Акафист преподобному Никифору Прокаженному, иноку Хиосскому

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избра́ннаго воина Владыки Небе́снаго, адаманта терпения, небосве́тлую ста́мну Свята́го Духа, сше́дшеся, ве́рнии, да восхвалим. Ты, же преми́рный отче, яко о́бщник страда́ний нашего Искупителя, дерзнове́нно молися о нас, прокаже́нных страстьми́, да зовем ти:

Радуйся, многотерпели́вне отче Ники́форе, недужным скорый помо́щниче.

Икос 1

Ангельскую души чистоту и к вышним стремле́ние изде́тска явил еси, преподобне, те́мже мира Зиждитель лише́ньми тя в часть Себе отдели́ и в чадо возлюбленное восприя. Ты же, детище благоуго́дливое быв, от земных родителей сиро́тное, оба́че Бога отцем неразлучно име́вшее, ныне от нас приими́ славословия сицева́я:

Радуйся, и́мже уте́шатся скорбная сердца,

Радуйся, и́мже стра́ждущии прославят Творца;

Радуйся, кротостию от юности преудобре́нный,

Радуйся, послушанием преукраше́нный;

Радуйся, к житию крестному от юности предызбра́нный,

Радуйся, к подвигу доблемýдренному призва́нный;

Радуйся, ти́хостное и незлобивое отроча́,

Радуйся, на па́житех смиренномýдрия упасе́нное овча́;

Радуйся, яко в скорбех и болезнех руце о нас воздева́еши,

Радуйся, яко крестоношению верныя науча́еши;

Радуйся, кри́тяном теплое заступле́ние,

Радуйся, малодушным нам в беда́х укрепле́ние.

Радуйся, многотерпели́вне отче Ники́форе, недужным скорый помо́щниче.

Кондак 2

Видя тя Бог человека и́стинна, непорочна, праведна, велие испытание тебе посылает, аки злато в горни́ле тя искушая, яко да Иовле крепкодушие во образ всем верным яви́ши, и́мже и стал еси проти́ву уныния волн, находящих на тя, егда язя прока́зы на теле твоем узре́ся. Тем, сию потаи́ти хотя, на чужеда́льний корабль восхо́диши и града Александрии достиза́еши. Мы же, упование твое на Единаго Благоутро́бнаго зряще, вопием Тому: Аллилуия.

Икос 2

Ра́зумом любомудрым службы Божия во граде вели́цем воспева́еши, отонýдуже и во Святую Землю во исполнение желания твоего те́плаго преплыва́еши, та́мо пред Крестом Христовым и Гробом Его живоносным молитвы серде́чныя вознося и глубину печали своея обнажа́я. Те́мже, в Александри́ю обрати́вся, единому от архиереев тýгу свою испове́даеши и на Хио́с ко святому Анфи́му а́бие отсыла́ешися. Мы же, премудрому Промыслу о тебе дивящеся, воспева́ем:

Радуйся, в скорби велицей надеждою на Отца Небеснаго себе огражда́яй,

Радуйся, в печали денноно́щно молитву серде́чную пролива́яй;

Радуйся, сладкопе́снивый Церкве Христовы сла́вие,

Радуйся, рук воздеянием низпосыла́яй разсла́бленным здра́вие;

Радуйся, ле́потою песнопе́ний свяще́нных измла́да плене́нный,

Радуйся, ангелогла́сным многими нарече́нный;

Радуйся, недугом приявый Божие всыновле́ние,

Радуйся, в немощи яви́вый Евангельских добродетелей прозябе́ния;

Радуйся, яко бысть Весе́лие се́рдца тебе Иисус Сладча́йший,

Радуйся, пе́рвее быв отре́бие миру, ныне же ему — дар высоча́йший;

Радуйся, его́же побе́дами Хио́с велича́ется,

Радуйся, его́же жительством козни вра́жия облича́ются.

Радуйся, многотерпели́вне отче Ники́форе, недужным скорый помо́щниче.

Кондак 3

Силою Вышняго укрепляемь, во ото́це Хио́сстем на многая лета водворяешися, и зде, яко Ангела Божия, тя преподобный Анфи́м срета́ет, в наро́читую прокаже́нных враче́бницу тя поселяя, раны твоя теле́сныя обязýя и духо́вное попечение взе́мля о крестоно́сней души́ твоей. Ты же, таковыя милости от волею Распятаго и Его уго́дника прие́мля, благода́рственная восписýеши: Аллилуия.

Икос 3

Имея велие к храму Божию усе́рдие, в це́рквице свята́го Лазаря, друга Господня, у лече́бницы на всяк день в моле́ниих и пе́ниих привита́еши, пред иконою дивною Богородицы от се́рдца, скорбию тесни́маго, вопия. Ея же чудесы не токмо на ха́ртии, но и в души напечатле́в и благоутро́бия бе́здны от Всеми́лостивыя восприят, не преста́й и ныне руце к Ней простира́ти о спасении нас, возносящих ти сицева́я:

Радуйся, Це́рковию Бо́жиею воспита́нный,

Радуйся, ма́нною словес Евангельских препита́нный;

Радуйся, яко цели́ши печали лютое неможе́ние,

Радуйся, яко хода́тайствы врачýеши уныния смертное боле́ние;

Радуйся, яко душе́вныя наши стрýпы молитвою за ны умягча́еши,

Радуйся, яко разсла́бленныя телом и неради́выя бодростию своею духовною возставляеши;

Радуйся, удаляяйся от всякия лука́выя вещи,

Радуйся, изведе́нный от мысленнаго Египта железныя пе́щи;

Радуйся, Богородице светлое гласова́ние,

Радуйся, ум огради́вый Священным Писанием;

Радуйся, о́бразе и правило Божиих песнопе́вцев,

Радуйся, соприча́стниче страстоте́рпцев.

Радуйся, многотерпели́вне отче Ники́форе, недужным скорый помо́щниче.

Кондак 4

Бурю смятений и попечений мирских на пристанище тихое премени́л еси, и, гнуша́емь от человек, маргари́т драгоце́нный Всетворцý показа́ся. Тем, ничесо́же стяжа́в, сокро́вищем мудрых советов от богопросвеще́ннаго ста́рца и писаний святооте́ческих обогаща́ешися, непреста́нно хваля та́ко к пользе душе́вней Устро́ившаго: Аллилуия.

Икос 4

Слыша Христос Многоми́лостивый моли́твы твоя и зря сердца твоего сокруше́ние, руку к тебе простирает: прииди́ ко Мне, чадо тружда́ющееся и обремене́нное, и Аз упокою тя. Ты же, от отца духо́внаго постриже́ние восприи́м, взем иго Господне благое на ра́мо, кро́тости и смире́нию по вся дни от Него науча́шеся и благода́рственная возноша́ше. Мы же, таковым щедротам Спаса дивящеся, похвальная ти воспева́ем:

Радуйся, в новаго человека богосотворе́ннаго облече́нный,

Радуйся, во одежду веселия оболче́нный;

Радуйся, целомудрия дивное благоуха́ние,

Радуйся, помощи Божия приявый обетова́ние;

Радуйся, горьково́дная мiра Крестом Христовым услади́вый,

Радуйся, себе укоре́ние в краеуго́льный камень терпения положи́вый;

Радуйся, жития сýетнаго печалей Промыслом отсече́нный,

Радуйся, не ктомý себе жи́ти, но Умершему за ны и Воскре́сшему посвяще́нный;

Радуйся, в рýце Созда́теля всецело себе преда́вый,

Радуйся, воли своея отвержения возжела́вый;

Радуйся, яко тобою мона́шеский лик украша́ется,

Радуйся, яко тобою сýщии в лютых не́мощех укрепляются.

Радуйся, многотерпели́вне отче Ники́форе, недужным скорый помо́щниче.

Кондак 5

Боготе́чно твое житие и преди́вно яви́ся, к разсужде́нию бо послушанием устреми́лся еси, преподо́бне, в лече́бней кали́бице, яко в пустыни, со страстьми́, яко зверьми до́блественне боряся, побеждая и побежда́яся, падая и возставая, молитвы ника́коже отступая и простирая длани своя Просте́ршему длани Боже́ственнеи на Пречи́стем и Живоно́снем Кресте, яко да в будущем Царстве Его пе́ти возмо́жеши немо́лчное: Аллилуия.

Икос 5

Видим тя, преподо́бне отче, вертогра́даря, цве́ты прекра́сныя и древа́ благови́дная израща́юща, Вышнему же Вертогра́дарю добродетелей сад преиспещре́нный, посреде́ терний скорбей и напастей процветший. Темже, угодниче Божий и дивный отче, припа́дающе к стопам твоим, просим: Троице Пресвяте́й благосе́рдствуй о нас, яко да согрешения своя ýзрим и, покаянием умудре́ннии, не преста́нем, благодаряще, возсыла́ти тебе такова́я:

Радуйся, яко от ко́рене повинове́ния смирение прораща́еши,

Радуйся, яко на ветви духо́вней якоже новый крин прозяба́еши;

Радуйся, бдения и трезве́ния дивное благоуха́ние,

Радуйся, терпеливодýшию веру вмени́вый во основа́ние;

Радуйся, розго́, отребле́нная Вышним, те́мже и многопло́дная,

Радуйся, грехми́ иссуше́нным реко́ многово́дная;

Радуйся, умом зловре́днаго целомудренно отбега́яй,

Радуйся, Священным Писанием при́сно внима́яй;

Радуйся, якоже кипари́с, посреде́ хлада мук благодушием зелене́еши,

Радуйся, якоже медуни́ца мироуха́нная, пред Зижди́телем благогове́еши;

Радуйся, от егоже устен Господня хвала возсыла́ется,

Радуйся, и́мже стропти́вии и ропотли́вии славосло́вию науча́ются.

Радуйся, многотерпели́вне отче Ники́форе, недужных скорый помо́щниче.

Кондак 6

Пропове́дник святоотеческих монашеских де́ланий является ти богогласный Анфим, ко трезве́нию, страху Божию, памяти сме́ртней и молчанию тя управляя, и та́ко за́поведьми Ева́нгельскими устрояет душе́вныя струны твоя, яко да мусики́йская Духу Святому цевни́ца соде́лаешися, и о тебе воспева́ет Троице Пресвятей: Аллилуия.

Икос 6

Возсия в тебе разум истинный, и́мже всячески к послушанию устремился еси, богоно́се, откровение бо стяжал еси, отче, и́скреннее, помыслы истязýя, кормчему своему кормило вручив и тем основание духо́внаго восхождения полага́я; в такове́м преди́внем смирении помянý Тя Господь и украси́ доброде́тельми душу твою. Те́мже от нас приими́ таковая:

Радуйся, высокомýдрие мира в буйство вмени́вый,

Радуйся, Иисýсову память в сердце своем водрузи́вый;

Радуйся, Христý подража́телю, нас ради обнища́вшему,

Радуйся, о́бщниче прежде бывшим Отце́м, до́льний покой попра́вшим;

Радуйся, Божиих ради хоте́ний своя потреби́вый хоте́ния,

Радуйся, в простоте́ повинýяся, до́бре пре́йде тече́ние;

Радуйся, паче ке́дра лива́нскаго в и́стиннем де́лании укорени́выйся,

Радуйся, Послушли́вому даже до смерти кре́стныя во след устреми́выйся;

Радуйся, яко псалти́рь яснозвýчная, стезю к покаянию воспева́яй,

Радуйся, яко труба богогла́сная, неради́выя к деланию пробужда́яй;

Радуйся, иноком новонача́льным звездо́ путево́дная,

Радуйся, путем истомле́нным древо высо́кое и сладкопло́дное.

Радуйся, многотерпели́вне отче Ники́форе, недужным скорый помо́щниче.

Кондак 7

Хотящу ти заповедь Евангельскую испо́лнити, во озлобле́нии боле́зненном всячески незло́бием и благодýшествием сияше, многострада́льне отче Ники́форе, кадило Христу благово́нное и приношение свято́е. Те́мже бла́гости и братолюбия дости́гл еси высоты, Духом Святым исполняяся, иным прокаже́нным, и́нокиням обители Пренепоро́чныя Помо́щницы и нам, немощным, образ быв, ка́ко подобает любо́вию к Богу и ближнему преспева́ти, с ни́миже вкýпе восписýем о тебе Вышнему: Аллилуия.

Икос 7

Новый яви́ся Иов, до́блестию в страда́ниих и по́двигом великодýшия вся болящия укрепляяй и наставляяй, Богом возлюбленный трýдниче, мужемýдренный ратобо́рче, тихости и поко́рности воле Божии о́бразе. Те́мже, сам быв острупле́н, наша раны благосе́рдными заступле́нии обязýеши, по достоянию воздающих ти таковая:

Радуйся, душевнаго мира гýсле согласная,

Радуйся, молитвы серде́чныя песне прекрасная;

Радуйся, души́ своея ризу слеза́ми радостотворными очища́яй,

Радуйся, плачем Вседержителя к милости приклоняяй;

Радуйся, всеусе́рдно устреми́выйся к богоугожде́нию,

Радуйся, пред очами Владыки обретый благоволе́ние;

Радуйся, уязвленным самолюбием целе́бнейший пла́стырю,

Радуйся, блужда́ющим в по́хотех плоти добрый путевождю и па́стырю;

Радуйся, яко Христос твоя присно соде́лася Радость,

Радуйся, яко имя Его бысть тебе вышняя сладость;

Радуйся, и́мже саможале́ние и малодýшие исправляются,

Радуйся, и́мже премудрость Промысла Божия познава́ется.

Радуйся, многотерпели́вне отче Ники́форе, недýжных скорый помо́щниче.

Кондак 8

Странен, премирне, ты показа́ся миру, нечистоте́ его не прикаса́яся, те́мже и церковь соде́лася Богу Живу, Дух бо Святый прии́де и всели́ся в тя, до́бляя мужества глави́зно, и очисти тя от всякия скверны. Ты же, молитвою священноде́йствуя и присно гре́шника себе мня, во удивле́нии зовяше: Аллилуия.

Икос 8

Весь бе ура́нен, и в ребро́ прободе́н, и ослепле́н, благодарною же душею паче солнца сияя; злый же недуг, яко мучитель, нещадно тя истязаше. Обаче удом твоим отсекаемым, ты немолчно пояше: да будет, Господи, жертва моя душевная благоприятна пред Тобою. Не остави, отче, предстательством нас, таковей твоей доблести ужасающихся, острупле́нных грехми, похотьми́ ослепленных, любовию Ти вопиющих:

Радуйся, Вышнему всесожжение словесное,

Радуйся, сущим до́лу дарование Небесное;

Радуйся, пакостника плоти смирением попаливый;

Радуйся, телесному крестоношению мысленное распятие совокупивый;

Радуйся, славословия Всещедраго кимвале богокрасный,

Радуйся, трезвения органе златогласный;

Радуйся, яко крепкостоянием твоим в скорбех научаемся,

Радуйся, яко худостию риз твоих вразумляемся;

Радуйся, яко терпение нищаго Лазаря показал еси,

Радуйся, яко Моисееву кротость явил еси,

Радуйся, унынием истязуемым духовная отрадо,

Радуйся, гневом жегомым Небесная прохладо.

Радуйся, многотерпеливне отче Никифоре, недужным скорый помощниче.

Кондак 9

Всякое благодаре́ние поощряет Дающаго е́же умно́жити дарова́ния; твоя же душа в славословии отнюд не престава́ше, сего ради свыше великия дары приял еси, Духа Святаго сосуде избранный. Испроси́ нам в терпении обстояний поне́ мало ти подража́ти, и в боле́знех благода́рственная присно от сердца сокрушеннаго Богови возносити: Аллилуия.

Икос 9

Ветия лжемудрствующия умолка́ют, недоуме́юще кре́стнаго жития силы: ели́цы бо Крест приемлют желанием, душевное исцеление взе́млют. Ты же, преми́рный отче, от претерпе́ния скорби плотски́я к видению и славе Креста возшел еси и велию благодать притяжа́л еси болезни цели́ти к тебе приходящих любо́вию и воспева́ющих таковая:

Радуйся, благословляяй Господа на всякое время,

Радуйся, безропотно пронесый тягчайшее бремя;

Радуйся, возненави́девый славу мимотекýщую,

Радуйся, отверги́й суету многословýщую;

Радуйся, паче богатства тленнаго Христово поношение вмени́вый,

Радуйся, тесный путь благослови́вый;

Радуйся, купе́ле Силоа́мская разсла́бленным грехми,

Радуйся, цельбо́ ослепленным похотьми́;

Радуйся, ломо́тныя и опýхольныя болезни отгоняяй,

Радуйся, моры губи́тельныя уставляяй;

Радуйся, яко в прокаже́нней плоти Ангельскою чистото́ю сияше,

Радуйся, яко во озлобле́ниих благость являше.

Радуйся, многотерпели́вне отче Никифоре, недужным скорый помощниче.

Кондак 10

Спасти хотя люди Афи́нския, душевными и телесными боле́зньми стра́ждущия, Промысли́тель Премудрый тя, кротчайший Никифоре, яко ангела утешителя к ним посылает, наставник же твой словесы таковыми свяще́ннику при лече́бнице Евме́нию тя предваряет: сей маргарит прекра́снейший, сокровище Божие и совершенна монаха ра́достию вси приимите, воздающе Богу по достоянию: Аллилуия.

Икос 10

Стена соде́лался еси прокаженным и страждущим во граде Афи́нстем, ти́хостию и благоволением Апостолу подражая, во всяцем внимании жительствуя, к согласию, миру, святыне и благогове́нию вся наставляя. Те́мже и образ нам показался еси, еже ка́ко подобает сердечным служением во псалме́х, и пениих, и песнех духовных преспева́ти, сего ради яко еди́неми усты возносим ти сицева́я:

Радуйся, благодарения радостию блиста́яй,

Радуйся, сострадания светлостию вся увеселяяй;

Радуйся, Дави́довою простотою отгнавый вра́жия злокова́рствия,

Радуйся, нищетою духа блаженство стяжа́вый Вечнаго Царствия;

Радуйся, суесловие попали́вый молчанием,

Радуйся, малодушие потреби́вый Вышняго величанием;

Радуйся, яко Евангелие достояние ума своего сотвори́ся,

Радуйся, яко любы неотпа́дающая в тебе воцари́ся;

Радуйся, яко к молению непрестанному верныя наставляеши,

Радуйся, яко к духовному разуму страждущия управляеши;

Радуйся, в пещи безмерных болезней пали́мыя ороси́вый,

Радуйся, мно́зи во глубине немощи сýщия исцели́вый.

Радуйся, многотерпели́вне отче Никифоре, недужным скорый помо́щниче.

Кондак 11

Пение всеумиле́нное подобает ти, моли́твенниче неусыпный: служителю бо Евме́нию в ке́ллию к тебе тайно вше́дшу, узре́ тя на воздýсе молящася, и, разслабле́ние членов твоих, зрения и ног лише́ние ведая, ужа́сся той, возопив: Аллилуия.

Икос 11

Светосияет нам образ твой, именем и де́лы победоно́сче, к познанию немощи своея нас, малодушных и ропотливых, управляя и вразумляя. Темже недоуме́юще, како смертней плоти твоей истлевающей, по вся дни обновляшеся, яко духодви́жная арфа, выну богосла́вная бряца́я, диви́мся и приносим ти такова́я:

Радуйся, любо́вию Христовою прободе́нный,

Радуйся, живоносным Крестом Его оживотворе́нный;

Радуйся, якоже Даниил во рву на Единаго упова́яй,

Радуйся, якоже о́троцы в пещи Благоутро́бнаго восхваляяй;

Радуйся, Церкве златокова́нный свети́льниче,

Радуйся, рачения еже к Богу таи́нниче;

Радуйся, яко огнем боления ве́чнаго пламене избе́гл еси,

Радуйся, яко силою Духа немощь плоти препре́л еси;

Радуйся, сладкопе́вче, Ангелом собесе́дниче,

Радуйся, гýсле молитвы, благода́тныя жизни снасле́дниче.

Радуйся, многотерпели́вне отче Никифоре, недужным скорый помощниче.

Кондак 12

Благодати чудотворений ковчег явился еси, богатода́рный отче, и по блаже́нней кончине нас благоутро́бием и помощию не оставляеши. Всем же в скорби к моще́м твоим и образу притекающим, подае́ши осла́бу душевную и телесную, с ними Всемилостивому возсыла́я теплое: Аллилуия.

Икос 12

Пение всеумиле́нное не престаем приноси́ти тебе, благоуве́тливый отче, ты же сие приими от недостойных устен и к Богу рýце твоя воздева́ти о нас не преста́й, вопиющих ти таковая:

Радуйся, печа́льми болезненными обретый безпеча́льное упокоение,

Радуйся, до конца претерпев, райская улучи́вый Селения;

Радуйся, гро́здие, в точиле скорбей вино источи́вшее,

Радуйся, миро, благоуханием добродетелей вся ны увесели́вшее;

Радуйся, токи чудес излива́яй,

Радуйся, ми́лостию к болящим не оскудева́яй;

Радуйся, мучений пучину окормле́нием Слова преплывый,

Радуйся, во́и лука́ваго крепкодýшием погуби́вый;

Радуйся, тряса́вицею и огне́вицею стра́ждущия уврачева́вый,

Радуйся, мно́гия беды от почитающих тя отгна́вый;

Радуйся, ми́лостиве, блаженства Небе́снаго ныне наслажда́яяйся,

Радуйся, нищий духом, благодати богатно присно причащаяйся.

Радуйся, многотерпеливне отче Никифоре, недужным скорый помощниче.

Кондак 13

О богомудре Никифоре Прокаженный! Ты боле́зньми ссека́ем, недýгами стрýжемь, житие на одре болезни лютыя препровожда́я, волю Божию о Христе всяко испо́лнил еси, еже есть всегда ра́доватися, непреста́нно моли́тися, о всем благодари́ти. Ныне же, светоявле́нне, нашу печаль утоли и ухо твое к проше́нием нашим ми́лостивно приклони, и к ра́дованию, молитве и благодаре́нию упра́ви о тебе вопиющия: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, благодарный страда́льче, молитвы таи́нниче, милостивый чудотво́рче, преподобне отче Никифоре!

Кто убо терпению, смирению, трезве́нию, благоуве́тливости, доблести и кро́тостной премýдрости твоим не подиви́тся?

Веруем, яко по преселе́нии твоем ко Господу ве́лию мзду улучи́л еси и многою благода́тию обле́клся еси, многоболе́зненныя бо, стра́ждущия, нича́щия ни́зу, разсла́бленныя, ни́щия и убо́гия заступле́нием и попечением своим не оставляеши и многая и дивная чудеса на них излива́еши.

Те́мже, сам искушен быв, помози́ и нам, страстьми́, и похотьми́, и своеволием искуша́емым. Ве́мы, яко вся находящая на ны грех ради наших восприяхом. Оба́че дерзновенным заступле́нием твоим пред Человеколюбцем воздви́гни ны, в пучине не́мощей обдержи́мыя, возста́ви на одре озлобления сýщия, облегчи́ недуги, здравия испроси́, боле́зни укроти́, утешение божественное даруй.

Припади́ в Небесных Чертогах к подножию ногу нашего Искупи́теля, не преста́й воздева́ти рýце твои о нас, недостойных и окаянных, по вся дни падающих и возстающих, оба́че надежды на Его милосердие не оставляющих, яко да твоими хода́тайствы укрепляеми и исцеления душ восприе́мше, грехов прощение улучи́м и Царство Его вечное насле́дим и с тобою кýпно да воспое́м благода́рственная в Троице славимому Богу нашему, Отцу, и Сыну, и Святому Духу, ныне, и присно, и во веки веков. Аминь.