Акафист Пресвятой Богородице пред иконой «Казанская-Пензенская»

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избра́нней от всех родо́в, Милосе́рдой Засту́пнице ро́да христиа́нскаго, покрыва́ющей Покро́вом бла́гости Своея́ от поруга́ния гра́ды христиа́нския, и чу́дною ико́ною Свое́ю зе́млю Пе́нзенскую от наше́ствия иноплеме́нных изба́вльшей, благода́рственное пе́ние прино́сим Ти, Влады́чице Богоро́дице. Ты же, я́ко иму́щая милосе́рдие неизрече́нное, всем призыва́ющим Тя бу́ди блага́я Помо́щница, заступа́й нас во всех ско́рбех и напа́стех, да в ра́дости серде́чней зове́м Ти: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 1

А́нгельстии чи́ни с тре́петом Тебе́ слу́жат, Богоро́дице Пречи́стая, и вся во́инства Небе́сная немо́лчными гла́сы Тя ублажа́ют, Засту́пницу усе́рдную ро́да христиа́нскаго, благоволи́вшую ди́вную ико́ну Свою́ во основа́ние гра́да Пе́нзы из рук царе́вых боголюби́вым лю́дем земли́ Су́рския дарова́ти и Покро́вом ми́лости Своея́ ве́рныя покрыва́ти. Те́мже со благогове́нием, усе́рдием и любо́вию припа́дающи ко пречи́стому Твоему́ о́бразу, во умиле́нии вопие́м Ти, Благода́тней:

Ра́дуйся, я́ко Ты еси́ на́ше с Бо́гом примире́ние;

ра́дуйся, я́ко Тобо́ю и́мамы Боже́ственное обновле́ние.

Ра́дуйся, ро́ду челове́ческому благослове́нная Помо́щнице;

ра́дуйся, непобеди́мое христиа́нское в беда́х храни́лище и предгра́дие.

Ра́дуйся, христолюби́вых во́инств вседержа́вное укрепле́ние и вспоможе́ние;

ра́дуйся, Милосе́рдая Ма́ти, гра́да Пе́нзы Покрови́тельнице.

Ра́дуйся, безпо́мощным ско́рую по́мощь Твою́ явля́ющая;

ра́дуйся, утесня́емым осла́бу и свобо́ду да́рующая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 2

Ви́дящи, Всенепоро́чная, с высоты́ Небе́снаго жили́ща Своего́, иде́же с Сы́ном Твои́м в сла́ве пребыва́еши, скорбь рабо́в Твои́х в но́вем гра́де Пе́нзе, ра́ди ва́рваров наше́ствия бы́вшую, благоволи́ла еси́ яви́ти ми́лость чрез ико́ну Свою́, да утвержда́емии зна́меньми Твоея́ бла́гости лю́дие христиа́нстии ве́рно вопию́т Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 2

Разуме́ша лю́дие гра́да Пе́нзы, я́ко по́мощь на ва́рвары то́кмо от Го́спода и Ма́тере Его́ Пречи́стыя, устреми́шася в це́рковь собо́рную, пе́ние всено́щное творя́ще и сле́зно вопия́ ко Преблагослове́нней:

Ра́дуйся, А́нгелы чти́мая и челове́ческими ро́ды многопе́тая;

ра́дуйся, Ра́досте ми́рови присносла́вимая.

Ра́дуйся, Засту́пнице усе́рдная ро́да христиа́нскаго;

ра́дуйся, мечу́ наказа́ния Бо́жия на богопроти́вныя.

Ра́дуйся, зе́млю Пе́нзенскую благослове́нием Твои́м осени́вшая;

ра́дуйся, Тобо́ю бо неруши́м наш град сохраня́ется.

Ра́дуйся, тьмы лю́тых обстоя́ний от нас отгоня́ющая;

ра́дуйся, всем ско́рое в беда́х избавле́ние.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 3

Си́лу Вы́шняго низпосла́ти лю́дем, во обстоя́нии ва́рваров су́щим, умоли́ Всеми́лостиваго Спа́са Христа́ Богоро́дица Пречи́стая, да ви́дяще ми́лость и человеколю́бие Его́, благода́рне возопию́т: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 3

Иму́щи любо́вь к лю́дем гра́да Пе́нзы, стра́хом и печа́лию утесня́емым, благоволи́ла еси́, Пречи́стая, преложи́ти скорбь на ра́дость: сле́зы из пречи́стых оче́с Твои́х источа́тися прекрати́шася, и весь лик Твой на ико́не просия́, я́ко со́лнце, све́том ди́вным озаря́я вопию́щих Ти такова́я:

Ра́дуйся, я́ко лю́бящи, за нас печа́луешися;

ра́дуйся, я́ко пред Бо́гом за нас при́сно хода́тайствуеши.

Ра́дуйся, Всемо́щная Предста́тельнице, гне́в Бо́жий от нас отводя́щая;

ра́дуйся, ми́лостивно ско́рби на ра́дость прелага́ющая.

Ра́дуйся, жи́тели земли́ Су́рския ико́ною Твое́ю уте́шившая;

ра́дуйся, иму́щим наде́жду на Тя помога́ющая.

Ра́дуйся, ору́жие на враги́ и стено́ к Тебе́ прибега́ющим;

ра́дуйся, христиа́ном кре́пкое утвержде́ние.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 4

Бу́рею мно́гих бед и напа́стей от наше́ствия иноплеме́нных одержи́ма бе земля́ Су́рская. Ты же, о, Милосе́рдая Ма́ти, на умоле́ние Сы́на Своего́ о спасе́нии гра́да Пе́нзы пречи́стыя сле́зы от ико́ны Твоея́ источи́вшая, виде́нием гро́зным по́лчища вра́жия устраши́ла еси́, и та́ко побе́ду на враги́ заступле́нием Твои́м христоимени́тым лю́дем дарова́ла еси́. Та́ко и мы, недосто́йнии, ти́хое и ми́рное житие́ под покро́вом Твои́м провожда́юще, на Тя, Госпоже́ Богоро́дице, упова́ние возлага́ем, воспева́юще ра́достно Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 4

Слы́шавше лю́дие гра́да Пе́нзы о ди́внем чудеси́ от святы́я ико́ны Твоея́, Влады́чице, бы́вшем, ка́ко в виде́нии гро́знем пред враги́ христиа́нскими, со двема́ богоно́сными ста́рцы предста́ла еси́, и светоно́сными, па́че со́лнца, луча́ми, от Тебе́ исходя́щими, а́ки мече́м пла́менным, пога́ных по́лчища поража́ла еси́. Ти́и бо а́бие стра́хом ве́лиим объя́ти бы́ша, от гра́да бежа́ша, я́коже о сем по́слежде земли́ на́шея плене́ннии пове́даху. Сего́ ра́ди пое́м Ти, Благослове́нней:

Ра́дуйся, виде́нием гро́зным враги́ христиа́нския устраши́вшая;

ра́дуйся, полки́ их у́жасом порази́вшая.

Ра́дуйся, нечести́вых злове́рия обличе́ние;

ра́дуйся, горды́ни их низложе́ние.

Ра́дуйся, враго́в на́ших гро́зное посрамле́ние;

ра́дуйся, над ми́ром И́мене Христо́ва над ми́ром возвыше́ние.

Ра́дуйся, проше́ния на́ша во бла́го исполня́ющая;

ра́дуйся, за нас Бо́га умоля́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 5

Богоявле́нною звездо́ю воссия́ во гра́де Пе́нзе чудотво́рная ико́на Твоя́, Пресвята́я Богоро́дице, озаря́ющи преди́вными чудесы́ зе́млю Су́рскую и неоску́дно подаю́щи исцеле́ния благода́тныя всем притека́ющим к ней с ве́рою и любо́вию, приле́жно по́мощи прося́щим. Та́ко при́зри, Всепе́тая, и на на́ше моле́ние, пред ди́вным о́бразом Твои́м сие́ соверша́ющих, и пода́ждь, Благосе́рдая, коему́ждо поле́зное на потре́бу и не отврати́ся от нас, оскверне́нных грехми́ мно́гими, но помози́, Ми́лостивая, в покая́нии и преспе́янии в до́брых де́лех житие́ нам провожда́ти, да Тя, благу́ю Помо́щницу в сем иму́ще, благода́рне вопие́м к Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 5

Ви́деша ва́рвары чу́до явле́ния Твоего́, Влады́чице, гро́знаго, уразуме́ша, коль скора́ и крепка́ по́мощь Твоя́ лю́дем правосла́вным, в стра́се и тре́пете от преде́л земли́ на́шея бежа́ша. Мы же, ра́дующеся о Твое́й, Госпоже́ Де́во, по́мощи и заступле́нии, лику́юще воспева́ем Ти сицева́я:

Ра́дуйся, я́ко Тобо́ю воздвиза́ются побе́ды;

ра́дуйся, я́ко Тобо́ю низпа́дают врази́.

Ра́дуйся, от разоре́ния, пле́на и сме́рти нас избавля́ющая;

ра́дуйся, святы́ни на́ша от оскверне́ния и поруга́ния сохраня́ющая.

Ра́дуйся, побе́ду на враги́ правосла́вно Тя чту́щим да́рующая;

ра́дуйся, печа́ли в ра́дость упова́ющим на Тя претворя́ющая.

Ра́дуйся, злы́я наме́рения разруша́ющая;

ра́дуйся, Ма́ти Милосе́рдая, Покро́вом Свои́м от бед зе́млю на́шу покрыва́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 6

Пропове́дуют ве́рнии лю́дие гра́да Пе́нзы, предстоя́ще пред о́бразом Твои́м чудотво́рным, Влады́чице Богоро́дице, вели́кия Твоя́ ми́лости и пресла́вныя чудеса́, я́коже не́когда в виде́нии со́ннем яви́лася еси́ деви́це, ле́ты мно́гия неду́гом стра́ждущей и очи́ма сле́пе бы́вшей, повеле́ ей приити́ и помоли́тися усе́рдно пред ико́ною Твое́ю, и та, смире́нно послу́шав Тя, ше́дши с ве́рою во святы́й храм и припа́дши о́бразу Твоему́ помоли́ся, и а́бие исцеле́ние от слепоты́ получи́вши, воспе́ в ра́дости серде́чней Пода́телю Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 6

Возсия́ла есть луча́ми пресла́вных чуде́с ико́на Твоя́ чудотво́рная земли́ Су́рской, Госпоже́ Богоро́дице, подаю́щи всем благода́тныя исцеле́ния и ди́вную по́мощь с ве́рою и усе́рдием к ней притека́ющим. Та́кожде ми́лостивно услы́шала еси́ моле́ние приле́жное рабы́ Твоея́ Анастаси́и, в разслабле́нии бы́вшей, благоволи́ла еси́ честны́й о́браз Твой внести́ в дом ея́, и та с ве́рою помоли́ся и исцеле́ние благода́тное от неду́гов получи́. Мы же, ве́дяще неизрече́нное Твое́ милосе́рдие к ро́ду христиа́нскому, поклоня́емся Тебе́, Пренепоро́чней, и в ра́дости духо́вней воспева́ем Ти такова́я:

Ра́дуйся, луча́ми чуде́с от ико́ны Твоея́ зе́млю Су́рскую просвети́вшая;

ра́дуйся, от ико́ны Твоея́ деви́це исцеле́ние источи́вшая.

Ра́дуйся, неизрече́нное милосе́рдие к разсла́бленней яви́вшая;

ра́дуйся, печа́ль и плач в ра́дость ве́лию претвори́вшая.

Ра́дуйся, су́щих в неду́зех тя́жких преди́вно исцеля́ющая;

ра́дуйся, безоче́сным сла́дкое зре́ние подаю́щая.

Ра́дуйся, зной страсте́й, находя́щих на ны, прохлажда́ющая;

ра́дуйся, скве́рныя по́мыслы на́ша очища́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 7

Хотя́щи па́че просла́вити о́браз Свой святы́й в земли́ Пе́нзенской, Пренепоро́чная Ма́ти, и низпосла́ти вели́кия ми́лости всем, а́ще кто с ве́рою прибега́ет к не́му, благоволи́ла еси́ лю́дем, во мно́зех неду́зех зело́ стра́ждущим, в виде́ниих их явля́тися и в ве́ре наставля́ти, повелева́ющи стопы́ своя́ ко ди́вному о́бразу Твоему́ направля́ти, да сподо́бятся усе́рдными моли́твами Твои́ми неизрече́нных благ, утеше́ния и исцеле́ния, да со все́ми вку́пе воспою́т Бо́гу, спаса́ющему нас Тобо́ю: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 7

Но́вое показа́ чу́до, Взбра́нная Воево́до Небе́сных Сил, егда́ град Пе́нзу от ва́рвар пога́ных сохрани́ла еси́. Сего́ ра́ди, иму́ще Тя, я́ко необори́мую сте́ну, во смире́нии возно́сим приле́жно те́плыя моли́твы и про́сим, Влады́чице: умири́ на́шу жизнь, утоли́ на́ша печа́ли, уврачу́й я́звы душ на́ших и от осужде́ния ве́чнаго моли́твами Твои́ми изба́ви, да зове́м Ти си́це:

Ра́дуйся, Влады́чице, прибега́ющих к Тебе́ спаса́ющая;

ра́дуйся, от опа́сных обстоя́ний изыма́ющая.

Ра́дуйся, оби́димым и непра́ведно гони́мым ско́рое заступле́ние;

ра́дуйся, оби́дящим гро́зное вразумле́ние.

Радуйся, обраща́ющимся к Тебе́ ра́дость неча́янную подаю́щая;

ра́дуйся, от клеветы́ и находя́щих на ны бед огражда́ющая.

Ра́дуйся, благоче́стно и Богоприя́тно Тя прославля́ющих ми́лующая;

ра́дуйся, наро́ди Оте́чества на́шего умиря́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 8

Странноле́пно и неизрече́нно служе́ние Твое́ ро́ду челове́чу и благодея́ния Твоя́, Влады́чице, и несказа́нно удивля́ет преми́рная и ужаса́ет земна́я, вку́пе же и просвеща́ет светоно́сною благода́тиею пречи́стаго о́браза Твоего́ и ро́ждшагося от Тебе́ Христа́ Бо́га на́шего. Того́ моли́, Чи́стая, в Боже́ственнем торжестве́ Твое́м пода́ти нам просвеще́ние и ве́лию ми́лость, да пое́м Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 8

Весь мир, я́ко зве́здами богосве́тлыми, чудотво́рными ико́нами Твои́ми, Милосе́рдая Ма́ти Де́во, преиспо́лнен есть, в них же ико́на Твоя́, во гра́де Пе́нзе храни́мая, преди́вными чудесы́ в земли́ на́шей сия́ет. Чрез ню́, Пречи́стая, тьму нече́стия и неве́рия отгоня́еши, ко спаси́тельному покая́нию и оставле́нию жития́ грехо́внаго побужда́еши, всем тре́бующим Твоего́, Влады́чице, заступле́ния мир и благоде́нствие подае́ши. Сего́ ра́ди вопие́м Ти, Благослове́нней:

Ра́дуйся, я́ко Тобо́ю и́мамы Богопозна́ние;

ра́дуйся, омраче́нных умо́в просвеще́ние.

Ра́дуйся, де́монския ко́зни расторга́ющая;

ра́дуйся, в духо́вней бра́ни нам спосо́бствующая.

Ра́дуйся, я́ко во́лею Твое́ю сокруша́ются ерети́ческия главы́;

ра́дуйся, я́ко ве́рнии Тобо́ю сподобля́ются Боже́ственныя сла́вы.

Ра́дуйся, к насле́дию нетле́нному и ве́чному нас устремля́ющая;

ра́дуйся, я́ко Тобо́ю безконе́чныя жи́зни сподобля́емся.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 9

Вся земля́ Ру́сская, Госпоже́ Богоро́дице, явле́нии ди́вными святы́х ико́н Твои́х облагоде́тельствованная, воссыла́ет при́сно хвале́бную песнь Тебе́, благо́й Засту́пнице ро́да христиа́нскаго. Те́мже и мы, недосто́йнии, иму́ще ико́ну Твою́ чудотво́рную, я́ко щит и покро́в гра́ду и земли́ на́шей, прибега́юще к ней в беда́х и напа́стех, заступле́нием Твои́м усе́рдным спаса́емся, воспева́юще в ра́дости духо́вней Созда́телю Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 9

Вети́й худо́жество не довле́ет ко изглаго́ланию пресла́вных чуде́с, Тобо́ю, Богома́ти, от чудотво́рнаго о́браза Твоего́ во гра́де Пе́нзе нам явля́емых. Сего́ ра́ди Тебе́, Милосе́рдней Засту́пнице на́шей, ико́ною Твое́ю бога́тыя нам щедро́ты низпосыла́ющей, хвалебноблагода́рственно глаго́лати дерза́ем:

Ра́дуйся, воздыха́ния на́ша и сле́зы ми́лостивно прие́млющая;

ра́дуйся, вся́кое теле́сное на́ше страда́ние моли́твами Твои́ми облегча́ющая.

Ра́дуйся, от грехо́внаго пле́на свобожда́ющая;

ра́дуйся, непрело́жнаго упова́ния на Тя во исхо́де душ не посрамля́ющая.

Ра́дуйся, неистощи́мая реко́, милосе́рдия к ро́ду челове́ческому преиспо́лненная;

ра́дуйся, от вся́каго поро́ка и скве́рны нас отвраща́ющая.

Ра́дуйся, стра́ху Бо́жию науча́ющая;

ра́дуйся, благо́му и богоуго́дному в житии́ на́шем наставля́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 10

Спасти́ хотя́ мир, Госпо́дь Вседержи́тель дарова́ Тя ми́ру, Пречи́стая, во огражде́ние от сопроти́вника Бо́жия. Ты же, Всеми́лостивая, во вре́мя живота́ на́шего бу́ди нам покро́в и заступле́ние, не оста́ви нас во дни испыта́ний и скорбе́й, находя́щих на ны грех на́ших ра́ди. Ути́ши, Блага́я, в душа́х на́ших бу́рю страсте́й, и па́ки в сердца́х кро́тость Христо́ву и любо́вь вкорени́, да вопие́м Пода́телю благ вся́ческих Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 10

Стена́ неруши́ма и основа́ние непоколеби́мое гра́ду Пе́нзе бысть ико́на Твоя́, Богома́ти Влады́чице. Не преста́й ны́не Твои́ми, Госпоже́, моли́твами избавля́ти град Твой и лю́ди от всех бед, да прино́сим Ти сия́ похва́льныя да́ры:

Ра́дуйся, све́том пра́вды Бо́жия беззако́нующих облича́ющая;

ра́дуйся, грехи́ на́ша в мо́ре милосе́рдия Твоего́ растворя́ющая.

Ра́дуйся, ожесточе́ние серде́ц на́ших еле́ем ми́лости умягча́ющая;

ра́дуйся, серде́чное сокруше́ние и сле́зы о гресе́х в нас рожда́ющая.

Ра́дуйся, по Бо́зе на́ше упова́ние;

ра́дуйся, христиа́ном Боже́ственное ра́дование.

Ра́дуйся, печа́ли на́ша утоля́ющая;

ра́дуйся, Твои́м честны́м Покро́вом всех осеня́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 11

Пе́ние всеумиле́нное и смире́нное прино́сят Ти, Госпоже́ Богоро́дице, пред Твои́м, Пречи́стая, о́бразом иере́ев сосло́вие и вси лю́дие, да простре́ши Богоно́сныя ру́це Твои́ и умо́лиши за мир. Пода́ждь, Влады́чице, утеше́ние рабо́м Твои́м, да не одоле́ют ны грехи́ тя́жкия и лю́тыя, да пое́м Бо́гу, дарова́вшему нам Тебе́: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 11

Светоприе́мную Пала́ту, Бо́га пло́тию ро́ждшую, чтим Тя, Пречи́стая. Сего́ ра́ди, предстоя́ще пред ико́ною Твое́ю, мо́лимся Тебе́ по Бо́зе, да мир умири́ши в Правосла́вии и спасе́ши от всех зол рабы́ Твоя́, да зове́м Ти:

Ра́дуйся, прекра́сная Бо́га Сло́ва Пала́то;

ра́дуйся, Престо́ле Бо́жий светоно́сный.

Ра́дуйся, ка́ющихся гре́шников держа́вная Спору́чнице;

ра́дуйся, грехо́вныя жи́зни и дел рук на́ших испра́вление.

Ра́дуйся, благослове́ний Бо́жиих нам Живоно́сный Исто́чниче;

ра́дуйся, Благослове́нная, гра́да Пе́нзы похвало́ и украше́ние.

Ра́дуйся, помраче́ние грехо́вное просвеща́ющая;

ра́дуйся, исто́чницы целе́бныя источа́ющая.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 12

Благода́ть Бо́жию испроси́ и утеше́ние пода́ждь рабо́м Твои́м, Чи́стая, напа́стьми одержи́мым, и рог ве́рных вознеси́, Богороди́тельнице Мари́е, град Тво́й моли́твами Твои́ми неразруши́м сохрани́, и нас, Безневе́стная, хва́лящих Тя, спаси́, да Твои́м предста́тельством спасе́ннии, пое́м Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Икос 12

Пою́ще Твоя́ чудеса́, Богоро́дице Влады́чице, мо́лим Тя, Держа́вная Помо́щнице: я́коже дре́вле спасла́ еси́ град Пе́нзу от наше́ствия ва́рварскаго, та́ко и ны́не защити́ зе́млю Ру́сскую от нахожде́ния вра́жия, от междоусо́бныя бра́ни, от жестосе́рдия и развраще́ния грехо́внаго. Се бо сла́вят Тя лю́дие правосла́внии, и с любо́вию вопию́т Ти:

Ра́дуйся, Одиги́трие, к го́рнему Ца́рствию возводя́щая;

ра́дуйся, спаси́тельное покая́ние подаю́щая.

Ра́дуйся, всей вселе́нней отра́до и утеше́ние;

ра́дуйся, градо́в и ве́сей ра́досте и покрове́ние.

Ра́дуйся, страны́ Росси́йския благода́тное возрожде́ние;

ра́дуйся, Це́ркве Правосла́вныя многопе́тая сла́во и утвержде́ние.

Ра́дуйся, благ ве́лиих для нас пред Бо́гом Хода́таице;

ра́дуйся, к животу́ ве́чному возведе́ние.

Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Кондак 13

О, Преми́лостивая Цари́це Небесе́ и земли́, Преблагослове́нная Богоро́дице, ро́да христиа́нскаго усе́рдная Засту́пнице! Приими́ благоутро́бно моле́бное пе́ние на́ше пред цельбоно́сным о́бразом Твои́м, во умиле́нии серде́ц с ве́рою Тебе́ возноси́мое. Спаси́ и сохрани́, Всеми́лостивая, страну́ на́шу, град наш и ве́рных рабо́в Твои́х от напа́стей и бед, от страсте́й обурева́ния и плене́ния грехо́внаго свободи́ нас, да предста́тельством Твои́м насле́дуем Ца́рствие Небе́сное и сподо́бимся вку́пе со А́нгелы и все́ми святы́ми при́сно воспева́ти Бо́гу: Ра́дуйся, Засту́пнице Милосе́рдная, при́сная о нас пред Бо́гом Предста́тельнице.

Этот конда́к читается трижды, затем и́кос 1-й и конда́к 1-й.

Молитва

О, Пресвята́я Влады́чице Богоро́дице, Засту́пнице усе́рдная Це́ркве Правосла́вныя и богохрани́маго Оте́чества на́шего, Твоя́ ико́на в благослове́ние, во основа́ние гра́да Пе́нзы из рук царе́вых даро́вана бысть. О, Пречи́стая, я́коже дре́вле всеси́льным Твои́м воево́дством спасла́ еси град Пе́нзу от наше́ствия ва́рварскаго, та́ко и ны́не вонми́ гла́су моле́ния на́шего: спаси́ нас, спаси́! помози́ нам, помози́! Се, обыше́дше обыдо́ша нас греси́ мно́зи, бе́ды мно́зи, врази́ мно́зи. О, Небе́сная Цари́це, разсе́й, я́ко прах, я́ко дым нечести́выя ко́зни враго́в на́ших и запрети́ им зе́млю Ру́сскую губи́ти и лю́ди от Бо́га отвраща́ти. Укрепи́, о, Госпоже́, нас малоду́шных, немощны́х возста́ви и спаси́, от неве́рия, суеве́рия и прельще́ния инове́рием огради́, Правосла́вие в Преда́нии святы́х оте́ц сохрани́, изба́ви нас от уны́ния и озлобле́ния, умягчи́ сердца́ на́ша Ма́терними Твои́ми моли́твами, да покрыва́еми Твои́м заступле́нием, Небе́снаго Ца́рствия насле́дницы бу́дем со все́ми святы́ми во ве́ки. Ами́нь.