Акафист священномученику Исидору Юрьевскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Приидите вернии, восхвалим в песнех священномученика Исидора и с ним семьдесят два мученика, иже пострадаша во граде нашем за Церковь святую Православную, во еже утвердити нас в вере святей истинней, во еже последовати нам учению отцев наших, и еже жити нам по заповедем Господним и тако скончавши житие сие достигнути райская селения с песнию:

Радуйся, Исидоре, Православныя веры твердый хранителю.

Икос 1

Во Юрьеве, граде Ливонстем, егоже основа князь Ярославль Богомудрый, издревле быша два храма: Святителя и чудотворца Николая и святаго великомученика Георгия, в храмех тех священнодействоваху иереи благоговейнии Исидор и Иоанн, иже беша ревнители веры православныя. На сие благонравное житие их с любовию взирающе и крепцей вере их подражати желающе, мы грешнии радостно взываем:

Радуйся, Исидоре, добрый наш пастырю.

Радуйся, истинныя веры учителю.

Радуйся, образе жития христианскаго.

Радуйся, тихий и кроткий наставниче.

Радуйся, чад наших премудрый блюстителю.

Радуйся, юным путь жизни указующий.

Радуйся, жен и мужей изрядный водителю.

Радуйся, старцев опора и радосте.

Радуйся, Исидоре, Православныя веры твердый хранителю.

Кондак 2

Во дни тыя врази православныя к вере латинстей всех принуждаху и православных людей угнетати начаша. Паства же святаго Исидора твердо стояше в вере отцев и Богу всегда воспеваше: Аллилуиа.

Икос 2

Пастырь святой Иоанн гонения за веру терпя, оставив пределы Юрьева града, в Псковстей земле прияв иноческий чин, основа Печерскую славную монахов обитель, иерей же Исидор во граде пребываше и с паствой усердно моляшеся, сего ради вси тако взываху ему:

Радуйся, малаго стада пастырю твердый.

Радуйся, вождю наш прекрепкий.

Радуйся, веры святыя хранителю добрый.

Радуйся, двере овцам.

Радуйся, овцы глашавый по имени.

Радуйся, яко паства глас твой послуша.

Радуйся, таин Божиих дивный строителю.

Радуйся, пастырю душу свою положивый за агнцы духовныя.

Радуйся, Исидоре, Православныя веры твердый хранителю.

Кондак 3

Враг рода человеческа и человекоубийца искони диавол, не могущий взирати на славное житие Исидора пресвитера Божия, и на твердое Православия укрепление, внуши старейшинам града погубити его и не дати верным едиными усты взывати ко Господу: Аллилуиа.

Икос 3

Имея в сердце своем твердую веру, приспевашу празднику Богоявления Господня, священник Исидор и православнии христиане изыдоша на реку Омовжу со святыми иконы на освящение воды. Тогда посланнии от Бискупа и старейшин града емше иерея Исидора и с ним бывшия мужи и жены и приведоша ко властем града, дабы от Православныя веры сих отвратити, мы же, ублажая душевную крепость святых мучеников, тако взываем:

Радуйся, Исидоре, веры Православныя ревнителю.

Радуйся, обычаев святоотеческих исполнителю.

Радуйся, на реку Омовжу, аки на Иордан, последовавый.

Радуйся, воды реки на освящение паствы своей благословивый.

Радуйся, гласу Господню на водах вопиющу внимавый.

Радуйся, духа премудрости, духа разума и духа страха Божия на реце взыскавый.

Радуйся, освятити воды и верующих у Господа просивый.

Радуйся, путь Господень уготовати люди призывавый.

Радуйся, Исидоре, Православныя веры твердый хранителю.

Кондак 4

Веден был еси руками нечестивых, священномучениче Исидоре, со семьдесятью мученики к судиям града, и в темницу заключен быв радостно воззва Богу песнь: Аллилуиа.

Икос 4

Суди неправеднии многими словесы своими увещеваху исповедники Латинскую веру прияши, иерей же Исидор, и иже с ним велие дерзновение показаша, славяху святую веру Православную и обличаша Латинская лжемудрования и отступства, мы же дивяся мужеству страстотерпцев вопием сице:

Радуйся, Исидоре, в темницу Христа ради вверженный.

Радуйся, чад своих веру Православную держати до конца увещававый.

Радуйся, учителю истиннаго Богопознания.

Радуйся, обличителю злочестиваго неверия.

Радуйся, имже Латинстии обычаи изгоняются.

Радуйся, имже семена правды Христовой посеяваются.

Радуйся, пастырь, не себе угождаяй.

Радуйся, стадо Христово от волков хищных верно ограждаяй.

Радуйся, Исидоре, Православныя веры твердый хранителю.

Кондак 5

Боготечная звезда явился еси, священномучениче Исидоре, стране Прибалтийстей: мученическим подвигом веру Православную запечатлев, призывая всех к вере истинней, верно воспевати Богу: Аллилуиа.

Икос 5

Видевше беззаконии, яко невозможно есть обратити святыя мученики от истинныя веры, изведше их из темницы и поставивше в судище на испытание, увещаваша их прияти веру Латинскую. Мы же твердому Православия исповеднику вопием тако:

Радуйся, Исидоре, о исхождении Святаго Духа токмо от Отца исповедавый.

Радуйся, служение Божественныя Литургии на опресноках обличивый.

Радуйся, учение Евангельское пред неверными утвердивый.

Радуйся, истинное предание церковное исполнивый.

Радуйся, правил седми вселенских соборов блюстителю.

Радуйся, чистое учение веры пред судиями исповедавый.

Радуйся, лжемудрования их низложивый.

Радуйся, верою своею правило веры нам показавый.

Радуйся, Исидоре, Православныя веры твердый хранителю.

Кондак 6

Славяще страдания святых мученик, молимся Христу Богу согрешений оставление даровати нам, празднующим с любовию святую память их и вопиющих Богу: Аллилуиа.

Икос 6

Видяще крепкое святых в Православней вере, судии градскии распалишася гневом и повелеша затворити их в темнице. Священник же Божий Исидор много поучаше дружину свою и увещеваше ю пострадати за веру, и мы недостойнии сим поучениям вместе соузники внимающе, со умилением глаголем сицевая:

Радуйся, Исидоре, добрый рабе Христов.

Радуйся, исполнивый жизнию слово Божие.

Радуйся, апостолов подражателю.

Радуйся, подвига мучеников ревнителю.

Радуйся, вождю добрый и сильный словом и делом.

Радуйся, лживая мудрования и вражию лесть отвергший.

Радуйся, яко теплотою веры твоея наша хладная сердца возгреваеши.

Радуйся, яко малодушныя мужеству научаеши.

Радуйся, Исидоре, Православныя веры твердый хранителю.

Кондак 7

Хотя привести вся люди ко Христу, молился еси, Исидоре, да открыет Он сердца их ко приятию света истины, люди же поучал еси хранити веру Православную, яко залог всех благ временных и вечных. Темже молитеся, святии мученицы, и нам до конца жития своего соблюсти веру Православную, да вопием купно с вами вси чистою душею: Аллилуиа.

Икос 7

В темнице суще воспеваху святии стратотерпцы песнь сию: «святии мученицы, иже добре страдальчествовавшии и венчавшиеся, молитеся ко Господу помиловатися душам нашим». Господи, укрепи рабов Своих шествовати путем сих исповедников веры и благослови нас сице прославляти их:

Радуйся, Исидоре, до конца жития своего веру истинную сохранивый.

Радуйся, чад своих духовных в ней утвердивый.

Радуйся, правую веру посреди судища небоязненно проповедавый.

Радуйся, вражию гордыню до конца низложивый.

Радуйся, венец правды от Господа восприявый.

Радуйся, венцем мученическим от Господа увенчанный.

Радуйся, упование на Единаго Бога возложивый.

Радуйся, Бога на дело Божие паче всего возлюбивый.

Радуйся, Исидоре, Православныя веры твердый хранителю.

Кондак 8

Странно и радостно сие бысть, яко сонм мучеников со пресвитером Исидором едиными усты и единым сердцем исповеда веру православную, в темнице поя Богу: Аллилуиа.

Икос 8

В темнице обратившись к востоку, начаша святии мученицы со слезами священная песнопения Господу воспевати. Иерей же Исидор с великим благоговением причастися святых и животворящих Таин, и причасти и сущих с ним и тако укрепишася вси на предлежащий им подвиг. Укрепите в вере истинней и нас, святии мученицы, вас восхваляющих:

Радуйся, Исидоре, до конца Иисуса Сына Божия возлюбивый.

Радуйся, за имя Его с любовию душу свою положивый.

Радуйся, Христовым страстем подражателю.

Радуйся, временную сию жизнь ни во что же вменивый.

Радуйся, бренное тело свое за Христа отдавый.

Радуйся, к лику святых мученик сопричтенный.

Радуйся, временныя скорби мужественно претерпевый.

Радуйся, вечное блаженство от Христа приявый.

Радуйся, Исидоре, Православныя веры твердый хранителю.

Кондак 9

Всем верным был священномучениче еси, образ словом, житием, любовию, духом, верою, чистотою и добре памятуют тя православнии людие и с тобою воспевают Спасителю Богу: Аллилуиа.

Икос 9

Витии церковнии сплетающе венцы мучеником за веру Христову восхваляют тя, отче Исидоре, воспоминающе, како нечестивии, разжегшиися яростию, изведоша тя из темницы с прочими узники и ввергоша тя во всех священных одеждах во глубину реки Омовжи, с тобою же и семьдесят и два верных чад твоих и тако вси предаша дух свой Господу. На сей мученический конец твой взирающе, припадаем к иконе твоей и со умилением вопием:

Радуйся, Исидоре, яко возрадовавшася душа твоя о Господе, облекшаго тя в ризу спасения.

Радуйся, во одежду веселия одеянный.

Радуйся, в тебе бо десница Господня прославися в крепости.

Радуйся, Крест Господень на рамо восприявый и за Господом последовавый.

Радуйся, благодать Божию, яко миро на главу приявый.

Радуйся, от Господа силою препоясанный и на высоких поставленный.

Радуйся, священниче Божий, облекшийся в правду.

Радуйся, преподобне, радостию Господней возрадовавшийся.

Радуйся, Исидоре, Православныя веры твердый хранителю.

Кондак 10

Спасти хотя душу свою, до смерти подвизался еси подвигом добрым, течение жития мученически скончал еси, веру соблюл еси, темже и уготовася ти венец правды от Христа Бога нашего, Ему же вси поем: Аллилуиа.

Икос 10

Бысть со святыми мученики и жена некая, имевше на руце своей младенца, триех лет суща, егоже отторгнуша судии от руки матере, дитя же, видя матерь свою потопленну. Сотворив трикраты крестное знамение, ввержеся в воду и тако прият мученическую кончину. Людие же, окрест стоящии, взываху радостно:

Радуйся, Исидоре, чад своих духовных ко Христу приведый.

Радуйся, люди веровати в Бога даже до смерти научивый.

Радуйся, не убоявыйся тело убивающаго.

Радуйся, душу предавый в руце Господни.

Радуйся, яко ныне во обителех райских услаждаешися.

Радуйся, и по смерти пред Господем живый.

Радуйся, и ныне молитвы наша приемляй.

Радуйся, теплый предстателю наш пред Господом Богом.

Радуйся, Исидоре, Православныя веры твердый хранителю.

Кондак 11

Пение умиленное приносим ти, заступниче наш, просяще твоея помощи и ходатайства пред Богом: укрепи нас в вере православней, якоже укреплял еси некогда чада своя духовная, да вси с тобою воспоим песнь: Аллилуиа.

Икос 11

Светильницы богосветлии явишася людем святии мученицы, егда пришедшей весне и воде разлившейся, обретоша телеса ваша вверху реки Омовжи, яко три поприща от града, на брезе лежащая, вси во единем месте и ничимже поврежденная. Оставшиися тогда православнии, вземше мощи их, погребоша на месте том, иных же, принесше во град Юрьев, положиша в землю, песни надгробныя воспевающе:

Радуйся, Исидоре, блаженне, непорочне, в законе Господни ходивый.

Радуйся, яко жива есть душа твоя и восхваляет Господа дивнаго во святых своих.

Радуйся, яко уготовася тебе место упокоения.

Радуйся, яко душа твоя во благих водворися.

Радуйся, яко во блаженном успении вечный покой обрел еси.

Радуйся, яко память твоя в род и род.

Радуйся, яко со святыми ныне упокоился еси.

Радуйся, яко свету невечернему преставился еси.

Радуйся, Исидоре, Православныя веры твердый хранителю.

Кондак 12

Благодать Пресвятаго Духа испроси нам, преблагий пастырю наш, от Всещедраго Бога и Спаса нашего, да не безплодна будет в нас проповеданная тобою святая вера, но да уклоняющеся от путей нечестия и заблуждений, ходим во свете заповедей Божиих, воспевающе всегда в сердцах: Аллилуиа.

Икос 12

Поюще праведное житие твое, Исидоре блаженне, славяще кончину твоя рождения бысть в жизнь вечную, к ней же и нас привлецы зовущих:

Радуйся, Исидоре, церкви Христовы похвало и украшение.

Радуйся, православия проповедниче громогласный.

Радуйся, почитаемый на земли.

Радуйся, увенчанный на небеси.

Радуйся, молитвенниче наш усердный.

Радуйся, помощниче наш скорый.

Радуйся, земли прибалтийския защитниче верный.

Радуйся, града Юрьева ограждение и покрове.

Радуйся, Исидоре, Православныя веры твердый хранителю.

Кондак 13

О, преславный священномучениче Исидоре, приими сие моление наше, в похвалу тебе возносимое, и моли Христа Бога о всех нас, да утвердит Господь жизнь нашу в любви к Богу и ближним, да подаст нам покаяние нелицемерное и да обрящем вси милосердие его в день судный, в радости поюще песнь: Аллилуиа. (трижды)

Сей конда́к глаго́лется три́жды. И па́ки чте́тся и́кос 1-й, и конда́к 1-й.

МОЛИТВА

О, всечестный отче Исидоре, земли Российския светильниче, Церкви Православныя многоценное украшение, воззри с небеси очами пресветлыми во глубину сердец наших и озари наши темныя души лучем огненным веры твоея и пробуди к покаянию нашу совесть нечистую. Ты некогда брошен бысть в пучину водную и во одеждах священства потоплен в ней, ныне протяни руку помощи нам, во одежде страстей в пучине грехов утопающим, и помози нам во Христа крестившимся во Христа облекшися, яви нам недостойным силу душевную и твою крепость сердечную, дабы мы возмогли на ню, яко на трость оперетися и от падений греховных нашу немощь великую сею тростию отгнати. Ты привел еси с собою за Веру Православную сонм мученик святых, научи и нас ко Христу люди привлекати, а не соблазняти их скверною нашею. И якоже быстрины речныя изнесоша на сушу телеса ваша, идеже яко святыя мощи обретшася, тако молитеся и о нас, мученицы святии, да изнесет Господь наши души и телеса из пучины греха на сушу праведности и да обрящет нас тамо в покаянии и вере скончавшихся.

Глаголет бо Соломон премудрый, в день памяти вашея чтенный: «Аще людие пред лицем человеческим муку приимут, упование их безсмертия исполнено». Укрепи и в нас, Исидоре преблаженне, сию надежду безсмертия, да не угаснет светильник веры нашея, погашенный от дуновения диавола. Благослови нас, отче святый, крепкий верою, не ослабший надеждою и любовию к людем горящий, благослови нас святым осенением во имя Пресвятыя Троицы: Отца и Сына и Святаго Духа. Аминь.