Шрифт

Акафисты Богородице

Акафист Пресвятой Богородице пред иконой «Умиление» Серафимо-Дивеевская (иной акафист)

Умиление Серафимо-Дивеевская
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранная от всех родов Заступнице вселенныя, похвальный глас Твоих рабов приемши, Всеблаженная, избави нас от всяких бед, да пред иконою Твоею и мы архангельский привет поем усердною душею:

Радуйся, всем радостем Ты еси радость, Всеблаженная.

Икос 1

Архангел Божий Гавриил, началовождь Небесных Сил, предста Тебе, Отроковице, Совет Превечный открывая и еже «Радуйся» вещая: «Ты Мати будеши Владыце». Тому последующе верно, дерзаем вси нелицемерно воспети радостный сей глас Тебе, молящейся о нас:

Радуйся, рождшая Жизнь всем утробо; радуйся, грешнаго мира спасение.

Радуйся, Сын Твой воскресе от гроба; радуйся, Евиных слез избавление.

Радуйся, древняго змия поправшая; радуйся, узы греха растерзавшая.

Радуйся, радость женам несказанная; радуйся, Божия милости дверь.

Радуйся, Ангелов песнь непрестанная; радуйся, Богу избранная Дщерь.

Радуйся, твари всея ожидание; радуйся, грешником всем упование.

Радуйся, всем радостем Ты еси радость, Всеблаженная.

Кондак 2

Видяще образ Твой сей «Умиление», токи целебныя всем источающий, тепле к нему притекаем смиреннии, в нуждах и скорбех спасения чающе. Ты же Христа умоли, яко Мати, всяко прошение нам даровати, яко да присно Тому воспоим песнь благодарну пред образом сим: Аллилуиа.

Икос 2

Разум небесный стяжа Серафим, тяжким недугом лежа одержим; Тя бо моляше болезнь исцелити. Ты же, Благая, пришедши во сне, кротце предстала ему в тишине, отроку жизнь обещавши продлити. Темже, от смерти Тобою спасенный, сладце воспе Серафим умиленный:

Радуйся, высшая неба небес; радуйся, Мати Господня святая.

Радуйся, рождшая Бездну чудес; радуйся, стамно щедрот всезлатая.

Радуйся, Ты бо нам милость являеши; радуйся, всяку болезнь исцеляеши.

Радуйся, душ и телес врачевство; радуйся, падших благое возстание.

Радуйся, горних умов торжество; радуйся, грешников к Небу воззвание.

Радуйся, Бога за нас умоляеши; радуйся, вражию сеть сокрушаеши.

Радуйся, всем радостем Ты еси радость, Всеблаженная.

Кондак 3

Силою Вышняго дивно храним, в силу от силы в душе преспеваше в юности чистей святый Серафим. В храм Пресвятыя усердно хождаше и, умиленно молитву творя, сердцем хвалу во псалмех восписуя, Бога Всещедраго благодаря, присно пояше Ему Аллилуиа.

Икос 3

Имея Тя Спутницу верную в жизни, остави избранник Твой юный отчизну, в обитель Саровскую путь направляя. Слагая бо в сердце Твоя словеса, отечество мняше свое Небеса, пустынных живот на земли ублажая. И, слышав: «От нашего рода есть сей», Тебе воспеваше, надежде своей:

Радуйся, веры звездо путеводная; радуйся, Кормчая жизни моей.

Радуйся, Спутнице, к Богу доходная; радуйся, крове от бури страстей.

Радуйся, к Богу бо нас управляеши; радуйся, душу спасти вразумляеши.

Радуйся, правды стезе незаблудная; радуйся, мосте, горе возводяй.

Радуйся, нищим Помощнице чудная; радуйся, венче, сердца веселяй.

Радуйся, в Царствие нас призываеши; радуйся, двери рая отверзаеши.

Радуйся, всем радостем Ты еси радость, Всеблаженная.

Кондак 4

Бури житейския скоро спасает Божия Мати вдовицу блаженную, жребий вручити ей Свой обещает, землю возделати благословенную. Темже, Пречистыя воли послушна, в путь неизвестный отходит вдовица, претерпевающи вся благодушно, дондеже в жребий святый водворится, Девы глагола в терпении ждущи, Богу же Сыну прилежно поющи: Аллилуиа.

Икос 4

Слыша вдовица глагол долгожданный, в тонцем дремании ей провещанный: «Зде есть в Дивееве место Мое, зде есть Мой жребий четвертый избранный, зде ты положиши кости твоя, девам пристанище прежде создавши». Темже вдовица, от ложа воставши, Матери Света за радость святую светло поет похвалу таковую:

Радуйся, Света обитель блаженная; радуйся, Богом избранный удел.

Радуйся, скиние Бога священная; радуйся, добрых сокровище дел.

Радуйся, милости море безбрежное; радуйся, душ тишино безмятежная.

Радуйся, вдов к чистоте окормление; радуйся, девства сосуде драгий.

Радуйся, в старости сил укрепление; радуйся, в юности жезле благий.

Радуйся, Дево Марие нетленная; радуйся, Господом благословенная.

Радуйся, всем радостем Ты еси радость, Всеблаженная.

Кондак 5

Божия Матере гласу внимающи, храм Ея имени вдова созидает; малое стадо сирот собирающи, во благочестии тех возращает. Тако в Дивееве Божие семя в добрую землю вложися во время, плод же в терпении свой принесе, яко да мы от плода днесь вкушающе, Матерь Благую Творца небесе благодарим, о Ней песнь воспевающе: Аллилуиа.

Икос 5

Видевши первоначальница мати, яко обитель начат возрастати, Девы Марии словес в исполнение, малое стадо свое поручает старцем Саровским и мудро вверяет паствы духовное все окормление. И, преспевающи в жизни своей, благодарящи источник чудес, Деву Марию, за помощь с Небес, песни слагает похвальныя Ей:

Радуйся, тихая наша отрадо; радуйся, имя Тебе Умиление.

Радуйся, Мати словеснаго стада; радуйся, места сего прославление.

Радуйся, нам бо покров простираеши; радуйся, нас ко Христу собираеши.

Радуйся, девам Ты светлый чертог; радуйся, сирых от бед ограждаеши.

Радуйся, Тя бо послушает Бог; радуйся, плачущих всех утешение.

Радуйся, немощи наша терпящая; радуйся, нас во благих богатящая.

Радуйся, всем радостем Ты еси радость, Всеблаженная.

Кондак 6

Бысть проповедница милостей всех в своем житии Александра честная. Божие Имя всегда во устех, в сердце и мысли молитва святая. Слезныя токи Тебе приношаше, Тя, Живоносный Источниче, чтущи, труд же дневный неустанно творяше, духом горящи и Богу поющи: Аллилуиа.

Икос 6

Возсиявающи свет благодати в дивном Дивееве, Божия Мати Свой омофор простирает над ним, козни врага и наветы людския, немощи духа и страсти плотския, нужды, обычныя людем земным, — вся утоляет Царица благая, скоро Своим сиротам помогает. Темже, поюще Тоя чудеса, радостно рцем Ей сия словеса:

Радуйся, свете спасения благостный; радуйся, чистых сердец красото.

Радуйся, совести мире, всем сладостный; радуйся, духа любве широто.

Радуйся, цветниче благоухающий; радуйся, жезле, враги устрашающий.

Радуйся, в немощи помощь всесильная; радуйся, в скорби утехо с Небес.

Радуйся, в скудости пище обильная; радуйся, вышшая всяких словес.

Радуйся, Божий бо гнев утоляеши; радуйся, милость на нас призываеши.

Радуйся, всем радостем Ты еси радость, Всеблаженная.

Кондак 7

Хотящи оставити мир сей растленный, блаженная вкупе сирот собирает и Матере Бога удел, ей врученный, Пахомия старца блюсти умоляет; Пречистыя образ на перси приемлет и в руце Владычицы дух предает. Исполненный скорби Пахомий ей внемлет и песнь ей надгробную сице поет: Аллилуиа.

Икос 7

Новый Дивееву Ангел хранитель, жребия Девы и дев устроитель, послан Пречистою бысть Серафим. Купно с прехвальным Петром, с Иоанном, в келлии Дева предста несказанно, светлая, с мучениц ликом святым, благоухающи миром небесным. «Дев ты Моих не остави», — вещает, помощь ему по вся дни обещает, он же приносит Ей дар свой словесный:

Радуйся, славо пророков прекрасная; радуйся, крине удолий рая.

Радуйся, мучениц песнь велегласная; радуйся, стершая слезы моя.

Радуйся, грешных молитв не забывшая; радуйся, сирых Твоих посетившая.

Радуйся, наша пред Сыном Споручнице; радуйся, с Богом принесшая мир.

Радуйся, душ Жениховых Обручнице; радуйся, Двернице званным на пир.

Радуйся, тайны от века явление; радуйся, Дево, Тебе мое пение.

Радуйся, всем радостем Ты еси радость, Всеблаженная.

Кондак 8

Странных видений причастник блаженный, благостный старец отец Серафим к сердцу приемлет завет незабвенный Девы Марии и, Ею водим, девам обитель особую строит; меру соборному храму дает, место святое канавкой обводит, паству Пречистыя верно пасет, правило жизни и чин полагает, Богу неленостно пети внушает: Аллилуиа.

Икос 8

Всецелым умом ся Христу сраспиная, блаженства рая на земли предвкушая, пояше святый, яко благ тех виновней, Марии, родившей нам Спасшаго нас, архангельский Той, еже «Радуйся», глас прилежно всегда с простотою сыновней. Тому подражая, Мариин удел доныне обходит свой древний предел, хвалу Богородице Деве поя, да радости будет причастник Тоя:

Радуйся, о Богородице Дево; радуйся, рождшая Спаса Христа.

Радуйся, Бога вместившая в чрево; радуйся, плод Твой нам Путь живота.

Радуйся, радостей вечных виновная; радуйся, славо и радость церковная.

Радуйся, девственниц чистых венчание; радуйся, иноков щедрая Мати.

Радуйся, матерей всех величание; радуйся, доме, исполнь благодати.

Радуйся, стрелы во дни угашающи; радуйся, страхи в нощи прогоняющи.

Радуйся, всем радостем Ты еси радость, Всеблаженная.

Кондак 9

Всяких Сил ангельских, Дево, превысшую, хвалят немолчно Тя наша сердца, светлостей солнечных истинно чистшую, Тя величает вся тварь без конца. Ты же Ходатаица за нас буди к Сыну и Богу в день страшный Суда; грешных молений тогда не забуди, пети сподоби нас Богу всегда: Аллилуиа.

Икос 9

Витий многогласных не может язык воспети достойно Твой сладостный лик, о Дево и Мати Владыки Небес. Даров Твоих чудных и сил умножение сердца исполняет росы умиления, дает очесем всех источники слез. Твой образ святый со свещею горящею всегда веселяше взор старца молящаго, егда на колена склонився пред ним, усердно хваляше Тя пением сим:

Радуйся, всех безнадежных надеждо; радуйся, сердцу росо умиления.

Радуйся, правды лишенных одеждо; радуйся, всем нам источник спасения.

Радуйся, демонский лик низлагаеши; радуйся, грозно бесом запрещаеши.

Радуйся, духом унылых возстание; радуйся, палице спящим во зле.

Радуйся, стропотных душ наказание; радуйся, вся бо возможна Тебе.

Радуйся, в горьких работах всем сладость; радуйся, Мати, скорбящим всем радость.

Радуйся, всем радостем Ты еси радость, Всеблаженная.

Кондак 10

Спасительно постными сеяв слезами, жнет в радости старец от Девы вещание: «Ты скоро, любимиче, будеши с нами». И духом покоен, в живом уповании, отход свой от мира предуготовляет. Устав свой молитвенный и наставления хранити сирот своих он поучает: «От днесь вам Благая едина хранение; вы многия пестуны имате, чада, отец же не будет разве мене, на гробе моем ищите отрады, и в нуждах и в скорбех идите ко мне; и верую, даст вам Господь утешение, да присно восходит от вас Ему пение: Аллилуиа».

Икос 10

Стена еси девам, Пречистая Дево, от вражиих козней, от нужды и гнева, Тебе бо вручи нас святый Серафим. И в час испытания дух наш смятенный к Тебе мы возносим в молитве смиренней: о, буди Помощница сирым Твоим, да весело хвалим Тя, Присноблаженную, всемирную славу, хвалу неизменную:

Радуйся, верных Твоих утверждение; радуйся, крепкая сирых стено.

Радуйся, Церкве святыя хваление; радуйся, горним умом глубино.

Радуйся, цвете наш неувядаемый; радуйся, граде Царя прославляемый.

Радуйся, лествице, к Богу возведшая; радуйся, облаче легкий Христов.

Радуйся, росу руно произведшее; радуйся, всем Ты готовый покров.

Радуйся, наша надеждо известная; радуйся, дев похвало неневестная.

Радуйся, всем радостем Ты еси радость, Всеблаженная.

Кондак 11

Пение всякое днесь побеждается множеством благодеяний Твоих; милость Твоя на весь мир простирается, славо небесных и радость земных. Гласа бо Матере богоприятнаго Сын Твой послушает, Дево, всегда. Радость всем радостем Ты, Благодатная, — звати мы не умолчим никогда. Тако бо зваше Тебе преподобный, Богу поя, наш предстатель загробный: Аллилуиа.

Икос 11

Света открыся чертог вожделенный старцу, в молитве к Тебе восхищенну, Дево, пред образом сим «Умиление». В руце пречистеи душу святую Ты восприяла еси во иную жизнь безконечную в райских селениях. Плакаху чада, отца их лишенная, новым же знанием умиленная милости к старцу Твоей, растворяюще слезы надгробныя песнею красною, Тя величаху хвалою согласною, Матерь едину Тебе разсмотряюще:

Радуйся, темныя власти стенание; радуйся, праведных душ торжество.

Радуйся, вратников ада рыдание; радуйся, Тя бо поет естество.

Радуйся, князя мытарств низложившая; радуйся, демонов гордость смирившая.

Радуйся, имя, святым вожделенное; радуйся, в смертный Помощнице час.

Радуйся, радость нам неизреченная; радуйся, в час той услыши наш глас.

Радуйся, наших сердец умиление; радуйся, Бога умилостивление.

Радуйся, всем радостем Ты еси радость, Всеблаженная.

Кондак 12

Благодатный залог в ограждение, чадом дивеевским старец остави образ Пречистыя сей «Умиление». Сам же пресветло ликуя во славе, Матерь Небесную молит усердно сирых его соблюсти милосердно, да не воздремлют уныния сном, но да елеем свещу напояюще, внидут в чертог со своим Женихом, вечную Ангелов песнь воспеваюше: Аллилуиа.

Икос 12

Поем днесь Твою, Богородице, славу и милость ко грешным, на бесы державу; вси празднуем светло Твоя чудеса. Безмерно Тя всю освятив, Непорочная, Бог людем постави Тя в крепость всемощную: Тебе бо внимают Того ушеса. Тобою спасаеми вси ежечасно, приносим Ти песнь таковую согласно:

Радуйся, жизни сокровище вечныя; радуйся, правды ковчеже святый.

Радуйся, людем хвало безконечная; радуйся, свещниче веры златый.

Радуйся, Божие благоволение; радуйся, всех человеков спасение.

Радуйся, мученик всех дерзновение; радуйся, песнь преподобных Твоих.

Радуйся, праведных жен украшение; радуйся, краю желаний благих.

Радуйся, церкве хоругвь пречестная; радуйся, грешным нам Мати благая.

Радуйся, всем радостем Ты еси радость, Всеблаженная.

Кондак 13

О Мати Всепетая, всем во спасение даждь, Всеблагая, сердец умиление, да Божиим страхом всегда ограждаеми, избегнем губительных сетей борца, и тако Твоими мольбами спасаеми, во веки восхвалим благаго Творца: Аллилуиа.

Этот кондак читается трижды, затем 1-й икос «Архангел Божий...» и 1-й кондак «Избранная от всех родов…».

Молитва

О Пресвятая Владычице, Богородице Дево! Приими недостойныя молитвы наша, сохрани нас от наветов злых человек и от напрасныя смерти, подаждь нам прежде конца покаяние, на моления наша умилосердися и радость вместо печали даруй. И избави нас, о Госпоже Владычице Богородице, от всякия беды, напасти, скорби, болезни и всякаго зла, и сподоби нас, грешных рабов Твоих, одесную стати во втором пришествии Сына Твоего, Христа Бога нашего, и наследники нас быти сподоби Царствия Небеснаго и жизни вечныя со всеми святыми в бесконечныя веки. Аминь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго, яко Благ и Человеколюбец.

Умиление Серафимо-Дивеевская