Акафист Пресвятой Богородице пред иконой Влахернской

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранной от всех родов Богородице Деве всеми Небесными силами и всеми святыми прославляемой непрестанно в Горнем Царствии Небесном, ведущей вся тайны сокровенные души нашей и покрывающей немощи наша милосердием Сына Своего и Бога нашего, благодарственное приносим пение Тебе, Богородице. Ты же, яко имущая милосердие неизреченное, от всяких нас бед и грехов свободи, да зовем Ти: Радуйся, Слава Церкви небесной и земной, Богомати Благословенная Влахернская!

Икос 1

Архангел Гавриил благовествовав радость велию к Тебе: «Радуйся Богоневесто, Господь с Тобою; благословенна Ты между женами и рождаемое наречется Сыном Божьим». Ты же смиренне рекла еси: «Се раба Господня, буди Мне по глаголу твоему». Сие убо воспоминающе, молим Тя: испроси у Бога нам всем стяжати добродетели богоугодныя, дабы има прославлено бе имя Отца Небеснаго выну. Сего ради с упованием взываем Ти:

Радуйся, Царице, ризами златыми одеянная;

Радуйся, родителей праведных и святых дщи благословенная;

Радуйся, от царскаго корене Иоакимом произращенная;

Радуйся, от архиерейскаго рода Анною рожденная;

Радуйся, Царя царствующих преблагословенный престоле;

Радуйся, пречудно к небесному Свету Христову нас приводящая;

Радуйся, Стамно, Небесную Манну вместившая;

Радуйся, Владычице ангелов, в горнем Иерусалиме торжествующая;

Радуйся, Слава Церкви небесной и земной, Богомати Благословенная Влахернская!

Кондак 2

Видяще святая Елизавета Всепреблагословенную Деву Марию к ней грядущую с радостию рече: «И откуда мне сие, да прииде Мати Господа моего ко мне?»; исполнилась Духа Святаго сродница твоя и прослави Тя, глаголюще: «благословенна Ты между женами, и благословен плод чрева Твоего!» Ты же, Мати Всемогущего Бога, предрекала еси, яко возвеличат Тя роды вси. От ныне и до века исполнение слов Твоих ныне зряще, просим Тя: настави ны за вся Бога благодарити и в радостях и скорбях ниспошли нам веру в Божий промысел благой и всесовершенный, да с Тобою воспоим в вечности небесней Богу нашему: Аллилуйя!

Икос 2

Разумети великую тайну Боговоплощения мы, земнородные, не возможем, како бо убогими словесы нашими прославим Божие к нам милосердие, како Тя, Деву и Матерь, сему послужившую воспети сможем достойно. Сице молим Тя, Всенепорочная Царице Неба и земли, буди к нам милостива и прими величания сия:

Радуйся, благодарения наши с любовию приемлющая;

Радуйся, Сына Твоего и Бога чтити нас вдохновляющая;

Радуйся, о Христе радостию неземной сердца наша наполняющая:

Радуйся, благодатию Божией души наша выну обновляющая;

Радуйся, отроков и юношей мудрая путеводительнице;

Радуйся, всем унывающим велие утешение ниспосылающая;

Радуйся, немощных и слабых всесильная укрепительнице;

Радуйся, в старости надежная опоро и покрове;

Радуйся, Слава Церкви небесной и земной, Богомати Благословенная Влахернская!

Кондак 3

Сила Вышняго от Духа Свята осени Тя, Пречистая, соделавши Тя Матерью Господа и Спасителя Нашего, и укрепи Тя на многоскорбнем пути земнаго жития твоего, претерпела бо скорбь велию, егда Ты услышала еси от старца Симеона о немилостивном убиении Сына Твоего, обаче верою превознемогла еси муку сердечную. Сице молим Тя: укрепи нас всех в тяготех земнаго бытия и даруй нам сокрушение о гресех, преобрази и обнови души наша, да с Тобой купно во веки воспевать сподобимся Христу: Аллилуйя!

Икос 3

Имущи попечение милостивое о людех, по прошению Твоему, о Богомати, первое чудо сотвори Спаситель в Кане Галилейстей, егда умножи вино на пиру брачнем. Сие же убо воспоминающе, просим тя: даруй нам быти выну верныма чадами Божиими и заповеди Его соблюдать усердне, воспевая, твое великое милосердие к нам грешным глаголем Ти сице:

Радуйся, Трапезо святая, Хлеб жизни нам даровавшая;

Радуйся, нам недостойным образ благочестия выну являющая;

Радуйся, всех ревнующих о чистоте духовней благодатно укрепляющая;

Радуйся, от греховных язв и страстей нас всех исцеляющая;

Радуйся, козни бесовстии разрушающая и хитрости их посрамляющая; Радуйся, благодатными лучами надежды нас незримо осеняющая;

Радуйся, в вере и любве нас пречудно утвердждающая;

Радуйся, на труды дневные нас благословляющая;

Радуйся, благодарения Богу приносити нас научающая;

Радуйся, Слава Церкви небесной и земной, Богомати Благословенная Влахернская!

Кондак 4

Бурю различных скорбей и страданий утоляти хотяще, прибегаем к Тебе, Всеблагомощная Владычице, ведуще, яко моления твои врачуют души наши от маловерия и теплохладия, ибо и в земном житии зрела еси зовущих Ему: «Осанна!», после же возопивших: «Да пропят будет!» Так, суетен всяк человек. Обаче, ведуще Силу и Премудрость Иже от Тебя Рожденного и Твое всемилостивое перед Сыном Твоим заступление, просим Тя: упованием непроложным сердца наши исполни, да зовем Христу: Аллилуйя!

Икос 4

Слышавше и видевшее искупительныя страдания Христовы, объята бе, Всенепорочная Богомати, скорбью и утратой велию, егда Божественный Страдалец ради всех нас грешных крестную смерть претерпел. Сын бо Твой Своя Божественныя длани на Кресте распростер, мукою своею весь мир от мрака смертнаго свобождая. Твоея матерния печали при Кресте Сына Твоего бывшей, егда видела еси Его страждуща за вся человеки мукою неизглаголанною. Сие же воспоминающе молим Тя, Мати Жития Вечнаго, даруй ны любити всегда Господа всею душею, всем сердцем и всем помышлением нашим, да умиленно зовем Ти:

Радуйся, Мати Христова, на Голгофу за Сыном Твоим последовавшая;

Радуйся, паче иных Господу сострадавшая;

Радуйся, от небожителей и земнородных во вся веки славимая;

Радуйся, исцеляющее Милосердие Христово нам являющая изобильно;

Радуйся, миловати и прощати обидящая ны побуждающая;

Радуйся, к исправлению жития ны присно сподвигающая;

Радуйся, Тя славящих не когда не оставляющая и не посрамляющая;

Радуйся, в несении креста земнаго нас укрепляющая;

Радуйся, Слава Церкви небесной и земной, Богомати Благословенная Влахернская!

Кондак 5

Боготечную звезду наставляющую верных шествовати по пути Божию, зрим святую икону Твою, Богомати: к ней же припадающии людие приемлют здравие тела, очес прозрение, разслаблении укрепление и вси благодарно поют Господеви: Аллилуйя!

Икос 5

Видевше Сына Твоего Воскресшего, апостолы и жены-мироносицы возрадовахуся зело радостию неизреченною и ликованием духовным о Едином Победители смерти и ада. Ты, о Всесвятая Богомати, паче всех иных торжествовала победу Иисусову над силами смерти, сердце бо Твое материнское пело и ликовало непрестанно, яко Сын Твой воскресе. Сице просим Тя, Мати благодати Божией: умоли Спасителя, да сподобит Он нас всех вечно праздновати непрестанно и нескончаемую Пасху Господню в Царствии небеснем, да зовем ти:

Радуйся, прежде всех явлением Воскресшаго Господа обрадованная;

Радуйся, Воскресение Христово купно со апостолами торжестовавшая;

Радуйся, Живого и Бессмертного Воскресшего Христа Мати;

Радуйся, за скорби временныя в палатах вечных ликующая;

Радуйся, любящих Сына Твоего чадами Своими именующая;

Радуйся, в истинной вере нас сохраняющая и в благочестии утверждающая;

Радуйся, от рождества до разлучения души от тела нашего нас не оставляющая;

Радуйся, к доброму ответу за жизнь нашу на Страшнем Суде нас приуготовляющая;

Радуйся, Слава Церкви небесной и земной, Богомати Благословенная Влахернская!

Кондак 6

Проповедал архангел Гавриил весть Тебе, Пренепорочная Богородице, яко скоро завершится земное житие Твое, да славу невыразимую Сына Твоего во Царствии Его выну зрети будеши. Ты же рела еси христианом, яко до скончания века не оставиши нас без матернего твоего покрова; Ты бо еси наша Единственная Молитвенница, Надежда, Утешение по Бозе наше, твоего бо ходатайства Спаситель подаст согрешений оставление нам всем, воспевающим ныне славу Твою и Богу вопиющим: Аллилуйя!

Икос 6

Возсияла слава Твоя, Всехвальная Богородице, ангелами и людьми превозносимая, на небесех, егда приня Господь твою душу в Руце Свои. Апостолы и все христиане в радости возопиша: «Пресвятая Богородица помогай нам!», и мы вместе с ними вопием:

Радуйся, по успении Твоем нас всех не оставляющая и утешающая;

Радуйся, Целительнице душ и телес наших быстрая и безвозмездная;

Радуйся, Молитвеннице неустанная, Сына Своего о нас всех грешных умоляющая;

Радуйся, Ходатаице Благая, пред Богом прошения наша скоро возвещающая;

Радуйся, Звездо утренняя и вечная, во тьме греховней сияющая;

Радуйся, Луно пресветлая, Солнцу правды предшествующая;

Радуйся, святой своею жизнью ангелов и всех святых превзошедшая;

Радуйся, наша сердца от гнева и ярости присно сохраняющая;

Радуйся, Слава Церкви небесной и земной, Богомати Благословенная Влахернская!

Кондак 7

Хотящи явити велию любовь Свою к людям, благословила еси, Пречистая Богомати, апостола и евангелиста Луку написати образ Твой святый через него же все христиане Иерусалимские помощь обретаху. После благочестивая царица Евдоксия перенесе многоцелебный образ Твой в царствующий град Константинополь, и помести во храме Влахернском, дабы благодатная и помощь и сила всем верным людям подавалась неоскудно и вси христиане всегда воспевали Сыну Твоему: Аллилуйя!

Икос 7

Новое, великое чудо сотворила еси во Влахернском храме, Предивная Царица Небесная, егда явлением Покрова Твоего осенила еси страждущий народ византийский. Сие же воспоминающе, молям Тя: неотступно пребуди с нами и защити ны от враг видимых и не видимых, яко Ты еси нам первая Помощница, яко твоим ходатайством милости зде получаем; в день же судный чаем помилование улучити у Сына Твоего. Тебе, яко Всемилосердней Богородице, благодарственное пение восписуем сице:

Радуйся, покрывающая нас всех своим безграничным милосердием;

Радуйся, чадолюбивая и заботливая Мати всех заблудших грешников;

Радуйся, от ереси и расколов нас защищающая;

Радуйся, милосердия Божия нам Ходатаице;

Радуйся, о продлении жизни на земле Сына Своего умоляющая;

Радуйся, неверных и заблудших ко Христу приводящая;

Радуйся, в посте и молитве прибывающим присно с ними сопребывающая;

Радуйся, во дни брани земной и духовной нас ограждающая;

Радуйся, Слава Церкви небесной и земной, Богомати Благословенная Влахернская!

Кондак 8

Страшное гонение возвиже враг рода человеческого на иконы святыя, тогда убо образ Твой Влахернский, о Всенепрочная Дево, христиане благочестивые до времени в стене сокрыша, и лампаду затеплиша, дабы не оскудела милость Твоя, Царице ангелов, к грешным чадам Твоим, многие убо чудеса сотворила еси Ты через образ святый Свой всепобеждающей любовию Твоею. И ныне просим Тя: веру слабую нашу преобрази, надежду укрепи, любы воскреси в сердцах наших, да воспоем Христу Спасу: Аллилуйя!

Икос 8

Всем сердцем обрадовались людие правоверные: священницы и монаси, иерархи и миряне, егда весть о благодатней Твоей Влахернской иконе распространилась от пределов эллинских о по всему миру. Святая гора Афон, земля Египетская и Царьград, страны полнощныя и полуденныя, Восток и Запад мира христианскаго воздает честь и поклонение много чудотворному образу Твоему. Сего ради и мы с упованием на великия и неизреченныя милости Твоя с надеждою вопием Ти сице:

Радуйся, всех стремящих к духовному ангельскому житию помогающая, подбодряющая и вдохновляющая;

Радуйся, Врачебнице наша Всемилосердная, недуги наша туне исцеляющая;

Радуйся, нас ради Небо оставляющая и в скорби сущим на земли помогающая;

Радуйся, и в самый час кончины страдания наша утоляющая;

Радуйся, добрые намерения благословляющая;

Радуйся, на путь к Царствию Небесному нас наставляющая;

Радуйся, неусыпная наставнице всех заблудших и ослепленных;

Радуйся, славою чудес Твоих верных разум озаряющая;

Радуйся, Слава Церкви небесной и земной, Богомати Благословенная Влахернская!

Кондак 9

Все естество ангельское дивится Твоему неизреченному милосердию, Всемилостивая Владычице, зане теплым Твоим предстательством пред Сыном Твоим род человеческий заступаеши, яко всяк чин возраст обретают во вся века и времена помощь неоскудную во всех нуждах духовных и телесных и житейских мы же возносимо Тебе, Всеблагословенная Владычице, Господеви благодарственное пение: Аллилуйя!

Икос 9

Ветия многовещанныя и риторы доброгласныя, в искусстве своем преизощренныя николиже возмогут справедливо и достойно воспети Тя, Милосердная Мати Искупителя нашего, ибо кто в силех есть воспети вся добродетели Твои, Всенепорочная Дево, кто вознесет хвалу достодолжную небесныя славы Твоея ради, кто величие чудес и глубину человеколюбия Твоего превознесет праведнее? Ибо Тобою славится на земли и в человецех Троица Всесвятая; мы же с надеждею и смирением пред образом Твоим Влахернским припадая, паки приносим Ти похвалы, вопиюще сице:

Радуйся, от ропота и заблуждений духовных всех нас исцеляющая;

Радуйся, возрастати присно во Истине Христовой сподобляющая;

Радуйся, быти выну добрыми учениками и последователями Сына Твоего научающая;

Радуйся, распознавати и исполняти волю Божию вразумляющая;

Радуйся, грешников ко исправлению и покаянию сподвигающая;

Радуйся, заблуждших от пути истины к покаянию призывающая;

Радуйся, земли Российския Заступнице, вразумляющая нас и на путь спасения наставляющая;

Радуйся, благочестивых от соблазнов и прельщений преславно оберегающая;

Радуйся, молебнице теплая, Судию всех умилостивляющая;

Радуйся, Слава Церкви небесной и земной, Богомати Благословенная Влахернская!

Кондак 10

Спасти хотящи всякую душу от погибели вечней, Всесвятая Богородице, всех нас к Сыну твоему приводиши, яко воистину Он есть путь истина и живот. Усердными же молитвами твоими и нас, прдстоящих пред образом Влахернским укрепляеши, Ты бо всякое воздыхание со слезами приемлеши и слышиши зов наш, и исцеления духовные и телесные нам ниспосылаеши, пробуждая нас с благодарением Богу воспевати: Аллилуйя!

Икос 10

Стене нерушимей и адаманту крепчайшему подобны молитвы Твоя, Пречистая Мати и Госпоже наша, яко Тобою мы выну оберегаемы есмы от всяких бед и скорбей, зол и болезней, яко Тобою во обстояниех скорбных и тягостных отраду и утешение обретаем, поелику на Небесех непрестанно ходатуйствуеши за ны пред Триипостасным Господем нашем и приклоняеши Его Животворящее милосердие ко всем, взывающим Ти сице:

Радуйся, недугов неисцельных пречудное врачевание;

Радуйся, душ и сердец каменных преславное преображение;

Радуйся, упований наших непреложное основание;

Радуйся, в испытаниях и тяготах дарующая укрепление;

Радуйся, труд земледельцев с Небес благословляющая;

Радуйся, плоды земных трудов разделяти со обездоленными поучающая;

Радуйся, мглу бесовскую посещением Своим разгоняющая;

Радуйся, в явлениих Своих в правой вере людей утверждающая;

Радуйся, дубраво, осеняющая нас от зноя страстей и прохладою благости покрывающая;

Радуйся, Слава Церкви небесной и земной, Богомати Благословенная Влахернская!

Кондак 11

Пение прими от нас, чтущих святый твой образ Влахернский, его же благоволила еси явити в стране Российстей, яко царие и бояре русские, любовию велиею к Тебе озаренные и движимые, пренесоша его в пределы Московстии, дабы соотечественники наши прославиша велие милости твоя от Тебя, Мати Света, явленные, и восхвали бы во веки всех благ Подателя Христа Бога нашего песнию: Аллилуйя!

Икос 11

Свет Твой не земной божественный вечный исходит от Тебя, Дево Богородице, неудобозримая глубина для ангелов и для людей тайна Ты еси великая. Прославляем Тя, Матерь великого Бога, пением сим акафистным и просим: озари, исцели и просвети своею благодатью наши души и телеса, да не погибнем мы, а всегда восхвалим, благословим и поклоняемся Богу и Тебе:

Радуйся, ангельское житие являющая;

Радуйся, древо светлоплодовитое, от негоже питаются вернии;

Радуйся, древо благосеннолиственное, имже покрываются мнози;

Радуйся, чудеса великия по милости Твоей присно источающая;

Радуйся, хранительнице наша от внезапной смерти;

Радуйся, веру колеблемую и надежду угасающую выну обновляющая;

Радуйся, храмов и монастырей Благодатное бесценное сокровище;

Радуйся, сладость ангелом скорбящим радости и грешных Заступнице;

Радуйся, Слава Церкви небесной и земной, Богомати Благословенная Влахернская!

Кондак 12

Благодать, отраду и утешение всем молящимся пред многочудесным образом Твоим даруеши, яко от многих веков приходят к нему в обитель преславную Спасо-Влахернскую, идеже моления теплыя пред ним возносятся, людие православныя со своими болями и заботами и отходят утешенныя, Ты бо, Мати Ипостаснаго Слова, присно предстательствуеши о всех, вопиющих о Тебе Богу: Аллилуйя!

Икос 12

Поюще и моляще непрестранно в честь и хвалу Богу и Твою, Госпожа Владычица, священнический чин, монахи и миряне просят Тя: спаси всех христиан от погибели вечныя и церковь Божию от врагов видимых и невидимых до скончания века сохрани. Мы бо взирая на светолепный Лик твой, Царице ангелов, разумеем духовно, яко се Пречистая грядет к нам, Мати великого Бога и сего ради с упованием и любовию мы поим:

Радуйся, честными иконами Твоими мысленный взор наш к Тебе Самей возводящая;

Радуйся, чрез них подающая освящение всему миру христианскому.

Радуйся, яко в иконах Твоих сила и благодать Твоя открываются;

Радуйся, всех Своим белоснежным омофором покрывающая;

Радуйся, на покаяния и сокрушения своих грехов Вразумительнице;

Радуйся, Верная к Горним обителям путеводительнице;

радуйся, честная похвало иереев благоговейных;

Радуйся, иноков в подвигах молитвеннных утверждение;

Радуйся, яко своим присутствием выну нас утешаеши и радуеши;

Радуйся, Слава Церкви небесной и земной, Богомати Благословенная Влахернская!

Кондак 13

О Богоматерь Влахернская многочудесная, возвесели наша сердца радостию благою, яже о Христе Иисусе. В скорбех подаждь утешение, мир и тишину даруй всей нашей стране. Умоли Сына Твоего простити нам прегрешения наша и ввести ны в Царство свое, да вси вопием зде, на земли, и в Вышнем Иерусалиме Триединому Богу: Аллилуйя!

Этот конда́к читается трижды, затем и́кос 1-й и конда́к 1-й.

Молитва ко Пресвятей Богородице пред иконою Ея Влахернской

О Пречистая наша Всеблагословенная и Всемощная Госпоже Владычице Влахернская и всего мира христианского похвало и утверждение, благодарим Тя, яко сподобила еси нас великой Своей милости, творити пресветлое торжество Честнаго Твоего многоцелебного Образа, явленнаго благоволением Твоим во граде Константинополе, послеже во многих градах и весех чудесы просиявшего.

Взирая на твой светозарный благодатный лик, Пречистая, со трепетом радости и благоговения и зрим очи Твои голубые, голубиные, небесные, исполненные любовью великою, добротою богатою и смирением совершённым. Твои уста подобно цвету розы, исполненны сладких речей. Руки твои распростертые к нам, исполнены добрых дел. Дивную красоту твою неземную во всем не доступно нам описати, токмо бо в молчании и трепете взываем душею умиленной, сокрушенной в смирении пред всесовершенной святостью твоею.

Сице и днесь с трепетом, пред Святою иконою Твоею припадая, умоляя наполнити наше немощное человеческое естество живительными и цельбоносными струями непрестанных молитв Твоих и очиститися от всякой скверны плоти и духа, совершая святыню в страсе Божиим, ибо вемы, яко много может молитва Твоя пред Престолом Триединаго Бога. Се мы, смиренныя и грешныя, обремененнии игом тяжких многих беззаконий наших, во умилении глубоцем просим подать исцеление слепым, хромым, глухим и другим страждущим, одержимыми многими и различными скорбями и недугами, ибо мы вемы, яко ничтоже возможно ходатайству Твоему, аще токмо восхощеши.

Темже просим утвердити нашу веру праву, Церкве Русстей мир, тишину и благостроение, укрепить православныя люди в настоящую годину испытания и избавить от душепагубных ересей, расколов и разделений, сподобить соблюсти всех в единомыслии и да познают не верующии и не покланяющиися Честному Образу Твоему, яко Ты еси несравненное наше Украшение, Слава, Небесный и Державный Покров, скорая Помощница, непостыдная Заступница и постоянная Ходатаица у Единого Ходатая Бога и человеков Иисуса Христа. Яко Тя ради подобает всякое благодарение Всесильному и Всеблагому Содетелю, Господу нашему Иисусу Христу купно со Безначальным Его Отцем и с Пресвятым и Благим и Животворящим Его Духом, ныне и присно и во веки веков. Аминь.