Акафист святителю Парфению, епископу Лампсакийскому, чудотворцу

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Избра́нному Бо́гом от младе́нства свети́льнику миру и цели́телю болезнем бы́вшему, святи́телю Христо́ву Парфе́нию ны́не смире́нно притека́юще, бра́тие, из глубины́ серде́чныя вознесе́м моли́тву, я́ко могу́щему свободи́ти на́с от страсте́й, и вся́ких бед и напа́стей, зову́ще:

Ра́дуйся, Парфе́ние, вели́кий чудотво́рче.

Икос 1

Ангельския си́лы удиви́шася бога́тству в тебе су́щия благода́ти Бо́жия, е́юже от младе́нства испо́лнился еси́: бесы бо яви́лся еси́ изгоня́я, боля́щия исцеля́я, слепы́м зрение подава́я и и́на мно́га ди́вная творя́, и́мже чудя́щеся, вопие́м ти́:

Ра́дуйся, Бо́жия благода́ти сосу́де избра́нный;

Ра́дуйся, во мра́це сия́ющая свеще́.

Ра́дуйся, любве́ Бо́жия к человеком явле́ние;

Ра́дуйся, скорбя́щих утеше́ние.

Ра́дуйся, а́лчущих и жа́ждущих корми́телю;

Ра́дуйся, наги́х одеятелю.

Ра́дуйся, ни́щих дру́же и помо́щниче;

Ра́дуйся, го́рестей на́ших услади́телю.

Ра́дуйся, го́речи сласте́й душевре́дных обличи́телю;

Ра́дуйся, богоугожде́ния о́бразе.

Ра́дуйся, до́бре жи́тельствующия утвержда́яй;

Ра́дуйся, заблу́дших исправля́яй.

Ра́дуйся, Парфе́ние, вели́кий чудотво́рче.

Конда́к 2

Ви́дя, е́же по Бо́зе, ангелоподо́бное житие́ твое́, архиепи́скоп Ахи́ллий, чудесе́м твои́м удивля́яся, ра́довашеся, я́ко таковы́й свети́льник Це́ркви обретеся. Темже потща́ся на свещнице Лампсакийския Це́ркве поста́вити тя́, и вопия́ше ди́вному во святы́х Бо́гу: Аллилу́ия.

Икос 2

Ра́зум в ведении дея́нием стяжа́л еси́, богому́дре, таи́нник Бо́жия благода́ти бы́в: богомы́слием бо и моли́твою, кро́тостию же и смире́нием и чистото́ю, я́коже лествицы степе́нями к боговидению восше́л еси́. Оба́че ревну́я Го́сподеви во смире́нии подража́ти, до дне́ явле́ния своего́ мирови, благода́ть су́щую в тебе таи́л еси́. Сего́ ра́ди вопие́м ти́ си́це:

Ра́дуйся, иису́сов сострада́льче и сонаследниче;

Ра́дуйся, до́брый во́ине Христо́в.

Ра́дуйся, жития́ чистото́ю а́нгелом поревнова́вый;

Ра́дуйся, во хра́ме пребыва́ние от ю́ности возлюби́вый.

Ра́дуйся, земны́я му́дрости ненауче́нный, но небе́сною сугу́бо обогаще́нный;

Ра́дуйся, Телом и Кро́вию Христо́вою та́инственно воспита́нный.

Ра́дуйся, моли́твою возраще́нный;

Ра́дуйся, то́ю вся́ по́хоти, я́ко мече́м, посекий.

Ра́дуйся, о́бразе кро́тости и смире́ния;

Ра́дуйся, моли́твенников ти́хая отра́до.

Ра́дуйся, мира убега́ющим покро́ве;

Ра́дуйся, всем отверза́яй очеса́ духо́вная.

Ра́дуйся, Парфе́ние, вели́кий чудотво́рче.

Конда́к 3

Си́лою Христо́вою свы́ше облече́н, идолобесия крепость низложи́л еси́, лю́ди же пре́жде неверныя ко Христу́ приве́д, проти́ву духо́в зло́бы укрепи́л еси́, и от сете́й злоко́зненных изба́вил еси́, науча́я всех пети Бо́гу: Аллилу́ия.

Икос 3

Имея ре́вность во утвержде́нии новообраще́нныя па́ствы твоея́, в Царьгра́д восте́кл еси́, и от царя́ Константи́на на разоре́ние скве́рных ка́пищь и́дольских вла́сть прии́мь, вся́ кумиры во гра́де твое́м ниспрове́ргл еси́, хра́м же Истинному Бо́гу воздви́гл еси́ на вели́кую ра́дость верным, воспева́вшим ти́ си́це:

Ра́дуйся, Ду́ха Свята́го жили́ще освяще́нное;

Ра́дуйся, о́браз Бо́жий не помраче́н в себе сохрани́вый.

Ра́дуйся, подо́бие Бо́жие в душе свое́й созда́вый;

Ра́дуйся, лампа́до еле́я благово́ннаго.

Ра́дуйся, свети́льниче, горя́й и светя́й;

Ра́дуйся, огню́, пожига́яй зловерие.

Ра́дуйся, растленныя хра́мы ду́ш на́ших обновля́яй;

Ра́дуйся, кумиры по́хотей на́ших ниспроверга́яй.

Ра́дуйся, кре́ст сво́й безро́потно понесы́й и на́с тому́ же науча́яй;

Ра́дуйся, па́стырю на́ш до́брый и люби́мый.

Ра́дуйся, Лампсакийская похвало́;

Ра́дуйся, всея́ Це́ркви украше́ние.

Ра́дуйся, Парфе́ние, вели́кий чудотво́рче.

Конда́к 4

Бу́рю страсте́й мои́х укроти́, чудотво́рче, се́ бо волне́ния не ктому́ терпя́, к тебе, о ко́рмчию до́брый, о́чи моя́ возвожу́. Ты́ же, я́ко вы́ну Бо́жию престо́лу предстоя́й, помоли́ся о мне, грешнем и нечи́стем, да возведе́н бу́ду от бе́здны грехо́вныя и, я́ко ио́на, неи́стовствующия пучи́ны избы́в, благода́рственно воспою́ о тебе Бо́гу: Аллилу́ия.

Икос 4

Слы́шавше роди́телие беснаго отроча́те, я́ко ду́хи нечи́стыя сло́вом отго́ниши, пла́чуще, сы́на своего́ к тебе приведо́ста. Ты́ же, я́ко Пра́веднаго Судии́ служи́тель верный, исцели́ти недосто́йнаго не восхотел еси́, оба́че, роди́телевыми мольба́ми преклоне́н бы́в, здра́ва о́трока сотвори́л еси́. Они́ же, ра́дующеся, вопия́ху ти́:

Ра́дуйся, Бо́жия пра́вды ди́вный служи́телю;

Ра́дуйся, гла́се гнева Госпо́дня грешники устраша́яй.

Ра́дуйся, в милосе́рдии к ка́ющимся Христу́ подража́яй;

Ра́дуйся, го́рдыя и непокори́выя к послуша́нию приводя́й.

Ра́дуйся, роди́телем, ча́да своя́ развраща́ющим, наказа́ния полага́яй;

Ра́дуйся, ю́ноши заблу́дшия от пути́ поги́бельнаго отвраща́яй.

Ра́дуйся, честна́го супру́жества покро́ве;

Ра́дуйся, си́рых и вдови́ц защище́ние.

Ра́дуйся, ста́рости жезле́ и подкрепле́ние;

Ра́дуйся, усо́пшим блаже́ннаго упокое́ния хода́таю.

Ра́дуйся, на́ша наде́ждо непосты́дная;

Ра́дуйся, девства красото́.

Ра́дуйся, Парфе́ние, вели́кий чудотво́рче.

Конда́к 5

Богода́нною ти́ си́лою мно́гая чудеса́ соверши́в, некогда узрел еси́ ю́ношу ме́ртва при пути́ лежа́ща, роди́тели же его́ над ни́м пла́чуща, я́коже дре́вле Госпо́дь над Ла́зарем, прослези́лся еси́ и, прекло́нь колена, с призыва́нием и́мене Госпо́дня уме́ршаго за ру́ку взе́м, воздви́гл еси́. Абие же ю́ноша то́й воскре́се и глаго́лати нача́т, велича́я Бо́га и восклица́я: Аллилу́ия.

Икос 5

Ви́дящи ры́барие лампсакийстии на мно́г де́нь мре́жи своя́, извлача́емыя на бре́г, ни еди́ныя ры́бы иму́щия, и надо́лзе та́ко всу́е труди́вшеся, к тебе со слеза́ми притеко́ша. Ты́ же, те́пле помоли́вся, па́ки мре́жи во глубину́ вве́ргнути ры́барем повелел еси́. Они́ же, толи́кую лови́тву я́ша, я́ко и извлещи́ я́ едва́ возмого́ша, тебе́ же, до́брый моли́твенниче, просла́виша. С ни́ми же и мы́ глаго́лем тебе такова́я:

Ра́дуйся, человеки Христу́ уловля́яй;

Ра́дуйся, смертоно́сныя глубины́ изыма́яй.

Ра́дуйся, до́брый ко́рмчию корабля́ иису́сова;

Ра́дуйся, во мра́це и бу́ре путево́дный свети́льниче.

Ра́дуйся, от та́йных напа́стей охраня́яй;

Ра́дуйся, от звере́й душетленных спаса́яй.

Ра́дуйся, от во́лн гнева смире́нием спаса́тися науча́яй;

Ра́дуйся, реко́, на́шу нечистоту́ моли́твою омыва́ющая.

Ра́дуйся, страстьми́ сгара́ющих прохлажде́ние небе́сное;

Ра́дуйся, носи́телю чуде́с, жа́жду духо́вную утоля́яй.

Ра́дуйся, си́лою Бо́жиею изнемога́ющих укрепля́яй;

Ра́дуйся, де́монов посрамле́ние.

Ра́дуйся, Парфе́ние, вели́кий чудотво́рче.

Конда́к 6

Проповедник богоно́сный яви́лся еси́, святи́телю, не то́чию словесы́ науча́я, но боже́ственными дея́нии твои́ми, па́че же и всем житие́м, вся́каго человека к Еди́ному Истинному Бо́гу Спаси́телю приводя́й и глаго́лати Ему́ науча́яй: Ве́лий еси́, Го́споди, во святы́х Твои́х и чу́дна дела́ Твоя́! Кто́ не поклони́тся Тебе, Царю́ Святы́й, и со стра́хом не воспое́т: Аллилу́ия.

Икос 6

Возсия́л еси́ миру, о́тче, чуде́с светлостьми́, се́ бо и тва́рь вся́ повину́ся тебе, до́ждь с небеси́ све́дшему и ско́рбныя лю́ди тем зело́ возвесели́вшему. При́зри у́бо и на на́с, грешных, не отврати́ся от на́с, зо́л ра́ди на́ших, но вонми́ моли́твам на́шим, сохрани́ от гла́да, тли́ и вся́каго вре́да на́с, вопию́щих ти́ си́це:

Ра́дуйся, Пита́теля вся́ческих вели́кий уго́дниче;

Ра́дуйся, Боже́ственнаго Учи́теля подража́телю.

Ра́дуйся, Хлебом небе́сным ду́ши насыща́яй;

Ра́дуйся, безпло́дныя ни́вы серде́ц на́ших благопло́дны творя́й.

Ра́дуйся, умиле́ния сле́зы из оче́с на́ших изводя́й;

Ра́дуйся, я́ко тобо́ю грехи́ на́ша очища́ются.

Ра́дуйся, я́ко зно́й страсте́й на́ших тобо́ю остужа́ется;

Ра́дуйся, я́ко вся́ потре́бная в житии́ се́м твое́ю моли́твою на́м да́руются.

Ра́дуйся, я́ко ра́вною ревни́теля Илии́ благода́тию до́ждь низве́л еси́;

Ра́дуйся, я́ко тва́рь тебе́, я́ко царя́, послу́шаше.

Ра́дуйся, я́ко обетова́ния Христо́ва верующим на тебе испо́лнишася;

Ра́дуйся, я́ко апо́столом Его́ чудесы́ уподо́бился еси́.

Ра́дуйся, Парфе́ние, вели́кий чудотво́рче.

Конда́к 7

Хотя́щи от ду́ха неверия свободи́тися, жена́ некая со усе́рдием притещи́ к тебе потща́ся, от ско́рби сея́ избы́ти тобо́ю упова́ющи. Темже честна́я во упова́нии бла́зе не посрами́ся: тебе бо моли́тву сотво́ршу, и бесу изгна́ну бы́вшу, с верою несумненною благода́рственно воспе: Аллилу́ия.

Икос 7

Но́вое, дре́вняго лютейшее, безверие ны́не вся́ стра́ны и вся́ племена́ земна́я растлети хва́лится, я́ко и на́шея правосла́вныя па́ствы овца́м от веры отторга́тися. Но мы́ к тебе, о́тче преподо́бне, прибега́юще, мо́лимся: я́коже во оте́чествии твое́м, та́ко и в на́шем, бесо́вскую тму́ предста́тельством твои́м разжени́, да спасе́ннии твои́ми моли́твами, си́це восхваля́ем тя́:

Ра́дуйся, умовре́дия язы́ческаго не́мощь облича́яй;

Ра́дуйся, неверствия гла́дом истаева́ющия ду́ши насыща́яй.

Ра́дуйся, и́стины Христо́вы живо́ю водо́ю мир напая́яй;

Ра́дуйся, помраче́нныя смы́слом просвеща́яй.

Ра́дуйся, зва́ние Боже́ственное человеком изясни́вый;

Ра́дуйся, отча́янныя небе́сною наде́ждею укрепи́вый.

Ра́дуйся, лжу́ огне́м и́стины попали́вый;

Ра́дуйся, щито́м веры вся́ стрелы разже́нныя врага́ отрази́вый.

Ра́дуйся, моли́твою, я́ко мече́м, вооруже́нный;

Ра́дуйся, шле́мом спасе́ния венча́нный.

Ра́дуйся, ми́ра душе́внаго пода́телю;

Ра́дуйся, уны́лых от сна́ духо́внаго возбуди́телю.

Ра́дуйся, Парфе́ние, вели́кий чудотво́рче.

Конда́к 8

Стра́нствие преходя́щее житие́ на́ше земно́е помышля́я, со апо́столом глаго́лал еси́, преподо́бне: Не и́мамы зде пребыва́ющаго гра́да, но гряду́щаго взыску́ем. О не́мже и воздыха́л еси́ при́сно, жела́я от телесе́ разреши́тися и со Христо́м жи́ти. Оба́че не преста́вился еси́ к Нему́, до́ндеже мно́жество человек от поги́бели спа́сл еси́, с ни́миже ны́не, я́ко оте́ц со ча́ды, ра́достно воспева́еши в раи́ Госпо́днем: Аллилу́ия.

Икос 8

Ве́сь прилепи́лся еси́, блаже́нне, иису́сови, и Того́ еди́наго всем жела́нием возлюби́в, вся́ до́льняя сла́сти и су́етную сла́ву человечу возненави́дел еси́, ду́шу же и тело твое́ чи́сты соблю́л еси́. Сего́ ра́ди и избра́ тебе́ Бо́г во Свое́ Ему́ жили́ще, и Тому́ хра́м Госпо́день освяще́н яви́лся еси́, но и вся́ окре́стныя гра́ды и страны́ Ева́нгелием просвети́л еси́. Темже и мы́, твоему́ вели́чию дивя́щеся, зове́м:

Ра́дуйся, бра́чнаго черто́га Агнча все́льниче досто́йнейший;

Ра́дуйся, благоуха́ния небе́снаго храни́лище нескве́рное.

Ра́дуйся, оде́жду креще́ния нескве́рну сохрани́вый;

Ра́дуйся, архиере́йския благода́ти досто́йный носи́телю.

Ра́дуйся, па́ству твою́ до́бре упасы́й;

Ра́дуйся, заблу́дшия на до́брыя па́жити па́ки возврати́вый.

Ра́дуйся, во пло́ти безпло́тным подража́телю;

Ра́дуйся, о чистоте ревну́ющим помо́щниче.

Ра́дуйся, грешники ка́ющияся воздвиза́яй;

Ра́дуйся, к любви́ Бо́жией на́с наставля́яй.

Ра́дуйся, пло́ти грехо́вныя пла́мень угаша́яй;

Ра́дуйся, и́ноков и и́нокинь ди́вный спобо́рниче.

Ра́дуйся, Парфе́ние, вели́кий чудотво́рче.

Конда́к 9

Вся́каго грешника ка́ющася да́нною ти́ благода́тию от сме́рти вечныя исхища́еши, о́тче преподо́бне: се́ бо и Алла́на о́наго, сама́го себе́ удави́вшаго, и́менем иису́совым воскреси́л еси́ и, от мучи́тельства диа́воля свободи́в, научи́л еси́ пети: Аллилу́ия.

Икос 9

Ветии суему́дреннии недоумеют, ка́ко ты́, му́ж препро́ст сы́й, ниже́ кни́жныя му́дрости науче́н, толи́кое мно́жество человек от неверствия отврати́л еси́, пред царе́м же и мудреца́ми глаго́ля, не постыделся еси́? Мы́ же, прославля́юще умудри́вшаго тя́ Свята́го Ду́ха, вопие́м ти́:

Ра́дуйся, Ипоста́сныя Прему́дрости Бо́жия избра́нниче;

Ра́дуйся, чистоты́ ра́ди прия́телище Ея́ бы́вый.

Ра́дуйся, прему́дрость Креста́ уразумевый;

Ра́дуйся, му́дрости мирския бу́йство обличи́вый.

Ра́дуйся, зло́бою младе́нствовавый;

Ра́дуйся, ра́зум сво́й в послуша́ние Христу́ плени́вый.

Ра́дуйся, всего́ себе́ Христа́ ра́ди отве́ргийся;

Ра́дуйся, путе́м кре́стным всю́ свою́ жи́знь проше́дый.

Ра́дуйся, о земны́х ско́рбех, вечное воздая́ние предзря́, пренебрегий;

Ра́дуйся, еди́ное на потре́бу позна́вый.

Ра́дуйся, пло́ть свою́ ева́нгельски возненави́девый;

Ра́дуйся, на служе́ние Бо́гу и бли́жним всего́ себе́ преда́вый.

Ра́дуйся, Парфе́ние, вели́кий чудотво́рче.

Конда́к 10

Спаси́ на́с, о́тче, от ца́рскаго гнева! - вопия́ху ти́ порфиротво́рцы иногда́. Имже подража́юще, зове́м: От Бо́жия гнева твое́ю моли́твою спаси́ на́с! Тии бо земна́го царя́ ри́зы погубля́ху, мы́ же ца́рственную креще́ния ри́зу оскверни́хом. Предста́ни у́бо о на́с Влады́це небесе́ и земли́, да да́ст на́м оставле́ние содеянных зо́л, и да облече́т ны́ в пе́рвую оде́жду и сподо́бит в Ца́рствии небе́снем благода́рственно воспети: Аллилу́ия.

Икос 10

Царю́ Небе́сному всем усе́рдием рабо́тая, и́стинную свобо́ду духо́вную сохрани́л еси́, па́че же и са́м, я́ко ца́рственно свяще́ние яви́лся еси́, вся́ тленныя ве́щи мира сего́ попра́в. Темже и архиепи́скопа Ипатиа́на, сребролю́бию ра́бствовавша, к покая́нию приве́л еси́, того́ душе́вную, ку́пно же и теле́сную болезнь исцели́в. Изба́ви у́бо и на́с, и́гом корыстолю́бия одержи́мых, да воспое́м ти́:

Ра́дуйся, ра́бе благий и верный небе́снаго Царя́;

Ра́дуйся, тала́нты своя́ усугу́бивый.

Ра́дуйся, житие́м свои́м небеса́ возвесели́вый;

Ра́дуйся, вселе́нную чудесы́ удиви́вый.

Ра́дуйся, помышле́ний и жела́ний свои́х му́дрый власти́телю;

Ра́дуйся, вла́сть над бесы, е́же изгони́ти я́, прие́мый.

Ра́дуйся, я́ко вси́, притека́ющии к тебе, и́га грехо́внаго свобожда́ются;

Ра́дуйся, я́ко душе́вныя на́ша стра́сти тобо́ю укроща́ются.

Ра́дуйся, я́ко и теле́снии неду́ги на́ши тобо́ю исцеля́ются;

Ра́дуйся, я́ко мно́гия грехо́вныя у́зы человеков расто́ргл еси́.

Ра́дуйся, я́ко миродержи́телей не́мощь яви́л еси́;

Ра́дуйся, я́ко в тебе просла́вися си́ла иису́сова.

Ра́дуйся, Парфе́ние, вели́кий чудотво́рче.

Конда́к 11

Пение непреста́нное Христу́ в житии́ твое́м приноси́л еси́, о́тче, и небе́сным си́м исправле́нием серафи́мски к Нему́ любо́вию возгорелся еси́, и а́ще телом на земли́, но ду́хом в го́рних вы́ну пребыва́л еси́. По успе́нии же твое́м в ли́це пе́рвенец, иску́пленных от земли́, пое́ши о́ную чу́дную девственников пеcнь. Мы́ же, грешнии, на земли́ бре́нными усты́ вопие́м смире́нно Бо́гу: Аллилу́ия.

Икос 11

Света небе́снаго земно́е прия́телище показа́лся еси́, егда́ приспе ча́с тво́й, да от мира сего́ в селе́ния возлю́бленная пре́йдеши: на одре бо неду́гуяй, ни от кого́же исцеле́ния прия́ти восхотел еси́, исто́чник исцеле́ний лю́дем быва́яй, Бо́жию бо изволе́нию благоду́шне повину́лся еси́, на́с же пети науча́еши си́це:

Ра́дуйся, зерца́ло Трисия́ннаго Света;

Ра́дуйся, небе́снаго озаре́ния испо́лненный.

Ра́дуйся, от бога́тства ду́ха твоего́ бли́жния просвети́вый;

Ра́дуйся, до́брых дел нело́жный учи́телю и о́бразе.

Ра́дуйся, гно́йныя я́звы страсте́й моли́твами твои́ми исцеля́яй;

Ра́дуйся, нико́им же неду́гом боля́щих возгнуша́выйся.

Ра́дуйся, стра́хом Бо́жиим огради́выйся;

Ра́дуйся, во́ли Госпо́дни безро́потный исполни́телю.

Ра́дуйся, от младе́нства Го́сподом предызбра́нный;

Ра́дуйся, от ю́ности греху́ уме́рый.

Ра́дуйся, го́рния жи́зни вожделевый;

Ра́дуйся, из темни́цы телесе́ к лу́чшему житию́ ра́достно преше́дый.

Ра́дуйся, Парфе́ние, вели́кий чудотво́рче.

Конда́к 12

Благода́ти да́р испроси́ на́м у Го́спода, тебе́, о́тче, верно хва́лящим, вонми́ воздыха́ниям на́шим, сле́з на́ших не пре́зри, утоли́ на́ша ско́рби, укроти́ лю́тыя стра́сти, да́ждь на́м пла́чь сокруше́нный о гресех на́ших, да душа́ми чи́стыми и нескве́рными устна́ми воспое́м Бо́гу: Аллилу́ия.

Икос 12

Пою́ще тя́, о богоблаже́нне о́тче, вемы, я́ко хвале́ния сия́, к прославле́нию свяще́нных по́двиг твои́х и твоея́ боже́ственныя сла́вы не дово́льна су́ть, зане́ от помраче́нных умо́в и оскверне́нных усте́н возно́сятся. Оба́че, любо́вию подвиза́еми, дерза́ем глаго́лати си́це:

Ра́дуйся, от младе́нства всего́ себе́ Го́сподеви преда́вый;

Ра́дуйся, благово́нием ра́йским облагоуха́нный.

Ра́дуйся, светом моли́твы просвеще́нный;

Ра́дуйся, теплото́ю любве́ Бо́жия обя́тый.

Ра́дуйся, во Христа́ облече́нный;

Ра́дуйся, светлою нетления ри́зою украше́нный.

Ра́дуйся, земны́х стяжа́ний, я́ко бре́мени тя́жкаго, отве́ргийся;

Ра́дуйся, нико́его же и́га кроме иису́сова понесы́й.

Ра́дуйся, от младе́нства чудотво́рец яви́выйся;

Ра́дуйся, до престарения верен Христу́ пребы́вый.

Ра́дуйся, притека́ющия к тебе нетесно в се́рдце свое́м вмести́вый;

Ра́дуйся, ка́ющияся сугу́бо возлюби́вый.

Ра́дуйся, Парфе́ние, вели́кий чудотво́рче.

Конда́к 13

О, вели́кий и чу́дный архиере́ю Бо́жий, о́тче Парфе́ние богоно́сне! Ны́нешняя на́ша убо́гая моле́ния, я́ко кади́ло прия́тное приими́, и не забу́ди пред престо́лом Влады́ки Христа́ моля́ся, да изба́вит на́с от вся́ких бед и зо́л и укрепи́т проти́ву бесо́вския ра́ти, и и́змет вечныя му́ки всех, вопию́щих Ему́: Аллилу́ия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва святи́телю Парфе́нию, епи́скопу Лампсакийскому

О, свяще́нная главо́, преподо́бне о́тче Парфе́ние! Кия моли́твы принесу́ тебе а́з, во гресех вы́ну пребыва́яй? Ра́зве о зло́бе свое́й те́пле пла́кати потщу́ся и твоея́ по́мощи и укрепле́ния испроси́ти дерзну́. Се́ зри́ши, о блаже́нне, ка́ко греси́, ско́рби же и напа́сти жите́йския ду́шу мою́ обурева́ют и уже́ во во изнеможе́ние ту́ю приведо́ша. Оба́че, на предста́тельство твое́ пред Го́сподем надеяся, вопию́ ти́, свя́те: укрепи́ осла́бленныя ру́це и колена моя́, да́ждь утеше́ние светлое безотра́дней душе мое́й, услади́ го́рькия ско́рби, я́же я́ко те́рния и волчцы́ о́стрыя мя́ уязвля́ют и пу́ть спаси́тельный тя́жек ми́ творя́т. Испроси́ мне от Го́спода терпения да́р, кро́тости же и смиренному́дрия ду́х пра́вый, да не́гли и́ми на мя́ благода́ть Утешителева привлече́тся. Очи́сти мя́, моли́твою твое́ю от вся́кия скве́рны пло́ти и ду́ха, да бре́мя грехо́в све́ргнув и от я́зв страсте́й исцеле́н, ле́гце сподо́блюся прейти́ от диа́вольския сети и по́двиг жития́ сего́ преше́д, не лише́н бу́ду ра́йския оби́тели, ку́пно со всеми святы́ми сла́вя и воспева́я Пресвяту́ю и достопокланя́емую Тро́ицу, Отца́ и Сы́на и Свята́го Ду́ха, во веки веко́в. Ами́нь.