Акафист святителю Петру (Могиле), митрополиту Киевскому и Галицкому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Возбранному воеводе и пастырю, славному сыну славнаго известнаго рода володарей Молдовлахии святителю Петру составим похвалу, яко во дни лютых гонений отстоявшему и в Богодухновенных трудах своих запечатлевшему чистоту веры святыя Православныя. И ныне молитвами твоими спасай нас от бед и напастей, да с любовию зовем ти:

Радуйся, святителю отче Петре, ревностный защитниче веры Православныя.

Икос

Ангелам по ревности в защите веры и спасения душ человеческих подражая пожил еси. Трудами твоими Богодухновенными ниву церковную оплодоносил еси. Сего ради исполненныя духа любви к тебе с благодарностию вопием таковая:

Радуйся, святителю отче Петре, ради служения Церкви Христовой богатство, знатность рода и почести земныя оставивый.

Радуйся, заблуждения латинства в письменах своих обличивый.

Радуйся, Киево-Могилянскую Коллегию в духовное просвещение основавый.

Радуйся, униатами поруганныя храмы и обители своими средствами восстановивый.

Радуйся, святителю отче Петре, Богослужебныя книги написавый.

Радуйся, Православное исповедание веры Собором вселенских Патриархов и святителей утвердивый.

Радуйся, святителю отче Петре, ревностный защитниче веры Православныя.

Кондак 2

Видяще благочестивыя родители воевода Симеон и княгиня Маргарита чадо свое мудростию и многоразличными познаниями с детства Всевышним одаренное и крепкою любовию к Христовой Церкви озаренное, в радости воспели о нем Богу: Аллилуиа.

Икос 2

Разум свой Божественными ученьми просветил еси, святителю отче Петре, отвергнув еси почестей мира сего суету, православное исповедание веры своей защитил еси. Сего ради Богомудрым наследником не токмо царскаго престола, но и делания монашескаго явился еси. Мы же в тебе избранный сосуд благодати Божия видяще во умилении вопием сицевая:

Радуйся, рождением своим праздник рождества Христова предваривый.

Радуйся, в год рождения твоего род Могил на престол Молдавский вступивый.

Радуйся, в день памяти святителя Петра родивыйся.

Радуйся, и сам достойным подражателем покровителя небеснаго явивыйся.

Радуйся, любви ради к Церкви и святыням ея с усердием потрудивыйся.

Радуйся, святителю отче Петре, ревностный защитниче веры Православныя.

Кондак 3

Сила Божия благодати укрепляше тя, егда в окружении униатов и католиков веру свою Православную безбоязненно исповедал и защитил еси, и пред королями польскими свободы и прав ей исходатайствовал еси. Мы же ведуще сия о силе духа и ревности твоей поем Богу: Аллилуиа.

Икос 3

Имея веру несумненную и помысл чист на ниве церковней ради духовнаго пресвещения и спасения душ неутомимо трудился еси. Мы же в приносимых духовных плодах твоих самоотвержению и подвигам твоим удивляясь и в них поучаясь благодарно вопием ти таковая:

Радуйся, в смутное премя архимандритом Киево-Печерския Лавры нареченный.

Радуйся, многая имения и земли обители Киево-Печерския из плена возвративый.

Радуйся, блага земныя и духовныя в обители святей приумноживый.

Радуйся, преподобным и Богоносным отцам Киево-Печерским усердно потрудивыйся.

Радуйся, обитель Киево-Печерскую молитвою к Богородице от напасти оградивый.

Радуйся, в благодарность за помощь Пресвятей Владычице молебное пение сотворивый.

Радуйся, святителю отче Петре, ревностный защитниче веры Православныя.

Кондак 4

Бурю злословия и мятежа людскаго претерпел, но не убоялся еси, святителю отче Петре, Божественною любовию все козни врагов и злых человек побеждая, на всяцем месте и всяк час славя Бога воспевал Ему: Аллилуиа.

Икос 4

Слыша и видя многую твою добродетель, веру крепку и несумненну, чистоту непорочну, любовь нелицемерну, иерархи православныя единогласно избра и торжественно посвяти тя в митрополиты Киевския. Видяще тя пастыреначальником Богомудрым и строителем дому Божия добрым и непорочным, с надеждою на молитвы твоя взываем тебе таковая:

Радуйся, царский скипетр на митрополичий жезл сменивый.

Радуйся, быстрым шествием по лестнице церковного чина духовнаго восхождения не затмивый.

Радуйся, интересы Церкви Христовой выше всего земнаго всегда возносивый.

Радуйся, православное исповедание Апостольской Церкви в трудах своих запечатливый.

Радуйся, род твой истинным благочестием даже польских королей к себе преклонивый.

Радуйся, достойным потомком лучших сынов легендарного рода Могил себя явивый.

Радуйся, святителю отче Петре, ревностный защитниче веры Православныя.

Кондак 5

Боготечное светило явился еси всем христианом, святителю отче Петре, Божественный небосклон и доныне ученьми своими просвещая, верным показуя правыя стези и научая всех в духе любви и истины Триединому Богу воспевати: Аллилуиа.

Икос 5

Видяще православнии людие великия подвиги твоя во всяцем благочестии и чистоте Богу приносимыя и труды до кроваваго пота в просвещении омраченных страстьми полагаеми, познают в тебе, святителю отче Петре, крепкий щит и забрало и во дни скорбных обстояний и блуждания греховнаго припадающе вопиют ти таковая:

Радуйся, благословением твоим служити пассии, тобою составленныя, в Посту Великом утвердивый.

Радуйся, Богослужебные чины в «Требнике» своем изложивый.

Радуйся, и доныне правило твое – по средам служити Акафист Успению Божией Матери в Лавре Печерской – Господь сохранивый.

Радуйся, книгоиздательской деятельностью много народа просветивый.

Радуйся, по всей земле книги Богослужебныя распространивый.

Радуйся, молитвами твоими и потомков своих служителями Богу сотворивый.

Радуйся, святителю отче Петре, ревностный защитниче веры Православныя.

Кондак 6

Проповедником православнаго вероучения был еси, святым Апостолам в ревности подражая, храмы Божии и обители созидая, православныя пресвитеры мудро поставляя, братолютию и христианскому житию люди добре научая, да вси единым сердцем и усты воспоют с тобою Богу: Аллилуиа.

Икос 6

Возсиял еси в Боголюбивой душе твоей немеркнущий свет Богопознания, вознося тя на высоту духовнаго совершенства. Тем же светом и мы от тебя просвещаеми благодарно вопием сицевая:

Радуйся, монашеский скит в Голосиево основавый.

Радуйся, в основание его духовное начало положивый.

Радуйся, церковь в нем святому мученику Иоанну Сочавскому создавый.

Радуйся, в церкви той много частиц святых мощей и Креста Господня положивый.

Радуйся, в скит сей для подвигов монашеских приходивый.

Радуйся, сад духовный в нем заложивый.

Радуйся, святителю отче Петре, ревностный защитниче веры Православныя.

Кондак 7

Хотяй невозбранно духом в горняя селения возноситися, святителю отче Петре, в бущующем мире душею надмирно пожил еси, подвигом добрым до конца подвизаясь, труды к трудам прилагая, неустанно достойно и праведно поя Богу: Аллилуиа.

Икос 7

В новой обители, в месте пустыннем, подвигам древних отшельников подражая, подвизался еси, святителю отче Петре, тем же и нас научи тихого пристанища от житейских плаваний достигнути, тебе зовущим таковая:

Радуйся, святителю отче Петре, пример монашескаго воздержания показавый.

Радуйся, Божественные Литургии ежедневно совершавый.

Радуйся, Господь воду по молитвам твоим в подтверждение силы Православия в вино обративый.

Радуйся, много земных поклонов Богу и святым Его сотворивый.

Радуйся, безсонные ночи в молитвах своих проводивый.

Радуйся, тайно вериги на теле своем носивый.

Радуйся, святителю отче Петре, ревностный защитниче веры Православныя.

Кондак 8

Странником и пришельцем в жизни сей скоротечней себе помышлял еси, святителю отче Петре, мысленно в горняя душу свою возводя. Мы же, видя смирение и подвиги, побеждати мир, плоть и диавола на примере твоем поучаясь, всегда вспомоществующему тебе в Троице славимому Богу поем: Аллилуиа.

Икос 8

Весь исполнен быв любви к Богу и ближним, святителю отче Петре, спасение всем устрояя, не иский себе, но многих пользы пожил еси и о Господе свято и праведно почил еси. И ныне у Престола Всевышняго ходатайства твоего о пастве не оставляеши. Мы же, приемля помощь твою, прославляюще тя, благодарно зовем таковая:

Радуйся, тяжелую ношу защиты Православия от католиков и униатов подъявый.

Радуйся, многая труды, скорби и напасти не единожды претерпевый.

Радуйся, клевету и поношения даже от единоверных имевый.

Радуйся, мужество и самоотверженность в трудных обстояниях сохранивый.

Радуйся, чистоту веры Православныя отстоявый.

Радуйся, неколеблющееся благочестие и твердость исповедания Православныя веры до конца сохранивый.

Радуйся, святителю отче Петре, ревностный защитниче веры Православныя.

Кондак 9

Всяк возраст и всяко сословие видя ревность твою и труды, святителю отче Петре, молит тя всякия беды, скорби и напасти избавити в нынешнем веце. И в будущем, любовию твоею побеждаеми, чаем в селении праведных с тобою купно пети Богу: Аллилуиа.

Икос 9

Ветии многовещанные многою духовною силою слова твоего превзошел еси. Божии мудрость, величие и силу неведущим открыл еси, на путь спасения наставляя. Людие же, видяще твое неусыпное попечение о них, непрестанно вопиют ти таковая:

Радуйся, многочисленные труды по восстановлению Киевской митрополии понесший.

Радуйся, о пастве твоей ревностно болезновавший.

Радуйся, святую Софию Киевскую от униатского пленения свободивый.

Радуйся, святый храм ея иконами украсивый и обновивый.

Радуйся, и по смерти твоей святую Софию от чуждых посягательств защитивый.

Радуйся, в храме Софийском более двух месяцев непогребенный нетленно пребывый.

Радуйся, святителю отче Петре, ревностный защитниче веры Православныя.

Кондак 10

Спасение вечное наследовал еси, святителю отче Петре, положив душу за словесныя овцы твоя. Сего ради освятился еси и неизреченныя милости сподобился еси со Ангелы и всеми святыми в небесном Царствии пети Богу: Аллилуиа.

Икос 10

Стена необоримая нам явился еси, святителю отче Петре, от враг видимых и невидимых всех прибегающих к твоему небесному заступлению надежно защищая. И ныне обители, грады и страну нашу православную от волков в шкурах овечьих и всякаго лукавствия, коварства и губительства огради. Да ведуще ревность и силу твою в защите веры Православныя в надежде на всегдашнюю помощь твою, дерзновенно вопием таковая:

Радуйся, у родителей твердому стоянию в вере и благочестии научивыйся.

Радуйся, благотворителем и покровителем бедных храмов и обителей явивыйся.

Радуйся, в благоустроении Успенския Киево-Печерския обители усердно потрудивыйся.

Радуйся, в Киевские митрополиты в Успенском храме града Львова рукоположенный.

Радуйся, и земное упокоение в Успенском храме Киево-Печерския обители обретший.

Радуйся, оставшееся от родителей наследство духовным школам завещавый.

Радуйся, святителю отче Петре, ревностный защитниче веры Православныя.

Кондак 11

В пениях наших всеумиленных восхвалим Господа Бога, даровавшего нам тя, веры святыя Православныя поборника и учителя, о спасении душ наших зело поревновавшего. Наученные тобою, святителю отче Петре, право веровати истинам Евангельским воспоем в Троице славимому Богу: Аллилуиа.

Икос 11

Светоноснаго светильника неугасаема видим тя, святителю отче Петре, на Божественном небосклоне ярко горящего. Наслаждаяся блаженства неизреченнаго, Божественных милостей благодатные лучи сокровенно и нам, сущим во тьме неразумия, изливаеши. Сего ради уповая на молитвы твоя, во умилении глубоцем почитаем тя, святителю Божий, звании сицевыми:

Радуйся, Духа Святаго сосуде избранный.

Радуйся, воине Христов непобедимый.

Радуйся, к сонму святых сопричтенный.

Радуйся, людьми и Богом прославленный.

Радуйся, почитающих тя молитвенниче неусыпный.

Радуйся, яко во славе святых пребывающий.

Радуйся, святителю отче Петре, ревностный защитниче веры Православныя.

Кондак 12

Благодать данную ти от Бога добре ведуще, святителю отче Петре, знаем тя – усерднаго молитвенника и ходатая спасения душ наших. Сего ради просим и молим тя: испроси у Всемилостиваго Бога даровати согрешениям нашим прощения, веры Православныя утверждение, во всяком благом деле вспоможения, домовом, обителям, градом и весям благословение, да всегда в радости поем прославляющему тя Богу: Аллилуиа.

Икос 12

Воспевая многая твоя и предивныя добродетели, почитаем память твою, добрый пастырю и угодниче Христов, святителю отче Петре, непрестанно поминай нас у Престола Господня да всегда с любовию вопием ти таковая:

Радуйся, непрестанною молитвою на высоту Богомыслия возносимый.

Радуйся, в посте и молитве непрестанно пребывавый.

Радуйся, неутомимый проповедниче правды Евангелия.

Радуйся, веры Православныя столпе непоколебимый.

Радуйся, яко словесное свое стадо от душепагубных волков сохранивый.

Радуйся, и на кафедре святительской подвигов иноческих не оставивый.

Радуйся, святителю отче Петре, ревностный защитниче веры Православныя.

Кондак 13

О всехвальный и предивный угодниче Божий и воине Христов, святителю отче Петре, приими от нас грешных и непотребных сие усердно приносимое тебе наше моление и твоим непрестанным благоприятным к Богу ходатайством избави нас от внезапныя смерти, от всяких бед и напастей и вечныя муки. Защити храмы, обители, веси и страну нашу православную от лукавства и злобы иноплеменников, от коварства раскольников, безбожников и еретиков, да сподобимся купно с тобою и всеми святыми во веки пети Богу: Аллилуиа, аллилуиа, аллилуиа.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва 1-ая святителю Петру (Могиле)

О великий угодниче Христов, святителю отче Петре, тезоимените святому Апостолу Петру не токмо по имени, но и по ревности и трудах, услыши нас, грешных, вопиющих к тебе о помощи, ибо и ныне, аки и прежде, восстали и воюют еретики, раскольники и сектанты на веру святую Православную и верных чад ея. Святителю отче Петре, зная ревность твою в защите веры святыя Православныя, усердно молим тя: испроси нам у Владыки и Господа нашего Иисуса Христа крепость и силу твердаго и непоколебимаго исповедания Православныя веры, мужество в одолении врагов и на всяк час готовность положити душу свою за Христа и Бога нашего.

Святителю отче наш Петре, просим и молим тя: поспеши на помощь нам, усердно зовущим тя, и разори козни всех мыслящих нам злая. Пламенною молитвою твоею у Престола Божия сохрани храмы, обители, грады, веси, домы и души наша православныя во всяком благочестии и чистоте. Да всегда чистым сердцем и едиными усты исповедуем, славим, благодарим, хвалим, почитаем и превозносим в Троице славимаго Бога – Отца, и Сына, и Святаго Духа ныне, и присно, и во веки веков. Аминь.

Молитва 2-ая святителю Петру (Могиле)

О пречестная и священная главо и благодати Святаго Духа исполненная, Спасово со Отцем обиталище, великий архиерее, теплый наш заступниче, святителю Петре! Предстоя у Престола всех Царя и наслаждаяся света Единосущныя Троицы и херувимски со Ангелы возглашая песнь Трисвятую, великое же и неизследованное дерзновение имея ко Всемилостивому Владыце, моли спастися паствы Христовы людем, благосостояние святых Церквей утверди: архиереи благолепием святительства украси: монашествующыя к подвигом добраго течения укрепи: царствующий град и вся грады и страны добре сохрани, и веру святую непорочну соблюсти умоли: мир весь предстательством твоим умири, от глада и пагубы избави ны, и от нападения иноплеменных сохрани, старыя утеши, юныя настави, безумныя умудри, вдовицы помилуй, сироты заступи, младенцы возрасти, плененныя возврати, немощствующыя исцели, и везде тепле призывающыя тя и с верою притекающыя к тебе и усердно припадающыя и молящыяся тебе от всяких напастей и бед ходатайством твоим свободи. Моли о нас Всещедраго и Человеколюбиваго Христа Бога нашего, да и в день Страшнаго Пришествия Его от шуияго стояния избавит нас, и радости святых причастники сотворит со всеми святыми во веки веков. Аминь.