Акафист святому мученику Агафангелу Римскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1.

Возбранному воину Небеснаго Царя, победное знамение в руце приимшему и Господу последствовашему доблественно, пение всеумиленное вознести дерзаем и, на молитвы того уповающе, в веселии глаголем: радуйся, Агафангеле, мучениче Христов всепрославленный.

Икос 1.

Агафангеле мучениче всеизрядный, молитвами твоими отверзи недостойная уста моя, да возмогу от души похвалы тебе принести и подвиги твоя прославити, и славу твою возгласити, вопиюще сице:

Радуйся, Божиих дарований исполненный,

Радуйся, благодатию Господнею осененный;

Радуйся, Святыя Троицы пречистое селение,

Радуйся, ангельскаго жития уподобление;

Радуйся, силы Божия всеславное явление,

Радуйся, Церкве Христовы похвало и утвержение;

Радуйся, суету тленную мира сего отринувый,

Радуйся, страстей пламень кровьми мученическими угасивый;

Радуйся, Агафангеле, мучениче Христов всепрославленный.

Кондак 2.

Блаженство вечное унаследовал еси и радости небесныя причастие, поношение и злословие и смерть за Христа претерпевши, Агафангеле всечудне, темже стеною молитв твоих огради всех, во умилении приносящих Богу песнь: Аллилуиа.

Икос 2.

Воспеваеши Господеви песнь нову, во славе предстояще престолу Господню купно со всеми святыми, ризы своя Кровию Агнца Божия убелившими и Его ради страдания приимшими и молитву Господу приносящими, сего ради и мы, грешнии, пение приносим похвальное:

Радуйся, огнем божественным всеразжженный,

Радуйся, светом Истины осиянный;

Радуйся, добродельми светло украшенный,

Радуйся, венцем мученическим увязенный;

Радуйся, небесных ликов похвало всерадостная,

Радуйся, христиан православных песнь всеславная;

Радуйся, всечудное наше от бед избавление;

Радуйся, вражия злобы преславное посрамление.

Радуйся, Агафангеле, мучениче Христов всепрославленный.

Кондак 3.

Горняго Иерусалима достигл еси, мучениче Христов, идеже в незаходимей ныне сияеши славе, яко вседоброе украшение язвы и раны за Христа приятыя носяще и к подвигу призываеши и к молитве подвизаеши всех, во еже пети Богу: Аллилуиа.

Икос 3.

Дивнаго во святых Своих Бога Израилева прославил еси в житии своем, мучениче всеславне Агафангеле, любве бо ради Господни отвергл еси всепрелестнейшую доброту тленную и нетленною славою облеклся еси, яко звезда всесветлая освещаеши путь ко Христу всем, пение приносящим ти:

Радуйся, сопричастниче вечныя радости,

Радуйся, приятиелище божественныя сладости;

Радуйся, всех святых сомолитвениче,

Радуйся, христианом помощниче;

Радуйся, всеславное верных похваление,

Радуйся, сил адских устрашение;

Радуйся, радуйся всякия правды исполненый;

Радуйся, лживыя неправды потребляющий;

Радуйся, Агафангеле, мучениче Христов всепрославленный.

Кондак 4.

Егда предстал еси судищу мучителеву, не убоялся еси убивающих тело, душу же славою нетленною облачающих и ко страстем всерадостно шестововал еси, воспевая Подвигоположника Господа и молитву Ему усердно принося: Аллилуиа.

Икос 4.

Жизнь моя – Христос и смерть мне приобретение есть, - глаголал еси мучениче пребезумным, - темже не устрашуся, ниже убоюся страсти ради Господа, страстию Своею врата ада Поправшаго и воскресением Своим и мне воскресение дарующаго и к подвигу мученическому мя ныне призывающаго. Сего ради, мучениче вседоблественный, приими от нас пение сие:

Радуйся, путем тесным в радость Господа возшедый,

Радуйся, вся красная мира сего во уметы вменивый;

Радуйся, учениче Премудрости Божественныя;

Радуйся, грозде всесладкий Лозы Благоплодныя,

Радуйся, звездо пресветлая неба церковнаго,

Радуйся, цвете всеславный вертограда небеснаго;

Радуйся, подвиги своими всю землю осиявший,

Радуйся, терпением своим всех наставляющий;

Радуйся, Агафангеле, мучениче Христов всепрославленный.

Кондак 5.

Злобы адския посрамитель воистину явился еси, мучениче всеславне Агафангеле, течением бо кровей твоих угасил еси пламень преисподний и козни демонския попрал еси твердостию твоею, темже от страстей избави ныне всех, память твою славящих и Богу песнь поющих: Аллилуиа.

Икос 5.

Истину познал еси Ипостасную, мучениче всеславне, и от Нея свобождение приял еси, избегл бо еси ловления лукаваго и сетей диавольских непричастну душу свою соблюл еси, темже пением ублажаешися таковым:

Радуйся, божественныя мудрости взыскавый,

Радуйся, небеснаго знания возжелавый;

Радуйся, идольское нечестие отринувый,

Радуйся, истинное богомудрие возлюбивый;

Радуйся, Хлебом жизни вечныя насыщенный,

Радуйся, питием безсмертия напоенный;

Радуйся, Бога всем житием твоим прославивший,

Радуйся, человекозавистца подвиги своими посрамивый;

Радуйся, Агафангеле, мучениче Христов всепрославленный.

Кондак 6.

Крест Христов, спасаемым силу и славу Божию являющий, приял еси и Божественному Подвигоположнику послед_уя даже до смерти, на Голгофу всерадостно восшел еси и Господа ради страсти и смерть прияти сподобился еси, Емуже ныне в незаходимей славе песнь приносиши: Аллилуиа.

Икос 6.

Лицы ангельския подвиги твоя воспевают и святых всех чини радуются, людие же христоименитии веселия исполняются, новаго молитвенника и предстателя обретающе и славословие сему приносяще:

Радуйся, житием своим светло сияющий,

Радуйся, и нас в доброделании укрепляющий;

Радуйся, весь мир любовию обымающий,

Радуйся, спасения многих взыскующий;

Радуйся, крепкое падающих возведение,

Радуйся, право стоящим утверждение;

Радуйся, путь ко спасению нам возвещающий,

Радуйся, враги наша устрашающий;

Радуйся, Агафангеле, мучениче Христов всепрославленный.

Кондак 7.

Муки и страсти претерпел еси, Агафангеле предивне, ведяще яко ни скорбь, ни теснота, ни смерть отлучити тя не возмогут от любве Божия, еяже причаститися сподоби всех, повиги и страдания твоя прославляющих и песнь о тебе благодарственную Богу приносящих: Аллилуиа.

Икос 7.

Не возжелал еси шествовати на совет нечестивых и на пути грешников не стал еси и посреде седалища развращеннаго пребывания избегл еси, темже блаженство вечное уготовися ти, мужества образе и чистоты воистину сокровище всеславное, и песнь присно воспевается:

Радуйся, подвигом своим ангелов удививый,

Радуйся, терпением своим бесовския дерзости посрамивый;

Радуйся, пещи Вавилонския не устрашивыйся,

Радуйся, прещения мучителей не убоявыйся;

Радуйся, росо, еюже огнь безбожия угашается,

Радуйся, море, имже зловерие потопляется;

Радуйся, мечу, злочестие посекающий,

Радуйся, щите, верных защищающий;

Радуйся, Агафангеле, мучениче Христов всепрославленный.

Кондак 8.

Очи сердечныя присно имый горе, о земном и тленном помышление отринул еси, и кровми мученическими ризы своя убеливше, вшел еси в селения горняя, Ангелом благим тезоименне, идеже непрестанно молитва поется: Аллилуиа.

Икос 8.

Плоть твою духови покорил еси, и язвами мученическими украсил и венцем нетления увенчал еси, отринув тленность ветхаго человека, в новаго облеклся еси, страдальче священнейший, сего ради и мы пение приносим:

Радуйся, в ризу правды облек_ийся,

Радуйся, благодатных дарований сподобльшийся;

Радуйся, силою Божией укрепляемый,

Радуйся, светом лица Божия выну озаряемый;

Радуйся, волю Господню о тебе всецело исполнивый,

Радуйся, Небеснаго Отечества кровьми своими достигнувый;

Радуйся, от падений греховных нас ограждающий,

Радуйся, на путь правды нас премудре наставляющий;

Радуйся, Агафангеле, мучениче Христов всепрославленный.

Кондак 9.

Разум богопросвещен имеяй воистину, предстал еси пред судищем нечестивым и кротко веру в Господа распятаго исповедал еси. Темже молитвами твоими утверди сердце наше, да ничтоже восхощем ведети, точию Господа, Емуже слава и похваление подобает: Аллилуиа.

Икос 9.

Сила Господня, присно в немощи человеческой совершаемая, явлена бысть о тебе, Агафангеле всеблаженне, с_ею бо вооружен, посрамил еси державу сопротивнаго и стерл еси вся немощныя дерзости демонския, сего ради похвалы приносим таковыя:

Радуйся, Пасхи вечныя причастниче,

Радуйся, Царствия Христова наследниче;

Радуйся, душу свою за Христа положивый,

Радуйся, подвигом своим нас в Православии укрепивый;

Радуйся, яко оружие Крест Христов приемый,

Радуйся, тем всезлобную ярость победивый;

Радуйся, светом небесным души наша озаряющий,

Радуйся, и ныне благословением твоим нас осеняющий;

Радуйся, Агафангеле, мучениче Христов всепрославленный.

Кондак 10.

Терпения столп был еси, ревнующе о подвизе аввы твоего, Климента всеблаженного, Агафангеле чудне, сего ради купно с ним и венец мученический приял еси и ныне в незаходимей сияеши славе, зовуще: Аллилуиа.

Икос 10.

Узы и бесчестие и гонение и страсть мужественно претерпел еси, Агафангеле вседивне, язвы Господа своего на теле носяй, темже и мы, подвиги твоя похваляюще, венцы песненныя сицевыя сплетаем:

Радуйся, Господа всем сердцем возлюбивый,

Радуйся, даже до смерти Ему последовавый;

Радуйся, Христу сораспявыйся всерадостно,

Радуйся, страдания за Него приявый безропотно;

Радуйся, Крест Господень на рамена своя приемый,

Радуйся, на Голгофу всерадостно возшедый;

Радуйся, страданий Христовых мужественный соучастниче,

Радуйся, Воскресения Его благий сопричастниче;

Радуйся, Агафангеле, мучениче Христов всепрославленный.

Кондак 11.

Фараона всегубителя мысленнаго попрал еси страстию твоею и всю силу вражию течением кровей мученических потопил еси, всемудренне, и на колесницу страстей непорочных всед, достигл еси Новаго онаго Иерусалима, емуже Художник и Содетель Бог, идеже и песнь Творцу присно воспевается: Аллилуиа.

Икос 11.

Хваления жертву и елей милости возносил еси Господеви, двадесять и осмь лет в темнице молитву возносяще, последи же сам яко жертва непорочна принеслся еси, Агафангеле предивне, многия муки приявый, прими же от нас похвалы малыя сия:

Радуйся, муки и скорби ни во что же вменивый,

Радуйся, узами темничными узы злобы сокрушивый;

Радуйся, на колесницу мучений возшедый,

Радуйся, страстьми Царствия Небеснаго достигнувый;

Радуйся, одеяние души кровьми своими убеливый,

Радуйся, на брак Агнчий прерадостно возшедый;

Радуйся, нечестие идольское посрамивый,

Радуйся, венец всеславно мученический приемый;

Радуйся, Агафангеле, мучениче Христов всепрославленный.

Кондак 12.

Царей нечестивых и воевод безбожных мужески обличил еси, Царя Небеснаго доблественнейший воине Агафангеле, главы же усечением венец приял еси всеукрашенный, темже купно с Ангелы песнь воспеваеши присно Господу: Аллилуиа.

Икос 12.

Шатания языческая и расколов нестроения утоли молитвами твоими, мучениче предивне, и Церковь Христову неврежденну пребыти сотвори, яко да жезлом заступления твоего от волков душехищных избавльшеся, Богу благодарение возсылаем и взываем непрестанно:

Радуйся, правды дивное благоухание,

Радуйся, святости чудное сияние;

Радуйся, яко тобою от напастей избавляемся,

Радуйся, яко тобою благодати от Господа сподобляемся;

Радуйся, яко предстательством твоим жизнь вечная обретается,

Радуйся, яко молитвами твоими вера истинная познавается;

Радуйся, от напастей и скорбей нас свобождающий,

Радуйся, от греховных язв исцеляющий;

Радуйся, Агафангеле, мучениче Христов всепрославленный.

Кондак 13.

О мучениче предивный и досточудный, скорби и страдания приемый многоразличныя и подвигом своим в радость Господа своего вшедый, молитвами твоими от всякия скорби изми рабы твоя и избави страстей душевредных, да прославляюще твое предивное о нас заступление, Богу песнь и славословие приносим: Аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

МОЛИТВА

О всечудне и достоблаженне мучениче Агафангеле, подвигом всечестным исповедания веры истинныя украшенный и венцем праведным страданий за Христа увенчанный, кровьми своими пламень безбожия угасивый и в радость Господа своего всерадостно возшедый. К тебе ныне, мучениче всеславне, прибегаем и во умилении взываем: молитвами твоими огради ны от вселукавыя злобы диавольския, на нас присно распаляющейся, утоли расколы и нестроения, Церковь Христову возмущающия и многия от спасительного Ковчега Христова отторгающия, возгрей в сердцах наших веру Православную и надежду всеблагую, паче же друг ко другу любовь нелицемерную, да в добродетели преуспевающе и подвизех возрастающее, достигнем Царствия Небеснаго, идеже ты ныне в незаходимей сияеши славе и воспеваеши присно всепокланяемое имя Отца и Сына и Святаго Духа. Аминь.