Акафист преподобному Никодиму Тисманскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранному угоднику Божию и преславному учителю нашему и помощнику, хвалу приношаем, мы раби твои, яко заступнику великому, но яко имеяй дерзновение пред Господем, от всяких нас бед свободи, да зовем ти: Радуйся, отче Никодиме, чудотворче.

Икос 1

Ангели на Небеси хвалят тя, преподобне отче, равноангельному житию твоему дивящеся: инок же множество, сицевыя песни радостно приносят ти:

Радуйся, ангелов удивление.

Радуйся, демонов прогонителю.

Радуйся, райское всеплодие.

Радуйся, безплотных подражателю.

Радуйся, преподобных венче.

Радуйся, благо духовное душ наших.

Радуйся, своея Лавры защитниче.

Радуйся, монахов учителю.

Радуйся, светлосте небесная.

Радуйся, сущих во узах прибежище.

Радуйся, сосуде Духа Святаго.

Радуйся, пустынник веселие.

Радуйся, отче Никодиме, чудотворче.

Кондак 2

Видяще твою от юности ангельскому житию ревность, отче Никодиме, и еже на Святей Горе Афонстей подвизи твоя иноческия и любовь твою Божественную, дивимся, и песнь о тебе приносим Богу: Аллилуия!

Икос 2

Разумевши Лавра Хиландарская тя отрасль корене владычня, в немже Дух Божий обитает, в веселии прият тя, мы же силе благодати сущей в тебе дивящеся, отче, радостию поем сице:

Радуйся, Святыя Горы похвало.

Радуйся, богословия пресветлый уме.

Радуйся, подвижниче ревностный.

Радуйся, Лазаревичей светлосте.

Радуйся, сердце, духовныя радости исполнено.

Радуйся, фимиаме благоприятный.

Радуйся, подателю душам нашим потребнаго.

Радуйся, всякаго зла отвратителю.

Радуйся, Саввы Неманича сродниче.

Радуйся, в егоже святей Лавре подвизавыйся.

Радуйся, небесный человече.

Радуйся, земный ангеле.

Радуйся, отче Никодиме, чудотворче.

Кондак 3

Силою Божественною бысть прот Лавре Хиландарстей, преподобне отче, и образ подвиг духовных: мы же, имуще тя заступника велия, радостно поем Богови: Аллилуия!

Икос 3

Имуще звание от Бога, святе, да идеши во ину землю, еже просветити ю духовне правилы Святыя Горы Афонския, благословение Матере Божия прият, сие исполни, преподобне: и стада монахов возрастил еси, образ тем быв, яже приношают ти сице:

Радуйся, монахов светлосте.

Радуйся, утешение наше.

Радуйся, усердный подвижниче.

Радуйся, всех божественных даров исполнение.

Радуйся, иноческаго жития устроителю.

Радуйся, пустынное процветение.

Радуйся, во узах сущих помощниче.

Радуйся, нечистых духов прогонителю.

Радуйся, отче богоносне.

Радуйся, от всякаго зла защитниче.

Радуйся, пастырю преблагий.

Радуйся, Православия охранителю.

Радуйся, отче Никодиме, чудотворче.

Кондак 4

Бурю волн Дунавских укрощая, тыя крестом оградил еси, святе, яко рече ти великий Антоний, и яко по суху на другую страну прешел еси, воспевая Богу: Аллилуия!

Икос 4

Слышав воевода Влайко желание твое, отче, обитель устроити, в нову землю пришедшу, исполни и, и милостивно ти глаголаше:

Радуйся, ангеле благовестниче.

Радуйся, монашеских уставов хранителю.

Радуйся, яко и волны дунавския послушаху тя.

Радуйся, от Великаго Антония благословение приявый.

Радуйся, христиан благочестивых радосте.

Радуйся, многих людей просветителю.

Радуйся, всех христианских земель веселие.

Радуйся, яко сын теми приятый.

Радуйся, у Водицы пустынником место освятивый.

Радуйся, яко труды твоя Бог благослови.

Радуйся, дальних краев просветителю.

Радуйся, смирения велий учителю.

Радуйся, отче Никодиме, чудотворче.

Кондак 5

Якоже желает елень на источники водныя, тако и твоя душа, отче, божественным званием вселися при источницех вод в пещере, со Ангелы купно поющи Богу: Аллилуия!

Икос 5

Егда изгнал еси демона из пещеры, иже ти возбранити бе хотя, четыредесeт дней и четыредесет нощей провел еси в непрестанней молитве, да Бог ти открыет волю Свою, идеже воздвигнеши великую лавру в честь Его Пречистыя Матере: тем услыши Бог желание твое, мы же ти с радостию поим сице:

Радуйся, в пещере подвизавыйся.

Радуйся, яко исполнился молитва твоя.

Радуйся, святых подвигов любителю.

Радуйся, высшую духовную науку познавый.

Радуйся, божественных вещей строителю.

Радуйся, монашеских соборов учителю.

Радуйся, на высоту возвысивыйся.

Радуйся, сердец христианских утешение.

Радуйся, святых Божиих мест ревнителю.

Радуйся, Святаго Духа обиталище.

Радуйся, отче, наш учителю.

Радуйся, божественных даров приемниче.

Радуйся, отче Никодиме, чудотворче.

Кондак 6

Егда в молитве бдел еси на камени три дни и три нощи, отче, божественная светлость осия тя и яко светлый столп от неба до земли явися, из негоже Бог заповеда ти, да на том месте воздвигнеши жертвенник, ты же, светлостию Духа Святаго озарен, со слезами радостно воспевал еси Богу: Аллилуия!

Икос 6

Собрав ученик множество, отче, воздвигл еси в Тисмане лавру великую, идеже деннонощно возношаше молитвы Долготерпеливому Богу, Иже тобою творяше велия и славныя чудеса: мы же, твоя чада духовныя, в теплоте Духа воспеваем ти таковая:

Радуйся, отче, наш учителю.

Радуйся, о нас пред Богом теплый молитвенниче.

Радуйся, сокровищнице Духа Святаго.

Радуйся, Святаго Духа благое обиталище.

Радуйся, помилование наше.

Радуйся, яко молитвами твоими ны непрестанно призираеши.

Радуйся, даром слез исполненный.

Радуйся, яко пролитием слез сосуд Духа Святаго показавыйся.

Радуйся, пастырю иноков.

Радуйся, христиан защитниче.

Радуйся, светлосте христианских земель.

Радуйся, цевнице песней духовных.

Радуйся, отче Никодиме, чудотворче.

Кондак 7

Светлостию жития твоего, отче, удостоился еси великих дарований, еже и нечистыя духи лукавыя изгоняти: и многия ко православной вере обратил еси, преподобне: того ради радостно хвалим тя, поюще Богу: Аллилуия!

Икос 7

Егда угорский краль Сигизмунд проси милость твою о дщери его, яже бе одержима нечистым духом издетска, и видев ю здраву и исцелену твоим предстательством к Богу, со слезами возопи ти тако:

Радуйся, отче утешения.

Радуйся, уставляяй болезни верных сердец.

Радуйся, прибежище на тя надеющихся.

Радуйся, духовный целителю душ христианских.

Радуйся, краля Сигизмунда удивление.

Радуйся, воеводе Мирче похвало.

Радуйся, яко тя Сигизмунд послуша.

Радуйся, яко той водою Крещения просветися.

Радуйся, проповедниче Православия.

Радуйся, губителю ереси.

Радуйся, святых правил ревнителю.

Радуйся, правыя веры проповедниче.

Радуйся, отче Никодиме, чудотворче.

Кондак 8

Естество пламене победил еси, отче, посреде огня надолзе невредим пребыв, преблаженне: вкупе со учеником твоим в пламени вопия Богу: Аллилуия!

Икос 8

Чудящеся зело беху Сигизмунд и Мирча и множество верных, тя видевше посреде огня невреждена, отче, и хваляще силу Божию, тя хранящую, пояху ти сице:

Радуйся, естество превозшедый:

Радуйся, Божественныя благодати исполненный.

Радуйся, яко и огнь тебе повинуся.

Радуйся, яко посреде пламене стояй, духом в горних был еси.

Радуйся, божественный уме.

Радуйся, ангеле в естестве человечестем.

Радуйся, яко всяк ум превышаеши.

Радуйся, яко всех искушающих уничижаеши.

Радуйся, яко вси немы пребыша пред чудесы твоими.

Радуйся, отче, огнем любве Христовы распалаемый.

Радуйся, возлюбленниче Духа Святаго.

Радуйся, славо твоея святыя Лавры.

Радуйся, отче Никодиме, чудотворче.

Кондак 9

Егда прииде время твоего отшествия от сего жития к Богу, был еси о том извещен, преподобне отче. Изшед же в последний путь от пещеры во святую Лавру, на пресветлый праздник Рождества Господня, вкупе со ученики твоими воспел еси Божественному Младенцу: Аллилуия!

Икос 9

Велия печаль объят вся, отче, уведевшия о твоем прехождении от жития сего: обаче одушевлени твоим обетованием предстательствовати за них пред Богом и за вся, иже твоея помощи требуют, в радости пояше ти тако:

Радуйся, предстателю твоея Лавры.

Радуйся, прибежище на тя уповающих.

Радуйся, духовное ограждение.

Радуйся, наша сило духовная.

Радуйся, Тисманский ангеле хранителю.

Радуйся, сладчайший монахом учителю.

Радуйся, кораблю мысленный.

Радуйся, пристанище спастися хотящим.

Радуйся, наше благословение.

Радуйся, прибежище напаствуемым душам.

Радуйся, светильниче, светом Духа Святаго светяй.

Радуйся, ангельский уме, Божия премудрости исполненный.

Радуйся, отче Никодиме, чудотворче.

Кондак 10

Видевше преселение преподобнаго отца нашего Никодима ос-вященнаго от земли на Небо, отвратимся и мы суетнаго мира, и взыдем на божественную лествицу, да с ним вкупе воспоим Богу: Аллилуия!

Икос 10

Приидите, вернии да возвеличим дивнаго во святых, учителя монахов и похвалу верных от Тисманския лавры и венец Горжа, великаго в преподобных Никодима и единогласно да воспоим песни хвалы:

Радуйся, нас Божиим путям научаяй.

Радуйся, ненаученных учителю.

Радуйся, райское наслаждение.

Радуйся, звездо, Божественною светлостию блистающая.

Радуйся, от младости Бога изволивый, мира сего отвративыйся.

Радуйся, яко на твоих раменах понесе благий и легкий ярем Божий.

Радуйся, нечистых духов изгонителю и обидимым помощниче.

Радуйся, чад от всякаго зла избавителю и радосте тех верных родителей.

Радуйся, скорое христиан утешение.

Радуйся, врачу духовный.

Радуйся, сущих в неволе утешителю.

Радуйся, избавителю наш и диавола побеждение.

Радуйся, отче Никодиме, чудотворче.

Кондак 11

Никакоже престанем проповедати твоя многочисленныя чудеса, отче Никодиме, всяку бо болезнь исцеляеши и вся твоею богатою помощию и милосердным заступлением от бед избавляеши, того ради радостно хваляще тя, поим Богу, Иже тя прославльшему: Аллилуия!

Икос 11

На тя присно надеющеся, тя славим, преподобне отче Никодиме, ты бо венцем живота украсился еси во славе Божественныя светлости, и во веки образ благочестивым душам являеши, тем радующеся, мы, служители твоя, благочестно тя превозносим и прославляем, зовуще сице:

Радуйся, многоценный крине и духовнаго жития крепосте.

Радуйся, венче преподобных и защитниче христиан.

Радуйся, всех преподобных и всех святых сожителю.

Радуйся, Божественныя славы наследниче.

Радуйся, единогласное верных пение.

Радуйся, благочестия избранный плоде.

Радуйся, светом жития твоего вся благочестию научаеши.

Радуйся, делателю тайныя молитвы, яже есть меч Духа Святаго.

Радуйся, невидимых врагов низложителю.

Радуйся, яко твоим духовным наследием Богу покланяемся.

Радуйся, кандило горящее святых подвигов.

Радуйся, яко вси вернии тя с верою почитают.

Радуйся, отче Никодиме, чудотворче.

Кондак 12

Дивящеся божественней благодати, действующей в твоих прославленных святых мощех, отче Никодиме, и помышляюще о светлости, еюже тя Бог украси, с неизреченною радостию поем, вернии, Благодетелю: Аллилуия!

Икос 12

Показался еси образ кротости, отче, и исполнився Божественныя благодати, вся просветил еси, мы же тобою духовнаго мира исполняеми, поим ти сице:

Радуйся, отче.

Радуйся, архимандрите.

Радуйся, обителище благодати.

Радуйся, Духа Святаго сосуде.

Радуйся, преславная деннице.

Радуйся, от Бога прославленный.

Радуйся, преподобне отче.

Радуйся, зовем ти, светом осияваеми.

Радуйся, наш добрый пастырю.

Радуйся, сирых утешение.

Радуйся, прибежище угнетаемых.

Радуйся, светлосте заблуждших.

Радуйся, отче Никодиме, чудотворче.

Кондак 13

О преподобне отче Никодиме, приими сие усердное моление наше и ходатайствуй нам милости Вышняго, и от всякаго искушения избави нас, свободи же нас муки вечныя, тя хвалящих и поющих Богу: Аллилуия!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва преподобному Никодиму Тисманскому

О святый преподобный отче Никодиме, приими сие умиленное моление наше и проси милости нам пред Престолом Божиим. Избави нас, преподобне, славящих тя, от всякаго лютаго обстояния, веси бо немощи естества нашего, обаче и веру зриши и воздыхания слышиши: темже не остави нас, отче, притекающих к тебе.

Моли убо Господа за ны недостойныя, яко да простит нам грехи наша и да подаст нам любовь и помощь выну добро творити во славу Пресвятаго Имене Его.

Тебе просим и молим тя: помози нам отче, грешным, искушеньми злыми прельщаемым, обаче в сокрушении середечнем тебе призывающим, яко да покрыеши и сохраниши ны от смертоносных стрел супротивника нашего диавола, яже смертно ураняют души наша.

Помилуй к тебе притекающия, исцеляя немощи их, и якожде исцелил еси девицу некую, от нечистаго духа мучиму, тако н нас, отче, избави от всех душевных и телесных болезней наших, да твоим предстательством спасени, выну возносим славу, хвалу и поклонение: Отцу и Сыну и Святому Духу, ныне и присно и во веки веков. Аминь.