Шрифт

Акафисты Богородице

Акафист Пресвятой Богородице пред иконой «Единая Надежда отчаянных»

Кондак 1

Взбранной Воеводе Божией Матери и Небесной нашей Покровительнице; вси в борьбе со страстьми, похотьми и соблазанами житейскими изнемогающия, во уныние и отчаяние пришедшия и плоды благодати Святаго Духа чрезмерною печалию изсушившия, но внезапно Царицею Небесною укрепленныя, радостно взывают:

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Икос 1

Ангели удивляются, Богородице Дево, Твоей неутомимой помощи грешным людям, жаждущим спасения, но от борьбы со страстьми, похотьми и соблазнами изнемогающим, с великою любовию Ангельским языком славословят Тя, Пренепорочная:

Радуйся, святых Ангелов служити грешным людям посылающая;

радуйся, сама многажды чад Твоих немощных укрепляющая.

Радуйся, уныние от печальных сердец отгоняющая;

радуйся, ленивых и нерадивых подвизатися ради Царствия Небеснаго заставляющая.

Радуйся, закоснелым в лени и в нерадении мучитися совестию допускающая;

радуйся, во отчаяние пришедших, но Бога не разлюбивших, от окончательной гибели спасающая.

Радуйся, полчища бесовския, на них нападающия, вмиг разгоняющая;

радуйся, яко Тобою и грешныя людие исправляются.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 2

Видящи Пречистую Деву, таковую велию милость ко грешником проявляющую, и всех любящих Ея, на правом пути спасения укрепляющую, очнемся, братие, от непомерной печали и воззовем к Ней: помози нам, Царице Небесная, примири нас с Сыном Своим, укрепи нашу волю к добродетельной Богоугодной жизни, да прогнав от себя лень и нерадение, воззовем к Богу: Аллилуия.

Икос 2

Тьма греховная окружила нас и разум наш омрачается, яко своею ленью и нерадением впали мы в забвение и окамененное нечувствие, темже яко рабов своих понуждают ны демоны работати греху, понеже волею своею вдалися мы в руце их и сдружилися с обществом сатанинским, но аще и не считаем себя причастными ему, обаче и добрых дел не творим: обеты, данныя Богу, не исполняем, в разслабление греховное впадши, но, надеяся на заступление Твое и на помощь благоутробия Твоего, взываем Ти сице:

Радуйся, всем любящим Триипостасного Бога, скорая Попечительнице;

радуйся, в борьбе со страстьми изнемогающим скорая Помощнице.

Радуйся, многоглаголивых и пустословных молчати и Бога боятися научающая;

радуйся, ленивых и сонливых к бодрствованию воздвизающая.

Радуйся, омраченныя суетою и нерадением чрез печаль сердечную вразумляющая;

радуйся, не любити мира и вся , яже в мире, наставляющая.

Радуйся, прежде любити ближняго своего научающая;

радуйся, от любви к ближнему к любви Божией их приводящая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 3

Грех овладел нами и в броню нечувствия заключил сердца наша: не имамы стыда, ни покаяния, ни слез, ни страха Божия. Помрачилися грехом духовныя очи наша и не вемы, что творим: доброе или злое, утопая в бездне греховней. Но Твоими, Владычице, молитвами возбужденная совесть наша и обличает нас, и научает не имети надежды на своя немощныя силы, но в несумненной надежде на Твое всесильное заступление пред Богом вопияти Ему: Аллилуия.

Икос 3

Имущи Тебе, Великую Ходатаицу за род христианский пред возлюбленным Сыном Твоим и Богом нашим, молящую Его да не погубит за грехи наша всех, в плен бесовом впадших, но возвратит жаждущия спасения к добродетельней жизни, да укрепит их в борьбе со страстьми, похотьми и соблазнами житейскими, и мы грешныя дерзаем вознести глас к Тебе, Неискусомужняя:

Радуйся, Благодатная, день и нощь за ны, грешныя, Сына Своего умоляющая;

радуйся, яко и нас Ему молитися научающая.

Радуйся, творити волю Божию нам помогающая;

радуйся, славити Бога нас вразумляющая.

Радуйся, служити ближним, яко чадам Божиим, нам повелевающая;

радуйся, чрез любовь к ближнему любить Бога нас научающая.

Радуйся, память о ближнем с памятью Божией в нас соединяющая;

радуйся, усердная хранительнице иноков в борьбе с блудной страстию им помогающая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 4

Буря суетных помышлений и дел омрачает наш ум, яко не видети нам ниже чувствовати грехов своих, обвиняем бо ближняго своего в скорбех наших и печалех; обаче имуще надежду на Тя, и мы, побежденныя различными страстьми и похотьми, плененныя бесовскими наваждениями и страхованиями, охладевшия к молитве и доброделанию, от всего сердца не престанем просити помощи твоея, воспевая Богу: Аллилуия.

Икос 4

Слышавше, яко Сын Твой преклоняется ко всякой мольбе Твоей за ны, грешныя, ихже Ты, Всемилостивая, желаеши спасти, молим Тя: да укрепит Господь и нас по молитве твоей паки творити волю Божию, а не волю бесовскую, да поможет нам приклонити волю свою искренне работати Триипостасному Богу, да Тебе с любовию зовем:

Радуйся, наша истинная Ходатаице и Заступнице;

радуйся, яко Сын Твой Тебя ради нас милует.

Радуйся, яко без Тебе никто же может спастися;

радуйся, яко Ты еси Единая Лествице от земли на небо.

Радуйся, яко Ты еси Единая наша верная и надежная Путеводительнице в Царство Небесное;

радуйся, яко чрез Тебе падшия людие возвращаются в Рай.

Радуйся, рождшая нам спасителя душ наших;

радуйся, укрепляющая нас в напастех от враг видимых и невидимых.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 5

Своим целомудрием и смиренномудрием, Пречистая, превзошедши вся земнородныя, удостоилася еси дати свою пречистую кровь на соткание плоти Сыну Божию, но аще и почитаема еси Ангельскими чинами и сонмом святых Царицею Неба и земли, обаче не оставляеши и нас, грешных, но присно молиши возлюбленнаго Сына Твоего, да причислит ны Своему избранному стаду, и Сама неустанно помогаеши всем право верующим во Христа и поющим Ему: Аллилуия.

Икос 5

Ведуще велию милость Божию к почитающим Его, даровавшего нам Тебе, Заступницу рода христианскаго, да ни един истинно верующий во Христа не погибнет, аще прибегнет к Тебе, Божией Матери, за помощию и утешением, со благодарением во умиленном сердце зовем Ти:

Радуйся, единое наше в скорбех утешение;

радуйся, единое наше тайное вразумление.

Радуйся, ума нашего просвещение;

радуйся, душ и телес наших исцеление.

Радуйся, наше с Богом примирение;

радуйся, в Царство Небесное наше возведение.

радуйся, мудрая Украсительнице душ святых;

радуйся, единая Помощнице во благих начинаниях наших.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 6

Проповедницы истинии явилися святии Апостоли, слышавше от Тебе, Богородительнице: «Аз есмь с вами до скончания века!» Не остави и нас, аще и просвещенных учением святых Апостолов, обаче по множеству грехов во уныние и отчаяние впадших; помози нам, Владычице, уклонятися от всего злаго и богопротивнаго, яко не имамы сил отстати от своих греховных привычек, и всем сердцем, и всею волею служити Богу, не можем паки духовныма очима воззрети горе, но пораженныя безволием и унынием молим Тя о помощи, Всепетая, с жалобным стоном взывая к Богу: Аллилуия.

Икос 6

Показала еси нам Свет истинный – Христа Бога нашего, пренепорочная Богородительнице, яко Ты еси небесныя врата, имиже на землю сниде Сын Божий, да Тобою возведется род христианский в Царство Небесное. Мы же, надеяся на помощь Твою, молим Тя: не остави нас, волею разслабленных и безпомощных, утративших надежду на спасение; но помози нам и научи, Премилосердная, исправити греховное свое житие, дабы усердно благоугождая Богу, возмогли мы воспевати Тебе сицевая:

Радуйся, Пренепорочная, плотию Спаса и Бога нам рождшая;

радуйся, Препрославленная, яко сыном Твоим, Богочеловеком, грехи нам прощаются.

Радуйся, яко Твоим ходатайством людие покаянием на место ангелов падших возводятся;

Радуйся, яко любовию Твоею мы, мертвыя духом, оживотворяемся.

Радуйся, яко Тобою от сна греховнаго просыпаемся;

радуйся, яко Тобою совесть наша очищается.

Радуйся, яко Тобою бодрость духовная в нас появляется;

радуйся, яко Тобою ум наш просвещается.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 7

Вемы, яко Ты еси воистину Помощнице всем, усердно борющимися со страстьми, похотьми и соблазнами, в смирении претерпевающим вси скорби житейския: лишения и притеснения от злых людей и бесов. Темже и мы, аще по немощи человечестей и впадаем во грехи, но надеяся на Твое заступление и помощь, Царице Небесная, усердно взываем Богу: Аллилуия.

Икос 7

Новую показал еси нам милость Свою Творец явлением чудотворныя Твоея иконы, нареченныя «Единая Надеждо отчаянных». Мы же, грехми благодать потерявшия, темже во уныние и отчаяние пришедшия, видяще яко с верою приходящия к ней получают помощь и скорое исцеление, воспеваем Ти сицевая:

Радуйся, благая Целительнице болезней душевных и телесных;

радуйся, во всех скорбных обстояниих наше истинное увеселение.

Радуйся, яко Тобою ожесточенныя и озлобленныя сердцем смягчаются;

радуйся, яко Тобою ненавистницы любовию обогощаются.

Радуйся, яко Тобою нетерпеливыя терпети научаются;

радуйся, яко Тобою завистливыя доброжелательными бывают.

Радуйся, яко Тобою сребролюбцы нестяжательными и щедродательными становятся;

радуйся, яко тобою пианицы и табакокуры от гнусных страстей избавляются.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 8

Странное чудо явил еси нам Творец, даровавый Тебе, о Богомати, великую Помощницу всем, потерявшим надежду на исправление греховныя жизни. Мы же, поработившеся злым своим обычаям, не имамы сил преискренне служити Богу и туком Божественныя Его сладости духовно насыщатися, темже паче во уныние и отчаяние пришедше, со слезами припадаем к Тебе, Пренепорочная, да умолиши Сына Твоего за ны, вопиющия к Богу: Аллилуия.

Икос 8

Вси заблуждшия в сей привременней жизни, соблазнами мира сего уловленныя и духовныя своя очи тем помрачившия, не имущи в сем мори житейстем ни кормчего, ни учителя, не ведают, како устроити житие свое во еже спастися: кое правило исполняти, кое имети поведение, дабы Богу угодити и нечестивыя не раздражати до зела, да не яко дивии вепри нападут на ны и растерзают прежде времени, к Тебе, истинней Путеводительнице, в надежде на помощь прибегают, глаголя:

Радуйся, о быстротечности жизни сей нас помнить научающая;

радуйся, просящим помощи Твоея, жизненный крест нести помогающая.

Радуйся, тленное богатство призрети вразумляющая;

радуйся, нетленное сокровище на небеси приобретати повелевающая.

Радуйся, благодать душам нашим возвращающая;

радуйся, возбудитися от сна нашей совести и помятование сохранити о Боге нам помогающая.

Радуйся, Богоугодно молитися нас научающая;

радуйся, непрестанно за ны молитвы к Богу возносящая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 9

Всякое естество Ангельское удивляется Твоему милосердию ко грешному роду человеческому, погибающему в тине страстей, похотей и соблазнов, яко Ты, болезнуя о нас, не на небесех пребываеши в наслаждении духовных благ, но неустанно на земли труждаешися, спасая души наша, аще искаженныя грехом, но в надежде на милосердие Божие вопиющия Ему: Аллилуия.

Икос 9

Ветия многовещанныя не могут достойно глаголати о велией Твоей помощи всем, с верою к Тебе и Сыну Твоему прибегающим, в борьбе со своею плотию, соблазнами мира и духами злобы поднебесными изнемогающим, но надежду имущим на Тя и поющим Тебе сицевая:

Радуйся, Свет людем во мраке греховнем возжигающая;

радуйся, яко Тобою духовныма очима зрети горе научаемся.

Радуйся, Премилосердная Мати всех сирот;

радуйся, Попечительнице вдовам честным.

Радуйся, Наставнице богобоязненных пустынножителей;

радуйся, благочестивых мирян вразумление.

Радуйся, на боголюбивыя с любовию взирающая;

радуйся, нетленное богатство собирати им помогающая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 10

Всех хощеши спасти, аще кто искренне желает спасения, но и оных, забывших Бога и похотьми плотскими уловленных, призываеши болезньми и скорбьми к покаянию, сновидениями и знамениями их вразумляющи, да очнувшеся от сна греховнаго в покаянии слезном воззовут к Богу своему: Аллилуия.

Икос 10

Стена еси Ты, Богородице Дево, всем, хотящим спасения, за неюже безопасно сохраняемся от стрел врагов видимых и невидимых, сего ради на всяком месте и во всякое время сего краткаго жития нашего, с любовию чтуще Тя, от всея души воспеваем Тебе сицевая:

Радуйся, мир и спокойствие нам дарующая;

радуйся, Божественною радостию души наша напояющая.

Радуйся, долготерпению нас научающая;

радуйся, благочестием сердца наша исполняющая.

Радуйся, милосердие в нас утверждающая;

радуйся, веру в нас укрепляющая.

Радуйся, кротости нас научающая;

радуйся, воздержание в нас утверждающая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 11

Пение всякое земнородных не может достойно прославити твое, Царице Небесная, милосердие к роду христианскому, яко Ты, Всеблагая, не токмо жаждущим спасения, но и тем, кто потерял надежду на него, яко не в силах победити привычки своя греховныя, в великом томлении духа, унынии, отчаянии, омрачении ума, в ожесточении и окаменении сердечнем пребывающим, но Христа не отвергшимся, великое являеши вспоможение, со стоном сердечным взывающим к Тебе и Сыну Твоему: Аллилуия.

Икос 11

Светоподательнице явилася еси Ты во тьме греховней блуждающим, да вси, иже из мрака греховнаго к свету выйти искренне желают, Тобою просвещении, возмогли бы неуклонно шествовати путем спасения, взирающе непрестанно духовныма очима горе и в радости поюще таковая:

Радуйся, яко тщеславным и гордым духовно ослепнути попущающая;

радуйся, таковых временно ослепших верная Хранительнице.

Радуйся, по испытании их вновь просвещающая;

радуйся, искренним покаянием от тщеславияи гордости их избавляющая.

Радуйся, яко и смиренным ослепнути, да не возгордятся, попущающая;

радуйся, хотящих зрячими быти по мере их смирения и подвигов исцеляющая.

Радуйся, ревность к подвигом в них распаляющая;

радуйся, непрестанно молитися их научающая.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 12

Имаши власть от Бога вновь подавати нам благодать Сына Твоего, Владычице, юже мы в крещении получивше, утратили по множеству грехов своих, забывше обеты, нами Богу данныя, темже и ризу непорочности своея запятнав, нечуствием и омрачением одержимыя, токмо в Тебе, Всемилостивая, имамы неусыпную ходатаицу за род наш, заступающую всех, во отчаянии взывающих к Богу: Аллилуия.

Икос 12

Поюще Чистейшую всех земнородных, Еяже смирение и непорочность соделали Ю достойным сосудом Духа Святаго и Материю Сына Божия, облеченную пресвятою Троицею в славу Царицы неба и земли, мы, падшия и обремененныя грехми многими, не умея достойно восхвалити Тя, грешными устнами дерзаем воспевати Тебе сицевая:

Радуйся, Кротосте, паче всякия кротости;

радуйся, мудростию Своею всех мудрых превосходящая.

Радуйся, Игумения, всех ко спасению направляющая;

радуйся, благоговейным пастырем стадо свое пасти помогающая.

Радуйся, духовным отцем грехопадения чад их, ко исправлению тех, открывающая;

радуйся, чадам молитвами отцев их духовных милость Свою дарующая.

радуйся, духовных отцев своих почитати с благоговением повелевающая;

радуйся, Сама истинная Наставнице неимущим на земли духовных отцев и матерей.

Радуйся, Премилосердная Богородице Дево, Единая Надеждо отчаянных, в борьбе со страстьми изнемогающих.

Кондак 13

О, Премилосердная Богородице Дево! Пришедшим в безчувствие от лени, уныния и нерадения, всем отчаянным и надежду на исправление своей греховной жизни потерявшим, подаждь нечаянную радость духовную, и от окончательней погибели всех нас сохрани, наставляющи на путь спасения, да восчувствовав силу и крепость, Тобою Сыном Твоим нам дарованную, с радостию вопием всех благ Подателю Богу: Аллилуия.

(Сей кондак читаем трижды и вновь икос 1 и кондак 1)

Молитва

О, пречистая Владычице Богородице! К тебе, изнемогающие от уныния и разслабления, и своею совестию обличаемыя, с сердцем сокрушенном припадаем и со умилением вопием Ти: не отступи от нас, многогрешных, зряще безчисленныя грехопадения наша, имиже преогорчихом Триипостаснаго Бога и тебе, Царице Небесная.

Избави нас, о Заступнице наша, от привычек греховных и плена страстей, имиже пленили враги волю нашу, связали ю крепкими путами, понуждая нас работати греху. Множицею преступили мы своим хотением заповеди Творца своего, темже и лишилися за грехи наша благодати Сына Твоего, еюже защищает Бог любящих Его от сетей лукаваго. Не имамы, Владычице, сил разрешитися от вервия сего бесовскаго, изнемогла бо воля наша без благодати Сына Твоего и ведомы есмы аможе не хощем, и якоже рабов своих понуждает ны враг работати ему.

Не остави нас, Всемилостивая, без Твоея помощи, яко не имамы иныя надежды токмо Тебе, Пренепорочная. Аще не умолиши Сына Твоего помиловати ны, вси погибнем во гресех наших. Изведи нас от рабства сего греховнаго, буди нам Свободительница и уз бесовских Решительница, просвети ум наш, да память имамы, якоже вся, яже суть на земли, прах и пепел есть, наипаче бренная плоть наша, ейже, яко идолу, понуждает ны служити враг.

Пробуди, Владычице, к покаянию уснувшую совесть нашу, опали ю страхом предлежащего Страшнаго Судилища Божия, идеже ответ имамы дати о всех делех и словесех, и помышлениих наших. Разжзи души наша огнем ревности по Бозе, егоже в началех возжег в нас Бог. Мы же дар сей не соблюдохом и нерадением своим погубихом; ныне же, яко пять дев юродивых сидим во тьме, не имущи что возжещи в сретение Жениха Христа.

О, Матерь Света, Царице Небесная, Надеждо отчаянных и обремененных грехми многими, ниспошли нам помощь от Сына Твоего и Бога нашего, умоли Сладчайшего Господа Иисуса Христа, да не прогневается на ны зело, но возведет ны от рабства греховнаго, да укрепит волю нашу благодатию Своею, яко избавльшеся Твоим заступлением от сети вражия, прославим в Троице славимаго Бога, Отца и Сына и Святаго Духа во веки веков. Аминь.