Акафист Пресвятой Богородице пред иконою Ея «Успокоительница»

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Взбранной Воеводе и Благой Заступнице рода христианскаго, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких нас бед свободи, да зовем Ти:

Радуйся, Благая Успокоительнице, мир и покой в сердца наша низпосылающая.

Икос 1

Ангела с Небесе послати чадом нашим исходатайствуй, Пресвятая, у Сына Твоего и Бога нашего, якоже и Тебе послан бысть Гавриил Архангел, и сподоби ны взывати Тебе сице:

Радуйся, рождением Своим родителей обрадовавшая.

Радуйся, со слезами многими у Бога испрошенная.

Радуйся, молитвы и поста светлое прозябение.

Радуйся, благочестивыя жизни красный плоде.

Радуйся, от младенства святаго послушания исполненная.

Радуйся, благочестием от сосца матерня напоенная.

Радуйся, любве всесветлое жилище.

Радуйся, милостей Господних сокровище.

Радуйся, Благая Успокоительнице, мир и покой в сердца наша низпосылающая.

Кондак 2

Видящи наше слезное родительское моление, умилосердися, Владычице, о чадех наших, возми их под Свой честный и благосветлый покров, да воззовут в веселии Богу: Аллилуиа.

Икос 2

Разум чадом нашим низпосли, еже како добре Ти послужити, и наполни сердца их премудростию небесною, подающи едину ю возлюбити, земное же презрети, и не возбрани устом нашим взывати таковая:

Радуйся, детство свое при храме проведшая.

Радуйся, во Святая Святых возшедшая.

Радуйся, единому Богу посвященная.

Радуйся, молившаяся Ему день и нощь.

Радуйся, чистоту и целомудрие измлада возлюбившая.

Радуйся, смирение свое всеусердно охранявшая.

Радуйся, молитвою к Богу присно пламеневшая.

Радуйся, похвало и радосте родителей святых.

Радуйся, Благая Успокоительнице, мир и покой в сердца наша низпосылающая.

Кондак 3

Сила Вышняго да осенит чада наша, Твоего ради неусыпнаго предстательства за них пред Сыном Твоим, и, познавше Твое матернее милосердие ко всем с верою притекающим к Тебе, воззовут Богу: Аллилуиа.

Икос 3

Имуще от Бога чад наших, не хощем зрети их в геенне огненней пребывающих, но записанных в книзе животней. Сего ради, Пречистая Дево, приклонися ко гласу моления нашего, взывающему Тебе:

Радуйся, Мати Бога и Слова.

Радуйся, Святая Святых большая.

Радуйся, Воспитательнице Сына Божия.

Радуйся, Кормилице Господа сил.

Радуйся, яко раждаеши Спасителя мира.

Радуйся, яко растиши Избавителя плененным.

Радуйся, яко носиши Наставника заблудшим.

Радуйся, яко Сын Твой - Господь.

Радуйся, Благая Успокоительнице, мир и покой в сердца наша низпосылающая.

Кондак 4

Бурю видяще соблазнов многоразличных, умножившихся яко песия мухи и скнипы в пределех наших, к Тебе, Благодатная, взываем о чадех своих, да избегнут сих и вопиют Богу: Аллилуиа.

Икос 4

Слышаще глас Твой, глаголющий Сыну Твоему: «Приими всякаго молящагося Тебе и призывающа имя Мое на помощь», простираем руце наша на молитве к Твоему милосердию, да возмеши чад наших под покров Свой и исполниши прошения наша таковая:

Радуйся, от уныния злаго чад наших избавляющая.

Радуйся, от безумнаго веселия их ограждающая.

Радуйся, в несении креста их укрепляющая.

Радуйся, в подвизех благочестия их утверждающая.

Радуйся, под покровом Твоим милостиво их сохраняющая.

Радуйся, здравие душ и телес им подающая.

Радуйся, усердная Наставнице целомудрия.

Радуйся, милостивая Взыскательнице заблудших.

Радуйся, Благая Успокоительнице, мир и покой в сердца наша низпосылающая.

Кондак 5

Боготечная звезда утренняя, Сын Твой, Пресвятая Дево, да возсияет светом невечерним в сердцах чад наших во еже воззвати им Богу: Аллилуиа.

Икос 5

Видящи наше прилежное моление, не отврати лица Твоего от чад наших, аще и отвратятся Тебе, и услыши глаголы уст наших, вопиющих таковая:

Радуйся, яко научаеши чад наших имети разум на доброе.

Радуйся, на пути греха их запинающая.

Радуйся, правошествовати их наставляющая.

Радуйся, от лукавства злых человек их ограждающая.

Радуйся, в злострадании их укрепляющая.

Радуйся, благодарити Бога за все научающая.

Радуйся, благая Ходатаице присно о чадех наших к Сыну Своему.

Радуйся, Споручнице их пред Творцом и Богом.

Радуйся, Благая Успокоительнице, мир и покой в сердца наша низпосылающая.

Кондак 6

Проповедует весь мир христианский Твое всегдашнее заступление о молящихся Тебе, сице и ныне услыши многоболезненное сие родительское моление о чадех наших, во еже звати им Богу: Аллилуиа.

Икос 6

Да возсияет луча благодати в душах чад наших, и, просвещеннии Тобою, узрят путь, ведущий в живот вечный, и последуют по нем, сохраняеми под Твоим всемогущим покровом. Сего ради услыши ны, зовущих Ти таковая:

Радуйся, родителей на любовь благу к чадом своим подвигающая.

Радуйся, сердца чад, во еже родителей своих чтити, умиляющая.

Радуйся, просящим подающая разум.

Радуйся, верных озаряющая смыслы.

Радуйся, всех скорбящих Радосте.

Радуйся, умягчение злых сердец.

Радуйся, Отрадо и Утешение.

Радуйся, прибавление ума.

Радуйся, Благая Успокоительнице, мир и покой в сердца наша низпосылающая.

Кондак 7

Хотяще чадом нашим вечнаго спасения, со слезами предстоим пред честною Твоею иконою, Владычице, да не презриши моления нашего, зовущаго Сыну Твоему: Аллилуиа.

Икос 7

Новую покажи милость на чадех наших, Владычице, и неизследимыми судьбами Сына Твоего привлецы их под Свой благодатный покров, да усердно зовем Ти:

Радуйся, воспитание чад наших, во еже огражденными им быти муки вечныя.

Радуйся, воспитание чад наших во еже наследовати им блаженство непрестающее.

Радуйся, пробуждение совести чад наших на покаяние.

Радуйся, питающая их плодами добротолюбия.

Радуйся, премилосердая Утешительнице всех скорбящих и обремененных.

Радуйся, неусыпающая Наставнице всех заблудших и ослепленных.

Радуйся, Судии праведнаго умоление.

Радуйся, многих согрешений прощение.

Радуйся, Благая Успокоительнице, мир и покой в сердца наша низпосылающая.

Кондак 8

Странствующе в юдоли сей многоскорбней по морю многомятежному страстей, чада наша где обрящут твердое пристанище, аще не в Тебе, Пречистая. Спутешествуй же им и настави их на путь истинный, да зовут Богу: Аллилуиа.

Икос 8

Всем еси Мати милующая, Пречистая Дево, якоже Христос Спаситель рече Тебе, у Креста Его предстоящей: "Се, сын Твой", - указуя на избраннаго от человек. Сего ради вручаем чада наша в руце Твои и во смирении зовем Ти:

Радуйся, чад наших благосердая Путеводительнице.

Радуйся, терния греховных страстей милосердая Искоренительнице.

Радуйся, отраду в пустыни греха подающая.

Радуйся, в минуту скорби утешающая.

Радуйся, в землю обетования путеводствующая.

Радуйся, на воде упокоения веселящая.

Радуйся, совершенный разуме наставников и детоводителей.

Радуйся, благословение домов и семейств благочестивых.

Радуйся, Благая Успокоительнице, мир и покой в сердца наша низпосылающая.

Кондак 9

Всякаго блага исполни сердца и души чад наших, отгоняющи от них духа злосмраднаго безбожия, нечестия и блудодейства, господствующа в мире сем. Сохрани рабов Твоих в чистоте и целомудрии, да взывают во умилении Богу: Аллилуиа

Икос 9

Ветий суемудренных, лжущих на Твое всемощное заступление, отжени, Мати Божия, от чад наших, да не поползнутся умом в душетленныя учения и не обратятся сердцем в похоти безместныя, но призри на ны, верно вопиющия:

Радуйся, добрым нравом чад наших научающая.

Радуйся, от злых навыков их избавляющая.

Радуйся, мудрых наставников Твоим рабом посылающая.

Радуйся, от худых сообществ их отвращающая.

Радуйся, благому учению внимати призывающая.

Радуйся, суетныя басни презирати помогающая.

Радуйся, Божие ко грешным благоволение.

Радуйся, кающихся пред Господем крепкое заступление.

Радуйся, Благая Успокоительнице, мир и покой в сердца наша низпосылающая.

Кондак 10

Спасти хотя мир, Христос Бог призва не праведники, но грешники на покаяние, сего ради молися Сыну Твоему о чадех наших, аще и пойдут на страну далече, обаче взысканные Твоим Матерним заступлением, возвратятся в сокрушении сердца к Отцу Небесному и воззовут Ему: Аллилуиа.

Икос 10

Стеною несокрушимою стани, Небесная Царице, чадом нашим, да Твоим предстательством избегнут змиева приношения, краснаго в снедь, последи же смертоноснаго, и возмогут чистым сердцем пети Тебе таковая:

Радуйся, избавляющая чад наших от ядовитаго зелия.

Радуйся, спасающая их от душепагубнаго пития.

Радуйся, от блудодейства их сохраняющая.

Радуйся, целомудрию их научающая.

Радуйся, потребление всякаго обольщения.

Радуйся, избавление всякаго смущения.

Радуйся, трезвения Поборнице.

Радуйся, мудрости Ходатаице.

Радуйся, Благая Успокоительнице, мир и покой в сердца наша низпосылающая.

Кондак 11

Пети Твое необоримое заступление выну сподоби чад наших, да обряшут Тебе крепкую Помощницу, и Твоею благодатию отверзут уста свои воспевати Богу: Аллилуиа.

Икос 11

Светоприемною свещею житие чад наших соделай, да присно горят любовию к Тебе и Сыну Твоему, и не презри ны, зовущих Ти:

Радуйся, дым соблазнов разгоняющая.

Радуйся, мглу страстей просвещающая.

Радуйся, зрение хранити научающая.

Радуйся, блюсти чувствования вразумляющая.

Радуйся, щедрот неизреченных Мати.

Радуйся, побуждающая чад наших в благоговении Тебе предстояти.

Радуйся, утешение им в скорби живоносное.

Радуйся, от набега лукавых прибежище непреложное.

Радуйся, Благая Успокоительнице, мир и покой в сердца наша низпосылающая.

Кондак 12

Благодатию неизреченною Духа Святаго напитай сердца чад наших, еже возлюбити токмо Сына Твоего и Бога, и Тебе, Преблагую Заступницу, да подвигшеся Тобою, зовут Царю всяческих: Аллилуиа.

Икос 12

Поюще Твое милосердие, имже милуеши и питаеши чад наших, молимся: не престай просити о них Сына Твоего, яко вся Тебе возможна суть, и услыши мольбы наша таковая:

Радуйся, от купели святаго крещения чад наших Восприемнице.

Радуйся, к свету истины их Путеводительнице.

Радуйся, росу благодати Твоея им подающая.

Радуйся, млеком истины их питающая.

Радуйся, яко твориши чад наших земныя Ангелы.

Радуйся, яко претворяеши их в небесныя человеки.

Радуйся, наследники Царствия Небеснаго их показующая.

Радуйся, в обителех небесных их водворяющая.

Радуйся, Благая Успокоительнице, мир и покой в сердца наша низпосылающая.

Кондак 13

О, Всепетая Мати Иисуса Сладчайшаго! Приими малое сие моление о чадех наших в воню благоухания духовнаго и возми их под Твой милосердный покров. Еще же даруй им мыслити, глаголати и творити точию Тебе и Сыну Твоему угодная и посли им в жизни сей привременней вся полезная ко спасению душ их, да воспевают Богу: Аллилуиа.Аллилуиа.Аллилуиа.

Этот конда́к читается трижды, затем и́кос 1-й и конда́к 1-й.

Молитва Пресвятой Богородице пред иконою Ея «Успокоительница»

Молитва первая

О Пречистая Богомати, Всецарице Успокоительнице! Услыши многоболезненное воздыхание наше пред чудотворною иконою Твоею, из удела Афонскаго в Русь принесенною, призри на чад Твоих, неисцельными недуги страждущих, ко святому образу Твоему с верою припадающих!

Якоже птица крилома покрывает птенцы своя, тако и Ты ныне, присно жива сущи, покрый нас многоцелебным Твоим омофором. Тамо, идеже надежда исчезает, несумненною Надеждою буди. Тамо, идеже лютыя скорби превозмогают, терпением и ослабою явися. Тамо, идеже мрак отчаяния в души вселися, да возсияет неизреченный свет Божества! Малодушныя утеши, немощныя укрепи, ожесточенным сердцам умягчение и просвещение даруй. Исцели болящия люди Твоя, о Всемилостивая Царице! Ум и руки врачующих нас благослови, да послужат орудием Всемощнаго Врача, Христа Спаса нашего. Яко живей Ти, сущей с нами, молимся пред иконою Твоею, о Владычице! Простри руце Твои, исполненныя исцеления и врачбы, Радосте скорбящих, в печалех Утешение, да чудотворную помощь скоро получивше, прославляем Живоначальную и Нераздельную Троицу, Отца, и Сына и Святаго Духа во веки веков. Аминь.

Молитва вторая

 О, Пресвятая Владычице Дево Богородице, премилосердая Мати всех человек, спаси и сохрани под кровом Твоим чад наших, всех отроков, отроковиц, младенцев и во чреве матери носимых. Покрой их ризою Твоею, соблюди их в страсе Божием и послушании родителям, умоли Господа нашего и Сына Твоего, да дарует им вся полезная к душевному спасению. Вручаем их Твоему материнскому смотрению, яко Ты еси Божественный покров рабом Твоим. Аминь.