Акафист иконе Пресвятой Богородицы Зиновинская

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Богоявленный покров всех скорбящих и грехми обремененных, Царицу нашу преблагую, паче естества и слова Единородное Божие Слово рождшую, пением молебным ублажим:

Радуйся, Владычице Зиновинская, духовныя очи наша отверзающая.

Икос 1

Хотя благословение исцеляющее на верныя люди Твоя излияти, явила еси чудную икону Твою, «Зиновинская» именуемую, да веи, благодать изобильную от нея приемлющии, благодарным сердцем Богородице воспоют:

Радуйся, Пренебесная, Нетленная, Чистая;

Радуйся, Невместимаго всеми вместившая.

Радуйся, Небес Царя Бога рождшая;

Радуйся, Святая святых большая.

Радуйся, Сыну Твоему и Богу сопребывающая;

Радуйся, преславно с Богом царствующая.

Радуйся, Владычице Зиновинская, духовныя очи наша отверзающая.

Кондак 2

Издревле род христианский Твоим предстательством щедро снабдевая и просвещение, исцеление и воспитание чрез чудотворныя иконы Твоя ему даруя, благоволила еси, Богородице, землю Подольскую посетити и всех в ней сущих к пению таковому подвигнути: Аллилуиа.

Икос 2

Видя некая раба Божия свет духовный, в дому ея от пречистаго образа Богородицы многажды исходящий, священника и народ Божий о сем извести, да явлен будет миру цельбоносный лик Твой, егоже зряще возопиим:

Радуйся, Дево Мариам, приятное Богу имя и существо;

Радуйся, преукрашенная благодатию Мати Божия и Царице.

Радуйся, огнь Божества во чреве неопально приимшая;

Радуйся, смертных естество обожившая.

Радуйся, чистая Слова Питательнице;

Радуйся, живоприемный Источниче.

Радуйся, Владычице Зиновинская, духовныя очи наша отверзающая.

Кондак 3

Возсия в сердцах христианских Твоея благодати нетленный свет, мысленныя очи душ наших освящающий, страх блаженных заповедей Христовых в нас влагающий и со умилением пети научающий: Аллилуиа.

Икос 3

Многоразличныя исцеления источаше чудотворная икона Твоя, Богомати, по пренесении ея во святый Божий храм, болящии бо сердцем, умом и телом облегчение в недузех, очищение в чувствиих и смирение в мыслех обретаху, велегласно к Тебе взывающе:

Радуйся, огненосная Купина;

Радуйся, достохвальный Кивоте Божия завета.

Радуйся, златая Стамна, в ней же манна небесная - Христос соблюдеся;

Радуйся, честный Сосуде, в нем же евангельский многоценный бисер обретеся.

Радуйся, неоранная Земле Господня, израстйвшая нам Клас живота;

Радуйся, светоносный Свещниче незаходимаго Света.

Радуйся, Владычице Зиновинская, духовныя очи наша отверзающая.

Кондак 4

Яко венцем пресветлым, Пречистая Богородице, иконою Твоею Церковь Христова обогатися, и ликует, о таковом духовном сокровище вопиющи Богу: Аллилуиа.

Икос 4

Явила еси сугубую Твою милость, чадо малое, Даниила, от разслабления внезапнаго исцеливше, темже и славу сугубую новоявленной иконе Твоей снискала еси, пред неюже, вернии, умиленно возопиим:

Радуйся, диадимо честная божественныя славы;

Радуйся, надеждо известная и христиан похвало.

Радуйся, Лествице небесная, восходящая от земли к Престолу Божию;

Радуйся, Горо Господня, покрывшая небеса добродетелию.

Радуйся, о неисчерпаемый кладенец милосердия;

Радуйся, о безмерная глубино любве.

Радуйся, Владычице Зиновинская, духовныя очи наша отверзающая.

Кондак 5

Обетование данное Небесной Владычице исполняя, благодарственно возопи благочестивый родитель: «Приими, Всеблагомощная, чадо мое под покров Твой и буди ему Поручница к Рожденному из Тебе, Емуже присно взываем: Аллилуиа.

Икос 5

Живый под покровом Пречистыя исцеленный отрок пламенную любовь к Ней возымел есть и, восходя от силы в силу неизреченным Владычицы милосердием, архиерей Божий бысть, истово же работая Матери-Церкви, житием своим Христа Господа и Богородицу прослави, выну вопия:

Радуйся, Богородице Дево, проповедание мое;

Радуйся, Всесвятая Госпоже верных.

Радуйся, Сына и Слова раю словесный;

Радуйся, Преславный Граде Господень.

Радуйся, Дивная Колеснице Божия;

Радуйся, Красото земли преизобильная.

Радуйся, Владычице Зиновинская, духовныя очи наша отверзающая.

Кондак 6

Всяческая исполняются святости, егда благословение Твое, Богомати, прияти сподобятся. Такожде и архиепископ Модест, о славе Твоей поревновав, к славе святителя Христова вознеслся есть, вразумляя всех верных прославляти Бога: Аллилуиа.

Икос 6

Память святую храня о неизглаголаннем чудеси своего исцеления, возымел есть владыка Модест желание неотступное храм Божий во славу Пресвятыя Троицы и Богоматери во отечествии своем воздвигнути, да вси входящии вонь дивный образ Пречистыя возмогут узрети и умиленным сердцем пред ним возопити:

Радуйся, чудная Божия Палато;

Радуйся, земли и неба Всецарице.

Радуйся, Неоскверненная и Девственная, из Неяже создася новый Адам;

Радуйся, Книго таинственная, в Нейже написася Божие Слово.

Радуйся, Одре честный, святый и Богоприемный;

Радуйся, Образе, промыслом Всемогущаго благосоделанный.

Радуйся, Владычице Зиновинская, духовныя очи наша отверзающая.

Кондак 7

Тайная человеческая ведый Един благоволил благочестивому желанию архиерея явным стати и велелепному храму во имя Пресвятыя Троицы воздвигнутым вскоре быти, мы же таковому о нас Божию смотрению радующеся, воззовем: Аллилуиа.

Икос 7

Возсия всему краю Подольскому свет спасения от пречуднаго образа Твоего, Богомати, егда в ризу позлащенну одеяна предстала еси сердцам молящих Ти ся в новоосвященнем храме и благодарственно поющих:

Радуйся, Сладчайшаго Сына Сладчайшая Мати;

Радуйся, Прибежище великое и Похвало верным.

Радуйся, Саде заключенный, идеже Древо жизни и безсмертия;

Радуйся, Источниче запечатленный, в немже поток сладости всенеизреченныя.

Радуйся, Вместилище умныя святыни;

Радуйся, Подательнице божественныя благостыни.

Радуйся, Владычице Зиновинская, духовныя очи наша отверзающая.

Кондак 8

Воистину сокровище небоявленное всему краю Подольскому бысть икона Твоя, Владычице, многолетне бо на стражи благочестия народнаго непоколебимо предстоящи, многих научила еси пети Сыну Твоему и Богу: Аллилуиа.

Икос 8

Хотя на икону Пречйстыя Целительницы своея присно взирати и благодарственныя мольбы пред нею возносити, повеле благочестивый владыка списание честнаго образа Зиновинскаго сотворити, да неотступно пребудет с ним благословение Божия Матере, Юже велегласно воспоим:

Радуйся, надеждо наша, покрове и веселие;

Радуйся, от вражиих нахождений ограждение.

Радуйся, падшим возстание;

Радуйся, унывающим радование.

Радуйся, заблуждшим наставнице;

Радуйся, болящим посещение и исцеление.

Радуйся, Владычице Зиновинская, духовныя очи наша отверзающая.

Кондак 9

Дивный свет исходиша от иконы Твоея, Владычице, егда храм, в немже пребывати благоволила еси, зело от безбожник лютых поругаем бываше. «Внемлите себе, человецы, - безгласно лик Твой взываше, - покайтесь и возопийте Богу: Аллилуиа.

Икос 9

Скорбя о тьме духовной, еюже земля наша во времена гонений на веру Христову объята бяше, изволила еси, Владычице, икону Твою в дому благочестивом сокрыти, да не умолкнут никогдаже пред нею похвалы сицевыя:

Радуйся, Пучино разума и благодати;

Радуйся, Бездно неистощимыя светлости.

Радуйся, Цвете веры неувядаемый;

Радуйся, Жезле Ааронов дивно прозябший.

Радуйся, златая молитвы Кадильнице;

Радуйся, за род христианский вечная Предстательнице.

Радуйся, Владычице Зиновинская, духовныя очи наша отверзающая.

Кондак 10

«Яко тает воск от лица огня, тако да погибнут грешницы от лица Божия, а праведницы да возвеселятся» - сбытие священных словес сих зряще, приидите, вернии, поклонимся Христу Спасителю и Его Пречистой Матери, паки и паки безверие и безбожие поправшим, и ликующе воспоим: Аллилуиа.

Икос 10

Новое чудо явила еси, приснорадованная Владычице, егда у лика Твоего честнаго, со смеженным взором изображеннаго, внезапу очи отверзостеся. Мы же, таковому дивному знамению внимающе, принесем Богородице жертву воскликновения:

Радуйся, плоть Спасителю от Своих кровей исткавшая;

Радуйся, единаго Царя миру явившая.

Радуйся, Врача всех человеков рождшая;

Радуйся, тьму греховную разрушившая.

Радуйся, пламень многобожия угасившая;

Радуйся, путь к Вечной Жизни нам указавшая.

Радуйся, Владычице Зиновинская, духовныя очи наша отверзающая.

Кондак 11

Приспе день светлаго торжества, егда сокровенная чаяния верных раб Твоих, Приснодево, исполнися: чудотворный образ обретеся и в храм Божий со славою возвратися, да вси, упование в Тебе, Богомати, имуще, с верою к нему припадают и со слезами вопиют: Аллилуиа.

Икос 11

«Помилуй нас, Владычице, помилуй нас, многоболезненных душею и телом», - народ Божий, верою в предстательство Твоё движимый, вопиет, никтоже бо тощь от Божией Матере отходит, но всегда благодарственно поет:

Радуйся, от всякаго вражия пленения скорое свобождение;

Радуйся, всечудное человеков к Богу примирение.

Радуйся, душепагубныя скверны попрание;

Радуйся, сердец наших очищение и обновление.

Радуйся, страждущей плоти нашей врачевание;

Радуйся, душ наших победоносное спасение.

Радуйся, Владычице Зиновинская, духовныя очи наша отверзающая.

Кондак 12

Благодать Божия, обильно на икону Твою, именуемую Зиновинская изливаемая, неизреченно влечет к ней всех жаждущих от Госдода облегчения, исцеления и страждущей души спасения. Всякий бо от нея по вере своей приемлет и благодарственно о Тебе, Всеблагая, вопиет: Аллилуиа.

Икос 12

Светозарными лучами знамений и чудес немерцаемо сияет святая икона Твоя, Богомати, землю Подольскую многолетне от напастей и бед покрывая и народ ея к покаянию и благочестию призывая, темже убо молим Тя, Царице Небесная, да достойни явимся и ныне неисповедимых Твоих милостей и благохвально возопиим:

Радуйся, Ты еси крепость наша и утверждение;

Радуйся, Ты бо еси нам святое ограждение.

Радуйся, Ты еси источник нашего исцеления;

Радуйся, Ты бо еси начало истиннаго покаяния.

Радуйся, Ты еси ходатаица нашего прозрения;

Радуйся, Ты бо еси подательница любви и смирения.

Радуйся, Владычице Зиновинская, духовныя очи наша отверзающая.

Кондак 13

О, чудная и высшая всех тварей Царице Богородице, честнейшая воистину херувим и славнейшая без сравнения серафим! Се в руце Твои предаем отягченнии грехом души наша, Ты нас взыщи, Ты нас защити, Ты нас утеши и Своею пламенною молитвою двери Божия милосердия отверзи о Тебе вопиющим: Аллилуиа.

Этот конда́к читается трижды, затем и́кос 1-й и конда́к 1-й.

Молитва

О, Пренепорочная Приснодевствующая Богомати, мира христианскаго похвало и земли Подольския неотступное утверждение, благодарим Тя, яко сподобила еси нас недостойных причастниками быти неизглаголанных чудес Твоих. Отверзи убо очи мысленныя сердец наших, во еже всегда неложно зрети нам правдивую стезю жития христианскаго и непоколебимо ею шествовати. Укрепи наша стопы, чувствия наша сиянием благодати Твоея просвети, волю ко исполнению заповедей Христовых направи, разум покаяния и благодарения исполни и неотриновенных нас сотвори во вся дни живота нашего от Матерния Твоея чадолюбивыя милости, да выну кимвалами чистых устен хвалим, благословим и величаем благодатную Матерь Господа нашего Иисуса Христа, Емуже слава, честь и поклонение во веки. Аминь.