Акафист преподобному Пахомию Нерехтскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и чудотворче предивный, преподобне отче наш Пахомие, похвальная пения восписуем ти, молитвеннику и заступнику нашему. Ты же, яко имея дерзновение ко Святей Троице, от всяких нас бед свободи, любовию тебе зовущих:

Радуйся, Пахомие, преславный чудотворче.

Икос 1

Ангельскому образу жития твоего дивящеся, аще и зрим тя земнаго естеством суща, преподобне отче, прославляем Господа, дивнаго во святых Своих. Тебе же, угоднику Его, во умилении вопием:

Радуйся, Христов оружниче верный;

Радуйся, ходатаю о нас непрестанный.

Радуйся, веселие и отрадо, к тебе притекающим;

Радуйся, ко спасению всех призывающий.

Радуйся, иночествующим похвало и утверждение;

Радуйся, обители твоея твердое ограждение.

Радуйся, Костромскаго края сокровище драгоценное;

Радуйся, лучами Трисолнечнаго света озаренный.

Радуйся, Пахомие, преславный чудотворче.

Кондак 2

Видяще родители твои иерей Игнатий и Анна теплую любовь ко Господу, издетска в тебе являющуюся, благодарне в сердцах своих воспеваху Богу: Аллилуиа.

Икос 2

Ра́зум богому́дрый от юности име́я, отче преподобне, писа́ния боже́ственная возлюбил еси, в ни́хже сокрове́нней му́дрости поуча́лся еси. Мы же, ви́дяще таково́е тща́ние твое, вопием ти сицева́я:

Радуйся, родителей благочестивых пло́де избра́нный;

Радуйся, во граде Владимире кри́не прозя́бший.

Радуйся, любовь к добродетели от младе́нчества яви́вый;

Радуйся, ко служению Христову сердце твое устреми́вый.

Радуйся, мудростию Божественною, яко седи́нами ста́рческими, украси́выйся;

Радуйся, мира соблазнов от млады́х ногте́й отреши́выйся.

Радуйся, во обители Рождества Богородицы приле́жно моли́выйся;

Радуйся, молитвою твоею изря́дно укрепи́выйся.

Радуйся, Пахомие, преславный чудотворче.

Кондак 3

Си́лою свы́ше наставля́емый, Го́рняго желая улучи́ти, во обитель Рождества Пречистыя Богородицы вшел еси́ и а́нгельскому житию́ приобщи́лся еси, благода́рне прославля́я Бога и поя́ Тому́ хвале́бную песнь: Аллилуиа.

Икос 3

Име́я те́плую любовь ко Господу, в горни́ле послушания волю твою воспита́л еси преподобие. Мы же, ви́дяще таково́е смирение и кротость твою, зовем ти сице:

Радуйся, и́ноческое житие изря́дно возлюби́вый;

Радуйся, по́двиги духовными плоть

ду́ху покори́вый.

Радуйся, о́бразе кротости и послуша́ния;

Радуйся, красото́ смиренному́дрия и воздержа́ния.

Радуйся, а́нгельскую кротость показа́вый;

Радуйся, и́ноческое бесстрастие и безмолвие стяжа́вый.

Радуйся, трудолюбия правило яви́вый;

Радуйся, яко кадило благовонное, молитвы Богу приноси́вый.

Радуйся, Пахомие, преславный чудотворче.

Кондак 4

Бурю злых напа́стей по́двиги и моли́твы укроща́я, на высоту добродетели восше́д, возсиял еси, отче Пахомие, яко свети́льник на све́щнице поста́вленный. Темже и священства саном почте́н был еси и игуменство послушания ради прия́л еси, со смирением взывая ко Господу: Аллилуиа.

Икос 4

Слы́шав святитель Алексий о благоче́стном житии твоем, Преподобне, бре́мя игуменское на

ра́мена твоя возложил есть. Ты же, аще и недостойным себе почитая, оба́че волю святительскую исполня́я, приял еси послушание сие, темже от нас приими пе́сненныя хвалы́:

Радуйся, святителем Алексием на све́щницу возведе́нный;

Радуйся, благое иго на себе восприе́мый.

Радуйся, алтаря Господня непорочный служи́телю;

Радуйся, и́ноков добрый па́стырю и мудрый учи́телю.

Радуйся, благочестия утвержде́ние;

Радуйся, по́стническаго ли́ка украше́ние.

Радуйся, и́ночествующих во обители Константи́новой наста́вниче предо́брый;

Радуйся, немощству́ющей бра́тии врач богому́дрый.

Радуйся, Пахомие, преславный чудотворче.

Кондак 5

Боготе́чная звезда освети́ путь твой, преподобне, темже, славу человеческую ни во что же вменив, в пустыню устремился еси, иде́же в безве́стности и тишине́ возносил еси пламенную молитву ко Господу, поя Тому: Аллилуиа.

Икос 5

Видя суету́ суе́т и томле́ние духа, прису́щия миру сему, не прилепи́лся еси им, но, вся оставль, к высоте безмолвия устремился еси. Мы же, зря́ще таково́е смирение твое, воспеваем ти сице:

Радуйся, сле́зными пото́ки пустыню ороси́вый;

Радуйся, плоды безмолвия в ней возрасти́вый.

Радуйся, неиссяка́емый молитвы исто́чниче;

Радуйся, Всеросси́йского аввы Сергия до́брый учениче́.

Радуйся, упова́ние на Бога всем сердцем возложи́вый;

Радуйся, Костромския преде́лы свя́тостию жития твоего озари́вый.

Радуйся, неви́димых враго́в му́жественный прогони́телю;

Радуйся, бога́тства неиждива́емаго благи́й рачи́телю.

Радуйся, Пахомие, преславный чудотворче.

Кондак 6

Пропове́дует пустыня Костромская труды́ и по́двиги твоя, преподобне, ка́ко стра́нником под кров ея́ вшед, обрел еси место зело́ красное, глаго́лемое Сыпа́ново, в не́мже воздвигл еси честны́й

Крест глаголя: "Зде покой мой, зде вселю́ся, вознося́ Богу песнь хвале́бную: Аллилуиа".

Икос 6

Возсия́л еси, преподобне, све́том по́двигов твоих и пусты́ню тобо́ю возлю́бленную озари́л еси, сего ради, жители места того ди́вным сим све́том привлече́ннии, оби́тель умоли́ша тя созда́ти. Мы же, дивя́щеся таково́му житию твоему, благодарне вопием ти:

Радуйся, обители Троицкия первонача́льниче;

Радуйся, те́плый о нас к Богу моли́твенниче.

Радуйся, притека́ющих к тебе отец чадолюби́вый;

Радуйся, вся ко́зни вра́жия победи́вый.

Радуйся, трудолю́бче, дре́вним отцем подража́вый;

Радуйся, дея́ньми виде́ния стяжа́вый.

Радуйся, Божиею благода́тию и до́брыми де́лы твои́ми оправда́нный;

Радуйся, светом невече́рним осия́нный.

Радуйся, Пахомие, преславный чудотворче.

Кондак 7

Хотя́ всеблаги́й Господь в де́брех безлю́дных

обитель монахов устро́ити, избра́ тя, отче, на служе́ние сие. Ты же, волю божественную исполня́я и Сама́го Создателя в помощь призыва́я, кро́тко моли́лся еси: Аллилуиа.

Икос 7

Но́в аго чудотворца и ди́в наго пастыря яви́ тя Господь, преподо́бне, в земли Ру́сстей, егда́ в бы́вшем обита́лищи звере́й и птиц ди́вих огра́ду ста́ду твоему словесному воздвигл еси, от волко́в мы́сленных его до́бре охраня́я. Сему дивя́щеся, и мы, ча́да твоя, пе́сненно тебе взываем:

Радуйся, пустыню беспло́дную благода́тию уплодоноси́вый;

Радуйся, храм Триединому Богу в ней освяти́вый.

Радуйся, Пахомия Великаго усе́рдный ревни́телю;

Радуйся, и́ноческаго общежи́тия благоиску́сный устрои́телю.

Радуйся, икону Пресвятыя Троицы благоле́пно живописа́вый;

Радуйся, в души твоей образ Божий до́бре изобрази́вый.

Радуйся, мо́лние злых ду́хов присно попаляю́щая;

Радуйся, лампа́до в молитве неугаса́ющая.

Радуйся, Пахо́мие, преславный чудотвррче.

Кондак 8

Стра́нна и прише́льца помышля́я себе в ми́ре сем, преподобне, в нем, яко во юдо́ли плаче́вне, пребыва́я и к ве́чности ум свой возводя́, подвиг молитвенный поне́сл еси. Те́мже и братии, яко отец любвеоби́льный, яви́лся еси, науча́я всех воспева́ти Богу: Аллилуиа.

Икос 8

Весь в Бозе пребывая, всече́стне, на убо́гия, вдови́цы и си́рыя присно заботу простира́я, всем вся был еси, закону Христову повину́яся. Темже, милосердие твое восхваля́юще, пе́сньми тя ублажа́ем:

Радуйся, вдови́ц и ни́щих милостивый пита́телю;

Радуйся, печальных благи́й уте́шителю.

Радуйся, благочестия пресла́дкий учи́телю;

Радуйся, немощству́ющих душе́ю и те́лом до́брый врачева́телю.

Радуйся, сиро́т отец чадолюби́вый;

Радуйся, стра́ждущих помо́щник многомо́щный.

Радуйся, изнемога́ющих укрепле́ние;

Радуйся,

благода́ти всечи́стая струе́.

Радуйся, Пахомие, преславный чудотворче.

Кондак 9

Вся́кия ско́рби до́блественне претерпева́я, мольбы́ твоя, богому́дре, с мольба́ми а́ввы Сергия соединя́я, пред о́бразом Святыя Троицы воздыха́л еси: "Да ути́хнет ми́ра сего́ ненави́стная рознь и да в едине́нии лю́дие Росси́йстии воспоют Богу песнь победную: Аллилуиа".

Икос 9

Вити́и челове́честии не мо́гут воспе́ти достойно силы твоея любви ко Оте́честву, преподобне. Ты бо, авве Сергию подо́бяся и о земли Ру́сстей печа́луяся, во время многоплаче́вное и боле́зненное труды́ и по́двиги молитвенныя Богу прине́сл еси. Сего ради вопием ти сице:

Радуйся, о земли Ру́сстей сла́вный печа́льниче;

Радуйся, о умире́нии князе́й усе́рдный моли́твенниче.

Радуйся, веры Православныя ревни́телю;

Радуйся, во́инства христолюби́ваго молитвенный пред-

ста́телю.

Радуйся, стране нашей на враги́ спобо́рствуяй;

Радуйся, щи́те златокова́нный, ко́зни вра́жеския отрева́яй.

Радуйся, преподобнаго Сергия сомоли́твенниче;

Радуйся, о оте́честве твоем неусы́пный пред Богом засту́пниче.

Радуйся, Пахомие, преславный чудотворче.

Кондак 10

Спасти́ хотя́ лю́ди Росси́йския всеблагий Господь дарова́ нам тя, преподобне, яко па́стыря и врача́ безме́здна, да́ром рассужде́ния и исцеле́ний укра́шена. Мы же, прославля́я Пода́теля всех благ, боголе́пно восклица́ем Тому: Аллилуиа.

Икос 10

Царю́ Небе́сному, Ему́же вы́ну предстоя́т во́и а́нгельстии, благоприя́тно бысть и твое при́сное пред Ним предстоя́ние, сего ради даде́ ти, преподобне, силу неду́жныя исцеля́ти, бе́сы прогоня́ти и всем вся потре́бная и поле́зная даровати. Темже вопием ти сице:

Радуйся, чудеса́ мно́ги моли́твою твоею яви́вый;

Радуйся, бесна́го зна́мением кре́стным исцели́вый.

Радуйся, душе́вных язв цели́телю;

Радуйся, в не́мощех су́щим здра́вия пода́телю.

Радуйся, хромы́х ско́рое хожде́ние;

Радуйся, сля́ченных соверше́нное исправле́ние.

Радуйся, безме́здное неду́гов врачева́ние;

Радуйся, печа́льми жите́йскими обремене́нных увеселе́ние.

Радуйся, Пахомие, преславный чудотворче.

Кондак 11

Пе́нием всеумиле́нным прославля́л еси, досточу́дне, в житии твоем Пресвятую Троицу, сего ради по отше́ствии твоем в мир иной срето́ша тя а́нгели Божии, славосло́вящии Триединого Бога: "Свят, Свят, Свят еси Господи". С ними же ныне воспеваеши Ему: Аллилуиа.

Икос 11

Светоприе́млемая свеща́ яви́ся житие́ твое, преподобне отче, в нем же стяжа́л еси благодати сокро́вище нетле́нное, о ней же и поуча́л еси, глаголя:

«Братие, терпи́те бе́ды и ско́рби, да на сем ме́сте обря́щете благодать от Бога». Сподоби и нас ю́ стяжева́ти, досто́йно тя ублажающих:

Радуйся, Царствия Христова насле́дниче;

Радуйся, ли́ка святых уго́дников прича́стниче.

Радуйся, благода́тию Духа Святаго осене́нный;

Радуйся, венце́м бессме́ртия от руки́ Вседержи́теля увенча́нный.

Радуйся, ве́чныя жи́зни соприча́стниче;

Радуйся, а́нгельских лико́в собесе́дниче.

Радуйся, на земли достойно ублажа́емый;

Радуйся, на Небеси́ при́сно прославля́емый.

Радуйся, Пахомие, преславный чудотворче.

Кондак 12

Благода́ть и ми́лость испроси нам, угодниче Божий, у Владыки Вседержителя, дарова́вшего нам нетле́нныя мо́щи твоя, по мно́зех ле́тех от земли́ светоявле́нно возсия́вшия. Сия́ благогове́йне лобыза́ем и в восто́рзе духо́внем вопие́м ко Господу: Аллилуиа.

Икос 12

Пою́ще по́двиги и труды́ твоя, преподобне, восхваля́ем тя, присно с нами пребыва́ющаго и обитель твою николи́же оставля́ющаго, та́ же и исцеле́ния неоску́дно подаю́щаго всем, с верою к ра́це моще́й твоих притека́ющим и любовию взыва́ющим:

Радуйся, обитель твою многоцеле́бными моща́ми освяти́вый;

Радуйся, икону твою честну́ю мно́гими чудесы́ прославивый.

Радуйся, яко мо́щи твоя благода́тная исцеле́ния источа́ют;

Радуйся, яко моще́й твоих де́мони трепе́щут.

Радуйся, в со́ниих и виде́ниях чту́щия тя посеща́яй;

Радуйся, вся потре́бная нам от Бога моли́твами твоими ще́дро подава́яй.

Радуйся, гра́да Нерехты похвало́ и утвержде́ние;

Радуйся, оби́тели твоея́ при́сное заступле́ние.

Радуйся, Пахомие, преславный чудотворче.

Кондак 13

О, пречу́дный и преди́вный отче наш Пахомие! Приими́ ны́не ма́лыя похвалы́ сия, тебе́ приноси́мыя и умоли́ Милостиваго Бога, да помо́жет нам досто́йно дни жития́ нашего на земли́ скончава́ти, вечныя му́ки изба́витися и в мире ине́м воспевати Ему: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва.

О, пречудный и предивный отче Пахомие, древо плодовитое, в земли Владимирстей взращенное, в пустыни же Костромския земли добрый плод принесшее! О, земный ангеле, Небесный человече, и теплый о нас пред Богом молитвенниче! Ты, мирскаго мятежа удалився, в житии твоем благочестно пожил еси и, благоприятно Христу Богу угодив, дары Духа Святаго стяжал еси. Сего ради и Бог прослави тя и яви нам всечестныя мощи твоя, яко бесценное сокровище. Сия же ныне лобызающе и, яко жива тя суща ведуще, усердно молим тя: призри милостивно на нас, грешных, и твоим благоприятным ходатайством испроси у Господа Бога прощение согрешений наших, преспеяние в вере и благочестии и вся потребная для спасения души. Огради нас от козней диавольских и избави вечныя муки, да твоим ходатайством и заступлением сподобимся Богу угодити и Небесное Царство улучити, идеже вкупе с тобою сподобимся прославляти пречестное Имя Отца и Сына и Святаго Духа во веки веков. Аминь.