Шрифт

Акафисты святым

Акафист святому преподобному Симеону Мироточивому, царю Сербскому

Конда́к 1.

Избра́нный воево́до и царю́ Се́рбския земли́, ле́ствице све́тлая ве́ры правосла́вныя, преподо́бне Симео́не, наро́да се́рбскаго засту́пниче и святы́х хра́мов зижди́телю, святы́я Ла́вры преди́вный устрои́телю и смире́нный и́ноков наста́вниче, приими́ моле́ния правосла́вных ча́д твои́х, соблюди́, о́тче на́ш, от ересе́й ве́ру и́стинную, держа́ву и наро́д на́ш от губи́телей сохрани́, ве́рное ста́до твое́ от лю́тых волко́в огради́ и свяще́нныя догма́ты церко́вныя защити́. Приими́ на́ша пе́ния и похвалы́, я́же смире́нно прино́сим ти́, и моле́ний на́с, гре́шных, не пре́зри, из глубины́ серде́чныя вопию́щия:

Ра́дуйся, преподо́бне о́тче Симео́не Мироточи́вый, вели́кий чудотво́рче.

И́кос 1.

А́нгелов Творе́ц и всея́ тва́ри Соде́тель избра́ тя́ от чре́ва ма́тере твоея́, о́тче Симео́не, да послу́жиши Ему́ во вся́ дни́ живота́ твоего́ и да прославля́еши доброде́тельми свои́ми Пресвяту́ю Тро́ицу во ве́ки веко́в. Све́тло сия́ет со́лнце твоего́ и́ноческаго жи́тельства, преподо́бне Симео́не. Ты́ предпоче́л еси́ земны́м уте́хам бла́га Небе́сная, избра́в сокро́вища некра́домая и нетле́нная, вене́ц ца́рства земна́го ни во что́ же вмени́л еси́, презре́в людски́я по́чести, держа́ву свою́ сы́ну своему́ Стефа́ну вве́рил еси́ и повеле́л ему́ пра́вити му́дре. Ны́не восхваля́юще благоче́стие твое́, богому́дре, вопие́м ти́ похва́льная:

Ра́дуйся, царю́ Се́рбския земли́, Кре́ст Христо́в возлюби́вый.

Ра́дуйся, свяще́нныя Студе́ницы све́те незаходи́мый.

Ра́дуйся, побо́рниче святы́я ве́ры правосла́вныя.

Ра́дуйся, блаже́нный храмозда́телю и ревни́телю красоты́ церко́вныя.

Ра́дуйся, богонра́вное и́ноческое житие́ возлюби́л еси́.

Ра́дуйся, богуми́льское нече́стие истреби́л еси́.

Ра́дуйся, лозо́ Се́рбския Це́ркви многопло́дная.

Ра́дуйся, Бо́жия Ма́тери сосу́де избра́нный.

Ра́дуйся, ми́лости духо́вныя исто́чниче преизоби́льный.

Ра́дуйся, раздая́телю благода́ти Христо́вой ще́дрый.

Ра́дуйся, мона́шескаго воздержа́ния учи́телю преди́вный.

Ра́дуйся, апо́стольскаго преда́ния храни́телю ве́рный.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 2.

Ви́дяще мирски́я сла́вы тле́н и быстроте́чность, преподо́бне Симео́не, о́тче на́ш, ми́р и вся́, я́же драга́я в не́м, презре́л еси́, ми́лостыни преоби́льный раздая́тель яви́лся еси́ и оби́телей Бо́жиих украси́тель бы́л еси́, я́ко звезда́ светоно́сная в Земле́ Се́рбския возсия́вши. Ца́рский вене́ц и сла́ву возненави́дел еси́, блаже́нне Симео́не, мона́шескаго чи́на взыску́я, ми́р оста́вил еси́, и оби́тель све́тлую устро́ив, Богоро́дице ту́ю посвяти́л еси́, исполня́я обе́т свяще́нный, постриже́ние прия́л еси́, па́мять сме́ртную блюдя́, ло́жем гро́б себе́ избра́л еси́, о́тче богому́дре. Кре́ст Христо́в на ра́мена возложи́в, вопие́ши непреста́нно Го́сподеви: Аллилу́ия.

И́кос 2.

Научи́л еси́ боголюби́вую па́ству твою́, преподо́бне о́тче Симео́не, ка́ко е́сть пра́во ве́ровати во Святу́ю Тро́ицу и храни́ти святы́е догма́ты, да вси́ еди́ными уста́ми воспое́м Еди́ному Бо́гу во Святе́й Тро́ице, Отцу́ и Сы́ну, и Свято́му Ду́ху. Мы́ же, ча́да твоя́, сла́вим ве́рно И́стиннаго Бо́га, Пресвяту́ю Тро́ицу, Е́юже ты́ просла́влен и дарова́н на́м еси́ я́ко засту́пник и хода́тай за грехи́ на́ша, и моли́твенник Го́сподеви во ве́ки. Приими́ недосто́йная моле́ния на́ша, приими́ смире́нная песнопе́ния на́ша, я́же со стра́хом и любо́вию прино́сим ти́, воспева́я си́це:

Ра́дуйся, богому́дре о́тче Симео́не.

Ра́дуйся, ревни́телю ве́ры правосла́вныя.

Ра́дуйся, христолюби́вый власти́тель держа́вы своея́.

Ра́дуйся, вла́стный прогони́телю е́реси скве́рныя.

Ра́дуйся, Симео́не, благода́ти Ду́ха Бо́жия испо́лненный.

Ра́дуйся, рабо́тниче на ни́ве Христо́вой неутоми́мый.

Ра́дуйся, подви́жниче Студе́ницкой Ла́вры неусыпа́емый.

Ра́дуйся, пло́д ми́лостыни оби́льно Го́сподеви принесы́й.

Ра́дуйся, похвалу́ Небе́сную стяжа́вый.

Ра́дуйся, оби́тели святы́я и хра́мы воздви́гнувый.

Ра́дуйся, Святы́я горы́ тве́рдый храни́телю.

Ра́дуйся, вели́кия Хиланда́рския Ла́вры покрови́телю.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 3.

Си́ла Вы́шняго осени́ тя́, о́тче Симео́не, егда́ возгоре́ся пла́мень алка́ния живота́ ве́чнаго в се́рдце твое́м. Умножа́я по́двиги и труды́ своя́, всеце́ло преда́л еси́ ду́шу свою́ Защи́тнику Еди́ному, Бо́гу Живо́му и Кре́пкому и я́ко еле́нь возжажда́в духо́внаго пития́, ко Христу́ устреми́лся еси́. Ста́рче Симео́не любе́зному сы́ну-ста́рцу посла́ние отпра́вил еси́, да восхва́лят ку́пно Го́спода за вся́ ми́лости Его́. Я́ко звезда́ огнезра́чная возсия́л еси́, доброде́тели я́ко лучи́ све́та умно́жив, о́тче Симео́не, на го́ру Афо́нскую возше́л еси́, ду́шу сы́на твоего́ ра́дости исполня́я, хвале́ния те́плыя от него́ прия́л еси́. Мы́ же при́сно с тобо́ю и вели́ким сы́ном твои́м Са́ввою воспева́ем Бо́гу: Аллилу́ия.

И́кос 3.

Име́яше вои́стину по́мощь Бо́жию на вся́кое вре́мя, о́тче Симео́не, се́ бо на тебе́ оправди́шися обетова́ние псалмопе́вца-царя́, я́ко да́ст ти́ Госпо́дь по се́рдцу твоему́ и ве́сь сове́т тво́й испо́лнит. За́поведи Христо́вы па́че сла́вы возлюби́в, на вся́ком ме́сте жи́тельства твоего́ тоя́ испо́лнил еси́. От свята́го Са́ввы посла́ние получи́в, на го́ру Афо́н неме́дленно устреми́лся еси́, бу́дто гла́с Бо́жий услы́шавши. Лобза́нием ра́достным и слеза́ми све́тлыми ста́рец-сы́н ста́рца-отца́ сре́тил еси́ и еди́ными уста́ми и еди́ным се́рдцем о́ба воспе́ли хвалу́ Бо́гови и Пресвяте́й Богоро́дице. Те́мже и мы́ усе́рдно воспева́ем си́це:

Ра́дуйтеся, равноапо́стольнии отцы́, Симео́не и Са́вво.

Ра́дуйтеся, сла́внаго Хиланда́ра зижди́тели.

Ра́дуйтеся, се́рбскаго подви́жничества нача́льницы.

Ра́дуйтеся, Пресвяты́я Богоро́дицы служи́тели.

Ра́дуйтеся, носи́тели и́га Христо́ва ве́рнии.

Ра́дуйтеся, мно́жество оби́телей земли́ Се́рбския украси́телие.

Ра́дуйтеся, ве́рнии на́ши пред Бо́гом засту́пницы.

Ра́дуйтеся, кра́сное пусты́нное житие́ возлюби́вшии.

Ра́дуйтеся, уго́дницы Бо́жии, венцы́ небе́сныя стяжа́вшии.

Ра́дуйтеся, сироты́ и убо́гия ми́лующии.

Ра́дуйтеся, се́рбскаго и́ночества нача́льницы.

Ра́дуйтеся, се́рбскаго духове́нства свети́льницы.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Кондак 4

По отше́ствии твое́м, о́тче Симео́не, на Святу́ю го́ру, бу́рю ве́треннюю, нестрое́ния и ско́рби лю́тыя вра́г на́шего спасе́ния воздви́гл еси́ в держа́ве твое́й. Ду́х за́висти че́рныя сыно́м твои́м Ву́каном овладе́, и бра́та проти́в бра́та воздви́же, во е́же то́й непра́ведно вене́ц и держа́ву восхи́тит. Бра́нь междоусо́бную возмути́л еси́ Ву́кан и сму́ту крова́вую прине́сл еси́. Кто́ мо́жет исчести́ го́рькия сле́зы и вздо́хи тя́жкия твоя́, кто́ не подиви́тся терпе́нию и смире́нию твоему́ преподо́бне Симео́не. Ты́ бо моли́лся еси́ со слеза́ми Святе́й Засту́пнице го́ры Афо́нския, да изба́вит держа́ву твою́ и лю́ди твоя́ от вся́ких бе́д и напа́стей. Те́м же и мы́ о Пресвяте́й Де́ве с наде́ждой вопие́м Бо́гу: Аллилу́ия.

И́кос 4.

Егда́ мона́си Святы́я го́ры Афо́нския услы́шаша, царю́ Се́рбския земли́, о прибы́тии твое́м в оби́тель Ватопе́дскую, и не узре́ша ни венца́ ца́рскаго, ни би́сера многоце́ннаго, но то́кмо оде́жды и́ноческия убо́гия и све́тлый ли́к тво́й, зело́ удиви́шася. О́браз смире́ния и кро́тости яви́л еси́ и́м, ста́рче святы́й, испроси́вши благослове́ния и духо́вныя по́мощи, я́ко испо́лнил еси́ заве́т Христо́в, я́же смири́вый себе́ возвы́сится. Святы́й Са́вва, сы́н тво́й, возвесели́лся ду́хом и возра́довался зело́, я́ко мо́жеши ему́ помощи́. Мы́ же, ве́рная ча́да твоя́, прославля́юще просла́вльшаго тя́ Го́спода, с наде́ждою и любо́вию серде́чно вопие́м ти́:

Ра́дуйся, свети́льниче мона́шества се́рбскаго.

Ра́дуйся, Се́рбии Небе́сныя зижди́телю.

Ра́дуйся, во́ине духо́вный, бесо́вския стра́сти победи́вый.

Ра́дуйся, засту́пниче на́ш пред Го́сподом неутоми́мый.

Ра́дуйся, пра́вило жития́ и́ноческаго крестоно́снаго.

Ра́дуйся, храни́телю ве́ры правосла́вныя.

Ра́дуйся, мечу́, богуми́льскую е́ресь посека́ющий.

Ра́дуйся, сосу́де благода́ти Христо́вой и́стинный.

Ра́дуйся, царю́, оби́тели мно́гия украси́вый.

Ра́дуйся, о́тче, во искуше́ниях тя́жких ве́ру сохрани́вый.

Ра́дуйся, святу́ю ти́хость Христо́ву стяжа́вый.

Ра́дуйся, смире́ние па́че сла́вы возлюби́вый.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 5.

Богодарова́нне о́тче Симео́не, ты́ еси́ звездо́, ве́рою и доброде́тельми све́тло просия́вшая, ты́ еси́ свети́льник ве́лий, в пучи́не морсте́й су́щим яви́выйся, научи́ на́с и ны́не заве́ты и́ночестии пра́ведно соблюсти́ и благода́ть Свята́го Ду́ха стяжа́ти на́м помози́, да отве́рзутся на́ши о́чи духо́внии и у́зрим я́сно се́ти де́монстии. Моли́ся за ны́ ко Го́споду, преподо́бне, да возрасте́м в благоче́стии и чистоте́, я́же Ца́рствия Небе́снаго приобщи́мся и разу́мно Пресвяте́й Тро́ице еди́ными уста́ми воспои́м: Аллилу́ия.

И́кос 5.

Удивля́хуся ти́ кня́зи Царя́-гра́да ка́ко мирску́ю сла́ву и по́чести презре́л еси́, ка́ко вене́ц ца́рский и держа́ву Се́рбскую оста́вил еси́ и, на го́ру святу́ю возше́д, кре́ст жи́тельства и́ноческаго на ра́мена возложи́л еси́. Духо́вныя о́чи к не́бу вознесо́х, в покая́ние погрузи́лся еси́, ко Христу́ моля́ся неуста́нно. Вси́ святи́и оби́тели Афо́нстии со смире́нием и любо́вию посети́л еси́, о́тче Симео́не, ста́рец-сы́н ста́рцу-отцу́ в де́ле се́м благо́м с ра́достию споспешествова́л еси́. Те́мже вопие́м ти́, преподо́бне, приими́ моле́ния на́ша и похвалы́ на́ша не пре́зри, я́же воспева́ем ти́ такова́я:

Ра́дуйся, о́тче Симео́не, во́лею Го́споду после́довавый.

Ра́дуйся, ку́пно с сы́ном-ста́рцем Са́ввою в Каре́ю прише́дый.

Ра́дуйся, святи́и оби́тели бога́тно уще́дривый.

Ра́дуйся, Пресвяте́й Богоро́дице во Иверо́не поклони́выйся.

Ра́дуйся, царю́ пра́ведный, ми́лостивно Го́сподом услы́шанный.

Ра́дуйся, доброде́тельми свои́ми на горе́ Святе́й Афо́нстей просия́вший.

Ра́дуйся, благи́й пало́мниче, все́х Афо́нских святы́х отце́в почты́й.

Ра́дуйся, Вели́кую Ла́вру Афана́сия красно́ одари́вый.

Ра́дуйся, блаже́нне о́тче, я́ко и́мя твое́ написа́ся в Кни́ге Живота́.

Ра́дуйся, я́ко светоза́рный ли́к тво́й просла́вися во ве́к ве́ка.

Ра́дуйся, ми́лостивный засту́пниче си́рых и убо́гих.

Ра́дуйся, от мы́сленных волко́в защити́вый о́вцы слове́сныя.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 6.

Мона́си и прости́и Афо́нския земли́ ве́лию твоему́ нестяжа́нию удиви́шася, я́ко посто́м и моли́твою кре́пко подвиза́лся еси́, ца́рский вене́ц и держа́ву ни во что́ же вмени́в, кро́тость, смире́ние и послуша́ние и́ноческое избра́л еси́, преподо́бне. Ви́димо оби́тели Афо́нстии ми́лостынею уще́дрил еси́, в глубине́ серде́чней Го́спода возславля́я, я́ко подоба́ет и́ноку, нищету́ Христо́ву возлюби́л еси́, я́ко царю́ мно́гия оби́тели возставля́я. Приими́ хвале́ния недосто́йных ра́б твои́х, о́браз смире́ния лю́дем свои́м яви́в, и в Ца́рствии Бо́жием Небе́сную Се́рбию сотвори́в, я́ко с любо́вию вопие́м с тобо́ю Го́сподеви: Аллилу́ия.

И́кос 6.

Возсия́ли еси́ я́ко два́ лучу́ зве́зды у́тренняя, преподо́бне Симео́не, е́же твое́ ца́рское и мона́шеское житие́, ца́рствовал бо еси́ над страстя́ми свои́ми, послуша́ние храни́л еси́ и́ноческое и́стинно. Све́т Ева́нгельскаго Словеси́ озаря́л ду́шу твою́, преподо́бне, ре́вность по До́му Бо́жию снеда́ла тя́, о́тче на́ш, печа́ль серде́чная о лю́дех держа́вы твоея́ возставля́ла на моли́тву непреста́нную. Того́ же предста́тельством и на́с сохрани́, Пресвята́я Тро́ице. Помяни́, Го́споди, оби́тели и хра́мы, я́же то́й воздви́гл еси́, мона́шеское во́инство в Се́рбии основа́вый, пе́ниями смире́нными прославля́емый си́це:

Ра́дуйся, благи́ми дела́ми Бо́га просла́вивый.

Ра́дуйся, святы́й лучу́ Со́лнца Ве́чнаго.

Ра́дуйся, мно́гия сироты́ и убо́гия храни́телю.

Ра́дуйся, хра́мов Бо́жиих и оби́телей попечи́телю.

Ра́дуйся, доброде́телей исто́чник неисчерпа́емый.

Ра́дуйся, цве́те благосты́ни неувяда́емый.

Ра́дуйся, сла́во и похвало́ оби́тели Хиланда́рския.

Ра́дуйся, ку́пно с преподо́бным Са́ввою в раю́ ца́рствуеши.

Ра́дуйся, преподо́бне Симео́не, звездо́ незаходи́мая.

Ра́дуйся, целому́дрия свети́ло ди́вное.

Ра́дуйся, благода́ти Свята́го Ду́ха стяжа́телю.

Ра́дуйся, духо́внаго би́сера слове́снаго раздая́телю.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Кондак 7

Егда́ прии́де вре́мя твоего́ отше́ствия в Небе́сную оби́тель, преподо́бне, тогда́ услы́шал еси́ обетова́ние от Го́спода своего́: До́бре, ра́бе благи́й и ве́рный: о ма́ле бы́л еси́ ве́рен, над мно́гими тя́ поста́влю: вни́ди в ра́дость Го́спода твоего́. Тогда́ же духо́внаго отца́ своего́, вку́пе и ста́рца-сы́на призва́, да вознесу́т моле́ния ко Пресвяте́й Тро́ице о душе́ твое́й. Са́вва преподо́бный оте́ц на́ш, ку́пно же с бра́тиею оби́тели твоея́ вознесли́ пе́ния и моле́ния ко Го́сподеви да прии́мет тя́ во оби́тели Своя́, ло́жем ти́ вре́тище убо́гое послужи́ша и изголо́вием ка́мение бы́ша. Лобза́я о́браз Пречи́стыя Ма́тере, воспе́л еси́, о́тче преподо́бне: Вся́кое дыха́ние да хва́лит Го́спода, Аллилу́ия.

И́кос 7.

Ве́рный ра́бе Христа́ Преве́чнаго яви́лся еси́, о́тче Симео́не мироточи́ве, егда́ наста́ ча́с отше́ствия твоего́ в оби́тели Небе́сныя, призва́л еси́ ста́рца-сы́на своего́ Са́вву преподо́бнаго, да испо́лнит вся́ потре́бная по чи́ну святы́х оте́ц на́ших. То́й же прости́ся с тобо́ю и возпла́ка го́рько, я́же прии́де вре́мя уга́снути звезде́ невече́рней афо́нскаго мона́шества, те́мже и мы́ воспева́ем ти́ сицева́я:

Ра́дуйся, моли́твенниче на́ш неусыпа́емый и вселюби́мый.

Ра́дуйся, ма́слина многопло́дная и мироточи́вая.

Ра́дуйся, и́ноческих заве́тов ревни́телю.

Ра́дуйся, А́нгелов и святы́х Бо́жиих собесе́дниче.

Ра́дуйся, лозо́ Це́ркви Се́рбския сла́вная.

Ра́дуйся, ка́меню ве́ры Правосла́вныя.

Ра́дуйся, ни́щих и сиро́т утеше́ние и по́моще.

Ра́дуйся, неусы́пный на́ш пред Го́сподом моли́твенниче.

Ра́дуйся, истреби́телю вся́кия лжи́ и непра́вды.

Ра́дуйся, таи́нниче небе́сныя благода́ти.

Ра́дуйся, святы́й хода́таю Ла́вры Хиланда́рския.

Ра́дуйся, досто́йный носи́телю венца́ ца́рскаго.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 8.

Все́ и́ноческое во́инство оби́тели Хиланда́рския жа́лостными уязви́шася се́рдцы, мона́си и прости́и возпла́каша го́рько, Са́вва преподо́бный возслези́ша и ча́да духо́внии возрыда́ша, я́ко оста́вил еси́ на́с, Симео́не, мироточи́ве о́тче на́ш, в све́тлыя оби́тели Небе́сныя ду́хом всели́лся еси́, те́лом же чу́дно с на́ми пребыва́я. Па́че все́х ста́рец-сы́н тво́й ско́рбен бы́сть, я́ко бра́та и сы́на по ду́ху лиши́лся еси́, его́же на го́ру Афо́нскую привле́кл еси́, да спасе́ние улучи́т. Возскорбе́ша и́ноки Афо́нстии, я́ко ми́лостивнаго дая́теля не обрето́ша, и моли́твы те́плыя Го́сподеви вознесли́ есте́, да напису́ет ти́ в Кни́гу Живота́ ку́пно и сы́на твоего́, о́тче Симео́не богому́дре, мы́ же благода́рственно пое́м Го́сподеви: Аллилу́ия.

И́кос 8.

В оби́тели Ве́чныя отше́л еси́, преподо́бне о́тче Симео́не, из са́да кра́снаго, земна́го рая́, оби́тели Хиланда́рския, е́же ку́пно с сы́ном свои́м Са́ввою преподо́бным насади́л еси́, и иде́же святы́й обе́т положи́л еси́ моли́тися ко Го́споду Си́л до́ндеже свети́ла небе́сная лучи́ своя́ на зе́млю испуща́ют. При́зри на моле́ния недосто́йных ча́д твои́х, преподо́бне, и восхвали́ти Го́спода на́м помози́, да благода́рно зове́м ти́:

Ра́дуйся, насе́льниче Небе́сных оби́телей.

Ра́дуйся, тайнозри́телю Святы́я Тро́ицы.

Ра́дуйся, святы́я правосла́вныя ве́ры насади́телю.

Ра́дуйся, в печа́лех и ско́рбех ве́лий уте́шителю.

Ра́дуйся, свяще́ннаго ми́ра целе́бный исто́чниче.

Ра́дуйся, благода́ть чудотворе́ний по кончи́не стяжа́вый.

Ра́дуйся, на́ш ми́лостивный пред Бо́гом хода́таю.

Ра́дуйся, пра́ведниче, во успе́нии на́с не оста́вивый.

Ра́дуйся, Ве́чнаго Живота́ насле́дниче.

Ра́дуйся, многоце́нный Госпо́день свети́льниче.

Ра́дуйся, мирото́чными моща́ми с на́ми пребы́вый.

Ра́дуйся, засту́пниче за земно́е свое́ Оте́чество ве́рный.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Кондак 9

Бо́г преве́чный неизрече́нною свое́ю му́дростию, я́ко восхоте́ просла́вити тя́ и утеше́ние лю́дем дарова́ти, благода́ти ве́лия испо́лни святы́я мо́щи твоя́, я́же ре́ки ми́ра благово́ннаго источи́л еси́ на́м. По́стниче Хиланда́рский яви́лся еси́, подви́жниче горы́ Афо́нстей просла́вился еси́, помози́ ны́ моли́твами свои́ми, влады́ко Небе́сныя Се́рбския земли́, от вра́г ви́димых и неви́димых защити́ ны́ покро́вом свои́м, да вси́ совоку́пно просла́вим тя́ и воспое́м просла́вльшему тя́ ми́ром истече́ния Го́споду: Аллилу́ия.

И́кос 9.

Ки́ими пе́сненными похвалы́ восхва́лим твоя́ по́двиги и труды́, преподо́бне о́тче Симео́не. Ка́ко гла́с Бо́жий услы́шал еси́ и душе́ю в ве́чность устреми́лся еси́, иде́же вси́ святи́и упокоева́ются, ка́ко послу́шник ста́рца-сы́на своего́ яви́лся еси́ и кре́ст и́ноческий на ра́мо свое́ воздви́гл еси́. Ви́деша Са́вва отше́ствие твое́ ко Го́споду и возпла́каша го́рько, ты́ же ли́ком просия́в све́тло запове́дал ему́ моли́тися те́пло о душе́ свое́й. Мы́ же, недосто́йнии и гре́шнии раби́ твои́, мо́лимтися и взыва́ем си́це:

Ра́дуйся, о́тче Симео́не, и́ноков сла́во и похвало́.

Ра́дуйся, А́нгельскими си́лами в Небе́сныя оби́тели вознесе́нный.

Ра́дуйся, на́ша смире́нная моли́твы и проше́ния не презре́вый.

Ра́дуйся, благода́ти Бо́жией испо́лненный.

Ра́дуйся, Ца́рствия Христо́ва сонасле́дниче.

Ра́дуйся, ста́рче, му́дрость и́стинную стяжа́вый.

Ра́дуйся, на́ша кре́пкая наде́ждо на Небеси́ и упова́ние.

Ра́дуйся, горы́ Афо́нстей и Держа́вы Се́рбстей ра́дование.

Ра́дуйся, со Христо́м соедини́выйся.

Ра́дуйся, на́ш те́плый хода́таю пред Бо́гом яви́выйся.

Ра́дуйся, я́ко предстои́ши Престо́лу Святы́я Тро́ицы неусы́пно.

Ра́дуйся, я́ко мо́лишися о ча́дех твои́х неотсту́пно.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 10.

Во Оте́честве я́ко чу́ждий пребы́л еси́, но́вый Авраа́ме Се́рбския земли́, преподо́бне о́тче Симео́не. Избра́л бо еси́ Гра́д Небе́сный и бла́га ве́чнии, сокро́вища предпоче́л еси́, иде́же ни че́рвь, ни тля́ тли́т, и иде́же та́тие не подко́пывают, ни кра́дут. Оте́чество Небе́сное избра́в, плоды́ духо́внии и цве́ти небе́снии возрасти́л еси́ на ни́ве души́ своея́, я́ко се́рдце твое́ пребы́ше, иде́же бе́ сокро́вище твое́, те́мже Бо́г просла́вит тя́, чудотво́рче мироточи́ве. Моли́ся за ны́ ко Го́споду со все́ми святы́ми, воспева́я красно́: Аллилу́ия.

И́кос 10.

Помо́щник и моли́твенник бы́сть на́м, богоно́сне о́тче Симео́не, чудотво́рче мироточи́ве. Святы́я мо́щи твои́ во Оте́чество земно́е со Афо́нския горы́ возврати́лися еси́ и чу́дом мироточе́ния просла́влены бы́сте по моли́твам ста́рца-сы́на твоего́, преподо́бнаго отца́ Са́ввы. Многоми́лостиве о́тче Симео́не, умоли́ Го́спода Си́л, да спасе́т ду́ши на́ша, вопию́щия ти́ такова́я:

Ра́дуйся, Симео́не мироточи́ве, неду́гов на́ших исцели́телю.

Ра́дуйся, се́рбския лю́дие ра́досте и утеше́ние.

Ра́дуйся, вели́кия Хиланда́рския ла́вры зижди́телю.

Ра́дуйся, Се́рбския це́ркве прославле́ние.

Ра́дуйся, в печа́лех вели́кий уте́шителю.

Ра́дуйся, венца́ нетле́ннаго стяжа́телю.

Ра́дуйся, ско́рое скве́рныя е́реси посече́ние.

Ра́дуйся, неизсяка́емый чуде́с исто́чниче.

Ра́дуйся, тайнозри́тель Пресвяты́я Тро́ицы.

Ра́дуйся, учи́телю мона́шеских доброде́телей.

Ра́дуйся, святы́х кано́нов ревни́телю.

Ра́дуйся, Бо́жиих хра́мов украси́телю.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 11.

Неисчерпа́емое чуде́с мо́ре все́м источа́яй, преподо́бне о́тче Симео́не мироточи́ве, мы́ же пе́ния похва́льная прино́сим ти́ немощна́я, уго́дниче Христо́в. Не отри́ни ма́лое приноше́ние на́ше, недосто́йных ча́д твои́х, святи́и мо́щи твоя́ бо лобыза́ем и со умиле́нием пое́м Бо́гу: Аллилу́ия.

И́кос 11.

Свети́льниче ди́вный Се́рбския земли́, лампа́до негаси́мая пред Го́сподем, преподо́бне о́тче Симео́не мироточи́ве, на горе́ Святе́й не восхоте́л еси́ бы́ти, но в бе́лую Ла́вру Студе́ницу возврати́лся еси́, да просвети́тся свята́я оби́тель сия́, да припаде́м к моще́м твои́м и со слеза́ми возопии́м ти́ такова́я:

Ра́дуйся, о́тче, явле́нием свои́м свята́го Са́вву удиви́вый.

Ра́дуйся, я́ко преподо́бный Са́вва жела́ние твое́ испо́лни.

Ра́дуйся, в святу́ю Студе́ницу возврати́выйся.

Ра́дуйся, чудеса́ми ве́лиими просла́вленный.

Ра́дуйся, я́ко сыно́в свои́х Стефа́на и Ву́кана соедини́вый.

Ра́дуйся, вражду́ющих ча́д примири́вый.

Ра́дуйся, сердца́ ожесточе́нныя умягчи́вый.

Ра́дуйся, притека́ющих к тебе́ с ве́рою не оста́вивый.

Ра́дуйся, свяще́нным ми́ром иска́телей ми́ра пома́завый.

Ра́дуйся, немощны́х святы́м ми́ром исцели́вый.

Ра́дуйся, благоуха́нием духо́вным Оте́чество облагоуха́вый.

Ра́дуйся, все́ми ве́рными с благодаре́нием воспева́емый.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 12.

Прославля́юще ми́рное преставле́ние твое́, преподо́бне о́тче Симео́не, воспева́ем ти́, драги́й сосу́де ду́ха Свята́го, и усе́рдно мо́лим тя́, звездо́ Се́рбския земли́, да научи́ши ны́ покая́нию и да сохрани́ши от непра́выя ве́ры, да наста́виши ны́ на пра́выя стези́. О, светоно́сный лучу́ святы́я Студе́ницы, прославля́ем просла́вльшаго тя́ Го́спода, и согла́сно вопие́м: Аллилу́ия.

И́кос 12.

Со умиле́нием воспева́ем прославле́ние твое́, преподо́бне, ублажа́ем тя́, многомо́щне на́ш моли́твенниче пред Го́сподем, услы́ши гла́с моле́ния на́шего и проше́ния пред нетле́нными моща́ми твои́ми не пре́зри, но заступи́ и спаси́ ны́, да с ра́достию благода́рне воспое́м ти́ сицева́я:

Ра́дуйся, Симео́не, лозо́ многопло́дная ро́да Нема́ничей.

Ра́дуйся, похвало́ и сла́во све́тлой Студе́ницы.

Ра́дуйся, защи́тниче и свети́льниче и́ночества Се́рбскаго.

Ра́дуйся, лучу́ Све́та Несотворе́ннаго.

Ра́дуйся, кри́не Христо́в, да́рующий ми́ро исцеле́ний.

Ра́дуйся, све́тлая звездо́, Бо́жия чудеса́ явля́ющая.

Ра́дуйся, красото́ Студе́ницы неувяда́емая.

Ра́дуйся, сокро́вищнице благода́ти неизчерпа́емая.

Ра́дуйся, исто́чниче целе́бнаго ми́ра неизсяка́емый.

Ра́дуйся, кре́пкое Оте́чества на́шего огражде́ние.

Ра́дуйся, хра́мов и оби́телей ще́дрый украси́телю.

Ра́дуйся, лука́ваго зми́я сла́вный победи́телю.

Ра́дуйся, преподо́бне о́тче Симео́не Мироточи́вый, вели́кий чудотво́рче.

Конда́к 13

О всехва́льный, вели́кий чудотво́рче, преподо́бне о́тче Симео́не Мироточи́ве, приими́ смире́нное моле́ние на́ше, в похвалу́ ти́ кро́тко приноси́мое, умоли́ Го́спода Си́л да сохрани́т ны́ во вся́ дни́ живота́ на́шего, да да́рует ми́лость на Суде́ Стра́шнем и Вели́цем, во е́же обрете́м спасе́ние и с тобо́ю и все́ми святы́ми с ра́достию воспое́м Го́сподеви: Аллилу́ия.

Се́й конда́к чита́ется три́жды, зате́м и́кос 1-й, конда́к 1-й.

Моли́тва

О преподо́бне о́тче Симео́не, Студе́ницкий чудотво́рче. Влады́ко Се́рбския земли́ Стефа́не и мона́шества похвале́ние Симео́не преди́вный, во дни́ земна́го ца́рствия твоего́ никто́же неуте́шен оты́де от тебе́, но все́м ра́дость и утеше́ние ми́лостивно дарова́л еси́. Упаси́ виногра́дник тво́й, о́тче преподо́бне, да не пре́даны бу́дем в се́ти сатаны́, зми́я лука́ваго. Просвети́ о́чи на́ша с высоты́ Небе́сныя, да пле́на грехо́внаго избе́гнем. Посети́, све́те, не́мощь на́шу, вразуми́ и напра́ви ны́ на стези́ свя́тости, да николи́же оста́вит ны́ любы́ Бо́жия, да не престае́т моли́тва твоя́ заступа́ти Оте́чество твое́. О богоно́сне чудотво́рче, я́ко зве́зды небе́снии просия́ли чудесы́ твоя́ во все́х земля́х христиа́нских. Да́руй на́м от скве́рных грехо́вных страсте́й свобожде́ние и введи́ ны́ в ве́чное Ца́рство Животворя́щей и Неразде́льней Тро́ицы, да мы́ с тобо́ю и все́ми святы́ми бу́дем ве́чно прославля́ти и сла́вити Бо́га. Ами́нь.