Шрифт

Акафисты святым

Акафист священномученику Иоанну, пресвитеру Царскосельскому

Конда́к 1.

Избра́нному первому́ченику Це́ркве Росси́йския в годи́ну лю́тых гоне́ний от безбо́жников убие́нному, вене́ц нетле́нный от Го́спода Вседержи́теля прия́вшему и вся́ ны́ свое́ю сме́ртию ко и́стинней любви́ наста́вльшему со дерзнове́нием и наде́ждою предста́тельства небе́снаго взыва́ем:

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

И́кос 1.

А́нгел с небесе́ по́слан бы́сть сохраня́ти тя́ от па́губных запина́ний лука́ваго, священному́чениче Иоа́нне, егда́ принесо́ша тя́ ко святе́й купе́ли духо́вныя сро́дники твоя́. Бы́сть же тогда́ на Руси́ времена́ ми́рныя, и никто́же ве́сть та́йну убие́ния твоего́ и му́ченическаго к Бо́гу отше́ствия. То́кмо стра́ж небе́сный, послуша́ние Бо́жие исполня́я, измла́да руководя́ще тя́ незри́мо к венцу́ страстоте́рпческому. Сего́ ра́ди, таково́му о тебе́ Бо́жию промышле́нию дивя́щеся, воспева́ем си́це:

Ра́дуйся, зе́млю Ряза́нскую рожде́нием свои́м освяти́вый; ра́дуйся, Иоа́нном, в че́сть Крести́теля Госпо́дня, нарече́нный.

Ра́дуйся, кончи́ну му́ченическую прия́вый, я́коже и покрови́тель тво́й небе́сный; ра́дуйся, рожде́нием свои́м роди́телей свои́х обра́довавый.

Ра́дуйся, па́стыря се́льскаго ча́до благонра́вное; ра́дуйся, в зако́не Госпо́днем измла́да воспита́выйся.

Ра́дуйся, трудолю́бию и простоте́ отце́м науче́нный; ра́дуйся, ве́ру и благоче́стие ма́тере своея́ унасле́довавый.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 2.

Ви́дя Сердцеве́дец Бо́г ду́шу твою́, те́плою любо́вию к Нему́ испо́лненною, поста́ви тя́ на высо́кий степе́нь свяще́нства и многотру́дный пу́ть служе́ния па́стырскаго. Ты́ же изнача́ла стопы́ своя́ напра́ви во страну́ да́льнюю, иде́же мно́гих ко Христу́ приводи́л еси́, науча́я неве́рныя и инове́рныя воспева́ти всеблаго́му Просвети́телю ду́ш челове́ческих: Аллилу́иа!

И́кос 2.

Разуме́в ме́сто, угото́ванное тебе́ Бо́гом для трудо́в про́поведи Ева́нгелия, оста́вил еси́ любе́зное оте́чество свое́, до́м сво́й и бли́жния своя́, не пеки́йся ни о сла́ве, ни о бога́тстве ми́ра сего́. Таково́му самоотрече́нию твоему́ дивя́щеся, воспева́ем ти́ си́це:

Ра́дуйся, до́м и оте́чество ра́ди де́ла Госпо́дня оста́вивый; ра́дуйся, я́ко вся́ кра́сная ми́ра сего́ во уме́ты вмени́л еси́.

Ра́дуйся, избра́вый доброво́льно тяготы́ служе́ния на чужби́не; ра́дуйся, любо́вь Христо́ву в служе́нии се́м приобреты́й.

Ра́дуйся, апо́столу Па́влу подража́вый; ра́дуйся, креста́ пропове́дническаго не устраши́выйся.

Ра́дуйся, свы́ше прия́вый ду́ха му́жества и дерзнове́ния; ра́дуйся, ревни́телю Правосла́вия, просвети́телем дре́вним единонра́вный.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 3.

Си́лою Бо́жиею свы́ше укрепля́ем, священному́чениче Иоа́нне, утвержда́л еси́ ве́ру правосла́вную во Аме́рице инове́рной и яви́лся еси́ после́дователь преподо́бнаго Ге́рмана Аля́скинскаго, приумножа́я виногра́дник Бо́жий на ни́ве Алеу́тской. Свети́льник сво́й никогда́же, па́стырю до́брый, угаша́л еси́, уны́ние прему́дро низлага́я и во все́х обстоя́ниих ско́рбных навыка́я приноси́ти Го́сподеви смире́нную пе́снь: Аллилу́иа!

И́кос 3.

Име́я вои́стинну, священному́чениче Иоа́нне, ве́лию и и́скреннюю любо́вь к ма́лому ста́ду твоему́, хра́м во и́мя Пресвяты́я Тро́ицы во гра́де Чика́го возве́л еси́. Сего́ ра́ди ра́довашеся благода́рная па́ства твоя́, и немо́лчно сла́вляху преди́внаго Бо́га, ще́драго в ми́лостех Свои́х, взыва́я ти́ си́це:

Ра́дуйся, храмозда́телю, о сла́ве Бо́жией усе́рдно пеки́йся; ра́дуйся, о лю́дех твои́х, я́ко оте́ц о ча́дех, забо́тивыйся.

Ра́дуйся, труды́ ко труда́м прилага́вый; ра́дуйся, про́поведь Ева́нгелия со воздви́жением хра́ма Госпо́дня благополу́чно сочета́вый.

Ра́дуйся, мзду́ от Го́спода за тру́д сво́й справедли́во прия́вый; ра́дуйся, де́йствием Ду́ха Свята́го на дела́ Бо́жия вдохновле́нный.

Ра́дуйся, честна́го па́стырства о́бразе и пра́вило.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Кондак 4

Бу́ря помышле́ний сумни́тельных на́йде на тя́, Иоа́нне священному́чениче, егда́ те́стю твоему́, в боле́знех и неду́зех лежа́щу, зва́ху тя́ ю́жики твоя́ во оте́чествие верну́тися. Ты́ же уве́дел еси́ во призы́ве се́м во́лю Госпо́дню, о тебе́ та́ко промышля́ющу, повину́лся еси́ гла́су сро́дник твои́х и, Иоа́нну Ку́щнику подо́бяся, на ро́дину возверну́лся еси́, Го́сподеви поя́: Аллилу́иа!

И́кос 4.

Слы́шаша бли́жнии твои́ возвраще́ние твое́ с ра́достию срета́ху тя́. Ты́ же, ма́ло уте́шився, па́ки возложи́л еси́ ру́це свои́ на плу́г се́яния сло́ва Бо́жия, во гра́де На́рове водворя́яся во исполне́ние но́ваго послуша́ния церко́внаго. Сего́ ра́ди приими́ от на́с похвалы́ сицевы́я:

Ра́дуйся, во́ле Госпо́дней научи́выйся повинова́тися; ра́дуйся, жела́ний свои́х уме́вый отреша́тися.

Ра́дуйся, испо́лнь послуша́ние Бо́гови безро́потно и недоса́дливо; ра́дуйся, и на́с сле́довати хоте́нию Небе́снаго Отца́ наставля́яй.

Ра́дуйся, вы́ю свою́ под яре́м за́поведей ева́нгельских подклони́вый; ра́дуйся, ле́гкое бре́мя уче́ния Христо́ва в житии́ твое́м носи́вый.

Ра́дуйся, по́мысл тщесла́вия исше́ствием на но́вое ме́сто служе́ния низложи́вый; ра́дуйся, избежа́вый хвалы́ от челове́к исхо́дом из ме́ста, иде́же и́мя твое́ просла́вися.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 5.

Богому́дрым уче́нием Заве́та Но́ваго ду́ши ученико́в твои́х пита́л еси́, трудя́ся неуста́нно, до́ндеже вообрази́тся в сердца́х и́х сладча́йшее и́мя Го́спода Иису́са. Просвети́ у́бо и на́ша о́чи серде́чныя, о́тче на́ш Иоа́нне, да возсия́ет и в ни́х любо́вь Бо́жия, стра́сти грехо́вныя попаля́ющая и от сла́дости мирска́го жития́ отреша́ющая, во е́же чистосерде́чно пе́ти на́м Бо́гови а́нгельскую пе́снь: Аллилу́иа!

И́кос 5.

Ви́дя Промысли́тель Госпо́дь, вся́ на по́льзу раба́м Свои́м стро́яй, я́ко законоучи́тельством ве́лий пло́д принесе́н бу́дет душе́ твое́й и Це́ркви Христо́вой, поста́ви тя́ учи́теля Зако́ну Бо́жию гимна́зий на́ровских. Ты́ же терпе́нием, снисхожде́нием и любо́вию растворя́л еси́ сло́во твое́ о Бо́зе, священному́чениче Иоа́нне, исполня́я за́поведь Христо́ву: «Смотри́те, не пре́зрите еди́наго от ма́лых си́х». Не пре́зри у́бо и на́с, па́стырю до́брый, но умно́жи в на́с ве́ру твои́ми к Бо́гу хода́тайствы, да с благогове́нием взыва́ем ти́ си́це:

Ра́дуйся, наста́вниче отроко́м ма́лым в зако́не Госпо́днем; ра́дуйся, ча́д ма́лых ко Христу́ забо́тливо приводи́вый.

Ра́дуйся, ве́ру, любо́вь и наде́жду в ни́х умножа́вый; ра́дуйся, стра́ху Госпо́дню и́х науча́яй.

Ра́дуйся, на стезя́х спасе́ния стопы́ и́х утвержда́яй; ра́дуйся, на ка́мени за́поведей ева́нгельских душе́вный до́м и́х устроя́яй.

Ра́дуйся, и са́м незло́бию и простоте́ у ни́х учи́выйся; ра́дуйся, назида́вый и́х ко хра́му Бо́жию вы́ну прилепля́тися.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 6.

Про́поведию Ева́нгелия и уче́нием отроко́в непреста́нным у́м тво́й в Бо́ге неподви́жно утверди́л еси́, священному́чениче Иоа́нне. Уже́ бо приспе́ вре́мя убие́ния твоего́, сего́ ра́ди приведе́ тя́ Госпо́дь Путеводи́тель в Село́ Ца́рское, иде́же угото́ва ти́ вене́ц му́ченический, его́же на главе́ свое́й но́сиши, вы́ну поя́ Ему́: Аллилу́иа!

И́кос 6.

Возсия́ в годи́ну гоне́ний лю́тых све́т ве́лий новому́ченик росси́йских от Христа́ Спа́са на́шего. Оба́че тебе́, священному́чениче Иоа́нне, повеле́ Госпо́дь пе́рвым прия́ти сме́рть от руки́ нечести́вых во е́же положи́ти нача́ло кре́пкаго стоя́ния за и́стину Бо́жию. Сего́ ра́ди приими́ от на́с похвалы́ сицевы́я:

Ра́дуйся, за ве́ру правосла́вную и Це́рковь Христо́ву сме́рть вкуси́вый; ра́дуйся, ли́ку му́ченическому сопричи́сленный.

Ра́дуйся, да́же до проли́тия кро́ве своея́ подвиза́выйся; ра́дуйся, Го́сподом на высоту́ страстоте́рпчества поста́вленный.

Ра́дуйся, те́ло убива́ющих не устраши́выйся; ра́дуйся, до конца́ до́лг сво́й па́стырский испо́лнивый.

Ра́дуйся, пу́ть сво́й земны́й ева́нгельски соверши́вый; ра́дуйся, первострада́льче новому́ченик ру́сских.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Кондак 7

Хотя́ уте́шити ду́ши смяте́нныя и умири́ти сердца́, не́навистию помраче́нныя, кре́стным хо́дом по Селу́ Ца́рскому ше́ствовал еси́, о́тче Иоа́нне, моля́ Го́спода о су́щих во вражде́. Но не укроти́ся я́рость зве́рская и не восхоте́ша безу́мнии зло́бу свою́ оста́вити и воспе́ти Го́сподеви: Аллилу́иа!

И́кос 7.

Но́ваго предста́теля о Це́ркви Росси́йстей сотвори́ тя́ безбо́жники, Иоа́нне му́чениче, егда́ убива́ху тя́ на окра́ине гра́да твоего́. Измышля́ше бо нечести́вии ве́ру правосла́вную извести́ на Святе́й Руси́. Поги́бе па́мять и́х с шу́мом, и́мя же твое́ на Небеси́ сия́ет па́че све́та со́лнечнаго и на земли́ от ча́д Це́ркви Ру́сския прославля́ется похвалы́ сицевы́ми:

Ра́дуйся, предста́телю о на́с пред Го́сподем непосты́дный; ра́дуйся, моли́твенниче о ча́дех твои́х дерзнове́нный.

Ра́дуйся, хода́таю о Це́ркви Росси́йстей, Бо́гом избра́нный; ра́дуйся, в ско́рбех на́ших помо́щниче и в беда́х засту́пниче.

Ра́дуйся, боля́щих и стра́ждущих услы́шателю ско́рый; ра́дуйся, воздыха́ния на́ша прие́мляй и к Бо́гу ско́ро вознося́яй.

Ра́дуйся, щито́м моли́тв твои́х от напа́стей на́с огражда́яй; ра́дуйся, чту́щим святу́ю па́мять твою́ покро́ве благода́тный.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 8.

Стра́нник и прише́лец бы́л еси́ в жи́зни вре́менней, священному́чениче Иоа́нне, живы́й во отдале́нии от любе́знаго оте́чества твоего́. Егда́ же соверши́ся вселе́ние твое́ во гра́д Царскосе́льский, то́ и та́мо приста́нища земна́го не обре́л еси́, но а́бие му́ченическую сме́рть прия́л еси́, ше́ствуя к ме́сту упокое́ния ве́чнаго и Го́сподеви поя́: Аллилу́иа!

И́кос 8.

Ве́сь наро́д правосла́вный у́жасом и ско́рбью объя́т бе́, егда́ распространи́ся ве́сть о убие́нии твое́м, Иоа́нне пресви́тере. Сие́ бы́сть нача́лом междоусо́бия стра́шнаго и кровопроли́тия небыва́лаго. Сие́ же бы́сть и нача́лом вели́кия сла́вы Це́ркве на́шея, кровьми́ новому́ченик украси́вшейся, ея́же и ты́, иере́ю Царскосе́льский, прича́стником яви́лся еси́. Сего́ ра́ди вопие́м ти́ такова́я:

Ра́дуйся, на ро́дину возврати́выйся, во е́же приобщи́тися ча́ше страда́ний Госпо́дних; ра́дуйся, ри́зы своя́ убели́вый бели́лами му́к теле́сных.

Ра́дуйся, а́гнче незло́бивый, волка́ми свире́пыми на закла́ние уведе́нный; ра́дуйся, от гре́х свои́х кро́вию соверше́нне омове́нный.

Ра́дуйся, ра́нами твои́ми вше́дый во Свята́я Святы́х Иерусали́ма го́рняго; ра́дуйся, свяще́нное нача́ло Голго́фы ру́сския.

Ра́дуйся, звездо́ путево́дная, све́том спаси́тельным сия́ющая; ра́дуйся, заре́ благода́ти новому́ченик росси́йских.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Кондак 9

Все́м благонра́вным житие́м твои́м привле́кл еси́ к себе́ ве́лию благода́ть му́ченичества, Иоа́нне пресви́тере. Навы́кл бо еси́ измла́да прилепля́тися Бо́гови се́рдцем твои́м, страстоте́рпче чу́дный. Научи́ у́бо и ны́, недосто́йныя, иска́ти па́че всего́ Ца́рствия Бо́жия, презира́ти же преходя́щая и тле́нная, воспева́я во умиле́нии Го́сподеви; Аллилу́иа!

И́кос 9.

Вети́и многовеща́ннии не возмо́гут по достоя́нию сла́ву святы́х изобрази́ти. Смире́нный же у́м на́ш тщи́тся прони́кнути в та́йну убие́ния твоего́. Житие́ твое́ нескве́рное, священному́чениче Иоа́нне, а́ще и потае́но бы́сть, не возмо́же от Бо́га утаи́тися. Сего́ ра́ди приведе́ тя́ Госпо́дь к венцу́ страстоте́рпца но́ваго и соде́ла тя́ вхо́дом новому́ченик росси́йских. Приими́ у́бо от на́с похвалы́ сицевы́я:

Ра́дуйся, в житии́ твое́м те́пле и умиле́нне Бо́гу моли́выйся; ра́дуйся, ду́х сокруше́н и се́рдце незло́бивое име́вый.

Ра́дуйся, во дне́х твои́х покая́нию навы́кнувый; ра́дуйся, сребролю́бия и горды́ни избежа́вый.

Ра́дуйся, чистоту́, воздержа́ние и целому́дрие храни́вый; ра́дуйся, ду́шу имы́й пряму́ю и побужде́ния до́брая.

Ра́дуйся, к бли́жнему твоему́ соуча́стливость и сострада́ние приобреты́й; ра́дуйся, служе́ние у Престо́ла Бо́жия соверша́вый и́стово и благогове́йно.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 10.

Спасти́ хотя́ мно́гия и все́х обраще́ние терпели́вно ожида́яй премилосе́рдый Бо́г, сотвори́ тя́, Иоа́нне пресви́тере, с про́чими новому́ченики хода́таи за зе́млю Ру́сскую. Моли́твы ва́ша мно́гия ду́ши из тьмы́ извлека́ют и на пу́ть спасе́ния поставля́ют. Ублажа́ем и почита́ем вы́, я́ко незри́мыя вино́вники на́шего избавле́ния и пое́м о ва́с Бо́гу: Аллилу́иа!

И́кос 10.

Стена́ еси́ тве́рда все́м прибега́ющим к тебе́, о́тче на́ш Иоа́нне. Обре́л бо еси́ любо́вь, о не́йже пи́сано е́сть, я́ко: «Любы́ долготерпи́т, всему́ ве́рит и всего́ наде́ется», и па́ки: «Не любя́й бо бра́та пребыва́ет в сме́рти», и па́ки: «Соверше́нная любы́ во́н изгоня́ет стра́х». Удиви́ся мно́гия моли́твенному бесстра́шию и дерзнове́нию твоему́ и воспе́ша ти́ похвалу́ сицеву́ю:

Ра́дуйся, о гони́телех свои́х к Бо́гу вопия́вый; ра́дуйся, и́х бра́тией свое́й нарица́вый.

Ра́дуйся, кре́стным хо́дом те́х вразумле́ния иска́вый; ра́дуйся, сего́ ра́ди растерза́ние хи́щное от ни́хже и претерпе́вый.

Ра́дуйся, и́миже оклевета́нный и на сме́рть жесто́кую уведе́нный; ра́дуйся, о́бразе непови́ннаго злострада́ния.

Ра́дуйся, я́ко про́чее ни боле́зни, ни му́ки не косне́шися; ра́дуйся, я́ко со святы́ми ве́чно ра́дуешися.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския.

Конда́к 11.

Пе́ние а́нгельское распространи́ся в Ца́рском Селе́ во времена́ пога́ных воцаре́ния, оскве́рнших зе́млю Ру́сскую. Егда́ убива́ху тя́ безбо́жнии хули́телие, копрони́мы но́выя, тогда́ Небеса́ взыгра́шася, прие́млюще во оби́тели го́рния ду́шу твою́ непоро́чную, о па́стырю на́ш Иоа́нне. Сие́ же все́ бы́сть, да освяти́тся пе́рвее всего́ Село́ пома́занника Госпо́дня, Самоде́ржца чи́стаго, убие́нием иере́я проста́го, я́ко да и на́м почита́ти ме́сто сие́ моли́твенным отсю́ду к Бо́гу взыва́нием: Аллилу́иа!

И́кос 11.

Светоза́рный лу́ч благода́ти новому́ченик озари́ тьму́ кроме́шную, на Святе́й Руси́ воцари́вшуюся. Сие́ бы́сть и пе́рвое зна́мение ми́лости Госпо́дней, я́ко не до конца́ отри́нул Всевы́шний наро́д Сво́й, но вдаде́ и наказа́нию, да пока́ется, да вразуми́тся, да очи́стятся лю́дие Его́, и да воспо́лнится со вре́менем Це́рковь Ру́сская, во е́же и на бу́дущее вре́мя свети́ти Е́й всему́ ми́ру спаси́тельным све́том Правосла́вия. Те́мже вопие́м первому́ченику Царскосе́льскому такова́я:

Ра́дуйся, страстоте́рпче до́блестный, к жи́зни во Христе́ на́с призыва́яй; ра́дуйся, кончи́ною свое́ю кре́ст Госпо́день чти́ти на́с науча́яй.

Ра́дуйся, кро́вию свое́ю му́ченическою ко исправле́нию нра́ва своего́ на́с побужда́яй; ра́дуйся, высото́ю по́двига своего́ к покая́нию на́с непреста́нно зовы́й.

Ра́дуйся, страда́льче честны́й, стра́жем Правосла́вия в стране́ на́шей от Бо́га учине́нный; ра́дуйся, ева́нгельской И́стины свиде́телю добропобе́дный.

Ра́дуйся, волко́в душегуби́тельных от ове́ц ста́да Христо́ва отгоня́яй; ра́дуйся, Це́ркве на́шея охра́но от ересе́й, раско́лов и лжеуче́ний.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 12.

Благода́ти страда́льцев Госпо́дних, кро́вь свою́ за Христа́ пролия́вших, неприча́стна бы́сть Це́рковь во оте́честве на́шем. Ве́мы, я́ко непреста́нная гоне́ния, в ни́хже Це́рковь Вселе́нская роди́ся, не косну́ся изнача́ла Це́ркви Ру́сския. Но не мину́ше Ея́ о́бщая судьба́ Правосла́вия, востече́ бо и Та́ в годи́ну лю́тую еди́нем путе́м ко Христу́ Своему́, вопия́ Ему́: Аллилу́иа!

И́кос 12.

Пою́ще по́двиги му́ченическия, ублажа́ем соу́зников Христо́вых, на ни́хже сло́во Его́ испо́лнися: «Возложа́т на ва́с ру́це и изго́нят вы́». Сие́ определе́ние Бо́жие неукло́нно повсю́ду соблюда́шеся со време́н апо́стольских. Подоба́ше бо и Це́ркви Росси́йстей вни́ти в ча́с испыта́ния своего́, и́же проби́ в Селе́ Ца́рском убие́нием Иоа́нна, иере́я хра́ма собо́рнаго, ему́же глаго́лем си́це:

Ра́дуйся, я́ко ты́ и без числа́ убие́ннии вси́ концы́ земли́ на́шея освяти́ли есте́; ра́дуйся, я́ко не то́кмо своя́, но и грехи́ сооте́чественник свои́х кро́вию свое́ю омы́ли есте́.

Ра́дуйся, я́ко страда́ния твоя́ и всего́ со́нма новому́ченик взыдо́ша фимиа́мом благоуха́нным превы́ше небе́с; ра́дуйся, основа́ние кре́пкое ны́нешнего умноже́ния ве́ры на Руси́.

Ра́дуйся, я́ко же́ртвою твое́ю и собра́тий твои́х, повсю́ду му́чившихся, приклони́ся к на́м на ми́лость Творе́ц вся́ческих; ра́дуйся, сокруши́вый тьму́ безбо́жия и неве́рия прия́тием фиа́ла гне́ва Госпо́дняго.

Ра́дуйся, я́ко тебе́ ра́ди и все́х, на кре́ст возше́дших в годи́ну лю́тую, возсия́ дне́сь заря́ просвеще́ния но́ваго; ра́дуйся, судьбу́ свою́ соедини́вый с судьбо́ю избра́нных сыно́в Це́ркве Ру́сския.

Ра́дуйся, священному́чениче Иоа́нне, па́стырю Села́ Ца́рскаго и первому́чениче Це́ркве Росси́йския!

Конда́к 13.

О новому́чениче и страстоте́рпче Христо́в всече́стне, Иоа́нне, па́стырю Царскосе́льский! Приими́ убо́гое пе́ние от на́с, недосто́йных, чту́щих святу́ю па́мять твою́, и изба́ви на́с моли́твами твои́ми от бе́д настоя́щих, па́че же от ве́чныя сме́рти, да дости́гнув оби́телей Небе́сных, и мы́ с тобо́ю и все́ми святы́ми воспева́ти бу́дем Бо́гу ве́чно: Аллилу́иа!

Этот конда́к чита́ется три́жды, зате́м И́кос 1 и Конда́к 1.

Моли́тва.

О священному́чениче Иоа́нне, па́стырю Царскосе́льский! Предстоя́ще пред ико́ною твое́ю, мо́лимся ти́, я́ко посреде́ на́с су́щему: помози́ на́м, гре́шным, досто́йным бы́ти твоего́ о на́с к Бо́гу хода́тайства. Укрепи́ ны́ во благоче́стии и ве́ре правосла́вной вся́ дни́ живота́ на́шего во е́же безпреткнове́нно ходи́ти на́м путе́м отце́в на́ших и соблюда́ти уста́вы и обы́чаи святы́х, в земли́ на́шей просия́вших. Научи́ ны́ вну́тренняго челове́ка на́шего ева́нгельскою доброде́телию украша́ти и иска́ти Ца́рствия Бо́жия па́че земны́х и тле́нных ми́ра сего́; немощну́ю во́лю на́шу незы́блемо утверди́ в зако́не Госпо́днем; ре́вностию к дела́м богоуго́дным и спаси́тельным воодушеви́ теплохла́дное се́рдце на́ше; изба́ви ны́ от себялю́бия, тщесла́вия и лука́вства; поры́вы гне́ва и неразу́мия на́шего укроти́; нра́в на́ш гордели́вый смиренному́дрием украси́; искорени́ небреже́ние и ле́ность из серде́ц на́ших; уста́ на́ша, дру́г дру́га осужда́ющая, испо́лни чи́стаго хвале́ния Бо́жия; да́руй на́м умиле́ние в моли́тве, ожесточе́нность на́шу врачу́ющее; посреде́ ро́да развраще́ннаго и прелюбоде́йнаго кро́тость, незло́бие и целому́дрие соблюсти́ помози́. Па́че же всего́ наста́ви к покая́нию во гресе́х пре́жней жи́зни на́шея, да очи́стимся от все́х нечисто́т и страсте́й, и, моли́твою твое́ю поспешеству́емы, дости́гнем гра́да Бо́жия, в него́же ничто́ скве́рно вни́ти мо́жет, сла́вяще Тро́ицу Святу́ю во ве́ки веко́в. Ами́нь.