Акафист Пресвятой Богородице в честь иконы Ее Новоникитской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избра́нней от всех родо́в Преблагословенней Деве Богородице похвальное приносим пение; Ты же, яко иму́щая державу непобедимую и милосердие неизреченное, от всяких нас бед и скорбе́й свободи и от наветов вражиих защити, да зовем Ти:

Радуйся, Пресвятая Владычице, милостивая пред Богом о нас Заступнице.

Икос 1

Архангелов и Ангелов чи́ни благоговейно Тебе служат и вся Небесныя Силы немо́лчными гла́сы Тя, Пресвятая Дево, воспевают, яко рождшую Царя Небеснаго. Мы же, предстоя́ пред чудотворным образом Твоим, со умилением поем Ти такова́я:

Радуйся, благодать у Бога обре́тшая.

Радуйся, па́че Ангел возвеличенная.

Радуйся, Архангельским благовестием обрадованная.

Радуйся, двери райския нам отверзшая.

Радуйся, смиренная Рабо Господня.

Радуйся, от всех родо́в ублажаемая.

Радуйся, Пресвятая Владычице, милостивая пред Богом о нас Заступнице.

Кондак 2

Ви́дящи Всенепорочная Мати с высоты Небесныя, иде́же Ты с Сыном Твоим во славе пребываеши, бе́ды и скорби людей Твоих, явила еси нам икону Твою, да утверждаеми зна́меньми Твоея́ благодати, верно вопием Богу: Аллилуиа.

Икос 2

Разум небесный открывающи, Богородице Дево, благоволила еси многими чудесы́ прославити икону Твою святую, да вси, ве́дущи таковое Твое о ней благоволение, пе́сненно зовут Ти такова́я:

Радуйся, сосудом Богоизбра́нным соделавшаяся.

Радуйся, Материею Божиею стати сподо́бившаяся.

Радуйся, Одевающагося светом яко ризою пеленами повившая.

Радуйся, Жизнодавца Иисуса млеко́м Твоим питавшая.

Радуйся, о Рождестве Твоем от волхвов поклонение прии́мшая.

Радуйся, Нося́щаго весь мир дла́нию на руку́ Твоею носившая.

Радуйся, Пресвятая Владычице, милостивая пред Богом о нас Заступнице.

Кондак 3

Сила благодатная осеняет всех, Царице Небесная, с верою к Тебе притекающих: единей бо то́чию Тебе даде́ся, да всякое прошение Твое исполнится. Тем у́бо всяк возраст верных славословит Тя и Сына Твоего, зовущ: Аллилуиа.

Икос 3

Иму́щи ма́тернюю любовь к людем, Всеблагая, всем в беда́х и напа́стех к Тебе прибегающим, руку помощи простираеши. Мы же, все упование о спасении своем возложивше на Тя, Пресвятая Дево, с надеждою взываем Ти:

Радуйся, Ангелами хвали́мая и Серафимами воспеваемая.

Радуйся, яко Тобою вся вселенная радости и веселия исполняется.

Радуйся, яко от всякия души́ христианския прошение милостиво прие́млеши.

Радуйся, яко покровом Твоим весь род человеческий покрываеши.

Радуйся, яко благодатную силу Твою иконам Твоим даровала еси.

Радуйся, яко чрез святыя иконы Твоя Сама невидимо посреде́ нас пребываеши.

Радуйся, Пресвятая Владычице, милостивая пред Богом о нас Заступнице.

Кондак 4

Бурею сомнений обдержим бе воин готфский Никита, егда́ у́зре в видении со́ннем Отрока прекраснаго, крест в руце́ Своей держашаго. Не могу́ще же ему разумом своим сего постигнути, дева некая Иулиания повеле́ ему взор свой на пе́рси своя направити, на ни́хже бе образ Твой святый, Пречистая Дево. Он же, дивя́ся сему, со умилением возопи́ Сыну Твоему: Аллилуиа.

Икос 4

Слышав воин Никита, яко чудес великое множество и благодеяния неисче́тная исходят от иконы Твоея, непрестанно благодари Тя, Мати и Дево, за милости Твоя роду христианскому; Тобою же вразумляемый, многия люди наста́ви на путь спасительный и похвальная Тебе зва́ти научи:

Радуйся, яко благодать Твою роду человеческому низпосылаеши.

Радуйся, яко верным вся благая в жизни сей милостиво подаеши.

Радуйся, благочестивых христиан Наставнице.

Радуйся, боголюбивых иноков Попечительнице.

Радуйся, веду́щих брань проти́ву мира, плоти и диавола добрая Споспешнице.

Радуйся, ревнующим о целомудрии и чистоте изрядная Пособнице.

Радуйся, Пресвятая Владычице, милостивая пред Богом о нас Заступнице.

Кондак 5

Боготе́чная звезда яви́ся икона Твоя Новоникитская, Владычице, сего ради притекающии к Тебе ну́жды своя и скорби пред нею приносят, многая же милости от Тебе прие́млюще, радостно вопию́т Подателю всех благ: Аллилуиа.

Икос 5

Ви́дяще христолюбивии людие Тобою подаваемое им от многообразных бед избавление, познаю́т величие Твое на Небеси и с любовию вопию́т Ти си́це:

Радуйся, Преблагословенная, покров Свой над нами простирающая.

Радуйся, иконою Твоею, яко стеною нерушимою, люди Твоя ограждающая.

Радуйся, сосуде благодати избра́нный, миро благовонное в сердца́ наша изливающий.

Радуйся, милосердия источниче, жаждущим утешение источающий.

Радуйся, в злых обстоя́ниих скорая Помощнице.

Радуйся, вечныя радости Ходатаице.

Радуйся, Пресвятая Владычице, милостивая пред Богом о нас Заступнице.

Кондак 6

Проповедует мир весь милости и чудеса, от иконы Твоея бываемая, Пресвятая Дево, Ты бо всякия болезни чрез сию исцеляеши и скорби утоляеши. Сего ради со благоговением почитаем многоцеле́бный образ Твой и, молящеся пред ним, вопие́м Богу: Аллилуиа.

Икос 6

Возсия́ яко пресветлая заря святая икона Твоя, Богомати Пречистая, е́юже исцеления и помощь верным обильно подаеши. Мы же, таково́му промышлению пред богом о нас дивя́ся, с любовию приносим Тебе пения сицевы́я:

Радуйся, ко Христу Богу всех нас приводящая.

Радуйся, безчисленныя щедроты всем подающая.

Радуйся, яко иконою Твоею вся люди возвеселяеши.

Радуйся, яко скорби наша в радость претворяеши.

Радуйся, Божественныя благодати неистощимая сокро́вищнице.

Радуйся, молитв наших пред Богом злата́я кадильнице.

Радуйся, Пресвятая Владычице, милостивая пред Богом о нас Заступнице.

Кондак 7

Хотя́ще от бед, зол и напа́стей избавитися, со слезами предстоим пред иконою Твоею честно́ю, о Богомати, моля́щи, да не пре́зриши прошений наших, но спасе́ши всех нас, присно зовущих Сыну Твоему: Аллилуиа.

Икос 7

Дивна и преславна дела Твоя, Владычице, всем бо с прилежною молитвою к цельбоно́сней иконе Твоей притекающим вся благая по коего́ждо потре́бе подае́ши. Темже и мы, благодарно прославляя милости Твоя, глаголем Ти:

Радуйся, во всякой ну́жде нам помогающая.

Радуйся, уповающих на Тя помощию Твоею не оставляющая.

Радуйся, Тобою бо низходит к нам Божие благоволение.

Радуйся, Тобою бо и́мамы к Богу вя́щее дерзновение.

Радуйся, звездо́, путь нам во тьме указу́ющая.

Радуйся, мысленная очеса́ наша к го́рним обителем направляющая.

Радуйся, Пресвятая Владычице, милостивая пред Богом о нас Заступнице.

Кондак 8

Странно и непости́жно есть неверным разуме́ти, ка́ко чрез изображение пречистаго лика Твоего чудеса являеши, Преблагословенная Дево. Мы же, слышаще и видяще, яко многообра́зна есть помощь Твоя, чрез иконы Твоя нам щедро подаваемая, в радости вопие́м Богу: Аллилуиа.

Икос 8

Весь мир христианский ублажает Тя гласы хвалебными, Пречистая Дево Богородице, всем бо верным утешительно есть взира́ти на всечестну́ю икону Твою. О Владычице, приими́ и наша умиле́нная благохвале́ния такова́я:

Радуйся, ле́ствице, в го́рния обители нас возводя́щая.

Радуйся, кни́го, тайны Царствия Божия верным открывающая.

Радуйся, лучеза́рный свете любве и всепрощения.

Радуйся, сосуде Божественный вечнаго блаженства.

Радуйся, усердная о нас пред Господем Молитвеннице.

Радуйся, несконча́емыя жизни Подательнице.

Радуйся, Пресвятая Владычице, милостивая пред Богом о нас Заступнице.

Кондак 9

Всякаго естества Ангельскаго превышшая явилася еси, Преблагая Мати, те́мже на Небеси прехвально имя Твое, и на земли́ блажа́т Тя вси роди. Мы же грешными устами дерзаем возвеличившему Тя Богу взывати о Тебе: Аллилуиа.

Икос 9

Вети́и многовеща́ннии не возмогут по достоянию восхвалити предивная чудеса, от святыя иконы Твоея́ Новоникитския являемая; сего ради, вся чудеса от нея́ быва́емая ви́дяще, при́сно ублажаем Тя похвалами си́ми:

Радуйся, за христианы Сыну Твоему усердно молящаяся.

Радуйся, граду Ни́кополю икону Твою, яко залог Твоего благоволения, дарова́вшая.

Радуйся, всем скорбящим и обремене́нным утешение и радость приносящая.

Радуйся, в час смертный единая наша надежда, отрада и утешение.

Радуйся, Ангельских сил непрестаю́щее ликование.

Радуйся, притекающих к Тебе непосты́дное упование.

Радуйся, Пресвятая Владычице, милостивая пред Богом о нас Заступнице.

Кондак 10

Спасти хотя́ всякаго человека, Сын Твой и Бог наш милостиво приемлет вся молитвы Твоя о нас; те́мже вси вернии в беда́х и ско́рбех прибегают к скорому заступлению Твоему, Преблагословенная Дево, и благодарственно вопию́т о Тебе: Аллилуиа.

Икос 10

Стена и ограждение бу́ди нам, Всемилостивая Владычице, изнемогающим от скорбей и болезней, покрый покровом Твоим святым с верою покланя́ющихся Тебе пред чудотворным Твоим образом и с любовию вопию́щих таковая:

Радуйся, ризою Твоею честно́ю нас защищающая.

Радуйся, от бури искушений и бед нас ограждающая.

Радуйся, верных от вечныя погибели спасающая.

Радуйся, помышления наша освящающая.

Радуйся, сердец наших очищение и обновление.

Радуйся, цвете веры неувядаемый.

Радуйся, Пресвятая Владычице, милостивая пред Богом о нас Заступнице.

Кондак 11

Пение хвалебное воспеваем Ти, Богородительнице, яко молитвами Твоими к Сыну Твоему и Богу нашему гра́ды и ве́си от злых обстоя́ний сохраняеши, мир и вся блага́я в жизни всем чту́щим Тя подае́ши, на путь спасения наставляеши и всех вразумляеши воспевати Милосердному Человеколюбцу Богу: Аллилуиа.

Икос 11

Светоза́рными лучами чудес икона Твоя, Владычице, немерца́емо сияет и страну нашу православную благодатно озаряет, прогоняя силою Божиею всякое де́йство вражие, и побуждая нас Тебе, Богоизбранная Отроковице, хвалебная пения возноси́ти:

Радуйся, во славе приседя́щая Престолу Божественнаго Сына Твоего и та́мо нас воспомина́ющая.

Радуйся, с Сыном Твоим и Богом нашим вечно царствующая и о нас пред Ним хода́тайствующая.

Радуйся, теплотою благодати Твоея́ хла́дныя сердца́ наша согревающая.

Радуйся, мы́сленная очеса́ наша к го́рним обителем направляющая.

Радуйся, уповающим на Тя жизни конец непосты́ден да́рующая.

Радуйся, безболезненную и мирную кончину верным устроя́ющая.

Радуйся, Пресвятая Владычице, милостивая пред Богом о нас Заступница.

Кондак 12

Благодать ве́лия дана Ти от Бога, Преблагословенная Мати Божия, убо́гия назира́ти, болящия исцеляти, бедствующим помогати, скорбящия утешати и всех заблуждающихся на путь спасения обращати; те́мже вси тружда́ющиися и обремене́ннии неизлаго́ланныя милости Твоя прие́мля, уми́льно вопию́т Богу: Аллилуиа.

Икос 12

Пою́ще чудеса Твоя, и́миже являеши нам любовь Твою и милосердие, восхваляем Тя, Владычице, и, предстоя́ще пречистому образу Твоему, молим Тя: утоли наша печали и избави нас от всякаго зла, да всегда в любви Твоей пребывающе, во умилении серде́чнем зовем Ти:

Радуйся, честнейшая Херувим.

Радуйся, сла́внейшая без сравнения Серафим.

Радуйся, Ангельских чинов преславная Царице.

Радуйся, Небесных и земных Владычице.

Радуйся, в час недоумений нас вразумляющая.

Радуйся, очи духовныя наша отверзающая.

Радуйся, Пресвятая Владычице, милостивая пред Богом о нас Заступнице.

Кондак 13

О Всепе́тая Мати, Царице Небесная, ро́ждшая Христа Бога нашего, приими́ сие от всего се́рдца нашего приносимое Тебе моление, и всесильным Твоим предстательством сохрани нас от всяких бед и напастей в жизни сей, и сподо́би в блаженстве вечном со всеми святыми хвалу Богу воспевати: Аллилуиа.

Этот конда́к читается трижды, затем и́кос 1-й и конда́к 1-й.

Молитва

К кому воззову, Владычице, к кому прибе́гну в печали моей? К кому принесу сле́зы и воздыхания моя, а́ще не к Тебе, Царице Небесе и земли́? Кто исто́ргнет мя от ти́ны грехов и беззаконий, а́ще не Ты, о Мати Живота, Заступнице и Прибежище рода человеческаго?

Услыши стена́ние мое, уте́ши мя и помилуй в го́рести моей, защити в беда́х и напа́стех, избави от озлоблений и скорбе́й, недугов и болезней и от враг видимых и невидимых; умири вражду стужа́ющих мне, да изба́влен буду от клеветы и зло́бы человеческия; та́кожде от своея́ ми пло́ти гну́сных обычаев свободи́ мя.

Укрый мя под се́нию милости Твоея́, да обря́щу покой и радость и от грехов очищение. Твоему ма́тернему заступлению себе вручаю: буди мне Мати и надежда, покров и помощь, радость и утешение и скорая во всем Помощница. О чудная Владычице!

Всяк, притека́яй к Тебе, без Твоея́ всесильныя помощи не отхо́дит. Сего ради и аз, недостойный, к Тебе прибегаю, да изба́влен буду от внезапныя и лютыя смерти, скре́жета зу́бнаго и вечнаго мучения, Небесное же Царствие получити сподо́блюся и Тебе во умилении се́рдца реку́:

Радуйся, Мати Божия, Предстательнице и Заступнице наша усердная, во веки веков. Аминь.