Акафист преподобномученице Евдокии Илиопольской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранней Богом от рода самарянскаго и воззванней от рова погибельнаго во ограду Святыя Церкве Его, к торжеству первородных, на небесех написанных, сугубо венец приявшей, преподобномученице Евдокии похвальное воззовем пение: много бо может молитва праведныя ко благосердию Всевышняго, во еже от всяких бед спасти зовущия:

Радуйся, Евдокие, преподобная страстотерпице, о спасении душ наших молитвеннице.

Икос 1

Ангельстие чини и души праведных на небеси радуются радостию великою о единем грешнике кающемся, по неложному слову Господню. И мы, земнороднии, зряще Твое преестественное от глубины беззакония ко спасению возведение, Евдокие пречудная, радуемся и, Господа благодаряще, в похвалу тебе зовем:

Радуйся, чудо милосердия Божия на себе явившая;

Радуйся, дивныя благости Христовы силу на себе показавшая.

Радуйся, от тьмы греха в чудный свет Евангелия воззванная;

Радуйся, от тины сластей велиаровых избавльшеся, сладостей райских приобщившаяся.

Радуйся, грешников покаяния образе;

Радуйся, о нашем от злых дел обращении ходатаице.

Радуйся, Евдокие, преподобная страстотерпице, о спасении душ наших молитвеннице.

Кондак 2

Виждь, Христе Спасе, и да не презриши мя, молюся, грехми великими содержимаго, но молитвами славныя преподобномученицы Твоея Евдокии, ущедри и спаси мя, и Твоего Царствия наследника мя покажи, да с мученики и преподобными и всеми святыми воззову благоутробию Твоему: Аллилуиа.

Икос 2

Разум человеческий недоумевает, помышляя, от каковаго греха страшнаго на высоту ангелоподобнаго жития благодатию Христовою взошла еси, достохвальная Евдокие. Темже и мы, добрую тя предстательницу имуще, молимся тебе тепле: избави и нас от бездны греховныя, да любовию вопием ти таковая:

Радуйся, благодати и света исполненная;

Радуйся, рабства диавольскаго избегшая.

Радуйся, агнице, во двор словесных Христовых овец притекшая;

Радуйся, добраго Пастыря-Христа сладкий глас, зовущий тя, услышавшая.

Радуйся, драхмо погибшая и Христом обретенная;

Радуйся, никомуже отчаяватися в велицей греховней скорби побуждающая.

Радуйся, Евдокие, преподобная страстотерпице, о спасении душ наших молитвеннице.

Кондак 3

Сила благодати преизобиловала тамо, идеже умножися грех, да веселятся на небеси Ангели о единем грешнице покаявшемся, и да радостно сретают пред Престолом Божиим, поя: Аллилуиа.

Икос 3

Имеяй богатство милосердия, мытари и грешники и неверныя призвал еси, Иисусе Господи, и рабу Твою Евдокию, во гресех житие иждившую и Тя познавшую, покаянием и крещением просветил еси, и к подвигу преподобномученичества возвел еси. Нас же ныне истинному покаянию тоя научивши, подвизаеши восхваляти ю пении сими:

Радуйся, душею твоею благодатию обновившаяся;

Радуйся, мира греховнаго со страстьми и похотьми его отрекшаяся.

Радуйся, чину иноческому добрый путь показавшая;

Радуйся, постом, молитвою, и подвиги душу свою от скверн греховных очистившая.

Радуйся, мученическою смертию течение свое совершившая;

Радуйся, кровию твоею, за Христа излиянною, одежду свою брачную убелившая.

Радуйся, Евдокие, преподобная страстотерпице, о спасении душ наших молитвеннице.

Кондак 4

Бури помыслов греховных люте одержимыя души твоея, Евдокие пречудная, коснуся благодать Господня, егда дивным Того промышлением приключися иноку Герману, во обитель свою грядущу и нощию застигнуту во граде Илиополе близ греховныя храмины твоея приютитися, и по обычаю своему посреди нощи во псалмех и пениях, и о страшнем судищи Христовом чтении бодрствовати, и Богу возглашати со умилением: Аллилуиа.

Икос 4

Слышав Евдокия, на ложе греховнем лежащая, посреде тишины нощныя глас инока о вечней славе праведников и страшных муках грешников дивно глаголющаго, абие от сна погибельнаго пробудися и на утрие иноком тем на путь спасения наставляема, от иерея же Божия в вере Христовой оглашаема, стези праведной всем сердцем прилепися. Мы же, таковому промышлению Божию о тебе чудящеся, воззовем:

Радуйся, дивнаго смотрения Божия таиннице;

Радуйся, человеколюбия и щедрот Его печате.

Радуйся, муками адскими, грешников ожидающими, устрашенная;

Радуйся, славою райскою, праведником уготованною, упоенная.

Радуйся, яко нощь, неверным несветлая, явися ти просвещением в сладости словес Божиих;

Радуйся, яко утру возсиявшу, возсия и в тебе свет благодатнаго обновления.

Радуйся, Евдокие, преподобная страстотерпице, о спасении душ наших молитвеннице.

Кондак 5

Божественною благодатию осененная и от мудраго Германа благочестию наученная, славная Евдокия прежде крещения своего затворися и седмь дний, и седмь нощей, блуднице Евангельской подобяшеся, в посте, слезах покаяния и молитве всеусердне пребысть, к подвигом предстоящим себе уготовляя, и Богу, грешники милующу, вопиюще: Аллилуиа.

Икос 5

Видения пресветлаго удостоися скоро блаженная Евдокия, аще и немногия дни, но усердно подвизавшаяся: Архангелом бо Михаилом в горняя вознесена бывши и от ликов святых сретаема, от духа же злобы в воздухе оклеветаема и яростию безсильно теми отторгаема, в радости велицей о своем обращении уверися и обещания благодатнаго, еже во вся дни жития ю сохраняти, свыше сподобися, сего ради вопием ти:

Радуйся, Богом предъизбранная и чудесным изволением Его от беззаконий оправданная;

Радуйся, откровений небесных скоро сподобившаяся.

Радуйся, селения райския еще во плоти узревшая и сестрою от святых Божиих именованная;

Радуйся, от князя тьмы во гресех, уже Богом низложенных, обличенная, но от страшных объятий его Ангелом сохраненная.

Радуйся, до скончания жития твоего от тогоже Ангела соблюдаема быти утешена;

Радуйся, Евдокие, преподобная страстотерпице, о спасении душ наших молитвеннице.

Кондак 6

Проповедуеши всем падшим и отчаянным грешником, всечестная Евдокие, Божие человеколюбие и силу, како покаянием грешную душу омывает, очищает, светлит и возводит горе, и веселие творит силам небесным, с ними же и мы бренными усты зовем: Аллилуиа.

Икос 6

Возсия дивным светом житие Евдокии блаженныя, егда Боготканною одеждою крещения облекшися и имения своя, грехом неправедно приобретенная, ова нищим раздала, ова же к ногам пресвитера церковнаго повергла, сама же во обитель востекши, многия дни в подвизех преподобнических благочестно поживе. Таковое убо дивное и скорое жития пременение зряще, возглашаем ей:

Радуйся, богатство скорогибнущее на нетленная изменшая;

Радуйся, сокровищем неправедным други себе на небеси Евангельски стяжавшая.

Радуйся, яко Христа ради духом и телом обнищала еси;

Радуйся, Господа паче, якоже прежде той грех, возлюбившая.

Радуйся, Тому без лености усердно, якоже прежде сатане льстивому, ныне поработавшая;

Радуйся, Священная Писания скоро уразумевшая и, теми умудренна, начальницею спасаемых ставшая.

Радуйся, Евдокие, преподобная страстотерпице, о спасении душ наших молитвеннице.

Кондак 7

Хотяй препятие сотворити твоему светлому к небесам шествию, богоблаженная, исконный враг рода человеческаго внуши юноше Филострату, прежде и послежде к тебе страстию греховною пылающу, во одежде инока, аки волку хищному, во обитель проникнути, иже узрев тя пред собою, всякими словесы льстивыми и образы тщашеся огнь греховный возжещи в тебе, и паки к пути погибельному тя отвратити, и во град Илиополь похитити. Но силою Божиею, в тебе обитавшею, наказан бысть, егда единым словом твоим паде к ногама твоима. Паки же на утрие молитвою твоею, по внушению свыше, к жизни возвратися, врага посрами и сердцем возопи щедрому Богу: Аллилуиа.

Икос 7

Новая самаряныня, по образу Евангельскому, воистинну явися Евдокия преподобная: та бо в беззаконии жительствовавши Самим Господом Христом при кладезе быв обретена, вседушно Тому прилепися, и житие исправив, в мучениях душу свою предаде за Него. Тако и сия, стопами оныя шествующи, теми же враты Царствия Небеснаго достиже. Темже первую восхваляюще, и последней воспеваем сицевая:

Радуйся, вторая самаряныня, Фотинии самарянке подражавшая;

Радуйся, источника жизни и спасения — Христа возжадавшая.

Радуйся, неистовство страстей и любы плотскую отринувшая;

Радуйся, вся узы и сети врага растерзавшая.

Радуйся, тяжкое бремя студныя работы диавола во благое и легкое иго Христово пременившая;

Радуйся, путем тем селений небесных достигшая и о нас тамо молитву творящая.

Радуйся, Евдокие, преподобная страстотерпице, о спасении душ наших молитвеннице.

Кондак 8

Странное и преславное изменение твое, преподобная Евдокие, видяще демонов темныя полцы горько рыдаху. Вся же Силы Небесныя, радостию играюще, песнь Христу воспеваху, прославляюще Божие милосердие и велиим гласом зовуще: Аллилуиа.

Икос 8

Весь и всегда злобою преисполненный и тобою посрамленный змий лукавый, преподобная, новыя козни противу тебе устрои: им же бо наущенный царь Аврелиан, мний богатство, тобою оставленное, во обители твоей хранимым быти, посла сына своего с воины его разграбити, живущия же тамо мечу предати; но внезапу сей чудесне близ обители недугом тяжким быв поражен и умерщвлен — твоими же молитвами паки жив и здрав соделан, смирися, раскаявся и со всем домом своим ко Христу обратися, и паки убо новую печаль врагу сотвори, тебе же радостно возопи сицевая:

Радуйся, невидимою силою Божиею охраняемая;

Радуйся, чудесы многими осияваемая.

Радуйся, покаяния усердная проповеднице;

Радуйся, многих неверных на путь спасения наставнице.

Радуйся, козней диавольских сокрушительнице;

Радуйся, злых умышлений его в добрыя начинания претворительнице.

Радуйся, мертвых силою Христовою воскресительнице;

Радуйся, Евдокие, преподобная страстотерпице, о спасении душ наших молитвеннице.

Кондак 9

Всеми добродетельми украшенное и великим воздержанием, подвигом причастное, явися чудное пребывание твое во обители, Евдокие премудрая, от силы бо в силу благочестно восходящи, высоты жития равноангельнаго достигла еси, и демона лукаваго, всюду ти досаждающа, ухищрения злыя во благо обращала еси, многия же неверныя и закоснелыя ко Христу привела еси, поющи Тому: Аллилуиа.

Икос 9

Витийство земнородных не довлеет достойно восхвалити твоя подвиги, всеславная. Кто бо довольно может изрещи слезныя токи, яже в молитвах к Богу пролияла еси, кто болезни твоя изочтет? Кто исповесть всенощныя бдения, со врагом видимыя и невидимыя борения, за Христа страдания и всю тесноту жития твоего? Весь бо град Илиополь, и обитель, и вся окрестная селения чудесы просветила и яко солнце просияла еси. Тем убо молим тя: озари лучами света твоего и наша сердца, испроси оставление грехов всем вопиющим тебе таковая:

Радуйся, помраченный образ Божий во светлости велицей в себе вообразившая;

Радуйся, небесными ароматами благоухающая.

Радуйся, звездами чудес украшенная;

Радуйся, лучами всех добродетелей сияющая.

Радуйся, величия Божия всем концем земли благовествующая;

Радуйся, Небо и землю к пению славы Господа твоего призывающая.

Радуйся, Евдокие, преподобная страстотерпице, о спасении душ наших молитвеннице.

Кондак 10

Спасителя всех и Господа Иисуса, в нощи ти явльшася, узрела еси, Евдокие богоблаженная, Той бо дщерию своею тя нарек, на подвиг исповедничества и страданий за имя Его, славы ради небесныя и многих заблудших к обращению, призва тя и, ужасатися тебе никакоже повелев, изволи тебе быти сопутником и помощником Сам, Пресладкий, якоже и обеща. Темже, сердцем чистая, сего прелюбезнаго видения сподобившися, радостно воспела еси Всемилостивому Спасу: Аллилуиа.

Икос 10

Царство тьмы и идолослужения мерзкаго распространяя, Диоген правитель гонение на христиан воздвиже, и тебе, Евдокие, аки истинную Христову служительницу, пояти пятьдесят воинов направи. Ты же, преподобная, видением чудным укрепленная, кивот с Божественными Таинами Христовыми с собою прияв, сама вольно в руце воинов предалася еси. Егда же на суде нечестивом мудрый ответ о Господе давши и муки жесточайшия за Христа претерпевши, многия чудеса именем Его соделала еси, тогда всех гонителей, мучителей и народа собрание к вере Его обратила еси, яже и взываху тебе сицевая:

Радуйся, Господа Иисуса преподобная ученице и исповеднице;

Радуйся, дивных чудес силою Того совершительнице.

Радуйся, Филострата блуднаго от погибели исхитившая;

Радуйся, Аврелиана завистлива с семейством его от сетей бесовских избавившая.

Радуйся, Диодора, тя появшаго, с воины и сродники от пути нечестия отринувшая;

Радуйся, и самаго Диогена, твоего мучителя, со всем домом и множицею народа ко Христу приведшая.

Радуйся, Евдокие, преподобная страстотерпице, о спасении душ наших молитвеннице.

Кондак 11

Песнь благодарения воздаша тебе, пречудная Евдокие, прежде лютыя гонители, ныне же новопросвещенныя христианы града Илиополя, тобою в вере наученнии и чудесы просвещеннии. Подобаше бо чудесем преславным во граде сотворитися, да сама от погибели ко спасению обращена, и иным, в сетех диавольских седящим, помощь явиши и, Апостолом подобяшеся, вся народы твоя за собою к небеси приведеши и пети Вседержителю научиши: Аллилуиа.

Икос 11

Светло просияла еси в знамениих, славная Евдокие, и не токмо сама, но и людем, тобою обращенным, чудодействовати дар у Бога испросила еси: егда бо некий отрок Зинон, ядом змеиным угрызенный и сном смерти опочивый, молитвами новаго христианина Диодора, во имя Иисуса Распята, чудесне оживе, тогда вся люди паки Бога Живаго, в людех чудодействующа, восхвалиша, тебе же, наставнице своей, воспеша сицевая:

Радуйся, молитвеннице усердная за люди новопросвещенныя;

Радуйся, подвиги твоими Богу угодившая.

Радуйся, знаменьми страшными и неудобь постигаемыми люди ко Христу обращающая;

Радуйся, ко живыми господствующу и мертвыми владычествующу Господу дерзновение велие стяжавшая.

Радуйся, Евангелием предреченнаго чуда, еже змеинаго жала смертнаго невредности, свершения виновнице;

Радуйся, ветрограда Христова на земли, в подражание Апостолом, благая насадительнице.

Радуйся, Евдокие, преподобная страстотерпице, о спасении душ наших молитвеннице.

Кондак 12

Благодати велия и победоносных подвигов преисполненную вседрагую твою главу, течения своего пути добре совершившу, Евдокие преподобная, аки сокровищницу благоплодну и зрелу, Викентий, градоправитель нечестивый, чрез воины мечем усекну, мняй службу приносити богам мерзким. Сего же неподобный не разуме, яко делом скверным приобщаяйся, вечныя муки и погибель себе стяжав, святей же душе преподобномученицы яви вспоможение скоро от телесе разлучитися и со Христом быти, и пети Тому со Ангелы и святыми: Аллилуиа.

Икос 12

Поюще дивное и нам грешным многоназидательное твое житие, покаянием омытое, добродетельми осиянное, преподобномученичеством украшенное и мученическим подвигом завершенное, святая и богоблаженная Евдокие, Господа тя избравшаго и к Себе приявшаго прославляем и на твое пред величеством Его заступление уповающе, сладце вопием ти, страстотерпице:

Радуйся, Агнца Божия проповедавшая и яко агница Его закланная;

Радуйся, к жизни нестареющей и присносущней благочестно преставившаяся.

Радуйся, Христу, Жениху твоему, светильник уготовавшая;

Радуйся, кровию своею преподобнический венец себе славно украсившая.

Радуйся, телес наших здравие и душ спасение;

Радуйся, яко нам, грешным, воспоминание твое пресладко и всей Церкви имя твое пречестно.

Радуйся, Евдокие, преподобная страстотерпице, о спасении душ наших молитвеннице.

Кондак 13

О прехвальная и богоблаженная преподобномученице Евдокие! Приими от нас сие малое к тебе моление и, Свету Неприступному предстоящи, молися Всещедрому Богу, да по милости Своей отверзет двери покаяния нам, студными душу грехми окалявшим и в лености все житие свое иждившим, и от мрака греховнаго ко светлому отеческому дому востещи, имиже весть судьбами, благодатно устроит, и райских селений достигнути, и радостно пети с тобою да сподобит: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О всехвальная Христова преподобномученице Евдокие! Ты теплою любовию своею ко Христу Богу попрала еси козни вражия и обрела еси бесценный бисер Христа и достигла еси Царства Небеснаго. Сего ради к тебе припадаю и умиленною душею и сокрушенным сердцем вопию ти, страстотерпице, аз недостойный: призри с высоты небесныя на мя, боримаго греховными искушеньми, виждь вопль мой: многими грехми и бедами на всяк день враг запинает мя, ища моея погибели. Славная и всехвальная ученице и исповеднице Христова Евдокие! Умоли возлюбившаго тя Христа Бога, да подаст ми оставление многих прегрешений, да укрепит мя благодатию Своею трезвенно и бодренно шествовати путем святых заповедей Его и вселитися во святыя блаженныя небесныя обители, идеже ты со всеми святыми выну радостно славословиши Единосущную Троицу: Отца и Сына и Всесвятаго Духа. Аминь.