Акафист Пресвятой Богородице пред иконой «Ярославская»

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Символ веры:

Ве́рую во еди́наго Бо́га Отца́ Вседержи́теля, Творца́ не́бу и земли́, ви́димым же всем и неви́димым. И во еди́наго Го́спода Иису́са Христа́, Сы́на Бо́жия, Единоро́днаго, И́же от Отца́ рожде́ннаго пре́жде всех век. Све́та от Све́та, Бо́га и́стинна от Бо́га и́стинна, рожде́нна, несотворе́нна, единосу́щна Отцу́, И́мже вся бы́ша. Нас ра́ди челове́к и на́шего ра́ди спасе́ния сше́дшаго с небе́с и воплоти́вшагося от Ду́ха Свя́та и Мари́и Де́вы и вочелове́чшася. Распя́таго же за ны при Понти́йстем Пила́те, и страда́вша, и погребе́нна. И воскре́сшаго в тре́тий день по Писа́нием. И возше́дшаго на Небеса́, и седя́ща одесну́ю Отца́. И па́ки гряду́щаго со сла́вою суди́ти живы́м и ме́ртвым, Его́же Ца́рствию не бу́дет конца́. И в Ду́ха Свята́го, Го́спода, Животворя́щаго, И́же от Отца́ исходя́щего, И́же со Отце́м и Сы́ном спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Испове́дую еди́но креще́ние во оставле́ние грехо́в. Ча́ю воскресе́ния ме́ртвых, и жи́зни бу́дущаго ве́ка. Ами́нь.

Конда́к 1

Взбра́нной Воево́де и Всеми́лостивой Влады́чице на́шей Богоро́дице похва́льное прино́сим пе́ние и с ве́рою на Яросла́вскую Ея́ ико́ну взира́юще, уми́льно глаго́лем: О, Пречи́стая Де́во, услы́ши сие́ моле́ние на́ше и дару́й нам разуме́ние, я́ко досто́йно похвали́ти Тя, да просвеще́ннии благода́тию, воспои́м Тебе́ си́це:

Ра́дуйся, Всера́достная Цари́це, благода́тию сердца́ на́ша возвеселя́ющая.

И́кос 1

А́нгельское приве́тствие боже́ственнаго Гаврии́ла с Небеси́ Тебе́ приноси́мое, бысть досто́йно сла́вити Тя, превы́сшую све́тлостей со́лнечных, Свет Преве́чный ми́ру дарова́вшую. Нам же, гре́шным, удо́бее есть молча́ние, оба́че за ми́лость Твою́, на ны излия́ную, вси ро́ди родо́в пое́м Ти:

Ра́дуйся, Небесе́ и земли́ Цари́це;

ра́дуйся, Богоблаже́ная Отрокови́це.

Ра́дуйся, Та́ин Бо́жиих Сокро́вище;

ра́дуйся, Ду́ха Свята́го Прия́телище.

Ра́дуйся, Бо́га на руку́ Твое́ю носи́вшая;

ра́дуйся, деви́ческим млеко́м Творца́ всех пита́вшая.

Ра́дуйся, Неве́сто Богои́збранная;

ра́дуйся, Присноде́во Пресла́вная.

Ра́дуйся, враго́в неви́димых побежда́ющая;

ра́дуйся, в страх и тре́пет я поверга́ющая.

Ра́дуйся, всех ве́рных упова́ние;

ра́дуйся, душ на́ших спасе́ние.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 2

Видяще́ любо́вь Твою́ к ро́ду челове́ческому и моли́твенное предста́тельство за ны, гре́шныя, к Сы́ну Твоему́ и Бо́гу на́шему Го́споду Иису́су Христу́, благодаре́ние прино́сим Ти, Пречи́стая Богоро́дице, Сы́ну же Твоему́, спаса́ющему нас от поги́бели ве́чныя, с любовию пое́м: Аллилу́иа.

И́кос 2

Ра́зумом Боже́ственным просвеща́еми, святи́и благове́рнии кня́зи Васи́лий и Константи́н, пресла́вныя чудотво́рцы, ико́ну Твою́ прече́стную из гра́да Ки́ева в Яросла́вль принесо́ста и с че́стию во Успе́нстем собо́ре постави́ста. К ней же с ве́рою припа́даем, и Тебе́, Пресвята́я Богоро́дице, похва́льная воспису́ем:

Ра́дуйся, род христиа́нский возлюби́вшая;

ра́дуйся, Яросла́вскую ико́ну нам дарова́вшая.

Ра́дуйся, не то́чию Ки́ев, оба́че и град Яросла́вль под Покро́в Свой прии́мшая;

ра́дуйся, гра́ду сему́ велию ми́лость яви́вшая.

Ра́дуйся, Це́ркви сла́во и утвержде́ние;

ра́дуйся, страны́ на́шея кре́пкое заступле́ние.

Ра́дуйся, отча́янных и ско́рбных ве́лие утеше́ние;

ра́дуйся, гре́шников призыва́ющая ко исправле́нию.

Ра́дуйся, всех пра́ведно живу́щих Небе́сная Отра́до;

ра́дуйся, в по́двизех пребыва́ющих несказа́нная награ́до.

Ра́дуйся, а́нгельских лико́в пресве́тлое ра́дование;

ра́дуйся, князе́й возду́шных плач и се́тование.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 3

Си́ла Божия и благода́ть Свята́го Ду́ха во ико́нех Твои́х пребыва́ет, посему́ к Яросла́встей ико́не Твое́й со умиле́нием и сокруше́нием серде́чным припада́ющии с ве́рою ю лобыза́ют, и с ра́достию духо́вною на пресве́тлый лик Твой взира́юще, воспева́ют Бо́гу: Аллилу́иа.

И́кос 3

Иму́ще ве́ру кре́пкую и несумне́нную, святи́и благове́рнии кня́зи ико́ну Твою́ пречестну́ю в Яросла́вскую зе́млю принесо́ста и во благослове́ние нам ю дарова́ста. Мы же Тя благоче́стне почитающе, кро́тце на всеми́лостивый лик Твой, с Богомладе́нцем на руку́ Твое́ю седя́щим, взира́юще, воспева́ем Тебе́ сицева́я:

Ра́дуйся, при́сная Небожи́тельнице;

ра́дуйся, ве́чная на́ша Покрови́тельнице.

Ра́дуйся, а́нгелов Небе́сных всера́достное зре́ние;

ра́дуйся, челове́ков сла́во и похваление.

Ра́дуйся, я́ко си́ла Бо́жия во ико́нех Твои́х пребыва́ет;

ра́дуйся, я́ко Дух Святы́й незри́мо в них почива́ет.

Ра́дуйся, больны́м подаю́щая исцеле́ние;

ра́дуйся, скорбя́щим да́рующая утеше́ние.

Ра́дуйся, благода́ти сокро́вище неистощи́мое;

ра́дуйся, Сы́на Бо́жия жили́ще неудобозри́мое.

Ра́дуйся, чуде́с Христо́вых нача́ло;

ра́дуйся, спасе́ния на́шего глави́зно.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 4

Бу́рею скорбе́й и напа́стей жите́йских одолева́емии, еще́ же и неви́димых враго́в стре́лами страсте́й зело́ уязвля́емии, ниотку́ду наде́емся по́мощи улучи́ти, то́кмо на Тя упова́ние возложи́вше, и ко ико́не Твое́й честне́й припа́дающе, с любо́вию пое́м Сы́ну Твоему́ и Бо́гу: Аллилу́иа.

И́кос 4

Слы́шаша о пребыва́нии во гра́де ди́внаго о́браза Твоего́, Пресвята́я Богоро́дице, яросла́встии лю́дие ве́рою и наде́ждою во Успе́нский храм притеко́ша, и ико́не Твое́й с благогове́нием поклони́шася, Преблагослове́нная Богоро́дице, вопию́ще Тебе́ сицева́я:

Ра́дуйся, Преблагослове́нная Ма́ти Бо́га Вы́шняго;

ра́дуйся, Блага́я Засту́пнице ро́да челове́ческаго.

Ра́дуйся, ико́ною Твое́ю во Успе́нстем хра́ме пребыва́ющая;

ра́дуйся, христиа́ны от поги́бели ве́чныя спаса́ющая.

Ра́дуйся, от бурь жите́йских ти́хое приста́нище;

ра́дуйся, от ко́зней вра́жиих стра́ждущим прибе́жище.

Ра́дуйся, моля́щихся Тебе́ ве́рное услы́шание;

ра́дуйся, недугу́ющих ско́рое исцеле́ние.

Ра́дуйся, чуде́с реко́ приснотеку́щая;

ра́дуйся, благода́ти исто́чник неоскудева́ющий.

Ра́дуйся, ни́щих и убо́гих бога́тство неистощи́мое;

ра́дуйся, оби́димых Защи́тнице непобеди́мая.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 5

Боготе́чней звезде́ подо́бна свята́я Яросла́вская ико́на Твоя́, Богоро́дице: всем с ве́рою к ней притека́ющим свет Благода́ти Христо́вой при́сно источа́ет, мрак грехо́вный серде́ц на́ших разгоня́ет, о́чи на́ша духо́вныя просвеща́ет, науча́ющи с любо́вию пе́ти Бо́гу: Аллилу́иа.

И́кос 5

Ви́дящии ико́ну Твою́ чудотво́рную, Пресвята́я Влады́чице Богоро́дице, се́рдцем умиля́ются, от грехо́в и страсте́й душе́вных и теле́сных исцеля́ются, от поро́ков скве́рных отвраща́ются и всем се́рдцем к Бо́гу обраща́ются, с любо́вию Тебе́ вопию́ще:

Ра́дуйся, звездо, путеводя́щая ко спасе́нию;

ра́дуйся, ба́не, гре́шников очище́ние.

Ра́дуйся, заре́, со́лнце в мир вводя́щая;

ра́дуйся, луно́, во мра́це грехо́внем ве́рным светя́щая.

Ра́дуйся, серде́ц на́ших умиле́ние;

ра́дуйся, заблу́ждших в ло́но Це́ркви Возвраще́ние.

Ра́дуйся, Све́та Невече́рняго Жили́ще пресла́вное;

ра́дуйся, а́нгельских чино́в Нача́льнице преди́вная.

Ра́дуйся, на путь и́стины нас наставля́ющая;

ра́дуйся, окамене́лая сердца́ на́ша умягча́ющая.

Ра́дуйся, Цари́це, ря́сны златы́ми доброде́телей оде́янная;

ра́дуйся, Влады́чице, а́нгельскими пе́ньми просла́вленная.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 6

Пропове́дуем ве́лие милосе́рдие Бо́жие и Твое́ всемо́щное за ны хода́тайство к Бо́гу, Преблагослове́ная Ма́ти Де́во, Ты на́ше недосто́йное моле́ние приими́ и Сы́ну Твоему́ Единоро́дному вознеси́, да сподо́бит нас чи́стым се́рдцем вы́ну воспева́ти Ему́: Аллилу́иа.

И́кос 6

Возсия́вый свет от ико́ны Твоея́ чудотво́рныя всю вселе́нную просвеща́ет, благода́тию сердца́ на́ша исполня́ет, те́мже на по́мощь Твою́ упова́юще, с любо́вию к Тебе́, Богома́ти Пресла́вная, притека́ем и умиле́нным се́рдцем си́це Тебе́ воспева́ем:

Ра́дуйся, ро́да христиа́нскаго возвыше́ние;

ра́дуйся, Иоаки́ма и А́нны при́сное прославле́ние.

Ра́дуйся, чадоро́дием непло́ды возвесели́вшая;

ра́дуйся, за долготерпе́ние тиих награди́вшая.

Ра́дуйся, с Бо́гом на́ше примире́ние;

ра́дуйся, всех притека́ющих к Тебе́ ве́рное спасе́ние.

Ра́дуйся, проро́чества Иса́йина сверше́ние;

ра́дуйся, Сы́на Бо́жия чуде́сное воплоще́ние.

Ра́дуйся, в плач и рыда́ние а́дстии си́лы низверга́ющая;

ра́дуйся, па́че све́та солнечнаго сла́вою сия́ющая.

Ра́дуйся, христиа́нских родо́в Воеводо непобеди́мая;

ра́дуйся, тверды́не ве́ры несокруши́мая.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 7

Хотя́щи лю́дем по́мошь Свою́ дарова́ти, Яросла́вскую ико́ну ми́ру яви́ла еси́, и от не́я чудесы́ мноѓ и соде́яла еси́, Богома́ти Пречи́стая, град сей от вра́жиих нападе́ний сохрани́ла еси́ и на Ту́говой горе́ яросла́встей дружи́не побе́ду дарова́ла еси. Темже ми́лость Твою́ прославля́юще, вси Бо́гу Всеще́дрому с любо́вию воспева́ем: Аллилу́иа.

И́кос 7

Но́вое чу́до зрим ны́не, Богоро́дице Де́во, па́ки ико́на Твоя́ чудотво́рная в Яросла́вль возвраща́ется и с че́стию в хра́ме Спа́са на Городу́ водворя́ется. Посему́ ико́ну Твою́ нам явля́емую, я́ко би́сер многоце́нный прие́млем и, я́ко вели́кую святы́ню почита́ем, и Тебе́, я́ко Засту́пнице на́шей, с любо́вию воспева́ем:

Ра́дуйся, помо́щнице на́ша преизря́дная;

ра́дуйся, защи́тнице на́ша благослове́нная.

Ра́дуйся, земли́ Яросла́вской щит и огра́да;

ра́дуйся, вражду́ющих на ны всемо́щная прегра́да.

Ра́дуйся, от ага́рянских наше́ствий град сохрани́вшая;

ра́дуйся, побе́ду христиа́ном на враги́ дарова́вшая.

Ра́дуйся, от враг неви́димых нас спаса́ющая;

ра́дуйся, ду́ши на́ша благода́тию очища́ющая.

Ра́дуйся, в Спа́сском хра́ме ико́ною пребыва́ющая;

ра́дуйся, по зе́мли Яросла́встей в кре́стном хо́де, я́ко Цари́ца, велеле́пно ше́ствующая.

Ра́дуйся, ико́ною Твое́ю возду́х освяща́ющая;

ра́дуйся, земли́ плодоро́дие да́рующая.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 8

Стра́нное житие́ на зе́мли провожда́юще, мы́сленныя о́чи на́ша в Небе́сная устремля́юще, к милосе́рдию Твоему́, Богоро́дице, взыва́ем: испроси́ нам у Го́спода пре́жде конца́ покая́ние, и́мже очища́емии, с любо́вию возопии́м: Аллилу́иа.

И́кос 8

Все житие́ на́ше по Бо́зе Тебе́, Богоро́дице Дево, вверя́ем и ко всемо́щному Покро́ву Твоему́ притека́юще, со слеза́ми о заступле́нии нас, гре́шных, Тебе́, Влады́чице, умоля́ем. Испроси́ нам у Го́спода Иису́са Христа́ серде́ц на́ших умягче́ние, от грехо́вных неду́гов исцеле́ние, от стра́стных уз разреше́ние, да исцеле́ннии си́лою Бо́жиею, просла́вим Тя, моли́твенницу кре́пкую, с любо́вию пою́ще:

Ра́дуйся, Влады́чице, по Бозе все на́ше упова́ние;

ра́дуйся, Спору́чнице гре́шных и заблу́ждших Взыска́ние.

Ра́дуйся, Бо́га за ны непреста́нно умоля́ющая;

ра́дуйся, гнев Бо́жий на ми́лость нам претворя́ющая.

Ра́дуйся, Небе́сных благ незави́стная пода́тельнице;

ра́дуйся, грехо́вных язв безме́здная врачева́тельнице.

Ра́дуйся, оби́дящих вразумле́ние;

ра́дуйся, вражду́ющих примире́ние.

Ра́дуйся, подви́жников благоче́стия в по́двизех подкрепля́ющая;

ра́дуйся, нечести́во живу́щих исправля́ющая.

Ра́дуйся, ко́зней бесо́вских разоре́ние;

ра́дуйся, па́дших челове́ков воста́ние.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 9

Вся́кую похвалу́ превосхо́дит сла́ва Твоя́, Богоро́дице Пречи́стая, и вся́кий ум челове́ческий изнемога́ет досто́йно пе́ти Тя, превы́ше а́нгельских лико́в Христо́м Бо́гом возвели́ченную и, я́ко Цари́цу Небеси́ и земли́ те́ми прославля́емую. Оба́че умилосе́рдися на ны, грешныя, и дару́й нам разуме́ние возноси́ти хвалу́ Сы́ну и Бо́гу Твоему́, пою́ще Ему́: Аллилу́иа.

И́кос 9

Вети́и богоглаго́ливыя не возмо́гут всех чуде́с, от ико́н Твои́х быва́емых, исчести́ и Тя, я́ко Чудотво́рицу преди́вную досто́йно похвали́ти, превосхо́дит бо сла́ва Твоя́ вся́ческое сло́во челове́ческое. Оба́че на Яросла́вскую ико́ну Твою́ с ве́рою взира́юще, уми́льно Тебе́ вопие́м:

Ра́дуйся, Небеси и земли́ Влады́чице неизме́нная;

ра́дуйся, к Бо́гу Моли́твенице дерзнове́нная.

Ра́дуйся, Хода́таице за род христиа́нский благоуспе́шная;

ра́дуйся, Предста́тельнице за ны благоутро́бная.

Ра́дуйся, от бед и обстоя́ний нас спаса́ющая,

ра́дуйся, на мыта́рствах христиа́ном помога́ющая.

Ра́дуйся, неча́янная на́ша Ра́досте;

ра́дуйся, благода́ти духо́вныя дару́ющая сла́дость.

Ра́дуйся, свяще́нное сокро́вище сла́вы Бо́жия;

ра́дуйся, избавля́ющая от куми́ров и многобо́жия.

Ра́дуйся, безце́нный ковче́же Бо́га Жива́го;

ра́дуйся, хра́ме благоукра́шенный Ду́ха Свята́го.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 10

Спасе́ние лю́дем возвеща́ющи, чудотво́рныя ико́ны Твоя́ по всей вселе́нней, я́ко зве́зды пресве́тлыя на тве́рди Це́ркви Христо́вой, ми́лостиво яви́ла еси. Ти́и бо любо́вь Твою́ к ро́ду христиа́нскому пропове́дуют, Цари́це Небе́сная, та́кожде и си́лу Бо́жию, в них живу́щую, чуде́сне явля́ют, науча́ющия всех хвале́бно вопи́ти Бо́гу: Аллилу́иа.

И́кос 10

Стены́ тверде́йше бысть заступле́ние Твое́ от ве́ка всем гре́шником, его́же обы́кла еси́ подава́ти по милосе́рдию Твоему́, Пречи́стая Дево́ Богоро́дице, та́ко и ны́не на́шу не́мощь посети́ и ду́ши на́ша спаси́, Всеблага́я, еще́ же и благода́тию обогати́ сердца́ на́ша, да возмо́жем невозбра́нно сла́вити и́мя Твое́ свято́е, со благодаре́нием пою́ще Тебе́ сицева́я:

Ра́дуйся, си́рых и убо́гих Пита́тельнице;

ра́дуйся, ю́ных чад Воспита́тельнице.

Ра́дуйся, отроко́в от поро́ков охраня́ющая;

ра́дуйся, ста́рых и немощны́х подкрепля́ющая.

Ра́дуйся, ча́ше злата́я, моли́твеннаго фимиа́ма благоуха́ние;

ра́дуйся, кади́льнице, милосе́рдия благово́ние.

Ра́дуйся, ле́ствице, к Небеси́ приводяшая;

ра́дуйся, ста́мно, ма́нною небе́сною Животво́рнаго Христа́ нас насыща́ющая.

Ра́дуйся, же́зле Аро́нов расцве́тший;

ра́дуйся, ковче́же, в не́дре Свое́м Христа́ содержа́щий.

Ра́дуйся, Купино́ Неопали́мая, во чре́ве деви́ческом огнь Божества́ носи́вшая;

ра́дуйся, вочелове́чению Еди́наго от Тро́ицы послужи́вшая.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 11

Пе́ние хвале́бное пред пречи́стым ли́ком Твои́м принося́ще, мо́лим Тя, Богоро́дице Де́во, глас на́ших моле́ний услы́ши и Бо́гу благоутро́бному вознеси́, проще́ние грехо́в и прегреше́ний на́ших во́льных и нево́льных испроси́, да поми́лует и поста́вит одесну́ю Себе́ в Стра́шный Су́дный день всех ве́рою Его́ почита́ющих и с любо́вию пою́щих: Аллилу́иа.

И́кос 11

Светоза́рный лик Твой, с Яросла́вской ико́ны на нас ми́лостиво взира́ющий, с любо́вию лобыза́ем и мо́лим Тя, Пречи́стая Де́во, рук на́ших дела́ испра́ви, по́мощи на вся́кое благо́е начина́ние испроси́, благода́тию сердца́ на́ша озари́ и грех, живу́щий в нас, искорени́, да благода́рно вопие́м Ти такова́я:

Ра́дуйся, Храни́тельнице на́ша и утвержде́ние;

ра́дуйся, ка́ющихся гре́шников исправле́ние.

Ра́дуйся, чистото́ю Свое́ю ра́йския сады́ облагоуха́вшая;

ра́дуйся, смире́нием Свои́м род челове́ческий возвесели́вшая.

Ра́дуйся, доброде́телей свято́е вмести́лище;

ра́дуйся, благ духо́вных ди́вное храни́лище.

Ра́дуйся, мяту́щихся серде́ц умире́ние;

ра́дуйся, волну́ющихся бу́рею страсте́й утеше́ние.

Ра́дуйся, архиере́ев благочести́вых возвыше́ние;

ра́дуйся, свяще́нников благогове́йных похвале́ние.

Ра́дуйся, мона́шествующих всеблага́я люби́тельнице;

ра́дуйся, в ми́ре живу́щих всеси́льная покрови́тельнице.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 12

Благода́ти всечестна́я Яросла́вская Твоя́ ико́на испо́лненная, вся́кую по́мощь христоимени́тым лю́дем дару́ет, неду́жных исцеля́ет, вражду́ющих примиря́ет, любо́вию сердца́ на́ша просветля́ет и благодаре́ние Всемогу́щему Бо́гу приноси́ти на вся́кий час ве́рных науча́ет, да с любо́вию прославля́ем и́мя Его́ свято́е, пою́ще: Аллилу́иа.

И́кос 12

Пое́м Твое́ ди́вное к ро́ду челове́ческому благоволе́ние, пра́отцам на́шим во бра́нех вспоможе́ние, от гла́да и мо́ра избавле́ние. Оба́че и ны́не услы́ши на́ше моле́ние, Богоро́дице, от враг ви́димых и неви́димых гра́ды и ве́си на́ша сохрани́ и побе́ды на супоста́ты христиа́ном дару́й, да вси просла́вим Бо́га Вседержи́теля и Тебе́, Всеблаго́й на́шей Засту́пнице благода́рно воспои́м:

Ра́дуйся, Ма́ти Всеблага́я, ро́ду христиа́нскому Бо́гом да́нная;

ра́дуйся, Моли́твеннице Всесвята́я за нас к Бо́гу неуста́нная.

Ра́дуйся, апо́стола Иоа́нна усынови́вшая;

ра́дуйся, тем ми́лость Божию нам возвести́вшая.

Ра́дуйся, от междоусобныя бра́ни ве́рных охраня́ющая;

ра́дуйся, от враг ви́димых и неви́димых избавля́ющая.

Ра́дуйся, щи́те, от стрел лука́вых защища́ющий;

ра́дуйся, мечу́, враго́в неви́димых посекающий.

Ра́дуйся, пребыва́ющих в моли́тве ще́дро награжда́ющая;

ра́дуйся, непреста́нную моли́тву по благода́ти дару́ющая.

Ра́дуйся, во Иерусали́м Го́рний христиа́ны препровожда́ющая;

ра́дуйся, две́ри ра́йския ве́рным отверза́ющая.

Ра́дуйся, Всера́достная Цари́це, благода́тию сердца́ на́ша возвеселя́ющая.

Конда́к 13

О Всера́достная Цари́це, Преблагослове́нная Богоро́дице и При́снодево Пресла́вная! Ты ве́чную ра́дость, Го́спода на́шего Иису́са Христа́, христиа́н Спаси́теля, челове́ческому ро́ду дарова́ла еси́. Те́мже мо́лим Тя, пресве́тлая на́ша Наде́ждо, умоли́ Сы́на Твоего́ Единоро́днаго, да изба́вит нас от вла́сти греха́, да излие́т нас оби́льно благода́ть Свята́го Ду́ха, да убели́т оде́жды душ на́ших со и́збранными сопричте́т и в ра́йския оби́тели пресели́т, и́деже вку́пе со святы́ми воспои́м Ему́ ве́чно ра́достную песнь: Аллилу́ия.

Этот конда́к читается трижды, затем и́кос 1-й и конда́к 1-й.

Молитва

О Пресвята́я Влады́чице на́ша Богоро́дице! Ты бо милосе́рдием Свои́м преди́вную Яросла́вскую ико́ну ми́ру дарова́ла еси́, любо́вь Свою́ лю́дем показу́ющи, и ны́не мо́лим Тя, Преблагослове́нная ро́да на́шего Засту́пнице, не оста́ви нас гре́шных, с ве́рою и умиле́нием на Пречи́стый о́браз Твой взира́ющих и о по́мощи и заступле́нии Тя умоля́ющих. Ве́мы, я́ко мно́го мо́жет хода́тайство Твое́ пред Сы́ном Твои́м и Го́сподем на́шим Иису́сом Христо́м. Те́мже мо́лим Тя, недосто́йнии раби́ Твои́, приими́ от нас возсыла́емое Тебе́ благода́рственное сие́ хвале́ние и Свое́ю любо́вию, я́ко любвеоби́льнейшая Ма́ти, согре́й хла́дныя сердца́ наша́, умоли́ Свои́м те́плым предста́тельством ро́ждшагося из Тебе́ Го́спода Бо́га и Спа́са на́шего Иису́са Христа́, да прости́т нам согреше́ния на́ша и препоя́шет нас си́лою Свое́ю свы́ше ко исполне́нию во́ли его́ Святе́й. Озари́ ду́ши на́ша немерца́ющим Твои́м све́том, и́же да бу́дет нам, стра́нствующим в земно́й юдо́ли жи́зни сея́, путеводи́телем к Го́рнему Оте́честву, Иерусали́му Небе́сному, иде́же Ты в вели́цей сла́ве сия́еши. Умоли́ Го́спода Ма́терними Твои́ми моли́твами, да сохрани́т нас от собла́знов и вожделе́ний грехо́вных ми́ра сего́, от всех враг ви́димых и неви́димых, да дару́ет вся́кому гра́ду и ве́си оби́лие благ земны́х, да огради́т ми́ром Це́рковь Свою́, и соде́лает вся ны насле́дницы Ца́рствия Своего́ Небеснаго, идеже вси святи́и немо́лчно сла́вят Пресвяту́ю Тро́ицу и Тя, Всеми́лостивую на́шу Засту́пницу. Ами́нь.