Акафист святителю Мартину Исповеднику Римскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный Воеводою и Господом Сил на Кафедру Святейшей древней Церкви Римстей. Украсил еси собою Петров Божественнен Престол, и на того камене Церковь Православную непоколебиму сoблюд, Мартине, и с Верховным Апостолом прославился еси дивно в невечернем дне Царствия Христова. Сего ради, да зовем ти:

Радуйся, святителю Мартине, твердыя веры православныя, Исповедниче.

Икос 1

Архангелы и ангелы пришед на Собор во град святый Рим со апостолы Петром и Павлом, вразумляя Святых Отцев Церкви вручити ти Престол святых Первоверховных Апостолов во время тяжкое и лютое, егда Церковь Божия раздираема бысть волками лютыми и дивими, расхищающими стадо Христовых словесных овец. Ты же, приял еси благодать Первосвятительства, святейшим твоим словом, Отче, Церковь Божию упасл еси, всесвященное учение яве утвердил еси, еретические полки низвергл еси. Сего ради приими от нас сицевая:

Радуйся, Мартине, православных учений наставниче всеславне;

Радуйся, Верховника священных повелений хранителю неложне;

Радуйся, лжи истеннейший обличителю;

Радуйся, словесе Божественного учителю;

Радуйся, реко, духовных вод исполненна;

Радуйся, приснонаполняющий души наша ко благоплодию разумному;

Радуйся, свешнице, благочестия светом сияюще;

Радуйся, горо, точащая Божественное радование;

Радуйся, священнодействинниче священнейший;

Радуйся, чудодетелю честнейший;

Радуйся, Божественных словес изъявителю;

Радуйся, смрадных ересей обличителю;

Радуйся, святителю Мартине, твердыя веры православныя, Исповедниче.

Кондак 2

Видя, Святителю, плевелы Павлом, патриархом Цареградским, разсеяваемыя посреде пшеницы благочестивыя веры, уразумев сие, яко учение еретическое и зловредное, противу глаголемое учению Святых Отцев, иже в Халкидоне, сый исполнен, Всеблаженне, Божественныя ревности, собрал еси священнен, Мартине, собор, иже в Латеране, церковное утвердил еси предание. Посреде же Собора отвергл еси Пирра, Сергия и Феодора, Кира же и подобныя, тем буесловящия злославныя. Учение же православное: иже существа два и две воли, и действа сугуба исповедующе, со Святыми Отцы вопия Богови: Аллилуиа.

Икос 2

Разум недуговавший, безумнаго Павла, патриарха, во Христе едину мудрствующаго волю, разумом истинным и верою украшаем, обличил еси, Мартине, явственно. Сына Отцу равночестна и сопрестольна исповедал еси. Во Единей Ипостаси действа два, носяща, проповедал еси. Мы же, тобою в вере утверждаеми, взываем тебе таковая:

Радуйся, Мартине, учиниче апостола Петра, верный;

Радуйся, священнодетелю, всехвальне, скинии истинныя;

Радуйся, хлебом неснедаемым паству свою насытивый;

Радуйся, Чаше, пива Божественнаго точащая;

Радуйся, венцем неувядаемым от Бога увенчанный;

Радуйся, блаженства Богоизбранного сподобивыйся;

Радуйся, ходатаю к Богу о всяком человеце присный;

Радуйся, вознице, всех ведущий во обители Горняя;

Радуйся, свеще, на Кафедре Римстей ярко горевшая;

Радуйся, светильниче, свете жизни имущий;

Радуйся, от запада убо исходяща;

Радуйся, и даже на востоце убо являющаяся;

Радуйся, святителю Мартине, твердыя веры православныя, Исповедниче.

Кондак 3

Cилою вражиею из Рима нуждею изгнан бысть, отче блаженне Мартине, неправедно от престола своего отлучаемь. От человек неправедных пострадати благоволил еси. Стоя среди пребеззаконнующих, яко законен страдалец, от них оскорбляемь и наругаемь, и влачаемь всуе, пребыл еси в вере непревращен, выну поя Богови: Аллилуиа.

Икос 3

Имея воистину богатство неистощимое в сокровищнице сердца своего сокровенное, учение святоотеческое о Святей Троице, священнейшим твоим словом, отче, всесвященное учение яве утвердил еси, еретические полки низвергл еси, претерпеваше изгнания и темницы, и скорби многи, всю разсеял еси ереси прелесть. Сего ради терпению твоему дивящеся, вопием ти тако:

Радуйся, страдальче всехвальне;

Радуйся, мучениче предивне;

Радуйся, многовременныя темницы претерпел еси;

Радуйся, яко хранитель непорочныя веры пребыл еси;

Радуйся, еретическую тьму умалил еси;

Радуйся, светом спасительным, учения Христова, вся просветил еси;

Радуйся, лукавых человек уста заградил еси;

Радуйся, верных пети хвалу Богови научил еси;

Радуйся, подвигом исповедничества украсился еси;

Радуйся, с патриаршими лики и святительми сопричислился еси;

Радуйся, от запада до востока возгремел еси;

Радуйся, зарями благочестия и Землю Русскую просветил еси;

Радуйся, святителю Мартине, твердыя веры православныя, Исповедниче

Кондак 4

Буря помышлений сумнительных смущает наш ум, како святитель Христов от беззаконных поругаем бывает. Враждебно тя, якоже зверие влекоша, веригами связаша, посреде града ругательно укоряше и хуляше, и без студа на тя нападающа. Ты же все мучения претерпел еси, Первоверховному Предшественнику своему подражая, взываше Богови: Аллилуиа.

Икос 4

Cлыша Павел, патриарх цареградский, дыхание смерти над ним крылья своя простершия, клятвою увещаваше царя, да престанет более озлобляти Святаго Старца. Кесарь же злобою дышуще, не прияша моления патриарха, паки и паки Страдальца мучению предаде, в темницу всади его, посем в заточение в Херсонес сосла, идеже гладом, теснотою и всяким потреб недостатком моримый по двою лету ко Господу отыде. Мы же славя скончание мучений твоих и ко Господу преселение, вопием тебе сице:

Радуйся, волки пришедшия в кожах овчих, далече от стада Спасова отгнал еси;

Радуйся, раздранную ризу Христову и растерзанную песьими челюстьми, мудре сшил еси;

Радуйся, апостольских преданий хранителю был еси;

Радуйся, Христа Иисуса, яко Бога же и человека, две воли и действа имуща, православно проповедал еси;

Радуйся, жертва и жритель был еси;

Радуйся, пожерл еси себе Богу веры ради;

Радуйся, умертвился еси, богоглаголиве, миру всему;

Радуйся, Единому же Богу жив пребыл еси;

Радуйся, священным помазанием и мученическою кровию к Богу приблизился еси;

Радуйся, многообразных ради мучений в нетления ризу облеклся еси;

Радуйся, на небесех ныне живеши;

Радуйся, Божественному Престолу присно предстоиши;

Радуйся, святителю Мартине, твердыя веры православныя, Исповедниче.

Кондак 5

Боготечная звезда явился еси, преблаженне отче Мартине, возсиял еси к востоком от запада, всю зарями землю просветил еси и отгнал еси тьму еретическую глубочайшую, и всех научил еси взывати Богови: Аллилуиа.

Икос 5

Видеша архиереев и священниц множества, страха ради кесарева, учение еретическое принимающих, восстал еси пред судищем судящих тя, осуждая прелесть проповедающих едину во Христе волю, и мученическим украсился еси венцем. Того ради слышиши ото всех сице:

Радуйся, страждущих прославление;

Радуйся, мучеников величание;

Радуйся, железом окованный, непреткновенно стезею Христовою шествовавый;

Радуйся, кровию своею обогренный, вшедый во Святая Святых;

Радуйся, постом, страстныя играния отогнавый;

Радуйся, воздержанием, желание претворивый;

Радуйся, безбожия пустыню, рекою твоих трудов напоивый;

Радуйся, в море слез своих, фараона мысленнаго потопивый;

Радуйся, в кровныя капли со слезами смешанныя, многообразнаго змия погрузивый;

Радуйся, вместо трудов и болезней, красоту Едемскую зрети сподобивыйся;

Радуйся, в темнице заточенный, ересь в небытие затворивый;

Радуйся, со престола низложенный, врагов и супостатов Церкви Божией низложивый;

Радуйся, святителю Мартине, твердыя веры православныя, Исповедниче.

Кондак 6

Проповедь словес твоих, Богомудре, во всю землю дивно изыде. Тем же явися предтечею Вселенскаго Собора, иже в Царьграде, сего ради на небесех обрел еси мзду трудов твоих, демонския погубил еси полки, ангельские достигл еси воинства, ихже житию без порока поревновал еси, дерзновение имея ко Спасу, вопия Ему: Аллилуиа.

Икос 6

Возсиял еси, Мартине, Троицы рачителю, в тебе новый апостол Павел, научающа письмены своими ясно вере Божественней, еже славити Христа во двою естествах, волях же и действах суща, сего ради в песнех достойных, вернии того почтим взывающе:

Радуйся, проповедниче веры;

Радуйся, заграждение скверных, незатворенныя уста;

Радуйся, благодать Духа источивый от сладкого и медоточного твоего языка;

Радуйся, огнь горящь на ереси;

Радуйся, Философе, разум земнородных и небесных в себе собравый;

Радуйся, премудре, безмерным желанием подобником Христа явился еси;

Радуйся, подражателю Спасовых страстей;

Радуйся, на Кресте своем Христу сраспялся еси;

Радуйся, живоносное заре и солнце, заблуждшим;

Радуйся, трубо Божественная, возгремевшая учение Христа неслышашим;

Радуйся, саде новоцветный в вертограде Христовых святителей;

Радуйся, плоде божественнаго разума, имже питаются вернии;

Радуйся, святителю Мартине, твердыя веры православныя, Исповедниче.

Кондак 7

Хотя богомерзкия ереси кромешную тьму разсеяти, свете воистину Богосветлый явился, Мартине, людие римстии усердно пасый, весь мир своими благодатными лучами наполнил еси. И от нас убо богохульные ереси отжени, да благоприятно Богу вопием: Аллилуиа.

Икос 7

Новаго тя Самсона воителя на сопостаты разумеем, отче святый Мартине, нашествие филистимлян новых на богоизбранный народ православный оружием святительства своего отражающа, мир и тишину же божественную водворяюще, вопиющим таковая:

Радуйся, облечеся во браню правды;

Радуйся, возложи на ся шлем и суд нелицемерен;

Радуйся, приявый щит непобедимый преподобия;

Радуйся, приемый силу от Вышняго;

Радуйся, препоясавыйся мечем духовным глагола Божия;

Радуйся, обувыйся в сандалии истины, во еже наступити на главу древняго змия;

Радуйся, прияша венец доброты от руки Господней;

Радуйся, дана ти от Господа держава Царствия;

Радуйся, в вои с сопротивными яко злато в горниле заколенный;

Радуйся, яко всеплодие жертвенное приявый;

Радуйся, яко истину присно глаголят уста твоя;

Радуйся, яко мерзки пред тобою уста лживыя;

Радуйся, святителю Мартине, твердыя веры православныя, Исповедниче.

Кондак 8

Cтранствия земнаго течение совершил еси, во обители горняя преселился еси. Сердцем верующе в правду, усты же исповедующе во спасение, яко Господь име два естества и воли две, и нас научил еси присно воспевати Ему: Аллилуиа.

Икос 8

Весь исполнися любви Христовой, яко пастырь добрый, душу свою полагает за овцы, данные стада тебе верно упасл еси, многия ради пользы был еси столп и утверждение истины, сего ради вопием ти усердно:

Радуйся, пастырю добрый, овцы на пажитех тучных питавый;

Радуйся, страже неусыпный, от волков хищных стада своя сохранивый;

Радуйся, овцы заблуждшия ко Христу возгласивый;

Радуйся, ересьми ослепленныя, во ограду Церкви Христовой призвавый;

Радуйся, пастырю предобрый, спасающий словесное стадо от всяких бед;

Радуйся, двере, еюже овцы вниде во двор Отчий;

Радуйся, пастырю прелюбимый, душу свою положивый за овцы;

Радуйся, пище духовная, алчущую паству Евангельским словом напитавый;

Радуйся, скорбящим, Божественная радость;

Радуйся, болящим, скорое исцеление;

Радуйся, пристанище тихое, в неже притекающие спасаются;

Радуйся, избавителю готовнейший, хранителю, спасительный всем;

Радуйся, святителю Мартине, твердыя веры православныя, Исповедниче.

Кондак 9

Всю разсеял еси ереси прелесть, мученически подвизаяся, болезни многи, Мартине, претерпел еси, за Христа Бога, дремания твоим веждом не дал еси, дондеже вселение Богу был еси, и ныне изшел еси к неболезненней жизни, вопия Богови: Аллилуиа.

Икос 9

Витийствующие уста бездверныя лукавых человек заграждаются твоим словом, досточудне отче Мартине, разседеся лукавый при ногу твоею священною, и является сияющи учение Божественное паче солнца, сего ради светом небесным облистаемии, вопием тебе похвальная:

Радуйся, апостолов приемниче;

Радуйся, страдальцев единонравниче;

Радуйся, постников единоревнителю;

Радуйся, догматов предложителю;

Радуйся, истины водружение;

Радуйся, веры утверждение;

Радуйся, чистоты селение;

Радуйся, благовоние Духа;

Радуйся, превеликое сокровище познаний;

Радуйся, основание Христовой Церкви;

Радуйся, Боготочная реко разумений;

Радуйся, потопление богопротивных учений;

Радуйся, святителю Мартине, твердыя веры православныя, Исповедниче.

Кондак 10

Cпасти хотя людие земли Корсунския, молитвенником за отечество свое новое явился еси, Мартине. Землю Русскую святым гробом и телом твоим обогатил еси, при нем же в церкви Влахернстей святый равноапостольный князь Владимир святое Крещение прияти изволил есть, вопия тобою прославляемому Богу: Аллилуиа.

Икос 10

Стены новаго Иерихона-Царьграда возтрепетаху, немогущии слышати трубный глас обличений твоих, богоглаголиве отче Мартине. Камение же мертвии возопиша, зане сердца людей окаменеша. Мы же тя, Иисуса Навина, разумеем, ведущаго нас в землю обетованную и вопием к тебе сицевая:

Радуйся, скверну окаменненых сердец наших отымающий;

Радуйся, каменю, из него же изтече живоносныя воды пучино;

Радуйся, жезле священства Ааронова, мертвую душу нашу прозябший;

Радуйся, манно богоданная, еюже сладостно нас питавый;

Радуйся, плоде земли обетования, его же нам в снедь Господь дарова;

Радуйся, агнче непорочне, на заколение себе нас ради приведый;

Радуйся, ветве райская, она же даровася нам в знамение жизни вечныя;

Радуйся, зерцало, в нем же имамы отражение грядущаго;

Радуйся, звездо, ведущая нас к яслем Спасителя;

Радуйся, столпе огненый, во тьме греховной блуждающим;

Радуйся, древо многолиственное, под сенью своею в знои трудов всех укрывающее;

Радуйся, одеждо теплая нагих, в мразе и хладе живущих;

Радуйся, святителю Мартине, твердыя веры православныя, Исповедниче.

Кондак 11

Пением ангельским душу твою сопровождаху вои небесныя, егда преселился еси от сего временнаго к небесному, святителю отче Мартине. Гроб же твой, идеже почивает честное тело твое благоухание источает, яко рай Божий, облагоухая верныя. Мы же окрест его собравшися в веселии поем: Аллилуиа.

Икос 11

Светоносная твоя, отче Мартине, возсиявши память. Просвещает души благоговейно сию совершающих, и причастники Божия света явленно совершает. Юже достойно, Богомудре, песньми величаем:

Радуйся, светолитием Христовым просвещаемь, омраченную мою душу просвети;

Радуйся, венец победы носяща и почести приемша, ихже и нас общники сотвори;

Радуйся, имевый власть вязати и решити, разреши зол моих соуз;

Радуйся, любви Божией причастниче, соделай и Царствия Небеснаго мя причастника;

Радуйся, жезлом веры отгоняеши ересей ловитвы, отгони от нас ересей множество;

Радуйся, морем веры исповедания прелести угасил еси злословие, угаси и огнь неверия иссушающаго мя;

Радуйся, страданиями твоими, яко мечем, бесовския полки победил еси, и чтущих тя, ихже злобы избави;

Радуйся, мучений ради наслаждаешися божественнаго радования, со Всеми Святыми, имже общники и нас быти сподоби;

Радуйся, целомудрия чистоты препоясався мужеством, даждь и нам чистоту целомудрия;

Радуйся, плотския мудрствования умертвил еси, умертви и телесныя страсти озлобляющия нас;

Радуйся, терпением твоим низложил еси вся шатания лукаваго, и молитвами твоими научи нас терпению;

Радуйся, благодать исцелений от руки Божественныя достойно приял еси, и недуг неудобных исцели моих тысящи;

Радуйся, святителю Мартине, твердыя веры православныя, Исповедниче.

Кондак 12

Благодать излияся во устнах твоих, небомудренне отче Мартине, был еси пастырь Христовой Церкви, уча словесныя овцы, веровати во Единаго от Святыя Троицы, яко Бога и человека, воли носяща прилично обема естествома. Сего ради днесь святую твою память светло празднуем, вопия тобою славимому Богу: Аллилуиа.

Икос 12

Песньми и псалмы совокупльшеся, твою славную память, Мартине, светло восхвалим днесь. Яко благолепна бо возсия и светоносна, украшена славою и благодатию. Темже играют ныне ангельстии чины, хвалят же мученицы со апостолы, твоих подвигов, Исповедниче, страдания. Темже и мы вопием тебе с ними:

Радуйся, учений Божественных основание незыблимое;

Радуйся, друзе Христов и сосуде честный;

Радуйся, духовный органе, грома Божественнаго мановение;

Радуйся, рая Божественнаго, благорасленный свете;

Радуйся, Троицы Всесвятыя, рабе благий и верный;

Радуйся, чинов Ангельских, сослужителю присный;

Радуйся, людей православных, славное величание;

Радуйся, поколебавшихся в вере, крепкое утверждение;

Радуйся, за истину униженных, возстание;

Радуйся, неповинных, от клеветы разрешение;

Радуйся, яко тобою от вечныя муки свобождаемся;

Радуйся, яко тобою вечнаго Царствия сподобляемся;

Радуйся, святителю Мартине, твердыя веры православныя, Исповедниче.

Кондак 13

О, пречудный и предивный отче наш Мартине, великий чудотворче и святителю Христов, нынешнее наше малое приими приношение, умоли Господа Сил и всея твари Создателя, в час исхода душ наших, избавитися вечных мук и адскаго страдания, да с тобою и со Всеми Святыми вместе совокупльшеся, воспеваем Богу присно: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.