Акафист священномученику Сергию (Мечеву), пресвитеру Московскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранный служителю Христов, во дни гонений в сонме новомучеников просиявый, страстотерпче и исповедниче, отче Сергие; ты бо вземши Крест свой к подвигу неуклонно шествовал еси спасительною стезею, темже, яко имея велие дерзновение ко Господу, моли спастися нам, чадом твоим, да с верою зовем ти:

Радуйся, священномучениче Сергие, пастырю Богомудре.

Икос 1

Ангелов Творец и Содетель всея твари, спасти хотя страну нашу, пред грядущим бедствием предпосла в мир мерный служители Своя, святыя страдальцы, к подвигу мученическому приуготованныя. К сему высокому служению от рождения призван был еси и ты, преславне Сергие, яко благий плод от древа добраго, в вере, надежде и любви прозябший. Тем же и мы, премудрость Всевышняго славяще, гласом радования воспеваем ти сице:

Радуйся, отроча Богом избранное;

Радуйся, измлада в вере наставленный.

Радуйся, к горнему ум вперивый;

Радуйся, высоту службы церковныя сердцем познавый

Радуйся, сослужителю верный старца святаго;

Радуйся, достойный сыне того и преемниче.

Радуйся, драгоценный сосуде, благодати исполненный;

Радуйся, святости отца твоего наследниче.

Радуйся, священномучениче Сергие, пастырю Богомудре.

Кондак 2

Видя пастырское служение родителя твоего, праведного Алексия, в горении ко Господу и жертвенней любве к людем неослабевающее, близость Божию яве познал еси и крепко в вере и добродетели утвердился еси, со святым старцем поя согласно Богу: Аллилуия!

Икос 2

Разумом чистым разумея пагубу лжеучений богоборческих, на защиту веры и Церкве со всею Русью Святою всесеоружно стал еси, темже, ужасаяся и благоговея пред силою Вседержителя велий сонм святых в земле нашей явльшаго, поем ти сицевая:

Радуйся, щедро от Господа дарованиями исполненный;

Радуйся, вся сия на служение Ему поставивый.

Радуйся, от пути, уготованного тебе, не уклонивыйся;

Радуйся, яко в годы гонений иго пастырского служения подъял еси.

Радуйся, учениче святых отец усердный,

Радуйся, в делании духовном ревностно подвизавыйся.

Радуйся, яко выну пред Богом ходити навыкл еси;

Радуйся, верность Христу до конца сохранивый.

Радуйся, священномучениче Сергие, пастырю Богомудре.

Кондак 3

Силою данною ти свыше, превысшую сил человеческих ношу подъял еси, отче, по преставлении старца Алексия взем общину им созданную на рамена своя; потщался еси узами любве Христовой во едину семью человецы связати, да в покаянии и служении Богу пребывающе, едиными усты славят Того: Аллилуия!

Икос 3

Имеяй велие попечение о пастве, Богом ти вверенней, нужды чад своих принимал еси яко своя, семена добродетелей усердно сея в сердца их, молитвою и слезами обильно орошая, в терпении плод возрастил еси. Мы же, видяще общину твою, верность Христу и единение в годы гонений сохраншую, благодарственная воспеваем ти:

Радуйся, возделателю благонравия;

Радуйся, щедрый и любвеобильный пастырю.

Радуйся, иконописания и пения церковнаго рачителю;

Радуйся, устава Богослужебнаго ревнителю.

Радуйся, истины богословия сердцем познавый;

Радуйся, в вере и богопознании чада твоя утверждавый.

Радуйся, яко жития святых деяньми читати научал еси

Радуйся, яко величайшую тайну богослужения изъяснял еси.

Радуйся, священномучениче Сергие, пастырю Богомудре.

Кондак 4

Бурю ветров злых на Святую Церковь веющих, благодатию учения святоотеческого разгонял еси, отче премудре, уча в службе церковней спасительное пристанище обретати; превыше бо мира сия служба есть и вводит в небесная, идеже ангелы со святыми воспевают Богу: Аллилуия!

Икос 4

Слышаша людие, правды ищущий, проповедниче богоизбранный, огненныя словеса твоя благодати исполнены в вере и любве ко Христу утверждахуся, тебе же похвальная пояху тако:

Радуйся, Церковь, яко Тело Христово исповедавый;

Радуйся, к соединению во Христе в таинствах призывавши.

Радуйся, яко живущим в мире дольнем путь ко спасению указуеши; Радуйся чрез богослужение с миром горним соединятися духом научаеши.

Радуйся, светильниче горящий, на высоту вознесенный;

Радуйся, яко просвещавши души наша светом премирным.

Радуйся, витие богодухновенный, учение отеческое о праздницех церковных ясно изложивый;

Радуйся, яко к радости духовней нас приобщавши.

Радуйся, священномучениче Сергие, пастырю Богомудре.

Кондак 5

Богопротивное лжеучение, единство Христовой Церкве раздирающее, попусти Господь распространити; волцы во шкурах овчих, алчущих расхитити стадо церковное, обретоша тя, непоколебима защитника православных догматов и верна последователя святых отец, небоязненно коварство тех обличающа, Бога же Единаго в Троице славяща: Аллилуия!

Икос 5

Видеша людие ревность и мужество новомучеников и исповедников, за чистоту Православия и Святую Церковь кровь изливающих, гласу совести следовати ревноваху, обольщения отвергше. Мы же, лукавству мира сего подверженнии, твоею неустрашимою верностию научаемся не малодушествовати, пред Богом же ходити, благодарно ти вопиюще:

Радуйся, яко совесть неблазну хранил еси;

Радуйся, гласу ея присно внимал еси.

Радуйся, яко приятием богопротивных законов тую не осквернивый;

Радуйся, лукавство врага посрамивый.

Радуйся, Святыя Церкви гонимыя защитниче;

Радуйся, Православныя веры поборниче.

Радуйся, непоколебимый столпе догматов церковных;

Радуйся, премудрый обличителю ересей лукавых.

Радуйся, священномучениче Сергие, пастырю Богомудре.

Кондак 6

Проповедниче велегласный, ты, славный пастырю Божий, показался еси во дни богоотступничества и гонения на Церковь Русскую. Умножающимся гонением усугубися и ревность твоя, и горение духа; малый же храм твой - велия крепость и прибежище спасения обретеся, идеже песнь верных торжествующе воспеваема бысть: Аллилуия!

Икос 6

Возсиял еси светом Божественным, Сергие досточудне, егда приуготованный ти венец мученический со смирением приял еси; заключение и изгнание понесл еси, благодаряще Зиждителя. Темже сердцем умиляяся, воспеваем ти тако:

Радуйся, в руце Божий душу твою вверивый;

Радуйся, благодарно приемый гонения и скорби.

Радуйся, яко молитвою телесныя твоя болезни утолял еси;

Радуйся, яко и наши болезни молитвою врачуеши.

Радуйся, блаженне, правды ради изгнанный;

Радуйся, мзду на небеси улучивый.

Радуйся, узы и горькия работы многолетне терпевый;

Радуйся, яко пройдя сквозь велия страдания покоя желаннаго достигл еси.

Радуйся, священномучениче Сергие, пастырю Богомудре.

Кондак 7

Хотя истину утвердити чистоту веры Христовой оградити, Сергие преславне, поборниче правды, верность Русской Церкви Православней свидетельствовал еси, со архиереи верными и во изгнании радостно возглашая: Аллилуия!

Икос 7

Новаго тя богослова и исповедника, древним подобнаго, дарова Господь людем Своим, преславне Сергие, аще и в темнице пребывая, обаче любовию Христовою всех объемля, возвышал еси апостольски глас твой, призываяй веру хранити и заповедем Господним следовати. Темже прославляем тя сице:

Радуйся, старцев Оптинских послушниче;

Радуйся, Святейшаго Патриарха Тихона преданный последователю.

Радуйся, святых исповедников друже верный;

Радуйся, светильниче светлый, горяй любовию ко Христу.

Радуйся, малодушных укрепителю;

Радуйся, яко изгнание и узы, духом торжествуя, воспел еси.

Радуйся, дар Духа Святаго, ведати сокровенное, стяжавый;

Радуйся, яко по смирению прозорливость недугом мнел еси.

Радуйся, священномучениче Сергие, пастырю Богомудре.

Кондак 8

Странное чудо видим на тебе исполняемое, досточудне отче, егда на путь страданий вступи, ко святым Иоанну Златоусту, Феодору Студиту, такожде горце гонимым, усердно взывал еси, обаче уверение в правости пути твоего получил еси, Богу поя: Аллилуия!

Икос 8

Весь благодатных дарований исполнен, течение временныя жизни в лишениях и работах тяжцех совершая, исповедниче славный, духом от силы в силу возрастал еси, се бо от пастырскаго делания к мученическому подвигу веде тя Господь. Сие Божие о тебе благоволение славяще, поем ти сице:

Радуйся, семена добрыя в сердца чад твоих сеявый;

Радуйся, в горниле страданий вкупе с ними духом возраставый.

Радуйся, души человечестии, яко зерна мнози во един хлеб в купножительстве соединивый;

Радуйся, сердце твое отверзе, прияти души, Богом врученныя тебе

Радуйся, неустанный делателю на ниве Христовой;

Радуйся, слезами начатки добродетелей в душах человеческих возрастивый.

Радуйся, яко семя в земли умершее, в чадех умноживыйся;

Радуйся, яко и ныне не престаеши плодоносити.

Радуйся, священномучениче Сергие, пастырю Богомудре.

Кондак 9

Все естество ангельское удивися вся могущей сотворити силе Божией, како человецы плоть носящии на диавола вооружишася, како мучими за исповедание веры, духом веселяшеся, како земля наша кровию святых очистися и Русь Святая паки воста, возглашающе победную песнь: Аллилуия!

Икос 9

Витийствовати изнеможе язык человечь силу Божию, во святых Его действующую во вся времена чудесы многими, паче недоумеем величие подвига сродников наших яже в последняя времена в земли Русской просияли есте, аще тии подобни нам человецы быша, како глад, жажду, наготу, биение и поругание благодаряще Бога терпеша, в муках и болезнех не престающе славити Господа и ближним служити. Вкупе со святыми прославляем и отца нашего Сергия, с любовию зовуще:

Радуйся, верный друже Христов;

Радуйся, яко службу Богу чрез служение ближним совершал еси.

Радуйся, от отца своего жертвенную любовь к словесным овцам унаследовавый;

Радуйся, евангельскою любовию тех до конца возлюбивый.

Радуйся, яко в заточении молитвы о сиротах твоих непрестанно возносил еси;

Радуйся, яко и ныне молитвенно руце за ны простиравши.

Радуйся, яко Господа ради не пощаде живота своего;

Радуйся, душу свою за други своя положивый.

Радуйся, священномучениче Сергие, пастырю Богомудре.

Кондак 10

Спасти хотя душу, блаженне отче, путем веры неуклонно шествовал еси, вера бо, рекох, готовность есть умрети за Христа; молитвою таковую веру стяжав, смирением и чистотою совести, непрестанно славил еси Господа, поя Ему: Аллилуия!

Икос 10

Стена еси и ограждение необоримое всем с верою к тебе прибегающим, отче Сергие; ты бо неложно показался еси верный служитель Христов, егда по мнозех летех изгнания ко страданию крестному приближися. В руце Божии живот свой предал еси, яко агнец на заколение ведом. Темже, зряще величие души твоея, воспеваем ти:

Радуйся, чрез блаженную старицу путь твой предуведый;

Радуйся, яко тою священномучеником пронареченный. Радуйся яко темницу и смерть яко затвор и схиму восприял еси;

Радуйся, яко молитвою к тому себе приуготовивый.

Радуйся, яко Предтече Господню, обличителю беззаконий подражателю;

Радуйся, в день рождества сего великаго Пророка во узы заключенный.

Радуйся, якоже и той, в темнице умерщвленный;

Радуйся, яко от смерти к вечному животу прешедый.

Радуйся, священномучениче Сергие, пастырю Богомудре.

Кондак 11

Пение всеумиленное воспевает яко вышше всех добродетелей любы есть. Любы, якоже глаголет апостол, вон изгонит страх. Ты же, о возлюбленне наставниче наш, отче Сергие, силою любве твоея ко Спасителю далече отринул еси страх от души твоея, духом бодрым возшед на крест. Тем же молим тя, помози и нам воспрянути духом, чрез покаяние, труды и терпение от тоя любве вмале вкусити, дабы неосужденно чистым сердцем воспети ангельски: Аллилуия!

Икос 11

Светоприемный светильник возсиял еси, отче Сергие, житием твоим; мы же хотяще жительству твоему подражати, твоего предстательства пред Господем просим и с любовию взываем ти:

Радуйся, адаманте веры, лютых мучений не устрашйвыйся;

Радуйся, яко вся страдания мужески претерпел еси.

Радуйся, яко услыша Господь молитвы твоя;

Радуйся, яко из вверенных душ тебе никтоже пострада.

Радуйся, яко и смерть не возможе разлучити тя от возлюбленных чад твоих;

Радуйся, яко малое стадо твое Господом Самим хранимо бысть.

Радуйся, наставниче святый, яко не престаеши пещися о вверяющих ти ся;

Радуйся, яко присно предстательствуеши за ны у Престола Святыя Троицы.

Радуйся, священномучениче Сергие, пастырю Богомудре.

Кондак 12

Благодать духа обильно излияся на главы верных ученик Христовых, в последняя времена верность сохранших Господу в Русской стране; яже гоними бяху, умерщвляеми за Христа, да не разлучатся от любве Божия; с ними же и ты, священномучениче Сергие, в радость Господа яко верный служитель вшел еси, идеже со всеми святыми песнь победную воспевавши: Аллилуия!

Икос 12

Поюще хвалебную песнь, воспеваем страдания твоя и величаем тя, добропобедне Сергие, яко воина непобедима венцем мученическим от Господа увенчанна, безбожных гонителей поправшаго; ты бо волею в мученическия ризы облеклся еси; того ради преклонше колена сердец наших со умилением взываем ти:

Радуйся, прекрасный цвете благоуханный, в земли нашей процветший;

Радуйся, Церкве Русския украшение.

Радуйся, воине неустрашимый Христов;

Радуйся, победителю, венцем мученическим увенчанный.

Радуйся, к лику новомученик причтенный;

Радуйся, в сонме святых славно прославленный.

Радуйся, предстателю земли Русския;

Радуйся, неусыпный ея хранителю.

Радуйся, священномучениче Сергие, пастырю Богомудре.

Кондак 13

О усердный служителю и мучениче Христов, отче наш Сергие, приими от нас приносимое тебе моление и твоим всесильным ходатайством избави ны от враг видимых, паче же от невидимых, не отступи духом твоим от нас, пребуди присно наставник наш в жизни сей и безпреткновенно введи в Небесныя Обители, да во веки поем Богу: Аллилуия!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва священномученику Сергию, пресвитеру Московскому

О преславный священномучениче Сергие, пламенный молитвенниче, столпе Православия, пастырю Богомудре и исповедниче, за Христа страдания и смерть приявый!

Веруем, яко покровителем нашим вкупе с праведным старцем Алексием присно пребывавши и попечений о пастве и ныне не оставлявши. Сего ради молим тя: простри руку помощи всем в немощи и скорби сущим; научи во единодушии и любве пребывати, и вечности, в тайне богослужения являемей, общники ны сотвори. Веру православную исповедати, гласу совести следовати и по Бозе деяньми жити помози; да тобою укрепляеми, к горнему устремимся и Царствия Небесного достигнем, идеже ты в сонме новомученик и исповедник Российских непрестанно славиши Всеблагаго во Святей Троице Единаго Бога во веки. Аминь.