Шрифт

Акафисты святым

Акафист святителю Иоанну Милостивому, патриарху Александрийскому

святителю Иоанну Милостивому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1.

Избра́нный от ми́ра преди́вный уго́дниче Христо́в, ве́ры и и́стины благове́стниче, и́хже, я́ко до́брый се́ятель на ни́ве Христо́вой, в сердца́ ча́д Бо́жиих усе́рдно все́ял еси́, не преста́й моля́ся за ны́ ко Го́споду дарова́ти земли́ на́шей ми́р и безмяте́жие, Це́ркви святе́й от ересе́й и раско́лов огражде́ние, да твои́ми моли́твами от бе́д избавля́еми, благода́рно зове́м ти́:

Ра́дуйся, Иоа́нне, ми́лостивый святи́телю.

И́кос 1.

А́нгела, пламене́юща ду́хом и во пло́ти су́ща челове́ка, избра́ тя́ Госпо́дь бы́ти служи́телем Це́ркви святе́й и овца́м свои́м па́стырем до́брым, от ю́ности бо твоея́ Бо́гу еди́ному се́рдцем и душе́ю прилежа́л еси́. Мы́ же, име́я в тебе́ о́браз па́стыря преди́вна, уми́льно взыва́ем ти́:

Ра́дуйся, земли́ Ки́прския благо́е произраста́ние; ра́дуйся, и́го Христо́во с ра́достию восприя́вый.

Ра́дуйся, в незло́бии се́рдце свое́ соблюды́й; ра́дуйся, все́ю душе́ю Бо́га возлюби́вый.

Ра́дуйся, Тому́ ре́вностно послужи́вый; ра́дуйся, па́стырю Бо́гом избра́нный.

Ра́дуйся, благода́тию архиере́йскою увенча́нный; ра́дуйся, Не́ба церко́внаго украше́ние.

Ра́дуйся, Иоа́нне, ми́лостивый святи́телю.

Конда́к 2.

Ви́дяще тя́ па́стыря по́двигом до́брым подвиза́ющася и, «а́ки еле́нь на исто́чницы водны́я», к Бо́гу устремля́ющася, ста́до же свое́ сло́вом Ева́нгельским, а́ки а́нгельским хле́бом, оби́льно пита́юща, святи́телю о́тче на́ш Иоа́нне, умиля́емся се́рдцем и душе́ю, благодаря́ще Бо́га, дарова́вшаго на́м тебе́, па́стыря на ни́ве церко́вней ве́рна и стра́жа ове́ц Его́ приле́жна, и зове́м Ему́: Аллилу́иа.

И́кос 2.

От ю́ности твоея́, святи́телю на́ш Иоа́нне, орлу́ уподо́бился еси́, от мирски́я суеты́ к высоте́ небе́сней воспари́в, да пости́гнеши глубины́ прему́дрости Бо́жия и в све́те и́стиннаго Богове́дения ста́до твое́ му́дро просвети́ши. Мы́ же наставля́еми тобо́ю покланя́тися Бо́гу, в Тро́ице сла́вимому, воспева́ем ти́ похвалы́ сия́:

Ра́дуйся, процветы́й я́ко фи́никс многопло́дный; ра́дуйся, до́бр о́браз ве́рным показа́вый.

Ра́дуйся, Про́мыслом Бо́жиим при́сно води́мый; ра́дуйся, прему́дрость Бо́жию обреты́й.

Ра́дуйся, Необъя́тнаго ра́зумом ве́рою объя́вый; ра́дуйся, све́т и́стинный все́м возвести́вый.

Ра́дуйся, и́стинному Богопозна́нию научи́вый; ра́дуйся, пра́вды Бо́жией глаша́таю.

Ра́дуйся, Иоа́нне, ми́лостивый святи́телю.

Конда́к 3.

Я́ко се́рна от тене́т, от суеты́ ми́ра сего́ отбе́гл еси́ и к и́ноческому по́двигу потща́лся еси́, Христу́ Бо́гу непоро́чным житие́м благоугоди́л еси́, достоблаже́нне о́тче на́ш Иоа́нне, в труде́х же и бде́ниих, от стра́жи у́тренния до но́щи дрема́ния ве́ждома твои́ма и сна́ очесе́м не дава́л еси́, сего́ ра́ди жили́ще Ду́ха Всесвята́го бы́ти сподо́бился еси́, в Тро́ице пева́емому Бо́гу, я́ко орга́н многостру́нный, непреста́нно воспева́л сла́достное: Аллилу́иа.

И́кос 3.

Всеми́лостиваго Го́спода благосострада́тельное милосе́рдие яви́ся тебе́, досточу́дне о́тче Иоа́нне, во о́бразе боголе́пныя отрокови́цы, от ма́слин вене́ц нося́щей, привлача́ющи тя́ подо́битися дея́ньми твои́ми Всеми́лостивейшему Влады́це; сего́ ра́ди име́ние свое́ непреста́нно расточа́л еси́ убо́гим и ни́щим, да бога́тство неистощи́мое приобря́щеши на Небесе́х. Мы́ же, ви́дяще тя́ ми́лостива помо́щника стра́ждущих и благоде́теля все́х су́щих в беда́х, вопие́м ти́ такова́я:

Ра́дуйся, милосе́рдию Бо́жию подража́вый; ра́дуйся, любвеоби́льный попечи́телю неду́жных.

Ра́дуйся, ми́лостивый па́стырю стра́ждущих; ра́дуйся, многопопечи́тельный о́тче в беда́х су́щих.

Ра́дуйся, ще́дрый да́телю прося́щим; ра́дуйся, безме́здный пита́телю си́рых.

Ра́дуйся, я́ко расточа́л еси́ мно́жество щедро́т.

Ра́дуйся, Иоа́нне, ми́лостивый святи́телю.

Кондак 4

Ви́дя Тя́ пастыренача́льник Христо́с милосе́рдия ева́нгельскаго ревни́теля, служе́ния же и́стинно христиа́нскаго усе́рдна исполни́теля, поста́ви Тя́ я́ко свети́льника све́тла на све́щнице церко́вней, па́стыря изря́дна христоимени́тому ста́ду це́ркви Александри́йския, я́ко да богому́дро пасе́ши слове́сныя о́вцы на па́житех зла́чных и от ересе́й па́губных и́х избавля́еши, да и ти́и, помина́юще оте́ческая наставле́ния твоя́, воспою́т Бо́гу: Аллилу́иа.

И́кос 4.

Прия́в жре́бий апо́стольства от Го́спода твоего́, ча́да своя́ духо́вная уче́нием и оте́ческою любо́вию усе́рдно наставля́л еси́, яви́л еси́ та́кожде о́браз ре́вностнаго исполне́ния де́л благотворе́ния, насыща́я а́лчущих, одева́я наги́х и подава́я утеше́ние все́м, су́щим в ско́рбех. Мы́ же, сла́вяще до́бр о́браз трудо́в твои́х, ублажа́ем тя́ сицевы́ми похвалы́:

Ра́дуйся, ни́вы Христо́вой вертогра́дарю ве́рный; ра́дуйся, де́л милосе́рдия тру́дниче неутоми́мый.

Ра́дуйся, сло́ва Бо́жия до́брый се́ятелю; ра́дуйся, му́дрый учи́телю, просвеща́ющий ве́рных.

Ра́дуйся, любо́вию оте́ческою пасо́мых объе́млющий; ра́дуйся, свети́льниче ве́ры, все́х освеща́ющий.

Ра́дуйся, наста́вниче в доброде́тели всеусе́рдный; ра́дуйся, богому́дрый па́стырю слове́сных ове́ц.

Ра́дуйся, Иоа́нне, ми́лостивый святи́телю.

Конда́к 5.

Путево́дней звезде́ уподо́бился еси́, Иоа́нне преподо́бне, указу́я все́м пу́ть к Ца́рству Небе́сному, его́же и са́м стяжа́л еси́, и ду́шу твою́, я́ко го́рницу сио́нскую, Христу́, Но́вой Па́схе, угото́вал еси́, ю́же, ви́дя смире́нием по́стлану и доброде́телию укра́шену, освяти́ Пастыренача́льник архиере́йскою благода́тию. Ты́ же, я́ко Пе́тр Апо́стол, взыва́л еси́ Ему́: «Го́споди, Ты́ вся́ ве́си, Ты́ ве́си, я́ко люблю́ Тя́», непреста́нно поя́ Ему́: Аллилу́иа.

И́кос 5.

Апо́стольское уче́ние ве́ры и Боже́ственныя благода́ти насле́дие име́я, святи́телю о́тче Иоа́нне, не от челове́к зва́н бы́л еси́, но от десни́цы Бо́жией прия́л еси́ жре́бий служе́ния архиере́йскаго в Це́ркви святе́й, и бре́мя сие́, я́ко кре́ст Христо́в, на ра́мо твое́ взе́м, во вся́ком благоче́стии и чистоте́ слове́сных ове́ц твои́х упа́сл еси́. Зря́ще тя́ па́стыря до́бра Це́ркви Христо́вой приле́жна, лю́дие с любо́вию воспева́ху ти́:

Ра́дуйся, кро́тостию и целому́дрием украше́нный; ра́дуйся, смиренному́дрием и любо́вию возсия́вый.

Ра́дуйся, моли́твою чи́стою благоуха́яй; ра́дуйся, же́ртву чи́стую Бо́гу приноси́вый.

Ра́дуйся, приноше́ния твоя́ моли́твою освяти́вый; ра́дуйся, апо́стольскою ре́вностию объя́тый.

Ра́дуйся, по́двигом до́брым подвиза́выйся; ра́дуйся, я́ко в го́рнем Сио́не пребыва́еши.

Ра́дуйся, Иоа́нне, ми́лостивый святи́телю.

Конда́к 6.

Пропове́дует тя́ Це́рковь Бо́жия стра́жа ве́рна ове́ц слове́сных, и́хже ты́ в безго́дие и дни́ треволне́ния му́дре упа́сл еси́, в ве́ре Правосла́вней до конца́ соблю́л еси́ и моли́твою за вся́ пред же́ртвенником Госпо́дним предстоя́л еси́, па́стырю ми́лостивый Иоа́нне, и та́ко просвети́ся све́т тво́й пред челове́ки, и́же ви́деша до́брая дела́ твоя́ и просла́виша Отца́ Небе́снаго, вопию́ще Ему́: Аллилу́иа.

И́кос 6.

Возсия́л еси́, я́ко свети́ло неугаси́мое, горе́нием ве́ры и чистото́ю души́ твоея́ во гра́де Александри́и, святи́телю Иоа́нне, иде́же Пастыренача́льник Госпо́дь поста́ви тя́ па́сти о́вцы Его́, и́мже ты́ вои́стину бы́л еси́ пра́вило жития́ чи́стаго и, я́ко стра́ж недре́млющ, в ве́ре и́стинней па́ству свою́ утверди́л еси́, о́браз па́стыря до́браго оста́вив на́м, принося́щим ти́ благохвале́ния сия́:

Ра́дуйся, бо́дренно слове́сныя о́вцы охраня́яй; ра́дуйся, оте́ческою любо́вию и́х утеша́яй.

Ра́дуйся, огра́до и́х кре́пкая и несокруши́мая; ра́дуйся, лампа́до све́тлая, в моли́тве неугаси́мая.

Ра́дуйся, Правосла́вныя ве́ры и́стинный ревни́телю; ра́дуйся, пле́велов ве́ры и нече́стия искорени́телю.

Ра́дуйся, пра́вило жи́зни ве́рным явля́яй; ра́дуйся, и́стины и пра́вды наста́вниче.

Ра́дуйся, Иоа́нне, ми́лостивый святи́телю.

Кондак 7

Хотя́й все́м челове́ком спасти́ся, ты́ все́м вся́ бы́л еси́, да, я́коже Па́вел, Христу́ все́х приобря́щеши, святи́телю о́тче Иоа́нне, апо́стольскими бо стопа́ми гра́ды и ве́си проходи́л еси́, зно́й и мра́з претерпева́я, бога́тых и убо́гих, злы́х и до́брых посеща́л еси́, о́вых к целому́дрию, о́вых к братолю́бию призыва́я, а ине́х стра́хом Бо́жиим па́стырски вразумля́я, заблу́ждших же и косне́ющих в е́ресех и раско́лах оте́чески облича́л еси́ и в ве́ре Правосла́вней утвержда́л еси́, да вси́ еди́неми усты́ и еди́ным се́рдцем пою́т Триеди́ному Бо́гу: Аллилу́иа.

И́кос 7.

Я́ко го́лубя яви́ тя́ Госпо́дь, святи́телю Иоа́нне, не ве́твь бо ма́сличную, но благове́стие ева́нгельское су́щим в ковче́зе церко́внем приноси́л еси́ и усты́ Дави́довы к Бо́гу взыва́л еси́: «Да вни́дет пред Тя́ моли́тва моя́, приклони́ у́хо Твое́ к моле́нию моему́». Помяни́ у́бо и на́с, чту́щих тя́ зва́нии си́ми:

Ра́дуйся, непреста́нныя моли́твы Бо́гу приноси́вый; ра́дуйся, ча́д свои́х стра́хом Бо́жиим вразуми́вый.

Ра́дуйся, покая́нныя и́х воздыха́ния Бо́гу возноси́вый; ра́дуйся, в гове́нии вкуша́вый а́нгельскую сла́дость.

Ра́дуйся, терпе́нием обреты́й ева́нгельскую ра́дость; ра́дуйся, ковче́же, преиспо́лненный благода́тию.

Ра́дуйся, Та́йны Христо́выми освяще́нный; ра́дуйся, Та́инств Бо́жиих ди́вный строи́телю.

Ра́дуйся, Иоа́нне, ми́лостивый святи́телю.

Конда́к 8.

Чу́дно творя́й пути́ на́шего спасе́ния Человеколю́бец Госпо́дь, ви́дя тя́ па́стыря ове́ц свои́х приле́жна и Правосла́вныя ве́ры храни́теля тве́рда, а́ки ро́су на руно́ Гедео́ново, дарова́ тя́ па́стыря изря́дна своея́ па́жити, святи́телю Иоа́нне, увенча́ земно́е стра́нствие твое́ венце́м нетле́ния и поста́ви тя́ пред Престо́лом Сла́вы Своея́ моли́твенника о на́с, гре́шных, те́пла. Сего́ ра́ди, Бо́гу, во бла́го вся́ устроя́ющему, со умиле́нием зове́м: Аллилу́иа.

И́кос 8.

Всего́ себе́ в ру́це Бо́жии преда́вый, к па́стве твое́й смире́нно стопы́ своя́ напра́вил еси́, в не́йже бы́л еси́ убо́гим прибе́жище и бе́дствующим избавле́ние, ю́ным чистоты́ и целому́дрия до́брое наставле́ние, вдови́цам и си́рым благо́е попече́ние, неради́вым ча́дом вразумле́ние и во озлобле́нии су́щим незло́бивое обличе́ние, Це́ркви Христо́вой от вся́кия напа́сти му́дрое защище́ние, все́х прибега́ющих к тебе́ утеша́я и благопотре́бная и́м ко спасе́нию подава́я. О се́м приими́ от на́с, почита́ющих па́мять твою́, похвалы́ такова́я:

Ра́дуйся, сокро́вище твое́ до́бре расточи́вый; ра́дуйся, пла́менне па́ству Христо́ву возлюби́вый.

Ра́дуйся, же́ртвенную любо́вь па́стве яви́вый; ра́дуйся, в бли́жних свои́х Го́спода возлюби́вый.

Ра́дуйся, Го́споду своему́ ве́рно послужи́вый; ра́дуйся, архиере́ю Бо́жий, свы́ше просла́вленный.

Ра́дуйся, иера́рше Христо́в, венце́м сла́вы увенча́нный; ра́дуйся, я́ко над мно́гими поста́ви тя́ Госпо́дь.

Ра́дуйся, Иоа́нне, ми́лостивый святи́телю.

Кондак 9

Вси́ лю́дие христоимени́тыя па́ствы ви́деша тя́, па́стыря своего́, смире́нием и милосе́рдием сия́юща, просла́виша Бо́га, святи́телю о́тче Иоа́нне; ты́ же, любо́вию к ни́м испо́лненный, я́ко о ча́дех свои́х, сле́зныя моли́твы Бо́гу де́нь и но́щь излива́л еси́. Сего́ ра́ди лю́дие твои́, умиля́ющеся се́рдцем и душе́ю, воспева́ху Бо́гу, дарова́вшему и́м такова́го святи́теля ди́вна: Аллилу́иа.

И́кос 9.

Ка́ко восхва́лим по достоя́нию высоту́ смире́ния твоего́, святи́телю Иоа́нне, и́мже укроти́л еси́ прего́рдаго кли́рика твоего́, я́ко к нему́, ды́шущему зло́бою на тя́, ты́ у алтаря́ Госпо́дня поклони́лся еси́, кро́тко прося́ у него́ проще́ния. Си́м смире́нием свои́м ты́ па́че громогла́сных слове́с обличи́л еси́ его́, я́ко то́й, пла́ча и рыда́я, позна́ гре́х сво́й, раска́яся и за богоуго́дное житие́ сподо́бися свяще́ннаго зва́ния. Мы́ же, от злы́х де́л свои́х посрамля́еми, дерза́ем в покая́нии зва́ти Бо́гу: «Го́споди. Да́руй ми́ зре́ти моя́ прегреше́ния и не осужда́ти бра́та моего́», тебе́ же приноси́ти похвалы́ сицева́я:

Ра́дуйся, сосу́де и́стиннаго смире́ния; ра́дуйся, любве́ нелицеме́рныя рачи́телю.

Ра́дуйся, а́гнче незло́бивый, ко́зни вра́жия попра́вый; ра́дуйся, кро́тостию твое́ю досажде́ния покрыва́вый.

Ра́дуйся, ропта́ние и злохуле́ние возненави́девый; ра́дуйся, терпе́ние кре́пкое стяжа́вый.

Ра́дуйся, кади́ло чи́стаго благоуха́ния; ра́дуйся, свети́льниче неземна́го сия́ния.

Ра́дуйся, Иоа́нне, ми́лостивый святи́телю.

Конда́к 10.

Повеле́ Госпо́дь хотя́щим спасти́ ду́шу свою́ – погуби́ти ю́ ра́ди друго́в свои́х. Ты́ же, святи́телю Иоа́нне, ду́шу твою́ о па́стве твое́й полага́л еси́ и до кончи́ны жития́ же́ртву Безкро́вную за вся́ лю́ди Бо́гу принося́, в кро́тости душе́вней взыва́л еси́ к Нему́: «Го́споди, на́с же все́х, от еди́наго Хле́ба и Ча́ши причаща́ющихся, соедини́, и ни еди́наго на́с осужде́ния сотвори́, но да обря́щем ми́лость и благода́ть со все́ми святы́ми, от ве́ка Тебе́ благоугоди́вшими, во е́же зва́ти Тебе́: Аллилу́иа».

И́кос 10.

Светоза́рную звезду́ Христо́с тя́ на высоте́ церко́вней яви́, о́тче Иоа́нне, я́ко апо́стольский престо́л украси́л еси́ изря́дно де́лы боже́ственными; милосе́рдием же и ми́лостынею па́че все́х милосе́рдием возсия́вших святы́х наре́клся еси́«Ми́лостив»: обогати́ бо тя́ зело́ пода́тель благи́х Христо́с, и житие́ твое́, па́че со́лнца возсия́вшее, милосе́рдия испусти́ лучи́ тре́бующим, отгоня́ющия те́мный о́блак нищеты́, всебога́те. Сего́ ра́ди мы́, озаря́еми неме́ркнущим све́том милосе́рдия твоего́, вопие́м ти́ си́це:

Ра́дуйся, страннолю́бче ще́дрый и пле́нных свободи́телю; ра́дуйся, проше́ния обремене́нных ско́ро исполня́яй.

Ра́дуйся, сле́зы ча́д свои́х ми́лостию осуша́яй; ра́дуйся, житие́ твое́ в милосе́рдии проводи́вый.

Ра́дуйся, преизоби́льное милосе́рдие на́м яви́вый; ра́дуйся, доброде́тельми твои́ми Бо́гу благоугоди́вый.

Ра́дуйся, стра́же ве́рный, бла́го Це́ркви соблюда́яй; ра́дуйся, сосу́де моли́тв, и́миже де́моны дале́че отступа́ют.

Ра́дуйся, Иоа́нне, ми́лостивый святи́телю.

Конда́к 11.

Небе́сный гла́с: «Ца́рь Царе́й зове́т тя́ к Себе́» слы́шати сподо́бился еси́, святи́телю Иоа́нне, егда́ прибли́жися кончи́на жития́ твоего́. Бо́г упра́ви стопы́ твоя́ на Ки́пр, иде́же ты́, дости́гнув оте́ческаго гра́да твоего́ Амафу́нта, в ми́ре преста́вился еси́ ко Го́споду, вознеся́ ему́ моли́тву: «Благодарю́ Тя́, Го́споди Бо́же мо́й, я́ко сподо́бил мя́ еси́ принести́ вся́ Твоя́ Тебе́, Ему́же ны́не предаю́ и ду́шу мою́». Мы́ же, ве́дяще я́ко Бо́г по блаже́нней кончи́не твое́й ди́вно просла́ви тя́, со умиле́нием серде́ц вопие́м Ему́: Аллилу́иа.

И́кос 11.

Свети́ло пресве́тлое Це́ркви Христо́вой возсия́л еси́, святи́телю Иоа́нне, в житии́ бо твое́м и по преставле́нии к Небе́сным ча́д твои́х не оставля́еши, но ру́це моле́бнии ко Христу́ воздева́еши о на́ших гресе́х и о все́х лю́дех, и та́ко гне́в Бо́жий, пра́ведно на ны́ дви́жимый, моле́нием твои́м умилостивля́еши и вре́мя на покая́ние дарова́ти на́м Его́ умоля́еши, да не безпло́дны яви́мся пред лице́ Судии́ Пра́веднаго, но я́коже му́дрыя де́вы, со свети́льники ве́ры испо́лненными. Сего́ ра́ди тебе́, пред Бо́гом при́сному о на́с предста́телю, вседуше́вно взыва́ем:

Ра́дуйся, закосне́лую со́весть в на́с пробужда́ющий; ра́дуйся, в ева́нгельстей и́стине на́с утвержда́ющий.

Ра́дуйся, к чистоте́ се́рдца на́с призыва́ющий; ра́дуйся, трапе́зою духо́вною на́с пита́ющий.

Ра́дуйся, в невече́рнем дни́ ди́вно сия́ющий; ра́дуйся, с ли́ки А́нгельскими обита́ющий.

Ра́дуйся, в моли́твах о на́с не умолка́ющий; ра́дуйся, предста́телю на́ш у Престо́ла Бо́жия.

Ра́дуйся, Иоа́нне, ми́лостивый святи́телю.

Конда́к 12.

Благода́ти неисповеди́мое зна́мение яви́ на́м Госпо́дь, укра́си бо сла́вный гра́д Александри́ю, я́ко Ковче́г Заве́та в дре́вней Ски́нии двема́ Херуви́мы, столпа́ми и́стины и любве́: святи́телем Афана́сием, безбоя́зненным блюсти́телем пра́вила ве́ры, и уго́дником Свои́м Иоа́нном, о́браз на́м милосе́рдия явля́ющим, си́м показу́я, да вси́ ве́рнии свя́то храня́т и́стину и пребыва́ют в любви́, укрепля́ются в Правосла́вней ве́ре и в ра́дости душе́вней взыва́ют Триеди́ному Бо́гу: Аллилу́иа.

И́кос 12.

Пою́ще ве́лия и пресла́вная чудеса́ твоя́, святи́телю Христо́в Иоа́нне, почита́ем свяще́нную па́мять твою́ и благогове́йно мо́лим тя́, во е́же ми́лостивно дарова́ти на́м мно́гая душа́м на́шим поле́зная и ко спасе́нию потре́бная. Мы́ же, име́я тя́ неусы́пна пред Бо́гом о на́с предста́теля и засту́пника, благода́рне зове́м ти́ такова́я:

Ра́дуйся, Христо́м Бо́гом возлю́бленный; ра́дуйся, те́плый пред Бо́гом предста́телю.

Ра́дуйся, упова́ние призыва́ющих тя́ с ве́рою; ра́дуйся, о ча́дех Бо́жиих ве́рный попечи́телю.

Ра́дуйся, от вся́ких на́с бе́д покрыва́яй; ра́дуйся, пропове́дниче ми́ра Бо́жия.

Ра́дуйся, апо́стольския ве́ры тве́рдый храни́телю; ра́дуйся, Правосла́вия неустраши́мый испове́дниче.

Ра́дуйся, Иоа́нне, ми́лостивый святи́телю.

Конда́к 13.

О всеблаже́нне па́стырю на́ш, святи́телю о́тче Иоа́нне, приими́ ма́лое сие́ моле́ние на́ше, с любо́вию тебе́ приноси́мое, и умоли́ Христа́ Бо́га, да изба́вит на́с от вся́ких бе́д, скорбе́й и напа́стей, и ми́ром незы́блемым жи́знь на́шу да огради́т. Це́рковь же святу́ю Свою́ от раско́лов и нестрое́ний соблюде́т, и вся́ лю́ди Своя́ ко единомы́слию ве́ры и любве́ к Себе́ приведе́т, во е́же в невече́рнем дни́ Ца́рствия Его́ всегда́ воспева́ти Ему́: Аллилу́иа.

Этот конда́к читается трижды, затем и́кос 1-й и конда́к 1-й.

Моли́тва.

Святи́телю Бо́жий Иоа́нне, ми́лостиве защи́тниче си́рых и су́щих в напа́стех. К тебе́ прибега́ем и тебе́ мо́лимся, я́ко ско́рому покрови́телю все́х и́щущих от Бо́га утеше́ния в беда́х и ско́рбех. Не преста́й моля́ся ко Го́споду о все́х с ве́рою притека́ющих к тебе́. Ты́, преиспо́лнен сы́й Христо́вы любви́ и бла́гости, яви́лся еси́ я́ко чу́дный черто́г доброде́тели милосе́рдия и стяжа́л еси́ себе́ и́мя «Ми́лостивый». Ты́ бы́л еси́ я́ко река́, непреста́нно теку́щая ще́дрыми ми́лостьми и все́х жа́ждущих оби́льно напая́ющая. Ве́руем, я́ко, по преселе́нии от земли́ на Не́бо, усугу́бися в тебе́ да́р благода́ти сея́ и я́ко соде́лался еси́ неисчерпа́емый сосу́д вся́кия благосты́ни. Сотвори́ у́бо твои́м хода́тайством и заступле́нием пред Бо́гом «вся́кия уте́хи», да вси́, прибега́ющии к тебе́, обрета́ют ми́р и безмяте́жие: да́руй и́м утеше́ние в печа́лех вре́менных и посо́бие в ну́ждах жите́йских, всели́в в ни́х наде́жду ве́чнаго упокое́ния во Ца́рствии Небе́снем. В житии́ твое́м на земли́ ты́ бы́л еси́ приста́нище все́м су́щим во вся́кой беде́ и ну́жде, оби́димым и неду́гующим; ни еди́н от притека́вших к тебе́ и проси́вших у тебе́ ми́лости лише́н бы́сть твоея́ благосты́ни. То́жде и ны́не, ца́рствуя со Христо́м Бо́гом на Небеси́, яви́ все́м покланя́ющимся пред честно́ю твое́ю ико́ною и моля́щимся о по́мощи и заступле́нии. Не то́чию са́м ты́ твори́л еси́ ми́лость беспо́мощным, но и сердца́ други́х воздвига́л еси́ ко утеше́нию немощны́х и к призре́нию убо́гих. Подви́гни у́бо и ны́не сердца́ ве́рных к заступле́нию си́рых, утеше́нию скорбя́щих и успокое́нию неиму́щих. Да не оскудева́ют в ни́х да́ры ми́лости, па́че же да всели́тся в ни́х ми́р и ра́дость о Ду́се Свя́те во сла́ву Го́спода и Спа́са на́шего Иису́са Христа́, во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (которому читался акафист) и всех святы́х, спаси́ и помилуй мя, гре́шнаго, яко Благ и Человеколюбец.

святителю Иоанну Милостивому