Акафист святому блаженному Андрею Симбирскому, Христа ради юродивому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1.

Избра́нный уго́дниче и Христа́ ра́ди юро́дивый, святы́й блаже́нный о́тче Андре́е, с ю́ных ле́т по́двиг отрече́ния от бла́г жите́йских избра́вший, хвале́бное ны́не прино́сим тебе́ пе́ние, чту́ще святу́ю па́мять твою́. Ты́ же я́ко име́яй ве́лие дерзнове́ние к милосе́рдному Го́споду, от вся́ких на́с бе́д и напа́стей свободи́, да зове́м ти́:

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Икос 1.

Равноа́нгельнаго жития́ сподо́бился еси́, блаже́нне Андре́е, и́бо по ра́нней сме́рти благочести́вых роди́телей твои́х отве́рг еси́ ми́ра су́етное служе́ние и вся́ его́ ло́жные красоты́. Того́ ра́ди услы́ши от на́с похвалы́, тебе́ приноси́мыя:

Ра́дуйся, до́браго ко́рени о́трасль благоче́стная;

Ра́дуйся, ча́до моли́твы роди́телей боголюби́вых.

Ра́дуйся, от рожде́ния твоего́ Бо́гом избра́нный;

Ра́дуйся, по́двиг юро́дства на себя́ от о́трочества прия́вый.

Ра́дуйся, се́мя Христо́ва уче́ния в се́рдце свое́м возрасти́вый;

Ра́дуйся, вся́ кра́сная ми́ра нивочто́же вмени́вый.

Ра́дуйся, в не́мощнем телеси́ си́лу ве́лию яви́вый;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 2.

Ви́дя престра́нное твое́ житие́, и́бо презре́в вся́кое о пло́ти сме́ртней попече́ние, в зно́й и сту́жу в ру́бище бы́л облаче́н, ве́рою те́плою и пла́менней ко Христу́ любо́вию согрева́емый, ве́рнии гра́да Симби́рска, ви́дя добро́ту и смире́ние твое́ и Ду́ха Свята́го стяжа́ние, воспе́ли Бо́гу: Аллилу́иа.

Икос 2.

Ра́зум, от Бо́га тебе́ да́нный, во мни́мом безу́мии сокры́л еси́, блаже́нне; в ви́димом те́ле поко́е ду́х сво́й возбужда́я, в безгла́сии свое́м положи́л еси́ хране́ние усто́м, но непреста́нно в се́рдце свое́м моли́твы о лю́дях гре́шных Го́споду приноси́л еси́. Мы́ же, дивя́ся таково́му житию́ твоему́, взыва́ем хвале́бно:

Ра́дуйся, тя́жкий кре́ст юро́дства Христа́ ра́ди прие́мый;

Ра́дуйся, мни́мым безу́мием сия́ние благода́ти сокры́вый.

Ра́дуйся, я́ко дитя́ неразу́мное пред людьми́ яви́лся;

Ра́дуйся, горды́ни пла́мень с ма́лых ле́т в себе́ угаси́вый.

Ра́дуйся, да́р прозорли́вости по́двигом моли́твы стяжа́вый;

Ра́дуйся, да́ром си́м стра́ждущим послужи́вый.

Ра́дуйся, все́м прося́щим по́мощи ско́рое вспоможе́ние;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 3.

Невозмо́жная от челове́к Го́сподом си́лою Ду́ха Свята́го соде́лается, и си́ла Бо́жия в не́мощех соверша́ется; немощны́й челове́к самоотверже́нием себе́ Христа́ ра́ди ве́чнаго врага́ попира́ет. Укрепи́, блаже́нне о́тче Андре́е, моли́твами твои́ми и на́с, в мяте́же су́етнаго жития́ сего́ изнемога́ющих, да сподо́бимся с тобо́ю в небе́сных черто́зех воспева́ти пе́снь: Аллилу́иа.

Икос 3.

Ве́дая, блаже́нне, я́ко в земно́м житии́ ты́ прови́дцем суде́б челове́ческих явле́н бы́л, цели́телем неду́г тя́жких мно́гих, ско́рбных уте́шителем, немощны́х укрепля́вшим, заблу́ждшим на пу́ть пра́вды наста́вником, и ны́не ве́рнии к по́мощи твое́й прибега́ют, воспева́юще тебе́ си́це:

Ра́дуйся, гряду́щая я́ко настоя́щая прови́девый;

Ра́дуйся, креста́ своего́ усе́рдный носи́телю.

Ра́дуйся, и́го Христо́во и бре́мя Его́ благоду́шно подъе́мый;

Ра́дуйся, да́р исцеле́ний от Бо́га прие́мый.

Ра́дуйся, ру́бищем па́че оде́жды златотка́нныя украси́выйся;

Ра́дуйся, возлюби́вший па́че одра́ мя́гкаго на земли́ поверже́ние.

Ра́дуйся, поноше́ния я́ко хвальбу́ прие́млющий;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 4.

Ви́дим тя́, блаже́нне Андре́е, но́вую светоза́рную звезду́, чу́дно возсия́вшую на тве́рди Це́ркви Росси́йстей, я́вльшуюся на́м в после́дния времена́ и су́щим в горды́ни и пре́лести ума́ своего́, показу́ющую высоту́ смире́ния и любве́, науча́я ве́рных пе́ти Бо́гу: Аллилу́иа.

Икос 4.

Ду́хом прови́дя преподо́бный Серафи́м Саро́вский ра́вное а́нгельскому ди́вное житие́ твое́, блаже́нне о́тче Андре́е, назва́ тя́ кре́пким предста́телем и моли́твенником гра́ду Симби́рску. Мы́ же, дивя́щеся таково́му о на́с недосто́йных и жестокосе́рдых смотре́нию Бо́жию, во умиле́нии зове́м такова́я:

Ра́дуйся, во́лжских преде́лов све́тлое украше́ние;

Ра́дуйся, гра́ду Симби́рску нело́жное похвале́ние.

Ра́дуйся, Ду́ха Свята́го чи́стое селе́ние;

Ра́дуйся, смире́нием и терпе́нием безпло́тным уподобле́ние.

Ра́дуйся, все́м по́мощи прося́щим ско́рое вспоможе́ние;

Ра́дуйся, свети́льниче Боже́ственнаго све́та.

Ра́дуйся, в смире́нии свое́м чу́дно возвы́шенный;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 5.

Боготе́чней звезде́ уподо́бился еси́, блаже́нне о́тче Андре́е, житие́м твои́м освяти́л еси́ преде́лы симби́рския, блиста́юще ве́лиим по́двигом себя́ отверже́нием. На́с же, погиба́ющих в бу́рях страсте́й мо́ря жите́йскаго, наставля́еши к ти́хой при́стани спасе́ния посо́бием моли́тв твои́х. Мы́ же, прославля́я Го́спода, просла́вльшаго тя́, вопие́м Ему́: Аллилу́иа.

Икос 5.

Сподо́бил тя́, блаже́нне о́тче, Госпо́дь челове́ком служи́ти и посла́л ти́ да́р целе́ния неду́гов пло́ти немощне́й; подава́л еси́ стра́ждущим хле́б и чрез него́ си́и от Милосе́рдаго Бо́га исцеле́ние прия́ли. Ны́не же в черто́зех небе́сных хле́б жи́зни ве́чныя вкуша́еши и мо́лиши за на́с, те́лом и душе́ю немощству́ющих, и к тебе́ в умиле́нии взыва́ющих:

Ра́дуйся, неду́гов тя́жких цели́телю;

Ра́дуйся, от поги́бели неча́янныя изба́вителю.

Ра́дуйся, в ро́дах тя́жких вспомо́щниче;

Ра́дуйся, лука́вых бесо́в посрами́телю.

Ра́дуйся, отча́явшихся наде́ждо;

Ра́дуйся, ча́д на́ших храни́телю.

Ра́дуйся, гне́в Бо́жий от на́с отвраща́ющий;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 6.

Пропове́дник и о́браз ева́нгельскаго жития́ бы́л еси́ в терпе́нии и кро́тости: Госпо́дь, ви́дя высоту́ смире́ния твоего́, блаже́нне Андре́е, дарова́ тебе́ да́р зре́ния та́йных и сокрове́нных. Да́ром си́м мно́гих от поги́бельнаго пути́ греха́ на стези́ покая́ния наста́вил еси́. Мы́ же ви́девши о тебе́ такова́я, Бо́гу пое́м: Аллилу́иа.

Икос 6.

Предви́дел еси́, блаже́нне, кончи́ну су́етнаго челове́ческаго жития́, и сохрани́ть ду́шу безсме́ртную у таковы́х челове́к жела́я, подава́л и́м о се́м ви́димый зна́к, пе́рсть земну́ю или́ щепу́ недоуме́нным в десни́цу влага́я. О се́м ве́дуще, и мы́ со смире́нием к тебе́ припа́даем, да умо́лиши Спа́са ду́ш на́ших христиа́нскую кончи́ну дарова́ти все́м ны́не вопию́щим ти́ такова́я:

Ра́дуйся, житие́м твои́м су́етность ми́ра сего́ обличи́вый;

Ра́дуйся, пло́ть свою́ со страстьми́ и похотьми́ попра́вый.

Ра́дуйся, вся́кое пристра́стие земно́е от себе́ отгна́вый;

Ра́дуйся, ми́р Христо́в в душе́ свое́й стяжа́вый.

Ра́дуйся, исто́чниче благода́ти оби́льный;

Ра́дуйся, защи́тниче на́ш пред Го́сподом си́льный.

Ра́дуйся, себе́ Бо́гу всеце́ло преда́вый;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 7.

Хотя́ще тебе́, блаже́нне Андре́е, от земна́го жития́ разреши́тися, приобщи́лся еси́ Честна́го Те́ла и Кро́ви Христа́ Бо́га на́шего, просвети́лся еси́ лице́м ра́достию небе́сною. Чту́щия тя́, сте́кшеся ко сме́ртному одру́ твоему́, ви́дяще ра́дость твою́ о Го́споде, то́ки умиле́нных сле́з пролива́ху, пою́ще к Бо́гу: Аллилу́иа.

Икос 7.

Но́вое зна́мение благоволе́ния Своего́ яви́ Госпо́дь к на́м, жестоковы́йным, то́нущим в горды́ни и самообольще́нии ума́ своего́: указа́ ме́сто погребе́ния и честны́я мо́щи твоя́, блаже́нне, досе́ле сокры́тыя. Но́ваго тя́ моли́твенника и предста́теля пред милосе́рдием Бо́жиим, тя́ стяжа́хом, благода́рно се́рдцем и усты́ вопие́м ти́:

Ра́дуйся, смире́нием высо́кая стяжа́вый;

Ра́дуйся, очеса́ своя́ всегда́ с упова́нием на Го́спода возводи́вый.

Ра́дуйся, ско́рый и безме́здный врачу́;

Ра́дуйся, во́ине Христо́в непобеди́мый.

Ра́дуйся, челове́че Бо́жий, смире́нием и терпе́нием, я́ко по́ясом златы́м препоя́санный;

Ра́дуйся, за незло́бие твое́ Го́сподом блаже́нством увенча́нный.

Ра́дуйся, засту́пником гра́да Симби́рска преподо́бным Серафи́мом нарече́нный;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 8.

Гре́х ра́ди и беззако́ний челове́ческих попуще́нием Бо́жиим бу́ря безу́мнаго безбо́жия разруши́ держа́ву Росси́йскую, Це́рковь же Бо́жию пости́же о́гненное искуше́ние. Ру́це нечести́вых оскверни́ша ме́сто упокое́ния твоего́, блаже́нне Андре́е, но Боже́ственным промышле́нием в после́дняя времена́ явле́но на́м ме́сто погребе́ния и честны́я мо́щи твоя́. Ве́рнии же, чудя́щеся сему́, ра́достно пою́т Бо́гу: Аллилу́иа.

Икос 8.

Име́я неисчерпа́емое бога́тство чистоты́ душе́вныя и смиренному́дрия, ве́ру несумне́нную и по́мысл чи́ст, юро́дствуя во Христе́, неле́ностно служи́л еси́ Го́сподеви все́м житие́м свои́м. Те́мже, я́ко звезда́ путево́дная све́тиши все́м в житии́ ко Христу́ иду́щим. Сего́ ра́ди высо́каго по́двига твоего́ вопие́м ти́ сицева́я:

Ра́дуйся, живы́й хра́м Боже́ственнаго терпе́ния;

Ра́дуйся, го́рдых се́рдцем облича́вый смире́нием.

Ра́дуйся, красото́ смиренному́дрия и воздержа́ния;

Ра́дуйся, о́бразе кро́тости и послуша́ния.

Ра́дуйся, ангелоподо́бный челове́че;

Ра́дуйся, безмо́лвниче ди́вный.

Ра́дуйся, та́йно в моли́тве от бе́д сохраня́ющий;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 9

Все́ житие́ твое́ порабо́тих за́поведем Христо́вым, я́ко ра́б благи́й, его́ же ди́вно Са́м Ца́рь Сла́вы просла́ви. Вся́кия ско́рби и тесноты́ претерпе́л еси́: зауше́ния, оплева́ния, поноше́ния и осмея́ния, ра́достно ше́ствуя у́зким путе́м жития́ твоего́, блаже́нне Андре́е. Сего́ ра́ди и Христо́с тя́ со блаже́нными всели́л еси́, с ни́ми же в ве́чном Его́ Ца́рствии пое́ши а́нгельскую пе́снь: Аллилу́иа.

Икос 9

Вити́йствующий язы́к и го́рдый у́м совопро́сников ве́ка сего́ не возмо́жет по достоя́нию уразуме́ти земно́е житие́ твое́, блаже́нне Андре́е, я́же соверши́л еси́, ше́ствуя ко Христу́. Кто́ бо дово́лен изрещи́ высоту́ по́двига юро́дства твоего́ и кто́ изочте́т самоотверже́ние и высоту́ ду́ха твоего́, небе́сный челове́че и земны́й а́нгеле. Мы́ же, смире́нием твои́м побежда́еми, зове́м ти́ такова́я:

Ра́дуйся, прибе́жище на́ше в земны́х ско́рбех;

Ра́дуйся, ско́рый помо́щниче в тя́жких обстоя́ниях.

Ра́дуйся, исто́чниче оби́льный благода́тию;

Ра́дуйся, заре́ пресве́тлая смире́ния, ду́ши гре́шных озаря́ющая.

Ра́дуйся, теплото́ любве́ боже́ственныя на́с согрева́ющая;

Ра́дуйся, звездо́, луча́ми свои́ми ду́ши го́рдых челове́к уро́ком смире́ния просвеща́ющая.

Ра́дуйся, си́лою Бо́жией, да́нной тебе́, беснова́тых исцеля́ющий;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 10.

Госпо́дь храни́т вся́ ко́сти пра́ведных, и ни еди́на от ни́х сокруши́тся. Ны́не ди́вно яви́шася на́м мо́щи твоя́, блаже́нне Андре́е, я́ко животво́рный исто́чник благода́ти, омыва́ющий скве́рную нечистоту́ ду́ш на́ших. Благода́ть бо излива́еши все́м, с моли́твою к тебе́ притека́ющим и пою́щим Бо́гу: Аллилу́иа.

Икос 10.

Стено́ю необори́мою яви́лся еси́ гра́ду Симби́рску и стране́ на́шей, кре́пкий засту́пник в беда́х и ско́рбех многомяте́жнаго сего́ жития́ живу́щим. Тебе́ у́бо мо́лим, блаже́нне Андре́е, укроти́ го́рдость ума́ на́шего и научи́ воспева́ти тебе́ си́це со смире́нием:

Ра́дуйся, пре́лести ми́ра нивочто́же вмени́вый;

Ра́дуйся, Христу́ Бо́гу все́м житие́м послужи́вый.

Ра́дуйся, блаже́нство ве́чное унасле́довавый;

Ра́дуйся, вся́кую го́рдость в себе́ уничижи́вый.

Ра́дуйся, грехо́вных ра́н ско́рое врачева́ние;

Ра́дуйся, ста́вших на пу́ть покая́ния до́брое поддержа́ние.

Ра́дуйся, страны́ на́шея чу́дное ра́дование;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 11.

Пе́ние на́ше моле́бное приими́, блаже́нне о́тче Андре́е, се́ бо ве́рою и любо́вию к тебе́ прибега́ем, преклоня́ем пред смире́нием твои́м коле́на жестоковы́йных серде́ц на́ших, и прославля́ем просла́вльшаго тя́ Го́спода, мо́лимся ти́: умири́ волну́ющееся мо́ре жития́ на́шего, укроти́ смуще́ние челове́ческия, да зове́м ди́вному во святы́х свои́х Бо́гу на́шему: Аллилу́иа.

Икос 11.

Новоявле́нную звезду́, путеводя́щую на́с по пути́ ко спасе́нию, ны́не возсия́вшую на тве́рди церко́вней, ви́дим тя́, блаже́нне Андре́е, и све́том по́двига твоего́ озаря́еми, тве́рдо ве́руем и упова́ем на предста́тельство твое́ пред Го́сподем за на́с недосто́йных и зове́м ти́ такова́я:

Ра́дуйся, сосу́де, Ду́ха Свята́го испо́лненный;

Ра́дуйся, дара́ми его́ просвеще́нный.

Ра́дуйся, кро́тости и смире́ния Христо́ва вмести́лище;

Ра́дуйся, младе́нческия чистоты́ и и́скренняго незло́бия храни́лище.

Ра́дуйся, я́ко и по преставле́нии твое́м в небе́сныя на́с не оставля́еши;

Ра́дуйся, я́ко милосе́рдие Бо́жие о гресе́х на́ших умоля́еши.

Ра́дуйся, все́м притека́ющим к тебе́ пред Бо́гом предста́телю;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 12.

Благода́ть прия́л еси́ от Го́спода, блаже́нне Андре́е, прови́дети духо́вныма очи́ма вся́к та́йный гре́х и сокрове́нный неду́г душе́вный в лю́дех: пода́ждь у́бо и на́м, грехми́ ослепле́нным, зре́ние темноты́ и недосто́инства своего́, да исцеле́ннии моли́твами твои́ми, чи́стым се́рдцем и усты́, ра́достно пое́м а́нгельскую пе́снь Бо́гу: Аллилу́иа.

Икос 12.

Воспева́ем твоя́ вели́кия по́двиги, блаже́нне Андре́е, почита́ем самоотверже́ние и юро́дство твое́ во Христе́, ублажа́ем твою́ святу́ю кончи́ну, сла́вим в немощне́м те́ле му́жество неизрече́нное и, в похвалу́ по́двига земна́го жития́ твоего́, вопие́м ти́ сицева́я:

Ра́дуйся, жесто́ким путе́м юро́дства ра́йских селе́ний дости́гший;

Ра́дуйся, нището́ю бога́тство ве́чное обре́тший.

Ра́дуйся, уничиже́нием позна́вый ми́р высоча́йший;

Ра́дуйся, поноше́нием от безу́мных, Христа́ ра́ди, ве́чную сла́ву с Ни́м стяжа́вый.

Ра́дуйся, чи́стым се́рдцем любо́вь Христо́ву позна́вый;

Ра́дуйся, омраче́нных ду́хом пре́лести и горды́ни смиря́тися помога́вый.

Ра́дуйся, ле́д зло́бы нераска́янных серде́ц любо́вию твое́ю растопи́вый;

Ра́дуйся, блаже́нне о́тче Андре́е, гра́да Симби́рска чу́дное похвало́ и заступле́ние.

Конда́к 13.

О,пресла́вный уго́дниче Христо́в, до́брый тайнови́дче ду́ш челове́ческих, святы́й блаже́нный о́тче Андре́е, кре́пкое на́ше заступле́ние пред милосе́рдием Бо́жиим! Приими́ от на́с, гре́шных и недосто́йных, сие́ ма́лое моле́ние на́ше от любве́ тебе́ приноси́мое, и твои́м предста́тельством умири́ на́ши бу́ри жите́йския, укроти́ горды́ню ума́ челове́ческаго, испра́ви на́ш стро́потный пу́ть греха́ и да́руй на́м да́р покая́ния соверше́ннаго, очи́сти от вся́кия нечистоты́, да вку́пе с тобо́ю вопие́м Спаси́телю на́шему и Го́споду а́нгельскую пе́снь: Аллилу́иа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва ко свято́му блаже́нному Андре́ю, Христа́ ра́ди юро́дивому, Симби́рскому чудотво́рцу.

О, смире́ннейший и ди́вный уго́дниче Христо́в, преблаже́нне о́тче Андре́е! Ты́ измла́да ми́р се́й ви́димый и привре́менный ни во что́ вмени́л еси́, и и́го неизрече́нныя любве́ Христо́вой на себя́ подъя́л, с ни́м же безро́потно ше́ствовал все́м житие́м твои́м, за́поведи Спаси́телевы исполня́я со тща́нием и смире́нием. Те́мже тя́ Госпо́дь Сла́вы просла́вил и сподо́бил зре́ти Све́т И́стины. Мы́ же гре́шнии, потемне́нными и го́рдыми оча́ми умо́в на́ших зря́ще лишь земна́я и су́етная ве́ка сего́ развраще́ннаго и поги́бельнаго, преклоня́я коле́на озло́бленных серде́ц на́ших пред высото́ю по́двига твоего́, смире́нно мо́лим тя́, блаже́нне Андре́е: моли́твами твои́ми свободи́ на́с от поро́чных земны́х по́мыслов и страсте́й, укроти́ зло́бствования и горды́ню в душа́х на́ших; неду́гующих душе́ю и пло́тию исцели́, скорбя́щим помози́, гре́шных на пу́ть спасе́ния наста́ви, бу́ди засту́пником усе́рдным во все́м житии́ на́шем, тя́ бо вели́каго хода́тая и моли́твенника за на́с, недосто́йных, Госпо́дь на́м посла́л. Е́й, ди́вный уго́дниче Бо́жий, исхода́тайствуй моли́твами твои́ми вся́, я́же ко спасе́нию на́м спосо́бствующая, гра́д се́й и страну́ на́шу от вся́каго искуше́ния и озлобле́ния по́мощию твое́ю сохрани́, да предста́тельством твои́м соблюда́еми, сла́вим ве́лие долготерпе́ние Бо́жие к на́м недосто́йным всегда́, ны́не, и при́сно, и во ве́ки веко́в. Ами́нь.