Акафист преподобному Василиску Сибирскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избра́л еси́, Го́споди, уго́дника Твоего́ Васили́ска, измла́да се́рдце чи́сто дарова́в в нем, и, да́ры духо́вными изря́дно его́ украси́в, яви́л еси́ земли́ Сиби́рской подви́жника ди́внаго, и́же пусты́ни тя́жкая во́лею претерпева́я, моли́твы чи́стыя благода́ть вои́стинну стяжа́. Те́мже подви́гни и нас, Христе́ Бо́же, го́рняя помышля́ти, предста́тельством блаже́ннаго отца́ на́шего, да пое́м тому́: Ра́дуйся, преподо́бне о́тче Васили́сче, безмо́лвия ве́лий рачи́телю.

Икос 1

А́нгелов, к Бо́гу воспаря́ющих, о́бразы святы́я изде́тска с любо́вию зрел еси́, о́тче Васили́сче, те́мже, во́зрастом еще́ младе́нствуя, к Вы́шнему вознести́ся помы́слил еси́, во е́же теле́сныма очи́ма сла́ву Бо́жию ви́дети. Егда́ же по труде́х мно́зех криле́ духо́вныя Госпо́дь тебе́ дарова́, те́ми в Небе́сныя оби́тели возне́слся еси́. Мы же, сим поуча́еми, прино́сим ти такова́я:

Ра́дуйся, изде́тска в служе́ние Бо́гу избра́нный;

ра́дуйся, све́том Боже́ственнаго ра́зума осия́нный.

Ра́дуйся, от мла́да позна́вый нищету́ теле́сную;

ра́дуйся, вои́стинну стяжа́вый нищету́ духо́вную.

Ра́дуйся, кро́тостию и незло́бием А́нгелом подо́бниче;

ра́дуйся, и́стиннаго смире́ния ве́рным наста́вниче.

Ра́дуйся, мона́хом и мирски́м красоту́ восхожде́ния яви́вый;

ра́дуйся, богоуго́дными де́лы страну́ Сиби́рскую просвети́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 2

Ви́дя Госпо́дь Всеве́дец жела́ние твое́ Ему́ еди́ному рабо́тати и призре́в на нрав твой послушли́вый, умягчи́ жены́ твоея́ се́рдце, ю́же роди́тель твой избра́ тебе́, и по триле́тнем воздержа́нии супру́жеский соу́з согла́сно расто́ргли есте́. Ты же, о́тче, ду́шу твою́ Христу́ уневе́стив, ра́достне воспе́л еси́ Бо́гу: Аллилуия!

Икос 2

Разуме́я во́лю Бо́жию и зако́ну Христо́ву кро́тко повину́яся, блаже́нне, тяготы́ бра́та твоего́, подви́жника та́йнаго, с любо́вию поне́сл еси, в не́мощех его́ служа́ ему́ усе́рдно; наипа́че же вку́пе с ним в моли́твах прилежа́, изря́дным о Бо́зе раде́нием мно́гия неради́выя к исправле́нию призва́. Мы же, братолю́бие христиа́нское твое́ зря́ще, си́це тебе́ взыва́ем:

Ра́дуйся, Бо́га па́че всего́ земна́го возлюби́вый;

ра́дуйся, Того́ Еди́наго в животе́ твое́м взыска́вый.

Ра́дуйся, я́ко любо́вь Боже́ственную мирсте́й любви́ предпоче́л еси́;

ра́дуйся, я́ко жите́йскую ра́дость на тяготы́ пусты́нныя премени́л еси́.

Ра́дуйся, о́бразе смиренному́дрия и послуша́ния;

ра́дуйся, пра́вило по́стническаго воздержа́ния.

Ра́дуйся, по́мысла чистото́ю просия́вый;

ра́дуйся, я́ко Мари́я, благу́ю часть избра́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 3

Си́лою любве́ ко Го́споду ми́ра кра́сная отве́ргл еси́, о́тче Васили́сче, отше́льническое житие́ избра́в, в не́мже ре́вностно подвиза́яся, к вя́щшему по́стничеству приступи́л еси́, и та́ко те́ло твое́ покло́ны и бде́нии зело́ утружда́я, стра́сти плотски́я воздержа́нием кра́йним уста́вил еси́, вопия́ в смире́нии Бо́гу: Аллилуия!

Икос 3

Иму́щу тебе́ ве́лие стремле́ние богоуго́дно жи́ти, Подвигополо́жник Госпо́дь показа́ ти самочи́ния па́губу, и в леса́ бря́нския стопы́ твоя́ напра́ви, иде́же ста́рцу пусты́нному Адриа́ну в послуша́ние вда́лся еси́, о́тче, и, я́ко ветвь, к дре́ву благо́му приви́лся еси, те́мже, в труде́х пусты́нных зело́ преспе́в, и́ноческим одея́нием досто́йно украси́лся еси́. Мы же взыва́ем ти та́ко:

Ра́дуйся, в пусты́ню, я́ко в цветни́к, с ра́достию вше́дый;

ра́дуйся, по́двиги твои́ми, я́ко крин се́льный, процветы́й.

Ра́дуйся, нестяжа́нием зело́ обогати́выйся;

ра́дуйся, воздержа́нием кре́пким украси́выйся.

Ра́дуйся, обе́т пусты́нничества при по́стриге твое́м да́вый;

ра́дуйся, его́же в по́двизе до́бром до конца́ испо́лнивый.

Ра́дуйся, псалмы́ и моли́твы Го́споду при́сно воспева́вый;

ра́дуйся, покло́ны земны́ми от дрема́ния себе́ возставля́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 4

Бу́ря искуше́ний и бесо́в наве́ты обступи́ша тя, хотя́ще уны́нием ду́шу твою́ препре́ти, ты же, о́тче Васили́сче, боле́зньми воздержа́ния си́лу вра́жию истощи́л еси́, на ка́мени смире́ния терпе́нием ве́лиим ве́ру твою́ утверди́в, и та́ко немощно́е естество́ о Го́споде укрепля́л еси́, де́нно и но́щно возыва́я Тому́: Аллилуия!

Икос 4

Слы́шавше лю́дие о твое́м, о́тче Васили́сче, благоче́стнем житии́ пусты́ннем, стека́хуся к тебе́, жела́юще с тобо́ю ку́пно жи́тельствовати и ко спасе́нию тобо́ю наставля́тися, ты же, свя́те, смире́ния и́стиннаго испо́лненный, неве́жду себе́ испове́дуя, предпоче́л еси́ е́же в безмо́лвии еди́н с Еди́ным всегда́ пребыва́ти. Мы же, богому́дре, глаго́лем тебе́ та́ко:

Ра́дуйся, се́рдце твое́ ми́рови затвори́вый;

ра́дуйся, во́ли Бо́жией всего́ себе́ покори́вый.

Ра́дуйся, благоуве́тия и благоче́стия смире́нный учи́телю;

ра́дуйся, слове́сным и безслове́сным кро́ткий благоде́телю.

Ра́дуйся, с усе́рдием на врага́ спасе́ния противоста́вый;

ра́дуйся, посто́м и моли́твою де́моны отгна́вый.

Ра́дуйся, ду́ха нищету́ па́че сла́вы челове́ческия возлюби́вый;

ра́дуйся, в немногосло́вии твое́м глубину́ му́дрости показа́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 5

Богото́чный исто́чник духо́вныя благода́ти зря в тебе́, ю́ный Зоси́ма те́пле моля́ше тя, да учени́к тебе́ приле́жен бу́дет, ты же, о́тче, духо́вными оча́ми про́мысл Бо́жий прозре́в, я́ко дру́га и́скренняго любо́вию того́ прия́л еси́; те́мже на путь и́ночества тобо́ю наставля́емый Зоси́ма ра́достне воспе́ Бо́гу: Аллилуия!

Икос 5

Ви́дя помышле́ние духовника́ твоего́, хотя́ща во оби́тель Коне́вскую тебе́, о́тче, пресели́ти, те́пле моля́ проси́л еси́ того́, да в отше́льстве свое́м недви́жимо пребу́деши; оба́че послуша́ния ра́ди, я́ко во́ли Бо́жией повину́яся, с Зоси́мою вку́пе, его́же возлюби́ душа́ твоя́, за ста́рцем свои́м после́довал еси́. Мы же, кро́тость твою́ ублажа́юще, взыва́ем ти си́це:

Ра́дуйся, Авраа́мле послуша́ние позна́вый;

ра́дуйся, И́овлю терпе́нию поревнова́вый.

Ра́дуйся, и́ноче, в смире́нии и кро́тости соверше́нный;

ра́дуйся, в безстра́стия ри́зу оболче́нный.

Ра́дуйся, ску́достию пи́щи те́ло твое́ изнуря́вый;

ра́дуйся, хле́бом Живота́ ве́чнаго ду́шу твою́ насыща́вый.

Ра́дуйся, простоты́ жития́ мона́шескаго наста́вниче;

ра́дуйся, чистоты́ души́ христиа́нския храни́телю.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 6

Пропове́дуемым словесе́м Христо́вым, я́ко кро́ток есть и смире́н се́рдцем, вои́стинну поучи́лся еси́, тру́жениче пусты́нный, те́мже и Госпо́дь тя зело́ уте́ши, благоволи́в чрез Зоси́му откры́ти ти сокро́вище уче́ния о моли́тве серде́чней; ты же, преподо́бне Васили́сче, благода́рне воспе́л еси́ Бо́гу о сем: Аллилуия!

Икос 6

Возсия́л еси́ на о́строве Коне́вском высото́ю жития́ твоего́, о́тче досточу́дне, иде́же в де́лании моли́твы вельми́ возраста́я, ум твой свяще́нным безмо́лвием просвети́л еси́, и сла́дость моли́твенную и́мене Иису́сова оби́льно излива́емую вкуси́л еси́, богоблаже́нне. Мы же, толи́кое дарова́ние в тебе́ зря́ще, смире́нно взыва́ем ти:

Ра́дуйся, слове́с ева́нгельских послу́шателю благода́тный;

ра́дуйся, блага́го и́га Христо́ва носи́телю благода́рный.

Ра́дуйся, доброде́ланием трезве́ние стяжа́вый;

ра́дуйся, ума́ хране́нием се́рдце твое́ очи́стивый.

Ра́дуйся, благода́ти Бо́жией храни́лище преиспо́лненное;

ра́дуйся, Ду́ха Свята́го жили́ще досто́йное.

Ра́дуйся, высоты́ Христо́ва разуме́ния дости́гнувый;

ра́дуйся, ум твой с се́рдцем в моли́тве соедини́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 7

Хотя́, преподо́бне, в Бо́зе Еди́нем всегда́ пребыва́ти, ум твой па́мятованием Христо́вым от вся́кия стра́сти очи́стил еси́, и Ду́ха Свята́го благода́тию моли́тву самодви́жиму в се́рдцы твое́м стяжа́л еси, те́мже непреста́нно Го́сподеви в любви́ предстоя́, в умиле́нии чи́стом вопия́л еси́ Ему́: Аллилуия!

Икос 7

Но́вую ле́ствицу восхожде́ния чтим тя, богому́дре, ты бо любве́ ра́ди благоволи́л еси́ моли́твеннаго твоего́ о́пыта изложе́ние, его́же сподви́жник твой и сотаи́нник Зоси́ма приле́жный списа́тель бысть, по преставле́нии твое́м на поле́зное ми́рови яви́ти. Мы же, о́тче Васили́сче, моли́твенно свети́льник сей прие́млюще, в спаси́тельней ре́вности взыва́ем ти:

Ра́дуйся, Христа́ Бо́га в се́рдцы твое́м вмести́вый;

ра́дуйся, и́мя Его́ спаси́тельное во уме́ всегда́ носи́вый.

Ра́дуйся, моли́твенную сла́дость се́рдцем твои́м позна́вый;

ра́дуйся, слез благода́тных пото́к умили́тельный источи́вый.

Ра́дуйся, к Бо́гу любо́вию вели́кою пламене́вый;

ра́дуйся, я́ко де́йством ея́ се́рдце твое́ взыгра́шеся.

Ра́дуйся, моли́твы чи́стыя священнодействи́телю;

ра́дуйся, сокрове́нных Бо́жиих тайнозри́телю.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 8

Стра́нен быв вся́кия сла́вы челове́ческия, еди́ныя сла́вы Бо́жия иски́й, блаже́нне, в пусты́ню вну́треннюю с Зоси́мою ве́рным удали́тися возжела́л еси́, Васили́сче, те́мже, ста́рцем твои́м благослове́нный, преде́л Сиби́рских дости́гл еси́, иде́же лише́ния мно́га претерпева́я, Бо́гу в наде́жди воспева́л еси́: Аллилуия!

Икос 8

Все упова́ние возложи́в на Про́мысл Бо́жий и к Пречи́стей в моли́твах всегда́ прибега́я, пусты́нниче святы́й, я́ко пти́ца небе́сная попече́ние ма́лое о телеси́ твое́м име́л еси́, па́че же воздержа́нием мно́гим дух твой укрепи́в, красоту́ исправле́ний твои́х ве́рным уясни́л еси́, те́мже приими́ от нас сицева́я:

Ра́дуйся, у́зок путь во Ца́рствие Небе́сное избра́вый;

ра́дуйся, пусты́нничества крест во́лею подъя́вый.

Ра́дуйся, страны́ мра́зныя не убоя́выйся;

ра́дуйся, ве́тра хла́днаго не устраши́выйся.

Ра́дуйся, ско́рби и боле́зни му́жественно понесы́й;

ра́дуйся, Засту́пницею усе́рдною всегда́ храни́мый.

Ра́дуйся, моли́твы храм в се́рдцы твое́м воздви́гнувый;

ра́дуйся, труд, терпе́ние и усе́рдие в основа́ние того́ положи́вый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 9

Всего́ себе́ Го́споду освяти́в, о́тче Васили́сче, в боле́знех жесто́ких Христу́ сраспя́лся еси́ вои́стинну, и в пусты́ни, я́ко во гро́бе, Тому́ спогре́блся еси́, блаже́нне, и Бо́га ра́ди мно́гая злострада́ния претерпе́л еси́, но любве́ Христо́вы ника́коже разлучи́ся, при́сно поя́ Ему́: Аллилуия!

Икос 9

Вети́и многоречи́вии умолка́ют, зря́ще твоего́, о́тче Васили́сче, жития́ безмо́лвнаго по́двиг: я́ко пла́мя прилежи́т свещи́, тако́ ты, блаже́нне, умо́м и се́рдцем твои́м вои́стинну Христу́ прилепи́лся еси́. Мы же, таково́е де́йство моли́твы в тебе́ зря́ще, любо́вию взыва́ем ти:

Ра́дуйся, Бо́гу в любви́ непреста́нно предстоя́вый;

ра́дуйся, благода́ть богообще́ния стяжа́вый.

Ра́дуйся, вели́ких дарова́ний Небе́сных прия́телю;

ра́дуйся, духо́в поднебе́сных ве́лий устраши́телю.

Ра́дуйся, на высоту́ доброде́телей восше́дый;

ра́дуйся, Ца́рствие Бо́жие внутрь себе́ име́вый.

Ра́дуйся, Влады́ки вы́шняго ве́рный служи́телю;

ра́дуйся, и́стинныя ра́дости о Бо́зе благи́й стяжа́телю.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 10

Спасе́ния ра́ди души́ твоея́, о́тче Васили́сче, мно́гая ле́та в пусты́ни неисхо́дно подвиза́лся еси́, и та́мо ста́рости честны́я дости́гнув, на высоту́ доброде́тели восше́л еси́, те́мже Госпо́дь поста́ви тя во е́же бли́жних спасе́нию послужи́ти, отону́дуже ма́лую бра́тию собра́в, воспе́л еси́ Бо́гу: Аллилуия!

Икос 10

Стена́ кре́пкая в моли́тве бра́тии пусты́нней был еси́, святы́й Васили́сче, ду́хом сокруше́нным, я́ко мече́м, науча́я тех кова́рства вра́жии посека́ти, и нас ны́не от сна ле́ности житие́м твои́м богоза́рным пробужда́я, яви́лся еси́ утеше́ния духо́внаго пода́тель. Мы же, по́двиги твоя́ ублажа́юще, воспева́ем тя си́це:

Ра́дуйся, в горе́нии ду́ха А́нгелом уподо́бивыйся;

ра́дуйся, в доброде́лании душе́ю обнови́выйся.

Ра́дуйся, чи́стою моли́твою изря́дно благоукраше́нный;

ра́дуйся, бра́ни неви́димыя во́ине соверше́нный.

Ра́дуйся, пра́вды Бо́жией всегда́ алка́вый;

ра́дуйся, рая́ сла́дости еще́ на земли́ вкуси́вый.

Ра́дуйся, блаженнаго смире́ния добро́ту стяжа́вый;

ра́дуйся, Иерусали́м Небе́сный вои́стинну насле́дивый.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 11

Пе́ние умиле́нное тебе́ прино́сим, блаже́нне о́тче, и успе́нию твоему́ с тре́петом внима́ем, и́бо все́льшагося в тя Свята́го Ду́ха де́йство благода́тию оби́льно ду́шу твою́ напита́ и все те́ло твое́ освяти́. Мы же, сему́ дивя́щеся, вопие́м Бо́гу о тебе́: Аллилуия!

Икос 11

Све́том Боже́ственным просвеще́нный, о́тче Васили́сче, высоты́ моли́твы непреста́нныя дости́гл еси́, отону́дуже очи́ма серде́чныма Свет присносу́щный вои́стинну сподо́бился еси́ зре́ти, и́мже вельми́ озаре́нный сам светови́ден ве́рным показа́лся еси́, те́мже приими́ от нас такова́я:

Ра́дуйся, о Го́споде при́сно любому́дрствуяй;

ра́дуйся, от но́щи к Бо́гу у́треннюяй.

Ра́дуйся, ру́це твоя́ в моли́тве ча́сто простира́вый;

ра́дуйся, но́зе твоя́ во бде́ниих зело́ претруди́вый.

Ра́дуйся, за́поведи Ева́нгельския до конца́ соверши́вый;

ра́дуйся, обетова́ния Ева́нгельския впра́вду восприе́мый.

Ра́дуйся, я́ко житие́м твои́м ко благоче́стию нас пробужда́еши;

ра́дуйся, я́ко дея́нии твои́ми на путь спасе́ния нас наставля́еши.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 12

Блаже́н вои́стинну еси́, о́тче Васили́сче, и́бо в клеть се́рдца твоего́ вшед, собесе́дник любе́зен Го́сподеви был еси́, и я́ко Серафи́ми любо́вию к Нему́ горе́л еси́, и я́коже Херуви́ми всегда́ у́мно Его́ зре́л еси́; ны́не же в несконча́емей ра́дости пребыва́я, и нас науча́еши славосло́вити Бо́га: Аллилуия!

Икос 12

Пою́ще честну́ю па́мять твою́, о́тче Васили́сче, благода́рная прино́сим ти, и моли́тв благоуха́ние от моще́й твои́х прие́млюще, весе́лия духо́внаго исполня́емся, и твоя́, пустыннолю́бче, труды́ и боле́зни, Христа́ ра́ди подъя́тыя, ублажа́юще, досто́йно велича́ем тя словесы́ таковы́ми:

Ра́дуйся, звездо́, спасе́ния путь ко врато́м небе́сным нам указу́ющая;

ра́дуйся, сокро́вищнице, пребезце́нный ка́мень, Христа́, в себе́ иму́щая.

Ра́дуйся, кла́дезю, духо́вною вла́гою оби́льно нас напая́яй;

ра́дуйся, сто́лпе, несокруши́мую си́лу моли́твы во бра́ни явля́яй.

Ра́дуйся, ста́мно, чудеса́ доны́не бога́тно преизлива́ющая;

ра́дуйся, реко́, дея́нии твои́ми ду́ши ве́рных ороша́ющая.

Ра́дуйся, в ско́рбех пребыва́ющим ско́рый и благи́й помо́щниче;

ра́дуйся, о чту́щих тебе́ те́плый и ве́рный к Бо́гу моли́твенниче.

Ра́дуйся, преподо́бне о́тче Васили́сче, безмо́лвия ве́лий рачи́телю.

Кондак 13

О, пусты́нниче ди́вный, преподо́бне о́тче Васили́сче, к тебе́ в смире́нии припа́даем, я́ко стяжа́вшему ве́лию Ду́ха Свята́го благода́ть: при́зри с высоты́ го́рния на нас, до́льними обурева́емых, и пода́ждь душа́м на́шим моли́твами твои́ми возраста́ние духо́вное, во е́же чи́стым умо́м и се́рдцем досто́йно пе́ти Христу́ Бо́гу на́шему: Аллилуия!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва

О, преподо́бне и богоблаже́нне о́тче наш Васили́сче, безмо́лвия до́блий рачи́телю и пустынножи́телю ре́вностный, у́мнаго де́лания смире́нный наста́вниче и послуша́ния преди́вный о́бразе! Ты ми́ра сла́дости бе́гая, пусты́ни непрохо́дныя дости́гл еси, в не́йже мно́гая ле́та, богомы́слием озаря́ем, в труде́х пусты́нных подвиза́лся еси́, смиренному́дрия глубину́ ископа́в; сего́ ра́ди, я́ко сокро́вище пребога́тое, серде́чныя моли́твы сла́дость уте́шительную Госпо́дь тебе́ дарова́, ея́же де́йствием вели́ких дарова́ний испо́лнился еси́. Те́мже мо́лим тя, о́тче Васили́сче, воззри́ на ны, уны́лыя и немощны́я, и возгре́й в сердца́х на́ших и́стинную ре́вность о Христе́ Иису́се Го́споде на́шем, И́же есть еди́н исто́чник спасе́ния на́шего. Бу́ди нам поспе́шник к высоты́ духо́вныя восхожде́нию: ум наш в трезве́нии бо́дренном укрепи́ и дух сокруше́н в сердца́ на́ша вкорени́; наипа́че вразуми́, научи́ и усе́рдие неосла́бное в моли́тве непреста́нней пода́ждь нам, во е́же освяти́ти уста́, умы́ и сердца́ Христу́ Бо́гу на́шему, Его́же и́менем отбежа́т от нас вся́кая непра́вда и уны́ние, диа́вольским де́йством составля́емыя, и да просветя́тся ду́ши на́ша све́том любве́ Боже́ственныя ко исправле́нию жития́ на́шего, да не поги́бнем во огни́ а́ки пле́велы, но, я́ко пшени́цу чи́стую, собере́т ны Госпо́дь в жи́тницу Свою́ Небе́сную, иде́же вси лю́бящии Его́ в ра́дости несконча́емей пребыва́ют, сла́вяще Отца́, и Сы́на, и Свята́го Ду́ха, во ве́ки веко́в. Ами́нь.