Акафист преподобному Филарету Глинскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранниче возлюбленный Божия Матери, дивный и преславный украсителю обители Глинския, преподобне и богоносне отче наш Филарете, пение сие немощное ныне приими и от всяких бед избави нас, вопиющих:

Радуйся преподобне отче Филарете, славо и украшение обители Глинския.

Икос 1

Ангельски житие провождаше, сподобился еси ликом ангельским причтения, отче преподобне Филарете, и ныне со безплотными ликующе, молитву приносиши всех Творцу и Богу о всех, славословие сицевое ти возглашающих:

Радуйся, ангелов собеседниче.

Радуйся, человеком наставниче.

Радуйся, всех святых сомолитвениче.

Радуйся, христианом помошниче.

Радуйся, сопричастниче вечныя радости.

Радуйся, приятилище божественныя сладосте.

Радуйся, чудес Христовых всеславное явление.

Радуйся, страны нашея похвало и утвержение.

Радуйся преподобне отче Филарете, славо и украшение обители Глинския.

Кондак 2

Ведуще, яко много может молитва праведнаго, к тебе, отче, прибегаем и тя усердно молим: милости от Господа испроси всем, верою воспевающим Того славу и величество и зовущим: Аллилуиа.

Икос 2

Разум имущь благодатию Божиею просвещен, стяжал еси духовная дарования и явился еси провозвестник вечнаго Евангелия, чадом твоим истину выну проповедуя и путь ко спасению указующе всем, взывающим ти сице:

Радуйся, пастырю наш добрый.

Радуйся, отче наш благодатный.

Радуйся, присное заблуждающих вразумление.

Радуйся, веры преславныя утверждение.

Радуйся, милостей Божиих провозвестниче.

Радуйся, правды Божией светильниче.

Радуйся, проповедниче богопросвещенный.

Радуйся, в добродетели преславно утвержденный.

Радуйся преподобне отче Филарете, славо и украшение обители Глинския.

Кондак 3

Сила Вышняго от юности храняше тя, отче достославне, и на путь спасения наставляше, егда восхотел еси стезею шествовати теснаго жития иноческаго, Господу усердно работая и непрестанно вопия: Аллилуиа.

Икос 3

Имея желание всеусердное Господу Своему поработати, восприял еси образ монашескаго равноангельнаго жития и вся искушения и соблазны врага вселукаваго преоборол еси, сего ради похвалы сицевыми ублажаешися:

Радуйся, лику иноческому сопричтенный.

Радуйся, житием добротетельным светло украшенный.

Радуйся, в ризу правду облекшийся.

Радуйся, благодатных дарований сподобльшийся.

Радуйся, отцем древним всеусердно подражавый.

Радуйся, чистоту тех и смирение стяжавый.

Радуйся, мира суету и страстей течение отринувый.

Радуйся, чистоту и богомыслие паче всяческих возлюбивый.

Радуйся преподобне отче Филарете, славо и украшение обители Глинския.

Кондак 4

Бурное море житейское не возмогоша потопити спасительную ладию молитвенную, на нейже подвиг свой безпрепятственно совершил еси, отче наш Филарете, и достигл еси необуреваемаго пристанища Христова, идеже песнь воспевается: Аллилуиа.

Икос 4

Слышаше в сердце своем призыв Христов, на подвиг тя призывающий, мужественно Господу последовал еси, со апостолом вопия: вся могу о укрепляющем мя Иисусе, темже и мы пение ти приносим, глаголюще:

Радуйся, крест служения Господу приявый.

Радуйся, всему миру образ благочестия явивый.

Радуйся, благодатию Божией укрепляемый.

Радуйся, светом лица Божия выну озаряемый.

Радуйся, сладость молитвы в житии своем вкусивый.

Радуйся, обеты иноческия неврежеднно сохранивый.

Радуйся, от падений греховных нас ограждающий.

Радуйся, на путь правды нас премудре наставляющий.

Радуйся преподобне отче Филарете, славо и украшение обители Глинския.

Кондак 5

Божиим светом Всеблагим разум твой просвещен бысть, сего ради многая и преславная дела совершил еси во славу Божию и во прославление Пречистыя Матери Его, храмы благоукращающе и Господу воспевающе: Аллилуиа.

Икос 5

Видяще благодати Божией обильное излияние на тебе, богомудре отче, явленное, епископ Евгений призва тя к игуменскому служению и на свещник высокий воздвиже тя, да светом любви осияеши братию обители Глинския и ко Христу неврежденно приведеши паству твою, пение сицевое ти приносящую:

Радуйся, жезл наказаний игуменский восприявый.

Радуйся, паству твою тем добре управивый.

Радуйся, любви отеческия откровение.

Радуйся, промысла Божия всечудное совершение.

Радуйся, в молитве к Богу предстоятелю.

Радуйся, Небесных благ всеславный раздаятелю.

Радуйся, ко благочестию нас ученьми своими наставляющий.

Радуйся, от всякия напасти нас избавляющий.

Радуйся преподобне отче Филарете, славо и украшение обители Глинския.

Кондак 6

Проповедует обитель Глинская славу деяний твоих, досточудне отче Филарете, храмами Божиими красующеся и собором святых похваляющееся, и, поминающе наставления твоя, Богу непрестанно хвалу возносит, вопиюще: Аллилуиа.

Икос 6

Возсия слава Божия и явися спасительное промышление Господне, еже о Церкви Святей. Тобою бо, отче достославне Филарете, обитель Владычицы Богородицы благоукрасися и житие иноческое в той благообразне исправися, темже чада твоя духовная пение пение ти приношаху сицевое:

Радуйся, храмов Божиих украсителю.

Радуйся, веры и благочестия хранителю.

Радуйся, иноческих обетов блюстителю.

Радуйся, нечестивых обычаев искоренителю.

Радуйся, Пречистой Владычице чисте послуживый.

Радуйся, благословение Ея во смирении восприявый.

Радуйся, волю Господню всецело исполнивый.

Радуйся, Небеснаго Отечества достигнувый.

Радуйся преподобне отче Филарете, славо и украшение обители Глинския.

Кондак 7

Хотяще всем сердцем прославити Пресвятую Владычицу Богородицу, украсил всеславно обитель, во славу Имени Ея Преславнаго воздвигнутую, темже прославление от Нея прияти сподобился еси и душа твоя, отче треблаженне Филарете, обитель благоукрашенная явися, идеже Господь выну прославляется и хвала Ему присно возсылается: Аллилуиа.

Икос 7

Нового Моисея, путеводящя к Небеси стадо свое, зрим тя, преподобне отче наш Филарете, ученьми бо своими наставляеши к добродетели и подвигу вся, пеньми сицевыми тя ублажающия:

Радуйся, наставниче наш благодатный.

Радуйся, отче милостивый и кроткий.

Радуйся, трапезою Небесною насыщенный.

Радуйся, питием безсмертия напоенный.

Радуйся, словесы своими всех просвещающий.

Радуйся, ученьми своими всех утешающий.

Радуйся, светильниче, огнем добродетели возженный.

Радуйся, благодатию Христовою преукрашенный.

Радуйся преподобне отче Филарете, славо и украшение обители Глинския.

Кондак 8

Странну всякаго зла и порока соблюл еси душу твою, преподобне отче наш Филарете, и добродетели вместилище всеславное явился еси, Господу присно работая и всем житием песнь Ему составляюще похвальную: Аллилуиа.

Икос 8

Весь благодатию Божией облеклся еси, яко светлою ризою и боготканною, отче наш преподобне, темже и вшел еси непрепятственно во святилище Божие, идеже мольбы и моления присно приносищи всех благих Подателю о чадех твоих, песньми тя сицевыми похваляющих:

Радуйся, непрестанно о всех молитвы приносящий.

Радуйся, о чадех твоих духовных присно ходатайствующий.

Радуйся, молитвы кадило благоуханное.

Радуйся, стено ограждения нерушимая.

Радуйся, звездо всесветло пламенеющая.

Радуйся, к жизни нетленней путь указующий.

Радуйся, яко предстательством твоим мир с Богом обретаем.

Радуйся, яко путем твоим к Небеси восходим.

Радуйся преподобне отче Филарете, славо и украшение обители Глинския.

Кондак 9

Всякия избави нас напасти и скорби, отче наш богомудре Филарете, ты бо в молитве присно предстоиши престолу Божию и молишися о душах наших, яко истинный друг Христов и чудотворец всемилостивый, непрестанно Богу взывающе: Аллилуиа.

Икос 9

Извитийствовал еси всемудренно уставы и правила жития иноческаго, отче преславне Филарете, пекущеся о соборе монашестующих и о дружине святей, от Бога попечению твоему врученней, яже похвалы и пение ти возсылают сице:

Радуйся, спасения нашего споспешниче.

Радуйся, от лукавства духов злобы всемощный помощниче.

Радуйся, Православия утверждение.

Радуйся, злобы адския обличение.

Радуйся, Путем Господним присно ходивый.

Радуйся, многих от путей погибельных отвративый.

Радуйся, черноризцев похвало всерадостная.

Радуйся, православных песнь всеславная.

Радуйся преподобне отче Филарете, славо и украшение обители Глинския.

Кондак 10

Спасение многих взыскал еси, отче богомудре, и сам для всех был еси всем, глаголу первоверховнаго апостола последствуя, да приобрящеши вся Христу Богу и к невечернему Царствию приведеши, идеже песнь Творцу всяческих приносится: Аллилуиа.

Икос 10

Стена молитв присно защищает обитель Глинскую и покров твой выну заступает всех, подвиг свой зде совершающих со упованием твердым на всемилостивую Владычицу и твое отеческое предстательство, темже лицы иночестии похвалу ти составляют, взывающе:

Радуйся, крепкое ограждение от находящих на ны искушений.

Радуйся, нетрудное отгнание напастей и скорбей.

Радуйся, мечу, злочестие посецающий.

Радуйся, щите, верных защищающий.

Радуйся, росо, еюже огнь безбожия угашается.

Радуйся, море, имже зловерие потопляется.

Радуйся, Царствия Христова наследниче.

Радуйся, вечныя Пасхи причастниче.

Радуйся преподобне отче Филарете, славо и украшение обители Глинския.

Кондак 11

Пение паче иных принесл еси Престолу Вседержителя и труды множайшими стяжал еси милость Божию. Темже, яко раб благий и верный, талант сторично преумноживший, вшел еси в радость Господа своего и водворился еси во дворех правды, идеже песнь присно воспевается: Аллилуиа.

Икос 11

Светом немеркнущим озарена бысть душа твоя во время исхода твоего, егда шествовала еси ко Владыце и Пастыреначальнику, крест яко победы знамение носяще, Господа благодаряще и молитву возносяще Ему о всех, похвалы сицевыми тя славящих:

Радуйся, селений небесных преславно достигнувый:

Радуйся, в чертозех пресветлых водворивыйся.

Радуйся, на брак Агнчий всерадостно возшедый.

Радуйся, венцем безсмертия увенчанный.

Радуйся, Светом Невечерним озаренный.

Радуйся, Славою Божиею просвещенный.

Радуйся, крепкое падающих возведение.

Радуйся, право стоящим утверждение.

Радуйся преподобне отче Филарете, славо и украшение обители Глинския.

Кондак 12

Благодати Божией источник неоскудеваемый явишася всем верным мощи твоя честныя, излевают бо токи исцелений и помощь Небесную всем, с верою к тебе прибегающим и тобою Господу молитву приносящим: Аллилуиа.

Икос 12

Поюще и восхваляюще подвиги и труды твоя, поминаем наставления твоя, отче наш всеславне Филарете, чтим память твою всерадостно и мощем твоим поклоняемся достолепно, молитвы и моления возсылающе:

Радуйся, сосуде, благодатию преисполненный.

Радуйся, ковчеже, дарами Духа всеукрашенный.

Радуйся, чудес источниче неистощимый.

Радуйся, исцелений кладезе неисчерпаемый.

Радуйся, вселукавых духов прогонителю.

Радуйся, козней диавольских победителю.

Радуйся, яко тобою от напастей избавляемся.

Радуйся, яко тобою благодати сподобляемся.

Радуйся преподобне отче Филарете, славо и украшение обители Глинския.

Кондак 13

О, всеславне и досточудне отче наш Филарете, пустыни Глинския преславный возродителю и о всем мире ходатае теплейший, от обителей славы Горняя призри на чада твоя и молитвами твоими от всяких бед сохрани, купно с тобою песнь Господу приносящих: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.