Шрифт

Акафисты святым

Акафист святым Cедми отроком Ефесским

Cедми отроком Ефесским
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1.

Избра́ннии от воскре́сшаго пло́тию из ме́ртвых Христа́ Бо́га, во увере́ние о́бщаго все́х воскресе́ния ми́ру явле́ннии, преди́внии о́троцы, и́же во Ефе́се, прославля́юще просла́вльшагося в ва́с Го́спода, похва́льная пе́ния возно́сим ва́м, глаго́люще:

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

И́кос 1.

А́нгелов Творе́ц, ве́дый изнача́ла несумне́нную кре́пость испове́дания ва́шего, сотвори́ ва́с в лю́тых обстоя́ниих провозве́стники бы́ти о́бщаго все́х воскресе́ния, я́ко ангелоподо́бныя свиде́тели ева́нгельскаго обетова́ния. Сицево́му о на́с смотре́нию Бо́жию дивя́щеся, во благогове́инстве зове́м си́це:

Ра́дуйтеся, све́тлыя зве́зды гряду́щаго воскресе́ния; ра́дуйтеся, пресла́внии лучи́ Христа́ Спа́са воскре́сшаго.

Ра́дуйтеся, денни́це вели́каго дне́ Госпо́дня; ра́дуйтеся, из домо́в неве́рных ве́рная Христу́ ча́да яви́вшиися.

Ра́дуйтеся, в чу́дный све́т и свобо́ду сыно́в воскресе́ния призва́ннии; ра́дуйтеся, Ду́хом Святы́м в пропове́дники глаго́лов живота́ ве́чнаго избра́ннии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 2.

Ви́дяще ва́с роди́тели ра́зум до́бр иму́щая, потща́шася в чи́н во́инский дружи́ны царе́вы ва́с устро́ити; вы́ же, вся́ тле́нная ми́ра презре́вше, в Сио́н го́рний к Царю́ Небе́сному сердцы́ свои́ми востеко́сте, да я́ко дру́зи Бо́жии и служи́телие та́йны о́бщаго воскресе́ния вмене́нни бу́дете, пою́ще Христу́: Аллилу́ия.

И́кос 2.

Ра́зум Христо́в чи́стыми душа́ми восприя́ти сподо́бившеся, ди́внии о́троцы, посреде́ грехо́вныя жи́зни све́рстник ва́ших благода́тию Христо́вою соблюда́еми, дру́г ко дру́гу любо́вию и едине́нием ду́ха бра́тие яви́стеся, и во еди́но сверше́нни бы́сте. Сего́ ра́ди приими́те от на́с похвалы́ сия́:

Ра́дуйтеся, еди́ною ба́нею пакибытия́ возрожде́ннии; ра́дуйтеся, любо́вию Христо́вою а́ки бра́тие соедине́ннии.

Ра́дуйтеся, Це́ркве Бо́жия ча́да возлю́бленная; ра́дуйтеся, А́нгелов Бо́жиих собесе́дницы.

Ра́дуйтеся, па́че бра́шен есте́ственных и́стинным хле́бом жи́зни себе́ пита́вшии; ра́дуйтеся, се́ю пи́щею чрез благода́ть Свята́го Ду́ха от сме́рти в жи́знь процве́тшии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 3.

Си́ла Вы́шняго, таи́нники благода́ти в злострада́ниих укрепля́ющи, си́х венце́м добропобе́дным испове́дания увенча́тися пред челове́ки и а́нгелы сподо́би, на́с же научи́ пе́ти Бо́гу: Аллилу́ия.

И́кос 3.

Иму́ще тща́ние в до́м Госпо́день на моли́тву по вся́ дни́ приходи́ти, ника́коже сего́ обы́чая отверго́стеся, святи́и, гоне́нию Де́киеву бы́вшу; е́же уве́девше врази́ ве́ры Христо́вы, царя́ о се́м извести́ти потща́шася, оба́че мучи́телева преще́ния на прославле́ние ва́м си́лою Бо́жиею премени́шася. Таково́му у́бо о ва́с Бо́жию промышле́нию ра́дующеся, со умиле́нием глаго́лем ва́м си́це:

Ра́дуйтеся, те́мныя си́лы кня́зя ми́ра сего́ благода́тию Христо́вою сокруши́вшии; ра́дуйтеся, зло́бу и кова́рство слу́г его́ всепобе́дно посрами́вшии.

Ра́дуйтеся, ко́зней и преще́ний и́х не убоя́вшиися, ниже́ смути́вшиися; ра́дуйтеся, по́мощию Бо́жиею ви́димо укрепи́вшиися.

Ра́дуйтеся, я́ко дре́вле Дании́л в пеще́ре льво́ве, посреде́ мучи́телей сохране́ннии; ра́дуйтеся, си́лою Влады́чнею из среды́ и́х неврежде́нно изведе́ннии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Кондак 4

Бу́рею я́рости дви́жим, злочести́вый Де́кий ца́рь во гне́ве святы́я вопроша́ет: почто́ не бы́сте с на́ми в пра́здник бого́в, всю́ вселе́нную призва́вших к поклоне́нию? Ему́же Максимилиа́н, еди́н от седми́, отвеща́ет: и́мамы еди́наго Бо́га и Царя́, и́же на небеси́, Ему́же прино́сим на вся́к ча́с же́ртву хвале́ния, испове́дания и моле́ния, пою́ще Ему́: Аллилу́ия.

И́кос 4.

Слы́шав нечести́вый ца́рь, ка́ко ве́ру ва́шу со дерзнове́нием испове́даете, че́сти во́инския лиши́ти ва́с повеле́, и та́ко испыта́ния ва́ша Христа́ ра́ди нача́шася, Христо́м скоропослу́шно в пречу́дное успе́ние преображе́нная. Те́мже и ны́не кре́пость в испыта́ниих от Бо́га умоли́те пою́щим:

Ра́дуйтеся, во́ини царя́ земна́го, к во́инству Царя́ небе́снаго сопричте́ннии; ра́дуйтеся, че́сть земну́ю оста́вльшии, да сла́ву небе́сную восприи́мете.

Ра́дуйтеся, земны́я че́сти за Христа́ лише́ннии; ра́дуйтеся, сего́ ра́ди венцы́ нетле́нными от Него́ увенча́ннии.

Ра́дуйтеся, побе́ды Его́ пропове́дницы явле́ннии; ра́дуйтеся, сла́вы Его́ ве́чныя седмочи́сленное блиста́ние.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 5.

Боже́ственныя любве́ теплото́ю гре́емии, благода́тию Христо́вою от мучи́телей покрове́ни яви́лися есте́, святи́и о́троцы, Максимилиа́не, Иамвли́ше, Мартиниа́не, Иоа́нне, Диони́сие, Ексакустодиа́не же и Антони́не, в ле́тех ю́ных красоту́ вну́тренняго челове́ка с ле́потою вне́шнею сочетава́юще и, я́ко А́нгели, в пла́мени испове́дания ва́шего воспева́юще Бо́гу: Аллилу́ия.

И́кос 5.

Ви́дев злохи́трый ца́рь Де́кий зело́ благоле́пную ю́ность ва́шу, на не́колико дни́й и осла́бу от у́з ва́м да́рует, прельсти́ти ва́с ко отрече́нию от Христа́ наде́яся. Вы́ же, во своя́си отше́дше, сребро́ и зла́то ни́щим разда́ти потща́стеся, ко исхо́ду себе́ уготовля́юще. Сего́ ра́ди воспису́ем ва́м похва́льная сия́:

Ра́дуйтеся, закосне́вшаго во зле́ мучи́теля на не́кое милосе́рдие подви́гшии; ра́дуйтеся, младе́нческою кро́тостию ва́шею кова́рную зло́бу его́ на вре́мя угаси́вшии.

Ра́дуйтеся, красото́ю сыно́в све́та злообра́зныя служи́тели греха́ плени́вшии; ра́дуйтеся, Ду́ха Свята́го благода́тию кова́рство и́х побе́дно посрами́вшии.

Ра́дуйтеся, чрез раздая́ние земны́х бога́тств сокро́вищем небе́сным обогати́вшиися; ра́дуйтеся, и на́с взаи́м дава́ти Бо́гу науча́ющии, да бога́тство неоскудева́емое на небесе́х обря́щем.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 6.

Пропове́дует пеще́ра горы́ Охло́н чу́дную сла́ву ва́шу, святи́и о́троцы, де́бри бо и верте́пы ея́ моли́твою ва́шею облагоуха́ли есте́, отону́дуже на тве́рди церко́вней, я́коже зве́зды сла́вы небе́сныя, из мра́ка гробо́в чу́дно возсия́вшыя, яви́стеся и на́с Первонача́льнику о́бщаго воскресе́ния Христу́ Бо́гу пе́ти научи́сте: Аллилу́ия.

И́кос 6.

Возсия́ти хотя́ лю́дем све́т и́стины, мглу́ же заблужде́ния разгна́ти, Христо́с Бо́г сни́ти ва́м во мра́к моги́льный соизво́ли я́ко да по́слежде в ди́внем воста́нии ва́шем о́бщее воскресе́ние уве́рит. Пред таковы́м Бо́жиим о ва́с благоволе́нием преклоня́ющеся, возсыла́ем ва́м хвале́ния сия́:

Ра́дуйтеся, тве́рдости ра́ди испове́дания от му́к промысли́тельно изба́вленнии; ра́дуйтеся, и на́с кре́пце за пра́вду бра́тися науча́ющии.

Ра́дуйтеся, безболе́зненно по́двиг ва́ш сконча́вшии; ра́дуйтеся, чу́дным сно́м почи́вшии, во е́же воста́нием от сего́ сна́ сме́рти мглу́ заблужде́ния разсе́яти.

Ра́дуйтеся, в нетле́нии теле́с ва́ших Го́сподем соблюде́ннии; ра́дуйтеся, пре́жде о́бщаго воскресе́ния изволе́нием Бо́жиим воста́вшии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Кондак 7

Хотя́ безбо́жный ца́рь ну́ждею к идолослуже́нию святы́я привлещи́, па́ки пра́здник и́дольский устроя́ет и ты́я на́нь привести́ повелева́ет; не обре́тшым же те́х во гра́де Ефе́се слуго́м его́, роди́тели и́х ка́знию устраши́ти тщи́тся, но от си́х извеще́н быва́ет, я́ко святи́и в пеще́ре сокры́шася, воспева́юще Бо́гу: Аллилу́ия.

И́кос 7.

Но́вое устремле́ние зло́бы ми́р яви́л е́сть, егда́ роди́телие ме́сто поко́ища ча́д свои́х царе́ви откры́ша, и та́ко любве́ о́тчия к ни́м отреко́шася. Сего́ ра́ди ко избра́нником Бо́жиим глаго́лем си́це:

Ра́дуйтеся, ми́ром отве́рженнии и Не́бо восприя́вшии; ра́дуйтеся, Отца́ ра́ди Небе́снаго отцы́ земны́ми пре́даннии.

Ра́дуйтеся, оте́ческою любо́вию Его́ в таи́нственнем сне́ чу́дно сохране́ннии; ра́дуйтеся, нетле́ние улучи́вшии и ми́р све́том воскресе́ния осия́вшии.

Ра́дуйтеся, пу́ть к сему́ ди́вному све́ту на́м указу́ющии; ра́дуйтеся, ча́с кончи́ны сбытие́м обетова́ния Бо́жия на́м услажда́ющии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 8.

Стра́нное и пресла́вное чу́до всемогу́щества Бо́жия на ва́с, святи́и о́троцы, показа́ся, ка́мением бо по повеле́нию Де́киеву в пеще́ре загражде́ннии и печа́тию запечатле́ннии, сто́ и о́смьдесят ле́т да́же до дни́й царя́ Феодо́сия та́мо спя́ще пребы́ли есте́, воста́вше же а́ки живи́и, саддуке́йское мудрова́ние посрами́ли есте́, пою́ще Христу́, ва́с воскреси́вшему: Аллилу́ия.

И́кос 8.

Ве́сь седмочи́сленный испове́дников ли́к, во гро́бе ка́меннем заключе́н бы́в, жи́зни ве́чныя ника́коже отлучи́ся, но исте́кшим сто́м и осми́десятим ле́том со́н от оче́с и́х произволе́нием Бо́жиим отрясе́ся, и та́ко святи́и о́троцы живи́и воста́ша, ве́сь ми́р о воскресе́нии все́х уверя́юще и на́с пе́ти науча́юще си́це:

Ра́дуйтеся, упова́ние о́бщаго воскресе́ния обетова́нием Бо́жиим утвержда́ющии; ра́дуйтеся, краеуго́льнаго ра́ди Ка́мене Христа́ Бо́га ка́мением во гро́бе загражде́ннии.

Ра́дуйтеся, Его́ ра́ди, во гро́бе запечатле́ннаго, печа́тию запечатле́ннии; ра́дуйтеся, А́гнцем, взе́мшим на Себе́ гре́х ми́ра, от у́з сме́рти свобожде́ннии.

Ра́дуйтеся, во увере́ние о́бщаго воскресе́ния, я́коже Ла́зарь четверодне́вен, из гро́ба изведе́ннии; ра́дуйтеся, числу́ седми́ херуви́м, Престо́лу сла́вы Бо́жия предстоя́щих, сообра́знии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Кондак 9

Вся́кое естество́ а́нгельское возра́довася о чу́днем по мно́зех ле́тех воста́нии ва́шем и ужаса́шеся: ка́ко вы́, пресла́внаго у́бо чудесе́, о ва́с бы́вшаго, не ве́дуще, обы́чное целова́ние дру́г дру́гу подае́те и у́треннее пе́ние Го́споду, а́ки вчера́ ко сну́ отше́дшии, прино́сите, пою́ще: Аллилу́ия.

И́кос 9.

Вети́йствующий язы́к не возмо́жет изрещи́ чуде́с Твои́х, Го́споди, ве́мы бо, ка́ко блаже́нный о́трок Иамвли́х, многоле́тняго успе́ния своего́ не разуме́я и во гра́д за пи́щею исше́дый, удиви́ся, егда́ Ефе́с, Христо́вою ве́рою изда́вна просвеще́нный, уви́де, и Го́спода просла́ви, на́с же глаго́лати сотвори́ такова́я:

Ра́дуйтеся, де́лателие на ни́ве Госпо́дней, моли́твенныя сле́зы оби́льно проли́вшии; ра́дуйтеся, в ску́дости и гоне́нии почи́вшии, во сла́ве и бога́тстве воста́вшии. Ра́дуйтеся, зре́нием торжества́ ве́ры Христо́вы, во дни́ ва́ша гони́мыя, по воста́нии обра́дованнии; ра́дуйтеся, побе́ду Христа́ над ми́ром я́ве узре́вшии.

Ра́дуйтеся, и на́с на сию́ упова́ти науча́ющии; ра́дуйтеся, от уны́ния на́с огражда́ющии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 10.

Спасти́ хотя́ Бо́г и в ве́ре утверди́ти лю́ди, сия́ о многоле́тнем успе́нии Иамвли́ха чрез дре́вний пе́нязь, на то́ржище и́м принесе́нный, науча́ет, епи́скопу гра́да сия́ уразуме́вшу и Бо́га просла́вившу с пе́снию: Аллилу́ия.

И́кос 10.

Стена́ и утвержде́ние ве́ры яви́стеся, святи́и, челове́ком, в пеще́ру ва́шу прише́дшим и ковче́жец с хартие́ю обре́тшым, на не́йже имена́ ва́ша и кончи́ны о́браз напи́сана бы́ша, во е́же пе́ти все́м:

Ра́дуйтеся, се́дмь избра́нных сосу́дов Бо́жиих; ра́дуйтеся, вку́пе со святы́ми му́ченики еле́ем ра́дования пома́заннии.

Ра́дуйтеся, се́дмь свети́льников пред Престо́лом Хода́тая Бо́га и челове́ков; ра́дуйтеся, се́дмь тру́б благове́стия втора́го прише́ствия Сы́на Челове́ческаго.

Ра́дуйтеся, се́дмь а́нгел, благовеству́ющих на́м сла́ву до конца́ претерпе́вших; ра́дуйтеся, я́ко седмисве́щник златы́й, це́рковь Бо́жию украша́ющии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 11.

Пе́ние благода́рственное Пресвяте́й Тро́ице вознося́, благочести́вый ца́рь Феодо́сий со тща́нием во Ефе́с устреми́ся, во е́же святы́я о́троки ви́дети, и се́дмь дни́й та́мо пребыва́ше, до́ндеже сии́, главы́ прекло́нше, ду́х сво́й Го́споду преда́ша, ку́пно с ни́ми побе́дную возсыла́я пе́снь Христу́ Бо́гу: Аллилу́ия.

И́кос 11.

Свети́льницы, тьму́ е́реси разгоня́ющии, яви́лися есте́, святи́и о́троцы, све́том нетле́ния ва́шего сия́ющии и блаже́нным по воста́нии па́ки успе́нием и́стину гряду́щаго живота́ утвержда́ющии, саддуке́йское бо мудрова́ние посрами́вше, вся́ раздо́ры церко́вныя ути́шили есте́, о́бщее воскресе́ние вку́пе с дре́вним Ла́зарем уверя́юще. Те́мже, благодаря́ще о се́м Го́спода, со умиле́нием зове́м ва́м:

Ра́дуйтеся, ско́рбное житие́ на́ше до́брым упова́нием осиява́ющии; ра́дуйтеся, посреде́ во́лн жития́ сего́ к приста́нищу небе́сному на́с направля́ющии.

Ра́дуйтеся, я́ко зве́зды, во оти́шие блаже́ннаго поко́я в черто́зе Христо́ве на́с путеводя́щии; ра́дуйтеся, блаже́нство ве́чное, скорбя́щим угото́ванное, благовеству́ющии.

Ра́дуйтеся, я́ко недосто́йны су́ть стра́сти ны́нешняго вре́мене к бу́дущей сла́ве, уверя́ющии; ра́дуйтеся, до́блии ве́стницы ца́рства небе́снаго бы́вшии.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 12.

Благода́ть даде́ся ва́м от Бо́га, во е́же вся́ лю́бящия и чту́щия вы́ в чу́дный све́т Его́ руково́дствовати. Те́мже и на́шея жи́зни ско́рбный пу́ть кре́пкою наде́ждою воскресе́ния озари́те, от грехо́вныя поги́бели на́с соблюди́те и в ча́с сме́ртный на́м предста́ните, да ва́шим заступле́нием невече́рняго све́та вели́чествия Бо́жия и мы́ гре́шнии дости́жем, иде́же с ли́ки пра́ведных воспои́м о ва́с Бо́гу: Аллилу́ия.

И́кос 12.

Пою́ще ди́вное прославле́ние си́лы Бо́жия в ва́с, святи́и о́троцы, ублажа́ем вы́, я́ко засту́пники и моли́твенники на́ша пред Го́сподем, и с любо́вию, святе́й ико́не ва́шей предстоя́ще, возглаша́ем ва́м хвале́ния сия́:

Ра́дуйтеся, в Росси́йстей земли́ гра́да Ста́рицы похвало́ и утвержде́ние; ра́дуйтеся, вся́ окре́стныя ве́си сла́вою благода́тныя по́мощи ва́шея испо́лнившии.

Ра́дуйтеся, боля́щих младе́нцев прибе́жище и исцеле́ние; ра́дуйтеся, скорбе́й роди́телей и́х нело́жное врачева́ние.

Ра́дуйтеся, все́м лю́бящим и чту́щим вы́ покро́ве и огражде́ние; ра́дуйтеся, всего́ ми́ра христиа́нскаго по́моще и заступле́ние.

Ра́дуйтеся, страстоте́рпцы Христо́вы, всеми́рнаго воскресе́ния ме́ртвых пречу́днии пропове́дницы.

Конда́к 13.

О чу́днии о́троцы, све́том небе́сныя сла́вы ва́шея и увере́нием несконча́емаго живота́ ско́рбный пу́ть жития́ на́шего озаря́ющии! Приими́те ма́лое сие́ моле́ние на́ше и не отри́ните на́с, притека́ющих к ва́м: моли́те при́сно все́х Влады́ку, да и мы́ ра́йскаго черто́га не лише́ни бу́дем, но вку́пе со святы́ми воспои́м та́мо Христу́ Бо́гу: Аллилу́ия.

Этот конда́к чита́ется три́жды, зате́м и́кос 1 и конда́к 1.

Моли́тва пе́рвая.

Бо́же вели́кий, хва́льный и непостижи́мый, и неисповеди́мый, созда́вый челове́ка руко́ю Твое́ю, пе́рсть взе́м от земли́, и о́бразом Твои́м почти́вый его́, Иису́се Христе́, прежела́емое и́мя, со Безнача́льным Твои́м Отце́м и с Пресвяты́м, и Благи́м, и Животворя́щим Твои́м Ду́хом, яви́ся на рабе́ Твое́м (имяре́к), и посети́ его́ ду́шу и те́ло, умоля́ем от пресла́вныя Влады́чицы на́шея Богоро́дицы и Присноде́вы Мари́и, святы́х Небе́сных Си́л Безпло́тных, и честна́го сла́внаго проро́ка, и Предте́чи и Крести́теля Иоа́нна, святы́х сла́вных и всехва́льных апо́столов, и́же во святы́х оте́ц на́ших, и вселе́нских учи́телей, Васи́лия Вели́каго, Григо́рия Богосло́ва, Иоа́нна Златоу́стаго, Афана́сия и Кири́лла, Никола́я и́же в Ми́рех, Спиридо́на чудотво́рца, и все́х святы́х священнонача́льников, свята́го апо́стола первому́ченика и архидиа́кона Стефа́на, святы́х сла́вных великому́чеников Гео́ргия Победоно́сца, Дими́трия Мирото́чца, Фео́дора Стратила́та, и все́х святы́х му́чеников, преподо́бных и богоно́сных оте́ц на́ших Анто́ния, Евфи́мия, Са́ввы Освяще́ннаго, Феодо́сия о́бщаго жития́ нача́льника, Ону́фрия, Арсе́ния, Афана́сия Афо́нскаго, и все́х преподо́бных, святы́х и исцели́телей, безсре́бренников Космы́ и Дамиа́на, Ки́ра и Иоа́нна, Фалале́я и Три́фона и про́чих, свята́го пра́веднаго Иоа́нна Кроншта́дтскаго, свята́го преподо́бнаго Иоа́нна Ры́льскаго, святы́я блаже́нныя Ксе́нии Петербу́ржской и все́х Твои́х святы́х. И да́ждь ему́ со́н упокое́ния, со́н теле́сный здра́вия и спасе́ния и живота́, и кре́пость душе́вную и теле́сную, я́коже посети́л еси́ иногда́ Авимеле́ха уго́дника Твоего́ во хра́ме Агри́ппове, и да́л еси́ ему́ со́н утеше́ния, е́же не ви́дети паде́ния Иерусали́мова, и сего́ успи́вый сно́м пита́тельным, и па́ки сего́ воскреси́вый во еди́ном мгнове́нии вре́мене, в сла́ву Твоея́ бла́гости. Но и святы́я Твоя́ сла́вныя се́дмь о́троки, испове́дники и свиде́тели Твоего́ явле́ния показа́вый, во дни́ Де́кия царя́ и отсту́пника, и сия́ успи́вый в верте́пе на ле́т сто́ и о́смьдесят, я́ко младе́нцы согрева́емыя в ложесна́х ма́тере своея́, и ника́коже претерпе́вшыя тле́ния, в похвалу́ и сла́ву человеколю́бия Твоего́, и в показа́ние, и извеще́ние на́шего пакибытия́, и воскресе́ния все́х. Са́м у́бо Человеколю́бче Царю́, предста́ни и ны́не наи́тием Свята́го Твоего́ Ду́ха, и посети́ раба́ Твоего́ (имяре́к), и да́руй ему́ здра́вие, кре́пость, и благомо́щие, Твое́ю бла́гостию, я́ко от Тебе́ е́сть вся́ко дая́ние бла́го, и вся́к да́р соверше́н. Ты́ бо еси́ вра́ч ду́ш и теле́с на́ших, и Тебе́ сла́ву и благодаре́ние и поклоне́ние возсыла́ем, со Безнача́льным Твои́м Отце́м, и с Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Моли́тва втора́я.

О пречу́днии святи́и седмочи́сленнии о́троцы, Ефе́са гра́да похвало́ и всея́ вселе́нныя упова́ние! Воззри́те с высоты́ небе́сныя сла́вы на на́с, любо́вию па́мять ва́шу чту́щих, наипа́че же на младе́нцы христиа́нския, ва́шему заступле́нию от роди́телей свои́х препоруче́нныя. Низведи́те на ня́ благослове́ние Христа́ Бо́га, ре́кшаго: оста́вите дете́й приходи́ти ко Мне́. Боля́щия у́бо в ни́х исцели́те, скорбя́щия уте́шите; сердца́ и́х в чистоте́ соблюди́те, кро́тостию испо́лните я́, и в земли́ серде́ц и́х зерно́ испове́дания Бо́жия насади́те и укрепи́те, во е́же от си́лы в си́лу и́м возраста́ти. И все́х на́с, святе́й ико́не ва́шей предстоя́щих рабо́в Бо́жиих (имяре́к), и те́пле ва́м моля́щихся, сподо́бите Ца́рствие Небе́сное улучи́ти и немо́лчными гла́сы ра́дования та́мо прославля́ти великоле́пое и́мя Пресвяты́я Тро́ицы, Отца́ и Сы́на и Свята́го Ду́ха, во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (которому читался акафист) и всех святы́х, спаси́ и помилуй мя, гре́шнаго, яко Благ и Человеколюбец.

Cедми отроком Ефесским