Шрифт

Акафисты Праздникам

Акафист Рождеству Христову (иной)

Кондак 1

Возбранный и прежде век от Отца Рожденный, Спас мира и Царь веков, яко Отроча родися нам, Сын, и дадеся нам. Сей ныне волею плоть приим от Девы и, яко разумное Солнце Правды, сущим во тьме и сени смертней седящим Боголепно возсия. Приидите, возрадуемся, зряще Бога во плоти, в Вифлееме нас ради пеленами повиваема, и с волхвы и пастырьми Сему покланяющеся, велегласно возопиим:

Слава в вышних Богу и на земли мир, в человецех благоволение.

Икос 1

Ангели древле у врат Эдема древу жизни отпадшаго Адама стрегуще, ныне же от веси Вифлеемския радость велию земнородным благовествуют, яже будет всем людем: яко родися Спас, Иже есть Христос Господь, в яслех безсловесных плотию младенствующе. Приидите, вернии, Матерь Спасову прославим, по Рождестве паки явльшуюся Деву, и со Ангелы и пастырьми песнь достойную в вертепе от Нея Рождшемуся воспоем:

Слава Тебе, Пребезначальное Слово, Бог сый, человек явивыйся;

слава Тебе, Боже Великий и Вечный, Своего Божества не отступльше, из боку Девичу воплотивыйся.

Слава Тебе, Сыне Божий - Сыне Девы, зрак раба приимшему;

слава Тебе, Слове Божий, Неизследиме, в юдоль нашего изгнания пришедшему.

Слава Тебе, Превечное Слово, истощанием странным от Девы миру возсиявый;

слава Тебе, Премудросте Божия и Сило, нас ради по нам обнищавый.

Слава Тебе, Невесты Пречистыя пребогатое Рождество, Егоже славы полны суть Небеса;

слава Тебе, возсиявшее Солнце Правды, Имже радости исполняется вся земля.

Слава в вышних Богу и на земли мир, в человецех благоволение.

Кондак 2

Видевше Творец и Зиждитель всяческих гиблема человека, егоже рукама созда, милосердствуя о нем, приклонив небеса, на землю сниде, высотою Царствуяй Небес, землею содеяся, - Егоже Отце прежде век раждает, да падшее обновит человеческое естество. Его зряще Самаго и Человека и Бога, ликовствующе со всеми небесными и земными, хвалящими предивное Божие снисхождение, вопием Ему: Аллилуиа.

Икос 2

Разумети велию благочестия тайну хотяще, человецы пастырие реша друг ко другу: прейдем до Вифлеема, и видим глагол сей бывший, егоже Господь сказа нам. И поспешшеся приидоша, и обретоша Мариам же и Иосифа, и Младенца в яслех, и поклонишася Ему, славяще и хваляще Бога о всех, яже слышаша и видеша, якоже глаголано бысть к ним. С ними же и мы, сбытие тайны нашего спасения зряще, от Девы плотию Рождшемуся, яко Царю и Богу нашему, принесем сия похвалы:

Слава Тебе, Отчиим благоволением явльшуся от Девы, всяческая радости исполняя;

слава Тебе, Собезначальне Отцу, пленным отпущение, слепым прозрение от Отца возвещая.

Слава Тебе, Отчия славы сияние Божества, в залог спасения мира в яслех положенный;

слава Тебе, Бог сый, Иисусом Сладчайшим Иосифу от Ангела пронареченный.

Слава Тебе, Огнезрачный, горе Херувимы, долу же во объятиях Пречистыя Девы дориносимый;

слава Тебе, Отчее Сияние, Свет во откровение языков, тьмою необъемлемый.

Слава Тебе, Агнче Божий, еще Предтече во чреве сущу, предивное взыграние;

слава Тебе, Сыне Неискусобрачныя Невесты, праматере Евы неложное радование.

Слава в вышних Богу и на земли мир, в человецех благоволение.

Кондак 3

Силы Небесныя чудящеся, како Отца Собезначальное Слово, дланию же содержащее тварь, из Неискусомужныя Своея Матере, яко от Девственнаго облака прошед, плотски в вертеп вселися, и яко престол ясли вменив. Емуже они со страхом и трепетом служащии, человеком возвестиша: се вам знамение: обрящете Младенца повита, лежаща в яслех. Сему падше, людие, поклонитеся, и с веселием воспойте: Аллилуиа.

Икос 3

Имеяй престол небо и подножие землю, в малый внити тщится вертеп, зане не обретеся Ему места во обители, идеже Дева Мария, Херувимом подобяся, яко Младенца Христа на руку носящи и любовию согревающи, воспеваше: Сыне Мой и Творче Мой! Како пеленами повию Тя яко Младенца? Како сосцы питаю Тя, питающаго всяческая? Како Твоей паче ума нищете удивлюся? Како Сына Моего нареку Тя, Раба Твоя сущи? Темже убо, Божию снисхождению дивящеся, со Пречистою Материю песнь принесем Владыце:

Слава Тебе, Един творяй чудеса, яко престол славы херувимския утробу Девичу освятивый;

слава Тебе, Един Сый Святыя Троицы, спасение и мир земли погибельней благовестивый.

Слава Тебе, Младенче Блаженный, род человечь от работы тления свободившему;

слава Тебе, Восточе востоков, сущия во тьме и сени смертней обожившему.

Слава Тебе, ни от крове, ни от похоти плотския Родившемуся;

слава Тебе, Непостижиме, пеленами повиваемь, сети диавола упразднившему.

Слава Тебе, Утешителю сумнящихся, Иосифова смущения предивное разрешение;

слава Тебе, Слове необыменный, волхвов и пастырей священнолепное поклонение.

Слава в вышних Богу и на земли мир, в человецех благоволение.

Кондак 4

Бурею помышлений сумнительных мятется Ирод и весь Иерусалим с ним: злобою снедаемь, богоборец яряшеся, яко Бог во плоти явися. Тварь же вся, играюще, дары своя Христу в Вифлееме Рождшуся приносит: Ангели пение, небеса звезду, волсви дары, пастырие чудо, земля вертеп, пустыня ясли, мы же Матерь Деву, вопиюще: с нами Бог, - Властитель мира, - Отец будущаго века, - Аллилуиа.

Икос 4

Слыша Иосиф весть от Ангела: востав, пойми Отроча и Матерь Его, и бежи во Египет, и буди тамо, дондеже реку ти: хощет бо Ирод искати Отрочате, да погубит Е. Востав же Иосиф ото сна, поят Отроча и Матерь Его нощию, и отыде во Египет. Слыши небо, и внушай земле: Бог же и Творец, нас ради человек, и нашего ради спасения, плоть приим, от рук Ирода злочестиваго бегает, смирения образ показуя, да и мы сетей и ловлений диавола всячески убегаем, и в Свете Богопознания Избавителю душ наших вопием:

Слава Тебе, Вседержителю Едине Господи, дивно вселенней возсиявый;

слава Тебе, Свете Невечерний, ищущим Тебе чистым сердцем путь звездою указавый.

Слава Тебе, Царю царствующих, безумие Ирода-детоубийцы славно посрамивший;

слава Тебе, Непобедиме, младенцы Вифлеемския лепотою херувимскою украсивый.

Слава Тебе, обилием кровей их пламя духа огнедышущего охладивый;

слава Тебе, не имеяй где главы подклонити, мир Божеством Своим облагодатствовавый.

Слава Тебе, и Присноцветущей Деве, во утробе Своей Тебе - плод Божественный согревшей;

слава Тебе, и Преблагословенней Богородительнице, от рук Ирода злочестиваго Тебе сохраньшей.

Слава в вышних Богу и на земли мир, в человецех благоволение.

Кондак 5

Боготечная звезда с небесе волхвом от страны Персския путь к явльшемуся Солнцу Правды показует, да идолослужителие суще, неизреченному Таинству уверовавше, всему миру пришествие Мессии благовествуют, злонравному же Ироду, возпылавшему Цвет от корене Иессеова, из земли Обетованныя изторгнути, свидетельствуют: яко родися Христос от Девы, Емуже они, аще и столь далече суще, приидоша со дары, яко Царю и Богу поклонитися, и чистым сердцем воспети Ему: Аллилуиа.

Икос 5

Провидев Тя в дусе богоглаголивый Исаия, Господи, яко хощеши от Девы родитися и человеком явитися, вопияше: Слышите убо, доме Давидов: се Дева во чреве приимет, и родит Сына, и нарекут имя Ему Еммануил. Услишите даже до последних земли, могущии покоряйтеся, яко с нами Бог! Приидите, вси людие, сбытие велие тайны сея зряще, яко Младенца в вертепе и яслех вмещаема, подымем Зиждителя, и радующеся, боголепно вопием:

Слава Тебе, Грядый Адама воззвати, Путь, и Истину, и Живот миру показующий;

слава Тебе, Отроча Младо - Превечный Боже, Отчиим подобием сияющий.

Слава Тебе, Осмодневен по Матери, Безначален же по Отцу, смирением обрезания жало греховное пресекавший;

слава Тебе, сия претерпевая, да всех чадами Божиими соделаеши.

Слава Тебе, жизни Подателю, долу снисшедый, да нас горе вознесеши;

слава Тебе, паче раба Себе умаливый, да нас рабства греховнаго избавиши.

Слава Тебе, Емуже небеса звездою послужити тщатся;

слава Тебе, Егоже дух злобы поднебесный страшится, яко мир спасется.

Слава в вышних Богу и на земли мир, в человецех благоволение.

Кондак 6

Проповедует и радуется дивный старец Симеон, якоже иногда Исаия пророк, егда от жертвенника Господня рукою Серафима угль огненный уст его коснуся, приемля от рук Пречистыя Богоматере Тебе Господа своего и Владыка, и глаголаше: Сей есть, Егоже Отец Небесный уготова пред лицем всех людей, Свет во откровение языком, на падение, и на востание многим, Иже нас ради явися яко человек, да избавит мир от клятвы законныя. Емуже покланяющеся, сладце вопием: Аллилуиа.

Икос 6

Возсия мирови небесе и земли Творец - Христос Спас нас, из утробы Девы Чистыя прошед, во славе, яко Избавитель мира, вражды средостение разорити грядет: правдою препоясан по чреслех Своих, и истиною обвит по ребрам Своим, да поразит землю словом уст Своих, и обличит славныя земли правостию дел Своих. Егоже море виде и побеже, Иордан возвратися вспять; мы же, спасение получивше, яко Благодетелю и Богу нашему поем:

Слава Тебе, Ветхий деньми, яко Младенец, руками Девы - Матере Своея, Богу Отцу принесенный;

слава Тебе, усты праведнаго Симеона пред лицем всех людей благословенный.

Слава Тебе, Источниче благодати неисчерпаемый, Троическое поклонение в струях Иорданских миру явивый;

слава Тебе, от раба Крещаемый, невидимую главу змиеву тамо сокрушивый.

Слава Тебе, Сыне Божий - Возлюбленный, благоволением Отца Небеснаго свыше свидетельствованный;

слава Тебе, Агнче Божий, вземляй грехи мира, Предтечею на Иордане миру указанный.

Слава Тебе, богатый в милости, Завета Новаго Божественное основание;

слава Тебе, красный добротою, паче всех сынов человеческих, прошедших и грядущих родов непререкаемое упование.

Слава в вышних Богу и на земли мир, в человецех благоволение.

Кондак 7

Хотяй сокровенную тайну любве Отца Небеснаго к роду человеческому открыти, яко агнец на заколение, в яслех безсловесных положился еси, и во Иордане главу Твою Предтече смиренне преклонил еси, Христе Боже наш. Слыша же Тя иногда Адам в раи ходяща, страхом сокрыся, мы же, видяще Тя в рабием зраце славу Божества Своего сокрывающа, да обветшавшее грехом естество наше банею крещения обновиши, и душу Свою за ны положиши, благодарно вопием Ти: Аллилуиа.

Икос 7

Новое и преславное чудо, яко бо на руно дождь, во чрево Девы снисшел еси, Христе, и яко капли дождевнии, излияся благодать Твоя на вся живущия на земли, прежде под клятвою законною бывшия, да познают Тебе Единаго Истиннаго Бога, и имут радость свою исполнену в Тебе; и, воспрянув от беззаконий своих, приидут, и припадут к Тебе, - Источнику жизни вечныя, и яко дары принесут Тебе сия похвалы:

Слава Тебе, Свете, превышший всех светлостей, Моисею древле в хладе тонком, задняя Твоя показавый;

слава Тебе, Слово Отчее Пребожественное, зарею невечерняго дне ныне миру возсиявый.

Слава Тебе, Боже Предвечный, тако о нас земнородных возблаговоливый;

слава Тебе, Сыне Давидов, яко матерь рождение свое, нас возлюбивый.

Слава Тебе, Любовь Святейшая, присно горящая и никогдаже угасающая;

слава Тебе, Спасе премилосердый, вся скорбящия и обремененныя радости исполняющий.

Слава Тебе, украсившему вселенную величием Премудрости и Божественной красоты;

слава Тебе, отверзшему земнородным источник Божественныя любви.

Слава в вышних Богу и на земли мир, в человецех благоволение.

Кондак 8

Странно бе слышати Ироду от волхвов о Рождестве Христове, странно бе и старцем Иерусалимским зрети Отрока Иисуса в церкви, послушающа и вопрошающа их, и ужасатися о разуме и о ответех Его. Не разумеша бо Писания, идеже пророк Давид предрек о Нем: Сын Мой еси Ты, Аз днесь родих Тя; Седи одесную Мене, дондеже положу враги Твоя подножие ног Твоих. Они же, Ироду злочестивому ревнующе, изрекут страшная: да распят будет! Зависти бо ради, грядущему Мессии Христу не воспеша: Аллилуиа.

Икос 8

Весь явился еси на земли, якоже на небеси, Свете Единоначальный и Трисиянный, да Твоими светосиятельными лучами души наша озариши, и животворящее питие Твоея любви всем открыеши, Непостижиме Господи, и сице человека, егоже создал еси, божественною лепотою благодатствуеши, и храм Твоего Божества, световиден и чист покажеши, ангельской славе сопричтеши. Мы же, иже Херувимы тайнообразующе и Животворящей Троице трисвятую песнь Тебе ради припевающе, приносим Ти сия благодарственныя похвалы:

Слава Тебе, Владыко Премилосерде, долу снисшедый, да кающимся грешником доступен будеши;

слава Тебе, Боже Непостижиме, давый Себе познати, да прежнее сыновство нам даруеши.

Слава Тебе, светодательный Источниче, тьму греховнаго неведения просвещающий;

слава Тебе, Хлебе, сшедый с небесе, манною божественнаго разума нас питающий.

Слава Тебе, показавшему нам человеколюбия Твоего Пребожественное снисхождение;

слава Тебе, недомысленное и несказанное мира от пагубы греховныя избавление.

Слава Тебе, Источниче Благодати соделавый человека храмом невместимаго Божества;

слава Тебе, Красото пресветлаго торжества, Еюже наполняются небеса и земля.

Слава в вышних Богу и на земли мир, в человецех благоволение.

Кондак 9

Все естество ангельское и человеческое в тесном вертепе, яко в царском чертозе, совокупльшеся, ликовствует: небесных Престолов превышний Владыка, и премирных Господствий всеистинный Господь, за человеколюбие на земли явися и с человеки пожити возжеле, да свободит род Адамов от мучительства адова. Воистину сый Бог наш превечный, и Человек нов, воплотивыйся волею и смиривыйся Божеством, во еже уготовати земнородным стезю ко спасению и даровати безсмертие Божественное воспевающим Ему: Аллилуиа.

Икос 9

Витии многовещаннии недоумеют бо глаголати, какоже прежде век на Престоле Огнезрачном в вышних Седяй со Отцем Безначальным и Божественным Духом, ныне из Девы воплощься яко человек, сообразен бренному умалению, богатство обожения носяй, нас же, сущия рабы врага и греха, примирити Богу тщится. Да веселятся небесная, да радуются земная; да отрыгнут горы веселия, и холми правду, яко помилова Господь люди Своя, и смиренных людей утеши, яко во век милость Его. Мы же, со всеми верными, Божие благоволение славословящими, песнь приносим Владыце:

Слава Тебе, неисповедимая совершенств Высото, прародителей же наших греховнаго поползновения избавление;

слава Тебе, неизследимая тайн Пучино, в Рождестве Твоем всему миру даровавый спасение.

Слава Тебе, отцев Боже, прелюбимое патриархов величание и пресладостное пророков исполнение;

слава Тебе, видимых и невидимых Содетелю, судеб мира настоящих и грядущих премудрое строение.

Слава Тебе, Любовь неизреченная, образом и подобием Твоим в Адаме нас почтый;

слава Тебе, главы змиевы Сокрушителю, от смертоноснаго яда сего души наша исцеливый.

Слава Тебе, Рождеству Твоему преславному покланяющихся Божественным благоуханием исполняяй;

слава Тебе, дары сердец своих Тебе приносящих, яко жертву благовонную освящаяй.

Слава в вышних Богу и на земли мир, в человецех благоволение.

Кондак 10

Спасения залог, - Камень нерукосечный от несекомыя горы, - Девы Чистыя, краеугольный отсечеся Христос Бог, да разстоящаяся естества, от востока и запада, севера и юга, Светом Своего Божественнаго Откровения к Богопознанию приведет и общницы радости ангельския соделает, и сице в лицех Небесных и земных Церковь вечно торжествующую утвердит. Егоже, яко Агнца Непорочна и не вкусивша скверны, звезда яви, яко Бог есть, за спасение мира волею пожретися грядый; Имже весь мир просвещаяйся, ликовствующе, вопиет: Алллилуиа.

Икос 10

Царю Превечный, прародителей наших, заповедь Божию преслушавших, и по грехопадении не оставивый, но на упование спасения прямо Едема вселивый. Ныне же Адамову нищету восприем, плотию на земли прозябл еси, Христе Боже наш, да Едема дверь, прежде затворенную, паки отверзеши, и стезю легкоходную в Царствие Небесное верным уготовиши, идеже, малым чим от Ангел разнствуя славою, яко новосаждения масличная, окрест трапезы славы Отчей, в лепоте Божественней, усыновиши, во еже непрестанно приносити Тебе сия похвалы:

Слава Тебе, Создателю всяческих, Един имеяй безсмертие и во свете живый неприступном;

слава Тебе, премилостивый, греха первороднаго мир свободивый, греху неискусный.

Слава Тебе, Спасителю мира, вся скорби наша и болезни на Себе приемый;

слава Тебе, Пастырю добрейший, в залог спасения миру душу Свою предложивый.

Слава Тебе, Церкве Зиждителю, в основание Ея, яко Бог и Человек, Себе положивый;

слава Тебе, Отчее Сияние и Духа Святаго дыхание, образа Твоего неизменное начертание в душах наших не возбранивый.

Слава Тебе, пресладкий Иисусе, волю Отца Своего Небеснаго преславно исполнивший;

слава Тебе, Спасе всещедрый, яко Исаак древле, жертвенною любовию миру послуживый.

Слава в вышних Богу и на земли мир, в человецех благоволение.

Кондак 11

Пение ангельское приносит Ти Святая Церковь, всещедре Спасе, и велегласно вопиет: Рождество Твое, Христе Боже наш, возсия мирови свет разума: в нем бо звездам служащии, звездою учахуся Тебе кланятися, Солнцу Правды, и Тебе ведяще с высоту востока в мир пришедшаго, людие пакибытием утешаются, Пречистую же Матерь Твою, Едину высшую небес, яко Престол Херувимский, и Пречистый храм Твоего Божества, непрестанно величают, и Тебе, Свету Трисиянному, с веселием вопиют: Аллилуиа.

Икос 11

Светодательный Источник и заря Трисиятельнаго Божества возсия вселенней Рождество Твое, Спасе мира, в нем бо Отчее благоволение познахом: тако бо возлюби Бог мир яко и Сына Своего Единороднаго дал есть, да всяк веруяй в Онь, не погибнет, но имать живот вечный. Мы же, богатством человеколюбия Твоего, Спасе, облагодатствовани суще, неисповедимое снисхождение и безбедное истощание Твое славим и, веселяшеся, сице Тебе взываем:

Слава Тебе, пришествием Твоим мир, заматерелый в растлении греховном, обновивый;

слава Тебе, Премилосерде, злобою диавола прельщенныя паки Богу возвративый.

Слава Тебе, Источниче разума, ум наш от помыслов лукавых очищающий;

слава Тебе, Пастырю пастырей, от тьмы неведения к Свету евангельския Истины нас наставляющий.

Слава Тебе, Свете немеркнущий яслей Вифлеемских, Ты наша радость, надежда и упование;

слава Тебе, сладосте сердечная, не отвергающийся нашего слезнаго покаяния.

Слава Тебе, теплото любимая, в отчаянии греховнем сущих надеждою прощения согревающий;

слава Тебе, в скорбех и печалех, и в страшный час смерти нас не оставляющий.

Слава в вышних Богу и на земли мир, в человецех благоволение.

Кондак 12

Благости и радости, и Божественныя славы, имиже наполняются Херувими и Серафими, и вся небесныя силы, исполнися земля и вси живущии на ней, егда яко Человек в вертепе Вифлеемстем человеком приразился еси, небесных и земных Царю, понеже таинство преславное - Евангелие Отчее: яко семя Жены сотрет главу змия, исполнися, - Бог во плоти на земли явися, да Собою всяческая ко Отцу приведет. Сему Твоему благоволению, Владыко наш и Господи, вся земля ангельски вопиет: Аллилуиа.

Икос 12

Поюще Твоего, Спасе, вочеловечения неизреченное таинство, веруем со пророком: днесь бо, яко агнец незлобивый, на заколение уготованный, в яслех безсловесных положился еси. Сему преславному сбытию дивящеся, Небо и земля, и Ангелов чины, и всяк язык земных, дароносяще всяческая, исповедует: нас бо ради родися Отроча младо Превечный Бог! Мы же, яко явльшемуся Богу и на земли виденному, и Богу и Отцу Соприсносущному, дерзаем приносити Тебе сия похвалы:

Слава Тебе, всяческая носяй глаголы, рождение свыше, - водою и духом, человеком возвестивый;

слава Тебе, якоже Моисей вознесе змию в пустыни, тако вознестися за спасение мира возблаговоливый.

Слава Тебе, Отца Небеснаго предивный Сыне, источник безсмертия - Кровь и Воду из ребр Твоих миру источивый;

слава Тебе, положением души Твоея за ны, Церковь спасительную нам воздвигнувый.

Слава Тебе, Радосте пресветлая, о Тебе бо, вернии, утверждение надежды имуще, радуемся;

слава Тебе, богатство неистощимое, Егоже причащатися в невечернем дни Царствия Твоего надеющееся, хвалимся.

Слава Тебе, Надеждо ненадежных божественнаго веселия непроходимое торжество;

слава Тебе, безлетный Свете, Явльший всему миру Триипостасное Божество.

Слава в вышних Богу и на земли мир, в человецех благоволение.

Кондак 13

О неизреченная и неизглаголанная щедрот бездно, Агнче Божий, Иисусе Христе, младенчествующий плотию, юже в ложеснах Девы Неискусомужныя Духом Святым исткал еси, да человеком единосущный явишися, и всяку слезу и воздыхание от лица земнородных отъимеши, и сих Твоего неприступнаго Божества причастницы соделаеши. Прими от нас убогое сие славословие и, якоже в ясли бессловесныя, вниди в сердца наша, и сии в жилище Себе освяти, и Светом Твоего Трисиятельнаго Божества нас озари, да со всеми небесными и земными принесем Ти ангельскую песнь: Аллилуиа.

Этот Кондак читается трижды. Затем Икос 1 и Кондак 1.

Молитва

Пребезначальное Начало, Боже Святый и Вечный, и всея твари Содетелю! Киими словесы возблагодарим и киими песньми возвеличим Твое нас ради человек неизреченное снисхождение, волею Божества Своего не отступльше, и недр Отчих не разлучаяся, Бог сый, яко Человек, в вертепе безсловеснем ныне положился еси, Христе Боже наш!

Кто исповесть неизглаголаннаго сего Таинства величие и преславнаго сбытия Таинство: Сын Божий, Сын Девы является, да свободит мир от клятвы законныя, и сыны греха и беззакония - чадами Божиими, наследниками вечных благ соделает, - Себе же, яко жертву непорочную и Всесвятую, в залог спасения падшаго человека да принесет.

Иисусе Сладчайший, Владыко Всемилостивый! Твоим Пребожественным снисхождением юдоль земная в храм Божественныя Славы Твоея освятися, и все живущии на ней небесным веселием исполнишася. Сподоби убо и нас в день Преславнаго Рождества Твоего чистым сердцем и отверстою душею исповедати Тя истиннаго Агнца Божия, услаждающаго и укрепляющаго нас надеждою грядущих благ в немеркнующем Свете Трисиятельнаго Божества, Имже вся живет и движется, Имже обновление нашего первообразнаго бытия да усовершится.

Ей, Господи, всякаго благодеяния богатый Дателю, и Подателю Благий, за еже тако возлюбил еси мир, яко вся скорби и болезни наша на Себе понести изволил еси, не остави нас, дондеже суета земная скорбьми и напастьми не изсушила души наша, и не погибе путь спасения под ногама нашима, да не посмеются о нас врази наши, но даруй нам в свете Твоего Божественнаго Откровения познати путь мира, добра и истины, и воззови ненасытною жаждою по Тебе, Спасителе нашем, во еже творити волю Твою Преблагую во страсе Твоем. И в похвалу неизреченному снисхождению Твоем, яко кадило благовонное, приносити Тебе житие нескверное и любовь нелицемерную, да в делех наших и во уповании веры нашея непрестанно совершается воля Твоя Святая, и во веки не умолкнет под небесем слава Твоя; слава, - яко Единороднаго от Отца, исполнь благодати и истины. Яко о Тебе, ныне плотию от Безневестныя и Пречистыя Девы Марии Рождшемся, вся колена небесная и земная, радости исполняющеся, велегласно исповедуют: с нами Бог, Емуже честь и поклонение подобает - Отцу, и Сыну, и Святому Духу, во веки веков. Аминь.