Шрифт

Акафисты соборам святых

Акафист Собору Карпатских святых

Кондак 1

Избраннии Богом во свидетельство православныя веры, святителие, исповедницы, преподобнии и праведнии Карпатския земли, страну сию ученьми своими просветившии и кровьми вашими освятившии, прещений мучителей не убоявшеся, любовь к Богу даже до смерти явили есте и за страдания ваша неувядаемыя венцы от руки Вседержителя прияли есте. Темже, ублажающе святую память вашу, всеумиленно взываем к вам:

Радуйтеся, вси святии земли Карпатския, теплии о нас к Богу молитвенницы.

Икос 1

Ангелом в житии своем уподобилися есте, отцы святии, с нимиже ныне на Небесех преславно ликовствуете и в радости неизреченней Престолу Господню предстоите. Мы же, ведуще твердое ваше исповедание, изгнание и терпение, имиже Христа Бога нашего прославили есте, ублажаем вас сице:

Радуйтеся, безбоязненнии веры Христовы проповедницы.

Радуйтеся, истиннаго благочестия неумолкающии глашатаи.

Радуйтеся, прелести мира сего отвергшии.

Радуйтеся, Царствия Божия присно взыскавшии.

Радуйтеся, любовь вашу ко Господу Иисусу кровию своею запечатлевшии.

Радуйтеся, души своя за имя Христово положившии.

Радуйтеся, вси святии земли Карпатския, теплии о нас к Богу молитвенницы.

Кондак 2

Видев вы Господь, святии равноапостольнии Мефодие и Кирилле, яко истинныя пастыри Церкви Своея, предустави вас быти просветители языком словенским; того ради и благодать Его бе с вами, ограждающая и укрепляющая вас, юже помощницу себе имуще, славу Божию во градех и пустынех делы и словесы вещали есте, научая всех пети Богу: Аллилуиа.

Икос 2

Разумом истиннаго богопознания свыше просвещеннии, проповедницы богоноснии явишася, святии Мефодие и Кирилле; темже во страны словенския приидоша и новокрещенныя люди Христовым учением просветили есте. Тии же, узревше вас яко Ангелов светлых, спасение благовестити грядущих, и яко пастырей добрых, душу свою за овцы полагающих, прославиша Бога, дивнаго во святых Своих. Сего ради радующеся, яко таковыя имамы учители и молитвенники, прославляем вас, глаголюще:

Радуйтеся, радости евангельския благовестителие.

Радуйтеся, ереси иконоборныя обличителие.

Радуйтеся, народом иноплеменным свет Христов принесшии.

Радуйтеся, словеном двери Царствия Небеснаго отверзшии.

Радуйтеся, яко даже до смерти вернии истине пребыли есте.

Радуйтеся, яко венцы исповедническими от Царя славы украшенни есте.

Радуйтеся, вси святии земли Карпатския, теплии о нас к Богу молитвенницы.

Кондак 3

Силою Вышняго укрепляем, равноапостольный княже Ростиславе, насытитися Небесныя пищи паче всего вожделел еси; сего ради в земли Моравстей идолы поправ и нощь неведения упразднив, о просвещении народа твоего светом веры Христовы тщался еси, научая воспевати Творцу всяческих: Аллилуиа.

Икос 3

Имуще едино рачение, еже единому Богу благоугождати и правдою верно Ему служити, Ростиславе блаженне, призвал еси в землю Моравскую равноапостольных учителей Мефодия и Кирилла, ихже ученьми люди твоя истиною Христовою насыщахуся. Темже ублажаем тя, благоверне княже, хвалении сими:

Радуйся, славу небесную паче земных благ возлюбив, Христу послужил еси, сияя добротами.

Радуйся, яко дух твой православно Бога воспе, идолы бо тобою низложишася.

Радуйся, яко в Небесных чертозех ныне ликовствуеши, княже праведный, возлюбил бо еси Христа, Емуже священныя храмы воздвигл еси.

Радуйся, добродетельми, яко порфирою, украсився, к Небесному Царствию преставился еси.

Радуйся, яко на земли свято пожив, в вечныя обители вселился еси.

Радуйся, яко ныне на Небесех сияеши и изливаеши струи благодати, во еже спастися душам нашим.

Радуйтеся, вси святии земли Карпатския, теплии о нас к Богу молитвенницы.

Кондак 4

Бури искушений и бед не поколеба крепости души твоея, преподобне отче Иоанне, твердынею бо веры себе украшая, желаний краю достигл еси и Церкве Зиждителю благоприятен явился еси, Емуже велегласно ныне на Небесех поеши: Аллилуиа.

Икос 4

Ведуще мира сего суету и яко неудобно есть в нем спасение безсмертныя души совершати, четыредесят и два лета в уединении единому Богови поработал еси, отче Иоанне. Сего ради, похваляя равноангельное житие твое, ублажаем тя, глаголюще:

Радуйся, Христа паче всего возлюбивый и всего себе в руце Его предавый.

Радуйся, Господеви житием твоим угодивый и Ангелы труды твоими возвеселивый.

Радуйся, Божия благодати сосуде избранный, юже и на нас изобильно изливаеши.

Радуйся, молитвы, поста и воздержания хранителю, чистотою и святынею Ангелом уподобивыйся.

Радуйся, яко князю Боривою и супружнице его, святей княгине Людмиле, благословение и наставление в духовном делании преподал еси.

Радуйся, яко пред Престолом Царя Небеснаго предстоиши и Ему молитвы о нас приносиши.

Радуйтеся, вси святии земли Карпатския, теплии о нас к Богу молитвенницы.

Кондак 5

Боготечныя звезды яви вас миру Господь Вседержитель, троице братий святых Моисее, Ефреме и Георгие, вы бо паче всего взыскали есте Царствия Небеснаго; сего ради уповая избавитися мучений вечных, страдания временныя кротко претерпели есте, воспевая благодарне Богу: Аллилуиа.

Икос 5

Видяще подвиги, труды и страдания ваша, яже за Христа мужественно претерпели есте, преблаженнии, с верою притекаем к вам и, благодатию Божиею, на вас почивающею, освящаеми, со умилением вопием сице:

Радуйся, преподобне отче Моисее, яко ради чистоты душевныя и телесныя много пострадав, блаженство чистых сердцем приял еси.

Радуйся, яко по преставлении от временныя жизни сея Пресвятую Троицу чисте зриши.

Радуйся, преподобне отче Ефреме, яко велие пощение и смирение чудно на земли показал еси.

Радуйся, яко сего ради на Небесех жизнь вечную наследовал еси.

Радуйся, блаженне страстотерпче Георгие, на Христа все упование возложивый.

Радуйся, яко с благоверным князем Борисом убиен быв, ныне с ним во славе Небесней пребываеши.

Радуйтеся, вси святии земли Карпатския, теплии о нас к Богу молитвенницы.

Кондак 6

Проповедует земля Мараморошская труды и подвиги твоя, святителю отче Иосифе, имиже ты безбоязненно веру православную в людех утверждал еси и о спасении духовных чад твоих попечение имел еси. Ныне же, Престолу Божию предстоя, не престай молитися о стаде твоем и о всех с верою к тебе притекающих, да молитвами твоими получивше от бед и скорбей избавление, непрестанно восхваляем Подателя всех благ Бога, взывая: Аллилуиа.

Икос 6

Возсиял еси, яко светильник, на свещнице церковней поставленный, святителю Иосифе, Грушевскую, Угольскую и иныя обители земли Карпатския неустанно окормляя и на спасения стезю многия души наставляя. Темже и мы, богоугодное житие твое восхваляюще, вопием ти сице:

Радуйся, верных чад Церкви Христовы добрый пастырю и учителю.

Радуйся, христианских добродетелей неустанный насадителю.

Радуйся, Православия защитниче, стадо Христово, тебе вверенное, неврежденным сохранивый.

Радуйся, расхитити его и в погибель вечную ввергнути врагом лютым не попустивый.

Радуйся, за исповедание веры православныя узы темничныя претерпевый.

Радуйся, в злостраданиях мужество сохранивый и вся мучения безропотно переносивый.

Радуйтеся, вси святии земли Карпатския, теплии о нас к Богу молитвенницы.

Кондак 7

Хотя всем житием своим достойно Господеви послужити, праведне отче Алексие, потщался еси тесным и прискорбным путем, ведущим в Царствие Небесное, шествовати, жития же вечнаго взыскуя, вся временная и тленная во уметы вменил еси, вопия непрестанно Богу: Аллилуиа.

Икос 7

Новаго ходатая и заступника имамы тя пред Богом, праведне отче Алексие, веруем бо, яко пред Престолом Божиим молишися, о еже низпослати благодатную помощь всем право славящим Господа. Сего ради вопием ти:

Радуйся, заповедей Божиих ревностный исполнителю.

Радуйся, сущих во тьме неверия и лжеучений просветителю.

Радуйся, нищих и обездоленных от трудов своих милостиво питавый.

Радуйся, в тайных благодеяниях твоих благодать Божию являвый.

Радуйся, и по отшествии твоем нас, земных, молитвами твоими не оставляяй.

Радуйся, нетленными мощами твоими токи исцелений обильно источаяй.

Радуйтеся, вси святии земли Карпатския, теплии о нас к Богу молитвенницы.

Кондак 8

Странника и пришельца помышлял еси себе быти в мире сем, священномучениче Максиме, единаго бо Господа возлюбив, заповеди Его неленостно исполняти тщался еси и непобедимый поборник веры православныя явился еси, мученический же венец от руки Вседержителя приим, ныне со Ангелы поеши Победителю смерти: Аллилуиа.

Икос 8

Всего себе воли Божией предав, священномучениче Максиме, священства благодать восприял еси; вернии же, видяще ревность твою и восхваляюще Бога, воспеваху ти сицевая:

Радуйся, пастырю добрый, душу свою за овцы положити готовый.

Радуйся, столпе Православия несокрушимый и исповедниче Христов неустрашимый.

Радуйся, терпением твоим злобу мира сего победивый и со святыми мучениками на Небесех водворивыйся.

Радуйся, слово евангельское возлюбивый и небоязненно его проповедавый.

Радуйся, мученическою кровию своею землю Горлицкую удобривый и исповедничеством твоим Церковь Православную возвеличивый.

Радуйся, яко мощи твоя исцеляют всякия скорби и болезни.

Радуйтеся, вси святии земли Карпатския, теплии о нас к Богу молитвенницы.

Кондак 9

Всякое естество подвиги твоими удивил еси, святителю отче Досифее, ты бо, благодатию Божиею укрепляем, ревностный защитник православныя веры был еси, всех притекающих к тебе во благочестии утверждая и научая воспевати Богу: Аллилуиа.

Икос 9

Вития многовещанныя не довлеют изглаголати вся труды твоя, святителю Досифее, во славу Божию тобою подъятыя, ибо доброта жития твоего воистину превосходит похвалу человеческую. Мы же, любовию к тебе побеждаеми, душами умиляемся и хвалим тя пении таковыми:

Радуйся, всего себе Господеви предавый и верно Ему послуживый.

Радуйся, цевнице духовная, ученьми твоими вся просветивый.

Радуйся, яко житием, делы и словесы о Христе Спасе свидетельствовал еси.

Радуйся, яко болящим усердно послужил еси и нищия препитал еси.

Радуйся, яко временная страдания претерпевая на земли, в радость нескончаемую вшел еси на Небеси.

Радуйся, яко терпением твоим жизнь вечную со святыми наследовал еси.

Радуйтеся, вси святии земли Карпатския, теплии о нас к Богу молитвенницы.

Кондак 10

Спастися хотящим верный наставник был еси, преподобне отче Алексие, стяжал бо еси смирение изрядное, молитву непрестанную, любовь нелицемерную; и ныне нам, грешным, спасения ищущим, помози святыми твоими молитвами, да тобою вспомоществуеми, достигнем горних селений и сподобимся со всеми от века Богу угодившими воспевати: Аллилуиа.

Икос 10

Стена крепкая и необоримая был еси пастве твоей, богоносе отче Алексие, ограждая верных от искушений плоти, мира и диавола; сего ради видяще таковое попечение о чадех твоих, молим тя: буди нам помощник в жизни сей и к Царствию Небесному путеводитель изрядный, вопиющим ти таковая:

Радуйся, от юности Христа всем сердцем возлюбивый и Тому единому усердне поработавый.

Радуйся, смиренный Христов подражателю и заповедей Господних ревностный исполнителю.

Радуйся, яко за веру Христову гонимый, злострадание безбоязненно претерпел еси.

Радуйся, венцем исповедническим от Христа увенчанный и Церковью Его славно возвеличенный.

Радуйся, яко ревностию о вере православней сердца наша распаляеши.

Радуйся, яко мощами твоими исцеления источаеши и благодатную помощь всем притекающим к тебе подаеши.

Радуйтеся, вси святии земли Карпатския, теплии о нас к Богу молитвенницы.

Кондак 11

Пение всеумиленное приносим ти, преподобне отче Иове, и с любовию чтуще святую память твою, восхваляем подвиги твоя: в молитвах бо, бдениих и в трудех иноческих зерцалом подражания быв, явился еси правило веры и образ кротости верным, в бедах и гонениях терпение являяй и всем приходящим к тебе утешение подаваяй. Темже смиренно молим тя: не лиши твоея помощи и нас, поющих Богу: Аллилуиа.

Икос 11

Светозарная звезда явился еси, отче Иове, всю землю Карпатскую светом боговедения освещая и мрак безбожия далече отгоняя. Темже и наша сердца, грехми отягченныя, просвети и к свету покаяния возведи, да зовем ти:

Радуйся, Троицкия Городиловския обители устроителю.

Радуйся, иноческаго жития на горах угольских возродителю.

Радуйся, яко весь пламенем пред Богом, аки свеща, горел еси.

Радуйся, яко моляся о мире, в неусыпном бдении предстоял еси.

Радуйся, яко с лики святых Пресвятую Троицу ангельскою песнию восхваляеши.

Радуйся, яко о почитающих память твою Бога непрестанно умоляеши.

Радуйтеся, вси святии земли Карпатския, теплии о нас к Богу молитвенницы.

Кондак 12

Благодать Божественную испросите притекающим к вам, святии, землю Карпатскую чудным светом богопознания просветившии и благочестивым житием своим Богу угодившии, да и мы сподобимся в селениях райских купно с вами воспевати Господеви: Аллилуиа.

Икос 12

Поюще святое, равноангельное житие ваше, вси святии земли Карпатския, ублажаем вас, яко многомощных молитвенников о нас пред Богом, теплых заступников и наставников ко спасению, и с любовию приносим вам пения сия:

Радуйтеся, непобедимою силою Христовою противу враг видимых и невидимых вооружившиися.

Радуйтеся, подвиг свой добре совершившии и страданьми вашими диавола посрамившии.

Радуйтеся, дерзновенным исповеданием Христа Ангелы возвеселившии и терпением вашим мучителей удивившии.

Радуйтеся, верность Христу до смерти сохранившии и претерпети за Него никиих мучений не убоявшиися.

Радуйтеся, пред Престолом Божиим наши ходатаи и милости Его нам щедрии подателие.

Радуйтеся, в скорбех, болезнех и печалех нам скории помощницы.

Радуйтеся, вси святии земли Карпатския, теплии о нас к Богу молитвенницы.

Кондак 13

О всеблаженнии угодницы Божии, вси святии земли Карпатския, услышите моления наша, с верою вам возносимыя, призрите на вся нужды наша душевныя и телесныя, да вашими молитвами избавимся в жизни сей от падений греховных, от наветов злых человек и напрасныя смерти, и в будущем веце спасение улучити и Небеснаго Царствия наследниками быти да сподобимся, поюще с вами ангельскую песнь: Аллилуиа.

Сей Кондак читается трижды, затем Икос 1 и Кондак 1.

Молитва Собору Карпатских святых

О преславнии и всехвальнии угодницы Божии, вси святии в земли Карпатстей просиявшии! К вам, яко теплым ходатаям и предстателем нашим, светом учений ваших просвещеннии и в вере Христовой наставленнии, с любовию прибегаем и в сокрушении сердец наших молимся: испросите у Всещедраго Бога прощение согрешений наших и жития нашего исправление, да в покаянии и нелицемерней любви друг ко другу поживше, предстанем Страшному Судищу Христову и вашим предстательством сподобимся стати одесную Праведнейшаго Судии, Емуже со Отцем и Святым Духом подобает слава, честь и поклонение ныне и присно, и во веки веков. Аминь.

Тропарь Собору Карпатских святых, глас 4

Днесь светло красуется Карпатский край и с ним вся концы земли нашея духовно торжествуют, память совершающе богопрославленнаго лика святых, в подвизе православныя веры издревле во уделе сем Богу угодивших, и к ним с любовию вопиют: о предивнии Христу Богу молитвенницы, венцы пресветлыми от Него увенчанныя, мир и благоденствие Отечеству нашему испросите и душам нашим велию милость.

Кондак Собору Карпатских святых, глас 3

Яко светильницы светозарнии явистеся в земли Карпатстей, просветителие наши, вы бо Крест Христов на рамена своя вземши, усердно Тому последовали есте, пламенною верою Богови приближившеся, от Негоже чудес дарованием обогатистеся; темже и мы с верою к вам притекающе, умильно глаголем: святии угодницы Карпатстии, спасайте нас молитвами вашими ко Господу.