Акафист преподобному Марону Пустыннику Сирийскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный угодниче Христов и чудотворче, преподобне отче наш Мароне, похвальное пение приносим ти, любовию чтущии твоя подвиги и труды, ими же Богу угодил еси, от Него же и дар исцеления недугов приял еси, яко имеяй дерзновение к Подателю здравия, от всяких нас бед и болезней свободи, да зовем ти:

Радуйся, Мароне пустынниче, скорбных врачу и иноков наставниче.

Икос 1

Ангельский нрав имел еси, отче преподобне, и яко бесплотный, непорочное житие совершил еси на земли, дивный образ совершенства духовнаго нам оставив, да подражаем добродетелем твоим и зовем ти сице:

Радуйся, от юности Господа Единого всем сердцем возлюбивый.

Радуйся, вся красная мира сего нивочтоже вменивый.

Радуйся, постом и бдением молитвенным плоть твою удручивый.

Радуйся, непорочный сосуде Божией благодати.

Радуйся, жилище Духа Святаго, украшенное чистотою.

Радуйся, мужу желаний духовных.

Радуйся, главо, освященная десницею Всевышняго.

Радуйся, безмолвия рачителю.

Радуйся, молву суетную возненавидевый.

Радуйся, богомыслия высото.

Радуйся, Сирийския страны прозябение святое.

Радуйся, Церкви Кирския красото и похваление.

Радуйся, Мароне пустынниче, скорбных врачу и иноков наставниче.

Кондак 2

Видя Господь душу твою яко ниву благовозделанную, к плодоносию духовному, к исканию единаго на потребу направи твой помысл, преподобне. Тем же любве ради Христовы мир оставил еси и всякаго пристрастия суетнаго свободився, притекл еси в пустыню Кирскую Сирии Евфратской на подвиги иноческия, зовый спасающему тя Богу: Аллилуйя.

Икос 2

Разумом богопросвещенным познал еси суету мира сего и непостоянство, в нем же радость сменяется скорбию, благополучие - нечаянными бедами. Тем же вечных благ возжелал еси, отче преподобне, и сия взыскати потщался еси отречением мирских благ и вольною нищетою, подвизая нас звати тебе:

Радуйся, пустынного безмолвия любителю.

Радуйся, смирения и нестяжания рачителю.

Радуйся, истиннаго самоотвержения совершенный образе.

Радуйся, иноческаго равноангельнаго жития всеизрядное явление.

Радуйся, правило веры и благочестия.

Радуйся, зерцало терпеливаго послушания.

Радуйся, слезы духовныя стяжавый.

Радуйся, плачем временным блаженство вечное снискавый.

Радуйся, молитвами непрестанными прилоги вражия сокрушивый.

Радуйся, бдением и трудами плоть твою духови покоривый.

Радуйся, постом и воздержанием страсти укротивый.

Радуйся, суд Божий и муки вечныя приснопамятовавый.

Радуйся, Мароне пустынниче, скорбных врачу и иноков наставниче.

Кондак 3

Силой Всевышняго осененный и укрепленный, в иночестем пострижении власов главы твоея все плотское мудрование отложил еси, преподобне, и яко воин благоискусный, власяницу иноческую в броню спасения стяжав, и непобедимым оружием Креста Христова вооружився, крепко ратовал еси противу врага невидимаго, диавола, смирением глубоким побеждая его вознесенную гордыню и выну вопия ко Господу: Аллилуйя.

Икос 3

Имея помышление о совершенном отрешении от соблазнов мира сего, пришел еси в пустыню суровую сирийскую, обрел еси тамо гору высокую, на ней же древле требище идольское бяше, и Богу освятив, в нем пребывал еси, имея небо покровом и землю одром упокоения, и кожаныя ветхия ризы одеянием многотрудному твоему телу, зноем опаляему и мразом померзаему, емуже ни малого угождения попускал еси, да не возобладает плоть над духом твоим, любовию ко Господу пламеневшим. Тем же зовем ти:

Радуйся, пустыню подвиги твоими освятивый.

Радуйся, жестокое житие пустынное проходивый.

Радуйся, песнопениями немолчными Бога славивый.

Радуйся, молитвы непрестанныя Господеви возносивый.

Радуйся, постниче не изнемогаяй, былием пустынным питавыйся.

Радуйся, трудолюбче нелицемерный, праздность возненавидивый.

Радуйся, многошвенныя ризы носивый.

Радуйся, в терпении и смирении преуспевый.

Радуйся, равноангелен на земли бывый.

Радуйся, презревый славу человеческую.

Радуйся, сокрушивый сети фарисейского тщеславия и гордыни.

Радуйся, поправый высокоумия душевредную прелесть.

Радуйся, Мароне пустынниче, скорбных врачу и иноков наставниче.

Кондак 4

Буря искушений и устремлений диавольских не возможе поколебати храмины твоея душевныя, преподобне отче, основана бо бе на твердом камени веры во Христа и хранима трезвением, трудами и молитвами непрестанными, ими же непрестанно противоборствовал еси врагу рода человеческаго на месте древнего владычества его: тем же и ныне к тихому пристанищу притекл с лики искупленных в мире, победивших же мир, вопиеши Христу: Аллилуйя.

Икос 4

Слышавше мнози о богоугодном житии твоем, отче Мароне, прихождаху к тебе, ови послушати поучений твоих душеполезных, ови же иночествовати с тобою в обители твоей пустынней, их же ты с отеческою любовию приемля, руководствовал еси стезею правою ко спасению, яко всем звати тебе:

Радуйся, веры истинныя правило.

Радуйся, кротости духовныя образе.

Радуйся, человече Божий, преподобием украшенный.

Радуйся, воине Христов, полки невидимых врагов победивый.

Радуйся, мира дольняго мудрый странниче.

Радуйся, мира горняго достойный насельниче.

Радуйся, в добродетелех благоискусный подвижниче.

Радуйся, сопричтенный к лику великих пустынножителей.

Радуйся, богомудрый множества сирийских иноков начальниче.

Радуйся, многая души человеческия Христу уневестивый.

Радуйся, мнозии монастыри руками ученик своих в сирийских пустынех учредивый.

Радуйся, великий авво множества отцев.

Радуйся, Мароне пустынниче, скорбных врачу и иноков наставниче.

Кондак 5

Боготечное светило быв, всех к Солнцу Правды Христу путеводил еси, угодниче Божий, словом и примером жития твоего святаго, еже все посвящено бысть на служение Богу и ближним твоим. Темже блаженство со святыми унаследовал еси и с ними вечно поеши хвалебную песнь Спасителю Богу: Аллилуйя.

Икос 5

Видевше Ангельстии чинове равноангельное житие твое, отче богоблаженне, смирения твоего глубину, молитвы неотступность, воздержания твердость и велию ревность духа твоего о чистоте, удивишася и прославиша Человеколюбца Бога, укрепляющаго немощное естество человеческое. Мы же ублажаем тя и зовем:

Радуйся, светильниче пустынный, просветивый страну Сирийскую сиянием твоих добродетелей.

Радуйся, монашествующих дивное украшение.

Радуйся, цвете благоуханный пустыннаго прозябения.

Радуйся, древо благоплодное небеснаго насаждения.

Радуйся, преподобием и правдою одеянный.

Радуйся, союзом добродетелей удобренный.

Радуйся, помазание приемый Святаго Духа.

Радуйся, освященный сосуде благодати Божией.

Радуйся, рабе Христов благий и верный.

Радуйся, слуго Господень истинный.

Радуйся, заповеди Господни исполнивый и оным научивый учеников твоих.

Радуйся, великий учителю иноков пустыннолюбивых.

Радуйся, Мароне пустынниче, скорбных врачу и иноков наставниче.

Кондак 6

Проповедник был еси евангельских добродетелей братии твоей, преподобне отче Мароне, и чада твоя духовныя верно руководил еси к вышнему Сиону, идеже есть жилище всех спасенных милосердием Христа Бога, пришедшаго в мир спасти падшее человечество и давшаго Своя спасительныя заповеди во спасение всем, иже подобно тебе, возлюбиша Его сердцем чистым и навыкоша пети Ему: Аллилуйя.

Икос 6

Возсияв в пустыни твоей яко богосветлое светило, отче наш Мароне, светом добрых дел твоих озарил еси души и сердца человеков, искавших от тебе наставитися во спасение: мнози бо ведяху тя равноангельна житием и прихождаху к тебе, да слышат от тебе глаголы живота вечнаго. Тебе убо, святому учителю небесныя истины, сотворшему и научившему, и мы смиреннии зовем хвалебно:

Радуйся, Евангелия Христова немолчный проповедниче,

Радуйся, апостольских преданий ревностный хранителю.

Радуйся, Православия святыя догматы в душе твоей добре утвердивый.

Радуйся, верою правою и делы благими Богу угодивый.

Радуйся, во след себе собор учеников твоих ко Христу приведый.

Радуйся, с ними, яко отец со чады, прияти почести небесныя от Господа возшедый.

Радуйся, не скрывый талант, тебе врученный Всевышним Домовладыкою.

Радуйся, куплю многу им сотворивый, спасение душ человеческих.

Радуйся, яко твоими ученьми грешнии покаянием Богу угодиша.

Радуйся, яко твоими наставленьми заблудшии правый путь спасения обретоша.

Радуйся, ближния твоя искренне возлюбивый.

Радуйся, спасению их душевному усердно послуживый.

Радуйся, Мароне пустынниче, скорбных врачу и иноков наставниче.

Кондак 7

Хотение едино имел еси, преподобне отче, еже Богу благоугождати, и спасению душевному ближних твоих благочестно послужити, темже обитель твоя святая бысть пристанище благоутишное всякому человеку, треволнением моря житейскаго утомленному. Ты бо, яко кормчий добрый, вся ученики твоя и приходящия к тебе люди наставлял еси словом и примером твоим вдали мира и сует его, сердцем и усты немолчно возглашати Богу: Аллилуйя.

Икос 7

Новая звезда светозарная на тверди Церкви Христовой возсиял еси, богоблаженне отче, в пустыни в начале подвига иноческаго уединенно пребывая, в молитвах, лощениях и трудах непрестанных, еже видя Всевидец Господь, собра к тебе паству иноков пустыннолюбивых, иже хотяху жити с тобою и назидатися от тебе во спасение: и тамо среди разрушеннаго владычества древняго омрачителя языков, основал еси селение Богу Единому Истинному, обитель свою, яко крин в пустыни процветшую духовно. Темже прославляем тя сими достодолжными похвалы:

Радуйся, преподобне, святостию и чистотою светло украшенный.

Радуйся, богоносне, дарами божественными свыше одаренный.

Радуйся, пастырю добрый тобою собраннаго стада словесных овец.

Радуйся, пустыню непроходимую в вертоград духовный трудами твоими претворивый.

Радуйся, вся страхования и привидения вражия молитвами твоими посрамивый.

Радуйся, нищий духом, но многих богатящий.

Радуйся, постническаго лика украшение.

Радуйся, звездо сияющая в сонме преподобных.

Радуйся, яко тесный и прискорбный путь паче пространнаго возлюбил еси.

Радуйся, воздержанием вся страсти умертвивый.

Радуйся, прежде умертвия твоего мертв бывый греху.

Радуйся, плоть твою духови любомудренно покоривый.

Радуйся, Мароне пустынниче, скорбных врачу и иноков наставниче.

Кондак 8

Странное и преславное чудо видится всем притекающим к тебе, отче наш Мароне, яко дивно прослави тя Господь: приял бо еси от него дар демоны прогоняти, недуги врачевати, скорбящих утешати, ожесточенныя сердца умягчати, да вси воспевают чудодействующему тобою Господу: Аллилуйя.

Икос 8

Все твое, преблаженне и богоносне отче, тщание и все о том бяше попечение, да выну всезлобному рода христианскаго врагу сопротивлятися и гордую его злобу попирати дивным оружием смирения, поста, безстрастия, труда, молитв непрестанных с коленопреклонением и покаянными слезами, и сими сам улучив победу на супостаты, стяжал еси от Господа дар и всем от лукаваго стужаемым помогати. Помози убо и нам, отче преподобне, твоими молитвами противитися искушениям вражиим и подражати тебе в побеждении страстей наших, да зовем ти:

Радуйся, смирением гордость душепагубную поправый.

Радуйся, кротостию пламень гнева в себе погасивый.

Радуйся, яко воздержанием и бдением целомудренно душу и тело твое соблюл еси.

Радуйся, гордыни диавольстей низложителю.

Радуйся, бесов прогонителю.

Радуйся, силу вражию поправый.

Радуйся, в силе Божией преспевавый.

Радуйся, лжи лукаваго обличителю.

Радуйся, прельщения бесовскаго посрамителю.

Радуйся, власть на духи нечистыя приявый.

Радуйся, яко тобою гоними, тии из одержимых ими скоро убегают.

Радуйся, яко бесныя, к тебе приводимии, здравии и смыслящии от тебе отходят.

Радуйся, Мароне пустынниче, скорбных врачу и иноков наставниче.

Кондак 9

Всем приходившим к тебе, молитвы и благословения ради, преподобне отче, дивно бысть видети тя, в ветсей и многошвенней кожаней ризе ходяща и зело нищетно под древом или во дни болезни в пещере пребывающа, всех - богатых и убогих, вельмож и простых, равно с любовию принимал еси и коемуждо слово на пользу душевную изрекал еси. Смиренно молим тя и нам во дни напасти, искушения, недоумения и сомнений притекающим к тебе, возглаголи слово утешения, наставления и ободрения, да поем предстательством твоим чудодействующему нам Господу: Аллилуйя.

Икос 9

Ветий премудрых превзошел еси, преподобне отче, благодатным помазанием словес твоих, ими же грешныя на покаяние приводил еси, подвизающияся в добродетели укрепил еси, и всем путь спасительный ко Христу показал еси, по нему же сам неуклонно шествовал еси до блаженныя твоея кончины, достойный воистину похвал таковых:

Радуйся, Сирийския Православныя Церкве светильниче немерцающий.

Радуйся, и в Российстей стране яко целитель изрядный издревле чтомый.

Радуйся, во дни жития твоего на земли и язычники ублажаемый.

Радуйся, христианскому роду присное утешение.

Радуйся, любящим и чтущим тя ходатаю спасения душам и телесем здравия.

Радуйся, пустынный гражданине, грады и веси наполнивый славою твоих подвигов.

Радуйся, маслино Божия благословения, ея же плодами напиташася вернии.

Радуйся, приведый ко Христу ученики твоя в добродетелех преуспевшия.

Радуйся, уготовавый житием и наставленьми твоими Господеви подвижники совершенныя.

Радуйся, полка иноческаго воевода благоискусный.

Радуйся, пустынножителей руководителю предивный.

Радуйся, храму сему, имени твоему посвященному, покрове Богом данный.

Радуйся, Мароне пустынниче, скорбных врачу и иноков наставниче.

Кондак 10

Спасти хотя многих к тебе прибегавших, не точию с тобою иночествовати хотящих, руку помощи милостивно подавал еси, но и различными мирскими делы, напастьми и скорбми отягченных и утесненных тако утешал, якоже родитель чада своя во обстоянии скорбей и болезней сущия утешает, отраду им своим попечением подавая и отеческою любовию тяжесть печалей облегчая. За таковое твое благодетельство и язычники нечестивыми чтом бысть, преподобне, вернии же, облагодетельствованнии тобою, благодарственно воспеваху Богу: Аллилуйя.

Икос 10

Стена заступления быша молитвы твоя, чудотворче святый, всем с верою к тебе притекающим во всякой скорби, ибо чистоты ради твоея сердечныя, сила духовная от Бога тебе даровася болящих исцеляти, бедствующим помогати, яко славити ближним и дальним величие Божие, в тебе явленное, и звати тебе сице:

Радуйся, сосуде, источаяй елей Божия милосердия.

Радуйся, живоносный источниче, струи исцелений изливающий нам.

Радуйся, скорый возстановителю здравия в немощи лежащих.

Радуйся, всех недугов, паче же болезней лютыя трясавицы и огневицы, целителю.

Радуйся, сляченных и увечных здравых сотворивый.

Радуйся, печальных утешителю.

Радуйся, бедствующим на помощь ускоривый.

Радуйся, разслабленных благосердый укрепителю.

Радуйся, безмездный врачу болезней душевных и телесных.

Радуйся, подателю врачеваний всем, притекающим к тебе с верою.

Радуйся, совершителю многих дивных чудес.

Радуйся, яко обилие благодати Божия прияти сподобился еси.

Радуйся, Мароне пустынниче, скорбных врачу и иноков наставниче.

Кондак 11

Пение всеумиленное Пресвятей Троице принесл еси при исходе твоем, преподобне отче наш Мароне, и яко пшеница зрелая, во время пожатая, являя в краткой, но тяжкой болезни предсмертной и немощь плоти, и силу духа своего, кончиною благою преселился еси от земли в обители горния, прияти награду от руки праведного Мздовоздаятеля Христа, Иже вчини душу твою со духи святых, немолчно возглашающих пред престолом славы Его победную песнь: Аллилуйя.

Икос 11

Светозарный светильник Божия благодати, озаряяй Сирийскую страну, явился еси, преподобне, духовным сиянием подвигов и чудес просветивый пустыню и в ней обители иноческия многия устроивый, и сие сияние твое духовное побуди святителя церкве Кирския почтити тя, авву знаменитаго и преславнаго, благодатию священства славы ради Церкве Христовой. Аще и тужаше дух твой, ужасаяся высоты сея, но смиренное послушание явил еси святителю и священства благодать восприяти не уклонился еси, подвизая всех согласно звати тебе:

Радуйся, место, оскверненное языческими идоложертвенными приношениями, освятивый совершением безкровныя Евхаристическия жертвы.

Радуйся, сея Божественный литургийныя жертвы достойный совершителю.

Радуйся, Алтаря Господня благоговейный служителю.

Радуйся, преподобне, руце твои со многим дерзновением ко Господу воздеявый.

Радуйся, молитвы теплейшия от сердца чиста к Престолу Вседержителя возносивый.

Радуйся, мастию священства умащенная главо.

Радуйся, вождю благоискусный воинов духовных.

Радуйся, свеще в молитве к Богу возженная.

Радуйся, маслино, елей милостей Божиих источившая всесильными молитвами твоими.

Радуйся, чаше, жаждущих утешения и врачевания напоившая.

Радуйся, даром чудотворения облагодатствованный.

Радуйся, телес наших благодатное богодарованное врачевание и о душах наших благоприятное предстательство.

Радуйся, Мароне пустынниче, скорбных врачу и иноков наставниче.

Кондак 12

Благодать, данную ти от Бога ведуще, радостно имя твое воспоминаем, преподобне отче наш Мароне, и с теплым усердием ко всечестному образу твоему притекаем, прилежно моляще чудотворения даром от Господа прославленного: подаждь цельбу всем болящим, наипаче же страждущим огневицею и трясавицею с верою к тебе прибегающим, избави и всех нас от всякия нужды и печали, да поем Богу: Аллилуйя.

Икос 12

Поюще славную кончину твою, стекошася ко гробу твоему иноков лицы и верных множество и со благоговением подъемше святыя мощи твоя, изнесоша я в ближнюю весь, идеже последи создан бяше велий благолепный храм во имя твое, преподобне, в нем же и положены быша многоцелебныя мощи твоя. И мы молящеся в сем храме, имени твоему посвященном, предстояще пред цельбоносным образом твоим и частию святых мощей твоих, чудесы благоухающих, прилежно молим тя: услыши нас всегда, твоего предстательства просящих за скорбных, недугующих и страждущих, к тебе вопиющих:

Радуйся, дарования чудес исцеления исполненный.

Радуйся, печальных отрадо.

Радуйся, немощствующих врачу.

Радуйся, щедрот и милования струя неизсякаемая.

Радуйся, любве и сострадания явление обильное.

Радуйся, телес наших богодарованное врачевание.

Радуйся, о душах наших благоприятное предстательство.

Радуйся, добрый наш наставниче.

Радуйся, о спасении нас грешных сильный ходатаю.

Радуйся, благосердый помощниче всех, благочестно совершающих память твою.

Радуйся, целителю наш скорый.

Радуйся, заступниче наш теплый.

Радуйся, Мароне пустынниче, скорбных врачу и иноков наставниче.

Кондак 13

О преподобне и богоносне отче наш Мароне Чудотворче! Приими сие похвальное пение, от нас недостойных во умилении тебе приносимое и не преставай молитися за всех недугующих и скорбящих, к твоему предстательству с верою притекающих, и подавай и всем нам твоими богоприятными молитвами вся благопотребная в жизни сей и к вечному спасению полезная, и сподоби вкупе с тобою во Царствии Небесном непрестанно пети Богу: Аллилуйя.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Марону Пустыннику Сирийскому

О возлюбленная и священная главо, преподобне и богоносне отче наш Мароне! Назирай свыше милостивно нас грешных и молися Владыце милостивому и всещедрому всех благ Подателю Богу о соблюдении страны нашея. Буди молебник и о нас грешных! К страшному Господу Саваофу честныя своя руце в час сей простри, и от Него милость и щедроты испроси, и приими ны во свое ходатайство и заступление, от всех бед и лютых болезней сохрани, и от всяких страстей свободи, и от нестерпимыя и неутешимыя огневицы и трясавицы молитвами твоими избави нас, и от нападения бесов, от видимых и невидимых врагов соблюди, и согрешениям нашим прощение испроси, и спасенны Христу представи ны, и милостивно, в день Страшнаго Суда, с радостию предстати нам пред лицем неизреченныя славы Его сподоби, и милостивное призвание в Царство Небесное от Него услышати, и в неизреченней радости зрети преславную Его лица доброту сподоби благодатию и человеколюбием Господа Бога и Спаса нашего Иисуса Христа: яко держава Его благословенна и препрославленна со Безначальным Его Отцем и Пресвятым и Благим и Животворящим Его Духом, ныне и присно и во веки веков. Аминь.