Акафист ко Пресвятой Богородице Киево-Печерских старцев

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Взбранная Воевода христианского рода, сколь дивны щедроты Твоя Всецарице, о них Тя любовию славим, взывая:

Радуйся, Дева Святейшая, Владычице наша благая.

Икос 1

Архангельски "Радуйся" Ти, Приснодево, за вся благодарне приносим зовуще:

Радуйся, мира Царице.

Радуйся, Радосте светлая.

Радуйся, Присноблаженная.

Радуйся, Мати Господня.

Радуйся, жизни источниче.

Радуйся, Благословенная.

Радуйся, храмов Святыня.

Радуйся, наша Твердыня.

Радуйся, Церкве веселие.

Радуйся, Славная, Кроткая, Дивная.

Радуйся, Солнца Светлейшая.

Радуйся, Дево Святейшая, Владычице наша благая.

Кондак 2

Твой Лик, Приснодева, сердца озаряет, наш дух оживляет, Царице, влекующе за вся славословити Тя, о Тебе вознося: Аллилуиа.

Икос 2

Достойно Тя славити даждь, Приснодева, всем сердцем сия возносяще смиренне:

Радуйся, Благовест мира.

Радуйся, Проповедь веры.

Радуйся, всех Просвещение.

Радуйся, Бога познание.

Радуйся, Того прославление.

Радуйся, Тому поклонение.

Радуйся, Небо отверзшая.

Радуйся, всех Привлечение.

Радуйся, душ освящение.

Радуйся, верою сильная.

Радуйся, Любы огневидная.

Радуйся, Дево Святейшая, Владычице наша благая.

Кондак 3

Просвети наши мысли, освяти наши чувства, мир тихий пролей в души наша. О сем, Приснодева, Тя просим и молим, о сем вопием: Аллилуиа.

Икос 3

Твоея Благодати, Святейшая Мати, подаждь причащатися Ти приносящим:

Радуйся, Мати Сладчайшая.

Радуйся, благ Излияние.

Радуйся, в помощи Дивная.

Радуйся, Знамя священное.

Радуйся, Имя всесильное.

Радуйся, Непобедимая.

Радуйся, Дева Преславная.

Радуйся, всеми Желанная.

Радуйся, всеми Блажимая.

Радуйся, о мире Моление.

Радуйся, мира Спасение.

Радуйся, Дево Святейшая, Владычице наша благая.

Кондак 4

Сокровище наше еси, Приснодева, Сокровище вечное всем во спасение, да вси о Тебе благодарне, Царице, во веки зовем: Аллилуиа.

Икос 4

Вся благостно к Спасу, Преславная Дева, приводиши вернии, Ти приносящия:

Радуйся, Пламене веры.

Радуйся, Столпе надежды.

Радуйся, любви Горение.

Радуйся, мире душевный.

Радуйся, Образ терпения.

Радуйся, Славо смирения.

Радуйся, Облаче света.

Радуйся, всех Осенение.

Радуйся, душ Озарение.

Радуйся, Тихая, Чудная, Мирная.

Радуйся, верных Отрада.

Радуйся, Дево Святейшая, Владычице наша благая.

Кондак 5

В чистоте непорочно хранити сердца призываеши, Мати Творца, да сподобимся Троицу Безсмертную зрети, со гласом хвалы: Аллилуиа.

Икос 5

О Тебе помышляти есть ангелом радость и людям спасительно, Дево, зовущим:

Радуйся, Дева Пресветлая.

Радуйся, Цвете Небесный.

Радуйся, Сладости зрение.

Радуйся, Ангел чистейшая.

Радуйся, Мати славнейшая.

Радуйся, верных Хваление.

Радуйся, Вся сострадание.

Радуйся, Вся всепрощение.

Радуйся, наше Целение.

Радуйся, всех Единение.

Радуйся, Двери спасения.

Радуйся, Дево Святейшая, Владычице наша благая.

Кондак 6

Яко волны морския, не бури мирстии, в пучину влекут, Приснодево, но токмо Тобой обретаем покой, зовуще о сем: Аллилуиа.

Кондак 6

Отраду скорбящих, Надежду просящих, Едину Тя вемы, Царице, зовущи:

Радуйся, бурных Отишие.

Радуйся, Пристане Тихая.

Радуйся, бед Избавление.

Радуйся, душ Сокрушение.

Радуйся, Плач покаяния.

Радуйся, Судии умоление.

Радуйся, Мир подающая.

Радуйся, скорбей Утоление.

Радуйся, уз Разрешение.

Радуйся, падших Возстание.

Радуйся, мое Оправдание.

Радуйся, Дево Святейшая, Владычице наша благая.

Кондак 7

Нам Тя со Креста, Сам Господь даровал, быти Матерью верных, Царице Святая, да всею душею храними Тобою, о Тебе воззовем: Аллилуиа.

Икос 7

Всегда еси с нами, Владычица наша, всегда ны незримо храниши, зовущия:

Радуйся, Агнице.

Радуйся, Божия. Радуйся,

Вся Священная. Радуйся, Кроткая.

Радуйся, Дивная.

Радуйся, Превознесенная.

Радуйся, в Бозе Желание.

Радуйся, к Богу Стремление.

Радуйся, в Нем Покаяние.

Радуйся, Чудная, Славная, Светлая.

Радуйся, Радосте вечная.

Радуйся, Дево Святейшая, Владычице наша благая.

Кондак 8

Все силы Небесныя славят Тя Дево, Стено Нерушима, еси бо всем верным, да вси о Тебе возвестим, Всецарице, во веки веков: Аллилуиа.

Икос 8

Во дни и ночи, в яве и тайне, храниши ны благостно, Дева, зовущих:

Радуйся, Покрове живущих.

Радуйся, Надежда отшедших.

Радуйся, наше Взыскание.

Радуйся, Помоще падшим.

Радуйся, Благостью дивная.

Радуйся, всех упование.

Радуйся, души Вразумление.

Радуйся, ума Просвещение.

Радуйся, света Сияние.

Радуйся, Церкви Хваление.

Радуйся, верных Веселие.

Радуйся, Дево Святейшая, Владычице наша благая.

Кондак 9

Возносиши присно, Святая Царице, фимиам священный молений о верных, да храними Тобою, Споручнице наша, о Тебе вознесем: Аллиуиа.

Икос 9

Твоими мольбами весь мир содержится да Ти благодарно взываем Царице:

Радуйся, Чаше всеблагости.

Радуйся, жизни Сокровище.

Радуйся, Присноблажимая.

Радуйся, Красото Неземная.

Радуйся, горних Веселие.

Радуйся, Присноблаженная.

Радуйся, Божий престоле.

Радуйся, Вечнаго Зрение.

Радуйся, всех Озарение.

Радуйся, ангелов Пение.

Радуйся, людям Спасение.

Радуйся, Дево Святейшая, Владычице наша благая.

Кондак 10

Ты еси наша Слава и Честь и Хвала, Спасение наше, Царица Святая и се о Тебе Небеса и земля песнь купно поют: Аллилуиа.

Икос 10

Да горят все сердца, подвизая уста, Тя славити, Дева, сия приносяще

Радуйся, Светлая Духом.

Радуйся, Кроткая сердцем.

Радуйся, верных Хранение.

Радуйся, Храме Господень.

Радуйся, Божий Киоте.

Радуйся, всех Утешение.

Радуйся, Вся Целомудрие.

Радуйся, Вся Благоухание.

Радуйся, Песнь Херувимов.

Радуйся, Тихая, Светлая, Славная.

Радуйся, Имя Священное.

Радуйся, Дево Святейшая, Владычице наша благая.

Кондак 11

Величие Духа, Печать Совершенства, и вечную Благость Твоя прославляем, благодарне зовуще, Владычице мира, за вся о Тебе: Аллилуиа.

Икос 11

Ты Слава Небес еси, радость духов и наше спасение, Дева, зовущих

Радуйся, Луче Богознания.

Радуйся, Реко Благодати.

Радуйся, Росо освящения.

Радуйся, милосте Море.

Радуйся, Полная Благости.

Радуйся, душ Умиление.

Радуйся, Мосте на Небо.

Радуйся, Лествице Света.

Радуйся, Молниезрачная.

Радуйся, Заре Воскресения.

Радуйся, Знамя Спасения.

Радуйся, Дево Святейшая, Владычице наша благая.

Кондак 12

Буди благословенна за вся, Всеблаженная, буди Благословенна во веки и веки от вышних и нижних, зовущия присно побледную песнь: Аллилуиа.

Икос 12

Блаженны Тобою и мы, Всецарице, яко благо есть верным сия приносити:

Радуйся, Славная горним.

Радуйся, Близкая дольним.

Радуйся, дух Оживляющая.

Радуйся, в Бозе Живущая.

Радуйся, к Богу Влекущая.

Радуйся, в Нем Пребывающая.

Радуйся, Ангел Превысшая.

Радуйся, Мати Предивная.

Радуйся, сладце Любимая.

Радуйся, всем Вожделенная.

Радуйся, Славо Вселенная.

Радуйся, Дево Святейшая, Владычице наша благая.

Кондак 13

О Царице духов, всех миров и веков! Буди Благостна, Благостна нам и вся ны заступи, сохрани и спаси, да зовем о Тебе: Аллилуиа, Аллиуиа, Аллилуиа.

Этот конда́к читается трижды, затем и́кос 1-й и конда́к 1-й.

Молитва

Призри на ны с Небеси, Приснодево, Все радости верных, Владычице мира. Ни блага земная Ти просим, Царице, Сама бо Всещедре сие подаеши, но о вечном спасении просим и молим. Да в Горняя зрим Тя во Славе Небесной, за вся о Тебе славословяще Бога во веки и веки. Аминь.