Акафист апостолу Иакову Зеведееву

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Господем за тихость нескверныя души твоея; от мрежей рыбарских на проповедь Евангелиа; от ловли рыб на уловление человеков; великий апостоле, учениче Христов, сыне громов; моли единаго истиннаго Человеколюбца, Егоже ты приискренне возлюбил еси; да помилует нас, ищущих твоего к Нему предстательства и зовущих ти:

Радуйся, Иакове, апостоле Христов и молитвенниче о душах наших.

Икос 1

Ангельских сил и всякия твари Творца, Владыку и Господа, восприемшаго плоть нашу и явльшагося на земли спасения нашего ради, узрев ходяща при мори Галилейстем и взывающа тя со братом твоим, Иакове блаженне, во звание апостольства, оставль мрежи рыбарския и отца твоего в корабли, неуклонно оттоле последовал еси стопам Спасителевым. Сего ради вопием ти сице:

Радуйся, любве ради ко Христу отца по плоти оставивый.

Радуйся, Христом Небеснаго Отца обретый.

Радуйся, мир и вся его прелести презревый.

Радуйся, небесная благая в воздаяние получивый.

Радуйся, плоть духу совершенно поработивый.

Радуйся, дух твой Сладчайшему твоему Учителю Иисусу покоривый.

Радуйся, Иакове, апостоле Христов и молитвенниче о душах наших.

Кондак 2

Всего себе, учениче Богозрачне, мановению отдав Владычню, твою мысль по всему просвещшаго и показавшего тя, преблаженне, апостола и честна Богогласника непостижимого Божества, разжегся еси ревностью о славе Божией, сего ради «сын громов» от Господа наречен был еси, поя Тому: Аллилуиа.

Икос 2

Якоже Илия ревностию разжигаем попалити восхотел еси непокоршияся проповеданию Христову, но возбрани тебе Хотитель милосердия, научая кротости благодатней, да зовем ти:

Радуйся, незлобия рачителю.

Радуйся, славы Божией ревнителю.

Радуйся, словом изощренная избранная стрело.

Радуйся, премудре, души сопротивных растерзаяй.

Радуйся, таинниче, пленяяй сих корысти.

Радуйся, служителю присносущныя жизни.

Радуйся, Иакове, апостоле Христов и молитвенниче о душах наших.

Кондак 3

Христова Божества Силу, сокрытую под облаком немощнаго человеческаго естества, познал еси явно, егда дщерь Иаирову Господь воскреси, наипаче же сподоби тя со апостолы Петром и Иоанном сотаинника быти многих и преславных чудес. Увидев же, яко Христос есть Бог истинный, из глубины сердца твоего воззвал еси Ему: Аллилуиа.

Икос 3

Разумом истиннаго богопознания озаряя твою душу, шествовал еси вослед Благаго Учителя твоего, поучаяся из уст Его исходящей премудрости, и совершеннаго ради твоего незлобия возлюблен был еси Христом Господом твоим. Услыши убо ны, воспевающия ти сице:

Радуйся, истиннаго Бога служителю.

Радуйся, бесов прогонителю.

Радуйся, мертвецы силою Христовою оживляяй.

Радуйся, тою жизнь и здравие людем возвращаяй.

Радуйся, помраченныя умом к Свету Истины призываяй.

Радуйся, правыя веры просвещением к добродетели наставляяй.

Радуйся, Иакове, апостоле Христов и молитвенниче о душах наших.

Кондак 4

Зарями свыше наполнився и светлостию Божественною просветився на Фаворстей горе преобразующегося Зиждителя и Господа видел еси и глас с Небесе услышати достойно получил еси, темже самовидец быв и свидетель Таин Божиих, вопия Ему: Аллилуиа.

Икос 4

Светел тя облак Слова на Фаворстей горе осени, облистающа славою обожена, блаженне Иакове, и глас слышати Отеческий сподобился еси, извествуяй Того Сыновство, сего ради зовем ти:

Радуйся, познанием Сущаго и Иже бе и Грядущаго превозшедый естество человеческое.

Радуйся, вместилище таинств, невместимых человеческим умом, бывый.

Радуйся, неизреченная Божия откровения узревый.

Радуйся, сия верным преподавый.

Радуйся, радости святых еще в жизни сей познавый.

Радуйся, оными ныне в преизбыточествии наслаждаяйся.

Радуйся, Иакове, апостоле Христов и молитвенниче о душах наших.

Кондак 5

Егда нас ради Владыка восприяти восхоте умервщление, яко вину истинного мертвых воскресения, в нощи, в нейже предаяшеся, со апостолы Петром и Иоанном взят тя содетельника, блаженне, яко мудра таинника, взывающа: Аллилуиа.

Икос 5

Имея велие дерзновение к возлюбившему тя Христу Сыну Божию, сподобился еси обетования пити чашу Христову и Его Крещением креститися. Сего ради вопием ти:

Радуйся, ближний Христов учениче.

Радуйся, присный Его друже.

Радуйся, дерзновение ко Спасителю имевый.

Радуйся, Чаши и Крещения Его причастниче.

Радуйся, словеса Господня, якоже сокровище многоценное, в сердце своем слагавый.

Радуйся, от честнаго лика дванадесятих ученик первее убиемый.

Радуйся, Иакове, апостоле Христов и молитвенниче о душах наших.

Кондак 6

Буря ярости иудейския пригвозди ко Кресту Христа Бога, волею пострадати за вся люди изволившаго, но не поколеба веры и упования твоего, Иакове блаженне, яко Той есть Спаситель мира – Христос, древле прореченный пророки во искупление падшего человечества. Удивляяся же крайнему милосердию и долготерпению Божию, взывал еси к Нему: Аллилуиа.

Икос 6

Слышав Божественный глас Христа жизнодавца, тридневно воскресшаго от мертвых и дверем затворенным вшедшаго ко учеником Своим, и «Мир вам» рекшаго, Иакове богоносне, зело возрадовался еси и Тому, яко Богу, благоговейно поклонился еси, всем же потом возвещал еси немолчно непреложную истину Его воскресения. О сем и мы хвалебно тебе зовем:

Радуйся, мир Христов в непорочный сосуд души твоея достойно приемый.

Радуйся, миром тем мира концы благодатно умиротворивый.

Радуйся, древния вражды идолослужительныя потребителю.

Радуйся, истины воскресения Христова очевидный и громогласный свидетелю.

Радуйся, дверем затворенным дивно прошедшаго Христа созерцателю.

Радуйся, пребожественнаго и радостотворнаго гласа Его слышателю.

Радуйся, Иакове, апостоле Христов и молитвенниче о душах наших.

Кондак 7

Боготечное на небо вознесение Христово видев и Духа Святаго, от Него ниспосланнаго во огненных языцех, сопричастник быв, Иакове прехвальне, духоносец божественный соделался еси и, облеченный силою свыше, потекл еси на проповедь Евангельскую, возвещая людем, во мраце неверия бывшим, Христа Бога спасительный свет и веру в Него правую, да зовут Ему: Аллилуиа.

Икос 7

Духовное сияние в виде огненне сниде на тя и Божественное приятелище содела, крепко безбожия тьму отгоняюща и мир просвещающа светлостию премудрых словес твоих, сего ради зовем ти:

Радуйся, яко зарею Боговидения души осияваеши.

Радуйся, яко блистании проповедания спящие во тьме неведения просвещаеши.

Радуйся, яко из глубины суетства человеки извлекаеши.

Радуйся, яко тех верою ко Христу обращаеши.

Радуйся, яко овец Христовых во двор Отчий приводиши.

Радуйся, яко тамо на пастбищах тучных их питаеши.

Радуйся, Иакове, апостоле Христов и молитвенниче о душах наших.

Кондак 8

Житие честно и пречудно имел еси, желанием бо желание неодержимо прием, сего ради Владыка, Своего богатного и честнаго даяния обрет тя сосуд вместящь, обилует даровании, иже паче ума таинств, имиже просвещаеши души, любовию приступающие и вопиющие Богу, вся во благое устрояющему: Аллилуиа.

Икос 8

Весь исполнен быв любве Божественныя, явился еси вместилище даров Святаго Духа: недужныя исцеляя, прокаженныя очищая, мертвыя воскрешая, покаяние, вводящее в жизнь вечную, проповедывал еси; приими убо от нас, грешных, похвалы сицевыя:

Радуйся, благодати Божия вместилище.

Радуйся, Духа Святаго обиталище.

Радуйся, чудоточная реко, цельбоносныя в болезнех силы.

Радуйся, источниче наставлений, приводящих к познанию правыя веры.

Радуйся, коварства лукаваго сатаны обличаяй.

Радуйся, верныя от козней его защищаяй.

Радуйся, Иакове, апостоле Христов и молитвенниче о душах наших.

Кондак 9

Свыше разжегше дыхание нуждное Утешителя яве показа тя мудра Богогласника, ветийствующа величия воплощшагося Слова, Егоже и самовидец был еси, всегда вопия: Аллилуиа.

Икос 9

Ветийство мудрости человеческия и прельщение неверных обличил еси и многия от них к вере Христове привел еси, тии же, от греха ко спасению обратившеся, немолчно взываху:

Радуйся, служителю присносущныя жизни.

Радуйся, трубо, возвестившая миру Предвечнаго и Безначальнаго Бога.

Радуйся, человечество и Божество Христово нам изьясняяй.

Радуйся, дивная словеса и наставления Господня нам возвещаяй.

Радуйся, любви делом и истиною нас научаяй.

Радуйся, пребывающим в любви пребывание в них Бога обещаваяй.

Радуйся, Иакове, апостоле Христов и молитвенниче о душах наших.

Кондак 10

Крепчайше грома явися твое провозглашение, законного образа шумение, Христа бо возгремел еси вселенней всей, Бога и Содетеля, и Избавителя, волхва Гермогена с учеником его Филитом вразумил еси, да познают Единаго Триипостасного Бога, вопиюще Ему: Аллилуиа.

Икос 10

Новая чудеса показал еси, Иакове, егда донесший на тебя Иосия во Христа уверовал еси, и умерщвляем за имя Христово, мученическим венцем украсился, взывающе тебе:

Радуйся, смирению и кротости нас научаяй.

Радуйся, сатанинския духи от человек изгоняяй.

Радуйся, чудесы твоими неверующих обращаяй.

Радуйся, учением твоим верныя во истинней вере утверждаяй.

Радуйся, Небесными тучами душевныя бразды напаяяй.

Радуйся, плодоносны сердца Христу содеваяй.

Радуйся, Иакове, апостоле Христов и молитвенниче о душах наших.

Кондак 11

Видети тя злодеи и убийцы, якоже твоего Владыки прежде, не терпяше, убивают мечем подражателя Христу, распятому плотию за человеки: тех бо деяния укоряя, твоего жития предложением обличил еси, темже, Богоблаженне, чашу испил еси, якоже обещался еси Владыце, и крещением Сего крестился еси, Емуже ныне усердно зовеши, радуяся: Аллилуиа.

Икос 11

Егда злочестивый Ирод воздвиже гонение на христианы; тогда и тебе, яко усерднаго исповедника имене Христова, на смерть предал еси, светозарная же душа твоя, достигши в меру возраста совершеннаго, познала есть приближение времене, егда подобает тленному наследити обещанное нетление и смертному обещанное безсмертие, сего ради смиренно приял еси Божие о тебе изволение и мученическою кончиною земнаго твоего жития зловерие Иродово обличил еси. Мы же, ревности твоей о славе Божией дивящеся, воспеваем тебе тако:

Радуйся, яко страсти и смерти Учителя твоего поревновал еси.

Радуйся, яко Егоже и славы причастник соделался еси.

Радуйся, по обетованию Того возседый на единем от дванадесяти престолов.

Радуйся, творяй на том суд и правду посреде людей Божиих Израиля.

Радуйся, наслаждаяйся лицезрением Сладчайшаго Иисуса, к Немуже всею душею стремился еси.

Радуйся, от Его милосердия ходатайствуяй нам вся благая.

Радуйся, Иакове, апостоле Христов и молитвенниче о душах наших.

Кондак 12

Поюще труды твоя во апостольстве и чудеса и исцеления, яже источал еси, и источаеши благодатию Духа Святаго, в тебе обитающаго, восхваляем Бога, даровавшаго нам таковаго путеводителя, наставляющаго нас на путь спасения и милосердующаго о немощех наших и вопием тобою Ему: Аллилуиа.

Икос 12

Свято прешед твое житие, святых селения достигл еси, идеже радуяся, зриши зарю трисиянную, еяже наслаждаяся, премудре, певцы твоя, предстоящия у святых мощей твоих, исполнены веселия и радости покажи, поющия ти:

Радуйся, благовестниче веры Христовы усерднейший.

Радуйся, учителю Церкве Христовы изряднейший.

Радуйся, Божественных Тайн возвестителю.

Радуйся, святителей образе и мучеников правило.

Радуйся, преподобных помоще и праведных венче.

Радуйся, всех верных, ко твоему заступлению прибегающих, скорый помощниче и покровителю.

Радуйся, Иакове, апостоле Христов и молитвенниче о душах наших.

Кондак 13

О преславный и всехвальный апостоле Христов Иакове, Твоим всесильным ходатайством ко Всеблагому твоему Учителю и нашему Владыце и Господу испроси нам вся благая временная и вечная и христианскую кончину жития, да с тобою и со ангельскими лики в селении праведных воспоем Триипостасному Богу: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва апостолу Иакову Зеведееву

О, великий угодниче Божий, богоизбранный и богопрославленный апостоле Иакове, брате Господень! Ты еси великий архиерей града Святаго, теплый наш заступниче и ходатай, предстоящий Престолу Пресвятыя Троицы.

Не отрини нас от твоего заступления, но воздвигни нас низверженных многими грехи.Яко священномученик, имеяй власть решати и вязати, разреши зол наших соузы и любви Божией причти нас и Царствия Небеснаго причастники, блаженне соделай молитвами твоими.Моли Христа Спаса, да сподобит непреткновенно совершати наше земное странствие, да вечныя и блаженныя жизни на небеси сподобимся и тамо, с тобою вкупе, выну восхваляти Троицу Нераздельную, воспевати Едино Божество Отца, и Сына, и Духа Всесвятаго, во веки веков. Аминь.