Акафист преподобному Лазарю Муромскому Олонецкому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Возбранному воину Христову, преславному угоднику Божию, духовного возрождения земли Карельской, теплому ходатаю, тебе, всехвальне Лазаре, житием богоугодным путь к совершенству и любви нам указующему, пение хвалебное приносим от благодарных сердец во умилении зовуще: Радуйся, преподобне Лазаре, терпения наставниче и теплый о нас молитвенниче.

Икос 1

Ангельский лик с человецы воспевает купно: “Ликуй, Фиваидо Русская, красуйтеся пустыни и дебри Олонецкия ... возрастившия святое и славное отец множество ... “.Русская северная природа, чистая и свежая, водою напоенная, печали и тайн богатая, души врачующая, влече к себе. И ты, достоблаженне Лазаре, грек, инок Константинопольския обители Высокогорския, на север притекл еси по глаголу пророческу: “желания сердца его дал еси ему .... предварил еси его благословением благостынным”. Зде на севере и плоды, достойны вечных житниц, принесл еси. Сему радуяся, воспеваем ти:

Радуйся, Лазаре, в благословенном Царьграде рожденный;

Радуйся, епископом Кессарийским в боголюбии воспитаннный.

Радуйся, послушание епископское идти в великий Новград получивый;

Радуйся, блаженное послушание то радостно исполнивый.

Радуйся, Лазаре, вершинам иночества приходящих к тебе научивый;

Радуйся, отче богомудрый, ум свой от всякаго пристрастия свободивый.

Радуйся, святе, очи сердца своего непрестанно к Богу устремлявший;

Радуйся, в мире надмирно поживший, и нас к тому просветивый.

Радуйся, преподобне Лазаре, терпения наставниче и теплый о нас молитвенниче.

Кондак 2

Видя Господа пред собою выну и, веруя Ему всем сердцем своим, иго Христово на выю свою приял, преподобне отче Лазаре, путем “тесных врат” шествовал еси, мечем слова Божия волю свою отсекая, делами веру являл и непрестанно Богу Всещедрому вопиял еси: Аллилуиа.

Икос 2

Разум Божественных и отеческих писаний стяжав, пребыл еси, богомудре Лазаре, в добром послушании у епископа Новаграда Василия, поучаяся сердцем сладостно. И бысть ти поучения сии “вожделенны паче злата и камене честна многа и сладша паче меда и сота”. И препроводи с ним девять лет, дондеже Василий не отыде ко Господу в селения вечныя. Помале же времени явися святитель в видении ти, Лазаре, и повеле идти на великое Онего-море, на Мучь-остров. Ты же весь в послушание преложився, к оному месту потекл еси. Мы же, дивящеся твердому твоему мужеству, воспеваем умиленно:

Радуйся, Лазаре, веру пламенну, яко матерь всякаго добраго дела, имевый;

Радуйся, драгоценное украшение иноков,послушание велие явивый.

Радуйся, веление епископа, в видении соннем данное, верно исполнивый;

Радуйся, Мучь-остров у Новоградского посадника откупивый.

Радуйся, зде в отшельничестве и лишениих богоугодно поживый;

Радуйся, преемника своего Афанасия на духовную жизнь вдохновивый.

Радуйся, отче богомудре, житием своим вся ны наставляяй;

Радуйся, святе, иго Христово зело возлюбивый.

Радуйся, преподобне Лазаре, терпения наставниче и теплый о нас молитвенниче.

Кондак 3

Силою Вышняго укрепляем,путь жизни своея, жесток и труден, а по надеждам благим вожделенен и сладостен, достойне прешел еси, богомудре Лазаре. Многи скорби претерпел, имиже многи добродетели: слезы, смирение, ревность ко Господу обрел еси, Емуже воспеваеши выну: Аллилуиа.

Икос 3

Имея крепкую веру, и возжелав спасения вечнаго, пустынный остров возлюбил, блаженне Лазаре. Крест святый водрузил на нем и часовню поставил с малой хижиной вблизи язычников, лопарей и чуди поселился, биения и раны терпя от них и великия скорби, взывал ко Господу псалмом Давидовым: ”Пролию пред ним моление мое,печаль мою пред Ним возвещу” и ратовал еси о спасении сих душ во тьме и сени смертней погибающих. Сего ради приносим ти похвалы сия:

Радуйся, Лазаре, от язычник-лопарей много претерпевый;

Радуйся,слезы очей об их языческом заблуждении во множестве изливавый.

Радуйся, банею слез своих очи чистого сердца созидавый;

Радуйся,чрез слезы кротость,мир, сердоболие и смиренномудрие снискавый.

Радуйся, душею за чудь и лопарей болевый и страдавый;

Радуйся, Лазаре, любви ко всякому Божию творению ученики твоя научивый.

Радуйся, отче и нас к Божией любви приводящий.

Радуйся, Угодниче Божий, Создателя и творение Его возлюбивый, и в Нем Единем упокоение снискавый.

Радуйся, преподобне Лазаре, терпения наставниче и теплый о нас молитвенниче.

Кондак 4

Бурею помышлений о спасении душ лопарей-язычников движимый, по заповеди Господней еже “любити врагов” поступая, дабы свободити душу от огорчения, гнева, ненависти, памятозлобия и сподобитися величайшего стяжания совершенной любве, со умилением взывал Христу Спасителю: Аллилуиа.

Икос 4

Слыша и зная и веруя, яко “Бог любы есть ... и любы не мыслит зла”,ты,благословенне Лазаре, моление творил выну об обидчиках своих. И се прииде к тебе старейшина лопарей, нося на руку отроча слепа от рождения и глагола: ”да сотвориши его здрава и мы отыдем от острова сего”. И взем отроча, ты моление горячее вознес о нем Господеви и Пречистей Богоматери и окропив святою водою, приложих ко Владычню образу и прозре младенец. Ты же о таковом чудеси прославил еси Бога. Видевшии же сие чудо крестишася и по мале времени Божиим промыслом лопари удалишася от места сего. Мы же, дивящеся о сем, приносим ти благодарственную песнь:

Радуйся, Лазаре, слепому младенцу лопарей зрение возвративый;

Радуйся, и сердца самих язычников своею кротостию и любовию покоривый.

Радуйся, силою благодати Божией лопарей просветивый;

Радуйся, в православие их любовию обративый.

Радуйся, по чудеси твоему многи люди к тебе стекахуся и нецыи из них в иночество постригахуся;

Радуйся, отче, стадо духовное Христово преемнику своему вручил еси.

Радуйся, Единым Богом жив сый, Ему выну хвалу и славу возносил еси;

Радуйся, огражден Высшею помощию зде, тамо сыноположение обрел еси.

Радуйся, преподобне Лазаре, терпения наставниче и теплый о нас молитвенниче.

Кондак 5

Богозданная пустынь, путь, ведущий в Небо, прия тебе, всехвальне отче наш, и чрез труды велии содела тя праведна, свята, блага, и столь чиста, яко еще при жизни на земли удостоен был еси зрети Пресвятую Богородицу. О сем ликовствуя, во умилении, вопием Богу: Аллилуиа.

Икос 5

Видяще твое иноческое преуспеяние и чистоту сердца твоего предано Единому Богу, Преблагая Владычица явися ти, достохвальне Лазаре. Видех бо свет велий сияющ и се хождаху мужи благообразнии, посреди же Жену светолепну златом сияющу. Ты же от видения того радости исполнився и со слезами моляся пал еси пред образом Преблагословенныя, иже, осиянный светом, обретеся у древа высоко от земли. Глас изыде от иконы: ”Призрю на смиренныя рабы, и место сие”. Мы же, видяще велию милость Пречистыя к тебе, отче блаженне, поем ти:

Радуйся, Лазаре, явление Царицы Небесныя во страсе и умилении зревый;

Радуйся, чудесному стоянию иконы и гласу Ея сладчайшему внимавый.

Радуйся, повеление Божия Матери об устроении церкви зде радостно восприемый;

Радуйся, возврат платы за Мучь-остров от сына посадника получивый.

Радуйся, храм во имя Успения Богородицы и келии братии соорудивый;

Радуйся,благословенную обитель достойному преемнику вручивый.

Радуйся, богомудрый игумене, добле корабль церкви направляющий;

Радуйся, славне, ныне в духовном Раи, Небесней Церкви, предстоящий.

Радуйся, преподобне Лазаре, терпения наставниче и теплый о нас молитвенниче.

Кондак 6

Проповедниче православныя веры и истиннаго жития во Христе Иисусе явился, преславний отче Лазаре, церковь на земли созидающи. В ней бо древо Жизни святый Жертвенник примирения, жизнь верным источает. Церковь бо суть духовная лечебница, радость радующихся, утешение унывающих.Темже многих обратил еси ко Христу Жизнодавцу, поя благодарственно Ему: Аллилуиа.

Икос 6

Возсиял яко “свеща на свещнице”, созидая тело Христово, строго соблюдая, дабы “едино тело, един дух” чрез Таинства Церкви в храмах были вси. Храм бо возведение дольнего в горняя, земная в небесная. Сему ревнуя, всехвальне, не токмо храмы внешния, но паче храмы внутренния, храмы душ Богу уготовлял еси. Сему радуяся, воспеваем ти, сицевая:

Радуйся, преподобне, храм души твоея Святым Духом осияваемый, имевый;

Радуйся, Богу служа человеков на лучшее пременяющий.

Радуйся, весь подвиг на стяжание Духа Свята направляющий;

Радуйся, долгожителю земный, более века духом пред Господем пламеневший.

Радуйся, безсмертный огнь, Тайны Христовы, достойно приемлющий и Дары сия приносящий;

Радуйся, ключами Таинств Церковных двери Царствия Божия христианам отверзаяй.

Радуйся, богопросвещенный ум и сердце в горняя устремляяй;

Радуйся, образ Божий и подобие Его в себе стяжавый.

Радуйся, преподобне Лазаре, терпения наставниче и теплый о нас молитвенниче.

Кондак 7

Хотя последовати Христу, подражал Ему всеусердно, великаго ангельскаго образа чин восприял, чистою душею огнь пламенной молитвы за весь мир возносил и великую схиму, яко печать совершенства от Бога приял, с трепетом вопия Ему:Аллилуиа.

Икос 7

Новая заповедь Христа: ”Да любите друг друга”полностью во обители твоей, преподобне, исполнися. Тамо бо братия твоя имеша едину душу и едино сердце, един ум и едину волю исполняти заповеди Христа Бога, помоществуя взаимно нести тяготы коегождо и тем привлекая Божию милость. Вси иноцы твоя радовахуся и благодаряще Бога за обитель сию, селение небесное, земное небо и нас привлекают к славословию сему:

Радуйся, подвижниче усердный, на земли во обители монашеской живший;

Радуйся, ангелом уподобивыйся и Небесных Сил сопричастниче бывый.

Радуйся, к ним ум свой возносивый;

Радуйся, утешения в души своей от Креста Христова приявший.

Радуйся, дивнии глаголы благодати Божия в душе своей слагавший;

Радуйся, желанное упокоение в Кресте Христовом обретший.

Радуйся, яко лампада негасимая пред Лицем Господа горевшая;

Радуйся, с апостолом: ”Имже мне мир распяся и аз миру”, возглашающий.

Радуйся, преподобне Лазаре, терпения наставниче и теплый о нас молитвенниче.

Кондак 8

Странно суетному миру слышати, яко молитвами твоими, достохвальне отче, богатство милосердия изливается на всех притекающих к твоему небесному покровительству. Молитва суть ангельское делание, соединение души с Богом, сокровище благодати. И мы, благодарнии, радостно воспеваем: Аллилуиа.

Икос 8

Всецело огнем Божестенныя любве исполнен и в молитву погружен, ты, достоблаженне, выну следуя апостолу: ”помолюся духом, помолюся и умом, ...восхождения в сердце своем положи” и обретоша горение духа. Молитва бо и монахов и мирских человеков богатство, сила немощных, таинственное священнодействие ума. Ты же и нас привлекаешь к сему, моляся днем и нощию, да воспеваем благодарнии:

Радуйся, сердце свое молитвою очистивый;

Радуйся, дар слез чрез молитву обретый.

Радуйся, непостижимую тишину, мир и покой в душе снискавший;

Радуйся, кадило молитвы неугашаемое и благоухающее.

Радуйся, неизреченный мир, радость и теплоту испытавый;

Радуйся, умиленным сердцем любовь Христову молитвою стяжавый.

Радуйся, молитвою, сим “дыханием духа”, вся печали отгонявший;

радуйся, ныне с Богом пребывающий и о нас молящийся.

Радуйся, преподобне Лазаре, терпения наставниче и теплый о нас молитвенниче.

Кондак 9

Всяку чудодейственну силу благодатию дивнаго во святых Своих Бога стяжав, преподобне, высоким житием по заповедем Господним.Источник бо и основание дара чудодействия благодать и любы Божия, изливающаяся на тя чрез молитву, непорочность и чистоту сердца твоего, преблаженне. Сего ради Творцу всяческих вопием: Аллилуиа.

Икос 9

Витийство человеческое не довлеет изрещи, коликую мзду восприимут вернии исполнением заповедей Господних. Сам бо Спаситель наш рече: ”Аще заповеди Моя соблюдете, пребудете в любви Моей” и апостоли: ”яко заповеди Его живот вечный есть и заповеди Его тяжки не суть”. Господь видя горение сердца твоего, преподобне Лазаре, в искании Его, открыся и яви помощь Свою тебе, творящему заповеди Его. Сего ради приими похвалы сия:

Радуйся, нищетою духа смиренномудрием облеченный;

Радуйся, плач, омывающий и утешающий душу обретый.

Радуйся, кротостию, яже зло добром побеждаяй себе украсивый;

Радуйся, плод правды, совершенство добродетелей в себе возрастивый.

Радуйся, милостью наставлениями о спасении душ горевший;

Радуйся, чисто сердце обителью Божией сотворивый.

Радуйся, мир чрез умаление зла и богатство любви источавый;

Радуйся, поругания, и бияния смиренне сносивший.

Радуйся, преподобне Лазаре, терпения наставниче и теплый о нас молитвенниче.

Кондак 10

Спасти хотя душу свою, плоть презрел, на вся видимая аки на прах и дым взирал, преподобне. Подвиги иноческия, молитвы и труды неустанные совершая Бога ради, духом пламенел, в горняя устремляясь, и в радости духовней Спасителю Христу взывал: Аллилуиа.

Икос 10

Стена и прибежище был иноком, чадом твоим духовным, уневестив их Христу, преподобне отче Лазаре, евангельски пожив, обитель Божию, монастырь, сию крепость Церкве создал и братию богомудро наставляя упасл еси, на пажитях нивы Господней к вечному царствию приводя. О сем радуяся взываем ти:

Радуйся,угодниче Божий, на земли для неба поживый;

Радуйся, розго Христова, добрые плоды Ему приносяй.

Радуйся, любовию к Богу и человеком пламеневший;

Радуйся, чувство «в гортани моем горечь от людской боли» имевый.

Радуйся, слезами твоими грехи потопляюще, мир людский очищавый;

Радуйся, ничесоже не имеющий в мире, обаче всем премирным обладавый.

Радуйся, тяжесть подвига сладостию упокоения облегчавый;

Радуйся, выну помня, Кто «мертвит и живит», животочныя слова Божия в дела претворявый.

Радуйся, преподобне Лазаре, терпения наставниче и теплый о нас молитвенниче.

Кондак 11

Пение благоговейное Богу достойно приносил, преподобне отче наш, с радостию шел ко Христу в послушание, ведая яко жизнь зде во плоти дана для благоугождения Господу. И стремясь достичь совершенства, многи подвиги совершил, богоблаженне, пост, непрестанну молитву, бдение, слезы, поклоны, изнурение тела, яже привлече на тя благодать Божию и Всещедрый Владыка духовное преспеяние дарова ти. О сем благодарным сердцем в веселии пел еси Создателю своему:Аллилуиа.

Икос 11

Светильник добродетелей и совершенства явился, преблаженне отче наш Лазаре. Оставив бо сродники своя, небрегл о здравии своем, никия препятия, напасти, мучения, ниже самая смерть не возможе удержати тя от стремления ко Господу. Ты бо облеклся еси «якоже избраный Божий свят и возлюбленный ..., в благость, смиренномудрие, кротость, долготерпение ..., любовь, яже есть соуз совершенства и мир Божий». О сем прославляя Бога, воспеваем совершенство добродетелей твоих:

Радуйся, во иночестве естества чин препобедивый;

Радуйся, оставив мир и всяко земное бремя, путь в горняя направивый.

Радуйся, тишину свободы от страстей и отраду душевную стяжавый.

Радуйся, неусыпное око, молитву умную, выну творивый.

Радуйся, состояния вожделенного: «Аз сплю, а сердце мое бдит» достигший;

Радуйся, смиренномудрием, до забвения своих добрых дел украсивыйся.

Радуйся, совершенным чадом небесным соделавыйся;

Радуйся, преподобне, нам путь спасения и доныне указующий.

Радуйся, преподобне Лазаре, терпения наставниче и теплый о нас молитвенниче.

Кондак 12

Благодать Божия дала ти, силы высочайшей любви к Богу, пробуждая в душе чувство непрестанного стремления к Нему. Господь рече: «Аз любящия мя люблю, ищущия же Мене обрящут благодать». И тоя ради любви ты, достославне, претерпел великия скорби, сокрушение духа, многия слезы, препобедив себе самого. О сем умиляяся славословие приносим Творцу: Аллилуиа

Икос 12

Поим Богу велию славу за велицыи неизреченная Его благодеяния любовь Его и обетования Его. Тако бо рече Господь: «Аз рех: бози есте и сынове Вышняго вси ..., вся возможна верующему». И на тебе, преподобне, исполнишася сия. Достоблаженное бо житие твое бысть приготовление к горнему миру к прехождению к вечности. В смерти же открывается полнота замысла о человеке, ибо и в горнем и в дольнем Един Господь. Сему благоговея, поим со умилением:

Радуйся, добре Бога ради подвизавыйся;

Радуйся, яко образом и подобием Бога ставший.

Радуйся, смирению Христову подражавый;

Радуйся, покаяния глубокаго, иже есть сердце духовныя жизни, снискавый.

Радуйся, тяжесть неисцелимости болезни на себе познавый;

Радуйся, душею близость Бога, Его любовь и благоутробие, восприявый.

Радуйся, сердце свое радостно Ему отдавый;

Радуйся, с верою и любовию за весь мир моливыйся.

Радуйся, преподобне Лазаре, терпения наставниче и теплый о нас молитвенниче.

Кондак 13

О преславный угодниче Божий, преподобне Лазаре, игумене обители Муромския, отче наш богомудрый и наставниче всеблаженный! Приими малое сие моление наше, усердно тебе приносимое и испроси у Спасителя нашего Господа Иисуса Христа, престолу Его предстоящу ти, да твоим предстательством дарует Господь Бог всем нам добродетельное и богоугодное житие, терпение, имже ты изобиловал, мир душам нашим, здравие телесное и духовное преуспеяние. Да тако спасаемии в вечней жизни с тобою воспеваем Создателю нашему: Аллилуиа, аллилуиа, Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Лазарю Муромскому

О всеблаженне отче наш и благодати Святаго Духа исполненный, преподобне Лазаре, теплый заступниче и помощниче с верою призывающим тя, услыши нас грешных, предстоящих ныне пред тобою и умильно молящих ти ся. Ты бо явился еси учителем благочестия, воздержания правило, смиренномудрия образ, терпению наставник, заступник и хранитель прибегающим к тебе. Помолися о нас, угодниче Божий, ко Всемилостивому Владыце Иисусу Христу Богу нашему и Пречистей Его Матери Приснодеве Марии Богородице подати миру мир, Церкви Святей – единомыслие, стране - благоденствие, людем - друг ко другу любовь и согласие. Испроси у Господа нам, молящимся тебе, вся яже к пользе душевней и телесней: милость, мир, благословение и в день Судный избавитися нам части шуия, стати же одесную Христа Бога со избранными наследниками Царствия Небесного, идеже ты наслаждаешися Вечныя Славы Его. Яко Тому подобает всякая слава, честь и поклонение со Безначальным Его Отцем и Пресвятым и Благим и Животворящим Его Духом ныне и присно и во веки веков. Аминь.