Шрифт

Акафисты соборам святых

Акафист Собору преподобных отец Соловецких

Конда́к 1

Избра́ннии вои́тели Христо́ви и благоче́стия подви́жницы,/ преподо́бнии Зоси́мо, Савва́тие и Ге́рмане со сподви́жники досто́йными,/ ва́ми бо ди́вно просла́вися и́мя Госпо́дне во страна́х Беломо́рия,/ и вся Ру́сская Це́рковь весели́тся о святы́ни ва́шей;/ покланя́ющеся той, благода́рно вопие́м вам:// Ра́дуйтеся, преподо́бнии отцы́ на́ши, вси святи́и Солове́цкии.

И́кос 1

А́нгельским житие́м жи́тельствовавше, отцы́ преблаже́ннии, безпло́тным подража́ти тща́щеся доброде́тельми, чистото́ю тех ду́шы своя́ убели́ли есте́, телеса́ истончи́вше труды́ по́стническими, я́ко а́нгели на земли́ пребыва́ли есте́; мы же таково́му житию́ ва́шему дивя́щеся, сию́ похвалу́ прино́сим вам:

Ра́дуйтеся, ми́ра избе́гшии и во ото́ки морски́я прише́дшии;

ра́дуйтеся, прише́ствием ва́шим мно́гих ко Христу́ приве́дшии.

Ра́дуйтеся, жи́тельство и́ноческое в пусты́ни се́верней созида́вшии;

ра́дуйтеся, по́двиги до́брыми и чудесы́ та́мо просия́вшии.

Ра́дуйтеся, рай благоцвету́щий во стране́ полу́нощней насади́вшии;

ра́дуйтеся, тоя́ язы́ки све́том и́стины Христо́вы просвети́вшии.

Ра́дуйтеся, я́ко труды́ мно́гими труди́вшиися во благоче́стии;

ра́дуйтеся, а́нгели земни́и и челове́цы Небе́снии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 2

Ви́дяще лю́дие страны́ Помо́рския и Коре́льския, я́ко до́бре жи́тельствуете во оби́тели ва́шей, по́двиги ди́вныя соверша́юще Бо́жиею благода́тию, приобща́хуся бра́тству ва́шему, и ку́пно с ва́ми воспева́ху Христу́ Бо́гу: Аллилу́ия.

И́кос 2

Ра́зумом Небе́сным просвеща́еми, неразу́мие живу́щих во стране́ се́верней просвети́ли есте́ от неве́рия к ве́ре и́стинней обраще́нием: ти́и бо ра́достно сле́доваху стезя́ми ва́шими, учи́телей до́брых вас почита́юще. Сотвори́те и нас недосто́йных ученики́ ва́ша бы́ти, да весе́лием глаго́лем вам:

Ра́дуйтеся, Вседержи́теля Бо́га ве́рнии служи́тели;

ра́дуйтеся, свяще́нных ото́ков свяще́ннии жи́тели.

Ра́дуйтеся, мно́гия ско́рби и беды́ и нападе́ния вра́жия претерпе́вшии;

ра́дуйтеся, Го́спода ра́ди вся блага́я ми́ра сего́ презре́вшии.

Ра́дуйтеся, Крест Христо́в с любо́вию ве́лиею подъе́мшии;

ра́дуйтеся, сла́дость ра́йскую еще́ на земли́ вкуси́вшии.

Ра́дуйтеся, плоть свою́ со страстьми́ и похотьми́ распе́ншии;

ра́дуйтеся, благода́ть у Го́спода обре́тшии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 3

Си́лою Вы́шняго укрепля́еми, отцы́ всечестни́и, лю́тых страсте́й победи́тели яви́стеся, боре́ньми кре́пкими, моли́твами сле́зными, труды́ бде́нными си́лу вра́жию низложи́ли есте́. Тем изба́вльшеся злых по́мыслов и безстра́стием украси́вшеся, любо́вию воспе́ли есте́ лю́бящему вас Бо́гу: Аллилу́ия.

И́кос 3

Иму́ще сердца́ своя́ горе́, в Небе́сных оби́телех сокро́вище себе́ собира́ли есте́, досточу́днии, и, мно́гими да́ры Всеще́драго Бо́га обогати́вшеся, да́нная вам от Него́ во сто крат приумно́жили есте́. Те́мже, прославля́юще по́двиги ва́ша, со умиле́нием взыва́ем вам:

Ра́дуйтеся, нището́ю духо́вною Ца́рство Небе́сное сниска́вшии;

ра́дуйтеся, мудрова́нием смире́нным мир непоколеби́мь в душа́х стяжа́вшии.

Ра́дуйтеся, кро́тостию ду́ха зе́млю кро́тких насле́довавшии;

ра́дуйтеся, чистото́ю серде́чною А́нгелом приобщи́вшиися.

Ра́дуйтеся, я́вльшиися сокро́вище неиждива́емое Солове́цкой оби́тели;

ра́дуйтеся, и́ноком ея́ засту́пницы и покрови́тели.

Ра́дуйтеся, мона́хов мно́жества наста́вницы;

ра́дуйтеся, Христо́ви ве́рнии избра́нницы.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 4

Бу́ря напа́стей не возмо́же возмути́ти тишины́ душ ва́ших, в Бо́зе уста́вленных и моли́твою к Нему́ управля́емых: от Того́ бо дар чудотворе́ний прие́мше, бу́ри морски́я и жите́йския укроща́ете, вспомощству́юще от тех стра́ждущим. Те́мже спа́сшиися от бед заступле́нием ва́шим велегла́сно воспева́ют Бо́гу: Аллилу́ия.

И́кос 4

Слы́шавше лю́дие о чудесе́х ве́лиих, содева́емых ва́ми, и о по́мощи, неоску́дно подае́мой прибега́ющим к вам в моли́твах, укрепля́хуся ве́рою ко святы́ни ва́шей, и предста́телей до́брых вас пред Бо́гом полага́юще, хвалу́ воздава́ху вам пе́нии сицевы́ми:

Ра́дуйтеся, в мо́ри пла́вающим благоути́шнии упра́вители;

ра́дуйтеся, от ги́бельнаго потопле́ния ве́рнии изба́вители.

Ра́дуйтеся, вопию́щих к вам о по́мощи ско́рии услы́шатели;

ра́дуйтеся, печа́льных и обремене́нных тягота́ми жите́йскими уте́шители.

Ра́дуйтеся, спу́тницы благонаде́жнии ше́ствующим путе́м приско́рбным и те́сным;

ра́дуйтеся, хода́таи те́плии о таковы́х пред Отце́м Небе́сным.

Ра́дуйтеся, тружда́ющимся труды́ честны́ми помо́щницы усе́рднии;

ра́дуйтеся, Боже́ственных повеле́ний исполни́тели тве́рдии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 5

Боголюбе́знии тру́женицы ни́вы духо́вныя яви́лися есте́, отцы́ преблаже́ннии, жела́нием Боже́ственным побежда́юще вся мудрова́ния земна́я, попече́ния ина́го не иму́ще, ра́зве о сла́ве Госпо́дней и о спасе́нии душ ва́ших, е́же и достиго́сте любо́вию Бо́жиею невозбра́нно. Ны́не в ве́чней сла́ве его́ пребыва́юще, с ли́ки Небе́сными воспева́ете Бо́гу: Аллилу́ия.

И́кос 5

Ви́девше врази́ ро́да челове́ческаго доброде́тельное житие́ ва́ше, я́ко по́двиги до́брыми в Ца́рство Небе́сное путь себе́ удо́бне уготовля́ете, мно́гажды тща́хуся воспяти́ти вам и погуби́ти нападе́нием лука́вых супоста́тов: ва́шими же моли́твами ти́и всегда́ посра́млени отхожда́ху, оби́тели и ото́ком сим николи́же могу́ще вреди́ти. Тем с благодаре́нием серде́чным пое́м вам си́це:

Ра́дуйтеся, земли́ Солове́цкой неусы́пнии храни́тели;

ра́дуйтеся, тишины́ и ми́ра ея́ наде́жнии защи́тители.

Ра́дуйтеся, всех враго́в ея́ неща́дно прогоня́ющии;

ра́дуйтеся, всех живу́щих в ней от злых напа́стей огражда́ющии.

Ра́дуйтеся, вся́кия лжи и ле́сти гро́знии обличи́тели;

ра́дуйтеся, пра́вды Бо́жия до́блественнии ревни́тели.

Ра́дуйтеся, и́стины Христо́вы немо́лчнии пропове́датели;

ра́дуйтеся, дре́вним святы́м досто́йнии после́дователи.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 6

Пропове́дует Це́рковь Правосла́вная свя́тость жития́ и вели́чие по́двиг преподо́бных оте́ц Солове́цких, хвалу́ воздаю́щи сему́ досточти́мому собо́ру пе́нием духо́вным, ди́внаго же во святы́х Свои́х Бо́га ра́достию прославля́ет, пою́щи: Аллилу́ия.

И́кос 6

Возсия́ла есть ва́ми, достоблаже́ннии отцы́, во стране́ полу́нощней сла́ва Еди́наго И́стиннаго Бо́га, в Тро́ице покланя́емаго: е́юже просла́вишася морсти́и ото́цы, Боже́ственным свяще́нием освяти́шася, благода́ти преизоби́льно испо́лнишася. Сего́ ра́ди чту́щии святы́ню сию́ притека́ют се́мо и по достоя́нию пою́т вам:

Ра́дуйтеся, благода́ть Госпо́дню ото́ком Солове́цким усво́ившии;

ра́дуйтеся, в жили́ще прему́дрости Бо́жия сия́ угото́вившии.

Ра́дуйтеся, Го́спода пред очи́ма вну́треннима при́сно име́вшии;

ра́дуйтеся, на криле́х доброде́телей в Го́рний Сио́н возлете́вшии.

Ра́дуйтеся, подвиза́ющимся по́двигом духо́вным вспомоществу́ющии;

ра́дуйтеся, мона́шескаго де́лания о́браз показу́ющии.

Ра́дуйтеся, ди́вная зна́мения и чудеса́ явля́ющии;

ра́дуйтеся, Бо́га в Це́ркви преподо́бных прославля́ющии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 7

Хотя́ще мирски́я суеты́ избежа́ти и еди́ному Бо́гу порабо́тати, в пусты́нных ото́цех водвори́лися есте́, преподо́бнии, у челове́к у́бо забве́нных, у Бо́га же возлю́бленных, моле́ний фимиа́мом облагоуха́вше я́ и по́двиги трудо́в возде́лавше, Бо́гу непреста́нно песнь пою́ще: Аллилу́ия.

И́кос 7

Но́вии чудотво́рцы и уго́дницы Бо́жии показа́стеся, преподо́бнии отцы́ на́ши: вы́ше естества́ житие́ яви́ли есте́, си́лою Бо́жиею укрепля́еми. На́ше уны́лое житие́ оживотвори́те чу́дными дыха́нии те́плых моли́тв ва́ших, да ве́тхости совле́кшеся, доброде́тельми обнови́мся и умиле́нно воспое́м вам:

Ра́дуйтеся, я́ко ва́ми Вы́шняго прему́дрость оправди́ся;

ра́дуйтеся, я́ко ва́ми и́стина Госпо́дня утверди́ся.

Ра́дуйтеся, я́ко по́двиги ва́шими ото́цы Солове́цкии просла́вишася;

ра́дуйтеся, я́ко усе́рдием ва́шим на спасе́ния стези́ и́нок мно́жества наста́вишася.

Ра́дуйтеся, в за́поведех Госпо́дних поуча́ющимся му́дрии учи́тели;

ра́дуйтеся, обраща́ющихся ко Христу́ блази́и попечи́тели.

Ра́дуйтеся, жела́ющим спасти́ся неоску́дно по́мощь подаю́щии;

ра́дуйтеся, в го́рния оби́тели ко Го́споду зову́щии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 8

Стра́нницы бы́сте во юдо́ли земно́й, отцы́ преблаже́ннии, восходя́ще душе́ю в Небе́сныя кро́вы, жела́ние се́рдца ва́шего в вы́шнем положи́ли есте́. Ны́не жела́ние сие́ улучи́вше, в дому́ Бо́жии пребыва́ете, со все́ми святы́ми пою́ще Бо́гу ве́чную песнь: Аллилу́ия.

И́кос 8

Всех вас, избра́нников Свои́х, от суеты́ мирски́я приведе́ Госпо́дь к житию́ надми́рному: во о́нем благоче́стно дни своя́ сконча́вше, соверше́нства и́ноческаго достиго́сте. Мы же о́браз жития́ ва́шего во очесе́х мы́сленных иму́ще и кончи́ну ва́шу че́стну на па́мять приводя́ще, возно́сим вам хвале́ния сицева́я:

Ра́дуйтеся, в тя́жестех трудо́в мона́шеских на Бо́га упова́вшии;

ра́дуйтеся, спасе́ние Его́ всем се́рдцем позна́вшии.

Ра́дуйтеся, в та́йных селе́ниих Госпо́дних ду́хом обита́вшии;

ра́дуйтеся, вели́чествия Непостижи́маго и сла́вы Его́ трепета́вшии.

Ра́дуйтеся, ны́не во оби́телех Небе́сных пребыва́ющии;

ра́дуйтеся, чудоде́йственную по́мощь лю́дем свы́ше простира́ющии.

Ра́дуйтеся, враго́в спасе́ния на́шего устраша́ющии;

ра́дуйтеся, красото́ю по́двиг ва́ших Це́рковь украша́ющии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 9

Все естество́ а́нгельское диви́тся чу́дному житию́ ва́шему, я́ко безпло́тным подо́бящеся, в по́стничестве неосла́бнем, в трезве́нии бде́ннем, в моли́твах непреста́нных на земли́ пребыва́ли есте́: тем укрепля́юще вас в безме́рных труде́х ва́ших, воздвиза́ху вас на похвалу́ Боже́ственную, вку́пе с ва́ми пою́ще: Аллилу́ия.

И́кос 9

Вети́и многовеща́ннии не мо́гут по́двиги ва́ша по достоя́нию просла́вити, достоблаже́ннии; недоуме́ют бо, ка́ко во ото́цех се́верных, а́ки во стране́ полу́денней жи́тельствовали есте́ и подо́бницы вели́ким отце́м пусты́нным бы́ли есте́. Мы же ве́лию ми́лость Бо́жию ко отре́кшимся себе́ во и́мя Его́ ве́дяще, воспева́ем вам такова́я:

Ра́дуйтеся, благода́тию Свята́го Ду́ха осия́ннии;

ра́дуйтеся, то́ю к подвиго́м преподо́бия призва́ннии.

Ра́дуйтеся, во мра́зе лю́те то́ю согрева́емии;

ра́дуйтеся, пи́щею нетле́нною ще́дро снабдева́емии.

Ра́дуйтеся, Ду́хом восхища́емии в Небе́сныя оби́тели;

ра́дуйтеся, я́вльшиися тех приснора́достнии жи́тели.

Ра́дуйтеся, благода́ти Бо́жия неизрече́ннии таи́нницы;

ра́дуйтеся, дерзнове́ннии о нас ко Го́споду моли́твенницы.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 10

Спасти́ хотя́ще ду́шы своя́, в ру́це Иму́щему спасе́ние всеце́ло преда́ли есте́ их, блаже́ннии, и преизлива́ющияся сосу́ды благода́ти сотвори́сте их. Боже́ственным восхожде́нием на высоту́ доброде́телей восходя́ще, Бо́гу хвале́бную песнь воспева́сте: Аллилу́ия.

И́кос 10

Стена́ необори́мая яви́стеся бра́тству Солове́цкому и всем притека́ющим под кров оби́тели ва́шея, досточу́днии уго́дницы Бо́жии, от напа́стей и бед огражда́юще их благомо́щною свое́ю моли́твою. Сего́ ра́ди на заступле́ние ва́ше пред Бо́гом и по́мощь упова́юще, взыва́ем к вам хвале́нии таковы́ми:

Ра́дуйтеся, в не́мощех нас посеща́ющии;

ра́дуйтеся, от паде́ний грехо́вных нас избавля́ющии.

Ра́дуйтеся, неду́ги душе́вныя и теле́сныя врачу́ющии;

ра́дуйтеся, в зако́не Госпо́дни ходя́щим вспомоществу́ющии.

Ра́дуйтеся, из бе́здны страсте́й челове́ки изводя́щии;

ра́дуйтеся, милосе́рдие Госпо́дне на всех низводя́щии.

Ра́дуйтеся, враги́ Бо́жия и собла́зны ве́ка сего́ расточа́ющии;

ра́дуйтеся, со все́ми святы́ми дне прише́ствия Госпо́дня ча́ющии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 11

Пе́ние благода́рственное непреста́нно возно́сим вам, преподо́бнии отцы́ на́ши; ва́ми бо обрето́хом сию́ достосла́вную кинови́ю, ва́ми спаси́тельная благода́ть Госпо́дня простре́ся во ото́цех Солове́цких и во все́й стране́ полу́нощней; сего́ ра́ди па́мять ва́ша ми́лостию Бо́жиею повсю́ду досто́йно почита́ема быва́ет. И мы прославля́ющему вас Бо́гу всера́достно взыва́ем: Аллилу́ия.

И́кос 11

Свети́льницы светоза́рнии, над бе́здною мирска́го мяте́жа горя́щии, яви́стеся преподо́бнии отцы́ Солове́цкии, све́том Христо́вым осиява́юще богоизбра́нныя ото́ки. Не пре́зрите во оби́тели ва́шей жи́тельствующих и всех, ве́рою к вам притека́ющих, милосе́рдие Бо́жие к нам приклони́те, да благода́рным се́рдцем вы́ну воспева́ем вам:

Ра́дуйтеся, све́том Боже́ственным нас просвеща́ющии;

ра́дуйтеся, во́ду живу́ю богопозна́ния нам источа́ющии.

Ра́дуйтеся, в де́лании за́поведей Госпо́дних нас му́дро наказу́ющии;

ра́дуйтеся, в Ца́рствие Небе́сное путь ве́рный нам указу́ющии.

Ра́дуйтеся, в не́дрех ото́ков морски́х почива́ющии;

ра́дуйтеся, нетле́нными мощьми́ ва́шими страну́ на́шу освяща́ющии.

Ра́дуйтеся, чудеса́ и исцеле́ния во изоби́лии творя́щии;

ра́дуйтеся, святы́ню Бо́жию в неоскуде́нии храня́щии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 12

Благода́тию Бо́жиею вся по́двиги соверши́ли есте́, прему́дрии, дела́ ди́вная и до́брая показу́юще, насле́дие неиждива́емое нам оста́вили есте́. Сим богатя́щеся и утвержда́ющеся в доброде́телех, пое́м да́вшему вам кре́пость и просла́вльшему вас Бо́гу: Аллилу́ия.

И́кос 12

Пою́ще благопло́дное житие́ ва́ше, труды́ богоуго́дными, чудесы́ и благода́тными явле́нии испо́лненное, благодаре́ние прино́сим вам, преподо́бнии, моли́твами всеси́льными ва́шими укрепля́еми, и ко исполне́нию во́ли Госпо́дни воздвизае́ми, на по́мощь ва́шу упова́юще зове́м вам:

Ра́дуйтеся, доброде́тельми ди́вными и по́двиги сия́ющии;

ра́дуйтеся, в моли́твах ва́ших к Бо́гу нас не оставля́ющии.

Ра́дуйтеся, а́ще и не поимено́ваннии у челове́к, у Го́спода вси изочте́ннии;

ра́дуйтеся, Ца́рства Бо́жия насле́дницы благослове́ннии.

Ра́дуйтеся, дела́ Госпо́дня по́мощию Его́ соверша́ющии;

ра́дуйтеся, вели́чие Боже́ственное свя́тостию ва́шею явля́ющии.

Ра́дуйтеся, по́мощь тре́бующим всеще́дро подаю́щии;

ра́дуйтеся, но́ву песнь Госпо́дню на земли́ живы́х пою́щии.

Ра́дуйтеся, преподо́бнии отцы́ на́ши, вси святи́и Солове́цкии.

Конда́к 13

О пресла́вное и преди́вное мно́жество святы́х земли́ Солове́цкия, я́ко безчи́сленныя свещи́ сия́ющее в пусты́ни ото́ков се́верных! Се приклоня́ем главы́ пред святы́нею ва́шею, пред вели́чием по́двиг и чудоде́йствием моли́тв. Мо́лим вас усе́рдно: заступи́те во оби́тели ва́ми просла́вленней жи́тельствующих и всех христиа́н, в ве́це сем многомяте́жнем Бо́гу угоди́ти тща́щихся. Испроси́те у Всеми́лостиваго Влады́ки проще́ния и оставле́ния всех на́ших прегреше́ний и душа́м ве́чнаго спасе́ния, да в ра́дости неизглаго́ланней оби́телей Небе́сных вку́пе с ва́ми воспое́м Всеще́дрому и Всеблаго́му Бо́гу: Аллилу́ия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Моли́тва

О сла́вный собо́ре, святи́и земли́ Солове́цкия, преподо́бных сосло́вие, пусты́нников со́нме, и́ноков ли́че! Собла́зном ве́ка сего́ умертви́вшеся, вре́менному ве́чное предпоче́тше, вы вселе́нием в морски́я ото́ки в рабо́ту Го́споду себе́ всеце́ло преда́ли есте́, па́че же песка́ морска́го умно́жистеся и па́че зве́зд небе́сных сия́ете ны́не в невече́рнем Ца́рствии Влады́ки Христа́ Бо́га. Святи́тся земля́ сия́ по́двиги ва́шими, живе́т благоуха́ющи ва́шими моли́твами, трепе́щет содержа́щи честны́я мо́щи ва́ша, и во времена́ после́дняя освяще́на бысть кро́вию му́ченическою, за ве́ру Христо́ву зде излия́вшеюся. Вси святи́и Солове́цкии, и́хже имена́ ве́мы и не ве́мы, венцы́ нетле́нными от Го́спода увенча́вшиися, и ри́зами убеле́нными оде́явшиися, благослове́ннии насле́дницы Го́рняго Иерусали́ма, моли́те Бо́га о оби́тели ва́шей и бра́тии ея́, и о все́м Оте́честве на́шем: да в любви́ и единому́дрии во́инствует свята́я Це́рковь Правосла́вная, да ве́ра на́ша пребыва́ет непри́коснове́нна злу, да да́рует нам Госпо́дь си́лу ю́ испове́довати, и а́ще потре́бно бу́дет, вся за ню́ претерпе́ти, и да́же до дне су́днаго непоро́чну сохрани́ти и неосужде́нно предста́ти Престо́лу Ца́рствия Его́ и со все́ми святы́ми вы́ну прославля́ти держа́ву, и великоле́пие, и человеколю́бие Его́ во ве́ки веко́в. Ами́нь.

И́на моли́тва

О Боже́ственный по́лче, небе́снии во́ини Христа́ Бо́га, преподо́бнии и богоно́снии отцы́ Солове́цкии! Вы пе́рвее ра́лом ева́нгельских уче́ний ду́ши своя́ плодоно́сны яви́ли есте́, по́слежде и непло́дную пусты́ню сию́ я́ко благоцвету́щий рай соде́лали есте́ и яви́лися есте́ же́ртвы благоприя́тныя Бо́гу, преобрази́вшеся у́мным де́ланием, во све́те невече́рнем узре́ли есте́ бу́дущия жи́зни сла́ву. Боже́ственным огне́м ду́ши своя́ возже́гше, востекли́ есте́ в Сио́н го́рний, и нетва́рнаго све́та причасти́лися есте́. Те́мже и на́м на земли́ су́щим, хода́тайствуйте душа́м спасе́ние, земны́х плодо́в изоби́лие, времена́ ми́рна, бла́га, да и мы недосто́йнии, направля́емии ва́шими моли́твами, поне́ на коне́ц на́шего многомяте́жнаго жития́, возлю́бим ве́чная па́че вре́менных, и во единонадеся́тый час порабо́таем со усе́рдием Небе́сному Домовлады́це Христу́, и услы́шим Его́ благоуве́тливый глас: прииди́те, насле́дуйте угото́ванное вам Ца́рство от сложе́ния ми́ра. Ами́нь.