Акафист мученикам Александру Воину и Антонине Римским

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избрании из пределов римских, святии мученицы, за Господа Иисуса Христа много пострадавшии, воспоминающе о благоявлении святаго исповедания вашего, мы умиленно Бога хвалим: Аллилуйя.

Икос 1

Ангела Господь послал есть, во укрепление лествицы спасения, предвидя велие рачение ваше. Вы же Христа исповедующе, живот вечный обрели есте. О вашем спасении радующеся, отверзше сердечная уста, преоруженно глаголем:

Радуйтеся, исповедницы славнии.

Радуйтеся, Бога сосуды избраннии.

Радуйтеся, дивнии мученицы.

Радуйтеся, Духа Божия ученицы.

Радуйтеся, во Христе духовнии сродницы.

Радуйтеся, друг друга чуднии заступницы.

Радуйтеся, живот бренный за Господа отдавшии.

Радуйтеся, в животе вечнем с Богом возсиявшии.

Радуйтеся, Александре и Антонино, дивнии святии мученицы.

Кондак 2

Видяще неколебимое стояние ваше в вере Христовою и ея проповедание подвигом пламенным, Ангели Божии цветуще стройне взывают: Аллилуйя.

Икос 2

Разум духовный стяжавше, безумных, непреподобных обличили есте, Истиннаго Бога прославили есте, идолов бесовских посрамивше. Каменю твердыни вашей о Бозе дивимся, крепость духовную смиренно воспеваем:

Радуйтеся, спасение испросившии.

Радуйтеся, диавола Силою Божию победившии.

Радуйтеся, безумие языков обличившии.

Радуйтеся, венцы небеснии получившии.

Радуйтеся, избранницы святии.

Радуйтеся, мученицы блазии.

Радуйтеся, Православия поборницы.

Радуйтеся, исповедания светильницы.

Радуйтеся, Александре и Антонино, дивнии святии мученицы.

Кондак 3

Силою Божия благодати неуклонно Христа исповедали есте, мучения лютии терпевше, Богом укрепляемии, духом горевше, победу над смертию одержали есте, и ныне в Обителех Горних воспеваете: Аллилуйя.

Икос 3

Имущи в сердце Господа Иисуса Христа, Антонино дево, издетска благочестие сохранившая, нечестиваго Фиста, диаволеслужителя, ты не убоялася еси. Лщения бесовския отвергающи, Господа полным сердцем исповедала еси, с любовию о Нем возвещающи. Исповеданию твоему, цветоче целомудрия, дивимся и словесам твоим паки радуемся:

Радуйся, веры Христовыя ревнительнице.

Радуйся, идолов диаволских разрушительнице.

Радуйся, молитвы денныя и нощныя кадильнице.

Радуйся, чистоты духовныя хранительнице.

Радуйся, дево благочестивая.

Радуйся, нечестие победившая.

Радуйся, твердости духа учительнице.

Радуйся, Духа Святаго носительнице.

Радуйтеся, Александре и Антонино, дивнии святии мученицы.

Кондак 4

Бурю безумия диаволскаго вы сокрушили есте, ко Господу неустанно взываше. Силу неодолимую обрели есте, с любовию огненною Христом укрепляемии. Дивен Господь во святих Своих: Аллилуйя.

Икос 4

Слышаще глас ангельский, доблести честная похвало, воине святый Александре, Господа всею душею прием, неусомненно пошел еси ты по стези исповедания. Ведаяй Христос доброту души твоея, избрал есть тебя на служение, с верою Господне благословение до конца ты исполнил еси, сподобив нас глаголати таковая:

Радуйся, воине смиренный.

Радуйся, во Христе укрепленный.

Радуйся, Ангела на земли собеседниче.

Радуйся, стойкости духовныя в подвизе своем проповедниче.

Радуйся, глаголов ангельских исполнителю.

Радуйся, послушания смиренный учителю.

Радуйся, целомудрия ограждение.

Радуйся, Церкви Святыя украшение.

Радуйтеся, Александре и Антонино, дивнии святии мученицы.

Кондак 5

Боготечною звездою подвиг ваш в земли римской просиял есть, Господу Иисусу Христу в прославление, демонству языков в посрамление. Зряще красоту победы сия, Бога ублажаем: Аллилуйя.

Икос 5

Видевый Фист, игемон неистовый, чистоту твою, Антонино, на поругание людем своим предал тя в злобе бесовстей, но Господь сохранил есть девство твое, диавола отвратив, душу невинную в руцы прием, ю принесл есть в Чертози Блаженнии. Сему чуду мы, из сердца радующеся, устнами песенне возглаголем:

Радуйся, небесная послушнице.

Радуйся, Христа Бога нашего слушательнице.

Радуйся, Евангелия исполнительнице.

Радуйся, Господа Иисуса Христа на земли зрительнице.

Радуйся, мучения крепко претерпевшая.

Радуйся, Христу при оных певшая.

Радуйся, Христом направляемая на спасение.

Радуйся, светильнице терпения.

Радуйтеся, Александре и Антонино, дивнии святии мученицы.

Кондак 6

Проповедницы Христовы, мучений не убоясте, веру истинную исповедали есте, в сердце непрестанно глаголюще: Алиллуиа.

Икос 6

Возсиял еси воин Христов, бремя идолов низложив, Ангелем званый, небесных речений вкусивый, очи с предвыспренней на Небеси устремил еси, мучений жестоковыйных не чуя. Влекомый Божию благодатию, молчанием загради уста своя, душею молитву преискренне воспевая. Спасению твоему, мучениче святый Александре, о Бозе радуемся и хвально поем тебе сицевая:

Радуйся, светлый воине земный.

Радуйся, святый воине небесный.

Радуйся, веры истинныя приятелю.

Радуйся, спасения достойный получателю.

Радуйся, христианом защитниче.

Радуйся, неустанный на Небесех молитвенниче.

Радуйся, неправды обличителю. Радуйся, правоверных попечителю.

Радуйтеся, Александре и Антонино, дивнии святии мученицы.

Кондак 7

Восхотел еси, Господи, праведных спасти, души юныя к Себе призвал еси, рабем Своим урок исповедания православныя веры являяй. Мученицы младии веру Христову не поругаша, бреннаго тела не пожалевше, на земли отверзли суть Раиския двери, дабы Господу непрестанно пети: Алиллуиа.

Икос 7

Новая имена возвел еси, Господи, на Небеси святих мучеников Александра и Антонины, на заре православней за Тя премного пострадавших, в болезнех тяжких убиенных, но Тобою навечно в Небеснем Царствии спасенных. О сем сквозе многая веки ныне воспеваем таковая:

Радуйтеся, страдания терпевшии.

Радуйтеся в них ко Христу горевшии.

Радуйтеся, юности не пожалевшии.

Радуйтеся, идолов лукавых одолевшии.

Радуйтеся, вернии Христовы Агнцы.

Радуйтеся, стяжавшии небеснии венцы.

Радуйтеся, христианом верным утешение.

Радуйтеся, Православия утверждение.

Радуйтеся, Александре и Антонино, дивнии святии мученицы.

Кондак 8

Странное чудо явил еси, Господи, вещая гласом Своим, на подвизи мучеников укрепляяй, и Сам на землю снизшел еси, пред святей Антониной девой предста, ея же на спасение с любовию благославляяй. Слава Тебе, Иисусе Премилостивый: Аллилуйя.

Икос 8

Вси Безплотныя Силы с замиранием созерцают глубину подвига вашего, егда приясте вы мучения тяжкия: руцы ваши ссекоми быша безумцы нечестивыми, невинная телеса огнем жегоми неистовым, во свидетельство Истины Христовыя, благодатию души ваши неизреченною Небесною прохладою внутрьуду палившею, пытки огненныя охладившею, боль телесную обратившею в духовное здравие. Сему чуду мы умиленно дивимся и радостно воспеваем:

Радуйтеся, мучений не убоявшии.

Радуйтеся, за веру с любовию пострадавшии.

Радуйтеся, благодатию Божией палимии.

Радуйтеся, Духом Божиим хранимии.

Радуйтеся, телес младих не пожалевшии.

Радуйтеся, Христа на земли духом зревшии.

Радуйтеся, Христом в подвизе соединеннии.

Радуйтеся, в единстве сем спасеннии.

Радуйтеся, Александре и Антонино, дивнии святии мученицы.

Кондак 9

Всякая мучения претерпевше, от Господа Иисуса Христа не отреклися есте, Ангели Божии свидетелми твердости духа вашего быша. Мы же, грехом пораженнии, о подвизе вашем воспоминающе, к Богу нашему всехвально взываем: Аллилуйя.

Икос 9

Ветии многовещании, яко рыбы безгласныя умрут в оскудении словеснем, не имуще глаголов велиих, дабы красоту спасения вашего описати. И мы, токмо крупицу нищия разумеюще, смиренно с велицею радостию глаголем сицевая:

Радуйтеся, подвижницы неизреченнии.

Радуйтеся, диаволом не уязвленнии.

Радуйтеся, плоть бренную поборовшии.

Радуйтеся, в благодати Божией возросшии.

Радуйтеся, страстей телесных усмирители.

Радуйтеся, диавола злаго победители.

Радуйтеся, молитвы неустанное пение.

Радуйтеся, мучеников святых украшение.

Радуйтеся, Александре и Антонино, дивнии святии мученицы.

Кондак 10

Спасти хотяще души своя, на мучения отдасте чресла свои, с верою страдания претерпевше, на лоно Авраамле победно введени быша. И наши души христианския сами спасаете ныне, к Богу одесную припадающе и ангельски вопиюще Ему: Аллилуйя.

Икос 10

Стена есть святая молитва ваша, христианом в волнах мiрских обуреваемым, и повдиг ваш блазий – пример веры истинныя. Во исповедании Христовом нас укрепите, Господа Иисуса Христа умолите о спасении нас, грешных, пред вами с надеждою предстоящих и сокрушенно хвалящих святое заступление ваше:

Радуйтеся, молитвенницы неугасимии.

Радуйтеся, заступницы, неустрашимии.

Радуйтеся, веры истинныя стяжатели.

Радуйтеся, правил крепости духовныя показатели.

Радуйтеся, Христом на Небесех пасомии.

Радуйтеся, на земли пастыри незримии.

Радуйтеся, сподвижницы чудеснии.

Радуйтеся, помощницы небеснии.

Радуйтеся, Алекснадре и Антонино, дивнии святии мученицы.

Кондак 11

Песнь духовную о вашей победе возносим, яко вы во мраце идолском не утопасте, Свет Превечный прияли есте, Ему же словеса благодарения воспевающе: Аллилуйя.

Икос 11

Светозарная свеще вы есте на пути спасения нам, слепым в мире сем, во гресех пребывающим, но на милосердие Божие уповающим и с победою в гласе своем возвещающим о спасении вашем:

Радуйтеся, наши духовнии покровители.

Радуйтеся, душ смиренных благоукрасители.

Радуйтеся, звезды духовнии яркии.

Радуйтеся, молитвенницы жаркии.

Радуйтеся, со Ангели купно воспеватели.

Радуйтеся, припадающим к вам спасению научатели.

Радуйтеся, Господа Иисуса Христа благовестители.

Радуйтеся, спасения нашего неусыпные просители.

Радуйтеся, Александре и Антонино, дивнии святии мученицы.

Кондак 12

Благодать заступничество ваше незримо дарует, яко вы внемлите просящим спасения и непрестанно Богу о рабех Его молите. Помолитеся и о нас, грешных, чрез образа ваши, на вас смиренно взирающих и слезно Богу вопиющих: Аллилуйя.

Икос 12

Поюще страдание ваше, Силою Духа наполняемся, видяще победу вашу, устнами радостно изливаемся. Яко мед сладкий, слава ваша в молитве течет и глаголы цветочные преискренне дарует:

Радуйтеся, любве безбрежный океане.

Радуйтеся, бесовом лютым изгнание.

Радуйтеся, страждущим утешение.

Радуйтеся, плачущим смирение.

Радуйтеся, алчущих накормители.

Радуйтеся, жаждущих напоители. Радуйтеся, малодушных укрепление.

Радуйтеся, немощных защищение.

Радуйтеся, Александре и Антонино, дивнии святии мученицы.

Кондак 13

О святии исповедницы Христовы Александре и Антонино, не оставите нас, грешных, в бедах и скорбех житейских сущих, но молитвами своими нас от сетей диаволских оградите, подвигом своим очи наши духовнии просветите, и на путь неблазнненаго и крепкаго исповедания веры православныя, нас грешных, наставите. Мы же о вас Господа нашего Иисуса Христа, от нищеты духовныя, богатно славим: Аллилуйя.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О святии мученицы Христовы, Александре и Антонино, не оставите нас во спасении нашем, в вере Христовой нас укрепите, Евангелию святому научите, на дела правыя наставите. Исповедание Христа Бога нашего животом нашим соделайте, не позволите врагом диаволским свернуть нас с твердыни веры истинныя, лщения бесовския обличайте, по пути спасения нас, грешных, направите. Помолитеся за Церковь русскую, от лжеучений темных ю оградите, святых русских исповедников во спасение стада Христова явите. Монахов, пастырей, мирских единым духом соборным, во исповедании веры истинныя, соедините. Непрестанно о нас грешных, немощных, малодушных у Господа милости просите, Ему же и славу возсылаем со Отцем и Святым Духом во веки веков. Аминь.

Молитва мученикам Александру и Антонине Римским

Святии мученицы Александре и Антонино! Призрите с небеснаго чертога на требующих вашей помощи и не отвергните прошений наших; но яко приснии благодетели и ходатаи наши, молите Христа Бога, да человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззакониям нашим, и да не во зло обратим благая, даруемая нам от всещедраго Бога, но во славу святаго имени Его и в прославление крепкаго вашего заступления. Да молитвами вашими даст нам Господь мир помыслов, воздержание от пагубных страстей и от всякия скверны; и да укрепит во всем мире Свою едину Святую, Соборную и Апостольскую Церковь, юже стяжал есть честною Своею кровию. Молитеся прилежно, святии мученицы, да утвердит Христос Бог во Святей Своей Православной Церкви живый дух правыя веры и благочестия; да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей; да мы вси в мире и благочестии поживем в настоящем веце и достигнем блаженныя вечныя жизни на небеси, благодатию Господа нашего Иисуса Христа, Емуже подобает всякая слава, честь и держава со Отцем и Святым Духом, ныне и присно и во веки веков. Аминь.