Акафисты Богородице
Акафист Пресвятой Богородице пред иконой «Прибавление ума»
![Прибавление ума Прибавление ума](img_i/s099.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кондак 1
Избранней от всех родов Божией Матери, Небеси и земли Царице, врачевство духовное всему миру подающей, благодарственная пения приносим о даровании Божественнаго сокровища, чудотворныя иконы Ея, «Прибавление ума» нареченныя, еюже ограждаеми, радуемся светло и с любовию взываем:
Радуйся, Всемилостивая Владычице, премудрость и разум верным людем Твоим дарующая.
Икос 1
Ангел предстатель послан бысть во град Назарет к чистей Отроковице Марии рещи: радуйся, егда Бог Слово воплощашеся во утробе Ея. Архангела благовестие слышавши, Пречистая Дева во смирении сердца отвеща: се, Раба Господня, буди Мне по глаголу твоему. Мы же грешнии, благоговейне чтуще Матерь Христа Бога нашего, яко Ангелом научихомся, тако со умилением вопием Благодатней:
Радуйся, Благословенная в женах; радуйся, у Господа обретшая благодать.
Радуйся, силою Всевышняго осененная; радуйся, Духом Святым освященная.
Радуйся, верная Рабо Господня; радуйся, Богоизбранная Отроковице.
Радуйся, Спасителя мира рождшая; радуйся, Мати Света, всех просвещающая.
Радуйся, премудрых превосходящая разум; радуйся, верных озаряющая смыслы.
Радуйся, Небеси и земли Царице; радуйся, яко Тя ублажают вси роди.
Радуйся, Всемилостивая Владычице, премудрость и разум верным людем Твоим дарующая.
Кондак 2
Видящи, Всенепорочная, желание людей новопросвещенных, благослови евангельских тайн благовестника апостола Луку написати пречистаго лика Твоего изображение, и на него зрящи, глаголала еси со властию: С сим образом благодать Моя и сила да будет. Темже благоговейне покланяющеся пред святыми иконами Твоими, имиже весь мир христианский украсила еси, благодарственно вопием о Тебе Богу: Аллилуиа.
Икос 2
Разум небесный открывающе, Пречистая Дево, благоизволила еси познати всем верным, яко в мире есть воля Божия, благая, угодная и совершенная, и всяк ум превосходящая. Призри на нас, Всепетая Богородице, озари светом истины, утеши нас, яко Мати, настави нас на путь правды, да возопиим моляще Тебе тако:
Радуйся, Божию Силу и Божию Премудрость, Христа породившая; радуйся, Бога с Человеком соединившая.
Радуйся, светом разума души наша просвещающая; радуйся, неизреченныя славы Божия вместилище.
Радуйся, почитания святых икон освящение; радуйся, духовных сокровищ Подательнице.
Радуйся, честным Твоим иконам благодать даровавшая; радуйся, яко на иконы Твоя взирающе, Самой Тебе покланяемся.
Радуйся, во всем мире исцеления от святых икон Твоих подающая; радуйся, к Небесем умы и сердца наша возводящая.
Радуйся, всю вселенную лучами Твоея благодати озарившая; радуйся, с Сыном Твоим и Богом вечно царствующая.
Радуйся, Всемилостивая Владычице, премудрость и разум верным людем Твоим дарующая.
Кондак 3
Силою благодатною осеняеми, благочестивии людие во град Назарет приидоша и обретоша тамо дом Богородичен, идеже Пречистая Дева родися и благовестие Архангела прият, и пренесоша дом той в землю Италийскую, во град Лорето. Верху же дома онаго доныне есть икона Богородична, от древа сотворена, юже ангельския Небесныя Силы невидимо окружают и благолепно чествуют, радостно вопиюще Богу: Аллилуиа.
Икос 3
Имущи к роду христианскому матернее милосердие, вси концы земли ко спасению призываеши, Пречистая, темже убо народи разноязычнии от многих стран приходят в дом Твой и пред иконою Твоею исповедуют грехи своя. Того ради от востока до запада прославлена бысть икона Твоя, и избавленнии от болезней, скорбей и напастей людие приносят Ти благодарения, взывающе:
Радуйся, Доме, Егоже созда Себе Премудрость Божия; радуйся, граде Божий, иже от малаго града Назарета произыде.
Радуйся, дом Божий явлением Своим освятившая; радуйся, Отроковице, Святая Святых большая.
Радуйся, с Предвечным Богомладенцем в Назарет пришедшая; радуйся, таинству спасения рода человеческаго послужившая.
Радуйся, Лествице, Еюже восходим от земли на Небо; радуйся, всему миру предивный Покрове.
Радуйся, яко с верою покланяемся пречистаго лика Твоего изображению; радуйся, яко от него приемлем благодатныя дары во спасение душ наших.
Радуйся, дивная знамения иконами Твоими совершающая; радуйся, державная Заступнице рода христианскаго.
Радуйся, Всемилостивая Владычице, премудрость и разум верным людем Твоим дарующая.
Кондак 4
Бурею скорби велия одержим бе изограф некий, в помрачении разума от земных врачей никоеяже пользы получивый. Тогда Пречистая Мати Господа явися болящему и заповеда икону написати, яже дом Ея во граде Лорето освящает. Сия исполнив, изограф исцелися и от того дне икону новописанную «Прибавление ума» нарече, поя пред нею хвалебную песнь Богу: Аллилуиа.
Икос 4
Слышавше людие земли Русския, яко благоизволи Пресвятая Богородица дати им в радость и утешение икону Свою, «Прибавление ума» нареченную, многими списками ея украсиша храмы и домы своя, от нихже дивная знамения и чудеса обильно содеваются всем притекающим с верою и поющим Преблагословенней таковая:
Радуйся, образ Твой честный во утешение и освящение нам даровавшая; радуйся, болезни душевныя и телесныя иконою Твоею скоро врачующая.
Радуйся, землю Русскую покровом милости Твоея осенившая; радуйся, любящия и чтущия Твой образ от всяких бед избавляющая.
Радуйся, со иконами Твоими благодатными невидимо в домы наша входящая; радуйся, благословение и радование тем приносящая.
Радуйся, оставленных врачами на Свои всемощныя руце приемлющая; радуйся, иждившим от недуга ум исцеление подающая.
Радуйся, безнадежных Надеждо; радуйся, умов наших Просвещение.
Радуйся, познания истины чистое зерцало; радуйся, яко от востока и до запада имя Твое ублажается.
Радуйся, Всемилостивая Владычице, премудрость и разум верным людем Твоим дарующая.
Кондак 5
Боготечней звезде подобна явися икона Твоя, Богомати: страну бо нашу Российскую и грады ея освящает, сущих во тьме невежества светом боговедения озаряет, разум наш, грехми помраченный, просвещает, заблуждающихся же на путь делания заповедей Сына Твоего и Бога наставляет, Емуже благодарственне вопием: Аллилуиа.
Икос 5
Видевше Божественное сокровище — дивную икону Богоматере, к нейже усердно притекающе, в недузех исцеление, в скорбех утешение, в бедах избавление приемлем и радостно поем Заступнице нашей:
Радуйся, явлением иконы Твоея верных осиявшая; радуйся, яко Тобою во тьме возсия Солнце Правды, Христос Бог наш.
Радуйся, Мати Света умнаго, благодатию всю вселенную озарившаго; радуйся, зарями благодати нас просвещающая.
Радуйся, светом Твоим мрак неведения нашего разгоняющая; радуйся, Дево, яко Тобою свет боговедения всем возсия.
Радуйся, свеще неугасимая, свет веры воспламеняющая; радуйся, добродетели путь освещающая.
Радуйся, святыни источниче; радуйся, от бед и напастей крепкая наша Хранительнице.
Радуйся, любве Божественныя светильниче неугасимый; радуйся, сиянием чудес Твоих весну спасения нам возвещающая.
Радуйся, Всемилостивая Владычице, премудрость и разум верным людем Твоим дарующая.
Кондак 6
Проповедует мир весь милости Твоя, Мати Господа нашего, во мнозех бо градех и весех земли Русския икона Твоя «Прибавление ума» лучами чудес сияет, просвещающи души наша светом Божия благодати и подвизающи пети прославльшему Тя Богу: Аллилуиа.
Икос 6
Возсиял еси в честней иконе Твоей, Богородице, свет спасения всем, блуждающим во тьме грехов и страстей, и всем молящимся пред нею с верою и благоговением скорая помощь подается. Умов наших омрачение светом Твоим отжени, Всепетая, и даруй Истинный Свет узрети всем, с любовию вопиющим Ти сице:
Радуйся, Звездо незаходимая, Солнце Правды в мир вводящая; радуйся, Мати Света Истиннаго, души верных просвещающаго.
Радуйся, благодатнаго учения Наставнице; радуйся, яко светлым покровом ум наш омраченный осеняеши.
Радуйся, заре невечерняя, мглу наших грехов разгоняющая; радуйся, тьмы и вечных мук нас избавляющая.
Радуйся, от сетей вражиих свобождающая; радуйся, безумие мира побеждающая.
Радуйся, душевредных учений низложение; радуйся, душеполезных знаний дарование.
Радуйся, иконою Твоею нас утешающая; радуйся, светом радости души ободряющая.
Радуйся, Всемилостивая Владычице, премудрость и разум верным людем Твоим дарующая.
Кондак 7
Хотяй всем человеком спастися и в разум истины приити, премилосердый Господь и Создатель наш образ Пречистыя Матере Своея «Прибавление ума» даровал есть нам, да вси с верою молящиися пред ним, крепость слова, и разум, и мудрость ума приимше, в тишине помыслов Царю и Богу нашему поют: Аллилуиа.
Икос 7
Новая и преславная чудеса являеши, Мати Божия, верным людем святою иконою Твоею: силою благодати Христовы помраченныя умом просвещаеши, от безумия отвращаеши, разслабленныя укрепляеши и всем притекающим к целебному Твоему образу скорую помощь подаеши, подвизающи пети Тебе таковая:
Радуйся, из глубины неведения извлачающая; радуйся, многи в разуме просвещающая.
Радуйся, слово премудрости просящим дарующая; радуйся, несмысленных разумны содевающая.
Радуйся, греховныя помыслы отгоняющая; радуйся, сердца ожесточенная умягчающая.
Радуйся, ум к Богу возвышающая; радуйся, немудрыя умудряющая.
Радуйся, ко благочестию наша Наставнице; радуйся, одевающая нас вечною радостию.
Радуйся, к Сыну Твоему и Богу молитвы верных приносящая; радуйся, и Сама непрестанно у Престола Вседержителя о всех молящаяся.
Радуйся, Всемилостивая Владычице, премудрость и разум верным людем Твоим дарующая.
Кондак 8
Странно есть видети икону Твою, Пречистая Богородице Дево, на досце написанную, духов тьмы прогоняющую силою Твоею Божественною и разум подающую немощию ума одержимым и всем неудобь учащимся; и нас, во гресех погибающих, молим со слезами, избави от враг видимых и невидимых, от тьмы неразумия, да всегда поем Спасителю и Богу нашему: Аллилуиа.
Икос 8
Вся земля Русская преисполнена, яко звездами богосветлыми, чудотворными иконами Твоими, Богородице Дево, в нейже и сия икона Твоя, «Прибавление ума», благодатию сияет и согревает оледенелая сердца наша знаменьми милости Твоея к нам грешным. Сего ради пред ликом Твоим святым преклоньше колена, воспеваем Тя, Всепречистая Мати наша, тако:
Радуйся, скорби наша в радость претворяющая; радуйся, от разжженных стрел лукаваго нас защищающая.
Радуйся, младенцев воспитание и благодатное хранение; радуйся, юности Охранительнице и Наставнице премудрая.
Радуйся, детем неудобь учащимся разум подающая; радуйся, вражия сети разрушающая.
Радуйся, верных разум просвещающая; радуйся, неверныя посрамляющая.
Радуйся, помрачением ума одержимых исцеляющая; радуйся, яко благодатию от иконы Твоея демони прогоняются.
Радуйся, Мати милосердия и щедрот; радуйся, Надеждо вечнаго нашего спасения.
Радуйся, Всемилостивая Владычице, премудрость и разум верным людем Твоим дарующая.
Кондак 9
Всякое естество ангельское благоговейно Тебе служит, Небеси и земли Царице, человеческий же род хвалы Тебе приносит и Твою святую икону почитает, сию бо во отраду и утешение даровала еси нам. Научи нас, о Всеблагая, достойно славити Тя и воспевати рождшемуся от Тебе Спасителю мира: Аллилуиа.
Икос 9
Витии человечестии недоумевают познати тайну служения Твоего роду христианскому, Богородице, ниже могут изъяснити силу чудотворную, от икон Твоих происходящую на всяку пользу душевную и телесную человеком. Мы же, православнии, со слезами радости пред иконою Твоею святою предстояще, прославляем Тя, Благодатная, и глаголем:
Радуйся, Ангелов радование; радуйся, от Архангел покланяемая.
Радуйся, Юже на воздусе сретают Херувими; радуйся, Ейже похвальная приносят Серафими.
Радуйся, светлое Церкве Небесныя и земныя украшение; радуйся, всех Небесных Сил вышшая.
Радуйся, от воинств Небесных почитаемая; радуйся, всех земнородных славо.
Радуйся, образом Твоим умы наша к Горнему возводящая; радуйся, Путеводительнице наша к Небесному Отечеству.
Радуйся, сиянием души Твоея всю землю просвещающая; радуйся, всех нас при Кресте Сына Твоего усыновившая.
Радуйся, Всемилостивая Владычице, премудрость и разум верным людем Твоим дарующая.
Кондак 10
Спасти хотя мир от безумия и прелести вражия, Человеколюбец Господь чудную икону Твою, Богомати, дарова, пред неюже помраченнии умом исцеляются, беснующиися от демонов свобождаются, скорбящии утешение и радость обретают. Темже прославляюще Бога, подающаго нам таковыя милости, вопием Ему благодарне: Аллилуиа.
Икос 10
Стена необоримая и Покров буди нам, Всенепорочная, сопротив ополчений видимых и невидимых враг, ограждающи нас от всяких бед и болезней. Сего ради припадающе к иконе Твоей «Прибавление ума», с верою в помощь благодатную и врачевство всем недугом душевным и телесным, радостно вопием Ти сице:
Радуйся, от путей погибельных нас удаляющая; радуйся, на всяку истину верных наставляющая.
Радуйся, духа болезни и уныния отгнание; радуйся, духа разума и крепости стяжание.
Радуйся, врагов силою Божиею посрамляющая; радуйся, советы нечестивых разоряющая.
Радуйся, беснующимся здравие подающая; радуйся, вся лютыя недуги врачующая.
Радуйся, от смерти духовныя нас избавляющая; радуйся, слезами Твоими грехи наша омывающая.
Радуйся, радостию духовною нас дивно насыщающая; радуйся, и в будущем веце вечныя радости нас сподобляющая.
Радуйся, Всемилостивая Владычице, премудрость и разум верным людем Твоим дарующая.
Кондак 11
Пение благодарственное приносим пред пречистым образом Твоим, Пренепорочная, за неизреченное Твое милосердие и молимся, о Богоблагодатная: огради ум наш и сердце от тлетворных учений, неверия и суеверия, сохрани страну нашу Российскую от всяких нестроений, врагами веры во Отечестве нашем воздвизаемых, и сподоби нас чистым сердцем славити Создателя нашего, поюще песнь: Аллилуиа.
Икос 11
Яко светоприемную свещу зрим икону Твою, Богомати, сиянием чудес землю нашу просвещающую, на путь спасения нас наставляющую и сердца наша любовию воспламеняющую к Тебе, Пречистей Матери Господа. Мы же, ведуще силу благодати Твоея, песньми радостными прославляем Тя сице:
Радуйся, премудрости Соломоновы превышшая; радуйся, сокровенныя тайны Божия верным открывающая.
Радуйся, любомудрыя немудрыя являющая; радуйся, Молние, души просвещающая.
Радуйся, суетную мудрость века сего посрамляющая; радуйся, ослепленных ею на путь правый наставляющая.
Радуйся, искренне молящимся ум обновляющая; радуйся, в час недоумения мысль благу на сердце полагающая.
Радуйся, Премудрости и благости Божия откровение; радуйся, Горняго мира Красото.
Радуйся, явившая нам дивную икону Твою, яко дар Небесный; радуйся, источниче радости непрестанныя.
Радуйся, Всемилостивая Владычице, премудрость и разум верным людем Твоим дарующая.
Кондак 12
Благодать Божественную испроси у Сына Твоего и Бога, о Всеблагая, подай нам руку помощи, да не погибнем без покаяния; согрей нас любовию Твоею, очисти умы наша от греховных помыслов, просвети сердечныя очи наша к зрению спасения и сподоби нас в жизни сей и в Царстве Небеснем воспевати Творцу и Создателю нашему: Аллилуиа.
Икос 12
Поюще чудеса, от иконы Твоея явленная, Владычице, хвалим, славим и величаем Тя, честнейшую воистину Херувим и славнейшую без сравнения Серафим. Призри с Небесе, Богородице, на предстоящия пред святою иконою Твоею и благодать Твою низпосли нам, избави от всяких бед и искушений вражиих всех воспевающих Тя, яко Заступницу и Хранительницу нашу:
Радуйся, молитвами Твоими весь мир спасающая; радуйся, нынешняго скорбнаго века утешение.
Радуйся, Мати Света, светом чистоты Твоея всех просвещающая; радуйся, воли Господни тайны нам открывающая.
Радуйся, страну Российскую в достояние Себе избравшая; радуйся, явлением чудотворных икон Твоих землю Русскую благословившая.
Радуйся, чудесы от образа Твоего к Свету Истины нас возводящая; радуйся, незримо нас благодатию осеняющая в образе Твоем.
Радуйся, радость благодатную в сердца боголюбивая изливающая; радуйся, двери милосердия Божия ходатайством Твоим отверзающая.
Радуйся, дары Духа Святаго стяжати нам помогающая; радуйся, едина Чистая и Благословенная в женах.
Радуйся, Всемилостивая Владычице, премудрость и разум верным людем Твоим дарующая.
Кондак 13
О Всепетая Мати Присносущнаго Света и Отчия Премудрости, Ты еси свет омраченных, прибавление ума и радость сердец наших; услыши и приими моление нас грешных, умудри нас неразумных и настави на пение и молитву пред иконою Твоею, «Прибавление ума» нареченную. Не престай молити о нас, недостойных рабех Твоих, славящих Тя и поющих Сыну Твоему и Богу: Аллилуиа.
Этот кондак читается трижды, затем 1-й икос «Ангел предстатель…» и 1-й кондак «Избранней от всех родов …».
Молитва
Богородице Пречистая, Доме, Егоже созда Премудрость Божия, даров духовных Подательнице, от мира к премирным ум наш возводящая и всех к познанию разума приводящая! Приими молебное пение от нас, недостойных раб Твоих, с верою и умилением покланяющихся пред пречистым образом Твоим. Умоли Сына Твоего и Бога нашего, да дарует властем нашим мудрость и силу, судиям правду и нелицеприятие, пастырем мудрость духовную, ревность и бдение о душах, наставником смиренномудрие, чадом послушание, всем же нам дух разума и благочестия, дух смирения и кротости, дух чистоты и правды. И ныне, Всепетая наша Мати, подай нам ума прибавление, умири, соедини во вражде и разделении сущия и положи им соуз любве неразрешимый, всех заблуждших от неразумия к свету истины Христовы обрати, страху Божию, воздержанию и трудолюбию настави, слово премудрости и душеполезное знание просящим даруй, осени нас вечною радостию, Херувимов честнейши и Серафимов славнейши сущая. Мы же, дивная дела и многоразумную премудрость Божию в мире и жизни нашей видяще, устранимся земныя суеты и излишних житейских попечений, и ум, сердце наше на Небеса возведем, яко да Твоим заступлением и помощию славу, хвалу, благодарение и поклонение за вся в Троице славимому Богу и всех Создателю возсылаем, ныне и присно и во веки веков. Аминь.
Тропарь, глас 4
О Преславная Мати Христа Бога нашего, благих Подателя, милостию Своею всю вселенную сохрани, даруй нам, рабом Твоим, премудрость и разум, светом Сына Твоего души наша просвети, едина Всепетая, от Херувим и Серафим славимая.
Кондак, глас 2
Яко умом Христовым нас просвещающую, хвалим Тя, Пречистая Мати Господа, всю вселенную держащаго, Красоты мира видимаго и невидимаго, лучами Жизни нас озаряющая.
Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго, яко Благ и Человеколюбец.
![Прибавление ума Прибавление ума](img_b/s099.jpg)