Акафист равноапостольному преподобному Науму Охридскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Возбранный чудотворче, и изрядный угодниче Христов, на вся верныя изливаяй исцеления и неистощимое чудес море, любовию хвалим тя, преподобне отче наш Науме, но яко имеяй дерзновение ко Господу, от всяких нас бед свободи, да зовем ти:

Радуйся, преподобне отче Науме чудотворче.

Икос 1

Ангела образом, земнаго суща естеством яви тебе всея твари Создатель; благоплодную бо доброту души твоея провидев, преблаженне Науме, научи всех вопити тебе сице:

Радуйся, мучениче Христов безкровный.

Радуйся, радостный трудниче.

Радуйся, цвете Божественнаго саждения.

Радуйся, лозо добродетельная винограда Христова.

Радуйся, крине райскаго прозябения.

Радуйся, предстателю всея земли Мизийския.

Радуйся, яко тобою отгонится рыдание.

Радуйся, яко тобою приносится радование.

Радуйся, преподобне отче Науме чудотворче.

Кондак 2

Видяще твоих даров излияние, Богомудре, просвещаемся душами и телесы, дивнаго тя чудотворца живоносна, Науме, разумеюще: чудесы бо яко водами, благодатию Божиею изливающимися, напаяеши верно вопиющих к Богу: Аллилуия!

Икос 2

Разум неуразуменный вразумляя о Святей Троице, был еси просвещение Мизийския земли. Сего ради вернии научишася воспевати тебе:

Радуйся, великий благочестия столпе.

Радуйся, верных прибежища граде.

Радуйся, твердое Православия укрепление.

Радуйся, честное Пресвятыя Троицы носило.

Радуйся, отче, всех преподобных украшение.

Радуйся, всех богомудрых премудрая доброто.

Радуйся, добре стадо свое наставляяй.

Радуйся, Мизийская похвало.

Радуйся, преподобне отче Науме чудотворче.

Кондак 3

Силою, данною ти свыше, слезу всяку отъял еси от лица люте страждущих, богоносе отче Науме: страждущим бо явился еси укрепление, недугующим исцеление, и всем всяк помощник показался еси, вопиющим Богу: Аллилуия!

Икос 3

Имеяше воистинну, отче Науме, хвалебная песнь тебе воспеваема быти, любовию же твоею побеждаеми, вопием ти сице:

Радуйся, сподвижниче апостолов.

Радуйся, добродетелей великих вместилище.

Радуйся, святыни чистое и честное жилище.

Радуйся, светильниче всесветлый.

Радуйся, достойный ангелов собеседниче.

Радуйся, добрый человеков наставниче.

Радуйся, яко тобою от страстей телесных избавляемся

Радуйся, яко тобою сладостей духовных исполняемся.

Радуйся, преподобне отче Науме чудотворче.

Кондак 4

Буря недоумения смущает ми ум, како достойно есть пети чудеса твоя, блаженне Науме, никтоже бо может я исчести, аще бы и многи языки имел, и глаголати восхотел; но мы дивно Богу в тебе прославляющемуся дерзаем воспевати: Аллилуия!

Икос 4

Слышаша, богомудре Науме, ближнии и дальнии величие чудес твоих, яко легкими благодатными крилами яко по воздуху навыкл еси сущих в неволи предваряти, скоро избавляя всех, вопиющих к тебе таковая:

Радуйся, избавление от неволи.

Радуйся, подаяние благодати.

Радуйся, нечаемых зол прогонителю.

Радуйся, желаемых благих насадителю.

Радуйся, скорый утешителю в беде сущих.

Радуйся, страшный наказателю обидящих.

Радуйся, чудес пучино, Богом излиянная.

Радуйся, крепкое падающих возведение.

Радуйся, преподобне отче Науме чудотворче.

Кондак 5

Боготечная звезда явился еси, всеблаженне Науме, научаяй словенския народы и просвещая их светом Христовым, верныя же научил еси Богу взывати: Аллилуия!

Икос 5

Виде отрок и позна тя, яко великаго чудотворца, егда тому зверя укроти и посла, яко помощника, ниву орати. Избави и нас от зверей душегубных, да зовем ти сице:

Радуйся, помощниче всем, тя призывающим.

Радуйся, всех неизреченная радосте.

Радуйся, апостолом сопрестольниче.

Радуйся, со Ангелы служителю Святыя Троицы.

Радуйся, и нам даруяй радость молитвами твоими.

Радуйся, яко страсти нам, насылаемыя бесовскими наваждении, утишаеши.

Радуйся, помощниче наш, преблаженне, Науме.

Радуйся, теплый предстателю наш.

Радуйся, преподобне отче Науме чудотворче.

Кондак 6

Проповедует страна вся Словенская и Мизийская тебе, преблаженне отче наш Науме, скораго в бедах заступника: всех от злых сохраняя, вопиющих к Богу: Аллилуия!

Икос 6

Возсиял еси свет животный, избавление нося во тьме смертней седящим Мизийским землям, свет Христов, да веруют во Единаго Бога в Триех Лицех, Нераздельную Троицу. Сего ради с ними купно и мы благодарственно вопием ти:

Радуйся, усердно призывающим тя помогаяй.

Радуйся, от многобожия избавляяй.

Радуйся, растерзаяй лжу яко паучину.

Радуйся, возношаяй славно истину.

Радуйся, тьму неверия прогоняяй.

Радуйся, на всяком месте тя призывающим помогаяй.

Радуйся, услышателю скорый.

Радуйся, бесовских сплетений прогонителю.

Радуйся, преподобне отче Науме чудотворче.

Кондак 7

Хотя неверие отгнати и показати свет истины, многия гонения и муки претерпел еси, преподобне отче наш Науме, И от нас убо греховное злосмрадие отжени, да благоприятно Богу вопием: Аллилуия!

Икос 7

Новаго тя Ноя, наставника ковчега спасительнаго разумеем, отче святый Науме, бурю всех лютых разгоняющаго учением своим, тишину же божественную приносящаго вопиющим таковая:

Радуйся, обуреваемых тихое пристанище.

Радуйся, сияние, скорбный мрак разгоняющее.

Радуйся, светило, вся концы земли просвещающее.

Радуйся, от бездны греховныя человеки избавляяй.

Радуйся, в бездну адскую сатану ввергаяй.

Радуйся, яко тобою дерзновенно бездну милосердия Божия призываем.

Радуйся, яко тобою от потопа гнева избавляемся.

Радуйся, яко тобою мир с Богом обретаем.

Радуйся, преподобне отче Науме чудотворче.

Кондак 8

Странное чудо является притекающим к тебе, блаженне Науме, священная твоя церковь: в ней бо и малое моление приносяще, велиих недугов приемлем исцеление, аще токмо по Бозе упование на тя возложим, верно вопиюще: Аллилуия!

Икос 8

Весь еси всем воистинну помощник, богоносе Науме, и врач скорый всем земным, на похвалу всех подвизая, вопити к тебе сице:

Радуйся, всяких исцелений источниче.

Радуйся, росо неботочная в знои трудов сущим.

Радуйся, подаваяй требующим благостроение.

Радуйся, люте страждущим помощниче.

Радуйся, уготовляяй просящим изобилие.

Радуйся, старым сединам силу обновляяй.

Радуйся, многих заблуждений от пути истиннаго обличителю.

Радуйся, яко тобою благонравное житие исправляем.

Радуйся, преподобне отче Науме чудотворче.

Кондак 9

Всякия утоли болезни, великий наш заступниче Науме: растворяя благодатная врачевания, услаждающая души наша, сердца же веселящая всех усердно к помощи твоей притекающих, Богу же вопиющих: Аллилуия!

Икос 9

Ветия суемудренныя нечестивых видим тобою посрамленныя, богомудре отче Науме: нас же во православии укрепил еси. Сего ради вопием ти сице:

Радуйся, щите, защищаяй благочестие.

Радуйся, мечу, посецаяй злочестие.

Радуйся, учителю Божественных велений.

Радуйся, лествице, Богом утвержденная.

Радуйся, немудрых умудривый твоими словесы.

Радуйся, ленивых подвигнувый твоими учении.

Радуйся, светлосте заповедей Божиих неугасимая.

Радуйся, луче оправданий Господних пресветлая.

Радуйся, преподобне отче Науме чудотворче.

Кондак 10

Спасти хотя душу, плоть твою духови покорил еси воистинну, отче наш Науме: молчанием бо прежде и бореньми с помыслы, деянию богомыслие приложил еси, богомыслием же разум совершен стяжал еси, имже дерзновенно с Богом и Апостолы беседовал еси, всегда вопия: Аллилуия!

Икос 10

Стена еси похваляющим, преблаженне, чудеса твоя, и всем к заступлению твоему прибегающим; темже и нас, в добродетели убогих, от нищеты, напасти, недугов и нужд различных свобождай, вопиющих ти с любовию таковая:

Радуйся, от убожества вечнаго изымаяй.

Радуйся, богатство нетленное подаваяй.

Радуйся, от мятежа и брани соблюдаяй.

Радуйся, от уз и пленения свобождаяй.

Радуйся, преславный в бедах заступниче.

Радуйся, превеликий в напастех защитниче.

Радуйся, брашно негиблющее алчущим правды.

Радуйся, яко тобою жизнь вечную кающиися получают.

Радуйся, преподобне отче Науме чудотворче.

Кондак 11

Пение Пресвятей Троице паче иных принесл еси, преблаженне Науме, умом, словом и делом: многими бо учении веру истинную уяснил еси, верою, надеждою и любовию наставляя нас в Троице Единому Богу воспевати: Аллилуия!

Икос 11

Светозарную лучу во мраце жития сущим неугасимую, видим тя, Богом избранне отче Науме: с невещественными бо ангельскими светы беседуеши о несозданном Троическом Свете, верных же души просвещаеши, вопиющих ти таковая:

Радуйся, озарение Трисолнечнаго света.

Радуйся, деннице незаходимаго солнца.

Радуйся, свеще, божественным пламенем возжженная.

Радуйся, яко угасил еси бесовский пламень нечестия.

Радуйся, светлое правоверия проповедание.

Радуйся, доброзрачное света Евангельскаго сияние.

Радуйся, яко тобою попрася поклонение твари.

Радуйся, яко тобою научихомся покланятися Творцу в Троице.

Радуйся, преподобне отче Науме, чудотворче.

Кондак 12

Благодать данную ти от Бога сведущии, радующеся твою память празднуем по долгу, преславный отче Науме, и к чудному заступлению твоему вседушно притекаем. преславных же твоих деяний, яко песка морскаго исчести не могуще, недоумением объяти бывше, вопием к Богу: Аллилуия!

Икос 12

Поюще твоя чудеса, восхваляем тя, всехвальне Науме: в тебе бо Бог в Троице прославляемый дивно прославися. Тем от души псалмы и песни приносим ти, чудотворче святый, и вопием к тебе таковая:

Радуйся, рода христианскаго возвышение.

Радуйся, утешению тезоименитый.

Радуйся, всех добродетелей зерцало.

Радуйся, всех притекающих к тебе крепкое забрало.

Радуйся, по Бозе и Богородице все наше упование.

Радуйся, телес наших здравие и душ спасение.

Радуйся, яко тобою от вечныя смерти свобождаемся.

Радуйся, яко тобою безконечныя жизни сподобляемся.

Радуйся, преподобне отче Науме, чудотворче.

Кондак 13

О, пресвятый и пречудный отче Науме, утешение всех скорбящих, нынешнее наше приими приношение и от геенны избавитися нам Господа умоли, богоприятным Твоим ходатайством, да с тобою воспеваем: Аллилуия!

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

Тебе, угодниче Бога Живаго, Науме чудотворче, иже исполнил еси закон Бога и Спаса нашего Иисуса Христа и сподобился еси от Него живота вечнаго, покланяемся любовию, и тя благодарим со смирением, за премногия твоя чудодейства, имиже помогаеши немощным людем и прославляеши имя Господа Бога и Спаса своего. Тебе бо, верный служителю Бога и Спаса, дадеся благодать Всесвятаго Духа бесы изгоняти, болящия исцеляти, немощныя укрепляти, страждущия утешати и во всяких скорбех помогати.

Того ради мы, недостойнии, почитаем тя, яко цевницу духовную, еюже изливается сила и небесное утешение коемуждо на потребу, и славословии прославляем Творца, Иже дарова ти таковую божественную силу и достояние. К тебе припадаем, праведниче и друже aнгелов, преподобне отче наш Науме, с покаянием и умилением, не престай молитися за свой род православный пред Престолом Пресвятыя, Единосущныя Троицы, за вся притекающия и кланяющияся пред твоими святыми мощами и всечестною иконою твоею, за болящия, и в вере усопшия, за старцы и младыя, за девы и матери.

Святе отче наш Науме, человече Божий, покрый немощи наша и исцели болезни наша, молитвама твоими, скоро услыши нас и потщися в помощь нам, да никогдаже рекут невернии: где есть Бог их? О преподобне отче Науме, яви силу твою, дарованную ти от Всемогущаго Господа, на нас, грешных рабех твоих, просвети ум наш светом святаго Евангелия, еже в житии твоем проповедал еси, и сохрани ны в целомудрии, здравии душевнем и отжени от нас пакостника диавола.

Укрепи и телеса наша здравием, яко да возможем богоугодно подвизатися и ближним нашим послужити, подаждь же нам покаяние и да в доброделании и Богоугождении поживше, обрящем милость Божию на Страшнем Судищи Христове.

Помолися, о преславне Науме чудотворче, за ны, да простятся нам согрешения вольныя и невольныя, и да очистит ны Господь Духом Своим Святым от всякия нечистоты, да достойни явимся Царствия Небеснаго, идеже с тобою прославим Святую Троицу, Яже тя прослави, Отца и Сына и Святаго Духа, ныне и присно и во веки веков. Аминь.