Акафист преподобным Иулиании и Евпраксии, основательницам Зачатиевския обители

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Избра́нныя неве́сты Христо́вы,/ преподо́бныя Иулиани́е и Евпракси́е,/ наста́вницы дев боголюби́вых/ и моли́твенницы усе́рдныя ко Го́споду,/ в ра́дости и ско́рби призыва́ем вы,/ да ва́шими моли́твами изба́вит нас Госпо́дь от вся́кия ну́жды и печа́ли вопию́щих:// Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

И́кос 1

А́нгельское житие́ яви́ли есте́, преподо́бныя Иулиани́е и Евпракси́е, ве́рная ча́да Ма́тере Бо́жия, прии́мшая Благове́стие измла́да на до́брую по́чву чи́стых серде́ц ва́ших и возрасти́вшая ве́лий плод смире́ния и кро́тости. Мы же зря́ще сие́, воспева́ем вам си́це:

Ра́дуйтеся, ве́рныя Христо́вы учени́цы;

ра́дуйтеся, Ца́рствия Бо́жия насле́дницы.

Ра́дуйтеся, кро́тости благогове́йное хране́ние;

ра́дуйтеся, смире́ния наста́вницы преди́вныя.

Ра́дуйтеся, благода́ть Свя́таго Ду́ха стяжа́вшия;

ра́дуйтеся, измла́да Христа́ возлюби́вшия.

Ра́дуйтеся, Ма́тере Бо́жия служи́тельницы ве́рныя;

ра́дуйтеся, чистоты́ А́нгельския подража́тельницы.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 2

Ви́дяще о́браз благоче́стия роди́телей ва́ших Фео́дора и Мари́и достосла́вных и я́же о Госпо́де по́двиги бра́та ва́шего митрополи́та Алекси́я, возжего́сте ре́вностию и любо́вию сердца́ ва́ша ко Сладча́йшему Христу́ Иису́су, и возжела́сте послужи́ти Ему́ в чи́не а́нгельстем, воспева́юще с Херуви́мы пе́снь: Аллилу́ия.

И́кос 2

Ра́зум ве́лий зело́ даде́ Госпо́дь тебе́, о ма́ти на́ша, преподо́бная Иулиани́е, и́мже устро́и пе́рвую оби́тель деви́чию во сла́внем гра́де Москве́, иде́же собра́шася ду́ши мно́ги во спасе́ние. Ны́не сла́вим тя, прему́драя наста́внице и засту́пнице на́ша, вку́пе с ве́рною сестро́ю твое́ю, возлю́бленною Евпракси́ею, зову́ще си́це:

Ра́дуйтеся, мироно́сицы Ру́сския земли́;

ра́дуйтеся, жен благочести́вых похвало́.

Ра́дуйтеся, Иису́са Сладча́йшаго возлюби́вшия;

ра́дуйтеся, ча́да Его́ блага́я и ве́рная.

Ра́дуйтеся, оби́тель деви́чию основа́вшия;

ра́дуйтеся, благоуха́ние духо́вное источа́ющия.

Ра́дуйтеся, сотаи́нницы дев боголюби́вых;

ра́дуйтеся, смиренному́дрия о́браз показа́вшия.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 3

Си́лою послуша́ния всеце́лаго обрела́ еси́ ты Ца́рствие Небе́сное в души́ свое́й чи́стей, о преблаже́нная ма́ти на́ша Евпракси́е. Прославля́ем твое́ смиренному́дрие и кро́тость преди́вную, я́ко сестра́ бе и дщи́ прему́дрыя игу́мении Иулиани́и, воспева́ющи с не́ю еди́ным се́рдцем и усты́ хвале́бную песнь: Аллилу́ия.

И́кос 3

Име́юще любо́вь и́стинную, преподо́бныя, яви́ли есте́ вы о́браз сострада́ния и милосе́рдия: взалка́ бо кто, и да́сте ему́ я́сти, возжада́, и напои́сте; стра́нен бысть, и введо́сте его́ под кров оби́тели своея́, ско́рбен се́рдцем бысть, и уте́шисте. Сего́ ра́ди, взира́юще на ве́лию ве́ру ва́шу, во умиле́нии вопие́м вам:

Ра́дуйтеся, два свети́ла Любве́ Боже́ственныя;

ра́дуйтеся, дел милосе́рдия исполни́тельницы.

Ра́дуйтеся, утеше́ние всем притека́ющим к вам;

ра́дуйтеся, ра́дости на́шея пода́тельницы пресла́вныя.

Ра́дуйтеся, де́вы благочести́выя, напита́вшия а́лчущих;

ра́дуйтеся, напоя́ющия словесы́  духо́вными жа́ждущих.

Ра́дуйтеся, го́рлицы боголюби́выя;

ра́дуйтеся, любо́вию согрева́ющия вся.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 4

Бу́рю смяте́ния наведе́ си́ла иноплеме́нная на зе́млю Ру́сскую, но не косну́ся душ ва́ших па́губное уны́ние. Я́ко купина́ дре́вле неопа́льна огне́м Боже́ственным горя́щи бысть ве́ра ва́ша в Промышле́ние Бо́жие о Святе́й Руси́, и огнь сомне́ния не сожже́ наде́жды в сердца́х ва́ших, благода́рно воспева́ющих за вся Бо́гу: Аллилу́ия.

И́кос 4

Слы́шавши глас святи́теля Бо́жия Алекси́я, благословля́ющий оби́тели первомоско́вския деви́чия основа́ние, возра́довася душа́ твоя́, о прему́драя наста́внице, ма́ти на́ша Иулиани́е, о Бо́зе Зижди́тели, без Него́же ничто́же бысть, е́же бысть. Та́кожде ми́лостию Его́ по моли́твам ва́шим, преподо́бныя, процвете́ я́ко крин се́льный, оби́тель свята́я Зача́тиевская во спасе́ние душ на́ших, те́мже дерза́ем взыва́ти вам си́це:

Ра́дуйтеся, Бо́га Отца́ возлюби́вшия;

ра́дуйтеся, Сы́на Его́ неве́сты пресла́вныя.

Ра́дуйтеся, оби́тель Ду́ха Свята́го в се́рдце устро́ившия;

ра́дуйтеся, Святу́ю Тро́ицу по́двигом свои́м просла́вившия.

Ра́дуйтеся, го́рлицы, любо́вию окриля́емыя;

ра́дуйтеся, ма́сличныя ве́тви Це́ркве Христо́вы.

Ра́дуйтеся, пре́лесть ми́ра сего́ презре́вшия;

ра́дуйтеся, ра́дости ра́йския преиспо́лненныя.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 5

Боготе́чною звездо́ю оби́тель свята́я Зача́тиевская для душ, жа́ждущих спасе́ния, светови́дною яви́ся, я́ко дарова́ Бог во оби́тели сей исто́чники воды́ теку́щия в живо́т ве́чный. Всяк бо пия́й от воды́ сея́ не вжа́ждется во ве́ки, но воспое́т благода́рным се́рдцем Бо́гу: Аллилу́ия.

И́кос 5

Ви́де еди́на от сесте́р в виде́нии со́ннем вы, преподо́бныя, спе́шно нося́щия во́ду ко хра́му. В тре́тий же день полу́дне случи́ся пожа́р на кро́ве о́наго. Егда́ же сестры́ прибего́ша к ра́кам ва́шим со слеза́ми, да помо́жете, а́бие угасе́ огнь горя́щ моли́тв ра́ди ва́ших. О преподо́бныя Иулиани́е и Евпракси́е, угаси́те и пла́мень страсте́й на́ших и наве́тов лука́ваго, да чи́стым се́рдцем воспева́ем вам сицева́я:

Ра́дуйтеся, моли́твенницы усе́рдныя ко Го́споду;

ра́дуйтеся, засту́пницы на́ша пред Бо́гом преди́вныя.

Ра́дуйтеся, те́рние страсте́й попаля́ющия;

ра́дуйтеся, возжига́ющия огнь любве́ ко Христу́.

Ра́дуйтеся, благоуха́ние кади́льное моли́твенное;

ра́дуйтеся, пода́тельницы сла́дости ра́йския.

Ра́дуйтеся, благода́тию озаря́ющия;

ра́дуйтеся, Све́та невече́рняго свети́льницы.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 6

Пропове́дницы ве́ры и благоче́стия преизря́дныя, преподо́бныя Иулиани́е и Евпракси́е, наста́вницы мона́шествующих и мирски́х покрови́тельницы пресла́вныя есте́. Бу́дите засту́пницы от духо́в зло́бы поднебе́сных всем с ве́рою и любо́вию притека́ющим к моли́твенному покро́ву ва́шему и вопию́щим Бо́гу: Аллилу́ия.

И́кос 6

Возсия́ неизрече́нный свет в собо́рней це́ркви Зача́тиевстей, егда́ ты, о ма́ти на́ша преподо́бная Иулиани́е, в виде́нии еди́ней от черни́ц яви́лася еси́, поправля́ющи лампа́ду у ико́ны Богоро́дицы «Всех скорбя́щих  Ра́досте». Ны́не же, взира́ющим нам на о́браз сей, ра́достию пасха́льною исполня́ются сердца́ на́ша, и печа́ль на ра́дость прелага́ется. Да у́зрим и мы, недосто́йнии, во Све́те непристу́пнем Го́спода Воскре́сшаго, зову́ще си́це:

Ра́дуйтеся, всем скорбя́щим ско́рыя уте́шительницы;

ра́дуйтеся, ра́дости духо́вныя пода́тельницы.

Ра́дуйтеся, ми́ра серде́чнаго укрепле́ние;

ра́дуйтеся, два сосу́да еле́я Бо́жия цели́тельнаго.

Ра́дуйтеся, возжига́ющия свети́льники ве́ры;

ра́дуйтеся, наде́жды путь освеща́ющия.

Ра́дуйтеся, весе́лие стяжа́вшия в ско́рбех;

ра́дуйтеся, любве́ и́стинныя пропове́дницы пла́менныя.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 7

Хотя́щи обрести́ ва́ша нетле́нныя мо́щи, благочести́вая игу́мения Доримедо́нта восхоте́ вскры́ти ме́сто подспу́дное. Оба́че егда́ лопа́та косну́ся кра́ю гробо́в ва́ших, преподо́бныя, а́бие нападе́ тряса́вица си́льна и неду́г мног на копа́ющаго. Зря́щии же вся сия́ в стра́се просла́виша Бо́га, воспева́юще Ему́: Аллилу́ия.

И́кос 7

Усе́рдныя подви́жницы Це́ркве Ру́сския яви́лися есте́, о преподо́бныя Иулиани́е и Евпракси́е: в труде́х бо неуста́нно подвиза́стеся, умерщвля́юще плоть свою́, сердца́ же непреста́нно иму́ще горе́, при ногу́ Иису́сову внима́юще словеси́ Его́ спаси́тельному. Та́кожде благу́ю ча́сть избра́сте, я́же не оты́мется от вас во ве́ки веко́в, те́мже вопие́м вам:

Ра́дуйтеся, небе́сныя засту́пницы земли́ Моско́вския;

ра́дуйтеся, созерца́вшия Сла́ву Боже́ственную.

Ра́дуйтеся, труды́ ра́ди Христа́ полага́вшия;

ра́дуйтеся, в ра́дость Го́спода вше́дшия.

Ра́дуйтеся, А́нгелов собесе́дницы;

ра́дуйтеся, святи́телю Алекси́ю сестры́ пресла́вныя.

Ра́дуйтеся, преподо́бных сора́дование;

ра́дуйтеся, всех святы́х украше́ние.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 8

Стра́нным и убо́гим прибе́жище и покро́в бысть оби́тель ва́ша, преподо́бныя; малоду́шным я́ко ка́мень тверд ве́ра ва́ша непрекло́нная яви́ся; уны́лым и смуще́нным се́рдцем я́ко свет со́лнечный возсия́ наде́жда ва́ша несумне́нная; любо́вию же преди́вною озаря́ете сердца́ пою́щих Бо́гу: Аллилу́ия.

И́кос 8

Правосла́внии лю́дие оте́чества на́шего воспева́ют ны́не песнь хвале́бную Бо́гу, благодаря́ще Его́ за ми́лость неизрече́нную. Во зна́мение ми́лости Своея́ дарова́ Госпо́дь оби́тели Зача́тиевстей о́браз Пречи́стыя Богоро́дицы Ми́лостивыя, показу́я си́м заступле́ние ва́ше, преподо́бныя. Мы же, вся́кое жите́йское попече́ние отложи́вше и собра́вшеся под покро́в ваш незри́мый моли́твенный, с любо́вию воспева́ем вам си́це:

Ра́дуйтеся, усе́рдныя за ны ко Го́споду хода́таицы;

ра́дуйтеся, Оби́тели ра́йския насле́дницы;

Ра́дуйтеся, умиле́нием сердца́ на́ша наполня́ющия;

ра́дуйтеся, исцеле́ние от Бо́га прося́щим подава́ющия.

Ра́дуйтеся, красоты́ неувяда́емыя кри́ни се́льнии;

ра́дуйтеся, добро́ты неизрече́нныя сокро́вища.

Ра́дуйтеся, о́браз Ми́лостивыя Влады́чицы во оби́тель прии́мшия;

ра́дуйтеся, Ея́же моли́твами ми́лости на нас излива́ющия.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 9

Вся́кая душа́ испо́лнися умиле́ния и ра́дования, взира́ющи на ико́ну ва́шу, преподо́бныя. Я́ко свеща́ горя́щи освеща́ет клеть темни́чную, та́ко любы́ ва́ша озаря́ет хра́мины душ, притека́ющих к вам с ве́рою, отбеже́ бо вся́кая скорбь и теснота́ от благода́рно воспева́ющих вку́пе с ва́ми: Аллилу́ия.

И́кос 9

Вети́и многоглаго́ливии не возмо́гут разуме́ти вся по́двиги и труды́ усе́рдныя ва́ша. Не сла́вы бо ра́ди тле́нныя от челове́к сия́ подъя́сте, но во иска́ние безсме́ртныя сла́вы Ве́чнаго Бо́га соверше́нныя. Сего́ ра́ди даде́ вам Оте́ц Сла́вы Ду́ха Прему́дрости и Открове́ния в позна́ние любве́ Его́ и ра́дости несконча́емыя. Мы же, таково́му смотре́нию Бо́жию о вас дивя́щеся, ве́рно вопие́м:

Ра́дуйтеся, благ земны́х отве́ргшияся;

ра́дуйтеся, еди́наго Бо́га иска́вшия и обре́тшия.

Ра́дуйтеся, Ца́рствия Бо́жия насле́дницы;

ра́дуйтеся, А́нгелов ди́вныя собесе́дницы.

Ра́дуйтеся, ра́йскую ра́дость стяжа́вшия;

ра́дуйтеся, ве́лию ми́лость от Бо́га прие́мшия.

Ра́дуйтеся, святы́х жен преди́вное украше́ние;

ра́дуйтеся, пресла́вное душ на́ших утеше́ние.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 10

Спасти́ся хотя́ще всем челове́ком, я́ко две сладкогла́сныя трубы́ сре́бряныя созыва́ли есте́ дев тружда́ющихся и обремене́нных под покро́в святы́я оби́тели Зача́тиевския, и вся притека́ющия обрето́ша поко́й о Христе́ Иису́се, взе́мше и́го Его́ благо́е и бре́мя ле́гкое, воспева́юще умиле́нную песнь: Аллилу́ия.

И́кос 10

Стена́ния и пла́ч мног приноси́вшия о земли́ Ру́сстей, и ны́не моли́теся, преподо́бныя, о нас многогре́шных и недосто́йных ча́дех ва́ших, да прости́т Госпо́дь вся прегреше́ния на́ша, и та́ко да изба́вимся от вся́кия ну́жды и печа́ли. Да сподо́бит нас Всеми́лостивый Влады́ка в ра́дости серде́чней воспева́ти вам сицева́я:

Ра́дуйтеся, све́тлыя пропове́дницы благонра́вия;

ра́дуйтеся, ди́вныя ко́рмчия в мо́ри жите́йстем.

Ра́дуйтеся, неве́сты чи́стыя Христа́ Иису́са Сладча́йшаго;

ра́дуйтеся, Ма́тере Бо́жия ча́да возлю́бленная.

Ра́дуйтеся, ве́лие утеше́ние нам да́рующия;

ра́дуйтеся, свети́льницы сла́внии Любве́ Боже́ственныя.

Ра́дуйтеся, Све́та и́стины храни́тельницы ве́рныя;

ра́дуйтеся, в ти́хую при́стань ду́ши приводя́щия.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 11

Пе́ние благода́рное прино́сят вам непло́дныя жены́, во оби́тель, ва́ми устро́енную, прише́дшия и моли́твами ва́шими непло́дства разреши́вшияся. Помози́те и нам, преблаже́нныя Иулиани́е и Евпракси́е, изба́витися от безпло́дных дел тьмы, да принесе́м досто́йныя плоды́ покая́ния и смире́ния, воспева́юще Бо́гу: Аллилу́ия.

И́кос 11

Светоприе́мную сокро́вищницу сотвори́ Госпо́дь Це́рковь Ру́сскую, вы бо, я́коже иногда́ две ле́пте вдови́ца ева́нгельская, все свое́ име́ние в ру́це Бо́жии преда́сте. Те́мже Госпо́дь, прии́м вас, я́ко же́ртву живу́ю многоце́нную, низпосла́ на вы́ благода́ть Ду́ха Всесвята́го. Вы же, преподо́бныя, простри́те щедро́ты своя́ на ны, из глубины́ души́ зову́щия:

Ра́дуйтеся, храни́тельницы ве́ры и́стинныя;

ра́дуйтеся, сокро́вища ра́дости нетле́нныя.

Ра́дуйтеся, зла́то смире́ния, в горни́ле очище́нное;

ра́дуйтеся, Све́том Христо́вым тьму просвеща́ющия.

Ра́дуйтеся, крило́ма моли́тв ва́ших ко Христу́ вознося́щияся;

ра́дуйтеся, му́дрости цве́ти благоуха́ющии.

Ра́дуйтеся, в сладкопе́нии Боже́ственнем пребыва́вшия;

ра́дуйтеся, сла́ву Бо́жию зре́ти сподо́бльшияся.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 12

Благода́ть стяжа́вше в душа́х ва́ших и получи́вше от Бо́га пять тала́нт, се, други́х пять обрето́сте и́ми и услы́шасте глас Госпо́день: в ма́ле бы́ли есте́ ве́рны, над мно́гими вы поста́влю. Ны́не у́бо внидо́сте в ра́дость Го́спода Бо́га своего́, воспева́юще во оби́телех ра́йских Ему́: Аллилу́ия.

И́кос 12

Пою́ще песнь побе́дную, просла́вляем Вели́каго Бо́га, ди́внаго во святы́х Свои́х. Несть бо раб, ни свобо́дь о Христе́ Иису́се, не́сть ни му́жеский пол, ни же́нский: оба́че вси суть еди́ни о Го́споде на́шем. Вы же, я́ко ве́рныя а́гницы непоро́чныя пребыва́ете со А́нгелы на Небесе́х, ра́дующеся с ни́ми ра́достию неизрече́нною несконча́емою, сего́ ра́ди вопие́м вам:

Ра́дуйтеся, житие́ яви́вшия ангелоподо́бное;

ра́дуйтеся, душ на́ших предста́тельство ве́рное.

Ра́дуйтеся, дще́ри возлю́бленныя Царя́ Небе́снаго;

ра́дуйтеся, Ма́тере Бо́жия други́ни сла́вныя.

Ра́дуйтеся, ра́дость нам принося́щия;

ра́дуйтеся, ду́ши любо́вию окриля́ющия.

Ра́дуйтеся, утеше́ние серде́ц преди́вное;

ра́дуйтеся, ума́ просветле́ние сла́вное.

Ра́дуйтеся, преподо́бныя Иулиани́е и Евпракси́е, благоче́стия наста́вницы богому́дрыя.

Конда́к 13

О преподо́бныя Иулиани́е и Евпракси́е, наста́вницы дев боголюби́вых и всем притека́ющим к вам утеше́ние пресла́вное! Ны́нешнее ма́лое моле́ние на́ше прии́мше, при́зрите ми́лостивно на нас, многогре́шных и недосто́йных чад ва́ших. Умоли́те Премилосе́рдаго Го́спода, да изба́вит нас от враг ви́димых и неви́димых и да сподо́бит нас насле́дники бы́ти Оби́тели ве́чныя, да вы́ну зове́м Ему́ благода́рным се́рдцем: Аллилу́ия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва

О преподо́бныя Иулиани́е и Евпракси́е, подви́жницы Христо́вы, и́нокинь моско́вских наста́вницы и всех прибега́ющих к вам ско́рые помо́щницы! Вы от ю́ности Бо́га возлюби́вшя, и́ноческаго жития́ возжела́ли есте́ и благослове́нием митрополи́та Алекси́я, свята́го бра́та ва́шего, оби́тель деви́чию устро́или есте́. В не́йже, усе́рдно потруди́вшяся, моли́твою, посто́м и бде́нием сердца́ очи́стили есте́ и о́браз благонра́внаго жития́ показа́ли есте́.

Те́мже, я́ко име́ющя дерзнове́ние ко Всеми́лостивому Спа́су, не оста́вите ме́ста сего́ свята́го, и и́нокинь, ча́ющих ва́шея по́мощи и заступле́ния. Сохрани́те град Москву́ от вся́ких бед и напа́стей, междоусо́бныя бра́ни и наше́ствия иноплеме́нников. Нам же, почита́ющим вас любо́вию, да́руйте мир и единомы́слие, да, ва́шыми моли́твами соблюда́еми и сохраня́еми, испове́дуем Святу́ю Тро́ицу, Отца́ и Сы́на и Свята́го Ду́ха. Ами́нь.