Акафист святой праведной Софии, княгине Слуцкой

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Избра́нная о́трасле благочести́ваго и дре́вняго кня́жескаго ро́да,/ свята́я пра́ведная ма́ти на́ша Софи́е,/ похва́льная пе́ния со умиле́нием воспева́ем ти,/ ты же, я́ко иму́щая ве́лие дерзнове́ние ко Го́споду,/ потщи́ся, да изба́вит от бед и скорбе́й ны, зову́щия:// Ра́дуйся, преподо́бная ма́ти Алекса́ндро, первонача́льнице оби́тели Диве́евския.

Икос 1

А́нгельскою любо́вию горя́щи ко Го́споду от младе́нчества твоего́, Софи́е пра́ведная, а́ще и роди́тельскаго воспита́ния не име́вшая, в ве́ре и благоче́стии возраста́ла еси́ под покро́вом Ма́тере Бо́жия. Мы же таково́е о тебе́ Бо́жие смотре́ние прославля́юще, взыва́ем ти:

Ра́дуйся, роди́телей благоро́дных ча́до боголюбе́зное;

ра́дуйся, не челове́ческим, но Боже́ственным смотре́нием опека́емая.

Ра́дуйся, в младе́нстве осироте́вшая, Го́сподем же не оста́вленная;

ра́дуйся, под покро́вом Пресвяты́я Богоро́дицы всегда́ храни́мая.

Ра́дуйся, пра́ведная же́но, Прему́дрости соиме́нная;

ра́дуйся, я́ко по и́мени твое́м и житие́ твое́ просла́вися.

Ра́дуйся, Христо́вой му́дрости нас науча́ющая;

ра́дуйся, о́браз и́стинныя му́дрости нам показу́ющая.

Ра́дуйся, в за́поведех Госпо́дних усе́рдно ходи́вшая;

ра́дуйся, в ско́рбех вре́менных утеше́ние благо́е получа́вшая.

Ра́дуйся, Христа́ Бо́га ча́до возлю́бленное;

ра́дуйся, пла́мень любве́ ко Го́споду в се́рдце свое́м возже́гшая.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 2

Ви́дящи, свята́я Софи́е, по кончи́не роди́телей себе́ оста́вленну, ко оби́тели Супра́сльской устреми́лася еси́ и та́мо ти́хое приста́нище обре́тши, не то́кмо усты́, но и се́рдцем вопия́ла еси́ Бо́гу: Аллилу́ия.

И́кос 2

Ра́зум богопросвеще́нный дарова́ся тебе́, свята́я пра́ведная Софи́е, и́мже проразуме́ла еси́ душепа́губную тще́тность и тле́нность земна́го бога́тства. И сия́ ве́дящи, Христа́ взыска́ти вседу́шно потща́лася еси́, те́мже велича́ем тя и взыва́ем тебе́ та́ко:

Ра́дуйся, с кня́жескою диади́мою вене́ц Христо́в соедини́вшая;

ра́дуйся, всем се́рдцем к жи́зни ве́чней устремле́нная.

Ра́дуйся, земны́я сла́сти в житии́ свое́м презре́вшая;

ра́дуйся, жи́тельство безконе́чное на Небесе́х предызбра́вшая.

Ра́дуйся, в Ца́рствие Небе́сное путе́м у́зким и терни́стым ше́дшая;

ра́дуйся, чи́стая и непоро́чная голуби́це, к го́рнему ми́ру возлете́вшая.

Ра́дуйся, все упова́ние свое́ на Бо́га возложи́вшая;

ра́дуйся, любо́вию ко Го́споду при́сно пламене́ющая.

Ра́дуйся, вся кра́сная ми́ра ни во что́же вмени́вшая;

ра́дуйся, и́стинную жизнь во Христе́ обре́тшая.

Ра́дуйся, ум свой горе́ устреми́вшая;

ра́дуйся, се́рдце твое́ жили́ще Ду́ха Свята́го соде́лавшая.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 3

Си́лою Боже́ственныя благода́ти и до́брым произволе́нием хотя́щи отврати́ти сму́ту и братоуби́йство от земли́ своея́, свята́я Софи́е, по́двиг служе́ния и́стине в бра́це с иносла́вным му́жем прия́ла еси́, сего ра́ди благода́рно о тебе́ пое́м Го́сподеви: Аллилу́ия.

И́кос 3

Иму́щи в се́рдце смире́ние ве́лие, в свя́тости и че́сти венча́лася еси́ с му́жем свои́м в правосла́внем хра́ме гра́да Бре́ста, пра́ведная Софие́. Сего́ ра́ди с любо́вию вопие́м ти:

Ра́дуйся, ра́ди ми́ра крестоноше́ние во бра́чном житии́ прие́мшая;

ра́дуйся, блаже́нная миротво́рице, ча́до Бо́жие наре́кшаяся.

Ра́дуйся, в супру́жестве благоче́стно пожи́вшая;

ра́дуйся, дома́шнюю це́рковь свою́ со стра́хом Бо́жиим созида́вшая.

Ра́дуйся, зако́на Христо́ва ре́вностная исполни́тельнице;

ра́дуйся, ни́ву се́рдца своего́ от те́рний душевре́дных очи́стившая.

Ра́дуйся, ду́шу слеза́ми покая́ния при́сно ороша́вшая;

ра́дуйся, моли́твенным по́двигом Бо́гу угоди́вшая.

Ра́дуйся, земли́ на́шея духо́вное сокро́вище;

ра́дуйся, Це́ркве Правосла́вныя многоце́нное украше́ние.

Ра́дуйся, десни́цею Бо́жиею превознесе́нная;

ра́дуйся, я́ко во смире́нии и кро́тости помяну́ тя Госпо́дь.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 4

Бу́рю ви́дящи, воздвиза́емую на ве́ру правосла́вную, со дерзнове́нием запове́дала еси́ сохрани́ти ю́ неврежде́нну во владе́ниих кня́жества Слу́цкаго, да ча́да твоя́ и весь наро́д, пра́ведная ма́ти на́ша Софи́е, правосла́вно возглаго́лют Христу́: Аллилу́ия.

И́кос 4

Слы́шавше лю́дие правосла́внии о вели́цем благоче́стии твое́м, пресла́вная Софи́е, я́ко Бо́жиим хра́мом и оби́телем ще́дро благотвори́ла еси́, и та́ко те́плое благодаре́ние Го́сподеви возноша́ху, тебе́ же ра́достное хвале́ние приноша́ху, вопию́ще си́це:

Ра́дуйся, хра́мов правосла́вных ще́драя покрови́тельнице;

ра́дуйся, ри́зы свяще́нническия истка́вшая и зла́том пребога́то украси́вшая.

Ра́дуйся, за́поведи Христо́вы пра́ведно испо́лнившая;

ра́дуйся, благоле́пие церко́вное преи́скренне возлюби́вшая.

Ра́дуйся, земно́е бога́тство ни во что́же вмени́вшая;

ра́дуйся, всемогу́щую си́лу благода́ти Бо́жия позна́вшая.

Ра́дуйся, градо́в Слу́цка и Ми́нска изря́дное украше́ние;

ра́дуйся, земли́ на́шея цве́те благоуха́нный.

Ра́дуйся, я́ко тобо́ю и́мя Бо́жие просла́вися;

ра́дуйся, благода́ти Христо́вы пресла́вное вмести́лище.

Ра́дуйся, ве́ры и́стинныя побо́рнице;

ра́дуйся, я́ко тобо́ю благ ве́чных сподобля́емся.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 5

Боготе́чная звезда́ яви́лася еси́, свята́я княги́не Софи́е, во дни пра́зднеств престо́льных а́ки пало́мница богомо́льная посеща́ющи хра́мы Бо́жия земли́ Слу́цкия и та́мо в моли́тве взыва́ющи ко Го́споду: Аллилу́ия.

И́кос 5

Ви́дящи, свята́я Софи́е, я́ко чистота́ ве́ры правосла́вныя от разли́чных ко́зней и напа́стей попира́ется, устро́ила еси́ во гра́де Слу́цке бра́тство в честь Преображе́ния Госпо́дня, да вси тесни́мии и гони́мии тве́рдаго ра́ди стоя́ния в ве́ре правосла́вней по́мощь и защище́ние та́мо обрета́ют. Те́мже вопие́м ти:

Ра́дуйся, ра́ди утвержде́ния ве́ры правосла́вныя по́двиги духо́вныя подъе́мшая;

ра́дуйся, в зе́млях свои́х Правосла́вие на ве́ки сохрани́вшая.

Ра́дуйся, да́же до забве́ния себе́ Христо́ви ве́рная;

ра́дуйся, ве́ры на́шея испове́днице дерзнове́нная.

Ра́дуйся, о́браз тве́рдаго стоя́ния за ве́ру Христо́ву нам показа́вшая;

ра́дуйся, я́ко за сие́ угото́вася ти сокро́вище благ ве́чных.

Ра́дуйся, мно́гия ско́рби за ве́ру правосла́вную прии́мшая;

ра́дуйся, венце́м испове́дничества от Го́спода украше́нная.

Ра́дуйся, пе́рвая от земли́ Слу́цкия к ли́ку святы́х причте́нная;

ра́дуйся, ско́рая помо́щнице всем, с моли́твою притека́ющим к тебе́.

Ра́дуйся, му́дрыми твои́ми глаго́лы ве́ру правосла́вную утвержда́ющая;

ра́дуйся, во и́стиннем благоче́стии всех наставля́ющая.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 6

Пропове́дница ве́лия показа́лася еси́, сла́вная Софи́е, труда́ми и боле́зньми твои́ми ве́ру правосла́вную во гра́де Слу́цке утвержда́ющи, зе́мли же и ве́си, близ лежа́щия, сле́зными моли́твами ороша́ющи и облагоуха́ющи. Мы же па́мять твою́ почита́юще, благода́рне взыва́ем ко Го́споду: Аллилу́ия.

И́кос 6

Возсия́ па́че со́лнца доброде́тель твоя́ во гра́де Слу́цке, ма́ти на́ша Софи́е, я́ко всем в ну́ждах и печа́лех прибега́ющим к тебе́ засту́пница яви́лася еси́. Приими́ и нас, недосто́йных, с любо́вию вопию́щих ти си́це:

Ра́дуйся, всем правосла́вным кре́пкое прибе́жище;

ра́дуйся, си́льных ми́ра сего́ превозмо́гшая.

Ра́дуйся, от всех враг ви́димых и неви́димых изря́дная засту́пнице;

ра́дуйся, в разреше́нии мирски́х нестрое́ний ско́рая помо́щнице.

Ра́дуйся, дре́вняго гра́да Слу́цка похвало́;

ра́дуйся, сла́внаго гра́да Ми́нска утвержде́ние.

Ра́дуйся, Правосла́вия му́жественная ревни́тельнице;

ра́дуйся, гони́телей ве́ры на́шея неустраши́мая обличи́тельнице.

Ра́дуйся, о́браз любве́ и кро́тости яви́вшая;

ра́дуйся, друг дру́га тяготы́ носи́ти нас науча́ющая.

Ра́дуйся, на пути́ спасе́ния на́ше утвержде́ние;

ра́дуйся, в Ца́рствие Бо́жие благонаде́жное приведе́ние.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 7

Хотя́й Госпо́дь во смире́нии и терпе́нии укрепи́ти тя, пра́ведная Софи́е, мно́гия ско́рби и смерть во младе́нстве чад твои́х попусти́, да просвети́шися, я́ко зла́то в горни́ле, и пое́ши Бо́гу: Аллилу́ия.

И́кос 7

Но́вую показа́ла еси́ доброде́тель, свята́я Софи́е, воздви́гши храм в честь Пресвяты́я Богоро́дицы, Ея́же Ма́тернему попече́нию и уме́ршая ча́да своя́ вве́рила еси́, те́мже тя ублажа́ем та́ко:

Ра́дуйся, не от челове́к, но от Бо́га утеше́ние в ско́рбех получи́вшая;

ра́дуйся, Человеколю́бцу Бо́гу всю себе́ преда́вшая.

Ра́дуйся, лише́ния земна́я благоче́стно поне́сшая;

ра́дуйся, кончи́ну чад свои́х я́ко во́лю Бо́жию прие́мшая.

Ра́дуйся, до́брыми твои́ми де́лы просла́вленная;

ра́дуйся, пра́вым изволе́нием се́рдца и ума́ в жили́ще Боже́ственныя благода́ти предугото́вленная.

Ра́дуйся, терпе́ние кре́пкое и неуста́нное нам подаю́щая;

ра́дуйся, в ско́рбех су́щих луча́ми наде́жды осиява́ющая.

Ра́дуйся, на Го́спода упова́ние неизме́нно возложи́вшая;

ра́дуйся, вене́ц блага́го воздая́ния от Христа́ прии́мшая.

Ра́дуйся, кре́посте и утеше́ние в беда́х и ну́ждах на́ших;

ра́дуйся, ди́вная ма́ти, благи́я па́мяти досто́йная.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 8

Стра́нствие земно́е соверши́вши, свята́я пра́ведная Софи́е, пло́тию преста́вилася еси́ от нас, ду́хом же с на́ми всегда́ пребыва́еши, да и мы с тобо́ю еди́неми усты́ и еди́нем се́рдцем уми́льно воспое́м Го́сподеви: Аллилу́ия.

И́кос 8

Вси лю́дие правосла́внии воспева́ют тя по достоя́нию, достохва́льная Софи́е, Це́рковь же Христо́ва све́тло пра́зднует па́мять твою́ и песнь хвале́бную прино́сит ти си́це:

Ра́дуйся, ве́рность Христу́ до конца́ соблю́дшая;

ра́дуйся, Го́сподем Не́ба и земли́ по преставле́нии ми́лостивно прия́тая.

Ра́дуйся, милосе́рдие Христо́во на Небеси́ обре́тшая;

ра́дуйся, блаже́нства ве́чнаго дости́гшая.

Ра́дуйся, от злых волко́в ко Христу́, до́брому Па́стырю, прибе́гшая;

ра́дуйся, во двор слове́сных ове́ц Его́ вше́дшая.

Ра́дуйся, в небе́сных оби́телех водворе́нная;

ра́дуйся, венце́м сла́вы от Бо́га увенча́нная.

Ра́дуйся, у Престо́ла Царя́ царе́й предстоя́щая;

ра́дуйся, со А́нгелы и все́ми святы́ми за ны моля́щаяся.

Ра́дуйся, у Престо́ла Святы́я Тро́ицы на́ша предста́тельнице;

ра́дуйся, земны́х и небе́сных благ пред Го́сподем нам усе́рдная хода́таице.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 9

Во всех конце́х земли́ на́шея сла́вится и́мя твое́, богому́драя Софи́е, я́ко спаса́еши вся ны моли́твами твои́ми от смертоно́сныя я́звы, тлетво́рных ветр и о́гненнаго запале́ния, предстоя́щи ны́не Престо́лу Всевы́шняго Бо́га с ли́ки А́нгелов и святы́х, воспева́ющих Ему́: Аллилу́ия.

И́кос 9

Вети́йствующий язы́к не мо́жет изрещи́ вели́чие благодея́ний твои́х, свята́я Софи́е, мно́жицею явле́нных благочести́вым супру́гом, непра́здным жена́м и новорожде́нным младе́нцем. Те́мже вси со благодаре́нием благоче́стно пою́т ти:

Ра́дуйся, всех скорбя́щих нело́жное утеше́ние;

ра́дуйся, непреста́нное на́ше ра́дование.

Ра́дуйся, му́дрых жен добро́то и похвале́ние;

ра́дуйся, целому́дренных дев красото́ и удобре́ние.

Ра́дуйся, те́плая о нас пред Го́сподем моли́твеннице;

ра́дуйся, изря́дная земли́ на́шея покрови́тельнице.

Ра́дуйся, сете́й вра́жиих сокруше́ние;

ра́дуйся, правосла́вным лю́дем ве́рное поможе́ние.

Ра́дуйся, душа́м и телесе́м на́шим вся, я́же к по́льзе, подава́ющая;

ра́дуйся, на вся́кое де́ло благо́е прему́дро нас наставля́ющая.

Ра́дуйся, во вся́ких злоключе́ниих и беда́х нам ско́ро помога́ющая;

ра́дуйся, моли́твенно тя призыва́ющих от внеза́пныя сме́рти избавля́ющая.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 10

Спасени́я душе́внаго и теле́снаго жела́ющим и о сих усе́рдно подвиза́ющимся помо́щница блага́я, пра́ведная Софи́е, яви́лася еси́. Ты бо еси́ засту́пница тружда́ющихся, обремене́нных, в неду́зех и обстоя́ниих су́щих, да вси благода́рственно взыва́ют просла́вльшему тя Царю́ сла́вы Христу́: Аллилу́ия.

И́кос 10

Стена́ несокруши́мая и огражде́ние кре́пкое явля́ются нам моли́твы твоя́, уго́днице Бо́жия, пра́ведная Софи́е, нетле́нныя же и многоцеле́бныя мо́щи твоя́ исцеле́ния и утеше́ния нам неоску́дно источа́ют. Мы же благода́рно велича́ем тя:

Ра́дуйся, жизнь земну́ю благоче́стно сконча́вшая;

ра́дуйся, вене́ц Ца́рствия Небе́снаго получи́вшая.

Ра́дуйся, в ра́дости небе́сней ны́не пребыва́ющая;

ра́дуйся, сне́ди ра́йския при́сно наслажда́ющаяся.

Ра́дуйся, со свеще́ю све́тлою дел благи́х в черто́г Христо́в возше́дшая;

ра́дуйся, нетле́нием и чудесы́ по кончи́не просла́вленная.

Ра́дуйся, явле́нием чудото́чных моще́й твои́х Це́рковь Христо́ву возвесели́вшая;

ра́дуйся, я́ко тем с ве́рою и любо́вию покланя́емся.

Ра́дуйся, притека́ющим к ра́це святы́х моще́й твои́х цельбы́ подаю́щая;

ра́дуйся, почита́ющим тя благослове́ние и ми́лости Бо́жия неоску́дно источа́ющая.

Ра́дуйся, лико́в А́нгельских ве́рная соприча́стнице;

ра́дуйся, оби́телей небе́сных сла́вная жи́тельнице.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 11

Пе́ние на́ше хвале́бное, а́ще и от усе́рдия приноси́мое, не дово́льно есть ко изъявле́нию серде́чнаго благодаре́ния за вся блага́я, я́же твори́ши нам да́же до дне и часа́ сего́, всечестна́я Софи́е. Мы же в напа́стех и ско́рбех к тебе́ прибега́ем, и на твое́ предста́тельство упова́юще, немо́лчно ко Го́споду взыва́ем: Аллилу́ия.

И́кос 11

Свеща́ многосве́тлая яви́лася еси́, преблаже́нная Софи́е, всем пребыва́ющим во мра́це ве́ка сего́, те́мже и нас, омраче́нных и уны́лых, просвети, во е́же из глубины́ серде́чныя зва́ти ти:

Ра́дуйся, ве́лие дерзнове́ние ко Го́споду обре́тшая;

ра́дуйся, Спа́са на́шего умилостиви́тельнице пресла́вная.

Ра́дуйся, мрак душ на́ших благода́тно я́ко свети́льник озаря́ющая;

ра́дуйся, любо́вь и ве́ру к тебе́ иму́щих от вся́ких бед спаса́ющая.

Ра́дуйся, в житии́ свое́м пра́вый путь земна́го тече́ния нам показу́ющая;

ра́дуйся, всех ко Христу́ Бо́гу путеводя́щая.

Ра́дуйся, житие́м свои́м Го́сподеви угоди́вшая;

ра́дуйся, све́том Христо́вым на Небеси́ осия́нная.

Ра́дуйся, я́ко изы́де по всей земли́ на́шей веща́ние о чудесе́х твои́х;

ра́дуйся, я́ко с ве́рою и благогове́нием почита́ется па́мять твоя́.

Ра́дуйся, Бо́жия снисхожде́ния к не́мощем на́шим всеизря́дная хода́таице;

ра́дуйся, за ны пред Го́сподем неусы́пная моли́твеннице.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 12

Благода́ть Бо́жию, проще́ние грехо́в и исправле́ние жития́ испроси́ нам у Го́спода Вседержи́теля, ма́ти Софи́е, да ми́лостив бу́дет к нам, немощны́м, смире́нно пою́щим Ему́, Спа́су на́шему: Аллилу́ия.

И́кос 12

Пою́ще многомо́щное предста́тельство твое́ к Бо́гу, ма́ти на́ша Софи́е, усе́рдно мо́лим тя: помина́й нас непреста́нно у Престо́ла Сла́вы Царя́ Небе́снаго, ублажа́ющих тя си́це:

Ра́дуйся, в со́нме святы́х просия́вшая;

ра́дуйся, и́стинная уго́днице Бо́жия.

Ра́дуйся, по́чести досто́йныя восприи́мшая;

ра́дуйся, проше́нием на́шим вне́млющая.

Ра́дуйся, блаже́нство ра́йское со все́ми святы́ми унасле́дившая;

ра́дуйся, на тве́рди небе́сней звездо́ присногоря́щая.

Ра́дуйся, украше́ние Це́ркве, на Небеси́ торжеству́ющия;

ра́дуйся, заступле́ние Це́ркве, на земли́ во́инствующия.

Ра́дуйся, ве́ры на́шея преди́вная побо́рнице;

ра́дуйся, чуде́с Христо́вых сокро́вище.

Ра́дуйся, от на́рода на́шего правосла́внаго велича́емая;

ра́дуйся, пе́сньми хвале́бными прославля́емая.

Ра́дуйся, пра́ведная Софи́е, свята́я моли́твеннице о душа́х на́ших.

Конда́к 13

О свята́я пра́ведная ма́ти на́ша Софи́е! Услы́ши ны́нешнее усе́рдное моле́ние на́ше и испроси́ нам у Го́спода и Спаси́теля на́шего избавле́ние от бед и скорбе́й, от враг ви́димых и невиди́мых, от поги́бели ве́чныя, гре́шником угото́ванныя, да милосе́рдием Христа́ Бо́га на́шего спаса́еми и твои́м предста́тельством поспешеству́еми, благоче́стно на земли́ поживе́м, и сподо́бимся вни́ти во Ца́рствие Его́ Небе́сное, иде́же благода́рственно со все́ми святы́ми воспое́м Бо́гу: Аллилу́ия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва

О свята́я пра́ведная ма́ти на́ша, блаже́нная княги́не Софи́е, приими́ ми́лостивно приноше́ние ве́ры, наде́жды и любве́ на́шея и вознеси́ е́ ко Го́споду, и я́коже в земне́м житии́ твое́м была́ еси́ помо́щница и засту́пница всем правосла́вным христиа́ном земли́ твоея́, та́ко и ны́не укрепи́ нас тве́рдо и непоколеби́мо до сме́рти стоя́ти за ве́ру правосла́вную, согре́й сердца́ на́ша любо́вию ко Го́споду и Пречи́стей Его́ Ма́тери. Умоли́ Христа́ Бо́га на́шего, да сохрани́т Це́рковь Свою́ Святу́ю от раско́лов и ересе́й, да утверди́т в ней дух пра́выя ве́ры и благоче́стия, дух ве́дения и любве́, дух ми́ра и ра́дости ве́чныя, да вся ча́да ея́ ду́хом и и́стиною покланя́ются Ему́, да укрепи́т ве́рных в благоче́стии и свя́тости жи́зни, да обрати́т отпа́дших от Правосла́вныя Це́ркве во свята́я не́дра ея́. О свята́я ма́ти, гра́да Слу́цка похвало́ и ра́досте, умоли́ Го́спода, да изба́вит град твой и всю страну́ на́шу от гла́да, тру́са, пото́па, огня́, меча́, наше́ствия иноплеме́нных, междоусо́бныя бра́ни и от смертоно́сныя я́звы, да низпо́слет прави́телем на́шим усе́рдие, му́дрость и ве́рность, да управля́ют и су́дят по во́ли Его́, да храня́т установле́ния Святы́я Це́ркве. Испроси́ всем с ве́рою моля́щимся тебе́ [или́:  притека́ющим к ра́це святы́х моще́й твои́х] ми́рное житие́, тишину́, просвеще́ние умо́в и серде́ц, соблюди́ их от ко́зней вра́жиих, от собла́знов ми́ра, во зле лежа́щаго, и от вся́кия ско́рби и ну́жды, обрати́ нас к покая́нию и исправле́нию, да́руй заблу́ждшим и́стины позна́ние, неду́гующим исцеле́ние. Сохрани́ нас благода́тными твои́ми моли́твами от всех враго́в ви́димых и неви́димых и изба́ви от вся́каго зла, да просла́вим во вся дни жи́зни на́шея Отца́, и Сы́на, и Свята́го Ду́ха, и твое́ заступле́ние во ве́ки веко́в. Ами́нь.