Акафист Пресвятой Богородице перед иконой Её «Шестоковская»

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Взбранной Воеводе Владычице нашей Богородице, явлением чудотворнаго образа Своего прославльшей обитель Шестоковскую, со благодарением, яко избавляеми от бед и скорбей, вопием радостно: Богородице, Ты еси утешение наше.

Радуйся, Мати милосердия, платом, иже в руце Твоей, слезы верных отирающая.

Икос 1

Архангелов и Ангелов Царице, предвозвестила еси нищей и немудрой мира сего, но обильной верою деве в пещнем огни и дыме смиренное пребывание чудотворнаго образа Твоего. Сего ради людие, обретши в пещнем шестке дивное изображение Пречистаго лика Твоего и исполнение пророчества зряще, со умилением взываху:

Радуйся, во огне и дыме чудно икону Твою сохраньшая.

Радуйся, пеще, в ней же вся скорби наша пожигаются.

Радуйся, Богоприимная Свеще, тьму душ наших озаряющая.

Радуйся, Божественный Огню, любовию к Богу и ближним нас воспламеняющий.

Радуйся, Мати милосердия, платом, иже в руце Твоей, слезы верных отирающая.

Кондак 2

Видевше людие града Москвы, идеже чудотворная икона Шестоковская обретеся, милосердие Божия Матери к человеком и многая чудеса от Ея иконы явленныя, пред тою благоговейно поклоняхуся, Богу воспевающе: Аллилуиа.

Икос 2

Разум Божественный имущи, провидя грядущая, яко настоящая, Преблагословенная Владычице, благоволила еси иконе Твоей — на ней же изобразися несказанное сострадание Твое к людем — обитати в храме Шелдомежском, близ места превелией скорби земли Русския, идеже некогда сила ея попрася, воинство Христолюбивое всесовершенно истребися, святый князь Георгий душу свою за други положи, а отцы наша на многая лета рабству неверных предани быша. Но благодарно воспевающе, поминая, яко и от толикия беды возставила еси, аки бы из мертвых воскресила еси и возвеличила еси страну нашу Российскую, вопием Ти:

Радуйся, избавление наше в день и час лютый.

Радуйся, Надеждо наша в страшный час исхода из сего временнаго жития.

Радуйся, любящим Тя христианскую, святых Тайн причастну кончину подающая.

Радуйся, чад Твоих от лютых мытарств демонских по смерти охраняющая.

Радуйся, из самых адских мук души верных похищающая.

Радуйся, до Страшнаго суда и даже на Страшнем суде неустанная и всесильная за род человеческий Предстательнице.

Радуйся, Мати милосердия, платом иже в руце Твоей, слезы верных отирающая.

Кондак 3

С илу благодатных исцелений иконе Твоей, о Богомати, изобильно даровала еси: слепии прозреваху, расслабленнии укрепляхуся и от одра восставаху, хромии правохождаху, обуявшии и безумнии в здравый ум возвращахуся. Вси с верою притекающие к Тебе полезная душам и телесем приимаху, беси со трепетом из мучимых ими исхождаху. Сего ради о иконе Твоей Ангельский собор и человеческий род согласно поют Богу: Аллилуиа.

Икос 3

Имущи Матернее попечение о спасении человеков, благоволила еси собрати, Пренепорочная, окрест чудотворныя иконы Твоея дев и вдовиц, подвизающихся богоугодно, внушила бо рабу Твоему, благоговейному иерею Евфимию потрудитися в устроении обители иноческия, юже той помощию Твоею содея паче всякия человеческия надежды. Мы же о Тебе, чающей спасения нашего, умильно глаголем:

Радуйся, по Бозе Спасителе, Спасительнице наша всемощная.

Радуйся, двери покаяния грешным отверзающая.

Радуйся, столп утверждения ходящим в законе Господни.

Радуйся, Споручнице грешников.

Радуйся, молитвами Твоими достойным осуждения Божия время на покаяние у Бога испрошающая.

Радуйся, нечаянныя радости и ныне, и в будущем веце Подательнице.

Радуйся, Мати милосердия, платом, иже в руце Твоей, слезы верных отирающая.

Кондак 4

Бурею непостоянною носимии, влекоми в пучину лютаго отчаяния, притекают в бедах и скорбех раби Твои, Богородице, к Тебе, яко единему упованию, но Ты, ненадежным надеяние и изнемогающим пристанище, взираеши нань с неизреченным сострастием, и, руце помощи подавши и радости исполнивши я, слышиши от всех: Аллилуиа.

Икос 4

Слышахом о дивных чудесех, от иконы Твоея явленных, Богомати Пречистая, радуемся и благодарим Тя, изряднее за чудо велие, яко в пещней трубе от огненнаго запаления образ Твой сохранила еси. Вся возможна Тебе, Божественная сила дана Ти, темже со страхом поем Тя:

Радуйся, Небесного Царя Дщи, Сына Божия Мати, Духа Святаго красная палато.

Радуйся, Троице Пресвятей из всех тварей ближайшая.

Радуйся, преукрашенная Божественною славою.

Радуйся, по Царе Господе — Царице всех, по Владыце всех — мира Владычице.

Радуйся, похвало человеческаго рода 8 9 и непрестанное пение Ангелов.

Радуйся, яко Тя блажат вси роди.

Радуйся, Мати милосердия, платом, иже в руце Твоей, слезы верных отирающая.

Кондак 5

Боготечное светило явила еси земли нашей — Шестоковскую Твою икону, Владычице, милости Твоя и благословение Божие на верныя люди низводящую и научающую всех пети Богу: Аллилуиа.

Икос 5

Видена быша шествия Твоя, о Богомати, во иконе Твоей Шестоковстей, сия бо во дни наша не точию не отъята от нас и от среды нашей не сокрыся под спудом, но яко на свешник поставленная во храме Шелдомежском, преславно сияет и всех научает пети Ти:

Радуйся, тайне Боговоплощения послужившая.

Радуйся, возлюбленная Мати сладчайшаго Иисуса.

Радуйся, от Того дерзновение молитися за весь мир приявшая.

Радуйся, предстоящая одесную Его, во славе неизреченней.

Радуйся, Всемощная, яко недвижимаго Бога молитвами Твоими подвизающая на милость к тяжким грешникам.

Радуйся, зане ни во едином прошении Твоем Господь, яко любящий Сын, отказати Ти не может.

Радуйся, Мати милосердия, платом, иже в руце Твоей, слезы верных отирающая.

Кондак 6

Проповедует Ангельский собор и человеческий род величие Твое, о Богомати! Тобою бо мир стоит, домы верных утверждаются, кающиися спасаются, приявшии милость Божию души молитвами Твоими из ада возводятся, согласно о Тебе вопиюще: Аллилуиа.

Икос 6

Возсия в сердцах наших, Владычице, свет истиннаго разумения, да познаем, яко доброта Твоя превзыде всяку тварь Божию. Несказанный соуз совершенства, непостижимый ангельским очесем, и да прославляем Тя похвалами сими:

Радуйся, необыменная глубино смирения.

Радуйся, пучино любве неизреченная.

Радуйся, образе сострастия и крайняго долготерпения.

Радуйся, инокинь Начальнице и матерей славо.

Радуйся, всех добродетелей зерцало.

Радуйся, Евангелие Сына Твоего делом исполненное.

Радуйся, Мати милосердия, платом, иже в руце Твоей, слезы верных отирающая.

Кондак 7

Хотяй Человеколюбец Бог явити в Тебе Матерь всех, могущую спострадати всем, повсячески искушаше Тя, от младенства крест уединения и сиротства понесла еси, в юности смущение Иосифово претерпела, раздиралася еси сердцем боящися за Сына Твоего. Оружие пройде Твою душу, егда услышала Его врагами поята и связана, и при кресте и у гроба Его стояла еси, но превозшед Иова многострадальнаго терпением, присно Бога благодарила еси, поя Ему: Аллилуиа.

Икос 7

Новыя милости и щедроты хотяще излити на верныя чада Твоя, Владычице, икону Твою чудотворную скорбящим во утешение даровала еси, сего ради молим Тя прияти похвалы сия благодарственныя:

Радуйся, силу всемогущества Христова иконою Твоею возвещающая.

Радуйся, всех к Тебе прибегающих Твоею милостию покрывающая.

Радуйся, во всех нуждах и бедах скорое вспоможение нам дарующая.

Радуйся, болезни душевныя и телесныя иконою Твоею скоро врачующая.

Радуйся, в скорбех наших небесную отраду в сердца наша проливающая.

Радуйся, всем страждущим зде мир сердца подающая, а горе Царствие Небесное уготовляющая.

Радуйся, Мати милосердия, платом, иже в руце Твоей, слезы верных отирающая.

Кондак 8

С транников и пришельцев на земли сей, не презри нас, Мати Спасителя нашего, но всели нас в вечныя небесныя кровы, идеже с Сыном и Царем всех во славе царствуеши, приемля песнь: Аллилуиа.

Икос 8

Вся духом Богу предстоящи, с нами пребываеши, Пречистая. Рече бо Ангел угоднику Твоему блаженному Андрею: «Не во всегда в раи Царица Небесная пребывает, но отходит в многобедный мир ваш, помогати людем и скорбящия утешати». Оставляеши красоту Божия рая и наш земный мир обходиши, ищущи слез отерети я. Искушенная всячески, всякую скорбь нашу аки свою проразумеваеши, темже приими теплыя благодарения наша: 12 13

Радуйся, Мати рабов Сына Твоего.

Радуйся, любящая нас паче плотских матерей наших.

Радуйся, скорая Помощница всем сущим в бедах и напастех.

Радуйся, вдов и сирот милосердное попечение.

Радуйся, умягчение злых сердец.

Радуйся, всех скорбящих радосте.

Радуйся, Мати милосердия, платом, иже в руце Твоей, слезы верных отирающая.

Кондак 9

Всякия скорби наша во дни земнаго жития Твоего, яко Мати наша, подъяла еси и милостивно состраждеши нам, якоже и Сын Твой. Темже и молим Тя, даждь нам терпение, благодушествие и кротость, и присно о Тебе пети Богу: Аллилуиа.

Икос 9

Витий многовещанных глаголы не могут изъяснити, коль велика любовь Твоя к роду человеческому и о нас попечение. Темже Тя достойно вси ублажаем:

Радуйся, безнадежных и отчаявшихся Надеждо.

Радуйся, утешение плачущих.

Радуйся, великое сокровище окрадываемых.

Радуйся, жезле и опора.

Радуйся, иноком и инокиням девам терпеливым венец нетленный сплетающая.

Радуйся, к сирым и оставленным милующих людей посылающая.

Радуйся, Мати милосердия, платом иже в руце Твоей, слезы верных отирающая.

Кондак 10

Спасения хотящим, изряднее же ревнующим о подвизе равноангельнаго жития, иноком и инокиням пособствуеши, Пресвятая Владычице. Ты бо еси Мати Спаса всех, Ты корень девства. Ты Инокинею Сама Себе наименовала еси. Сего ради всех спасаемых, подвизаеши пети о Тебе Богу: Аллилуиа.

Икос 10

Стеною быти земле Российстей, о мира Владычице, возжелала еси, егда чудотворныя иконы Твои во всех концех страны нашея умножила еси, и во дни наша излияла от пречистая Шестоковския иконы Твоея благодать вопиющим Ти:

Радуйся, Заступнице усердная рода христианскаго.

Радуйся, Мати людем Русским.

Радуйся, пред Нею же врази наши стояти не могут.

Радуйся, на обиды от возстающих на ны наша вопли и стоны приемлющая.

Радуйся, всемощная и крепльшая всякаго создания.

Радуйся, яко блаженными нас сотворяеши, имущих Тя, Предстательницу и Молитвенницу неусыпную.

Радуйся, Мати милосердия, платом, иже в руце Твоей, слезы верных отирающая.

Кондак 11

Пение всеумиленное от уст аще и недостойных, обаче благодарных, приими, Всеблагая Владычице, восхваляющих чудную икону Твою и даждь нам в Царствии Сына Твоего зрети Тя и прославляти о Тебе Создателя всех, вопиюще Ему: Аллилуиа.

Икос 11

Света тихаго и немерцающаго Сына Твоего сияние кроткое, о Мати милосердия, возсияй в омраченных скорбьми сердцах наших свет утешения Твоего и об

Радуй нас, радосте наша, и всех скорбящих, вопиющих Ти:

Радуйся, алчущих Питательнице.

Радуйся, больных исцеление.

Радуйся, нагих одеяние.

Радуйся, согреяние во озимении и мразех сущих.

Радуйся, не имущим, где главы преклонити, пристанище подающая.

Радуйся, всех верных от бед предивно спасающая.

Радуйся, Мати милосердия, платом, иже в руце Твоей, слезы верных отирающая.

Кондак 12

Благодать божественную испроси, Владычице, нам с верою и любовию поклоняющимся Твоей цельбоносней иконе: буди покров и заступление, и испроси нам христианскую кончину, да не точию зде, но и в вечной жизни о Тебе благодарне вопием Богу: Аллилуиа.

Икос 12

Поюще, Владычице, Твое несказанное к человеком милосердие, паче ангельскую чистоту и добродетель, Твою к Богу близость, неизреченную славу, недоумеваем, киими похвалы Тя восхвалити, токмо Архангеловыми словесы, Тобою приятыя:

Радуйся, благодатная, Господь с Тобою.

Радуйся, благословенная в женах.

Радуйся, Мати Господа нашего.

Радуйся, честнейшая Херувим.

Радуйся, славнейшая без сравнения Серафим.

Радуйся, присноблаженная и пренепорочная.

Радуйся, всех радостей Радость.

Радуйся, Мати милосердия, платом, иже в руце Твоей, слезы верных отирающая.

Кондак 13

О всепетая Мати, даровавшая нам чудотвор - ную Твою икону в покров и утешение, приими малое сие похвальное пение: наставляй и окорми нас в сей временной жизни, и по смерти не остави нас, и имиже веси судьбами спаси нас, да о Тебе выну вопием Богу: Аллилуиа.

Этот конда́к читается трижды, затем и́кос 1-й и конда́к 1-й.

Молитва Пресвятой Богородице пред Ее иконою Шестоковская

К кому возопию Владычице? К кому прибегну в горести моей, аще не к Тебе, Царице Небесная? Кто плачь мой и воздыхание мое приимет, аще не Ты, Пренепорочная, Надеждо христиан и прибежище нам грешным? Кто паче Тебе в напастех защитит? Услыши убо стенание мое, и приклони ухо Твое ко мне, Владычице Мати Бога моего, и не презри мене требующаго Твоея помощи, и не отрини мене грешнаго. Вразуми и научи мя, Царице Небесная, не отступи от мене, раба Твоего, Владычице, за роптание мое, но буди мне Мати и Заступница. Вручаю себе милостивому покрову Твоему: приведи мя грешнаго к тихой и безмятежней жизни, да плачуся о гресех моих. К кому бо прибегну повинный аз, аще не к Тебе, упованию и прибежищу грешных, надеждою на неизреченную милость Твою и щедроты Твоя окриляемь? О Владычице Царице Небесная! Ты мне упование и прибежище, покров и заступление и помощь. Царице моя преблагая и скорая заступнице! Покрый Твоим ходатайством моя прегрешения, защити мене от враг видимых и невидимых, умягчи сердца злых человек, возстающих на мя. О Мати Господа моего Творца! Ты еси корень девства и неувядаемый цвет чистоты. О Богородительнице! Ты подаждь ми помощь немощствующему плотскими страстьми и болезнующему сердцем, едино бо Твое и с Тобою Твоего Сына и Бога нашего имам заступление, и Твоим пречудным заступлением да избавлюся от всякия беды и напасти, о Пренепорочная и Преславная Божия Мати Марие. Темже со упованием глаголю и вопию: Радуйся, Благодатная; Радуйся, Обрадованная; Радуйся, Преблагословенная; Господь с Тобою. Аминь.