Акафист Пресвятой Богородице пред иконой «Оршанская»

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Конда́к 1

Избрáнней от сложéния ми́ра предвéчным Бóгом и Царéм на спасéние рóда человéческаго, я́ко вои́стину избáвльшей нас от вся́каго зла, Богорóдице благодáрственную песнь поéм: и́мать бо дерзновéние ко Всеми́лостивому Влады́це от вся́ких нас бед свобожда́ти. Сего ради славяще пречу́дное явлéние святы́я икóны Ея́, зовéм Ей: Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Икос 1

А́нгелов святы́х сóнми, ви́дяще близ дрéвняго грáда О́рши преслáвное чудотвóрныя икóны Твоея́ явлéние, восхваля́ют Тя, Богорóдице, и мы грéшнии, зря́ще толи́кую ми́лость Твою́ на нас, со умилéнием дерзновéнно Тебé вопиéм:

Рáдуйся, грáда О́рши просвещéние;

рáдуйся, всегó ми́ра спасéние.

Рáдуйся, отпáдших от вéры правослáвныя возстáние;

рáдуйся, ересéй погублéние.

Рáдуйся, Божéственнаго свéта озарéние;

рáдуйся, к Тебé прибегáющим покрове.

Рáдуйся, слез нáших избавлéние;

рáдуйся, я́ко от Тебé никтóже тощ и неутéшен оты́де.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 2

Ви́де, Пресвятáя, лю́ди правослáвныя земли́ Оршáнския, в скóрбех и печáлех к Тебé прибегáющия, заступлéния Твоегó и́щущия, и прося́щия Тя от злочести́вых еретикóв их избáвити. И даровáла еси им мир и в вéре укреплéние, да вси вéрнии, ве́дуще сия́, Бóгу воспою́т: Аллилу́иа.

Икос 2

Рáзум неуразумéнный чу́да Твоего́, Богорóдице, лю́дие правослáвнии разумéти жела́ют, кáко яви́ла еси́ икóну Твою́ святу́ю близ преслáвныя оби́тели Кутéинския, и́ноком в поможéние и всем вéрным во спасéние. Сегó рáди и мы, ми́лость Твою́ к нам, Богорóдице, прославля́юще, пое́м Ти таковáя:

Рáдуйся, оби́димым заступлéние;

рáдуйся, гони́телем вéрных обличéние.

Рáдуйся, и́ноком прибéжище;

рáдуйся, свящéнником весéлие.

Рáдуйся, лю́дем правослáвным попечéние;

рáдуйся, убóгим рáдование.

Рáдуйся, скорбя́щим уповáние;

рáдуйся, припáдающим к икóне Твоéй в напáстех укреплéние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 3

Си́ла свы́ше облечé лю́ди правослáвныя, взира́вшия, Богорóдице, на óбраз Твой святы́й, его́же получи́ша от Тебе́ я́ко вéлию святы́ню в пóмощь и заступле́ние, те́мже и́мя Твоé прослáвиша и Бóгу воспéша: Аллилу́иа.

Икос 3

Иму́щи Пресвятáя попечéние о святéй оби́тели Кутéинстей, восхотé устрóити тáмо Лáвру вéлию, да яви́тся та покрóв и прибéжище всем правослáвным, да и́ноцы смирéннии, пред пречи́стым Твои́м óбразом в ней моля́щиися, взыва́ют Тебé си́це:

Рáдуйся, пред Бóгом за нас предстáтельствующая;

рáдуйся, на путь прáвый наставля́ющая.

Рáдуйся, страстéй свобождáющая;

рáдуйся, ти́хостию ду́ши нáша исполня́ющая.

Рáдуйся, из глубины́ грехóвныя возведéние;

рáдуйся, от напрáсныя смéрти спасéние.

Рáдуйся, А́нгелов величáние;

рáдуйся, бесóв прогнáние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 4

Бу́рю вну́трь имéя помышлéний сумни́тельных, печáтник Спиридóн притечé ко óбразу Твоему́, Богорóдице, прося́ пóмощи Твоея́ и утешéния; прияв же от Тебé крепость на труды́ своя́, Влады́чице, Бóгу возопи́: Аллилу́иа.

Икос 4

Слы́шаще гони́телие вéры правослáвныя, я́ко Сáма Влады́чица яви́ икóну Свою́ святу́ю в заступлéние вéрным, убоя́шася зело́, не смéюще же нико́его зла сотвори́ти оби́тели Кутéинстей, отступи́ша от нея́. Мы же, дивя́щеся таковóму попечéнию Твоему́ о и́ноцех правослáвных, пое́м Ти си́це:

Рáдуйся, тишину́ и мир подавáющая;

рáдуйся, напáстей прилóги отгоня́ющая.

Рáдуйся, чернецéм смирéнным покрóве;

рáдуйся, оби́телем правослáвным утверждéние.

Рáдуйся, от злодéйствия супоста́т ограждáющая;

рáдуйся, от смéрти и тли нас спасáющая.

Рáдуйся, в ско́рбех лютых утеше́ние;

рáдуйся, в гоне́ниих врáжеских защищéние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 5

Боготéчная звездá и покрóв яви́лася еси, Богорóдице, всем притекáющим ко святéй икóне Твоéй Орша́нстей, я́ко свети́ло светозáрное во тьмé ересéй возсия́вшей, да и нас грéшных, на ту взирающих, Бóгу научи́ши взывáти: Аллилу́иа.

Икос 5

Ви́де преподóбный Афанáсий, я́ко в годи́ну лю́тую никтóже от человéк возмóже помощи́ ему́, но то́чию от Тебé, Влады́чице, чáя пóмощи, возложи́ на Тя все уповáние своé; получи́в же отвéт благоприя́тен, тáко возпрослáви и́мя Твоé:

Рáдуйся, ми́рови прибéжище;

рáдуйся, ми́лости истóчниче.

Рáдуйся, заступлéния у Тебé и́щущим стено́;

рáдуйся, в житéйстем мóри плáвающим пристáнище.

Рáдуйся, благодатнаго ми́ра подáние;

рáдуйся, от напáстей ограждéние.

Рáдуйся, мглу душ нáших озаря́ющая;

рáдуйся, нетлéнную благодáть дáрующая.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 6

Проповéдует оби́тель Кутéинская чудесá Твоя́, Богорóдице, от святы́я икóны Твоея́ истекающая, Ты бо озари́ла еси́ свéтом Правослáвия вся зéмли Бéлыя Руси́, попрáвши хитросплетéния врáжия. Тáко и нáши ду́ши озари́ свéтом любве́ Твоея́, да и мы под омофóром Твои́м честны́м прослáвим Бóга, вопию́ще Ему́: Аллилу́иа.

Икос 6

Возсия́ пáки свет икóны Твоея́, Богорóдице, егда́ благоволи́ла еси́ подóбию пречу́днаго óбраза Твоегó написа́тися для Оршáнския жéнския оби́тели Святáго Успéния, да и́нокини правослáвныя, зря́ще на лик Твой святы́й, взывáют Тебé си́це:

Рáдуйся, и́ночествующим укреплéние;

рáдуйся, вдови́ц прáведных утешéние.

Рáдуйся, дéвам целому́дренным похвалó;

рáдуйся, всем вéрным покрóве.

Рáдуйся, плáмень страстéй угаша́ющая;

рáдуйся, ум наш просвеща́ющая.

Рáдуйся, Царя́ Превéчнаго Мáти;

рáдуйся, чистоты́ неувядáемый Цвéте.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 7

Хотя́щи прослáвити угóдника Твоегó преподóбнаго Афанáсия, да пóдвигом му́ченическим стя́жет венéц от Гóспода, упрáвила еси егó в Купя́тицкий монасты́рь, Богорóдице, идéже Гóсподу рабóташе, и́мя Твоé прославля́ше и Бóгу вы́ну взыва́ше: Аллилу́иа.

Икос 7

Ди́внаго, Пресвятáя, яви́ла еси свети́льника земли́ Белору́сской, преподóбнаго Афанáсия, засту́пника и моли́твенника за нас, недостóйных, да и мы, зря́ще такову́ю Твою́ ми́лость к лю́дем правослáвным, и человеколю́бие Твоé восхваля́юще, воспоем Тебé си́це:

Рáдуйся, благодáти Истóчниче;

рáдуйся, о ми́ре нáшем Ходáтаице.

Рáдуйся, милосéрдия бéздно;

рáдуйся, преподóбных слáво.

Рáдуйся, óгненнаго мучéния нас свобожда́ющая;

рáдуйся, начáльника мытáрств далече отгоня́ющая.

Рáдуйся, нас от кля́твы избавля́ющая;

рáдуйся, плач наш в рáдость претворя́ющая.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Кондак 8

Стрáнное зрим чу́до, Богорóдице, кáко труды́ еретикóв тщéтны сотвори́ла еси и печáтнику Спиридóну дух му́дрости даровáла еси, сего ради тóй трудáми свои́ми вся зéмли Белору́сския прему́дростию кни́жною испóлни, и Бóга прослáви, глагóля: Аллилу́иа.

Икос 8

Весь град дрéвний Орша, чу́дною ико́ною Твое́ю осеня́емый, бысть вои́стину стена́ и прибéжище правослáвным, Влады́чице, к Тебé бо притекáющим заступлéние былá еси́, и нам недостóйным, взирáющим на óбраз Твой, Богорóдице, покрóв бу́ди и утешéние, да и мы, я́коже святы́й Афанáсий и печáтник Спиридóн, восхва́лим и́мя Твоé преблагóе та́ко:

Рáдуйся, всечестны́й Чертóже Бóжий;

рáдуйся, Мáти, вы́сшая небéс.

Рáдуйся, грехóвную печáль потребля́ющая;

рáдуйся, исцелéний богáтство изливáющая.

Рáдуйся, сокрóвище спасéния;

рáдуйся, истóчниче нетлéния.

Рáдуйся, Горó несекóмая, ю́же Дании́л прови́де;

рáдуйся, Жéзле пречестны́й, егóже Исáия проречé.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 9

Вся́кия исцели́ болéзни, и печáли гóрькия избáви нас, Богорóдице, усéрдно моля́щихся пред чудотвóрным óбразом Твои́м, вéси бо скóрби нáша, Пречи́стая. Бу́ди нам пóмощь и прибéжище неруши́мое, да сподóбившеся ми́лостей от Тебé, Преблагáя, и́мя Твоé прослáвим и Бóгу возопие́м: Аллилу́иа.

Икос 9

Вети́и лжему́дреннии, ви́дяще чудесá, от икóны Твоея́, Пресвятáя, исходя́щая, недоумевáют, како хитросплетéния их растерзáвши, лю́дем правослáвным мир и безмяте́жие подалá еси. Мы же, Твоему́ промышлéнию о нас, Богорóдице, чудя́щеся, воспевáем Ти си́це:

Рáдуйся, дрéвнюю кля́тву разруши́вшая;

рáдуйся, ерети́ческое лжему́дрие обличи́вшая.

Рáдуйся, храни́тельнице животá нáшего;

рáдуйся, Двéре, Е́юже про́йде Христóс.

Рáдуйся, кáющимся прощéние;

рáдуйся, неду́гующим исцелéние.

Рáдуйся, пáдшим возстáние;

рдуйся, погибáющим уповáние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 10

Спасти́ хотя лю́ди Твоя́, Богорóдице, от ерети́ческаго злосмра́дия, яви́ла еси́ нам óбраз Твóй чудотвóрный, ми́лости вéрныя исполня́ющий, нечéстие же врáжие опаля́ющий, и всем лю́дем правослáвным дáрующий благоприя́тно пéти Бóгу: Аллилу́иа.

Икос 10

Стена́ еси́ похваля́ющим чудесá Твоя́, Богорóдице, и покро́в всем ко благоутрóбию Твоему́ прибегáющим, тéмже и мы, недостóйнии раби́ Твои́, Пресвятáя, вéдуще промышлéние Твоé о нас, мóлим о ходáтайстве Твоéм пред Сы́ном Единорóдным, да, стяжáвше спасéние душа́м нáшим, с любóвию воспое́м Тебé сицевáя:

Рáдуйся, помóщнице нáша необори́мая;

Рáдуйся, моли́твеннице нáша неусыпáемая.

Рáдуйся, окормлéние в ю́ности;

Рáдуйся, жéзле в стáрости.

Рáдуйся, от тя́жких и лю́тых грехóв спасáющая;

Рáдуйся, неможéние душ нáших исцеля́ющая.

Рáдуйся, от прилóгов диáвольских избавля́ющая;

Рáдуйся, вся благáя твори́ти нам подавáющая.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Кондак 11

Пéние умилéнное принóсим Ти, о Мáти нáша, вéдуще Тя Засту́пницу рóда христиáнскаго, дáрующую нам уповáние и любóвию напоя́ющую сердцá нáша. Ты же, иму́щи дерзновéние ко Гóсподу Бóгу, всея́ твáри Содéтелю, не преста́й моли́тися о нас пред престóлом Влады́чним, да поми́лует всех, вопию́щих Ему́: Аллилу́иа.

Икос 11

Светозáрное свети́ло икóна Твоя́, о Пречи́стая Де́во, бысть нам; то́ю бо Божéственным свéтом ум наш просвещáеши, и тьму ерети́ческия прéлести отгоня́еши, всем же вéрным мир, рáзум и в вéре укреплéние дáруеши, вопию́щим к Тебé таковáя:

Рáдуйся, свéтом Божéственным нас осиявáющая;

рáдуйся, рáдостию сердцá нáша исполня́ющая.

Рáдуйся, мрак невéдения отгоня́ющая;

рáдуйся, из нездрáвия во здрáвие претворя́ющая.

Рáдуйся, две́ре вседуше́внаго покая́ния;

рáдуйся, душ всесовершéнное спасéние.

Рáдуйся, невозбрáнное от земли́ на нéбо преселéние;

Рáдуйся, на небесéх нáше оправдáние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 12

Благодáти истóчник бы́сть нам óбраз Твой пресвяты́й, Влады́чице, от скорбéй избавля́яй и на покая́ние нас призывáяй, да, зря́ще на пречи́стый лик Твой, очи́стимся от сквéрны духóвныя, и испрóсим у великодарови́таго Бóга всем долгóм нáшим отпущéние, в чистотé и свя́тости поживе́м и и́мя Егó прослáвим, в рáдости глаго́люще: Аллилу́иа.

Икос 12

Пою́ще Твоя́ чудесá, прославля́ем и́мя Твое, Богорóдице, иму́ще бо Тя Засту́пницу усéрдную, от Нея́же Сам Бог воплоти́ся и спасéние всем вéрным даровá, взираем на óбраз Твой святы́й, Влады́чице, и со умилéнием воспевáем Ти си́це:

Рáдуйся, Роди́тельнице Неискусому́жная Сы́на Превéчнаго;

рáдуйся, Прия́телище непорóчное Ду́ха Святáго.

Рáдуйся, рáдости Ходáтаице всему́ ми́ру;

рáдуйся, Светонóсная Сéне небéсная.

Рáдуйся, врéменным наказáнием невéжды умудря́ющая;

рáдуйся, согрешáющих покая́ние ми́лостиво приéмлющая.

Рáдуйся, воздыхáний нáших услы́шание;

рáдуйся, в час испытáний нáше заступле́ние.

Рáдуйся, Преми́лостивая Влады́чице, Орша́нская похвало́ и всем ве́рным утеше́ние.

Конда́к 13

О, преди́вная Мáти, всех святы́х святéйшая, преблагословéнная Влады́чице нáша Богорóдице, ны́нешнее нáше прии́ми молéние и от вся́каго злáго обстоя́ния нас избáви и от тьмы́ изведи́, да узрéвше Свет неизречéнный Сы́на Твоегó, и́мя Твоé прослáвим и Бóгу воспое́м: Аллилу́иа.

Этот конда́к читается трижды, затем и́кос 1-й и конда́к 1-й.

Молитва

О преблагословéнная Влады́чице нáша Богорóдице! Вы́сшая Небéс и вся гóрняя вóинства превосходя́щая, простри́ ру́ку Твою́ держáвную на нас, недостóйных раб Твои́х, и сохрани́ мир и безмятéжие в лю́дех правослáвных, свящéнники благослови́, монáхи защити́, лю́ди вся умири́, вóинство же укрепи́, град сей соблюди́, и нас всех, моля́щихся Тебé пред пречи́стым óбразом Твои́м, покры́й Свои́м человеколю́бием. И я́коже дрéвле даровáла еси́ оби́тели Кутеинстей и всему́ грáду Орши от ерети́ческаго зловóния избавлéние, тáко и ны́не избáви нас от вся́кия сквéрны духóвныя. И я́коже не остáвила еси́ преподóбнаго Афанáсия в годи́ну тя́жкую, тáко и нас, малоду́шных, во врéмя скорбéй нáших не остáви, Влады́чице, но бу́ди нам всем отра́да и утешéние. Да сподóбившеся ми́лости Твоея́, получи́м грехóв нáших оставле́ние и жития́ нáшего исправлéние. Ты бо еси́ Мáти нáша и засту́пница, немощны́х си́ла и малоду́шных крéпость! Ты нáше уповáние и покрóв! Исцели́ нас от вся́кия болéзни душéвныя и телéсныя, дáруй нам, Дéво Преблагáя, в житии́ нáшем тишину́ и покóй. И сподóби ны, егдá яви́тся Судия́ Вселéнней во вторóм пришéствии Своéм, вни́ти в Небéсное Цáрство, идéже вси святи́и прославля́ют в Трóице слáвимаго Бóга, Отцá и Сы́на и Святáго Ду́ха, и Твоé ми́лостивое предстáтельство, ны́не и при́сно и во вéки векóв. Ами́нь.