Акафист святителю Иоанну, митрополиту Тобольскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Возбра́нный чудотво́рче и прему́дрый па́стырю, свети́льниче Бо́жий, осия́вый страны Сиби́рския. Восхваля́ем Тя любо́вию о чудесе́х Твои́х ра́дующеся. Ты же предстоя́й невече́рней сла́ве Царя́ Небе́снаго, моли́ от вся́ких бед сохрани́тися пою́щим Ти:

Радуйся, святи́телю о́тче наш Иоа́нне, Сиби́рский чудотво́рче.

Икос 1

А́нгельски возже́гл еси́ свяще́нный пла́мень ве́ры в Зижди́теля Прему́драго, возлюби́л еси́ ма́лых сих, и́хже Бо́г Сло́во бра́тиею Свое́ю нарица́ет, те́мже и А́нгелы удиви́л еси́ пресла́вным житие́м Твоим. Мы же покланя́яся Ти, Святы́й о́тче взыва́ем:

Радуйся, тве́рдый ка́меню ве́ры православныя.

Радуйся, све́точе любве́ христиа́нския.

Радуйся, пра́вды Христо́вой служи́телю.

Радуйся, и́стины Бо́жия носи́телю.

Радуйся, просла́вивый Отца́ Небе́снаго до́брыми де́лы Твои́ми.

Радуйся, во сла́ве Бо́жией ца́рствуяй со все́ми Святы́ми.

Радуйся, любо́вию Твое́ю объе́мляй стра́ждущия.

Радуйся, моли́твою Твое́ю спаса́яй погиба́ющия.

Радуйся, святи́телю о́тче наш Иоа́нне, Сиби́рский чудотво́рче.

Кондак 2

Ви́дя жите́йское мо́ре воздвиза́емое бу́рею напа́стей, к ти́хому приста́нищу оби́тели Пече́рския прите́кл еси́ крестолю́бче и отре́кшися тле́ннаго ми́ра, Ве́чному Бо́гу воспе́л еси́: Аллилу́иа.

Икос 2

Ра́зум чи́ст от Бо́га Тебе́ дарова́ся о́тче Иоа́нне, и Ты я́ко ве́рный раб, де́лавый и труди́выйся, умно́жил еси́ благода́ти тала́нт; те́мже призва́ Тя Госпо́дь в ра́дость ве́чную. Мы же пое́м Ти Богому́дре:

Радуйся, чистоту́ ума́ Твоего́ сохрани́вый.

Радуйся, бде́нием и поще́нием стра́сти плотски́я умертви́вый.

Радуйся, лука́ваго смире́нием победи́вый.

Радуйся, нетле́нное бога́тство получи́вый.

Радуйся, се́рдце вели́кое в терпе́нии име́вый.

Радуйся, о́рле, воспари́вый к не́бу умозре́нием.

Радуйся, стра́нниче пути́ кре́стнаго.

Радуйся, насле́дниче Ца́рствия Небе́снаго.

Радуйся, святи́телю о́тче наш Иоа́нне, Сиби́рский чудотво́рче.

Кондак 3

Си́лою Креста́ неустраши́мо боро́лся еси́, преподо́бне Иоа́нне, противу кня́зя ми́ра сего́, воинствуя за Це́рковь и водружа́я зна́мение побе́ды Христо́вой с пе́снею: Аллилу́иа.

Икос 3

Име́я неоску́дное милосе́рдие ко вся́кому челове́ку, о́тче Иоа́нне, яви́лся еси́ скорбя́щим утеше́ние, заблу́дшим вразумле́ние, оби́димым заступле́ние, о си́рых и вдови́цах неусы́пное попече́ние и всем помо́щник во спасе́нии; благодари́м о Тебе́ Бо́га, ди́внаго во Святы́х Свои́х и Тебе́ прино́сим пе́ние сие́:

Радуйся, во́лю Твою́, во́ле Бо́жией сочета́вый.

Радуйся, ве́рою благода́ть позна́вый.

Радуйся, благода́тию доброде́тели стяжа́вый.

Радуйся, всего́ Себе́ ни́щим отда́вый.

Радуйся, в ми́лости неизме́нный.

Радуйся, врачу́ безме́здный.

Радуйся, немощны́м, я́ко Себе́ послужи́вый.

Радуйся, и́стинно Христу́ угоди́вый.

Радуйся, святи́телю о́тче наш Иоа́нне, Сиби́рский чудотво́рче.

Кондак 4

Бу́рю за́висти воздви́же лука́вый в се́рдце рабо́в самолю́бия и научи́ гордых клевета́ти на Тя пред Цари́, да погуби́т де́ло Твое́ побо́рниче благоче́стия; Бог же изведе́ пра́вду Твою́, я́ко све́т, и спасе́ Тя во смире́нии пою́ща Христу́: Аллилу́иа.

Икос 4

Слы́ша стена́ния бе́дствующих во дни гла́да, призва́л еси́ духо́вная ча́да Твоя с Тобо́ю хлеб насу́щный раздова́ти тре́бующим, до́брый и бо́дрый па́стырю; ду́ши челове́ческия от гла́да и ве́чныя сме́рти спаса́яй, те́мже в честь и сла́ву приими́ пе́ние сие́:

Радуйся, хле́бом небе́сным насыще́нный.

Радуйся, питие́м безсме́ртия напое́нный.

Радуйся, Бо́га Сло́ва учени́к неизме́нный.

Радуйся, Ду́хом Святы́м осене́нный.

Радуйся, Отцу́ Небе́сному всыновле́нный.

Радуйся, Пресвяты́я Тро́ицы хра́ме одушевле́нный.

Радуйся, от бед и скорбе́й избавле́ние.

Радуйся, лука́вых серде́ц исправле́ние.

Радуйся, святи́телю о́тче наш Иоа́нне, Сиби́рский чудотво́рче.

Кондак 5

Богоразу́мия звездо́, возсия́л еси́ во тьме́ неве́дения, отче Иоа́нне, луча́ми Евангельскаго уче́ния проника́я в сердца́ челове́ческия и подвиза́я всех воспева́ти Со́лнцу пра́вды Христу́: Аллилу́иа.

Икос 5

Ви́дя мрак неве́дения покрыва́яй челове́ки, бога́тство уче́ния Христо́ва расточи́л еси́ ще́дро; и неуста́нно труди́лся еси́, о́тче Иоа́нне, почерпа́я си́лу в моли́тве от исто́чника прему́дрости. Сего́ ра́ди почита́ем Твою́ светоно́сную па́мять, взыва́юще:

Радуйся, украше́нный седино́ю любому́дрия.

Радуйся, позлаще́нный доброде́телию смиренному́дрия.

Радуйся, Богодухнове́нный учи́телю.

Радуйся, духо́внаго просвеще́ния покрови́телю.

Радуйся, яснотеку́щая струя́ Богове́дения.

Радуйся, и́стиннаго Све́та пропове́дание.

Радуйся, я́ко о́троки умудря́еши.

Радуйся, я́ко младе́нцам ра́зум открыва́еши.

Радуйся, святи́телю о́тче наш Иоа́нне, Сиби́рский чудотво́рче.

Кондак 6

Пропове́дник сла́вы Бо́жией де́лом и сло́вом был еси́, о́тче Иоа́нне, те́мже Тя избра́ прее́мника Себе́ святи́тель Феодо́сий, с Ним же во Ца́рствии Небе́снем пое́ши: Аллилу́иа.

Икос 6

Возсия́л еси́ в дому Бо́жии, свети́льниче Христо́в Иоа́нне, егда́ избра́ша Тя ве́рнии во архиере́я, по блаже́нней кончи́не Свята́го Феодо́сия. Его же па́ству ве́рно упа́сл еси́, пою́щу Тебе́:

Радуйся, я́ко оде́я Тя прему́дрость безле́тная.

Радуйся, я́ко украси́ Тя красота́ пресве́тлая.

Радуйся, в ри́зу спасе́ния облече́нный.

Радуйся, влады́ко смире́нный.

Радуйся, венце́м сла́вы венча́нный.

Радуйся, па́стырю избра́нный.

Радуйся, о́вцы Твоя́ сохрани́вый.

Радуйся, по́двиг любве́ соверши́вый.

Радуйся, святи́телю о́тче наш Иоа́нне, Сиби́рский чудотво́рче.

Кондак 7

Хотя́ получи́ти небе́сную сла́ву, блаже́нне Иоа́нне, написа́л еси́ кни́ги, в них же науча́еши ве́рныя упова́ти на Бо́га и в ско́рби пе́ти Ему́: Аллилу́иа.

Икос 7

Но́вый чудотво́рец святи́тель Феодо́сий боля́щу Ти, о́тче Иоа́нне, яви́ся и повеле́ Тебе́ совершати литурги́ю. Ты же абие востал еси́ от одра́ боле́зни здра́в и вознесл еси́ благодаре́ние Христу, о сем ра́дуяся пое́ми Ти:

Радуйся, таи́нниче моли́твенныя сла́дости.

Радуйся, храни́телю благода́тныя ра́дости.

Радуйся, в ско́рби и боле́зни Небе́снаго Врача́ призва́вый.

Радуйся, по ве́ре Твое́й исцеле́ние прия́вый.

Радуйся, благоуха́ния цве́те возрасты́й в безсме́ртие.

Радуйся, я́ко высото́ю жития́ Твоего́ посрами́ся нече́стие.

Радуйся, я́ко призыва́ющим Тя помога́еши.

Радуйся, я́ко в со́ниях и виде́ниях ве́рныя посеща́еши.

Радуйся, святи́телю о́тче наш Иоа́нне, Сиби́рский чудотво́рче.

Кондак 8

Стра́нное чу́до ви́дим в Тебе́, Богоно́се Иоа́нне, Ты бо в ста́рости ю́ных испо́лненный сил послужи́ти Христу́ в Сиби́рь прише́л еси́, веща́ние же истины правосла́вия от Тебе́ изы́де до Кита́я, и но́вии лю́ди Бо́жии научи́шася пе́ти: Аллилу́иа.

Икос 8

Весь был еси́ в Бо́зе, Его́ же пропове́дал еси́ во стране́ изгна́ния, умножа́я стадо спасе́нных, те́мже Це́рковь велича́ет Тя пою́ще:

Радуйся, от и́дол ко Христу́ обраща́яй.

Радуйся, ико́нами Богоматери духо́вных Твои́х чад благословля́яй.

Радуйся, и́бо хла́дную Сибирь благода́тно согрева́еши.

Радуйся, и́бо но́щь скорбе́й отгоня́еши.

Радуйся, я́ко всем состра́ждеши.

Радуйся, я́ко пра́вилом жития́ Твоего́ всех назида́еши.

Радуйся, темни́ц посети́телю.

Радуйся, и́стинный Христо́в служи́телю.

Радуйся, святи́телю о́тче наш Иоа́нне, Сиби́рский чудотво́рче.

Кондак 9

Все Твое́ се́рдце отда́л еси́ во исполне́ние Ева́нгельския пра́вды, те́мже мно́гая до́брая дела́ соверши́л еси́, Боголюби́вый о́тче, в кра́ткое вре́мя служе́ния Твоего́ в Тобо́льске, та́йно благотворя́ и у́зники посе́щая во и́мя Иису́са Христа́, Ему́ же все́х призыва́еши пе́ти: Аллилу́иа.

Икос 9

Вити́йство челове́к не мо́жет сложи́ти досто́йную похвалу́ Святы́ни Твое́й, о́тче, я́ко Сам Бог просла́ви Тя чу́дною кончи́ною жития Твоего́, ю́же прови́дя, соверши́л еси́ литурги́ю и, послужи́в трапезе ни́щих в дому́ Твое́м, уедини́ся на моли́тву и та́ко отоше́л еси́ ко Го́споду, пред ико́ною Богома́тери склоня́ся; мы же исхо́дную пое́м Ти песнь во умиле́нии:

Радуйся, усну́вый пло́тию на земли́.

Радуйся, живы́й душе́ю на небеси́.

Радуйся, со Апо́столы Христу́ поклоня́яйся.

Радуйся, со му́ченики венчаяйся.

Радуйся, в собо́ре Святы́х оте́ц сия́ющий.

Радуйся, в ли́ке преподо́бных воспева́ющий.

Радуйся, ико́ну Богома́тери дарова́вый Тобо́льску во благослове́ние.

Радуйся, я́ко сия чудотво́рная ико́на на́ше огражде́ние.

Радуйся, святи́телю о́тче наш Иоа́нне, Сиби́рский чудотво́рче.

Кондак 10

Спасе́ние душа́м на́шим испроси́, отче Святы́й Иоа́нне, да возсия́ет пра́вда и мир посреде па́ствы Твоея и в Це́ркви вели́цей воспое́м Бо́гу: Аллилу́иа.

Икос 10

Стена́ еси́ бе́дным и сиро́тствующим, утеше́ние на́ше во дни ско́рби, исцеле́ние неду́гующим, просвеще́ние слепотству́ющим. Сего ра́ди, припадая ко Святы́не Твое́й, пое́м Ти:

Радуйся, и́бо де́ло земна́го Твоего́ жития продолжа́еши.

Радуйся, и́бо на стра́же спасе́ния на́шего пребыва́еши.

Радуйся, по́стниче и моли́твенниче злы́я ду́хи изгоня́яй.

Радуйся, де́вственниче, разсла́бленные укрепля́яй.

Радуйся, Бо́жий свети́льниче, зре́ние уясня́яй.

Радуйся, пропове́дниче ве́ры, слух исцеля́яй.

Радуйся, я́ко мно́зи припа́дают к Тебе освяща́емии.

Радуйся, яко издале́че мо́лятся Тебе спаса́емии.

Радуйся, святи́телю о́тче наш Иоа́нне, Сиби́рский чудотво́рче.

Кондак 11

Пе́ние сие́, я́ко дар смире́нный приими́ от нас, о́тче Иоа́нне, и соверше́нный дар любве́ нам испроси́, да у́зрим сла́ву Бо́жию и в небеса́х услы́шим: Аллилу́иа.

Икос 11

Светоза́рное со́лнце, возше́дшее во тьме грехо́вней зри́шися, о́тче преподо́бне, живы́й бо во ве́ки дарова́ Тебе власть и по сме́рти изгоня́ти де́монов и собира́ти ве́рных на моли́тву, те́мже две́сти лет притека́ху ко гро́бу Твоему́ лю́дие и завеща́ху ро́ду гряду́щему велича́ти Тя:

Радуйся, и́бо ту́чи неве́рия разгоня́еши.

Радуйся, и́бо мра́чныя ду́ши ве́рою озаря́еши.

Радуйся, и́бо наде́жду спасе́ния оживля́еши.

Радуйся, и́бо отча́янныя спаса́еши.

Радуйся, я́ко па́дшия ны возставля́еши.

Радуйся, я́ко уны́лыя воздвиза́еши.

Радуйся, и́бо вся́ку слезу́ бе́дствующих отъе́млеши.

Радуйся, и́бо сле́зы покая́ния исторга́еши.

Радуйся, святи́телю о́тче наш Иоа́нне, Сиби́рский чудотво́рче.

Кондак 12

Благода́ть исцеле́ния пролия́ся от Святы́х моще́й Твоих, о́тче Иоа́нне, и собра́шася от всех конце́в земли́ Росси́йския ча́да Твоя под се́нию матери Церквей Сиби́рских на ме́сто погребения Твоего́ и возопи́ша Бо́гу: Аллилу́иа.

Икос 12

Пою́ще ми́лостиваго Бо́га со све́том в душе́ и горя́щими свеща́ми в рука́х, срето́ша ве́рнии честны́я и многоцеле́бныя мо́щи Твоя́, преподо́бне Иоа́нне, архиереи же пронесо́ша их о́крест Софи́йския Це́ркви, тогда́ со слеза́ми умиле́ния ви́деша вси́, я́ко не́бо и земля́ сторжеству́ют с на́ми тре́петно взыва́я:

Радуйся, А́нгелом сожи́телю.

Радуйся, Го́рния Це́ркви служи́телю.

Радуйся, па́ствы Твоея покрови́телю.

Радуйся, и́бо пред Твое́ю чудною ико́ною Богома́тери па́ки возлежи́ши.

Радуйся, я́ко Первообра́зную лицезри́ши. Радкйся, я́ко Пресвяте́й Тро́ице предстои́ши.

Радуйся, принося́й о нас пред Бо́га кади́ло умилостивле́ния.

Радуйся, хода́таю на́шего спасе́ния.

Радуйся, святи́телю о́тче наш Иоа́нне, Сиби́рский чудотво́рче.

Кондак 13

О, вели́кий святи́телю Иоа́нне, приими́ моле́ние сие на́ше и, принося́ его́ ко престо́лу Всевы́шняго, испроси́ правосла́вней стране́ на́шей ми́ра и ве́ры утвержде́ния, лю́дем же ца́рствия Бо́жия и оправда́ния пред очи́ма стра́шного Судии пою́щим: Аллилу́иа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, па́стырю до́брый, святи́телю о́тче наш Иоа́нне, пра́ведный путь жития́ Твоего́ приведе́ Тя к ве́чному Со́лнцу пра́вды. Ты бо все́ю душе́ю взыска́л еси́ Бо́га, возлюби́л Его́ па́че се́й благовре́менной жи́зни. Мы же удали́хомся Бо́жия благосты́ни, ходя́ще по зло́й свое́й во́ле, возлюби́хом су́етная наслажде́ния, вознераде́хом о спасе́нии душ наших, затвори́хом се́рдце для слы́шания сло́ва Боже́ственнаго и отверго́хомся братолю́бия. О благостный святи́телю Иоа́нне! Не попусти́ нам поги́бнути в ти́не грехо́в на́ших, но вознеси́ о нас моле́ние ко Го́споду, да поми́лует нас и да́рует нам покая́ние, да не поглоти́т нас бе́здна лихои́мства, зло́бы и изме́ны, да умо́лкнет междуусо́бная бра́нь, да изба́вится земля́ на́ша гла́да и вся́каго гне́ва Бо́жия, да воцари́тся мир среди́ ми́ра земна́го. Услы́ши нас гре́шных, Свя́тче Бо́жий, яви́ нам чу́дное заступле́ние Твое́, посети́ нас си́рых, ни́щих, бе́дствующих и заблу́дших ове́ц Твоего́ ста́да: неду́ги на́ша исцели́, укрепи́ си́лы к терпели́вому несе́нию креста́ жи́зни, внемли́ стена́нию стра́ждущих, рыда́нию одино́ких, при́зри на слезы немощны́х и печа́льных. Мы боле́знуем душе́ю и изнемога́ем се́рдцем; моли́ся, побо́рниче и́стины, да возвратя́тся отпа́дшия в ло́но Церкви Христо́вой, да сла́вится и́мя Бо́жие в нас, да ца́рствует пра́вда и любо́вь в земли́ на́шей и мир Христа́ Бо́га на́шего да сподо́бимся прия́ти, ра́дость же о Го́споде да возсия́ет в сердца́х на́ших и благослови́м Пречестное и Великоле́пое И́мя Единосу́щныя и Неразде́льныя Тро́ицы Отца́ и Сы́на и Свята́го Ду́ха во ве́ки веко́в. Ами́нь.