Акафисты святым
Акафист святителю Павлину Ноланскому
![Акафист святителю Павлину Ноланскому Акафист святителю Павлину Ноланскому](img_i/s416.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кондак 1
Избранниче Божий, святителю Павлине, пастырей славное украшение и страждущих светлая отрада, нищих богатство и в горькой нужде сущих утешение, узников надеждо и грешных исправление, озари нас лучами любве твоея, зовущих: Радуйся, Павлине, святителю милостивый.
Икос 1
Ангеле утешителю скорбящих и немощных кроткий к небеси путеводитель был еси в житии твоем, святителю, душу свою за спасение униженных положил еси, тем же ароматом добродетелей твоих услаждаеми, величаем тя хвалебно:
Радуйся, свирель, к небесам призывающая.
Радуйся, благоуханное миро смирения.
Радуйся, добрыми делами Отца прославляяй.
Радуйся, любовию скорбных согреваяй.
Радуйся, Божию славу в жизни своей проявивый.
Радуйся, образе христоподражательного жития.
Радуйся, Павлине, святителю милостивый.
Кондак 2
Отверзи тебе небо и свет невечерний исполни душу твою, егда, наставляемый супругою и святителем Амвросием Медиоланским, ты отвергл еси мрак языческих страстей и в купели крещения духом узрел еси красоту лица Божия, воспев: Аллилуиа.
Икос 2
Разум, наукою и обилием знаний блистающий, Христу посвятил еси, с высоты почести и славы к вольной нищете Его ради снисшел еси и величие философа в крайнее смирение праведника изменил еси, вдохновляя звати тебе:
Радуйся, дивное явление силы и духа.
Радуйся, чудо возрождающей благодати.
Радуйся, образе нравственного преображения.
Радуйся, обновляяй души верных.
Радуйся, озаряяй их Евангельскою красотою.
Радуйся, и нас во Христа облекаяй.
Радуйся, Павлине, святителю милостивый.
Кондак 3
Силою таинственною влеком, по возрождении водою и духом, ты уединился на некое время в Пиренейских горах. И там в тишине беседовал с Единым, Истинным и Вечным и взывал еси радостно Нетленному Жениху твоея души: Аллилуиа.
Икос 3
Слыша славного Авзония, учителя твоего, и прочих друзей зовущих ти возвратитися к богатству, славе и радостям тленного мира, ты отвещал еси, яко сладостнее тебе уничижение со Христом и смирение Его, и не страшно посмеяние человеческое:
Радуйся, презреваемый славу временную.
Радуйся, обнищавый произволением.
Радуйся, купино пламенеющая огнем богообщения.
Радуйся, в пустыне углубившийся в тайны Евангелия.
Радуйся, озеро, отразившее ясный облик Христа.
Радуйся, благодатное реко живыя воды.
Радуйся, Павлине, святителю милостивый.
Кондак 4
Бури житейския удалився и волнений губительных мира сего избежав, обрел еси мир невозмутимый у Христа. Приведи и нас к тихой пристани упокоения в Боге, где сокровенная сладость поющих: Аллилуиа.
Икос 4
Зряще высокое твое житие, христиане града Барселоны понудиша тя приняти служение пресвитерское, зовуще:
Радуйся, в пустыне облекшийся силою свыше.
Радуйся, мир обогативый дарами духа.
Радуйся, тайн веры смиренный служителю.
Радуйся, Евхаристии сладкогласый ублажителю.
Радуйся, кротостию строгость растворяяй.
Радуйся, безгневия и смирения обиталище.
Радуйся, Павлине, святителю милостивый.
Кондак 5
Устрашився славы человеческия, тайно удалился еси с блаженною супругою твоею во град Нолу; там жизнь проведя в скудости и трудах, служа бедным, призревая сирых и болящих, в смиренной безвестности для мира, воспеваем есте: Аллилуиа.
Икос 5
Видя бедного просяща, повелел еси супруге твоей отдати последний кус хлеба. Она же не даде. И се прииде весть о потоплении корабля с пшеницею, посланного тебе от друзей, тогда рекл еси жене: "Аще бы не пожалела еси последнего хлеба, не погубил бы Господь корабля". Сему наставлению внимая, зовем ти:
Радуйся, милостивый до самоотречения.
Радуйся, щедрый и в крайней нужде.
Радуйся, через веру супруги Христа познавый.
Радуйся, с нею путем добра достигнувый райских высот.
Радуйся, образе благословенного супружества.
Радуйся, наставниче спасительного в мире жития.
Радуйся, Павлине, святителю милостивый.
Кондак 6
Проповедуя тайны веры и словом и посланием, ты потщался еси украшати Божия храмы изображением святых икон, глаголя, яко сие есть превосходный путь учения веры и благочестия. Тако назидал еси мудрых и некнижных, подвизая всех пети: Аллилуиа.
Икос 6
Воссиял еси радостию, егда сподоби тя Господь со святителем Амвросием обрести нетленное тело мученика Назария и цельбоносные кости святителя Кельсия, во благоухании знамений и чудес. Ныне же и сам ты чудо твориши всем призывающим тя:
Радуйся, молитвениче о нас усердный.
Радуйся, врачу лукавых совестей.
Радуйся, греховных страстей умирителю.
Радуйся, исцелителю тяжких болезней.
Радуйся, бездно чудес и милостей.
Радуйся, слуга нищих и убогих.
Радуйся, Павлине, святителю милостивый.
Кондак 7
Уста блаженного Августина прославиша тя, яко писателя и отца Церкве просвещенного, обратившего сокровища познаний во славу Бога, даровавшего их тебе. Ты отреклся еси от света, во еже объяти величие Креста и смиренно взывати: Аллилуиа.
Икос 7
Удивляяся богатству дарований твоих и высоте добродетельного жития, христиане града Нолы избраша тя во епископа области своея. Ты же, приимь от Христа виноградник духовный, плоды его во сто крат умножил еси и цветы святыни обильно возрастил еси, подвизая звати тебе:
Радуйся, глубино богословия.
Радуйся, православия светило,
Радуйся, теплый молитвениче за умерших.
Радуйся, мудрый наставниче живых.
Радуйся, кроткий вразумителю заблудших.
Радуйся, любвеобильный учителю верных.
Радуйся, Павлине, святителю милостивый.
Кондак 8
Страны родныя от вандалов опустошения, градов разорение, тяжкое рабство духовных чад, вопли детей и вдовиц горестно переживал еси, святителю. Но смятеся святая душа твоя, выкупая пленных, питая гладных, утешая скорбных, всех поучал еси бодренно взывати: Аллилуиа.
Икос 8
Весь был еси любовь, границ не имущая, сего ради избавляя от пленения сына вдовицы, вместо него сам в рабство отдался еси. Мы же, прославляя такое неслыханное милосердие, возглашаем ти:
Радуйся, яко с тобою воистину Христос.
Радуйся, чистейшая Евангельская лилия.
Радуйся, победная песнь торжествующей любви.
Радуйся, образ давый всем временам и народам.
Радуйся, яко вся преклоняются пред величием твоим.
Радуйся, источай нам потоки милосердия твоего.
Радуйся, Павлине, святителю милостивый.
Кондак 9
Всячески смирился еси, святителю, из владыки рабом, из епископа садовником соделался, труждаяся, терпя позор пленения, предавая себя за спасение ближних, в глубоком уничижении добре потрудился еси Господу твоему, взывая Ему: Аллилуиа.
Икос 9
Не может град укрытися сверху горы стоя, не скрыся и величие святителя Павлина от поработившего его князя. И егда же тот увидел, яко прозорливый садовник его епископ есть, то со страхом дарова ему свободу, ублажая сице:
Радуйся, пастырю добрый.
Радуйся, душу свою полагаяй за овцы.
Радуйся, жилище Святого Духа.
Радуйся, праведниче не от мира сего.
Радуйся, кротости звездо лучезарная.
Радуйся, пророческих даров тайниче.
Радуйся, Павлине, святителю милостивый.
Кондак 10
Спасти хотя порабощенных и страждущих во узах, паки яви угодник Божий величие души своея, егда желавшему наградити его князю рече: "Единого прошу, отпустите со мною всех пленных из области моея". И, прияв согласие, возопи с радостию Богу: Аллилуиа.
Икос 10
"Се аз и дети, яже даде ми Господь", - взываша святитель со всеми пленники здрав и радостен возвращайся. Яко Иосиф Прекрасный порабощением своим всей братии свободу даруяй и вдохновляя глаголати:
Радуйся, заключенных освободителю.
Радуйся, страждущих утешителю.
Радуйся, слабых заступниче.
Радуйся, во всех нуждах помощниче.
Радуйся, милостей Божиих ходатаю.
Радуйся, наше упование и отрадо.
Радуйся, Павлине, святителю милостивый.
Кондак 11
Воистину был еси великий купец, святителю, ценою всех благ земных и жертвою жизни своея обрел еси бесценный бисер Христа и приял еси сокровища на небеси, идеже тля не тлит и татие не крадут. Тамо вечная слава осеняет поющих: Аллилуиа.
Икос 11
Светоносный пастырю, ты и на смертном одре не забыл еси убогих своих, но, прияв Святые Тайны, озаботился еси об одежде для бедных, и тогда спокойно сомкнушася очи твоя. От умиленных сердец приими похвалу сию:
[1-й хайретизм утрачен]
Радуйся, любовию в Боге пребываяй.
Радуйся, почиваяй во славе нетления.
Радуйся, грешные души озаряяй благодатию.
Радуйся, пламенное сердце, наши скорби носящее.
Радуйся, светило великого христианского духа.
Радуйся, Павлине, святителю милостивый.
Кондак 12
Благодатию исполненный, в старости глубокой яко пастырь, обретший заблудших овец, яко добрый деятель стада Христова, ты радостно отшел еси в вечный покой, усладився Телом и Кровию Христа. Испроси и нам такую кончину и добрый ответ пред лицом Судии, Ему же вся тварь поет: Аллилуиа.
Икос 12
Взыскуя небесного града, странник и пришелец был еси на земли, нищий произволением. Ныне же достиг светоносных сеней Иерусалима небесного, ликуй в немерцающей славе, приемля от нас таковые хвалы:
Радуйся, обретый отечество вечное.
Радуйся и веселися в чертогах света.
Радуйся и созерцай желанного Господа.
Радуйся и молися Ему за ны грешные.
Радуйся и введи чад твоих в горнюю радость.
Радуйся и вечно ликуй на брачной вечери Агнца.
Радуйся, Павлине, святителю милостивый.
Кондак 13
О, пречудный святителю Павлине, даждь нам идти сладостным путем твоея любви, да будем едины со Христом, яко лучи со источником света, и в Боге обрящем бессмертную радость, поюще: Аллилуиа, Аллилуиа, Аллилуиа.
Сей конда́к глаго́лется три́жды. И па́ки чте́тся и́кос 1-й, и конда́к 1-й.
Молитва
О пречестна́я и свяще́нная главо́ и благода́ти Свята́го Ду́ха испо́лненная, Спа́сово со Отце́м обита́лище, вели́кий архиере́е, те́плый наш засту́пниче, святи́телю Павлине, предстоя́ у Престо́ла всех Царя́ и наслажда́яся све́та единосу́щныя Тро́ицы и херуви́мски со А́нгелы возглаша́я песнь трисвяту́ю, вели́кое же и неизсле́дованное дерзнове́ние име́я ко всеми́лостивому Влады́це, моли́ спасти́ся па́ствы Христо́вы лю́дем, благостоя́ние святы́х церкве́й утверди́: архиере́и благоле́пием святи́тельства украси́, мона́шествующыя к по́двигом до́браго тече́ния укрепи́, ца́рствующий град и вся гра́ды и страны до́бре сохрани́, и ве́ру святу́ю непоро́чну соблюсти́ умоли́, мир весь предста́тельством твои́м умири́, от гла́да и па́губы изба́ви ны, и от нападе́ния иноплеме́нных сохрани́, ста́рыя уте́ши, ю́ныя наста́ви, безу́мныя умудри́, вдови́цы поми́луй, си́роты заступи́, младе́нцы возрасти́, пле́нных возврати́, немощству́ющыя и моля́щияся тебе́ от всех напа́стей и бед хода́тайством твои́м свободи́: моли́ о нас Всеще́драго и Человеколюби́ваго Христа́ Бо́га на́шего, да и в день Стра́шнаго Прише́ствия Его́ от шу́ияго стоя́ния изба́вит нас, и ра́дости святы́х прича́стники сотвори́т со все́ми святы́ми во ве́ки веко́в. Ами́нь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (которому читался акафист) и всех святы́х, спаси́ и помилуй мя, гре́шнаго, яко Благ и Человеколюбец.
![Акафист святителю Павлину Ноланскому Акафист святителю Павлину Ноланскому](img_b/s416.jpg)