Шрифт

Акафисты святым

Акафист мученице Валентине (Алевтине) Кесарийской

мученице Валентине (Алевтине) Кесарийской

Память: 23 февраля

Тропарь мученице Валентине, глас 4

Агница Твоя, Иисусе, Валентина, зовет велиим гласом: Тебе, Женише мой, люблю, и, Тебе ищущи, страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою. Но, яко жертву непорочну, приими мя, с любовию пожершуюся Тебе. Тоя молитвами, яко милостив, спаси души наша.

Кондак мученице Валентине, глас 2

Храм твой всечестный, яко цельбу душевную обретше, вси вернии велегласно вопием ти: дево мученице Валентино, великоименитая, Христа Бога моли непрестанно о всех нас.

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранная Господом для свидетельства истинныя веры, мужественно поправшая языческое нечестие и за своя страдания нетленным венцем от Жениха Христа увенчанная, святая мученице Валентино, ныне ублажаем святую память твою. Ты же, яко имущая дерзновение ко Господу, молися за ны, прославляющих тя и с верою вопиющих:

Радуйся, святая мученице Валентино, силу любви своея к Богу явившая.

Икос 1

Ангельскую чистоту в земном житии своем непорочно сохранила еси, святая мученице Валентино, ныне же в чертозе Жениха Твоего со Ангелы вкупе воспеваеши Богу Трисвятую песнь на небеси. Мы же, чистоту жития твоего девственнаго прославляюще, хвалебное пение приносим ти сице:

Радуйся, нескверная и чистая дево.

Радуйся, Господу верность сохраньшая.

Радуйся, Его паче всего возлюбившая.

Радуйся, во благочестии пожившая.

Радуйся, тем Христу угодившая.

Радуйся, в страсе Божием пребывшая.

Радуйся, мир суетный победившая.

Радуйся, мучением своим веру во Христа засвидетельствовавшая.

Радуйся, жизнь вечную унаследовавшая.

Радуйся, в рай Божий всельшаяся.

Радуйся, венцем нетленным увенчанная.

Радуйся, в Царствие Небесное вшедшая.

Радуйся, святая мученице Валентино, силу любви своея к Богу явившая.

Кондак 2

Видя Господь душу твою силою дивною исполнену, яви тя, достохвальная Валентино, адаманта твердейшу, да мужественно исповедаеши веру истинную во Христа Иисуса вкупе со святыми девами Еннафою и Павлою, воспевая Ему: Аллилуиа.

Икос 2

Разумом своим, просвещенным от Бога, познала еси, святая мученице Валентино, яко идоли не можаху спасти души твоея. Егда же наста час испытания твоего, предана была еси на судище неверных, идеже правитель Фирмилиан в непочитании языческих богов обвини тя. Ты же, приведенная в языческий храм для поклонения идолом, отвергше тыя, камень дерзостно в жертвенник идольский вергла еси, воскликнувши: "Токмо Христос спасе душу мою!" Темже, прославляя велию веру твою, вопием:

Радуйся, славная дщерь Кесарии.

Радуйся, подвигом своим земное отечество твое прославльшая.

Радуйся, за Христа мужественно пострадавшая.

Радуйся, благодатию Его хранимая.

Радуйся, помощию Божиею врага посрамившая.

Радуйся, в руце Божии душу свою предавшая.

Радуйся, кровь свою пролиявшая на земли.

Радуйся, Сыном Божиим прославлена на небеси.

Радуйся, яко с девами в лице святых пребываеши.

Радуйся, яко с ними Христа вечно восхваляеши.

Радуйся, благами нетленными наслаждающаяся.

Радуйся, ихже наследниками быти и нам ходатайствующая.

Радуйся, святая мученице Валентино, силу любви своея к Богу явившая.

Кондак 3

Сила Вышняго даде тебе, дивная мученице, укрепление на тяжкия страдания телесе твоего, да не убоишися лютаго прещения. Ты же на мучения, якоже на брачный пир, с радостию потекла еси, да возможеши Царствие Небесное наследовати и благодарственно пети со Ангелы: Аллилуиа.

Икос 3

Имущи крепкую надежду токмо на Единаго Бога, агнице Христова Валентино, не повинулася еси велению мучителя воздати жертву идолом мерзким и не убоялася еси грядущих мучений. Темже, удивляяся силе духа твоего, в немощнем телеси твоем пребывающей, умиленно поем ти:

Радуйся, мучения велия претерпевшая.

Радуйся, Христу верность сохраньшая.

Радуйся, Его ради много пострадавшая.

Радуйся, венец мученический от Него радостно приявшая на небеси.

Радуйся, Христа всем сердцем возлюбившая.

Радуйся, жизни своея Его ради не пощадившая.

Радуйся, Ангелом Божиим дивно хранимая.

Радуйся, Господом присно любимая.

Радуйся, юность свою Христу посвятившая.

Радуйся, кровь свою за Него излиявшая.

Радуйся, во Царствии Его вечно пребывающая.

Радуйся, во обителях Небесных о нас молящаяся.

Радуйся, святая мученице Валентино, силу любви своея к Богу явившая.

Кондак 4

Буря ярости и гнева мучителя твоего не возможе поколебати храма души твоея, страстотерпице Христова, основан бо бе на твердом веры Христовы камени. Темже и в лютых страданиях, Господом укрепляема, ты веру несумненну соблюла еси, воспевая победительную песнь: Аллилуиа.

Икос 4

Слышав жестокий мучитель твой, чудная мученице Валентино, яко Господа Иисуса воспеваеши верно, якоже лютый змий устремися на кроткую душу твою, лестию сладкою надеяся уловити тя в сети своя, но ничтоже успев, разгневася зело и предаде тя на лютыя страдания. Мы же, тебе состраждущи, со слезами глаголем:

Радуйся, силою Христовою укрепленная.

Радуйся, сего ради мучителем не одоленная.

Радуйся, огнь мучений претерпевшая.

Радуйся, к Богу любовию горевшая.

Радуйся, сладость любви тоя познавшая.

Радуйся, любве ради Христовы подвиг страдальческий совершившая.

Радуйся, люто по ребрам биенная.

Радуйся, мучителей терпением своим удивившая.

Радуйся, подражательнице Христовых страстей бывшая.

Радуйся, с Ним во веки на небесех пребывающая.

Радуйся, образ любве и мужества в себе показавшая.

Радуйся, о горнем помышляти нас научающая.

Радуйся, святая мученице Валентино, силу любви своея к Богу явившая.

Кондак 5

Боготечною звездою явилася еси, приснопамятная мученице, егда светом веры Христовы многия просветила еси. О, чудная дево святая, ты на небеси душею своею сияеши у престола Божия, молися о нас, да сияет свет истинныя веры и в наших смиренных сердцах, поющих Творцу света песнь: Аллилуиа.

Икос 5

Видевши нечестивый мучитель велию веру твою, мученице Христова Валентино, ничимже колеблему, предаде тя на страдания, ихже ты мужественно претерпевши, душу твою радостно в руце Господа твоего предала еси. Мы же, воспоминая славную победу твою над врагом рода человеческаго, вопием ти сице:

Радуйся, веру во Христа до конца сохранившая.

Радуйся, райскую сладость вкусившая.

Радуйся, к лику святых дев сопричтенная.

Радуйся, славою велиею на небеси почтенная.

Радуйся, к Царствию Небесному путем тесным шествовавшая.

Радуйся, в радость Господа твоего радостно вшедшая.

Радуйся, образ терпения нам показующая.

Радуйся, любящим Бога во всем пособствующая.

Радуйся, славити Его всегда нас научающая.

Радуйся, помыслы благия во умы наша влагающая.

Радуйся, мир сей и вся его прелести презревшая.

Радуйся, и нас отвергати вся мирская и скоропреходящая призывающая.

Радуйся, святая мученице Валентино, силу любви своея к Богу явившая.

Кондак 6

Проповедует весь мир христианский славныя подвиги твоя, добропобедная Валентино, имиже прославила еси Христа Бога нашего, Емуже воспеваеши ныне в неизреченней славе песнь хвалебную: Аллилуиа.

Икос 6

Воссияла еси велиею ревностию по Бозе Вседержители, мученице Христова Валентино, сего ради вся угрозы и прещения ни во чтоже вменила еси и на мечное усечение вкупе со святою девою Еннафою, радостно шедши, всем сердцем Господа благодарила еси, яко сподоби тя мученический венец прияти. Темже, взирающе на велию крепость души твоея, с любовию глаголем ти сице:

Радуйся, Богу во всем угодившая.

Радуйся, свято и непорочно пред Ним ходившая.

Радуйся, Духом Святым наставленная.

Радуйся, светом Христовым просвещенная.

Радуйся, идолы во уметы вменившая.

Радуйся, боги языческия поправшая.

Радуйся, тобою бо идолопоклонницы посрамишася.

Радуйся, тобою бо Единому Господу покланятися научишася.

Радуйся, яко мучений и лютыя смерти не убоялася еси.

Радуйся, яко чрез мечное усечение с Господом сочеталася еси.

Радуйся, жити во благочестии нас наставляеши.

Радуйся, в истинней вере нас укрепляеши.

Радуйся, святая мученице Валентино, силу любви своея к Богу явившая.

Кондак 7

Хотя Владыка и Господь Славы явити вас, святыя мученицы Валентино, Еннафо и Павло, яко светильницы, во тьме светящия и светом Христовым всех просвещающия, призва вас на подвиг страдальческий, да видящии мужество ваше и твердую веру вашу покаются в своих заблуждениих и вкупе со избранными да вопиют: Аллилуиа.

Икос 7

Новаго чуда быша свидетелие людие града Кесарийскаго, видяще святыя мученицы мужественно вся страдания за Христа переносящия. Сего ради, увидевши велию веру их, многия увероваша в Господа, восклицая: "Велик Бог христианский!" Мы же, рцем им похвалы сия:

Радуйтеся, святии страстотерпицы, многих ко Христу приведшии.

Радуйтеся, собою, яко звездами, небо церковное украсившии.

Радуйтеся, в лице святых сияющии.

Радуйтеся, Бога за нас непрестанно умоляющии.

Радуйтеся, исповедников имени Иисусова велелепая славо.

Радуйтеся, служителей Христовых украшение пресветлое.

Радуйтеся, трие святии мученицы, Троицу Божественную страданьми своими прославльшии.

Радуйтеся, и нас покланятися в триех лицех Единому Богу научающии.

Радуйся, многострадальная Еннафо, строгание телесе твоего мужественно терпевшая.

Радуйся, главу свою за главу Церкви Христа радостно под меч преклоньшая.

Радуйся, непобедимая мученице Павло, мучения за истину претерпевшая.

Радуйся, страдании своими в радостный чертог Небесный вшедшая.

Радуйся, святая мученице Валентино, силу любви своея к Богу явившая.

Кондак 8

Странно и страшно бысть страдание твое за Христа людем не ведущим Бога, присноблаженная Валентино. Ты же, с радостию прияла еси мучения за Сладчайшаго Жениха своего, и кровию неповинною душу свою убелив, хвалу воспевала еси Творцу: Аллилуиа.

Икос 8

Вся суетныя прелести и радости мира сего призрела еси, святая мученице Валентино, и всем сердцем Господа возлюбивши, жертву спасительную Ему принесла еси. Сего ради и мзду велию на небеси стяжала еси, яже нетленна пребыва во веки. Мы же, с любовию тебе воспеваем:

Радуйся, вся до конца претерпевшая.

Радуйся, течение добре скончавшая.

Радуйся, душу свою убелившая кровию мученическою.

Радуйся, Пасху вечную на небеси вкушающая.

Радуйся, Хлебом небесным питающаяся.

Радуйся, питием нетленным на небеси напояешися.

Радуйся, милость от Бога всем верным приносящая.

Радуйся, прощения грехов наших у Бога просящая.

Радуйся, усердней молитве научающая.

Радуйся, нашим прошениям скоро внимающая.

Радуйся, от горьких мучений нас избавляющая.

Радуйся, о нашем спасении пред Господом ходатайствующая.

Радуйся, святая мученице Валентино, силу любви своея к Богу явившая.

Кондак 9

Все естество ангельское возрадовася зело, видя тя, святая мученице Валентино, истинным Богом Христа исповедавшую и мужественно вся козни вражия победившую. Ныне же в чертозех Небесных купно со Ангелы и всеми святыми веселишися, поя: Аллилуиа.

Икос 9

Ветийство человеческое не возможе по достоянию восхвалити тя, всеблаженная Валентино, за вся страдания твоя, яже претерпела еси за возлюбленнаго тобою Христа. Темже, ублажая мученическую кончину твою, поем со умилением сие:

Радуйся, Ангелов терпением удивившая.

Радуйся, чистотою души твоея вся небеса возвеселившая.

Радуйся, ликом святых радостно приятая.

Радуйся, со всеми святыми Престолу Славы Божией предстоящая.

Радуйся, молитвеннице наша усердная.

Радуйся, ходатаице наша присная.

Радуйся, яко от клеветы нас избавляеши.

Радуйся, яко от козней вражиих нас защищаеши.

Радуйся, ко блаженству вечному нас руководящая.

Радуйся, к небеси путь нам указующая.

Радуйся, сердец наших услаждение.

Радуйся, в истинней вере укрепление.

Радуйся, святая мученице Валентино, силу любви своея к Богу явившая.

Кондак 10

Спасения и вечнаго покоя достигла еси, страстотерпице святая Валентино, претерпела бо еси многия скорби и мучения в земном житии твоем. Научи же и ны, грешныя, шествовати правым путем, ведущим в жизнь вечную, да купно с тобою и всеми святыми воспеваем Создателю нашему: Аллилуиа.

Икос 10

Стена еси и надежное прибежище, мученице Христова Валентино, всем жаждущим спасения, о нихже в молитве пред Богом ходатайствуеши. Темже и нам, с любовию к тебе припадающим, буди покров и ограждение непреоборимое от враг видимых и невидимых, да тобою водимии внидем в радость Господа нашего и веселящеся о Бозе, воспоем ти радостно:

Радуйся, помощнице наша преблагая.

Радуйся, заступнице наша крепкая.

Радуйся, мучеников красото.

Радуйся, крепкое христиан прибежище.

Радуйся, Бога любити всем сердцем нас научающая.

Радуйся, прощати обиды нас наставляющая.

Радуйся, свете небесный во мраце жития сего светящий.

Радуйся, огнь любве к Богу и ближним, присно горящий.

Радуйся, зрением славы Божия присно утешающаяся.

Радуйся, видением Лица Его присно услаждающаяся.

Радуйся, тайны Божия созерцающая.

Радуйся, со Ангелы Господа присно прославляющая.

Радуйся, святая мученице Валентино, силу любви своея к Богу явившая.

Кондак 11

Пение умиленное приносим ти, достославная Валентино, да соединиши его с пением Ангельским на небеси, и воспевая зде страдания твоя, сподобимся молитвами твоими непрестанно славити Бога со святыми вкупе, поюще: Аллилуиа.

Икос 11

Светоприемную свещу зрим тя, святая мученице Валентино, светом веры Христовы озаряющую всех приходящих к тебе и твоея святыя помощи просящим. Не отрини убо молений наших, но принеси их пред престолом благости Господней, да поем ти со умилением:

Радуйся, упование наше непостыдное.

Радуйся, утешение наше присное.

Радуйся, скорая наша помощнице.

Радуйся, всем нам добрая наставнице.

Радуйся, телес наших здравие.

Радуйся, душ наших спасение.

Радуйся, яко молитвами твоими от бед избавляемся.

Радуйся, яко ходатайствы твоими милости Божия сподобляемся.

Радуйся, свеще, путь во тьме освещающая.

Радуйся, молитвеннице наша, нас защищающая.

Радуйся, на небеси в сонме святых пребывающая.

Радуйся, с мученики тамо ликующая.

Радуйся, святая мученице Валентино, силу любви своея к Богу явившая.

Кондак 12

Благодать свыше испроси нам, всеславная дево Валентино, прилежно молящимся тебе, и прощение всех согрешений наших. Не престай помогати нам, немощным, славящим тя и вопиющим о тебе Богу: Аллилуиа.

Икос 12

Поюще страдания твоя, мученице Христова Валентино, удивляемся мужеству твоему и терпению и, восхваляя Господа, даровавшаго нам толикую теплую молитвенницу, вопием ти:

Радуйся, моления и прошения наша приемлющая.

Радуйся, за ны пред Престолом Божиим молящаяся.

Радуйся, у Бога милости нам непрестанно просящая.

Радуйся, от нечаянных бед и зол непреложное наше избавление.

Радуйся, от бед и напастей тихое прибежище.

Радуйся, уз греховных скорая решительнице.

Радуйся, болезнующих безмездная целебнице.

Радуйся, от клеветы нас избавляющая.

Радуйся, от навета злых человек нас сохраняющая.

Радуйся, Ангелов чудное веселие.

Радуйся, мучеников красото.

Радуйся, крепкое христиан упование.

Радуйся, святая мученице Валентино, силу любви своея к Богу явившая.

Кондак 13

О всеславная и великоименитая мученице Христова Валентино, девства и чистоты хранительнице. Приими от недостойных раб твоих сие малое моление, с любовию тебе приносимое, и испроси у Христа Бога даровати нам чистоту душевную и телесную, да тако возможем внити в Царстие Небесное и купно с тобою сподобимся воспевати хвалу Богу: Аллилуиа.

Сей Кондак читается трижды, затем Икос 1 и Кондак 1.

Молитва мученице Валентине

О, многострадальная и премудрая мученице Христова Валентино! Ныне почитающе святую память твою, к тебе мы, грешнии и недостойнии, усердно прибегаем и во умилении сердец наших молимся. Ты паче всех благ земных Сладчайшаго Господа Иисуса Христа возлюбила еси и Тому чрез все житие верно последовала еси, Божественною благодатию душу свою питающи. Испроси убо и нам благодать просвещающую нас, да ею осеняеми, в вере и благочестии, в подвизех целомудрия и любви преуспевати будем и Христу в ближних Его служити неленостно потщимся. Моли убо Спаса нашего да сподобит и нас странствие наше земное непреткновенно совершити, и в мире и покаянии житие наше скончати, да тако на земли поживше, вечныя и блаженныя жизни на небеси сподобимся и тамо с тобою и со всеми святыми вкупе восхвалим Троицу Единосущную и Нераздельную, и воспоем Едино Божество, Отца и Сына и Святаго Духа во веки веков. Аминь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (которому читался акафист) и всех святы́х, спаси́ и помилуй мя, гре́шнаго, яко Благ и Человеколюбец.

мученице Валентине (Алевтине) Кесарийской