Акафист блаженному Иоанну Устюжскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и предстателю наш у Святыя Троицы, Иоанне всеблаженне, похвальными песньми от любве душевныя ублажаем тя заступника и покровителя нашего. Ты же, яко имеяй дерзновение ко Господу, от всяких бед и напастей свободи нас, да зовем ти:

Радуйся, Иоанне, преславный чудотворче.

Икос 1

Ангели радовахуся житию твоему, святче Божий Иоанне: вся бо земная во уметы вменил еси, нищету же вольную от юности до гроба претерпевая, Христа ради юрод был еси. Темже ублажаем тя:

Радуйся, совершенный нестяжателю, едино точию рубище раздранное имевый о чреслех твоих.

Радуйся, постниче, во дни среды и пятка ничтоже вкушавый.

Радуйся, воине Христов, благодатию Его мир, плоть и диавола победивый.

Радуйся, молитвенниче, руце ко Господу о творящих неправду воздевавый.

Радуйся, святаго Прокопиа, Христа ради юродиваго, истинный подражателю.

Радуйся, святость жития твоего буйством юрода мудре сокрывавый.

Радуйся, Иоанне, преславный чудотворче.

Кондак 2

Видя суетою мира сего ослепленных, досаждающих и оскорбляющих тя неповинно, не гневался еси на гонителей и обидящих тя, блаженне Иоанне, но молился еси о таковых в сокрушении духа глаголя Богу: Аллилуиа.

Икос 2

Разум богопросвещен имея, преблаженне Иоанне, бегал еси славы человеческия: юродствуя же присно по стогнам града Устюга, многа досаждения и скорби претерпел еси Христа ради. Темже достоит ти звати:

Радуйся, самопроизвольный мучениче, биения, оплевания и поношения от неразумных человек претерпевый.

Радуйся, за оскорбителей и гонителей твоих непамятозлобивый милоственниче.

Радуйся, страсти плоти твоея гладом и жаждею умертвивый.

Радуйся, чистотою душевною и телесною благолепно преукрашенный.

Радуйся, нищетою обогативыйся.

Радуйся, нищету сию паче сокровищ всего мира возлюбивый.

Радуйся, Иоанне, преславный чудотворче.

Кондак 3

Сила Честнаго и Животворящаго Креста Господня росодательну пещь содела ти, якоже иногда ангел преподобным отроком, о Иоанне блаженне: оградився бо крестным знамением, возлегл еси на горящем углии в пещи соборныя Успенския церкве, всех подвизая вопити о сем Творцу чудес Богу: Аллилуиа.

Икос 3

Имый благое помышление о богоугодном житии твоем, Успенскаго собора иерей Григорий по вечернем богослужении утаися за дверию храма, да увесть, что твориши, един пребывая. Ты же, о Иоанне богоблаженне, сотворив молитву за глаголющих лесть и творящих неправду, оградився крестным знамением, возлегл еси в пещь на горящее углие. Егда же иерей, ужасом объят быв сицеваго ради видения, вниде, ты убо, абие исторгся из пещи, рекл еси: "Еже сам узрел еси, да никомуже поведаеши до кончины моея". Сего ради рцем вси:

Радуйся, силою Честнаго и Животворящаго Креста Господня на горящем углии без вреда сохраненный.

Радуйся, росою Духа Пресвятаго орошенный.

Радуйся, пламенем любве яже к Богу и ближнему пламень пещный устудивый.

Радуйся, теплый молитвенниче, при храме Богоматере по вся нощи приметатися изволивый.

Радуйся, христианских добродетелей под личиною безумия подвижниче.

Радуйся, буйством твоим премудрыя посрамивый.

Радуйся, Иоанне, преславный чудотворче.

Кондак 4

Бурею напастей присно волнуемое житейское море благодатию Божиею немокренно прошед, Блаженне Иоанне, достигл еси вечноблаженнаго пристанища, идеже несть болезнь, ни печаль, ни воздыхание. Тамо убо почивая со ангелы и всеми святыми, поеши Богу: Аллилуиа.

Икос 4

Слышащи болящая Мария, Устюжскаго наместника Феодора жена, яко имаши обилие благодати Божия, посла слугу своего, да просить молитв твоих о исцелении ея. Ты же, угодниче Божий Иоанне, аки в безумии возопил еси слузе: Здравствуй, добрый княже со княгинею. Обаче егда слуга возвратися в дом госпожи своея, узре ю исцелевшу от жестокаго недуга. Сего ради глаголем ти:

Радуйся, единем словом тяжкия недуги исцеливый.

Радуйся, болящую Марию и разслабленную Аполлинарию молитвою уврачевавый.

Радуйся, бесноватую Евфросинию от мучительства диавола избавивый.

Радуйся, яко и ныне молитв твоих беси зело трепещут.

Радуйся, града Устюга радосте неотъемлемая.

Радуйся, всех притекающих к тебе утешение пресладкое.

Радуйся, Иоанне, преславный чудотворче.

Кондак 5

Боготечней звезде подобен был еси, блаженне Иоанне: шествуя бо по стогнам града Устюга, восходил еси благодатию Божиею от силы в силу, и безумствуя пред человеки, божественныя премудрости исполнен был еси от Бога, непрестанно воспевая Тому единому: Аллилуиа.

Икос 5

Видя, яко в мире сем, во зле лежащем, несть житейския сладости печали непричастны, многоскорбное житие от юности восприял еси, блаженне Иоанне. Мы же грешнии, ублажающе терпение твое, зовем ти таковая:

Радуйся, ныне на небеси, занеже преплавая пучину житейскаго моря на земли плакал еси.

Радуйся, блаженне, многа бо мзда твоя на небеси.

Радуйся, сопричастниче небесных благ, ихже око не виде, и ухо не слыша, и на сердце человеку не взыдоша.

Радуйся, сонаследниче достояния, еже уготова Бог любящым Его.

Радуйся, града Устюга заступниче.

Радуйся, верою к тебе притекающих покровителю.

Радуйся, Иоанне, преславный чудотворче.

Кондак 6

Проповедание евангельское, еже не скрывати себе сокровища на земли, совершенно соблюдая, не стяжал еси ни злата, ни сребра, но точию едино рубище раздранное, в немже зиму и лето необувен пребывая воспевал еси Христу Богу: Аллилуиа.

Икос 6

Возсияй нам светом твоего благорозумия, блаженне Иоанне: безумствуя бо присно пред человеки, ты уразумел еси глубину божественныя премудрости, яко не мудрых мира сего, но буих о Христе избра Бог в жилище благодати Своея. Еяже обильно преисполнен сый, приими от нас сицевая:

Радуйся, от утешителя Духа Истины обрадованный.

Радуйся, на земли и на небеси прославленный.

Радуйся, узкими враты и тесным путем все житие шествовавый.

Радуйся, Царствия Божия усердный взыскателю.

Радуйся, нищеты самопроизвольныя образе.

Радуйся, смирения Христова подражателю.

Радуйся, Иоанне, преславный чудотворче.

Кондак 7

Хотя от взора человеча святое житие и дивныя подвиги твоя сокрыти, блаженне Иоанне, юродствовал еси пред человеки по вся дни, в нощи же пребывая в непрестанной молитве, из глубины души взывал еси о всем Богу: Аллилуиа.

Икос 7

Новаго и дивнаго жития явися первоначальник в земли Российстей блаженный Прокопий Христа ради юродивый, егоже истинный подражатель показался еси, блаженне Иоанне. Темже величаем тя:

Радуйся, добре уразумевый глагол Божий: кая польза человеку, аще мир весь приобрящет и отщетит душу свою.

Радуйся, сих ради словес Господних многоскорбное и многоплачевное житие восприемый.

Радуйся, радостию неотъемлемою во веки.

Радуйся, прославленный Богом и человеки.

Радуйся, духовными подвиги в тайне подвизавыйся.

Радуйся, Царствие Небесное сими стяжавый.

Радуйся, Иоанне, преславный чудотворче.

Кондак 8

Странно и чудно житие твое, Иоанне всехвальне: бегая бо по стогнам града Устюга, алчбу и жажду претерпевал еси, ничтоже от кого взимая, и тако юную плоть твою духу покоряя, всегда воспевал еси Триединому Богу: Аллилуиа.

Икос 8

Весь мир православный молитвенно призывает тя яко великаго угодника Христова, достоблаженне Иоанне, и сия зовет ти в похвалу:

Радуйся, обетований Христовых наследниче.

Радуйся, временною скорбию вечнаго утешения сподобивыйся.

Радуйся, алчбою и жаждою плоть твою духу покоривый.

Радуйся, ангелов и всех святых собеседниче.

Радуйся, о всем мире православном молитвенниче.

Радуйся, земли Российския теплый пред Богом заступниче.

Радуйся, Иоанне, преславный чудотворче.

Кондак 9

Всякаго греха бегал еси аки яда смертоносна, угодниче Христов Иоанне, и сего ради сподобился еси Царствия Христова. Темже молимтися, помяни и нас многогрешных, ко Святей Троице во умилении зовущих: Аллилуиа.

Икос 9

Витийство наше скудное не довлеет к похвале имене твоего, угодниче Христов Иоанне. Обаче молимтися, не отрини от любве душевныя зовущих ти таковая:

Радуйся, божественных даров носителю.

Радуйся, молящымся тебе скорый помощниче.

Радуйся, почитающым священную память твою вечных благ ходатаю.

Радуйся, скорбящих скорый утешителю.

Радуйся, добрый сеятелю благочестия.

Радуйся, обличителю всякаго нечестия.

Радуйся, Иоанне, преславный чудотворче.

Кондак 10

Спасая душу твою, блаженне Иоанне, не восхотел еси работати Богу и мамоне, но Единому Богу точию. Темже ныне яко верный раб Владыце своему предстоиши на Небесех, поя Ему хвалебную песнь: Аллилуиа.

Икос 10

Стена еси непоколебима, блаженне Иоанне, всем с верою прибегающым к молитвенному предстательству твоему. Темже припадающе молимтися яко имущему велие дерзновение у Христа Бога, молися о нас грешных, почитающих тя звании сими:

Радуйся, православных христиан твердое ограждение.

Радуйся, Святыя Церкве благолепное украшение.

Радуйся, многоскорбное твое течение благочестно скончавый.

Радуйся, по скончании онаго в пресветлых райских обителех вселивыйся.

Радуйся, все житие твое во угождение Богу посвятивый.

Радуйся, во плоти яко ангел безплотен поживый.

Радуйся, Иоанне, преславный чудотворче.

Кондак 11

Пение благодарственное Единосущней Троице от всея души возсылал еси, преподобне Иоанне, ведая кончину земнаго подвига твоего, еяже с радостию чая, благодарил еси Бога, зовый: Аллилуиа.

Икос 11

Светло сияющее лице твое, аки ангела Божия, и тело твое аки снег бело обретеся, егда преставился еси ко Господу, блаженне Иоанне: многоскорбнаго бо ради претруднаго подвига твоего, дарова ти Господь кончину христианскую. Еяже молитвами твоими сподоби и нас грешных, да зовем ти таковая:

Радуйся, в горний Сион Царя Небеснаго душею востекий.

Радуйся, яко тамо, предстоя Ему, о всех нас тепле ходатайствуеши.

Радуйся, во время нощнаго подвига течение твое скончавый.

Радуйся, христианскую кончину безболезненну, непостыдну и мирну от Господа восприемый.

Радуйся, глубокаго смирения стяжателю.

Радуйся, кротости и терпения Христова предивный подражателю.

Радуйся, Иоанне, преславный чудотворче.

Кондак 12

Благодать данную ти от Бога ведяще, благоговейно покланяемся святым мощем твоим, лобызаем святолепное изображение лика твоего, угодниче Божий Иоанне, и молимтися, не остави нас твоим молитвенным предстательством ко Христу Богу, Емуже благодарне поем: Аллилуиа.

Икос 12

Поюще твое житие, восхваляем мирную кончину твою, блаженне Иоанне, и молимтися, буди нам во всем ко благу скорый помощниче, зовущым ти таковая:

Радуйся, яко одежды греховныя совлеклся еси.

Радуйся, яко в ризу чистоты и непорочности облеклся еси.

Радуйся, града Устюга добрый и неусыпный блюстителю.

Радуйся, яко о всех с верою молящихся тебе присно ко Господу ходатайствуеши.

Радуйся, терпения и злострадания дивный образе.

Радуйся, всех добродетелей зерцало пресветлое.

Радуйся, Иоанне, преславный чудотворче.

Кондак 13

О всеблаженный святый праведный Иоанне! Приими сие малое хвалебное пение наше, и избави нас от всякаго злаго обстояния, от напрасныя смерти и вечныя муки, и сподоби нас твоим предстательством к Богу, да с тобою и всеми святыми поем Ему во веки: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва блаженному Иоанну Устюжскому

О святый блаженный Иоанне! Припадающе смиренно молимтися, приими наше малое моление, и умоли Всемилостиваго Господа Бога нашего, да пробавит милость Свою нам грешным и да дарует нам вся яже к животу и ко спасению благопотребная.

О угодниче Христов! Аще и зело недостойни есмы, обаче духом сокрушенным и сердцем смиренным паки припадающе молимтися: предстательством твоим ко Господу, благопоспеши; страждущую страну Российскую, Господь от лютых безбожник и власти их да свободит, и да возставит престол православных правителей; верных рабов Его, в скорби и печали день и нощь вопиющих к нему, многоболезный вопль да услышит и да изведет от погибели живот наш. Град твой Устюг и вся грады и веси Российския соблюди от всякаго зла и всякия напасти, губительства, глада, труса, потопа, огня, меча, нашествия иноплеменников и междоусобныя брани, от всякия болезни и от всякаго обстояния, да всегда поем и величаем Всесвятое и Великолепое имя Божие, и твое милостивое о нас предстательство во веки веков. Аминь.