Акафист Пресвятой Богородице в честь иконы Ее Оковецкой Ржевской, именуемой Прозрение очес

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Взбранной Воеводе, небесе и земли Царице, милостивно икону Свою пречудную нам даровавшей благодарственное приносим пение. Ты же, Преблагословенная, Сына Твоего о нас умоли и от всяких бед избави, да со умилением поем Ти:

Радуйся, Владычице, душевныя и телесныя очи наша исцеляющая.

Икос 1

Архангел и Ангел множество Тя, честнейшую Херувим и славнейшую без сравнения Серафим, небесными гласы непрестанно величают. Мы же, ангельстей песни подражати дерзающе, умиляемся о Твоих благодеяниих, на нас бывших, и зовем Ти сице:

Радуйся, от Архангел и Ангел восхваляемая.

Радуйся, от всех Небесных Сил ублажаемая.

Радуйся, Богоизбранная Отроковице.

Радуйся, Троическаго Совета Таиннице.

Радуйся, крине благовонный девства и чистоты.

Радуйся, образе несказанный небесныя славы.

Радуйся, Владычице, душевныя и телесныя очи наша исцеляющая.

Кондак 2

Видящи икону Пресвятаго лика Твоего и Крест, иже на древесах обретени быша, людие зело удивишася: возсия бо свет неизреченный от святыни Твоея и мнози болящии исцелишася от недугов своих. Мы же, преклоняяся пред образом Твоим честным, во умилении сердечнем поем Богу: Аллилуиа.

Икос 2

Разум подаждь нам, Всесвятая Владычице, да к Тебе прибегаем в находящих на нас лютых скорбех, Ты бо крепость наша, и утверждение, и от врагов защищение, и, яко Благая, не остави нас во обстоянии сущих, но помози нам, взывающим сице:

Радуйся, обидимых Покровительнице.

Радуйся, изнемогающим скорая Помощнице.

Радуйся, бедствующих покрывающая.

Радуйся, страждущих утешающая.

Радуйся, обуреваемых тихое пристанище.

Радуйся, погибающих чудное спасение.

Радуйся, Владычице, душевныя и телесныя очи наша исцеляющая.

Кондак 3

Силою свыше укрепи нас, Пресвятая Дево Богородице, приклонися к мольбам нашим, избави нас от всех бед и скорбей, и видимыя и невидимыя враги отжени от нас, да спасаеми Тобою, Сыну Твоему и Богу вопием: Аллилуиа.

Икос 3

Имущи непостижимую любовь к роду человеческому, Богородительнице, призри на нас милостивным Твоим оком и печали наша на радость преложи: Ты бо еси всесильная христианом Помощница, просвещение и избавление, слава и похвала; сего ради поем Тебе таковая:

Радуйся, дивная о нас пред Богом Заступнице.

Радуйся, теплая о нас пред Ним Молитвеннице.

Радуйся, раю сладости небесныя.

Радуйся, вертограде Христов благоуханный.

Радуйся, милосердие нам являющая.

Радуйся, явлением честныя иконы Твоея тьму лютых обстояний от нас отгоняющая.

Радуйся, Владычице, душевныя и телесныя очи наша исцеляющая.

Кондак 4

Бурею страстей потопляемых спасаеши, Преблагословенная, и победу на враги видимыя и невидимыя даруеши с верою и любовию притекающим ко святей иконе Твоей, да уведят вси, яко Ты еси воистину Заступница рода христианскаго, и восхвалят матерния щедроты Твоя, воспевая Богу: Аллилуиа.

Икос 4

Слышаще о чудесех Твоих предивных, Пресвятая Дево, и сия воочию зряще, воздвигоша людие храмы Божия на месте явления Креста Господня и иконы Твоея чудныя, да вси приходящии на место сие, Тобою избранное, обрящут зде тихое пристанище и скорую помощь от Христа Спаса нашего Твоим ходатайством и заступленим. Сего ради зовем Ти сицевая:

Радуйся, звездо незаходимая.

Радуйся, свеще неугасимая.

Радуйся, иночествующих утешение и отрадо.

Радуйся, жен похвало и девствующих славо.

Радуйся, рая краснейшая.

Радуйся, утра светлейшая.

Радуйся, Владычице, душевныя и телесныя очи наша исцеляющая.

Кондак 5

Боготечней звезде подобна святая икона Твоя Оковецкая, благоволением Твоим, Владычице, христоименитым людем явленная; сего ради вси притекающии к Тебе со усердием моления о нуждах своих и скорбех пред нею приносят и, скорую помощь от Тебе приемлюще, с радостию велиею вопиют Сыну Твоему и Богу: Аллилуиа.

Икос 5

Видевше вернии людие, яко недалече от места явления чудотворнаго образа Твоего благоволила еси, Владычице, открыти благодатный источник воды целебныя, идеже дары милости Твоея неоскудно подаеши всем с верою приходящим, подвизая благодарственно пети Тебе сице:

Радуйся, икону Твою в помощь нам даровавшая.

Радуйся, знаменьми и чудесы сию прославившая.

Радуйся, живоносный источник явити благоволившая.

Радуйся, водою от него истекающею верных исцеляющая.

Радуйся, пред Господем и Сыном Твоим наша Молитвеннице.

Радуйся, всего рода человеческаго всемощная Заступнице.

Радуйся, Владычице, душевныя и телесныя очи наша исцеляющая.

Кондак 6

Проповедует Святая Церковь милости и чудеса Твоя, Богородительнице, от святыя иконы Твоея Оковецкия бываемая, на ней же зрим Тя, на руку Твоею держащую Богомладенца Христа, и святителя и чудотворца Николая, Тебе предстоящаго, егоже молитвами спасай нас от всяких бед и скорбей, вопиющих Сыну Твоему и Богу: Аллилуиа.

Икос 6

Возсия благодать неизреченная от цельбоноснаго образа Твоего, Пресвятая Дево, сердца наша радости и веселия исполняя. Сего ради, притекающе с верою к чудному образу Твоему, со упованием взываем Ти таковая:

Радуйся, яко скорбь нашу в радость претворяеши.

Радуйся, яко сладость неизреченную в души наша изливаеши.

Радуйся, мира душевнаго Подательнице.

Радуйся, в печалех сущих Утешительнице.

Радуйся, всех верных утверждение.

Радуйся, заблуждающихся доброе вразумление.

Радуйся, Владычице, душевныя и телесныя очи наша исцеляющая.

Кондак 7

Хотящи явити токи чудес от святыя иконы Твоея Оковецкия, повелела еси, Пречистая, в нуждах и в печали сущим молебная пения пред тою совершати, и получившим исцеление – проповедати милости и щедроты Твоя, ради тоя иконы явленныя, да благодарственно вопиют Богу: Аллилуиа.

Икос 7

Дивна и преславна дела Твоя, Богородице Дево: всем бо с прилежною молитвою пред цельбоносною иконою Твоею припадающим вся благая по коегождо потребе и в меру веры и любве подаеши. Сего ради, пред образом Твоим святым припадающе, со умилением поем Ти:

Радуйся, душ наших освящение.

Радуйся, ран душевных и телесных исцеление.

Радуйся, чаше, черплющая всему миру радость.

Радуйся, источниче, изливающий вечную сладость.

Радуйся, храмов наших первейшее украшение.

Радуйся, домов христианских благословение.

Радуйся, Владычице, душевныя и телесныя очи наша исцеляющая.

Кондак 8

Дивно икону Твою Оковецкую явила еси, Владычице, чрез сию людем немощным исцеления подавати благоволивши, обаче не токмо телесныя врачевания, но и скорбящим утешение, падающим востание, заблуждшим духовное прозрение и иныя тмочисленныя благодеяния милостивно подаеши всем с верою и упованием к Тебе притекающим и Сыну Твоему поющим: Аллилуиа.

Икос 8

Всеми вышними и нижними владычествуя Господь, Тебе, Матерь Свою, дарова нам во отраду и утешение, в защиту и укрепление и в вере утверждение, да под благим водительством Твоим непреткновенно житие сие земное прейдем и Царствия Небеснаго достигнем, поюще Ти таковая:

Радуйся, небесе и земли Царице.

Радуйся, мира горняго и дольняго Владычице.

Радуйся, православных верная Хранительнице.

Радуйся, душ святых мудрая Украсительнице.

Радуйся, в Горнее Царство благая Путеводительнице.

Радуйся, о спасении душ наших неустанная Попечительнице.

Радуйся, Владычице, душевныя и телесныя очи наша исцеляющая.

Кондак 9

Все естество Ангельское похвальная приносит Тебе, Пресвятая Дево, прославляя Твое милосердие ко грешному роду человеческому, егоже Ты Своим всемощным покровом осеняеши, от бед и искушений избавляеши, и молишися о всех верных, зовущих Сыну Твоему и Богу: Аллилуиа.

Икос 9

Ветия славы Твоея явишася Владычице, слепии и хромии, разслабленнии и немощнии исцеление от Твоея иконы приявшии. Сего ради, восхваляя вся милости Твоя, роду человеческому Тобою присно изливаемыя, со умилением воспеваем Тебе сице:

Радуйся, телес наших безмездное врачевание.

Радуйся, душ наших спасение.

Радуйся, сосуде благоуханный Духа Святаго.

Радуйся, доброплодная ветве вертограда Христова.

Радуйся, Ангелов всехвальная Царице.

Радуйся, земнородных милостивая Покровительнице.

Радуйся, Владычице, душевныя и телесныя очи наша исцеляющая.

Кондак 10

Спасти хотящи многия недужныя, чудную икону Твою, Владычице, явила еси в пределех Оковецких, и чрез сию множество исцелений даровала еси, наипаче же страждущим слепотою душевною и телесною. Сего ради «Прозрение очес» сия чудотворная икона Твоя наименовася, да вси притекающии к ней и помощи у Тебе просящии памятуют выну о Твоих неисчетных благодеяниих, и Подателю всех благ Богу да вопиют: Аллилуиа.

Икос 10

Стена еси похваляющим чудеса Твоя, Пресвятая Дево, всем к помощи Твоей прибегающим. Сего ради во всех тяжких обстояниих и во всякое время жития нашего помощь Твою и заступление обретающе, со благодарением зовем Ти сицевая:

Радуйся, суетную мудрость века сего посрамляющая.

Радуйся, ослепленных ею на путь правый наставляющая.

Радуйся, греховныя помыслы отгоняющая.

Радуйся, сердца ожесточенная умягчающая.

Радуйся, обуреваемых страстьми тихое пристанище.

Радуйся, смущаемых искушениями надежное прибежище.

Радуйся, Владычице, душевныя и телесныя очи наша исцеляющая.

Кондак 11

Пение всеумиленное приносим Ти, Всеблагая Владычице, пред пречистым Твоим образом; Ты же милостивно услыши ны, и помози нам покаянием очиститися от скверны греховныя и преуспети в богоугоднем житии, да поем о Тебе Создателю нашему: Аллилуиа.

Икос 11

Светозарную икону Твою, Богородительнице, со благоговением зрим и, лобызая ю, радуемся, имуще таковый залог Твоего к нам благоволения, вопиюще Ти хвалебныя песни таковыя:

Радуйся, Богом возлюбленная Царице.

Радуйся, Бога возлюбившая Владычице.

Радуйся, иноков Покровительнице.

Радуйся, инокинь Наставнице.

Радуйся, страны нашея православныя Защитнице.

Радуйся, всех христиан Благая Заступнице.

Радуйся, Владычице, душевныя и телесныя очи наша исцеляющая.

Кондак 12

Благодать Божественную испроси нам у Сына Твоего и Бога, о Всеблагая, подай нам руку помощи, да не погибнем люте без покаяния, просвети сердечныя очи наша к зрению спасения и сподоби нас в жизни сей и в Царствии Небеснем воспевати Творцу и Создателю нашему: Аллилуиа.

Икос 12

Поюще неисчетная Твоя чудеса, являемая нам от святыя иконы Твоея Оковецкия, Пресвятая Владычице, и припадающе к ней, молим Тя: защити нас в жизни сей и в день кончины нашея, егда имамы предстати на суд пред Престолом Сына Твоего и Бога нашего, да благодарно вопием Ти:

Радуйся, Царя Небеснаго умоление.

Радуйся, многих согрешений прощение.

Радуйся, болящих исцеление.

Радуйся, унывающих ободрение.

Радуйся, сердца нашего умиление.

Радуйся, ума нашего просвещение.

Радуйся, Владычице, душевныя и телесныя очи наша исцеляющая.

Кондак 13

О Всепетая Мати Христа Бога нашего, Благая Одигитрие! Приими милостивно сие моление наше, пред чудотворною иконою Твоею приносимое, буди нам в мире сем от враг видимых и невидимых покров и защищение, и в час смертный явися нам Сама, простирая руку помощи, и на Страшнем Суде Сына Твоего о нас умоли, да, спасаеми Тобою, с Небесными Силами и всеми святыми в радости неизреченней вопием Богу: Аллилуиа.

Этот конда́к читается трижды, затем и́кос 1-й и конда́к 1-й.

Молитва

О Пречудная и Превышшая всех тварей Царице Богородице, Небеснаго Царя Христа Бога нашего Мати, Пресвятая Одигитрие Марие! Услыши ны, грешныя и недостойныя, в час сей молящихся и к Тебе со воздыханием и слезами пред пречистым Твоим образом припадающия, и сице умильно глаголющия: изведи нас от рова страстей, Одигитрие Благая, избави нас от всякия скорби и печали, огради от всякия напасти, и злых клевет, и от неправеднаго навета вражия. Можеши бо, о Благодатная Мати наша, не точию от всякаго зла сохранити люди Твоя, но и всяким благодеянием снабдити и спасти: разве бо Тебе иныя Предстательницы в бедах и обстояниях и теплыя Ходатаицы о нас, грешных, к Сыну Твоему не имамы, Егоже умоли, Владычице, спасти нас и Царствия Небеснаго сподобити, да, спасеннии Тобою, славим Тя и в будущем веце, якоже спасения нашего Виновницу, и превозносим святое и великолепое имя Отца и Сына и Святаго Духа, в Троице славимаго и покланяемаго Бога, во веки веков. Аминь.