Шрифт

Акафисты соборам святых

Акафист Собору Ивановских святых

Кондак 1

Избраннии от Бога святии сродницы наши, в мире пожившии, обаче от мира не сущии, яко в предстательствах ваших надежду имуще спасения, благодарственная приносим пения и хваления, недостойнии соотечественницы ваши, вы же яко стяжавшии отечество вечное, от всяких нас бед свободите, зовущих:

Радуйтеся, вси святии земли Ивановския, приснии о нас к Богу молитвенницы.

Икос 1

Ангелом соревнителие и человеком наставницы в мире явистеся, святии сродницы наши, от древних родов даже до дней последних многоразличными подвиги Бога прославившии. Мы же пресветлый соборваш купно и коегождо по имени хваляще, сице зовем:

Радуйся, Тихоне преподобне, Лухскую пустыню нищетою твоею обогативый.

Радуйся, мощи твоя, яко сокровище некрадомо под спудом сокровенное, обители твоей оставивый.

Радуйтеся, Фаддее и Герасиме, ученицы и спостницы Тихоновы.

Радуйтеся, смиренномудрия и трудолюбия его подражателие.

Радуйся, Макарие пустыннолюбне, на реце Лусе уединенно подвизавыйся.

Радуйся, зде первую твою обитель основавый.

Радуйся, Иоакиме, наставнику твоему Иринарху Ростовскому в подвизех поревновавый.

Радуйся, затворниче и иконописче благодатный, Николо-шартомский монастырь возродивый.

Радуйтеся, вси святии земли Ивановския, приснии о нас к Богу молитвенницы.

Кондак 2

Видя сердцеведец Господь залог смирения вашего, и веру со упованием, и труд любве, и ревность о славе Его, благодатию Духа Святаго неизреченно обогати вас, в том же Дусе и нас земнородных молитвы приемлете, любовию поющих о вас: Аллилуиа.

Икос 2

Разум кичливый и мудрование плоти отвергше, святителие богомудрии, Духа елей в сосудех сердца стяжали есте, яко да просветится свет ваш пред человеки, темже и мы, недостойная чада вашя, с веселием вопием:

Радуйся, Митрофане, святителю Воронежский, земли нашея благое прозябение.

Радуйся, пастырю трудолюбный, начаток иноческаго жития зде положивый.

Радуйся, Августине, первый архипастырю града Иванова, святым патриархом поставленный.

Радуйся, народом божиим возлюбленный и жертво Богу благоуханная.

Радуйся, Василие, похвало Кинешемская и русския церкве украшение.

Радуйся, исповедниче, безбожная уста заградивый златоплетением словес твоих.

Радуйся, Борисе, чрез едино токмо лето в чине епископстем послуживый.

Радуйся, яко иерарх и яко мученик сугубую благодать приемый молитися о пастве твоей.

Радуйтеся, вси святии земли Ивановския, приснии о нас к Богу молитвенницы.

Кондак 3

Силою свыше облекостеся светло, святии, овому бо дар пророчества, овому же исцеления, иному слово мудрости, иному же дерзновение мученическое тем же Духом дадеся, да во всех прославляется Бог един, в Троице воспеваемый: Аллилуиа.

Икос 3

Имуще дерзновение много, яко утверждени на камени веры, мученицы крепкодушнии, иже со святителем Августином сопричтены быти сподобльшиися, некрепкаго врага победили есте силою крестною, приимите от нас похвалы сицевыя:

Радуйся, Борисе, верный диаконе, во изгнании архиерею твоему послуживый.

Радуйся, нуждею от пастыря разлученный и в заключении гладом скончавыйся.

Радуйтеся, Иоанникие и Нифонте, пощением страсти первее умертвившии, страдальчески второе смерть приимшии.

Радуйся, мучениче Александре благородне, свободу духа во Христе стяжавый.

Радуйся, Иоанне протопресвитере, честную старость твою мученическим венцем увенчавый.

Радуйтеся, Алексие и Николае, на небеси со ангелы славящии Бога.

Радуйтеся, Апполоне и Михаиле, во храме славы нерукотвореннем вселившиися.

Радуйтеся, Феоктисто, Анно и Ольго, в женстем естестве мужескую твердость показавшыя.

Радуйтеся, вси святии земли Ивановския, приснии о нас к Богу молитвенницы.

Кондак 4

Бурею злобы богоборцы смущаеми бывше, тщахуся паки распяти Христа, пастырей церкве и верных в темницы влекуще и убивающе. Вы же, страдальцы святии, свидетельство миру явистеся, яко воскресе Христос, поюще Ему: Аллилуиа.

Икос 4

Слышавше жителие града Шуи о разорении храмов божиих, предсташа заутра окрест церкве соборныя, во еже не предати святыни на проугание, аще и увещаеми быша от пастыря злу не противитися. Мы же сих страдалец безвинных похвалами венчаем, глаголюще:

Радуйся, отче Павле, от юности Христу послуживый.

Радуйся, яко и умрети за Христа не отреклся еси.

Радуйся, отче Иоанне, веси Палехския украшение.

Радуйтеся, священницы Божии, яко молитвою себе предуготовлясте к преселению горнему.

Радуйся, Петре, храма Божия любителю, за негоже и пострадати изволил еси.

Радуйся, яко смерти горькия избыти лестию не восхотел еси.

Радуйтеся, Николае, Авксентие, Сергие и Анастасие дево, от безбожных избиеннии.

Радуйтеся, яко первомученицы земли нашея явистеся.

Радуйтеся, вси святии земли Ивановския, приснии о нас к Богу молитвенницы.

Кондак 5

Боготечныя звезды во тьме безбожия сущым явистеся, священнострадальцы святии, образ бо бысте верным словом и житием, любовию, духом, верою и чистотою, к мысленному солнцу правды Христу приводяще зовущих Ему: Аллилуиа.

Икос 5

Видевше пастырие церкве Христовы стадо свое расхищаемо от волка душегубителя, потщашася душы своя положити за овцы, глаголом Божиим и молитвою на зверя льстиваго устремишася, и того до конца поправше, кровию своею в чертог небесный внидоша. Обаче не оставите сирых и нас, вопиющих:

Радуйся, отче Зосимо, града Иванова звездо пресветлая.

Радуйся, чина церковнаго и отеческих преданий ревнителю.

Радуйся, лжеучения и расккола обличителю дерзновенный.

Радуйся, священниче Божиий и жертво Богу священная.

Радуйся, отче Григорие, подвижниче бодренный и молитвенниче неленостный.

Радуйся, нищих питателю и скорбящих утешителю благодатный.

Радуйся, во страну сибирскую изгнанный и тамо смертию осужденный.

Радуйся, свободою духа и светлостию души твоея мучителей удививый.

Радуйтеся, вси святии земли Ивановския, приснии о нас к Богу молитвенницы.

Кондак 6

Проповедует церковь российская узы и скорби вашя, святии, вы бо от ближних и чад разлучаеми, в темницех многажды затворяеми, оклеветаеми и гоними, работы тяжкими изнуряеми, многообразне умерщвляеми веры ради, любве Христовы никакоже разлучистеся, присно поюще Ему: Аллилуиа.

Икос 6

Возсияша в российстей земли, яко заря невечерняго дне, страдальцы честнии, вами бо тьма безбожныя злобы отгнася, и клятва за грех отступления от рода нашего ныне отъемлется, мы же ко свету богоразумия вами наставлени, сице глаголем:

Радуйся, Константине, кинешемския обители Успения пастырю усерднейший.

Радуйся, яко в туюжде обитель разоренную во узах приведен был еси.

Радуйся, прещений мучительских не убоявыйся.

Радуйся, мученическую кончину во изгнании восприемый.

Радуйся, Иоанне, в решемстем монастыри Богу послуживый.

Радуйся, яко злато в горниле страданий искушенно явивыйся.

Радуйтеся, Елисавето и Анно, на изгнание неправедно осужденнии.

Радуйтеся, мученицы терпеливодушнии и достолавнии.

Радуйтеся, вси святии земли Ивановския, приснии о нас к Богу молитвенницы.

Кондак 7

Хотя человеколюбец Господь помиловати люди согрешившия, яви в российстей земли сонм исповедников новых, да тех призывающе в помощь, и в покаяния ризу облекшеся, благонадежне зовем: Аллилуиа.

Икос 7

Дивное чудо является всем, любовию вас призывающым, новомученицы святии, вы бо недузи от душ и телес отгоняете, скорбь и печаль потребляете, веру в маловерных сердцах утверждаете, мы же по Бозе на вас уповающе, сице взываем:

Радуйся, отче Леониде, от юности изволивый приметатися в дому Божии.

Радуйся, от святаго партиарха рукоположение приемый.

Радуйся, яко за веру Христову седмижды в темницу заключен был еси.

Радуйся, едино слово во устех имевый: служу Богу моему дондеже есмь.

Радуйся, отче Феодоре, шуйских церквей благочинне и пастырю добронравный.

Радуйся, яко три дни и три нощы неправедно испытуемый, никакоже поколебался еси.

Радуйся, совесть пастырскую лжесвидетельством осквернити не преклонивыйся.

Радуйся, за верность Христу от мучителей зверонравных немилостивно убиенный.

Радуйтеся, вси святии земли Ивановския, приснии о нас к Богу молитвенницы.

Кондак 8

Странное слышание и видение неудобопостижное! Како кровию вашею, славнии, освятисте землю российскую! Како же мощи вашя, в земли сокровенныя, быша яко пшеница чистая в сеятву, тучный клас приплодившая всем хотящим жати спасение, Богу поющым о вас: Аллилуиа.

Икос 8

Весь ум и желание сердца к Богу вперивше, старец честных седмочичленных лик, от паствы и чад разлучени, во единый час судищу предсташа, обаче прещений мучительских не убоявшеся, вернии даже до смерти пребыша. Ихже пресветлую память достойно восхвалим, глаголюще:

Радуйтеся, Петре, Иакове и Иоанне, трием апостолом тезоименитии.

Радуйтеся, на Голгофу земную возшедшии и небеснаго Фавора достигшии.

Радуйся, Николае, словом Божиим паче хлеба чувственнаго в темнице препитавыйся.

Радуйся, за сие слово неправедно осужденный.

Радуйтеся, и друзии три Иоанна, благодати Божия исполненнии.

Радуйтеся, пастырие единомудреннии и единонравнии.

Радуйтеся, седины вашя мученическим венцем увенчавшии.

Радуйтеся, вси святии земли Ивановския, приснии о нас к Богу молитвенницы.

Кондак 9

Всякое естество ангельское удивися подвигом вашым, святии, како во плоти суще и в мире живуще, безплотнаго врага победили есте? Мы же таковыя ходатаи и помощницы в немощи нашей имуще, благодарно Богу поем: Аллилуиа.

Икос 9

Ветия многовещаннии и богомудрии многими песньми по достоянию вас восхвалиша, святии, мы же, аще и недостойнии и немудрии, обаче любовию понуждаеми, дерзаем сице вас величати:

Радуйся, отче Леонтие, от юности монашеское житие возлюбивый.

Радуйся, по вся дни о службе церковней поревновавый.

Радуйся, исповедниче, скорбьми многими веру запечатлевый.

Радуйся, старче и молитвенниче о людех богоприятный.

Радуйся, мати Арсение, шуйския обители Успения игумение преподобная.

Радуйся, смирение, любовь и молитву паче всех добродетелей возлюбившая.

Радуйся, стаду твоему образ терпения в скорбех показавшая.

Радуйся, от затвора темничнаго к небеси возлетевшая и ангелы провождаемая.

Радуйтеся, вси святии земли Ивановския, приснии о нас к Богу молитвенницы.

Кондак 10

Спастися хотяй всем человеком промыслитель Господь, мнозей греховней тьме належащей, в мир посылает святыя своя, да тех любовию согреваеми и верою озаряеми, уныния хладность отринем и к деланию устремимся, Христово имя всегда призывающе, поюще Ему: Аллилуиа.

Икос 10

Царя превечнаго воини добропобеднии, единый с нами имуще образ и естество, потоки слезными пламень страстей угасили есте, и всяку Христову заповедь верно сотворше, достойно ныне приемлете славы венцы, услышите убо и нас, вопиющих:

Радуйся, отче Стефане, веси Шустова пастырю добрый.

Радуйся, от утра даже до вечера жития твоего Богу волею поработавый.

Радуйся, яко в старости твоей инии тя связаша и ведоша, аможе не хощеши.

Радуйся, в работе тяжце смерть приемый и с лики мученик сочетавыйся.

Радуйся, отче Евфимие, на служение Церкви гонимей волею изшедый.

Радуйся, во храме пусте о людских гресех моления и жертву приносивый.

Радуйся, священниче законный, яко данный ти залог до конца непорочно соблюл еси.

Радуйся, яко Христа поругана и распята даже до смерти не отверглся еси.

Радуйтеся, вси святии земли Ивановския, приснии о нас к Богу молитвенницы.

Кондак 11

Пение всеумиленное приимите от нас недостойных, Сиона горняго граждане, вы бо премудрость, богатство и славу мира сего нивочтоже вменивше, юроди себе нарекосте, сего ради избраннии, возлюбленнии и святии от Бога нарекшеся, многу мзду восприяли есте, поете со ангелы вечную песнь: Аллилуиа.

Икос 11

Светлоявленнаго дне зарю в своем сердце имуще и богосветлый разум стяжавше, блаженнии, прозреваете ясно грядущая и тайная душ обличаете, к вечному свету всех приводяще, усердно вам воспевающих:

Радуйся, Симоне, на реце Елнати начало подвигу юродства положивый.

Радуйся, во граде Юрьевце претрудное житие скончавый.

Радуйся, блаженне Алексие, Симону в терпении поревновавый.

Радуйся, безбожных обличителю безмолвынй и страдальче кротчайший.

Радуйся, Киприане, при реце Уводи в дебри уединенно подвизавыйся.

Радуйся, честныя твоя мощи многими чудесы прославивый.

Радуйся, Максиме, странниче юроде, разум суетен блаженным безстрастием пременивый.

Радуйся, чистоты ради сердца твоего пророчества даром украшенный.

Радуйтеся, вси святии земли Ивановския, приснии о нас к Богу молитвенницы.

Кондак 12

Благодати Святаго Духа сосуди честнии, многия подвиги вашя кий язык от земных изречет? Мы же дивному во святых своих Богу присно поем: Аллилуиа.

Икос 12

Поюще подвиги вашя, святии, дивимся зело добродетелей светлости, устрашаемся оныя славы блистания, уязвляемся сладце любовию вашею и духом ревности исполняемся, да вам по силе последующе, и радости вашия общницы будем, зовущии:

Радуйтеся, святителие богомудрии, словом Божиим землю нашу озарившии.

Радуйтеся, священномученицы, проповедь Евангельскую кровию запечатлевшии.

Радуйтеся, мученицы всехвальнии, яко вами Церковь Христова утвердися.

Радуйтеся, исповедницы крепцыи, яко вами всякая лесть низложися.

Радуйтеся, отцы преподобнии, яко истину глагол Божиих в житии своем показасте.

Радуйтеся, жены преблаженныя, яко в немощи плоти вашея Божию силу явисте.

Радуйтеся, Христа ради юродивии, чистым сердцем Бога узревшии.

Радуйтеся, праведнии, в мире яко светильницы просиявшии.

Радуйтеся, вси святии земли Ивановския, приснии о нас к Богу молитвенницы.

Кондак 13

О святии сродницы наши, многообразне угодившии Богу, недостойная моления нашя приемше, милостиваго Бога молите, из глубины греховныя ны воздвигнути и вечных мук свободити о вас вопиющих: Аллилуиа.

Сей Кондак читается трижды, затем Икос 1 и Кондак 1

Молитва Собору Ивановских святых

О прехвальные угодницы Божии, святии вси в земли Ивановстей просиявшии и яко цвети богосажденнии землю нашу облагоухавшии, многая вашя имена и большая дарования, вашим бо непорочным житием от древних родов до ныне свет Христов просвещается и имя Божие прославляется. Мы же, недостойная чада вашя, последних веков дошедше и исполнение чаемых вами видевше: веры православныя возрождение, храмов и обителей обновление, святых угодников прославление, поем Отца, Сына и Святаго Духа Бога, и к вам, избранным Его, со умилением и верою припадающе молим: не оставите отечества вашего земнаго, молите всеблагаго Господа даровати нам покаяние всецелое и сердце люботрудное во взыскание Его, заблуждшыя и безчувственныя светом веры озарити и на путь правый наставити, властей предержащих сердца просветити, еже от церкви благая глаголати, нищыя и сироты препитати, плененныя от уз свободити и во отечество возвратити, вся во обстоянии и скорби сущыя скоро избавити, и всякую душу людей своих благодатию Духа Святаго во благое наставити, да тем призываеми, очищаеми и просвещаеми, Царствия Небеснаго с вами сподобимся и прославим в Троице славимаго Бога во веки веков. Аминь.