Акафисты Богородице
Акафист Пресвятой Богородице пред иконой «Боянская»
![Боянская Боянская](img_i/s013.jpg)
Молитвы предначинательные
Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.
Сла́ва Тебе́, Бо́же наш, сла́ва Тебе́.
Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.
Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.
Го́споди, поми́луй, трижды.
Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.
О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.
Го́споди, поми́луй, 12,
Прииди́те, поклони́мся Царе́ви на́шему Бо́гу.
Прииди́те, поклони́мся и припаде́м Христу́, Царе́ви на́шему Бо́гу.
Прииди́те, поклони́мся и припаде́м Самому́ Христу́, Царе́ви и Бо́гу на́шему.
Псалом 50:
Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.
Кондак 1
Взбранной Воеводе и усердной Заступнице рода христианскаго, похвальная пения приносим о явлении Ея иконы. Сия бо слезы источает и сими всяку слезу от очес страждущих и притекающих к Ней отирает, да во умилении присно зовем Ей:
Радуйся, Богородице Дево, слезящая о гресех наших.
Икос 1
Архангел Гавриил вещаше Тебе, Дево, радуйся, и мы, грешнии, сице Тебе вопием, яко благоизволила еси явити чудотворный Твой образ, в земли Боянстей чудесне просиявший, злобу всякую и неверие человеков посрамивший и научивший всех звати Ти сицевая:
Радуйся, Преблагая Заступнице рода христианскаго;
Радуйся, преизящнейшая Наставнице наша;
Радуйся, Преблагословенная, Господь с Тобою;
Радуйся, Препрославленная Царице неба и земли;
Радуйся, яко Тобою Ангели удивляются;
Радуйся, яко Тобою вси человецы хвалятся;
Радуйся, Богородице Дево, слезящая о гресех наших.
Кондак 2
Видя, яко мы грешнии в беззакония погружаемся, Ты, Пречистая, благоволила еси слезы источати из Богоматерних очес Твоих, показующи сим великую любовь Твою к нам и милосердие. Священницы же и людие, видяще в церкви плачущую Твою икону, со страхом и любовию воззваша Богу: Аллилуиа.
Икос 2
Разум неуразуменный о явлении слезящия Твоея иконы уразумети ищуще, архиереи притекоша в храм Твой, Владычице, и со страхом испытавше вся, яже от Тебе бывшая, со всеми верными воспеша благодарственную песнь Тебе, глаголюще:
Радуйся, похваление наше в земнем странствии;
Радуйся, Прелюбимая наша Заступнице;
Радуйся, породившая нам Царя Славы, Христа;
Радуйся, пречудно к небесному Свету нас приводящая;
Радуйся, Стамно, Небесную Манну вместившая;
Радуйся, Царице, ризами златыми одеянная;
Радуйся, Богородице Дево, слезящая о гресех наших.
Кондак 3
Силою свыше укрепляеши нас, Богомати, и слезми Твоими исцеляеши души наша и телеса, исхищающи от мрака неверия, ересей и расколов, да, избавльшеся от заблуждения, прославим чудеса Твоя и из глубины души воскликнем Богу: Аллилуиа.
Икос 3
Имеющи попечение о людех земли Буковинския, благоволила еси явити чудотворную Твою икону, призывающую нас к слезному покаянию о гресех наших, да теплою верою и любовию к Тебе, Благословенней, воспеваем тако:
Радуйся, Жезле Ааронов прозябший;
Радуйся, неиссякаемый источник чудес;
Радуйся, неописуемое попечение о человецех;
Радуйся, слез Евиных избавление;
Радуйся, всемощный Покрове в бедах сущих;
Радуйся, скорая Заступнице уничиженных;
Радуйся, Богородице Дево, слезящая о гресех наших.
Кондак 4
Буря ересей и расколов обуревает нашу землю, но Ты, Пречистая, ведущи немощи наша, и всегда готова сущи на помощь и заступление, явила еси нам икону Твою плачущую и чудотворящую, укрепляющи нас в православнем стоянии и воздвизающи пети Богу: Аллилуиа.
Икос 4
Услышавше о плачущей иконе Твоей, Богородице, православнии людие из многих градов и весей стекошася, да видят чудо сие явленное. Ты же, Пресвятая, простерла еси к людем Своя милости, подающи обильная исцеления различных недугов и научающи всех пети Тебе таковая:
Радуйся, всегдашняя Утешительнице наша;
Радуйся, утоление печали;
Радуйся, всех скорбящих Радосте;
Радуйся, обидимых Заступнице;
Радуйся, Херувимов честнейшая;
Радуйся, Серафимов славнейшая;
Радуйся, Богородице Дево, слезящая о гресех наших.
Кондак 5
Боготечней звезде, целебныя лучи испущающей, уподобилася святая икона Твоя, Богомати, егда отрока, благоговейно облобызавшаго Твою икону, от неисцельныя язвы чудесно исцелила еси. Родители же сего и людие, уведевше бывшее, со слезами благодаряху Тя и воспеваху Богу: Аллилуиа.
Икос 5
Видяще слезы, от иконы Твоея, Пречистая, во время Божественныя Литургии истекшия, дети, притекшия из страны далече в храм Твой, удивишася. Ты же, Пресвятая, отгоняющи от душ их всякое сомнение, научила еси с верою и любовию пети Тебе сицевая:
Радуйся, Пророков Исполнение;
Радуйся, Святителей чудесная похвало;
Радуйся, Преподобных венче неизменный;
Радуйся, Мучеников всегдашнее укрепление;
Радуйся, святых жен Образе неизреченный;
Радуйся, Праведных всех непременное упование;
Радуйся, Богородице Дево, слезящая о гресех наших.
Кондак 6
Проповедницы Твоея милости явишася людие, страждущии от различных болезней и обретшия исцеления душевных и телесных недугов у святыя Твоея иконы. Мы же, дивящеся таковому о нас попечению, со всеми верными вопием Богу: Аллилуиа.
Икос 6
Молитвы, приносимыя у святыя иконы Твоея, услышавши, Пресвятая Дево, жену некую исцелила еси от тяжкаго недуга, укрепляющи сим не токмо ея, но и нашу веру во всемощную Твою помощь всем призывающим имя Твое и вопиющим Тебе тако:
Радуйся, благая Питательнице младенцев;
Радуйся, предивная Покровительнице юных;
Радуйся, Жезле утешения старости;
Радуйся, непостыдная Надеждо в смерти нашей;
Радуйся, Заступнице наша на судищи Христове;
Радуйся, яко молитвами Твоими от ада грешных исхищаеши;
Радуйся, Богородице Дево, слезящая о гресех наших.
Кондак 7
Хотя даровати милости Своя людем Всещедрый Господь, благоволи явити икону Твою, Пречистая, поражая сим, аки некиими стрелы духовными, всякое плотское мудрование в человецех и показуя, яко едина есть истинная вера, вера православная, научающая всех спасительно пети Богу: Аллилуиа.
Икос 7
Новое чудо сотвори Господь явлением иконы Божия Матере в Боянах, сия бо во удивление и вразумление многих чудесно слезы источает из очес Богоматере и Богомладенца Христа, подающи с ними надежду на спасение всем вопиющим к Ней таковая:
Радуйся, небурное Пристанище в мори плавающим;
Радуйся, непостыдная Надеждо по воздуху путешествующим;
Радуйся, всемощное укрепление наше в земнем странствии;
Радуйся, наша присная и вожделенная Похвало;
Радуйся, крепчайшая Заступнице воюющих на плоть свою;
Радуйся, Щите, ограждающий нас от духов злобы;
Радуйся, Богородице Дево, слезящая о гресех наших.
Кондак 8
Странное чудо явися, Пресвятая Владычице, егда, по молитвам родительницы пред иконою Твоею, младенец скончаваяся, возвратися к жизни. Видящии же сия утвердишася в вере и надежде на Твою помощь и воспеша Всесильному Богу: Аллилуиа.
Икос 8
Весь мир величает Тя, яко Всемощную Покровительницу нашу, ибо молитвами Твоими ныне, якоже древле в Кане Галилейстей, чудеса совершаются, скиптры царстии утверждаются и прогоняются полцы врагов видимых и невидимых от всех вопиющих Ти:
Радуйся, ограждение наше от соблазнов мира;
Радуйся, предивный человеков Покрове;
Радуйся, яко мы, грешнии, Тя верно ублажаем;
Радуйся, яко пред Тобою смиренно колена душ и телес приклоняем;
Радуйся, яко слезы Твоя укрепляют веру Православную;
Радуйся, яко сими умягчаеши наша злая сердца;
Радуйся, Богородице Дево, слезящая о гресех наших.
Кондак 9
Всякое естество Ангельское удивися, егда в Рождестве девство сохранила еси, Богородице. И ныне Твоими слезами люди во удивление привела еси, призывающи к целомудрию и благочестивому житию, да чистыми душами и телесы возсылаем песнь Богу: Аллилуиа.
Икос 9
Витии многовещаннии не возмогоша исчислити множество чудес Твоих, Богомати, имиже любовь Твою к людем являеши. Мы же ублажаем Тя, яко призрела еси нас, удалившихся от своего Творца и ныне прибегающих к Твоему Покрову и вопиющих:
Радуйся, плачем твоим нас утешающая;
Радуйся, всесильную десницу Твою к нам простирающая;
Радуйся, Кораблю хотящих спастися;
Радуйся, небурное наше Благоотишие;
Радуйся, верных Венче благознаменитый;
Радуйся, горних чинов Украшение;
Радуйся, Богородице Дево, слезящая о гресех наших.
Кондак 10
Спасти хотя мир, милосердый Господь, дарова людем согрешившим великую Заступницу и Ходатаицу, Пречистую Матерь Свою, да вси, хотящии наследовати спасение, прибегают к Ней во умилении сердца, вопиюще Богу: Аллилуиа.
Икос 10
Стена еси, Дево, всем от духов злобы страждущим, прогоняющи их далече от призывающих имя Твое. Сего ради мы, боримии от мира, плоти и диавола, смиренно молим Тя и пред Твоим пречистым образом взываем сице:
Радуйся, непременная Устроительнице нашего спасения;
Радуйся, Путеводительнице наша;
Радуйся, дивно приводящая грешников к покаянию;
Радуйся, Радосте наша;
Радуйся, с пречистою Плотию Твоею на небеса вознесенная;
Радуйся, славо наша и величание;
Радуйся, Богородице Дево, слезящая о гресех наших.
Кондак 11
Пение благодарственное приносим Ти, Пречистая, яко честнейшей Херувимов и славнейшей без сравнения Серафимов, и уповая на Тя не убоимся, егда подвижется земля и преложатся горы в сердца морская, чада Твоя бо есмы, у Креста Тебе врученнии Твоим Сыном и Богом нашим, Емуже вопием: Аллилуиа.
Икос 11
Светоприемная свеща и Луна всесовершенная являешися человеком, Небесная Дево, в нощи бо греховней блуждающих нас просвещаеши, облистающи светом, от вечнаго Солнца Правды исходящим, и научаеши пети Тебе таковая:
Радуйся, в Рождестве девство сохранившая;
Радуйся, по Рождестве Дева пребывшая;
Радуйся, во Успении Твоем нас не оставляющая;
Радуйся, мира Благая Заступнице;
Радуйся, Земле обетования;
Радуйся, яко источаеши нам мед и млеко;
Радуйся, Богородице Дево, слезящая о гресех наших.
Кондак 12
Благодатный Покров и Защищение вемы Тя, Владычице мира, яко чрез икону Твою слезящую охраняеши от всяческих ересей и расколов, воздвизаемых духом злобы поднебесныя. Сподоби нас до скончания века пребыти во Святей Церкви Православней и воспевати Богу: Аллилуиа.
Икос 12
Воспевающи милости и чудеса Твоя, молимся Тебе, Царице Небесе и земли, даровавшей нам в Твоей святей иконе надежду спасения и твердое уверение в истинности веры православныя и, якоже древле Архангел, и мы Тебе вопием:
Радуйся, в мире премирная нам являющая;
Радуйся, девство и Рождество сочетавшая;
Радуйся, мудрецов мира сего посрамление;
Радуйся, чистоты и целомудрия возвышение;
Радуйся, немолчная Уста славы Божия;
Радуйся, всем сердцем и душею любити Бога нас научающая;
Радуйся, Богородице Дево, слезящая о гресех наших.
Кондак 13
О, всепетая Мати, Владычице наша Богородице, приими сия похвалы и молитвы от нечитых устен наших. Сохрани Церковь и люди наша от всяких нужд и напастей, и сподоби нас в единстве духа и союзе мира присно Тя славити и воспевати Богу: Аллилуиа.
(Сей кондак читается трижды, затем икос 1 и кондак 1)
МОЛИТВА
О, Преблагословенная Владычице Богородице, милости и благосердия неисчерпаемая бездно и любве Божия присноживотный Источниче! Предстояще пред святою Твоею иконою, юже в земли нашей чудно явити благоволила еси, и созерцающе очами веры и смирения слезы милости Твоея, от чудотворнаго образа Твоего обильно источаемыя, яко раби непотребнии со умилением молим Тя: открый покаянием ко Господу помраченная сердца наша и сокрушенный дух наш паки созижди целомудрием; оживотвори любовию Божественнаго Сына Твоего вся наша помыслы, чувствия и начинания; страхом Господним укрепи расслабленную страстьми волю нашу; помози в терпении принести благословенныя плоды милосердия и братолюбия; да чистым сердцем и искреннею душею в любви Божией возрастающе, прочее время живота нашего в мире поживем, прославляюще в Троице Единаго Бога Отца и Сына и Святаго Духа, и Твое всемилостивое предстательство, ныне и присно и во веки веков. Аминь.
Окончание
По прочтении канона и молитвы, чти:
Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.
Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:
Го́споди, поми́луй, трижды.
И отпуст.
Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших и всех святы́х, спаси́ и помилуй мя, гре́шнаго, яко Благ и Человеколюбец.
![Боянская Боянская](img_b/s013.jpg)