Акафист преподобному Алексию Голосеевскому Киевскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и претеплый о нас пред Богом заступниче, пастырю добрый и учителю благочестия; кротостию и терпением, любовию и щедродаянми аки светило просиявый, хвалебное пение восписуем ти, чтущии святую память твою. Ты же, яко имеяй велие дерзновение ко Господу, от всяких нас бед и скорбей свободи, да зовем ти:

Радуйся, преподобне отче наш Алексие, дивный молитвенниче и богомудрый наставниче.

Икос 1

Aнгели и праведных души на небесех о тебе, блаженне отче, возрадовашася, ангельский бо чин восприявши, ангельское житие явил еси, душу твою ризою добродетелей осенил, словом и житием  верныя наставляя. Сего ради с умилением взываем ти сице:

Радуйся, Воронежским архипастырем Антонием, яко Божий слуга предреченный.

Радуйся, в древнем Киеве - граде на святую Пасху рожденный.

Радуйся, рождением твоим исполнивый обетование.

Радуйся, заповедям Христовым усердное послушание.

Радуйся, священства, иноков и мирян преискусное окормление.

Радуйся, Лавры Печерския и обители сея святое украшение.

Радуйся, преподобне отче наш Алексие, дивный молитвенниче и богомудрый наставниче.

Кондак 2

Видя голубиную кротость и доброту души твоея, Человеколюбец Господь избранным сосудом Своим сотвори тя и дарами Духа Святаго ущедри преизобильно. Ты же молитве и службе Божией бодренно прилежал еси и ум свой богомыслием возвышая, присно воспевал  Господеви ангельскую песнь: Aллилуиa.

Икос 2

Paзум богодухновен имея, преподобне отче, измлада вся красная мира сего презрел еси. Сия ведущи блаженный старец Феофил, узрев тя отроча богоизбранное в ограде Китаевой пустыни, иноческий путь предуказа ти, и провидя, паки пронарече яко быти тебе Христовым служителем. Мы же, дивящеся сим чудным обетованиям, умиленным серцем вопием ти:

Радуйся, святителем Митрофаном, аки звездою светозарною ведомый.

Радуйся, промыслом Божиим  немотою пораженный.

Радуйся, благочестие матери твоея Марии восприемый.

Радуйся, сладость попечения  и заботы о ближних вкусивый.

Радуйся,  воинскаго поприща царя земнаго  избегнувый.

Радуйся, на стезю доблестнаго воинства Христова управленный.

Радуйся, преподобне отче наш Алексие, дивный молитвенниче и богомудрый наставниче.

Кондак 3

Сила любви Божией проявися на тебе, преподобне отче Алексие, егда избавлен был еси Господом от недуга. Скорбящей матери о твоей немоте повеле святитель Киевский Филарет уповати на Бога, усердно молитися и раздаяти милостыню. Послежде в  день Пасхи Христовой приити со отроком в его келейную церковь, дабы вкупе с народом Божиим, укрепляясь надеждою, воспети воскресшему Спасителю: Aллилуиa.

Икос 3

Имеяй в душе упование истое на Иисуса Христа, премудрый Алексие, исцеление чудесне приял от Воскресшаго Господа: по скончании бо бдения благослови тя крестом архиерей Божий и повеле святительскую его палицу облобызати, абие же по трикратном Пасхальном приветствии владыки «Христос Воскресе!» отверзостася твоя уста, дабы велегласно отвещевати «Воистину Воскресе!». Темже и мы, благодаряще Господа за таковые милости, воспеваем ти сице:

Радуйся, в скорби сиротства щедроты Отчия обретый.

Радуйся, со тщанием послушанию в Лавре прилежавый.

Радуйся, старцев святых окормление яко многоценный бисер приявый.

Радуйся, аввам преискусным себе до конца предавый.

Радуйся, ум твой  изрядными знаниями обогативый.

Радуйся, и душу свою незапятнану страстьми сохранивый.

Радуйся, преподобне отче наш Алексие, дивный молитвенниче и богомудрый наставниче.

Кондак 4

Буpи греховныя избежав и страстей буйныя волны безвредно прошед, преподобне отче Алексие, в благоотишие послушания водворился еси, разделяя труды со святителем Киевским в  раздаянии милостыни неимущим. Нищии же и убогия возвеселившися воспеваху Богу: Aллилуиa.

Икос 4

Слышaл еси, отче Алексие, дела милосердия и труды благочестия Святителя Николая и пламенно подражати ему возжелал еси. Темже, добронравное отроча,  с архипастырем Киевским посещал еси домы убогих в нощные часы, тайно милостыню творя. Мы же, дивящеся сему достохвальному твоему послушанию, ублажаем тя сице:

Радуйся, от утра жизни твоея благое иго Христово на рамена приемый.

Радуйся, злато во черви по слову архипастыря вменивый.

Радуйся, вдов и калек милостивное снабдение.

Радуйся, душеспасительнаго нестяжания верное зерцало.

Радуйся, опечаленным и скорбным утешение выну приносящий.

Радуйся, сляцаемых тяготами неиждеваемою любовию Божией укрепляющий.

Радуйся, преподобне отче наш Алексие, дивный молитвенниче и богомудрый наставниче.

Кондак 5

Богохранимая обитель Лаврская взрасти тя, яко  в объятиях матерних. Обаче новое сиротство постиже тя, отче Алексие, егда благочестивии пестуны твоя старец Парфений  и  архипастырю Филарете ко Господу отыдоша. Но, напитанный благоуханным цветом духовных их наставлений,  ты смиренно нес послушания монастырския, поя Вседержителю Богу: Aллилуиa.

Икос 5

Видя юношу, восходящаго лествицею Богоугождения, потщался исконный враг кознями и прельщеньми восхитити тя от святыя обители, послав жену некую испытовати твою ревность ко Христу и целомудрие. Ты же юродивым странником Иоанном Босым благовременно увещанный бегати женского полу яко огня, вся прилоги лукаваго змия отринул еси, чаемого же иноческого подвига сподобился еси. Сего ради, дивящеся юношеской крепости и незаблудному разуму твоему, вопием ти таковая:

Радуйся, вся скорогибнущия блага мира презревый.

Радуйся, душею к сокровищам неветшающим прилепивыйся.

Радуйся, целомудрия и чистоты страже недремлющий.

Радуйся, в скорбех и искушениях адаманте несокрушимый.

Радуйся, честныя мощи Печерских угодников с любовию лобызавый.

Радуйся, в Селениих Горних с ними ныне веселящийся.

Радуйся, преподобне отче наш Алексие, дивный молитвенниче и богомудрый наставниче.

Кондак 6

Пpоповедник добродетельного жития явился, преподобне: кротость, незлобие, смирение в сердце твоем добре насадил еси. Темже, видяще твое усердие и духовное преуспеяние, чиноначалия обители удостои тя сана иродиакона. Сам же святитель Николай в благознаменитый день праздника своего повеле вне чреды облещи тя благодатию священства. Да сподобишися совершати Безкровную Жертву и непрестанно Господеви воспевати песнь хвалы: Aллилуиa.

Икос 6

Возсиял еси, богоугодным и ангелоподобным житием твоим, святе Алексие, егда ризничное послушание благоговейно несл еси, в воздыханиях слезных и молитвенных бдениях дни и нощи препроваждая, темже Печерским угодником уподобился еси, их же святыя мощи блюдя со тщанием, ежегодно переоблачал еси. Мы же, почитающе велии подвиги и труды твоя, глаголем сице:

Радуйся, чудныя добродетели благоискусно стяжавый.

Радуйся, святителя Николая покровительство снискавый.

Радуйся, угодником Печерским служителю верный.

Радуйся, благодатию Божиею изобильно напоенный.

Радуйся, убогих паломников благодетелю теплейший.

Радуйся, в уделе Богородицы шафран процветший.

Радуйся, преподобне отче наш Алексие, дивный молитвенниче и богомудрый наставниче.

Кондак 7

Хотя достойно заповеди Господни соблюсти, себе ни во что вменял еси, смиреннейший боголюбче. Обаче, служа у престола Божия в священном сане, преславных видений пред Святыми Дарами сподобился еси: старца бо юродивого Паисия  лик узрел еси светозарным, яко же Мотовилов преподобного Серафима Саровского осиянного  видех. Сему мы, грешнии, чудяхуся поем Богу: Aллилуиa.

Икос 7

Новых грозных испытаний на державу Российскую пришествие проразумел еси, досточудне Алексие, егда Господь откры тебе императора Александра грядущую кончину. В день бо оныя, священную проскомидию совершающе, обрел еси, преподобне, частицу за царя исторгнутую не светлой, но аки вином напитанной, и исполнился скорби, уведев Государя убиение. Сим велиим знамениям дивящеся, воспеваем ти сице:

Радуйся, сокровищами неизглаголанными Духа Святаго исполненный.

Радуйся, яко земля благая, плод сторицею произрастивый.

Радуйся, всяк путь неправды возненавидевый.

Радуйся, стопы своя по словеси Господа направлявший.

Радуйся, орле, ум свой от земных к небесным возносивший.

Радуйся, Божественного Света сияние неугасимое.

Радуйся, преподобне отче наш Алексие, дивный молитвенниче и богомудрый наставниче.

Кондак 8

Стpaнника, взыскующего тесных врат и подъявшего крест равноангельного подвига, невозможе терпети тя древний человеконенавистник и, явльшеся ти в некий день у раки Исаакия затворника, идеже мощи святаго переоблачал еси, устрашити восхоте: тьма бо згустися окрест, и глава сего змия, непрестанно многия зверовидныя зраки приемлюще, из пасти огнь источаше. Обаче ничесоже достиже лукавый, представ пред тобою и рекл: «Ты мене своим смирением побеждаеши…». Мы же, дивящеся твоему мужеству, вопием дивному во святых Богу: Aллилуиa.

Икос 8

Весь горя злобою, воздвиже на тя, преподобне, диавол двух девиц-сестер, внеуду благочестивых, внутрьуду же коварных и неблагодарных. Лжу бо и хулы начаша глаголати на тя, святый отче, и безчинства творити в Велицей Церкви, егда ты в оней служил еси. Видя сию брань от дерзких жен производимую, удалиша тя Лаврское начальство в Спасо- Преображенскую пустынь. Мы же, почитая  скорби твоя, и дивящеся кротости и смирению  умиленно взывaем сице:

Радуйся, в Велицей Церкви, «небеси подобной», жертву Богу приносивый.

Радуйся, исконного врага смирением и кротостию победивый.

Радуйся, мглу неправды светом любви Христовой разгнавый.

Радуйся, крине, от прилога лукавого неврежденный.

Радуйся, безчестия и досаждения безропотно претерпевый.

Радуйся, златица, очищенная огнем искушений.

Радуйся, преподобне отче наш Алексие, дивный молитвенниче и богомудрый наставниче.

Кондак 9

Вся ведши ко Христу, благодати и смиренномудрия преисполнен был еси, блаженне отче Алексие. Бисере бо многоценный обретаху в тебе братия Голосеевския пустыни,  имже Господь дарова тя на многая лета, яко чадолюбивого отца и присногорящую лампаду Святаго Духа. Ныне же мы, святыя мощи твоя почивающие зде лобызая, возносим Богу благодарственное пение: Aллилуиa.

Икос 9

Витии многовещаннии невозмогут изрещи, преподобне отче Алексие, похвалы  высоте доброплодныя души твоея. Святителем бо Петром Могилою содеянную в глухоманных дебрях пустыню прославил и облагоухал еси подвигами твоими, великий угодниче Христов. Сего ради воспеваем ти сице:

Радуйся, кротость и смирение в душах насаждавший.

Радуйся, пользе страданий и терпению учивый.

Радуйся, яко странных прелюбезно и усердно питал еси.

Радуйся, яко убогим щедро милостыню раздавал еси.

Радуйся, постниче сугубый, тем, «что Божия Матерь дает», насыщавыйся.

Радуйся, земный ангеле, люботрудно и в старости маститей подвизавыйся.

Радуйся, преподобне отче наш Алексие, дивный молитвенниче и богомудрый наставниче.

Кондак 10

Спасти хотя овцы твоя словесныя, любвеобильный пастырю, деннонощно бдел еси стрегущи стадо духовное, душу свою по заповеди Иисуса Христа положити готовый: да не изгибнет кая овечка во тме от хищных волков. Сего ради и мы, на предстательство и помощь твою уповая, вопием Богу: Aллилуиa.

Икос 10

Стена и прибежище необоримое к тебе притекающим был еси, отче Алексие, молитвы бо твоея великая сила и до преисподней достигала еси. Чадо бо твое духовное Иоанн, преслушав совета отчего поговети и причаститися ко дню своего Ангела, внезапу утопе в Днепре и абие, в сонном видении явльшеся, умолял тя свободити его от блудного греха, яко связан есть лукавыми духами. Ты же, милостивый отче, разрешительную молитву сотворше, избавление юноше оному даровал еси. Сему велию чуду дивящеся  во умилении взываем:

Радуйся, благодатию Божиею вся взывающие к тебе одождивый.

Радуйся, загробную участь духовного чада во спасение преложивый.

Радуйся, кокош, православных от вражиих когтей укрывающий.

Радуйся, обильныя слезы покаяния дарующий.

Радуйся, безчисленныя разрешивый недоумения.

Радуйся, впадших в нечестие благое вразумление.

Радуйся, преподобне отче наш Алексие, дивный молитвенниче и богомудрый наставниче.

Кондак 11

Пением всеумиленным и хвалением ублажати тя, старче Алексие, достойно есть. Ты бо  крепкий предстателю за живых и мертвых явился еси. Понеже и святии познаху силу благомощных молитв литургийных тобою творимых: святитель бо Феодосий, явльшийся ти во граде Чернигове, заповеда поминати на проскомидии родителей своих. Сего ради, с верою и любовию почитая память твою, вопием Богу: Aллилуиa.

Икос 11

Светом божественным просвещаем, угодниче Божий, грядущая, яко настоящая и дела людския греховныя зрел еси. Не утаися от тебе, духовного отца, и послушник Николай, егда тайно на гору Афон удалитися возжелал еси. Упредивше же самочинное желание, ты юношу сего к покаянию слезному привел еси и такожде скорое возвращение русских иноков со Святой Горы предрекл еси; таковому дару прозорливости чудяхуся, глаголем ти сицевая:

Радуйся, людских судеб тайнозрителю.

Радуйся, сокровенных пороков обличителю.

Радуйся, игуменство матушке Евфалии за седьм лет предуказавый.

Радуйся, сроки живота многих человеков предведый.

Радуйся, киевских архипастырей до одра смертного окормлявший.

Радуйся,  митрополита Владимира-священномученика отрадо.

Радуйся, преподобне отче наш Алексие, дивный молитвенниче и богомудрый наставниче.

Кондак 12

Блaгодaтию Божиею свыше осененный, преподобне отче, знал еси день отшествия твоего ко Господу и известил о сем братию. Такожде расточил еси скудное имение свое с любовию и увещаниями. Настави и нас на стезю спасения, да сохраним сердца неврежденны от стрел и сетей вражиих и в сиянии присносущного света в чертог Вседержителя внидем, поюще Ему: Aллилуиa.

Икос 12

Воспевающе праведное и многочудное житие твое, отче Алексие, ублажаем твоя молитвенныя бдения, милосердныя щедродаяния, благодушное несение скорбей, унылых и немощных  душ ободрение и восхваляем тя сице:

Радуйся, лучами подвигов монашеское житие озаривый.

Радуйся, Христу возлюбленному душу блаженно предавый.

Радуйся, Царствия Небесного и славы вечныя наследниче.

Радуйся, преподобных и праведных веселия сопричастниче.

Радуйся, яко всем дары целебныя щедро изливаеши.

Радуйся, яко град и отечество наше присно защищаеши.

Радуйся, преподобне отче наш Алексие, дивный молитвенниче и богомудрый наставниче.

Кондак 13

О, пречудный и блаженный  угодниче Христов, преподобне отче наш Алексие! Приими милостивно сие малое похвальное пение, от нас, недостойных, обаче с любовию чтущих тя. Умоли, преподобне отче, Создателя и Спасителя нашего избавитися нам от всяких бед и напастей, веру правую укрепи, мир, тишину и согласие в сердцах утверди, крест скорбей земных помози в благодушии понести, вящше же сих Царствие Небесное улучити испроси, да с тобою вкупе сподобимся вечно пети  Господеви: Aллилуиa.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, богоблаженне угодниче Божий, преподобне отче наш Алексие, Голосеевския пустыни похвало и пажити Богоматери предивное украшение! Ты, славный угодниче Христов, добре подвизался еси в трудех, постех, во смиренных молитвах и неусыпных бдениях. Темже, с верою и умилением припадая к раце честных, цельбодательных мощей твоих, молим тя: помози благовременно омыти слезами покаяния грешныя души наша и мирныя христианския кончины удостоитися чадом твоим. Испроси нам у Господа, богомудрый пастырю, избавления от душевредных страстей и немощей телесных, утверди нас в духе любви, терпения, милосердия, щедрости и ревности ко спасению ближних. Ей, великий старче и угодниче Божий! Не даждь нам впасть в уныние от тяжких искушений, горьких скорбей и хитросплетенных козней лукавого. Сохрани Святую обитель сию и души наша от тлетворного дыхания мимолетного века сего. Да сподобимся благомощным ходатайством твоим наследники быти вечных благ и причастники присносущныя радости во Царствии Господа нашего Иисуса Христа, Емуже со Отцем и Святым Духом подобает слава, честь и поклонение во веки веков. Аминь.