Акафист преподобноисповеднику Ираклию Иссык-Кульскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Богом для монашеского служения в Туркестанском краю, похвальная восписуем ти, исповедниче Ираклие, Ты же, яко имея дерзновение ко Святей Троице, молися о всех нас, со умилением зовущих ти,

Радуйся, исповедниче Ираклие, схимонаше праведный.

Икос 1

Ангельскому житию подражая, подвизался еси на ниве духовной, и промыслом Божиим послан был еси для монашеского служения в Туркестанском краю, тем же явился еси истинный подвижник и украситель земли нашея, и тако со смиренным сердцем, умильно глаголем ти сицевая:

Радуйся, земли нашея просветителю.

Радуйся, богомудрый учителю.

Радуйся, столпе веры и благочестия.

Радуйся, обличителю нечестия.

Радуйся, увеселения мирские отвергнувый.

Радуйся, богатства земные возненавидевый.

Радуйся, Богу единому послуживый.

Радуйся, путь в Царство Небесное указавый.

Радуйся, исповедниче Ираклие, схимонаше праведный.

Кондак 2

Видя Господь труды твоя к достижению Небесного Царства, сподобил тя исповеднического пути, ты же со смирением приял и исполнил еси послушание, данное тебе, и тако прославил еси всещедраго Бога, вопия Ему: Аллилуиа.

Икос 2

Разумел еси Богомудре Ираклие, яко всякий образ мира сего суетен есть. И тако видевше разорение монастыря своего, не убоялся еси, и паки ушел в скит на горах подле града Верного, и подвизался еси там, мы же, дивящеся твоему житию, вопием ти таковая:

Радуйся, веры Христовой непобедимый исповедниче.

Радуйся, по разорении монастыря упование на Бога возложивый.

Радуйся, действенной христианской любви и упования проповедниче.

Радуйся, всякия испытания во спасение души понести готовый.

Радуйся, исповедников Божиих сопричастниче.

Радуйся, истину несый.

Радуйся, земли нашея похвало.

Радуйся, Богу и людям всего Себе послужити подвигнувый.

Радуйся, исповедниче Ираклие, схимонаше праведный.

Кондак 3

Силу свыше имел еси, и на путь истинныя веры наставлял еси, учил еси вся благочестно жити и в правой вере пребывати, и паки сим прославил Господа, вопия Ему: Аллилуиа.

Икос 3

Имел еси в себе, праведный отче, страх Господень, смирение и любовь, и при сих добродетелях посвятил еси себя молитве и трудам во благо Церкви, и в годину лютых гонений и нестроений в Церкви твердо стоял в православии, а ныне с лики исповедников Божиих предстоиши престолу Всех Царя, мы же радующеся о тебе, зовем ти сице:

Радуйся, сонаследниче праведного лика исповедников богославный.

Радуйся, сопричастниче веры Христовой.

Радуйся, житием своим пример нам подающий.

Радуйся, противоборче всякого греха.

Радуйся, стяжателю Божиего благоволения.

Радуйся, силою молитвы себя ограждавый.

Радуйся, исполнителю всякой правды.

Радуйся, исповедниче Ираклие, схимонаше праведный.

Кондак 4

Бурю искушений воздвигоша на тя врази, праведный Ираклие, ты же силою благодати Христовой, победил еси вся сопротивныя. Гонений и мучений не убоялся еси, и ныне с лики победивших мирскую суету прославляеши Бога, вопия Ему: Аллилуиа.

Икос 4

Пожил еси чистое житие, подобно Отцам Церкви Русской, и паки возсиял еси, столпе веры и утверждения, народ страждущий утешая и твердо веру Христову защищая, ныне же мы ублажаем тя, исповедниче дивный, и приносим ти хвалебную песнь сицевую:

Радуйся, плоть со страстьми и похотьми поправый.

Радуйся, житием своим суету мирскую обличивый.

Радуйся, всякое пристрастие от себе отгнавый.

Радуйся, житие свое с подвигом исповедничества связавый.

Радуйся, подвигов монашеских ревнителю.

Радуйся, чистоты усердный хранителю.

Радуйся, всего себе Христу всесовершенно предавый.

Радуйся, за веру Христову пострадавый.

Радуйся, исповедниче Ираклие, схимонаше праведный.

Кондак 5

Боготечною звездою протекл еси на земли, и в сиянии святости возшел еси на Небеса, и ныне подаеши всем обильные милости, исповедниче Ираклие, и тако ныне в славе вечной на Небесах пребываеши и воспеваеши Христу: Аллилуиа.

Икос 5

Видяще труды Твоя, праведный Ираклие, подвигоположник Христос сподобил тя облещися в священныя ризы схимы великой, и дарова тебе почерпати ангельскую благодать, сего ради воспеваем Ти сицевая:

Радуйся, всем сердцем своим Бога возлюбивый.

Радуйся, душею Ему послуживый.

Радуйся, в подвигах монашеских воин доблественный.

Радуйся, ангельскому житию подражателю дивный.

Радуйся, всего себя воле Божией предавый.

Радуйся, на Него надежду возложивый.

Радуйся, любви Евангельской сокровище.

Радуйся, Духа Святаго вместилище.

Радуйся, исповедниче Ираклие, схимонаше праведный.

Кондак 6

Исповедник Царствия Божия и православной веры явился еси, дивный Ираклие, и многия от адского пути обратил ко Христу Жизнодавцу, сего ради вопием Ему вси: Аллилуиа.

Икос 6

Возсиял еси яко свеща многосветлая земли Азиатской, терпением своим победил вся скверны мира сего, взирая на жизнь земную Жизнодавца, достигл еси Небесного Чертога, мы же восхваляюще тя, усердно вопием:

Радуйся, в подвигах Богу в мире поживый.

Радуйся, терпению Христову подражавый.

Радуйся, в житии своем вся ухищрения сатанины препобедивый.

Радуйся, яко в годину скорби твердо в вере стоявый.

Радуйся, во всем наставниче премудрый.

Радуйся, силу заповедей Христовых постигнувый.

Радуйся, в сердце своем Христа всегда имевый.

Радуйся, яко за сие от Христа венец получивый.

Радуйся, исповедниче Ираклие, схимонаше праведный.

Кондак 7

Хотя последовати Христу, подражал Ему всеусердно, прияв на себя иго Его, научился от Него кротости и смирению, и по сем обрел душе своей вечный покой, зовущей присно: Аллилуиа.

Икос 7

Дивный воин в духовной брани оказался еси, демонския погубил еси полки и ангельские достигл еси чины, мы же с трепетом вопием ти таковая:

Радуйся, образе Богу верного служения.

Радуйся, от тли греховной воскресение.

Радуйся, подражателю во смирении Христу.

Радуйся, учителю благочестивого поведения.

Радуйся, противоборниче гордости человеческой.

Радуйся, истинного послушания подвижниче.

Радуйся, хитростей века сего обличителю.

Радуйся, заблудших исправителю.

Радуйся, исповедниче Ираклие, схимонаше праведный.

Кондак 8

Странником и пришельцем в мире сем предстал еси, о часе кончины своея помышления имея всегда, монашескими трудами и постом Царство Небесное стяжал еси, и молитвы своя ко Господу возсылал еси, поя Ему: Аллилуиа.

Икос 8

Всего себя от юности на служение Христу посвятил еси, праведный отче Ираклие, блаженный конец приим, и по смерти венец от Бога приял еси за труды твоя, и ныне в блаженстве вечном прославляеши Троицу Святую, вси же чада твоя восписуют ти таковая:

Радуйся, злобы демонския не устрашивыйся.

Радуйся, ангелам падшим не послуживый.

Радуйся, веру свою во искушениях сохранивый.

Радуйся, власти безбожной не покоривыйся.

Радуйся, защитником твердым веры истинной явивыйся.

Радуйся, во всем житии твоем в вере православной бывый.

Радуйся, лжеверы обличителю.

Радуйся, исповеднический крест понесый.

Радуйся, исповедниче Ираклие, схимонаше праведный.

Кондак 9

Вся силы Небесныя радостно тя прияша, богомудре, подвиг земнаго жития прошел еси, и исповеднический путь совершил еси, и ныне со всеми святыми воспеваеши Христу Богу: Аллилуиа.

Икос 9

Витийства суемудрых, не ведущих Бога, обличил еси, и всю силу веры правыя показал еси, обличил языческое нечестие и покорил бесовския полки. Мы же дивящеся трудам твоим, умильно глаголем ти таковая:

Радуйся, в житии твоем Христу подражавый.

Радуйся, яко корни истинныя веры повсюду насаждавый.

Радуйся, яко многих приведый ко спасению.

Радуйся, обративый грешников к покаянию.

Радуйся, сеятелю христианских добродетелей.

Радуйся, любви и вере нас научивый.

Радуйся, в беззаконии нас обличивый.

Радуйся, всех помнящих тебя покрове.

Радуйся, исповедниче Ираклие, схимонаше праведный.

Кондак 10

Спасти хотя душу свою от мучений вечных, понесл еси на себе подвиг монашескаго жития, приял еси и крест исповедания веры в далеком от Святой Руси краю. Со смирением и тщанием исполняя сие, вопиял Богу: Аллилуиа.

Икос 10

Стеной и ограждением явился еси, молитвенником земли Киргизской показался еси всем, дивный Ираклие, верным в скорбех и нуждах быстрое поможение, от бед и напастей щит и ограждение, за твои великие милости к нам, неустанно зовем ти сице:

Радуйся, призывающим тя скорый помощниче.

Радуйся, чистоты духовной сокровище.

Радуйся, недугов целителю.

Радуйся, всея Церкви украсителю.

Радуйся, ангельский образ и чистоту душевную предызбравый.

Радуйся, принятием схимы себя всего Богу отдавый.

Радуйся, всю жизнь свою обетами иноческими украсивый.

Радуйся, во всем житии твоем Богу верно послуживый.

Радуйся, исповедниче Ираклие, схимонаше праведный.

Кондак 11

Пение приносим ти, великий Ираклие, от сердец наших к Тебе возносимое, и прибегаем к твоему предстательству, не презри моление наше, к Тебе возносимое, и пред иконой твоей чудной проливаем слезы покаяния, вопия: Аллилуиа.

Икос 11

Светлыми лучами подвигов твоих облистался еси, ныне сияеши во славе вечной, исповедниче дивный. Поминая скорое всем твое поможение, вопием Ти сице:

Радуйся, воине Христов, мирскую жизнь оставивый.

Радуйся, Богу в Троице Единому послуживый.

Радуйся, бесов одоление.

Радуйся, подающий многие исцеления.

Радуйся, обители Небесной удостоивыйся.

Радуйся, горней славы приобщивыйся.

Радуйся, зерцало добродетели.

Радуйся, угодниче Божий всехвальный.

Радуйся, исповедниче Ираклие, схимонаше праведный.

Кондак 12

Благодать Божию за труды своя унаследовал еси, и ныне помогаеши нам во всяких бедах и обстояниях, мы же благодарственно вопием ти: Аллилуиа.

Икос 12

Поем честные подвиги твоя, величаем равноангельное житие твое, восхваляем святую память твою, Ираклие дивне, и прославляюще Господа, вопием ти сицевая:

Радуйся, града нашего похвало и ограждение.

Радуйся, всем инокам полезное наставление.

Радуйся, добродетели в себе изобразивый.

Радуйся, исповеднический путь возлюбивый.

Радуйся, в жизни сей нам руководителю.

Радуйся, правды ревнителю.

Радуйся, фимиам благовонный.

Радуйся, пред престолом Божиим наш твердый предстателю.

Радуйся, исповедниче Ираклие, схимонаше праведный.

Кондак 13

О святый исповедниче, схимонаше Ираклие, от грешных сердец наших приими недостойную песнь сию, яко усердную жертву сердец, любящих и величающих святую память твою. Заступи нас молитвами твоими, огради град сей и храм сей от диавольских напастей, искушений антихристовых, яко да находящеся под твоим усердным заступлением, прославляем Бога, вопия Ему: Аллилуиа, Аллилуиа, Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобноисповеднику Ираклию Иссык-Кульскому

О преславный угодниче Христов, праведный исповедниче Ираклие! Призри милостивно на ны недостойные, погрязшие во грехах и беззакониях. Прибегаем к тебе с молитвою от сокрушенных сердец возносимою, просим тя о великих милостях для града нашего, об избавлении от враг и междоусобиц, лукавств антихриста, яко да храними тобою, прославим Отца и Сына и Святаго Духа, ныне и присно, и во веки веков. Аминь.