Акафист преподобному Макарию Алтайскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный из всех родов Российстих на служение в горах Алтая и просвещение людей, живущих во тьме язычества и суеверия, отче Макарие! Прославльшего тя Господа мы величающе, тебе похвальная пения воспеваем. Служением своим языцы просветивший и свет Боговедения тем явивший, от скорбных обстояний и всяких вед избави нас, тебе зовущих:

Радуйся, преподобне Макарие, апостоле алтайский.

Икос 1

Ангелов Творец и всея твари Создатель направи стопы твоя, преподобне отче, к народу, седящему во тьме неведения и ищущему Солнца Правды. Ты же равноапостольного служения желая, мнози науцы с молитвою к Богу изучил еси, и талант данный ти Господем, в земли не сокрывая, разум свой на пользу матери-Церкви являя, первый среди ученик явился еси. Паче же иных в молитве и служении Господу преуспел еси, отче, тем же и мы с радостию зовем ти сицевая:

Радуйся, от юности Господа возлюбивый.

Радуйся, сладость молитв к Нему вкусивый..

Радуйся, страны Алтайския первый священниче.

Радуйся, и ныне о ней ко Господу молитвенниче.

Радуйся, яко тобою свет веры языком явися.

Радуйся, яко тобою алтайский народ просветися.

Радуйся, вся блага мира сего ни во что же вменивый.

Радуйся, свещниче, с вершины горы чада своя осветивый.

Радуйся, преподобне Макарие, апостоле алтайский.

Кондак 2

Видя усердие твое, преподобне отче Макарие, учителие твои, среди оных святитель Филарет Московский, на путь тесный тя наставляя и иноческому житию поучая, радовашеся, зря любовь твою ко Отцу, Иже на небесех, ему же вси со умилением зовем: Аллилуиа.

Икос 2

Разумом ко Господу устремляяся, все житейское попечение отложил еси, преподобне отче, став на горний путь иноческого жития, Господу молился еси и Тому единому служил еси. Сего ради прими от нас похвалы сия:

Радуйся, благочестивых родителей чадо прелюбезное.

Радуйся, от них получивый для веры вся полезная.

Радуйся, от отца любовь ко служению и проповеди унаследовавый.

Радуйся, от матере дар кротости и смирения приявый.

Радуйся, успешным обучением родителей возвеселивый.

Радуйся, любовь свою ко Господу и родителем многажды проявивый.

Радуйся, святителя Филарета друже и учениче.

Радуйся, в усердной молитве возросший светильниче.

Радуйся, преподобне Макарие, апостоле алтайский.

Кондак 3

Силою Вышняго укрепляемый, преподобне отче, вся искушения мира претерпевая, лишения и скорби кротостию и смирением побеждая, людем светским истинную веру показал еси, непрестанно вопия к Богу: Аллилуиа.

Икос 3

Имея мысль благу равноапостольным служением Господу угодити, стопы своя направил еси в земли Сибирския. Видя языцы, истиннаго Господа не знавшия, проповедал еси им Царя Славы, наречие местное изучил еси и родным для просвещаемых стал еси. Тем же мы, видя таковая, вопием ти:

Радуйся, отче, трудности на пути не убоявыйся.

Радуйся, с любовию за апостольское служение взявыйся.

Радуйся, горняя селения с проповедию обходивый.

Радуйся, чад своих искренне полюбивый.

Радуйся, Святое Писание народу алтайскому даровавый.

Радуйся, от Господа дар неусыпной молитвы приявый.

Радуйся, яко жизни оседлой языцы научил еси.

Радуйся, яко о спасении детских душ молился еси.

Радуйся, преподобне Макарие, апостоле алтайский.

Кондак 4

Бури искушений и скорбей побеждая, языцы наставлял еси во истинней вере, преподобне отче, неустанно проповедая, народы Алтлйстии научал еси. Жителем же местным собою образ благочестия являя и ко спасению тех наставляя, воистину преподобными подвиги украсился еси, отче Макарие, Господу непрестанно вопия: Аллилуиа.

Икос 4

Слышавше, преподобне Макарие, ближнии и дальнии о проповеди и житии твоем, притекаша к тебе, яко ко источнику чистому и исцеления деющему, крещения желающе и ищущие пути спасительного. Ты же, отче, приходящих братским целованием лобызая и истинней вере поучая, многих ко спасению привел еси. Мы же видевшее благоразумие твое, вопием ти:

Радуйся, благодатию свыше облеченный.

Радуйся, муже высокопросвещенный.Радуйся, даром прозорливост и одаренный.

Радуйся, к служению Божию Духом призванный.

Радуйся, алтайскому народу на его языце евангелие давый.

Радуйся, многия духовныя письмена написавый.

Радуйся, смирением и кротостию зло победивый.

Радуйся, многих из языков к вере истинней обративый.

Радуйся, преподобне Макарие, апостоле алтайский.

Кондак 5

Боготечная звезда явился еси, отче, на горах Алтая. Незабвенным архимандритом от сослужащих прозван был еси. Всего себе отдал народу просвещаемому, Господу непрестанно вопия: Аллилуиа.

Икос 5

Видевше тя верныя чада церкви Христовой, яко светило безоблачно сияюща многими дарованьми божественными, возрадовахуся зело. Словеса спасительная языком вещая, истинно Господу угодил еси. Отрока Михаила, провиденнаго тобою иереем, грамоте обучив, из тьмы неведения к познанию Света Истины привел еси. И сей явися к жизни вечней первый во иерейстем сане из алтайских племен. Мы же, отче Макарие, вопием ти сице:

Радуйся, духовно отрока возлюбивый и вторым отцем ему бывый.

Радуйся, в вере его утвердивый и просвещати соплеменных благословивый.

Радуйся, яко отрок сей, став иереем Божиим, прославися.

Радуйся, яко чрез него мнозие в вере утвердишася.

Радуйся, отче, виноград духовный насадивый.

Радуйся, преподобие свое миру всему явивый.

Радуйся, мнози сироты отеческим теплом согревый.

Радуйся, нагих одеждею нетления одеявый

Радуйся, преподобне Макарие, апостоле алтайский.

Кондак 6

Проповедника богодухновеннаго и неусыпнаго молитвенника видим тя, отче Макарие, мнозие ко предстательством твоим спасаются и из тьмы язычества обращаются, непрестанно бо молишися о нас ко Господу, воспевая ему: Аллилуиа.

Икос 6

Возсия свет Христов в душе отрока Иоанна, тобою просвещеннаго, отче Макарие. Грозный родитель сего, идольстии жертвы принося, возпыла на тя, отче, гневом, и погубити тебе желая, со мнозими сродники притекаху к месту, идеже ты обретался еси, со страшною силою накинуся и убити уже хоте. Конь того же того споткнуся, язычник оземь ударися и еле жив остася. Ты же, отче, любовь свою являя, болящему всю нощь служа, Господа Милосерднаго о прощении несмысленнаго молил еси. Мы же, видя таковую твою любовь ко врагом своим, восхваляем тя:

Радуйся, первое чадо Господу в земли Алтайстем явивый.

Радуйся, яко лютаго поносителя с кротостию приявый

Радуйся, Господу моливыйся простити того греси.

Радуйся, яко праведным гневом возгорелся еси на хуливших Господа Славы.

Радуйся, смирением своим покоривый жестоцыя нравы.

Радуйся, поносителю своему при одре служивый.

Радуйся, яко молитвами твоими язычник, клявшийся идолам в любве, христианином содеяся.

Радуйся, преподобне Макарие, апостоле алтайский.

Кондак 7

Хотяше служителие идольстии изгнати тя, отче Макарие, от Алтайския страны, мнозие скорби тебе учиниша: угрозы тебе посылаху и препятствия деяху. Ты же со смирением их поучал еси и о прощении и просвещении тех Господа непрестанно молил еси, вопия ему: Аллилуиа.

Икос 7

Новою и лучезарною лампадою веры Христовой на Алтае, пред Господем возсиял еси, преподобне. Мнозие же люди свет твой, отче Макарие, видя, яко ты Господу единому служиши со благоговением и любовию. Неций же от язык, Борисом нареченный, крещения не желая и гласу твоему не внимая, во тьме язычества косне. Ты же к словам поучений молитву приложил еси, и чудо явися: сей от идол прииде к вере Истинней. Видевше же силу молитвы твоея, воспеваем ти похвалы сия:

Радуйся, по евангельскому глаголу едину овцу взыскавый.

Радуйся, ко ослепленному душею словеса правды вещавый.

Радуйся, яко того самаго язва страшная и жар зельный объяста.

Радуйся, яко сей от язык к покаянию притече и Христовых Тайн причастник явися.

Радуйся, яко Божественною литургиею той с радостию насладися.

Радуйся, яко молитвами твоими от огневицы сей просвещенный оставлен бысть.

Радуйся, яко многая лета и благоденствие ходатайством твоим тому даровашася.

Радуйся, яко тобою свет Христов в стране полунощней воссия.

Радуйся, преподобне Макарие, апостоле алтайский.

Кондак 8

Странное и преславное чудо видится всем, отче Макарие, яко земля Алтайская во язычестем суеверии погибающая, явися твоими трудами ко свету Истины. Чада же ея, неведающая некогда Господа, ныне вопиют ему: Аллилуиа.

Икос 8

Все житие твое, равноапостольне отче Макарие, явися образом служения Предвечному Богу и людем края Алтайскаго и всея страны Российския. ты бо трудности и тяготы пути превозмогая, чрез холмы и реци шел еси к ко взыскующим спасительного слова, молитвою и беседою тех утешая и на путь спасительный наставляя, ловцем человеков, подобно апостолом Христовым, соделался еси. Мы же приносим ти похвалы сия:

Радуйся, мнози души из руки велиара исхитивый.

Радуйся, молитвою вся козни того победивый.

Радуйся, лучезарный светильниче веры и благочестия.

Радуйся, неутомимый искоренителю невежества и нечестия.

Радуйся, к чтению священнаго Писания нас возбуждаяй.

Радуйся, жити по Евангелию Христову нас научаяй.

Радуйся, внутрения язвы духовныя наша исцеляяй.

Радуйся, преподобне Макарие, апостоле алтайский.

Кондак 9

Всяк притекающий к тебе, богоносне отче Макарие, словом лювве и наставлением в вере бысть встречен, ты же, отче, много воздыхаше о народе, младенчествовавшем во Христе, непрестанно поя Господеви: Аллилуиа.

Икос 9

Витийство человеческое не довлеет к достойному прославлению твоих трудов, преподобне Макарие, обаче приими тебе приносимыя пения наша. Скорби во и подвизи твоя, приснопамятне, ублажающе, с верою и лювовию вопием ти сице:

Радуйся, мнози языцы ко Христу приведший.

Радуйся, чада духовныя во множестве обретший.

Радуйся, новых чад Божиих ревностный учителю.

Радуйся, сирых и убогих присный попечителю.

Радуйся, наказателю, Святую Троицу хулящих.

Радуйся, скорое воздвижение болящих.

Радуйся, милость Богородицы к нам приклоняюший.

Радуйся, у престола Господа Вседержителя чад своих присно поминающий.

Радуйся, преподобне Макарие, апостоле алтайский.

Кондак 10

Спасти хотя мнози словесныя овцы от волков, губящих я, непрестанно проповедовал истину новопросвещенным чадом твоим духовных, как в земли Алтайстей, так и во граде Болхове, идеже промышлением Божиим продолжил еси служение твое, среди народа русскаго, азы веры христианской забышаго и паки в суеверия языческия впавшаго, сострадание и любовь к тем являя и спасения тем желая, мнози труды полагал еси, отче Макарие, дабы вся страна Российская воспевала Господеви: Аллилуиа.

Икос 10

Стена нерушимая - вера твоя, отче Макарие, и служение твое Господеви - миро пред Ним благовонное, мнози собра люди со слезами, егда ты, преподобне, отъезжал еси от предел Алтайских. Стенание и плач стояше над горами, егда паства, тобою ко Господу приведенная, провождаше тя, отче, в дальний путь. Мы же, видя таковую любовь к тебе, воспеваем сицевыя похвалы:

Радуйся, непрестанно труды своя во славу Божию полагавый.

Радуйся, языком свет истинный показавый.

Радуйся, соплеменников твоих в вере утвердивый.

Радуйся, яко сердец твоего ненависть николиже коснуся.

Радуйся, яко уста твоя осуждения отвергостеся.

Радуйся, всем, любящим Господа тихую радость на сердце полагаяй

Радуйся, дружбу и любовь меж христианами укрепляяй.

Радуйся, о благостоянии святых Божиих Церквей Христа умоляй.

Радуйся, преподобне Макарие, апостоле алтайский

Кондак 11

Пению ангельскому уподобляшеся, преподобне Макарие, служение тобою Господеви возносимое. По молитве твоей мнози чудеса содеяшася. Языцы благодатию Святаго Духа, на тебе почивающей движимые, прихождаху ко общению со Христом и вопияху Тому: Аллилуиа.

Икос 11

"Свет Христов просвещает всех" - возгласил еси, отче преподобне, егда душа твоя от тела разлучашеся, сим показа всея жизни твоея венец. Тело бо твое по велению архиерея трижды окрест престола обнесено бысть и в землю сокрыто, душа же твоя в селениих горних вселися, славою Божиею осияваема. Мы же видеша таковую твою мирную кончину о Господе вопием сице:

Радуйся, в Божественных чертозех водворивыйся.

Радуйся, яко блаженнаго успения сподобивыйся.

Радуйся, в вечнем блаженстве упокоивыйся.

Радуйся, Бога лицезрением наслаждающийся.

Радуйся, с апостолы Христовы присно торжествующий.

Радуйся, с преподобными величаемый.

Радуйся, вечною радостию преисполненный.

Радуйся, яко Господа ради в земли Алтайстей прославился еси.

Радуйся, преподобне Макарие, апостоле алтайский.

Икос 12

Поюще служение твое, ублажаем тя, преподобне отче Макарие! Буди нам молитвенниче и защитниче от стрел лукаваго, укрепляя и наставляя нас к проповеданию Слова Божия среди язык и безбожник. Прими похвалы тебе, отче приносимыя, и услыши ны, во умилении вопиющих ти сицевая:

Радуйся, служений благоговейных любителю.

Радуйся, скорый молящихся услышателю.

Радуйся, блага житейския преславно нам подаваяй.

Радуйся, путь, ведущий к Богу, многим освещаяй.

Радуйся, проповедником веры истинной помощниче.

Радуйся, пришедших ко Христу от злых преследований защитниче.

Радуйся, яко ангели о твоих подвизех радуются.

Радуйся, яко мнози человецы по твоему примеру и предстательству спасаются.

Радуйся, преподобне Макарие, апостоле алтайский.

Кондак 13

О пречудный проповедниче и преславный угодниче Божий, земли Алтайския молитвенниче, преподобне отче наш, Макарие! Приими от нас малое моление, тебе ныне приносимое, яко Господеви ты угодил еси на земли, с Ним же и превыбываеши на Небесех. Сице молим тя: непрестанно молися, да и мы сподобимся в селениих горних воспевати Ему: Аллилуиа!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Макарию Алтайскому

О предивный угодниче Христов, преподобне отче Макарие! Благодать Всевышняго направи тя, святче Божий, во страну горнюю, во язычестве погибающую. Непрестанно труды своя полагал еси, дабы исхитити из руки врага рода человеческаго души язычников неразумных. Словом своим наставлял еси я, врачуя души и телеса младенствующих во Христе. Молися и о нас ныне, тьмою безбожия окруженных и нападения от язык приемлющих. Утверди наша словеса на проповедание Евангелия, укрепи наша стопы на хождение путем правды и несение той людем заблуждшим.

Ей, угодниче Божий! Молися о всех нас всех, ко святей иконе твоей припадающих. Помози нам устояти от искушений века сего. Испроси у Дароподателя Бога каждому по потребе его. Пастырем, несущим свет, - неустанность во трудех, ко службе великое усердие и пред Святыми Тайнами Благоговение. Верным, молящимся тебе, - крепость в вере, неленость в молитве и почитание святынь Божиих. Новопросвещенным - в вере научение, к молитве великое тяготение, ко службе во храме неленостное хождение. Всем же нам, молящимся тебе, - телеснаго здравия, наипаче же душевнаго спасения. Да и мы с тобою сподобимся во Царствии Небеснем воспевати песнь в Троице славимому Богу, Отцу и Сыну и Святому Духу, ныне и присно и во веки веков. Аминь.