Акафист благоверному князю Довмонту (Тимофею) Псковскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Взбранный воеводо и дивный наш покровителю, святый благоверный княже Довмонте, благодарственное пение приносим, светло почитающи святую память твою, яко усердному почитателю Святыя Троицы, яко крепкому защитителю от враг видимых и невидимых, яко любящему нас отцу нашему. Ты же яко имеяй дерзновение ко Святей Троице молися о спасении нас тебе зовущих:

Радуйся, дивный наш покровителю, святый благоверный княже Довмонте.

Икос 1

Ангела своего хранителя от врагов видимых дарова Господь тя граду Пскову во дни жития твоего святаго, святый благоверный княже Довмонте. Тем же ангелом хранителем явился еси и по смерти своей, охраняя всех чтущих тя от врагов видимых и невидимых, от навета злых человек восстающих на нас. Сего ради приими от нас благодарственную песнь сию:

Радуйся небесный наш покровителю.

Радуйся, известный всех ищущих от тебе помощи и заступления крепкий защитителю.

Радуйся, града Пскова воеводо дивный.

Радуйся, храма Святыя Троицы сокровище многоценное.

Радуйся к сонму покровителей Отечества нашего сопричтенный.

Радуйся, защитниче наш и поныне преизрядный.

Радуйся, яко со всеми угодниками Божиими о нас недостойных молишися.

Радуйся, яко благая и полезная нам пред Господем ходатайствуеши.

Радуйся, дивный наш покровителю, святый благоверный княже Довмонте.

Кондак 2

Видяще тя людие града Пскова, святый благоверный княже Довмонте, от своих изгнаннаго и ими преследуемаго, во святый град их в сей напасти пришедшаго, прияша тя с любовию и не токмо жити устроиша, но и княжити над ними поставиша тя. Ты же блаженне, сие доброе дело радостно, яко дар от них приял еси, и до кончины жития своего не забыл еси, сторицею благостию за благость им воздавая, да поют вкупе с тобою Господу Богу благодарственную песнь: Аллилуиа.

Икос 2

Разум богопросвещенный дарова тебе Господь Бог, святый благоверный княже Довмонте, егда ты во град Псков жити пришел еси: язычник сый христианином добрым по приятии святаго крещения содеялся еси, любовию отеческою любя русския люди, сохраняя и соблюдая их в мире, да зовут тебе:

Радуйся, разумом богопросвещенным от Господа обогащенный.

Радуйся, храбростию и мужеством от Него наделенный.

Радуйся, мрак языческий без колебания оставивый.

Радуйся, свет веры христианския радостно восприявый.

Радуйся, во всем житии своем веру православную свято соблюдавый.

Радуйся, обеты крещения ничем же нарушивый.

Радуйся, яко родитель любомудрый Псковским людям бывый.

Радуйся, яко орел бодренный, аки от воронов хищных, от врагов их спасавый.

Радуйся, дивный наш покровителю, святый благоверный княже Довмонте.

Кондак 3

Силою свыше озаренный, святый благоверный княже Довмонте, по святом крещении новым человеком стал еси; благодать святаго крещения добрыми делами укрепляя и Господа Бога, яко родителя добраго, неленостно почитая, поя Ему во умилении: Аллилуиа.

Икос 3

Имуще людие града Пскова на совести своей слово, взятое от них святым благоверным князем Александром Невским, яко приимати в горе и от пленения пришедших, пришедшаго тя, святый княже Довмонте, прияша и княжити над собою поставиша. Мы же, видевше сие, приветствуем тя званиями сими:

Радуйся, град Псков, яко второе отечество себе стяжавый.

Радуйся, любовию с народом русским себе связавый.

Радуйся, мужества носитель неподражаемый.

Радуйся, добродетелей делатель неленностный.

Радуйся, мужеством своим, яко стеною Псковскую землю оградивый.

Радуйся, страх и трепет храбростию своею во врагах вселивый.

Радуйся, радование наше и упование.

Радуйся, прибежище наше и заступление.

Радуйся, дивный наш покровителю, святый благоверный княже Довмонте.

Кондак 4

Бурю гонений от злых сородичей твоих претерпел еси, святый княже Довмонте, и напасти от злых человек. От сих бед избави и нас, чад твоих, и твоими святыми молитвами всех нас беспечальных сотвори, да радующеся о тебе, яко о молитвеннике нашем неусыпном, воспоим Богу с тобою: Аллилуиа.

Икос 4

Добродетельное житие твое, храбрости исполненное, от отцев наших слышахом, святый благоверный княже Довмонте, милости твоя, изливаемыя на нас, грешных, видехом. Просим и молим тя: не остави нас в годину испытаний наших без защиты твоея, якоже древле отцев наших притекающих к тебе защищал еси, тако и нас сохрани. Да тебе, яко отцу нашему зовем тако:

Радуйся, бурю гонений и искушений претерпевый.

Радуйся, напасти от злых человек испытавый.

Радуйся, в новом отечестве твоем покой стяжавый.

Радуйся, добрым правлением мир в людех водворивый.

Радуйся, мужеством своим мир и покой граду Пскову даровавый.

Радуйся, славу Божию паче славы человеческия искавый,

Радуйся, величие Его пред очами всегда видевый.

Радуйся, вся добрыя дела своя, яко дары, к ногам Вседержителя приносивый.

Радуйся, дивный наш покровителю, святый благоверный княже Довмонте.

Кондак 5

Боготечною звездою восшел еси пред нами, святый благоверный княже Довмонте, на высоте добродетелей своих дивно сияя и образ добрый всем бывый. Тем же умы наша и очи к тебе, святче Божий, возводим и просим тя: подаждь нам, яко милость, дар добродетелей твоих, да поем вкупе с тобою Господу Богу песнь: Аллилуиа.

Икос 5

Видеша людие града Пскова добродетель твою, по святом крещении возсиявшую, и слышаша от святаго Писания о любви им речения, любовию святой к тебе объятии, вопияху тебе сицевая:

Радуйся, любовию объятый, страха смерти во уме своем не имевый.

Радуйся, сердца людские к милосердию возгревавый.

Радуйся, малочисленными ратями могучаго врага побеждавый.

Радуйся, крепким упованием яко стрелою враги уязвивый.

Радуйся, смиренною кротостию твоею гордыя враги со стыдом бежати заставивый.

Радуйся, долготерпением твоим вспять от себе врага отвращавый.

Радуйся, и по смерти любви своея к нам не оставляяй.

Радуйся, всегда нам милости своя изливаяй.

Радуйся, дивный наш покровителю, святый благоверный княже Довмонте.

Кондак 6

Проповедника и делателя любви Христовой к людем видим мы тя, святый благоверный княже Довмонте, понеже крепка она бысть в тебе, яко смерть. Вода многих лишений ратных не угаси ю, и реки бед многих никогда же потопление устроиша ея. Любовь твоя святая, серафимским пламенем возженная, озаряет и нас, и воздвизает пети Господу песнь: Аллилуиа.

Икос 6

Воссиявши пред нами, яко знамя победное, любовь твоя к людем, благоверный княже Довмонте. Всегда влекла она и влечет к тебе нас, святче Божий. Всегда воздвизала и воздвизает нас от сна греховнаго, и припасти к раце святых и многоцелебных мощей твоих наставляет, и научает молити о спасении и взывати тебе тако:

Радуйся, добрыя дела, во имя любви к людем совершивый.

Радуйся, прелестьми мира потопити любви своея не допустивый.

Радуйся, языческое омрачение, яко уметы отвергнувый.

Радуйся, воспоминаниями прелестей язычества никогда же себе омрачивый.

Радуйся, ненависть по святом крещении твоем своими ногами поправый.

Радуйся, возвращатися к ней себе не допускавый.

Радуйся, братоненавидение братолюбием победивый.

Радуйся, пирования воздержанием заменивый.

Радуйся, страдания людей твоих милосердием облегчивый.

Радуйся, немощи и пороки людские образом жития своего лечивый.

Радуйся, кротостию своею и смирением люди своя, яко агнцы сотворивый.

Радуйся, чистотою и бескорыстием их теми же соблюдый.

Радуйся, дивный наш покровителю, святый благоверный княже Довмонте.

Кондак 7

Хотяй спасти град твой Псков от нашествия врагов, ты, княже Довмонте, пришел еси в соборный храм Святыя Троицы, положи меч свой тамо пред алтарем Господним и паде ниц на землю, благословение Божие прося словесы сими: "Господи Боже сил, мы людие Твои и овцы пажити Твоея, Имя Твое призываем. Призри на кроткия, смиренныя возвыси, гордыя и высокия мыслию низложи, да не опустеет пажить Твоя". И препоясався мечем от игумена Исидора, нападе на врагов и обрати их в бегство, поя Богу помогающему ти: Аллилуиа.

Икос 7

Дивнаго во бранех воеводу стране Псковской показа тя Господь, святый благоверный княже Довмонте, ты бо еси своим мужеством многажды врага сильнаго и оружием крепкаго отражал еси, и искусством ратным от предел земли твоея бежати повелевал еси, страх сим вселяя в них. Людие же, водимии тобою, видя сие, взываху тебе:

Радуйся, великий благочестия столпе.

Радуйся, во исповедании веры православныя крепкий.

Радуйся, храбрый и сильный воеводо.

Радуйся, во бранех непобедимый.

Радуйся, в молитвах ко Господу неотступный.

Радуйся, прещением своим страхом врагов исполнивый.

Радуйся, благословением Божиим, аки мечем, препоясавыйся.

Радуйся, меч твой, яко видимую защиту твою нам оставивый.

Радуйся, дивный наш покровителю, святый благоверный княже Довмонте.

Кондак 8

Странником и пришельцем во страну Псковскую вшел еси, блаженне княже Довмонте, и тридесят и три леты во граде Пскове пожил еси, водворяя в нем мир и благочестие, искореняя лжу и неправду примером жития своего, и воздвизая всех за благодеяния Божия воспевати Ему: Аллилуиа.

Икос 8

Весь исполнен любве Божией к людем своим, до маститыя старости своея не оставлял еси народ Псковский милосердием. Твое последнее отражение врагов у храма первоверховных апостолов Петра и Павла о той же любви твоей гласит нам. Яко стар еси и труден годами, претрудное сие дело совершил еси и благословляемый благодарными людьми в малом времени от трудов своих праведных почил еси, званиями почитаемый сими:

Радуйся, воспевателю Святыя Троицы изрядный.

Радуйся, молитвениче к ней неотступный.

Радуйся, почитателю Богородицы искренний.

Радуйся, призывателю святых угодников Божиих неусыпный.

Радуйся, зодче храмов Божиих усердный.

Радуйся, посетителю их неустанный.

Радуйся, со святыми Божиими собеседниче.

Радуйся, с иноками сомолитвенниче.

Радуйся, благочестивых людей в сердце своем благословлявый.

Радуйся, странных и убогих к себе принимавый.

Радуйся, лишенным крова покрове.

Радуйся, лишенным родства прибежище.

Радуйся, дивный наш покровителю, святый благоверный княже Довмонте.

Кондак 9

Всяк возраст людей благочестивых входя во храм святыя Троицы и восходя по ступеням храма, числом равным летам жития твоего во граде Пскове, воспоминает добродетельное житие твое, како ты, восходя добродетельми твоими, Небеснаго Царствия достигл еси. И язычник сый в рождении, по святом крещении твоем греховное житие, яко прах отрясл еси, поя Богу: Аллилуиа.

Икос 9

Витийствующий язык не возможет достойно воспети славное житие твое, великий угодниче Божий Довмонте, не может исчислити достойно и добродетели твоя и познати величия совершенств твоих. Обаче и малое сие и недостойное похваление приими от нас, княже святый, зовущих тебе:

Радуйся, крилами Богомудрия небесных чертогов достигший.

Радуйся, очами Боговедения Бога пред собою всегда видевший.

Радуйся, руками добродетелей, спасение души своея строивший.

Радуйся, ногами трудолюбия, дар благих начинаний исполняти навыкший.

Радуйся, житие твое добродетельми исполненное скончавый.

Радуйся, пример любви к Богу и ближнему нам давый.

Радуйся, чудесами твоими в святости своей нас уверивый.

Радуйся, молитвами твоими нам защитника себе показавый.

Радуйся, дивный наш покровителю, святый благоверный княже Довмонте.

Кондак 10

Спасти хотя душу свою, ты неленостно, святый княже, по ступеням добродетелей шел еси. Не знал еси покоя в делах ратных, терпел еси лишения с воины в годину сражений, отрицал еси страх при виде сильнаго врага пред собою, молитву совершая Богу о себе и людях, поя: Аллилуиа.

Икос 10

Стена и ограждение граду Пскову во дни жития был еси, святый Довмонте, и по смерти своей не оставлял еси людей твоих беззащитными от нападений лютаго врага. Сего ради и мы, любовию чтуще тя, зовем ти:

Радуйся, чудотворче предивный.

Радуйся, молитвенниче преславный.

Радуйся, покрове Богом нам данный.

Радуйся, ограждением от врагов и по смерти нам оставленный.

Радуйся, яко тобою радость сыновняя нам бывает.

Радуйся, яко тобою любовь наша светло сияет.

Радуйся, яко тобою надежда наша не тщетна является.

Радуйся, яко тобою вера наша утверждается.

Радуйся, дивный наш покровителю, святый благоверный княже Довмонте.

Кондак 11

Пение хвалебное и благодарственное неумолчно возносится и во дни сии о тебе, святый благоверный княже Довмонте, прославляя дивныя чудеса твоя, от мощей твоих исходящия. Слепому, по молитве его, зрение возвратил еси, воздвизая и нас, слепоту греховную отрясше, с тобою воспевати Богу песнь: Аллилуиа.

Икос 11

Светоприемным светильником содеялся еси пред людьми твоими, егда мощи твоя из земли во храм на поклонение изнесены быша. И молитвы людей в беде сущих не оставлял еси неуслышанными, всякому прибегающему к тебе милости изливая, да получивши просимое от тебе, благодарственно возносим тебе похвалы сицевые:

Радуйся, явлением своим мужу благоговейному, себе, яко молитвенника открыл еси.

Радуйся, повелением взяти покров от мощей твоих, яко чудотворца нового себе явил еси.

Радуйся, по обнесении по стенам града Пскова чудо победы над врагами показал еси.

Радуйся, яко сим чудом и по смерти твоей воеводою Отечества нашего быти не престал еси.

Радуйся, с воинами храбр воин и вождь бывый.

Радуйся, ратные дела с ними, яко равный, разделивый.

Радуйся, яко молитва твоя со святыми услышана бысть.

Радуйся, сею молитвою Господь паки нам тя, яко чудотворца явил есть.

Радуйся, дивный наш покровителю, святый благоверный княже Довмонте.

Кондак 12

Благодать Божия дана бысть тебе, святый благоверный княже Довмонте, во дни жития твоего, враги побеждающая и злыя сердца человеческия в мягкий воск претворяющая. Сия благодать является на людех твоих и по смерти твоей, недуги врачующая, оскудевающих в вере восполняющая, злобу и вражду среди верных церкви развевающая. Тем же не лиши и нас благодати сия, тя почитающих и поющих о тебе Богу: Аллилуиа.

Икос 12

Поюще твое дивное житие, любовию к ближним исполненное, дивный во святых Божиих, благоверный княже Довмонте, благодарим Господа давшего нам тебе, таковаго угодника своего, и просим, и молим Его Всеблагаго, да не лишит Он нас за грехи наша твоего к Нему предстательства, но да получим по молитвам твоим у престола Вседержителя мир и покой душам нашим, и да отринем нерадение свое, песньми красными воспевающе тя:

Радуйся, княже, благодатию Божественною исполненный.

Радуйся, братскою любовию к людем воскриленный.

Радуйся, коснеющих в нерадении своем подвизающий ко спасению.

Радуйся, утопающих во гресех воздвизающий ко исправлению.

Радуйся, яко злом омраченныя люди к любви христианской ведеши.

Радуйся, яко неверующия ко спасению зовеши.

Радуйся, явлением своим, людей благочестивых в вере укрепляяй.

Радуйся, чудесы от тебе исходящими, Бога, дивнаго во святых своих прославляяй.

Радуйся, гонителей наказателю.

Радуйся, клеветников обличителю.

Радуйся, гонимых покровителю.

Радуйся, оклеветанных оправдателю.

Радуйся, дивный наш покровителю, святый благоверный княже Довмонте.

Кондак 13

О, великий угодниче Христов, святый благоверный княже Довмонте! Приими сие малое и недостойное приносимое нами моление, избави нас, молитвами твоими от всякаго зла, и от всякой вещи сопротивной, ослабляющей веру нашу, да приимем мир и покой в души наша и благодать Божию, оскудевающих восполняющую, и да поем о тебе Богу всегда: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва благоверному князю Довмонту (Тимофею) Псковскому

О, дивный во святых угодниче Божий, Святый благоверный княже Довмонте! Услыши нас, к тебе прибегающих и помощи твоея просящих. Вемы бо, яко сильна есть молитва твоя пред Богом, и велика есть твоя любовь к людем твоим. Сею молитвою во дни жития твоего дивныя творил еси чудеса храбрости, сею любовию твоею к людем вдохновлял еси шествовати за тобою, тебе во всем подражати, тебе, яко отца своего слушати и волю Господню всегда творити. Тако и ныне по смерти твоей не остави нас сирыми, без твоего отеческаго заступления, не отыми от нас любви твоея за наше нерадение к тебе, яко ко отцу нашему, Богом нам дарованному. Буди печальным - утешитель благий, беззащитным - щит и ограждение, беспомощным - помощь и заступление. Егда же врази наши видимые и невидимые начнут с нами брань свою, твоими молитвами, якоже древле покровом своим град Псков, душу нашу огради, и наложи на них страх, да отпадут они от мыслей своих деяти нам злая. Препояши и нас, якоже мечем своим на отражение сих врагов, молитвою, постом и добрыми делами. Да преуспевающе в делании духовнем возблагодарим Господа Бога, давшего нам тя, молитвенника и заступника за нас, таковаго учителя нашего, и поклонимся Ему, живущему во вся веки. Аминь.

Вторая молитва благоверному князю Довмонту (Тимофею) Псковскому

О святый угодниче Христов, благоверный княже Довмонте! Ведуще твое к Богу дерзновение, в сокрушении сердца смиренно просим тя: молися о нас грешных и непотребных рабех (имена) и испроси нам молитвами твоими прощение грехов, исправление жития нашего, от болезней и всяких недугов исцеление, от наветов и козней диавольских избавление, паче же спасение душам нашим подаждь и небесных благ восприятия сподоби благодатию и человеколюбием Пресвятыя и Живоначальныя Троицы, Отца и Сына и Святаго Духа во веки веков. Аминь.